Wɔ 2 Kɔlentema 12:2, 3, Pɔɔlo hanle nrenyia bie mɔɔ bɛvale ye “bɛhɔle anwuma mɔɔ tɔ zo nsa” la anwo edwɛkɛ. Nrenyia zɔhane a le nwane? Pɔɔlo zile zo wɔ ngɛlata mɔɔ ɔhɛlɛle Kɔlente asafo ne la anu kɛ, Nyamenle ɛlɛfa ye ali gyima kɛ ɛzoanvolɛ. (2 Kɔl. 11:5, 23) Akee ɔhanle “Awulae ɛnyelɛzodeɛnwunlɛ nee ye yekile” nwo edwɛkɛ. Pɔɔlo ambɔ adiema biala duma wɔ edwɛkɛ ɛhye anu. Ɔti, yɛbahola yɛaha kɛ ɔdaye a ɔle nrenyia ne mɔɔ nyianle ɛnyelɛzodeɛnwunlɛ nee yekile ne la.​—2 Kɔl. 12:1, 5.

Ɔti, Pɔɔlo a le ahenle mɔɔ bɛvale ye “bɛhɔle anwuma mɔɔ tɔ zo nsa” yɛɛ “paladaese” la. (2 Kɔl. 12:2-4) Ɔvale edwɛkɛkpɔkɛ “yekile” mɔɔ kile mɔɔ bazi kenle bie mɔɔ bɛda ye ali la ɔlile gyima.

Duzu a le “anwuma mɔɔ tɔ zo nsa” mɔɔ Pɔɔlo nwunle ye la?

Wɔ Baebolo ne anu, bɛkola bɛfa “anwuma” bɛgyinla ɛkɛ bɛmaa anwuma mɔɔ yɛ nye dua ye la. (Mɔl. 11:4; 27:28; Mat. 6:26) Noko eza bɛfa “anwuma” bɛdi gyima wɔ adenle fofolɛ zo. Ɔdwu mekɛ ne bie a, ɔkola ɔgyinla ɛkɛ ɔmaa sonla tumililɛ. (Dan. 4:20-22) Anzɛɛ Nyamenle tumililɛ, kɛ neazo la, Nyamenle Belemgbunlililɛ ne.​—Yek. 21:1.

Pɔɔlo nwunle “anwuma mɔɔ tɔ zo nsa.” Boni a ɛhye kile a? Ɔyɛ a Baebolo ne si edwɛkɛ zo fane nsa fa kile kɛzi nwolɛ hyia anzɛɛ tumi mɔɔ wɔ nu la. (Aye. 6:3; Yiz. 21:27; Yek. 4:8) Ɔbayɛ kɛ, mɔɔ Pɔɔlo hanle “anwuma mɔɔ tɔ zo nsa” anwo edwɛkɛ la, ɛnee ɔlɛtwe adwenle yeahɔ tumililɛ mɔɔ kpogya na ɔlɛ tumi kpole​—Mɛzaya Belemgbunlililɛ ne mɔɔ wɔ Gyisɛse Kelaese asa nu mɔɔ menli 144,000 ne nee ye bali tumi wɔ nu la azo. (Nea Insight on the Scriptures, Vol. 1, m. 1059, 1062.) Kɛ mɔɔ ɛzoanvolɛ Pita hɛlɛle la, yɛlɛkendɛ “anwuma fofolɛ” ne, kɛ mɔɔ Nyamenle ɛwɔkɛ ne kile la.​—2 Pita 3:13.

Na “paladaese” ne mɔɔ Pɔɔlo hanle nwolɛ edwɛkɛ la noko ɛ?

Edwɛkɛkpɔkɛ “paladaese” bahola ahile ninyɛne dɔɔnwo: (1) “Paladaese” ne bahola agyinla ɛkɛ ne amaa Paladaese ne mɔɔ yɛ nye la ye ade kɛ ɔbara azɛlɛ ye azo la. (2) Ɔbahola yeahile sunsum nu tɛnlabelɛ mɔɔ Nyamenle menli bahɔ nu wɔ ewiade fofolɛ ne anu la. (3) Ɔbahola yeahile tɛnlabelɛ mɔɔ yɛ nwanwane mɔɔ wɔ anwuma mɔɔ bɛha nwolɛ edwɛkɛ wɔ Yekile 2:7 kɛ, “Nyamenle paladaese ne” la.​—Nea July 15, 2015 Ɛzinzalɛ Arane ne, m. 5. ɛden. 8.

Ɔbayɛ kɛ ɛnee ɛzoanvolɛ Pɔɔlo ɛlɛka ninyɛne nsa ɛhye mɔ amuala anwo edwɛkɛ wɔ 2 Kɔlentema 12:4 wɔ mekɛ mɔɔ ɔka ye anwubielɛ ne la.

Saa yɛpɛ ye sikalɛ a:

Ɔbayɛ kɛ “anwuma mɔɔ tɔ zo nsa” mɔɔ 2 Kɔlentema 12:2 ka nwolɛ edwɛkɛ la a le Mɛzaya Belemgbunlililɛ ne mɔɔ wɔ Gyisɛse Kelaese asa nu mɔɔ menli 144,000 ne nee ye bali tumi wɔ “anwuma fofolɛ” ne anu la.​—2 Pita 3:13.

Ɔle “anwuma mɔɔ tɔ zo nsa” ɔluakɛ Belemgbunlililɛ ne le tumililɛ mɔɔ kpogya na ɔlɛ tumi kpole.

Bie a “paladaese” ne mɔɔ “bɛvale” Pɔɔlo bɛhɔle nu la le (1) Paladaese ne mɔɔ yɛlɛkendɛ kɛ ɔbara azɛlɛ ye azo la, (2) sunsum nu tɛnlabelɛ mɔɔ bara wɔ zɔhane mekɛ ne la, ɔbayɛ kpole yeadɛla sunsum nu paladaese ne mɔɔ wɔ ɛkɛ ne ɛnɛ la, yɛɛ (3) “Nyamenle paladaese” ne mɔɔ wɔ anwuma mɔɔ ɔ nee ewiade fofolɛ ne badɛnla ɛkɛ ne wɔ mekɛ ko anu la.

Kɛ mɔɔ yɛnwu ye la, anwuma fofolɛ ne nee azɛlɛ fofolɛ ne a babɔ nu ayɛ ewiade fofolɛ ne a. Ɔbayɛ ngyehyɛleɛ fofolɛ, na anwuma arane mɔɔ le Belemgbunlililɛ ne la nee alesama babɔ nu azonle Gyihova wɔ paladaese azɛlɛ ne azo.