Kenle ko bie, adiema raalɛ bie mɔɔ wɔ New Zealand la nleanle vidio bie wɔ jw.org na ɛnee ɔkilehile kɛzi Gyihova lɛ ahunluyelɛyelalɛ nee kɛzi ɔda ye ali la anu. (Aye. 63:​7-9) Ɔzile kpɔkɛ kɛ ɔbava mɔɔ yezukoa la yɛali gyima ɔlua awie mɔ mɔɔ ɔbaboa bɛ la azo. Mɔɔ ɔhɔle kɛ ɔkali gua wɔ kenle zɔhane ne la, ɔyiale raalɛ bie mɔɔ la gua zo la na ɔhanle kɛ ɔtɔ aleɛ yeamaa ye. Raalɛ ne liele dole nu. Mɔɔ adiema raalɛ ne vale aleɛ ne rɛlɛle ye la, ɔvale Asoo Amaneɛnwunlɛ Bara Awieleɛ? trate ne ɔlile ye daselɛ ekyi.

Raalɛ ne bɔle ɔbo kɛ ɔsu. Ɔhilehilele nu kɛ bɛtetele ye kɛ Dasevolɛ noko ɔvile nɔhalɛ ne anu la yehyɛ kpalɛ. Noko kenlensa ye, ɔta ɔyɛ asɔne kɛ Gyihova ɛboa ye ɔmaa ɔzia ɔrɛla ye ɛkɛ. Adiema raalɛ ne maanle bɛlɛra ne Baebolo na ɔliele ɔdole nu kɛ ɔ nee ye bazukoa. a

Yɛbahola yɛazukoa Gyihova na yɛala ahunluyelɛyelalɛ ali yɛahile awie mɔ mɔɔ yɛ mbusuafoɔ nee asafo ne anu amra boka nwolɛ la. Eza yɛbahola yɛava nwolɛ adenle ne yɛali awie mɔ daselɛ yɛava yɛala ahunluyelɛyelalɛ ali.