Kyɛkyɛ. Mɔɔ Devidi hɛlɛle la le nɔhalɛ yɛɛ ɔbahola yeayɛ.

Suzu mɔɔ ɔhɛlɛle ye wɔ zɔhane ngyɛnu ne nee ngyehyɛnu gyɛne anu la anwo nea: “Saa melɛtua me ɛwɔkɛ ne mɔ alehyenlɛ biala a, mebado edwɛne meaye wɔ duma ne ayɛlɛ dahuu.” “O Gyihova me Nyamenle, mefi me ahonle muala anu meye wɔ ayɛlɛ, na mebawula wɔ duma ne anyunlunyia dahuu.” “Mebaye wɔ duma ne ayɛlɛ dahuu.”​—Edw. 61:8; 86:12; 145:1, 2.

Ɛnee Devidi ɛnwudu edwɛkɛ ne anu, yeannyia adwenle kɛ ɔnrɛwu ɛlɛ. Ɛnee Devidi ze kɛ Gyihova ɛha kɛ alesama ɛtane bamaa bɛawu, na ɔliele ɔdole nu kɛ ɔle ɛtanevolɛ. (Gyn. 3:3, 17-19; Edw. 51:4, 5) Ɛnee ɔze kɛ nɔhavoma le kɛ Ebileham, Ayezeke yɛɛ Gyekɔbo bɔbɔ ɛwu. Yɛɛ ɔze kɛ ɔdaye noko ɔbawu. (Edw. 37:25; 39:4) Noko ye edwɛkɛ mɔɔ wɔ Edwɛne 61:8 la da ɛhulolɛ mɔɔ ɛnee ɔlɛ nee kpɔkɛ mɔɔ ɔbɔle kɛ ɔbaye Nyamenle ayɛlɛ dahuu wɔ mekɛ ala mɔɔ ɔde ngoane nu la ali.​—2 Sa. 7:12.

Ɔdwu mekɛ ne bie a Devidi kɛlɛ ɔdaye mumua ne ye anwubielɛ nwo edwɛkɛ kɛ mɔɔ yɛkola yɛnwu ye wɔ Edwɛne 18, 51, yɛɛ 52 atidwɛkɛ ne mɔ anu la. Wɔ Edwɛne 23 ne anu, Devidi hanle Gyihova anwo edwɛkɛ kɛ ɔle ye neavolɛ mɔɔ kile ye adenle, ɔmaa ɔ nwo tɔ ye na ɔbɔ ɔ nwo bane a. Ɛnee Devidi noko le neavolɛ. Na ɛnee ɔkulo kɛ ɔsonle Nyamenle wɔ ye “ngoane mekɛ kɔsɔɔti anu.”​—Edw. 23:6.

Kakye noko kɛ, Gyihova a maanle Devidi hɛlɛle zɔhane edwɛkɛ ne a. Ngapezo ngakyile mɔɔ bara nu kenle bie la boka edwɛkɛ mɔɔ ɔhɛlɛle la anwo. Kɛ neazo la, wɔ Edwɛne 110, Devidi hanle mekɛ mɔɔ ye Awulae ‘badɛnla Nyamenle asa fema zo’ wɔ anwuma na bɛamaa ye tumi kpole la anwo edwɛkɛ. Ɔfa yeayɛ nzɔne? Ɔfa yeali Nyamenle agbɔvolɛ anwo zo konim na yeabua “maanle maanle ne mɔ ndɛne.” Devidi le Mɛzaya ne, ahenle mɔɔ badɛnla anwuma ali tumi na yeayɛ “ɛsɔfo dahuu” la ɛ nenyia. (Edw. 110:1-6) Gyisɛse hanle kɛ zɔhane ngapezo ne mɔɔ wɔ Edwɛne 110 la fale ɔ nwo na ɔbara nu kenle bie.​—Mat. 22:41-45.

Gyihova maanle Devidi hɛlɛle mɔɔ bazi wɔ ye mekɛ zo nee mɔɔ bazi kenle bie wɔ mekɛ mɔɔ bɛbadwazo ye na yeahola yeaye Gyihova ayɛlɛ dahuu la anwo edwɛkɛ. Ɛhye boa yɛ ɔmaa yɛte ɔ bo kɛ edwɛkɛ mɔɔ wɔ Edwɛne 37:10, 11, 29 la fale tɛnlabelɛ mɔɔ ɛnee tete Yizilayɛma wɔ nu nee tɛnlabelɛ mɔɔ yɛbanyia ye kenle bie wɔ ewiade wɔ mekɛ mɔɔ Nyamenle ɛwɔkɛ ne mɔ ɛra nu la anwo.​—Nea edwɛkɛ, “Ɛbaboka Me Nwo Wɔ Paladaese” mɔɔ wɔ magazine ɛhye anu la ɛdendɛkpunli 8.

Edwɛne 61:8 nee ngyehyɛnu gyɛne maa yɛnwu kɛ ɛnee Devidi kulo kɛ ɔye Gyihova ayɛlɛ wɔ tete Yizilayɛ kɔkpula kɛ ɔbawu. Na ɔmaa yɛnwu mɔɔ Devidi bahola ayɛ ye kenle bie wɔ mekɛ mɔɔ Gyihova ɛdwazo ye ɛra ngoane nu la.