Kyɛkyɛ, edwɛkɛ biala ɛnle Baebolo ne anzɛɛ tetedwɛkɛ nu mɔɔ kile kɛ bɛyɛle debie zɛhae a.

Kɛzi bɛhile ngyɛnu ɛhye abo wɔ Baebolo bie mɔ anu la maa menli bie mɔ suzu kɛ menli gyinlanle mowuamra agyakɛ anu maanle bɛzɔnenle bɛ wɔ alimoa Kilisienema mekɛ zo. Kɛ neazo la, Baebolo bie mɔ ka kɛ: “Bɛndwazo mɔwuamra bɛmba ngoane nu a, ɛnee bɛdabɛ mɔɔ bɛgyinla mɔwuamra agyakɛ anu bɛmaa bɛzɔne bɛ la, duzu a bɛ nye la zolɛ a?”​—Baebolo.

Noko edwɛkɛ mɔɔ Baebolo nwo mbɔlɔba nwiɔ bie ɛha la ɛne. Abɔlɔba bie mɔɔ bɛfɛlɛ ye Dr. Gregory Lockwood la hanle kɛ, edwɛkɛ biala ɛnle Baebolo ne anzɛɛ tetedwɛkɛ nu mɔɔ di daselɛ kɛ “awie gyinlanle awie mɔɔ ɛwu la agyakɛ anu ɔmaanle bɛzɔnenle ye a.” Zɔhane ala a Nwomanli Gordon D. Fee hɛlɛle kɛ: “Yɛnlɛ ɛzɔnenlɛ zɛhae bie anwo kɛlɛtokɛ wɔ tetedwɛkɛ anzɛɛ Baebolo ne anu. N[ew] T[estament] ne ɛnga ɛhye anwo edwɛkɛ; yɛɛ daselɛ biala ɛnle ɛkɛ mɔɔ kile kɛ alimoa Kilisienema anzɛɛ asɔne mɔɔ rale amozi la yɛle debie zɛhae bie a.”

Baebolo ne ka kɛ, ɔwɔ kɛ Gyisɛse ɛdoavolɛma ‘yɛ maanle maanle kɔsɔɔti anu menli ye ɛdoavolɛma, bɛsɔne bɛ, bɛkilehile bɛ bɛmaa bɛdi ninyɛne kɔsɔɔti mɔɔ yeha yehile bɛ la azo.’ (Mat. 28:19, 20) Kolaa na bɛazɔne awie kɛ Gyisɛse ɛdoavolɛ la, ɔwɔ kɛ ɔsukoa Gyihova nee Ɔ Ra ne anwo debie, ɔdie bɛ ɔdi na ɔtie bɛ. Awie mɔɔ ɛwu dɛbadɛba na bɛzie ye la ɛnrɛhola ɛnrɛyɛ zɔ; yɛɛ Kilisienenli mɔɔ de ngoane nu la ɛnrɛhola ɛnrɛyɛ zɔ ɛnrɛmaa ye.​—Nol. 9:5, 10; Dwɔn 4:1; 1 Kɔl. 1:14-16.

Ɔti duzu a ɛnee Pɔɔlo ɛlɛkile a?

Ɛnee Kilisienema bie mɔ ɛnlie ɛnli kɛ bɛbadwazo mowuamra. (1 Kɔl. 15:12) Pɔɔlo bɔle bɛ nzuzulɛ ne guale. Ɔhanle ye wienyi kɛ ‘dahuu ɔ nee ewule yia.’ Nɔhalɛ ne a le kɛ, ɛnee ɔtɛte ngoane nu. Noko ɔnva nwo esiane ɛhye mɔ mɔɔ ɔyiale la, ɛnee ɔlɛ anwodozo kɛ saa ɔwu a bɛbadwazo ye kɛ sunsum nu abɔdeɛ mɔɔ lɛ tumi kɛ Gyisɛse la.​—1 Kɔl. 15:30-32, 42-44.

Ɛnee ɔwɔ kɛ Kɔlentema ne te ɔ bo kɛ, kɛ Kilisienema mɔɔ bɛkpokpa bɛ la, bɛbayia sɔnea dahuu na bɛawu kolaa na bɛadwazo bɛ. Yemɔti mekɛ mɔɔ ‘bɛzɔnenle bɛ wɔ Kelaese Gyisɛse anu la,’ eza ‘bɛzɔnenle bɛ wɔ ye ewule ne anu.’ (Wlo. 6:3) Ɛhye kile kɛ bɛbayia sɔnea na bɛawu amaa bɛadwazo bɛ bɛahɔ anwuma kɛ Gyisɛse la.

Mɔɔ bɛzɔnenle Gyisɛse la ye ɛvolɛ mɔɔ bo nwiɔ la anzi, ɔzele ye ɛdoavolɛma nwiɔ kɛ: “Ɛzɔnenlɛ ne mɔɔ bɛlɛsɔne me la, bɛbazɔne bɛ bie.” (Maake 10:38, 39) Ɛnee bɛnzɔne Gyisɛse wɔ mekɛ zɔhane. Ɛnee ɔlɛkile kɛ nɔhalɛ mɔɔ ɔlɛdi yeamaa Nyamenle la bamaa bɛahu ye. Pɔɔlo hɛlɛle kɛ menli mɔɔ bɛkpokpa bɛ la nee ye bɔ nu “nwu amaneɛ a, [bɛ] nee ye bɛabɔ nu anyia anyunlunyia.” (Wlo. 8:16, 17; 2 Kɔl. 4:17) Yemɔti ɔwɔ kɛ bɛdabɛ noko bɛwu na bɛadwazo bɛ bɛahɔ anwuma.

Yemɔti yɛbahola yɛahile Pɔɔlo edwɛkɛ ne abo kpalɛ kɛ: “Saa tɛ ye zɔhane a, ɛnee duzu a bɛdabɛ mɔɔ bɛlɛsɔne bɛ bɛahɔ ewule nu la bayɛ a? Saa bɛnrɛdwazo mowuamra fee a, ɛnee kɛmɔti a bɛsɔne bɛdabɛ noko bɛkɔ ewule nu ɛ?”