Wɔgenga Ɛzinzalɛ Arane mɔɔ ɛra ɛvolɛ ɛhye anu la kpalɛ ɔ? Nea saa ɛbahola wɔabua kpuya ɛhye mɔ a:

Saa yɛnyia mekɛ yɛ nee Gyihova tendɛ, yɛtie ye na yɛdwenledwenle ɔ nwo a, kɛzi ɔbaboa yɛ kpalɛ ɛ?

Ɔbamaa yɛazi kpɔkɛ kpalɛ, yɛayɛ kilehilevolɛma kpalɛ, yɛ diedi nu ayɛ se na Gyihova anwo ɛlɔlɛ mɔɔ yɛlɛ la ayɛ kpole.​—w22.01, m. 30-31.

Saa yɛnyia Gyihova nee menli mɔɔ gyi ɔ gyakɛ anu la anu anwodozo a, kɛzi ɔbaboa yɛ ɛ?

Ɛnɛ a le mekɛ mɔɔ ɔwɔ kɛ yɛsukoa kɛ yɛbava yɛ nwo yɛado adenle mɔɔ Nyamenle dua zo yɛ ninyɛne la azo kpalɛ a, na ɔnle kɛ yɛsu mgbanyima ne mɔ adehilelɛ nee kpɔkɛzilɛ nwo kpolera. Anwongyelelɛ kpole ne kara la, ɛnee yɛziezie yɛ nwo kɛ yɛbali adehilelɛ mɔɔ ɔzɔho kɛ yɛnrɛhola yɛnrɛva yɛnrɛli gyima anzɛɛ nrɛlɛbɛ ɛnle nu la azo.​—w22.02, m. 4-6.

Mɔɔ anwumabɔvolɛ ne hanle hilele Zɛkalaya kɛ “ɛzuzunyɛma ne wɔ [Amɛnlado] Zɛlubabɛle asa anu” la, duzu a ɛnee ɔlɛkile a? (Zɛk. 4:8-10)

Ɛnyelɛzodeɛnwunlɛ ɛhye maanle Nyamenle menli nyianle anwodozo kɛ, ɛzonlenlɛsua ne ɛnrɛyɛ kɛ dɛba ne ɛdeɛ, noko bɛbazi bɛawie yɛɛ ɔbayɛ kɛ mɔɔ Gyihova kpondɛ la.​—w22.03, m. 16-17.

Kɛ ɔkɛyɛ na ‘yɛayɛ neazo wɔ ɛdendɛlɛ nu’ ɛ? (1 Tim. 4:12)

Yɛfa ɛbulɛ yɛtendɛ kɛnlɛma wɔ daselɛlilɛ nu, yɛfi ahonle nu yɛto edwɛne, yɛmaa mualɛ dahuu wɔ debiezukoalɛ bo, yɛka nɔhalɛ yɛɛ yɛmaa awie mɔ anwosesebɛ, yɛnrɛbɔ aholoba.​—w22.04, m. 6-9.

Duzu ati a bɛva kɛzi nane anwo ɛzulolɛ (belemgbunlililɛ) nna ne mɔɔ wɔ Daneɛle tile 7 anwo ne de la bɛbɔ nu bɛyɛ ye nane ko wɔ Yekile 13:1, 2 a?

Nane anwo ɛzulolɛ ne mɔɔ wɔ Yekile 13 la ɛngyi ɛkɛ ne ɛmmaa belemgbunlililɛ kokye bie ala, le kɛ Wulomu. Emomu, ɔgyi ɛkɛ ne ɔmaa maanyɛlɛ tumililɛ kɔsɔɔti mɔɔ ɛli alesama anwo zo la.​—w22.05, m. 9.

Adenle titili ko mɔɔ yɛdua zo yɛkile kɛ yɛlɛ anwodozo wɔ Nyamenle pɛlepɛlelilɛ ne anu la a le boni?

Saa awie bɔ yɛ aholoba, ɔyɛ yɛ debie mɔɔ yɛ nye ɛnlie nwo anzɛɛ ɔyɛ yɛ ɛtane a, yɛbɔ mɔdenle kɛ yɛnrɛva ɛya yɛnrɛzie yɛ nu, emomu yɛbagyakyi yɛamaa Gyihova. Ɔbaye ngyegyelɛ biala mɔɔ ɛtane ɛva ɛra la yeavi ɛkɛ.​—w22.06, m. 10-11.

Duzu a ɔwɔ kɛ adiema nrenyia bie mɔɔ ɛlɛyɛ asɔne wɔ debiezukoalɛ bo la kakye a?

Ɔnle kɛ ɔdua asɔneyɛlɛ zo ɔtu folɛ anzɛɛ ɔfa ɔbɔ nolo wɔ asafo ne anu. Ɔngyia kɛ ɔka “edwɛkɛ dɔɔnwo,” titili kolaa na bɛabɔ debiezukoalɛ ne abo la. (Mat. 6:7)​—w22.07, m. 24-25.

Adenle boni azo a “bɛdabɛ mɔɔ bɛyɛle ninyɛndane la, bɛbadwazo bɛ na bɛabua bɛ ndɛne” a? (Dwɔn 5:29)

Bɛnrɛgyinla ɛbɛla mɔɔ bɛbɔle ye dɛba la azo bɛnrɛbua bɛ fɔlɛ. Gyisɛse bagua ɔ nye aze anlea ɛbɛla mɔɔ bɛbabɔ wɔ bɛ ewudwazo ne anzi la amaa yeanwu kɛ saa ɔfɛta kɛ bɛkɔ zo bɛtɛnla aze a.​—w22.09, m. 18.

Duzu a J. F. Rutherford maanle mediema anwosesebɛ kɛ bɛyɛ wɔ September 1922 nyianu bie abo a?

Wɔ Cedar Point, Ohio, U.S.A., nyianu bie abo, ɔhanle kɛ: “Belemgbunli ne ɛlɛdi tumi! Bɛdabɛ a bɛbabɔ ye nolo a. Ɛhye ati, bɛbɔ, bɛbɔ, bɛbɔ Belemgbunli ne nee ye Belemgbunlililɛ ne nolo!”​—w22.10, m. 3-5.

Ndenle nsa boni mɔ a Ayezaya tile 30 ka kɛ Nyamenle dua zo boa yɛ maa yɛgyinla kpundii a?

Tile ɛhye kile kɛ (1) ɔtie yɛ asɔneyɛlɛ na ɔbua, (2) ɔmaa yɛ adehilelɛ, yɛɛ (3) ɔyila yɛ kɛkala na ɔbayila yɛ kenle bie noko.​—w22.11, m. 9.

Duzu ati a yɛkola yɛka kɛ edwɛkɛ mɔɔ wɔ Edwɛne 37:10, 11, 29 la rale nu wɔ tete ne na ɔbara nu bieko kenle bie ɛ?

Ɛnee Devidi edwɛkɛ ne fɛta tɛnlabelɛ kpalɛ mɔɔ Yizilayɛma hɔle nu la, le kɛ Sɔlɔmɔn tumililɛ ne anu ɛdeɛ ne bɔkɔɔ. Gyisɛse hanle kenle bie paladaese nwo edwɛkɛ na ɔhwenle adwenle ɔhɔle ngyɛnu 11 ne azo. (Mat. 5:5; Luku 23:43)​—w22.12, m. 8-10, 14.