Wɔgenga Ɛzinzalɛ Arane mɔɔ ɛra ɛvolɛ ɛhye anu la kpalɛ ɔ? Nea saa ɛbahola wɔabua kpuya ɛhye mɔ a:

Saa bɛka kɛ ‘yɛnyia adwenle fofolɛ’ a, ɔkile nzɔne? (Wlo. 12:2)

Saa yɛyɛ ninyɛne mgbalɛ ekyi bie ala a, ɛnee ɔtɛwiele. Emomu, ɔwɔ kɛ yɛneɛnlea kɛzi yɛdayɛ mumua ne yɛde wɔ yɛ nu la anu na yɛyɛ nzenzaleɛ biala mɔɔ hyia la amaa yɛahola yɛali Gyihova ngyinlazo ne mɔ azo kɛ mɔɔ yɛbahola biala la.—w23.01, m. 8-9.

Saa yɛlɛnea ninyɛne mɔɔ ɛlɛsisi wɔ ewiade ye la a, kɛ ɔkɛyɛ na yeahile kɛ yɛlɛ ndelebɛbo ɛ?

Kɛzi ninyɛne mɔɔ ɛlɛsisi ewiade la ɛlɛmaa Baebolo ngapezo ara nu la hyia yɛ. Noko kɛ anrɛɛ yɛbava yɛ adwenle yɛabu mɔɔ ɔkile na yɛaha yɛahile awie mɔ, mɔɔ ɔkola ɔfa mgbakyemgbakyenu ɔba la, yɛmaa mɔɔ yɛka la gyinla mɔɔ Gyihova ahyehyɛdeɛ ne ɛha la azo. (1 Kɔl. 1:10)—w23.02, m. 16.

Kɛzi Gyisɛse ɛzɔnenlɛ ne le ngakyile fi ye ɛdoavolɛma ɛdeɛ ne anwo ɛ?

Ɛnee ɔngyia kɛ ɔbayila ɔ nwo zo yeamaa Gyihova, ɔluakɛ bɛwole ye bɛdole maanle mɔɔ bɛyila bɛ nwo zo bɛmaa Nyamenle la anu. Ɛnee Gyisɛse di munli, ɛtane biala ɛnle ɔ nwo. Ɛnee ɔngyia kɛ ɔbanlu ɔ nwo wɔ ye ɛtane nwo.—w23.03, m. 5.

Kɛ ɔkɛyɛ na yɛaboa awie mɔ yɛamaa bɛamaa mualɛ wɔ debiezukoalɛ bo ɛ?

Yɛbahola yɛamaa yɛ mualɛ ne mɔ ayɛ nzinrenzinra, amaa menli dɔɔnwo anyia mekɛ ne bie amaa mualɛ. Eza ɔnle kɛ yɛka ninyɛne dɔɔnwo anwo edwɛkɛ. Ɛhye bamaa awie mɔ anyia bie aha.—w23.04, m. 23.

Duzu a “Nwuanzanwuanza Adenle” ne mɔɔ bɛha nwolɛ edwɛkɛ wɔ Ayezaya 35:8 la kile a?

Mɔɔ limoa, sɛkɛlɛneɛ adenle zo ademgbole ɛhye a le adenle mɔɔ Dwuuma pɛle vile Babelɔn hɔle bɛ sua zo la. Na yɛ mekɛ ye azo noko ɛ? Wɔ ɛvolɛ ɛya dɔɔnwo anu kolaa na 1919 adwu la, bɛyɛle gyima wɔ ademgbole ne azo—bɛhilele Baebolo ne abo na bɛpenletele yɛɛ bɛyɛle ninyɛne gyɛne. Nyamenle menli lua “Nwuanzanwuanza Adenle” ne azo ɛlɛkɔ sunsum nu paladaese ne mɔɔ ɔbamaa bɛanyia Belemgbunlililɛ nyilalɛ dɔɔnwo la anu.—w23.05, m. 15-19.

Sɛkɛlɛneɛ adenle zo mraalɛ nwiɔ boni mɔ a Mrɛlɛbulɛ tile 9 dua zo tu yɛ folɛ a?

Mrɛlɛbulɛ ka “raalɛ koasea” bie mɔɔ ye ɛsalɛdolɛ ne fa sonla kɔ “Nla ne” anu la anwo edwɛkɛ. Eza ɔka raalɛ bie mɔɔ gyi ɛkɛ maa “nɔhalɛ nrɛlɛbɛ,” mɔɔ ye ɛsalɛdolɛ ne maa bɛdua “ndelebɛbo adenle nu fɔɔnwo” na ɔfa sonla ɔkɔ ngoane nu la anwo edwɛkɛ. (Mrɛ. 9:​1, 6, 13, 18)—w23.06, m. 22-24.

Kɛzi Nyamenle mɛlɛbɛnwoaze nee ye ndelebɛbo ne lale ali wɔ kɛzi ɔ nee Lɔɔto lile la anu ɛ?

Gyihova maanle Lɔɔto adehilelɛ kɛ ɔnriandi ɔhɔ awoka ne mɔ azo. Noko mɔɔ Lɔɔto zɛlɛle Nyamenle kɛ ɔmaa ɔnriandi ɔhɔ Zowaa la, Nyamenle yɛle mɔɔ ɔhanle la.—w23.07, m. 21.

Saa raalɛ bie ahu nea nlanwonvoninli a, duzu a ɔbahola yeayɛ a?

Ɔwɔ kɛ ɔkakye kɛ nvonleɛ ne ɛnvi ye. Ɔwɔ kɛ ɔfa ye adwenle ɔsie ɔ nee Gyihova agɔnwolɛvalɛ ne azo na ɔdwenledwenle mraalɛ mɔɔ yiale ngyegyelɛ na bɛzɛlɛle Gyihova bɛmaanle ɔkyekyele bɛ rɛle la anwo edwɛkɛ mɔɔ wɔ Baebolo ne anu la anwo. Ɔbahola yeaboa ɔ hu yeamaa yeahwe ɔ nwo yeavi tɛnlabelɛ mɔɔ ɔbamaa yeanlea nlanwonvoninli la anwo.—w23.08, m. 14-17.

Saa awie tendɛ tia yɛ diedi ne a, kɛzi nwunu baboa yɛ yeamaa yɛabua ye bɛtɛɛ ɛ?

Yɛbahola yɛabu ye kpuya ne kɛ ɔle adenle mɔɔ yɛbalua zo yɛanwu mɔɔ ɔlɛdwenle nwo la. Ɔbamaa yɛahola yɛabua ye bɛtɛɛ.—w23.09, m. 17.

Duzu a yɛsukoa yɛfi kɛzi Mɛle nyianle anwosesebɛ la anu a?

Mɔɔ Mɛle nwunle kɛ ɔbawo Mɛzaya ne la, ɔkpondɛle moalɛ ɔvile awie mɔ ɛkɛ. Geebeleɛle nee Ɛlezabɛte gyinlanle Ngɛlɛlera ne azo maanle Mɛle anwosesebɛ. Yɛdayɛ noko yɛbahola yɛakpondɛ anwosesebɛ yɛavi yɛ mediema diedima ɛkɛ.—w23.10, m. 15.

Kɛzi Gyihova bua yɛ asɔneyɛlɛ ne mɔ ɛ?

Yebɔ ɛwɔkɛ kɛ ɔbadie yɛ asɔneyɛlɛ yɛɛ ɔnea kɛzi ɔfale ye bodane ne anwo la. (Gyɛ. 29:12) Bie a ɔbabua nzɛlɛlɛ ko ne ala wɔ ndenle ngakyile zo, noko ɔbaboa yɛ dahuu.—w23.11, m. 21-22.

Wulomuma 5:2 hanle “anyelazo” nwo edwɛkɛ, ɔti duzu ati a bɛhanle nwolɛ edwɛkɛ bieko wɔ ngyɛnu 4 ne a?

Saa awie te edwɛkpa ne a, bie a ɔbanyia anyelazo kɛ ɔbadɛnla aze wɔ paladaese azɛlɛ zo. Noko saa ɔlɛnwu amaneɛ ngakyile na ɔgyinla nu kpundii na ɔnwu kɛzi yenyia Nyamenle anyunlu ɛlolɛ la a, ɔmaa ye anyelazo ne yɛ kpole na ɔbayɛ debie mɔɔ sonle bolɛ ɔmaa ye a.—w23.12, m. 12-13.