1. Kɛzi Gyihova ta bua ye azonvolɛ asɔneyɛlɛ ɛ?

 ƐZE kɛ Gyihova bahola alua ɛ nwo zo abua awie asɔneyɛlɛ ɔ? Saa ɛle asafo nu kpanyinli, sonvolɛ, adekpakyelɛnli anzɛɛ nolobɔlɛnli bɔbɔ a, ɛbahola wɔaboa. Ɛle kakula o, kpanyinli o, nrenyia o anzɛɛ raalɛ o, ɛbahola wɔaboa. Saa awie mɔɔ kulo Gyihova la fɛlɛ ye kɛ ɔboa ye a, yɛ Nyamenle ne ta dua mgbanyima ne mɔ nee azonvolɛ nɔhavoma gyɛne nwo zo ‘kyekye ahenle arɛle kpole kpalɛ.’ (Kɔl. 4:11) Nea nwolɛ adenle mɔɔ yɛnyia kɛ yɛbalua adenle ɛhye azo yɛazonle yɛ mediema a! Saa ewulenzane bie ba, esiane bie si anzɛɛ yɛyia kpɔdekpɔdeyɛlɛ a, yɛbahola yɛaboa yɛ mediema na yɛakyekye bɛ rɛle.

2. Duzu ati a ɔbahola yeayɛ se kɛ yɛbaboa awie mɔ wɔ ewulenzane mekɛ nu a?

² Ewulenzane kola maa ɔyɛ se kɛ yɛbaboa yɛ nwo ngoko. Kɛ neazo la, bie a yɛkulo kɛ yɛkɔkpɔla yɛ gɔnwo mɔ, noko yɛnrɛhola yɛnrɛyɛ zɔ. Bie a yɛkulo kɛ yɛto ɛsalɛ yɛfɛlɛ bɛdabɛ mɔɔ bɛ nwo kyele bɛ ekyi wɔ ezukoa afoa nu la yɛmaa bɛba yɛ sua nu bɛbadi aleɛ, noko ɔdaye noko ɔnrɛhola ɔnrɛyɛ boɛ. Bie a yɛkulo kɛ yɛboa awie mɔ, noko saa yɛdayɛ mumua ne yɛ mbusuafoɔ ɛlɛnwu amaneɛ a, ɔbahola yeayɛ se. Noko yɛkulo kɛ yɛboa yɛ mediema, ɔti saa yɛyɛ biala mɔɔ yɛbahola la yɛboa bɛ a, Gyihova anye die nwo. (Mrɛ. 3:27; 19:17) Duzu a yɛbahola yɛayɛ a?

3. Duzu a yɛsukoa yɛfi mgbanyima mɔɔ wɔ Desi asafo ne anu la neazo ne anu a? (Gyɛlɛmaya 23:4)

³ Mɔɔ asafo nu mgbanyima bahola ayɛ la. Saa ɛle asafo nu kpanyinli a, bɔ mɔdenle kɛ ɛbanwu mboane ne mɔ kpalɛ. (Kenga  Gyɛlɛmaya 23:4.) Adiema raalɛ Desi mɔɔ yɛhanle ɔ nwo edwɛkɛ wɔ edwɛkɛ mɔɔ li ɛhye anyunlu anu la hanle kɛ, “Ɛnee mgbanyima mɔɔ wɔ me daselɛlilɛ ekpunli ne anu la nee medame nee mediema gyɛne bɔ nu kɔ daselɛlilɛ na yɛyɛ ninyɛne gyɛne.” b Mɔɔ mgbanyima ɛhye mɔ yɛle la ammaa yeanyɛ se kɛ bɛbaboa Desi wɔ mekɛ mɔɔ COVID-19 ewulenzane ne rale na ɔhunle ye mbusuafoɔ bie mɔ la.

4. Duzu ati a mgbanyima ne mɔ holale boale Desi a, na duzu a yɛsukoa yɛfi nu a?

⁴ Desi hilehilele nu kɛ, “Kɛ mɔɔ ɛnee menwu mgbanyima ne mɔ kɛ me gɔnwo mɔ la ati, yeammaa yeanyɛ se kɛ mebaha kɛzi mete nganeɛ nee mɔɔ ɛlɛgyegye me la anwo edwɛkɛ meahile bɛ.” Duzu a mgbanyima bahola azukoa avi nu a? Bɛkpɔlakpɔla mediema mɔɔ bɛnea bɛ nwo zo la kolaa na esiane bie azi. Bɛva bɛ agɔnwolɛ. Saa ewulenzane bie ati bɛnrɛhola bɛnrɛkpɔla bɛ wɔ bɛ azua nu a, bɛlua ndenle gyɛne zo bɛkpɔla bɛ. Desi hanle kɛ, “Ɔyɛ a, mgbanyima ngakyile fɛlɛ me anzɛɛ bɛkɛlɛ edwɛkɛ bɛnwa me wɔ kenle ko zɔhane ala. Ngɛlɛlera ngakyile mɔɔ bɛgengale bɛhilele me la hanle me ahonle ɔnva nwo kɛ ɛnee meze bɛ dɛba la.”

5. Kɛ ɔkɛyɛ na mgbanyima anwu mɔɔ mediema hyia nwo la na bɛaboa bɛ ɛ?

⁵ Adenle ko mɔɔ ɛbahola wɔalua zo wɔanwu mɔɔ ɛ mediema hyia la a le kɛ ɛbabiza bɛ kpuya mɔɔ ɔnrɛmaa bɛ ti ɛnrɛzi aze la. (Mrɛ. 20:5) Asoo bɛlɛ aleɛ, nyile nee ninyɛne gyɛne dodo mɔɔ baza bɛ ɔ? Bɛ gyima kpondɛ avi bɛ sa anzɛɛ bɛnlɛ ezukoa dɔɔnwo mɔɔ bɛfa bɛadua bɛ sua kakɛ ɔ? Ɔwɔ kɛ yɛboa bɛ yɛmaa bɛnyia moalɛ bie bɛfi arane ne ɛkɛ ɔ? Desi agɔnwo mɔ diedima boale ye wɔ nwonane afoa nu. Noko ɛlɔlɛ mɔɔ mgbanyima ne mɔ lale ye ali hilele ye nee bɛ anwosesebɛmaanlɛ a boale ye kpalɛ ɔmaanle ɔgyinlanle sɔnea ne anu a. Ɔhanle kɛ: “Mgbanyima ne mɔ nee me yɛle asɔne. Mengakye edwɛkɛ mɔɔ bɛhanle la ɛdeɛ, noko mekakye kɛzi mendele nganeɛ la. Ɛnee ɔle adenle mɔɔ Gyihova ɛlɛdua zo aha ahile me kɛ, ‘Ɔtɛkale ɛ ngome’” a.​—Aye. 41:10, 13.

6. Duzu a asafo ne anu amra dɔɔnwo bahola ayɛ aboa awie mɔ a? (Nea nvoninli ne.)

⁶ Mɔɔ awie mɔ bahola ayɛ la. Yɛ nye la kɛ mgbanyima ne mɔ a baboa mediema mɔɔ wɔ asafo ne anu la a. Noko Gyihova kulo kɛ yɛ muala yɛmaa yɛ mediema anwosesebɛ na yɛboa bɛ. (Gal. 6:10) Saa yɛda ɛlɔlɛ ekyi bɔbɔ  ali yɛkile awie mɔɔ ɛnde kpɔkɛ la a, ɔbahola yeanyia ɔ nwo zo tumi kpole. Kakula bie bahola ava kaade anzɛɛ debie bie mɔɔ yedɔlɔ la yeamaa adiema bie yeava yeamaa ye anwosesebɛ. Kakula mɔɔ ɛnyi ekyi la bahola ayɛ debie anzɛɛ ali gua amaa adiema raalɛ bie mɔɔ ɛyɛ kpanyinli la. Asafo ne anu amra bie mɔ bahola ado aleɛ ahɔmaa mediema mɔɔ ɛnde kpɔkɛ la wɔ bɛ azua nu. Noko saa ewulenzane bie ba a, awie biala mɔɔ wɔ asafo ne anu la hyia anwosesebɛmaanlɛ. Bie a yɛkpɔne debiezukoalɛ a yɛbahola yɛahendɛ ekyii amaa yɛ nee mediema adendɛ, anzɛɛ yɛalua videoconferencing zo yɛayɛ zɔ. Asafo nu mgbanyima noko hyia anwosesebɛmaanlɛ. Alasevolɛ bie mɔ kɛlɛ moyɛlɛ kɛlata ekyi kɔmaa mgbanyima ne mɔ mɔɔ ewulenzane bie ba a bɛta bɛyɛ gyima dɔɔnwo bɛboa mediema ne mɔ la. Saa yɛyɛ yɛ afoa nu ɛdeɛ ‘yɛmaa yɛ nwo anwosesebɛ na yɛboa yɛ nwo ngoko a,’ nea kɛzi ɔle kɛnlɛma a!​—1 Tɛs. 5:11.

7. Saa esiane bie si a, ngyegyelɛ boni a ɔfa ɔba a?

⁷ Esiane kola kakyi awie ɛbɛlabɔlɛ arɛlevilɛ nu. Bie a menli bie mɔ agyapadeɛ, bɛ awuke anzɛɛ bɛ alɔvolɛ bɔbɔ bavi bɛ sa. Alɔbɔlɛ edwɛkɛ ɛhye mɔ bie kola to yɛ mediema. Duzu a yɛbahola yɛayɛ yɛaboa a?

8. Duzu a asafo nu mgbanyima nee mbusua tile bahola ayɛ kolaa na esiane bie azi a?

⁸ Mɔɔ asafo nu mgbanyima bahola ayɛ la. Mgbanyima, bɛboa bɛ mediema bɛmaa bɛziezie bɛ nwo kolaa na esiane bie azi. Bɛmaa awie biala mɔɔ wɔ asafo ne anu la ɛnwu mɔɔ ɔwɔ kɛ ɔyɛ amaa bɛabɔ bɛ nwo bane nee kɛzi bɛ nee mgbanyima ne mɔ bali ngitanwo la. Margaret mɔɔ yɛhanle ɔ nwo edwɛkɛ wɔ edwɛkɛ mɔɔ li ɛhye anyunlu anu la hanle kɛ: “Yɛ mgbanyima ne mɔ yɛle asafo nu ngyianlɛ bie, na bɛbɔle yɛ kɔkɔ kɛ senle bahola adɔ ɛleka mɔɔ yɛde la mekɛ biala. Bɛhanle kɛ, saa maanle mgbanyima ne mɔ ka kɛ yɛdu anzɛɛ tɛnlabelɛ ne anloa yɛ se a, ɔwɔ kɛ yɛfi ɛkɛ ne ndɛndɛ.” Ɛnee zɔhane edwɛkɛ ne le ye mekɛ nu ɛdeɛ ɔluakɛ wɔ dapɛne nnu anzi, senle kpole bie dɔle ɛkɛ. Wɔ abusua ɛzonlenlɛ bo, mbusua tile bahola aha mɔɔ abusua ne anu sonla ko biala bahola ayɛ la. Saa ɛ nee ɛ mra siezie bɛ nwo na esiane bie si a, ɔnrɛmaa bɛ nye zo ɛnrɛda bɛ.

9. Kolaa na esiane bie azi anzɛɛ wɔ esiane ne anzi, duzu a mgbanyima bahola ayɛ a?

⁹ Saa ɛle ekpunli zo neavolɛ a, mmakendɛ too na saa esiane bie si a wɔakpondɛ bɛdabɛ mɔɔ bɛwɔ wɔ ekpunli ne anu la amuala nɔma. Dielie bɛ muala bɛ nɔma, na ɔyɛ a nea saa yemɔ a bɛtɛfa bɛtɛdi gyima a. Akee saa esiane bie si a, ɛbahola wɔavɛlɛ bɛ muala na wɔanwu mɔɔ bɛ nuhua ko biala hyia nwo la. Ka mɔɔ ɛbanwu ye la anwo edwɛkɛ kile mgbanyima avinli ngitanwodivolɛ ne ndɛndɛ na ɔdaye noko ɔbabɔ maangyebakyi zo neavolɛ ne amaneɛ. Mɔɔ bɛ muala bɛbayɛ la bahola aboa kpalɛ. Mɔɔ senle ne dɔle la, maangyebakyi zo neavolɛ ne mɔɔ wɔ ɛleka mɔɔ Margaret wɔ la anla too dɔnehwele 36. Ɛnee ɔlɛboa mgbanyima mɔɔ wɔ ɛkɛ ne la yeamaa bɛanlea mediema 450 mɔɔ bɛdu bɛvi bɛ sua nu la. (2 Kɔl. 11:27) Ɛhye maanle bɛnyianle dabelɛ bɛmaanle awie biala mɔɔ hyia bie la.

10. Duzu ati a mgbanyima bu mboanekpɔlalɛ ne kɛ nwolɛ hyia ɛ? (Dwɔn 21:15)

¹⁰ Ɔle mgbanyima ne mɔ gyima kɛ bɛbamaa bɛ mediema anwosesebɛ wɔ sunsum nu nee nganeɛdelɛ nu. (1 Pita 5:2) Saa esiane bie si a, ɔwɔ kɛ mgbanyima dimoa nea kɛ edwɛkɛ ɛtɛtole adiema ko biala, ɔlɛ aleɛ, adɛladeɛ nee ɛleka mɔɔ ɔbadɛnla la. Noko wɔ siane dɔɔnwo anzi, menli mɔɔ nyianle bɛ ti la bahyia sunsum nu nee nganeɛdelɛ nu moalɛ. (Kenga Dwɔn 21:15.) Harold mɔɔ boka Ɔfese Kɔmatii  bie anwo na ɔ nee mediema mɔɔ esiane ɛdo bɛ ɛlɛ ɛdendɛ la hanle kɛ, “Ɔdie mekɛ na awie anwo agyinla ye bieko. Bie a ninyɛne babɔ ɔ bo kɛ ɔyɛ boɛ, noko bie a bɛkakye bɛ kulovolɛ bie mɔɔ wule, bɛ agyapadeɛ bie mɔɔ sonle bolɛ mɔɔ vile bɛ sa anzɛɛ tɛnlabelɛ bie mɔɔ anu yɛ se mɔɔ bɛhɔle nu la. Wɔannea a ninyɛne ɛhye mɔ mɔɔ bɛbahakye la bamaa bɛali nyane bieko. Ɛhye ɛngile kɛ bɛnlɛ diedi, noko kɛmɔ yɛle menli la ati, zɔhane ala a ɔbayɛ a.”

11. Duzu a bie a mbusua bahyia nwo dahuu a?

¹¹ Mgbanyima fa folɛdulɛ mɔɔ se, “bɛ nee bɛdabɛ mɔɔ bɛsu la ɛzu” la di gyima. (Wlo. 12:15) Ɔwɔ kɛ mgbanyima maa bɛdabɛ mɔɔ bɛnyia bɛ ti la nyia anwodozo kɛ Gyihova nee bɛ mediema kulo bɛ. Mgbanyima baboa mbusua bɛamaa bɛayɛ bɛ sunsum nu ninyɛne mɔɔ bɛyɛ ye dahuu le kɛ asɔneyɛlɛ, bɛ ti anwo debiezukoalɛ, daselɛlilɛ yɛɛ debiezukoalɛ ɛhɔlɛ. Eza mgbanyima bahola aboa awovolɛ amaa bɛaboa bɛ mra bɛamaa bɛava bɛ adwenle bɛazie ninyɛne mɔɔ esiane ɛngola ɛnzɛkye ye la azo. Awovolɛ, bɛhakye bɛ mra kɛ Gyihova bahɔ zo ayɛ bɛ Gɔnwo na yeaboa bɛ dahuu. Bɛhilehile nu bɛhile bɛ kɛ bɛbahɔ zo bɛaboka ewiade amuala mediema mɔɔ bɛziezie bɛ nwo kɛ bɛbaboa bɛ dahuu la anwo.​—1 Pita 2:17.

12. Duzu a awie mɔ bahola ayɛ aboa wɔ esiane mekɛ nu a? (Nea nvoninli ne.)

¹² Mɔɔ awie mɔ bahola ayɛ la. Saa esiane ne bikye wɔ a, biza mgbanyima ne mɔ mɔɔ ɛbahola wɔayɛ wɔaboa la. Bie a ɛbahola wɔamaa menli mɔɔ esiane ne ɛdo bɛ la anzɛɛ suazilɛma mɔɔ ɛlɛba araboa la ɛleka bɛala. Ɛbahola wɔava aleɛ wɔahɔmaa nolobɔlɛma mɔɔ bɛhyia moalɛ la. Saa esiane ne ɛmbikye wɔ fee bɔbɔ a, ɛbahola wɔaboa. Adenle boni azo? Yɛ asɔne maa bɛ. (2 Kɔl. 1:8-11) Bie a ɛbahola wɔaboa moalɛ gyima ne ɔlua ndoboa mɔɔ ɛbaye wɔaboa ewiade amuala gyima ne la azo. (2 Kɔl. 8:2-5) Saa ɛbahola wɔadu adenle wɔahɔ ɛleka mɔɔ esiane bie ɛzi la a, biza mgbanyima ne mɔ mɔɔ ɛbahola wɔayɛ wɔaboa la. Saa bɛto ɛsalɛ bɛfɛlɛ wɔ kɛ ɛraboa a, ye biala anu bɛbatete wɔ amaa wɔahola wɔaboa wɔ ɛleka mɔɔ bɛhyia moalɛ dɔɔnwo la.

13. Ngyegyelɛ boni a yɛ mediema mɔɔ wɔ maanle mɔɔ bɛva bɛ sa bɛdo yɛ gyima ne azo anu la yia a?

¹³ Kpɔdekpɔdeyɛlɛ maa ɛbɛlabɔlɛ yɛ se wɔ maanle mɔɔ bɛva bɛ sa bɛdo yɛ gyima ne azo  la anu. Mediema mɔɔ wɔ maanle ɛhye mɔ anu la yia ezukoa nwo ngyegyelɛ, bɛ nwo to bɛ yɛɛ bɛ alɔvolɛ wu. Noko kɛ mɔɔ bɛva bɛ sa bɛdo yɛ gyima ne azo la ati, bie a mgbanyima ne mɔ ɛnrɛhola ɛnrɛhɔ bɛ ɛkɛ anzɛɛ bɛ nee menli mɔɔ hyia anwosesebɛmaanlɛ la ɛnrɛli adwelie. Ɛhye bie a dole Andrei mɔɔ yɛhanle ɔ nwo edwɛkɛ wɔ edwɛkɛ mɔɔ li ɛhye anyunlu la anu la a. Ɛnee adiema raalɛ bie mɔɔ wɔ ye daselɛlilɛ ekpunli ne anu la anwo kyele ye wɔ ezukoa afoa nu. Eza kale dole ye aze. Ɛnee ɔwɔ kɛ bɛyɛ ye apelehyɛne ngakyile, ɔti ɛnee ɔngola gyima yɛ. Ɔnva nwo kɛ ɛnee bɛva bɛ sa bɛdo yɛ gyima ne azo yɛɛ ewulenzane ne ɛra la, yɛ mediema yɛle biala mɔɔ bɛbahola la boale ye, na Gyihova nwunle mɔɔ bɛyɛle la.

14. Saa mgbanyima fa bɛ nwo to Gyihova anwo zo a, kɛzi bɛbayɛ neazo bɛamaa mediema ɛ?

¹⁴ Mɔɔ asafo nu mgbanyima bahola ayɛ la. Andrei yɛle asɔne na ɔyɛle mɔɔ ɔbahola la. Duzu a Gyihova yɛle a? Gyihova hanle mediema diedima mɔɔ bɛbahola bɛayɛ dɔɔnwo la ɔmaanle bɛboale ye. Bie mɔ vale adiema raalɛ ne hɔle asopiti. Bie mɔ vale ezukoa boale ye. Gyihova hanle bɛ ɔmaanle bɛyɛle biala mɔɔ bɛbahola la, na ɔyilale koyɛlɛ nee akɛnrasesebɛ mɔɔ bɛvale bɛboale ye la azo. (Hib. 13:16) Mgbanyima, saa bɛfa bɛ sa bɛto yɛ gyima ne azo a, bɛva bɛ gyima ne bie bɛwula awie mɔ asa. (Gyɛ. 36:5, 6) Mɔɔ tɛla biala la, bɛva bɛ nwo bɛdo Gyihova anwo zo. Ɔbaboa bɛ yeamaa bɛanlea mediema.

15. Saa yɛlɛyia kpɔdekpɔdeyɛlɛ a, kɛ ɔkɛyɛ na yɛabɔ yɛ Kilisiene koyɛlɛ ne anwo bane ɛ?

¹⁵ Mɔɔ awie mɔ bahola ayɛ la. Saa bɛfa bɛ sa bɛto yɛ gyima ne azo a, bie a ɔwɔ kɛ yɛkyɛ yɛ nwo ekpunli ngyikyi na yɛahola yɛayia. Ɔti ɛnɛ a le mekɛ mɔɔ ɔhyia kpalɛ kɛ yɛbamaa anzodwolɛ adɛnla yɛ avinli a. Bɛho bɛtia Seetan, na tɛ bɛ nwo. Bɛbu bɛ nye bɛgua bɛ mediema nvonleɛ zo anzɛɛ bɛbɔ mɔdenle bɛziezie bɛ avinli ndɛndɛ. (Mrɛ. 19:11; Ɛfɛ. 4:26) Bɛnyia ɛhulolɛ kɛ bɛbaboa bɛ nwo ngoko. (Tae. 3:14) Moalɛ mɔɔ bɛvale bɛmaanle adiema raalɛ ne mɔɔ ɛnee wɔ ngyegyelɛ nu la boale daselɛlilɛ ekpunli ne kpalɛ. Ɔmaanle bɛbikyele bɛ nwo kɛ abusua.​—Edw. 133:1.

16. Kɛ mɔɔ Kɔlɔsaema 4:3, 18 kile la, kɛ ɔkɛyɛ na yɛaboa yɛ mediema mɔɔ bɛlɛyɛ bɛ kpɔdekpɔde la ɛ?

¹⁶ Yɛ mediema apenle dɔɔnwo kɔ zo sonle Gyihova ɔnva nwo kɛ arane ne mɔ fa bɛ sa to yɛ gyima zo la. Bɛgua bie mɔ efiade ɔlua bɛ diedi ti. Yɛbahola yɛayɛ asɔne yɛamaa bɛ, bɛ mbusuafoɔ nee mediema mɔɔ bɛlɛfa bɛ  fanwodi bɛado esiane nu na bɛava sunsum nu, nwonane nu nee mɛla adenle zo moalɛ bɛamaa bɛ la. c (Kenga Kɔlɔsaema 4:3, 18.) Mmabu kɛzi asɔne mɔɔ ɛyɛ ɛmaa bɛ la bahola aboa bɛ la debie ekyi!​—2 Tɛs. 3:1, 2; 1 Tim. 2:1, 2.

17. Kɛ ɔkɛyɛ na wɔaziezie ɛ nwo kɛkala wɔamaa kpɔdekpɔdeyɛlɛ ɛ?

¹⁷ Ɛ nee wɔ abusua ne bahola aziezie bɛ nwo kɛkala amaa kpɔdekpɔdeyɛlɛ. (Gyi. 14:22) Mmabɔ mɔdenle kɛ ɛfa wɔ adwenle wɔabu tɛnlabelɛ ɛtane biala mɔɔ bara la. Emomu, mia agɔnwolɛvalɛ mɔɔ ɛ nee Gyihova lɛ la anu na boa ɛ mra maa bɛyɛ zɔ. Saa ɔyɛ na adwenleadwenle tɔ ɛ nwo a, ka wɔ ahonle nu edwɛkɛ kile Nyamenle. (Edw. 62:7, 8) Ɛ nee wɔ abusua ne ɛbɔ nu ɛzuzu deɛmɔti bɛbahola bɛava bɛ nwo bɛado ɔ nwo zo la anwo. d Kɛ mɔɔ ɔde wɔ esiane mekɛ nu la, saa ɛsiezie ɛ nwo na ɛfa ɛ nwo ɛto Gyihova anwo zo a, ɔbamaa ɛ mra ne mɔ anyia akɛnrasesebɛ na bɛazie bɛ nwo dii.

18. Duzu a la yɛ nyunlu kenle bie a?

¹⁸ Nyamenle anzodwolɛ ne maa yɛte nganeɛ kɛ yɛlɛ banebɔlɛ. (Fel. 4:6, 7) Gyihova dua zo maa yɛsie yɛ nwo dii ɔnva nwo ewulenzane, esiane nee kpɔdekpɔdeyɛlɛ mɔɔ yɛyia ye ɛnɛ la. Ɔdua mgbanyima mɔɔ yɛ gyima ɛsesebɛ la anwo zo ɔmaa yɛ anwosesebɛ. Eza yemaa yɛ muala yɛnyia nwolɛ adenle kɛ yɛbaboa yɛ nwo ngoko. Anzodwolɛ mɔɔ yɛlɛ ye kɛkala la bahola aboa yɛ yeamaa yɛagyinla sɔnea mgbole mɔɔ yɛbayia bɛ kenle bie, mɔɔ “anwongyelelɛ kpole” ne boka nwo bɔbɔ la anloa. (Mat. 24:21) Wɔ mekɛ zɔhane, ɔbahyia kɛ yɛbazɔ anzodwolɛ mɔɔ yɛlɛ la anu na yɛaboa awie mɔ yɛamaa bɛayɛ zɔ. Noko saa zɔhane mekɛ ne pɛ nu a, yɛnrɛyia ngyegyelɛ biala mɔɔ bamaa adwenleadwenle adɔ yɛ nwo a. Akee yɛ sa baha debie mɔɔ Gyihova kulo kɛ yɛ sa ka ye dahuu la​—anzodwolɛ kpalɛ mɔɔ badɛnla ɛkɛ dahuu.​—Aye. 26:3, 4.