1. Saa yɛsuzu Ebileham diedi ne anwo a, kpuya boni a bie a yɛbabiza a?

 MENLI dɔɔnwo ɛde Ebileham duma ɛdeɛ, noko ɔ nwo edwɛkɛ ekyi bie ala a bɛ nuhua dɔɔnwo ze a. Noko wɔmɔ ɛze Ebileham anwo edwɛkɛ dɔɔnwo. Kɛ neazo la, ɛze kɛ bɛvɛlɛle Ebileham kɛ “menli kɔsɔɔti mɔɔ lɛ diedi . . . la bɛ ze.” (Wlo. 4:11) Noko bie a ɛbanyia adwenle kɛ, ‘Asoo mebahola meava Ebileham agyakɛ na meanyia diedi mɔɔ ɔnyianle la bie ɔ?’ Ɛhɛe, ɛbahola.

2. Duzu ati a ɔhyia kɛ yɛsukoa Ebileham neazo ne anwo debie a? (Gyemise 2:​22, 23)

² Adenle ko mɔɔ yɛbahola yɛalua zo yɛanyia Ebileham diedi ne bie la a le kɛ yɛbazukoa ye neazo ne anwo debie. Ebileham lile Nyamenle mɛla zo na ɔdule ɔhɔle maanle mɔɔ wɔ moa la anu, ɔdɛnlanle ɛdanlɛ azua nu ɛvolɛ dɔɔnwo na anrɛɛ ɔfa ɔ ra Ayezeke mɔɔ ɔkulo ye edwɛkɛ kpalɛ la bɔbɔ yeabɔ afɔle. Mɔɔ ɔyɛle la kile kɛ ɛnee ɔlɛ diedi kpole. Ebileham diedi nee ye gyima maanle ɔnyianle Nyamenle anyunlu ɛlolɛ na ɔrayɛle ɔ gɔnwo. (Kenga Gyemise 2:​22, 23.) Gyihova kulo kɛ yɛnyia nyilalɛ zɔhane mɔ bie—ɔkulo kɛ ɛdawɔ noko ɛnyia bie. Ɛhye ati a ɔmaanle Baebolo kɛlɛvolɛ ɛhye mɔ, Pɔɔlo nee Gyemise hɛlɛle Ebileham neazo ne anwo edwɛkɛ la. Bɛmaa yɛzuzu ye neazo ne mɔɔ bɛha nwolɛ edwɛkɛ wɔ Wulomuma tile 4 nee Gyemise tile 2 la anwo. Adile nwiɔ ɛhye mɔ hanle Ebileham anwo edwɛkɛ bie mɔɔ hyia kpalɛ la.

3. Ngɛlɛlera titili boni a Pɔɔlo nee Gyemise amunwiɔ hwenle adwenle hɔle zo a?

³ Pɔɔlo nee Gyemise amunwiɔ hwenle adwenle hɔle edwɛkɛ mɔɔ wɔ Gyɛnɛsese 15:6 la azo, ɔse: “[Ebileham nyianle] diedi  wɔ Gyihova anu na Nyamenle bule nyɛleɛ ɛhye kɛ ɔle tenlene.” Saa Nyamenle bu awie kɛ ɔle tenlenenli a, mɔɔ kile la a le kɛ ɔdie ye ɔto nu yɛɛ ɔbu ye bɔbɔ kɛ nvonleɛ biala ɛnle ɔ nwo. Ɔyɛ anyelielɛ kpole kɛ Nyamenle babu sonla mɔɔ ɛnli munli na ɔle ɛtanevolɛ la kɛ nvonleɛ biala ɛnle ɔ nwo la! Ɔbayɛ kɛ, kɛ ɛkulo kɛ Nyamenle bu ɛdawɔ noko la ɛne, na ɔbahola yeara ye zɔ. Yɛbazukoa deɛmɔti Gyihova vɛlɛle Ebileham tenlenenli nee mɔɔ yɛbahola yɛayɛ amaa yeavɛlɛ yɛ tenlenema la.

4. Duzu a ɔmmaa alesama ɛngola ɛnyɛ tenlenema a?

⁴ Pɔɔlo hanle ye wɔ ye kɛlata ne mɔɔ ɔhɛlɛle ɔhɔmaanle Wulomuma ne la anu kɛ alesama kɔsɔɔti le ɛtanevolɛma. (Wlo. 3:23) Ɔti kɛzi bɛbahola bɛabu awie kɛ ɔle tenlenenli anzɛɛ nvonleɛ ɛnle ɔ nwo na yeanyia Nyamenle anyunlu ɛlolɛ ɛ? Amaa Pɔɔlo aboa nɔhalɛ Kilisienema amuala yeamaa bɛanyia kpuya zɔhane anwo mualɛ la, ɔhwenle adwenle ɔhɔle Ebileham anwo zo.

5. Duzu a Gyihova gyinlanle zo bule Ebileham tenlenenli a? (Wulomuma 4:​2-4)

⁵ Mɔɔ Ebileham de Keena azɛlɛ zo la a Gyihova vɛlɛle ye tenlenenli a. Duzu ati a Gyihova hanle kɛ Ebileham le tenlenenli a? Asoo kɛmɔ Ebileham lile Mosisi Mɛla ne azo pɛpɛɛpɛ la ati ɔ? Kyɛkyɛ. (Wlo. 4:13) Mɔɔ Nyamenle hanle kɛ Ebileham le tenlenenli la, ɔbole ɛvolɛ 400 kolaa na bɛava Mɛla ne bɛamaa Yizilayɛ maanle ne. Ɔti duzu titili a Nyamenle gyinlanle zo bule Ebileham tenlenenli a? Ɔlua Gyihova ɛlolɛ kpole ne ati, ɔgyinlanle Ebileham diedi ne azo ɔbule ye tenlenenli.—Kenga Wulomuma 4:​2-4.

6. Duzu ati a Gyihova kola bu ɛtanevolɛ bie kɛ ɔle tenlenenli ɛ?

⁶ Eza Pɔɔlo hanle kɛ, saa awie nyia diedi wɔ Nyamenle anu a, “bɛbu ye diedi ne kɛ ɔle tenlene nyɛleɛ.” (Wlo. 4:5) Pɔɔlo vale zɔle zolɛ kɛ: “Zɔhane ala a Devidi noko ka anyelielɛ mɔɔ awie nyia ye wɔ mekɛ mɔɔ Nyamenle kɛbu ye tenlenenli noko ɔnlua gyima zo la anwo edwɛkɛ kɛ: ‘Anyelielɛ a le bɛdabɛ mɔɔ bɛva bɛ mɛladonlɛ bɛhyɛ bɛ na bɛheda bɛ ɛtane ne mɔ azo la; anyelielɛ a le sonla ne mɔɔ Gyihova ɛnrɛbu ye ɛtane nwo mgbonda la.’” (Wlo. 4:​6-8; Edw. 32:​1, 2) Nyamenle fa bɛdabɛ mɔɔ bɛnyia diedi wɔ ye nu la ɛtane kyɛ bɛ anzɛɛ ɔkeda bɛ ɛtane zo. Ɔfa bɛ ɛtane ne mɔ ɔkyɛ bɛ bɔkɔɔ mɔɔ ɔmbu nwolɛ mgbonda a. Ɔbu menli zɛhae mɔ kɛ nvonleɛ ɛnle bɛ nwo yɛɛ bɛle tenlenema ɔlua bɛ diedi ne ati.

7. Duzu ati a yɛkola yɛka kɛ ɛnee Nyamenle tete azonvolɛ le tenlenema a?

⁷ Bɛbule Ebileham, Devidi nee Nyamenle azonvolɛ nɔhavoma gyɛne kɛ bɛle tenlenema ɛdeɛ, noko ɛnee bɛtɛde ɛtanevolɛma mɔɔ bɛnli munli a. Noko saa Nyamenle nwu bɛ diedi ne na ɔfa bɛ ɔtoto bɛdabɛ mɔɔ bɛnzonle ye la anwo a, ɔbu bɛ kɛ nvonleɛ biala ɛnle bɛ nwo. (Ɛfɛ. 2:12) Kɛ mɔɔ Pɔɔlo maanle ɔlale ali wɔ ye kɛlata ne anu la, diedi a le debie titili mɔɔ maa yɛ nee Nyamenle nyia agɔnwolɛvalɛ kpalɛ a. Ɛhye a zile wɔ Ebileham nee Devidi afoa nu a, na kɛ ɔde ye wɔ yɛdayɛ noko yɛ afoa nu la ɛne.

8-9. Edwɛkɛ mɔɔ ɛnle nɔhalɛ la boni mɔ a awie mɔ ɛha ye wɔ Pɔɔlo nee Gyemise ngɛlata ne mɔ anwo a, na duzu ati ɔ?

⁸ Kilisienemaanle ne ɛzu diedi nee gyima nwo kpolera wɔ ɛvolɛ ɛya dɔɔnwo anu. Ɛsɔfoma bie mɔ kilehile kɛ debie mɔɔ ɔwɔ kɛ ɛyɛ amaa wɔanyia ngoane la ala a le kɛ ɛbalie Awulae Gyisɛse Kelaese wɔali. Bie a wɔde kɛ bɛlɛka kɛ, “Wɔmɔ die Gyisɛse di na ɛbanyia  ngoane.” Bie a ɛsɔfoma ne bahwe adwenle ahɔ Pɔɔlo edwɛkɛ ɛhye bɔbɔ azo: “Nyamenle kɛbu ye tenlenenli noko ɔnlua gyima zo.” (Wlo. 4:6) Noko eza bie mɔ ka kɛ, saa ɛtudu adenle ɛkɔ ɛleka ngakyile mɔɔ asɔne ne bu bɛ kɛ ɛkɛ ne le nwuanzanwuanza na ɛdi asɔne ne amaamuo ngakyile zo a, ɛbahola “wɔalie ɛ nwo.” Bie a bɛbahwe adwenle bɛahɔ Gyemise 2:24 azo: “Ɔlua gyima zo a bɛbu awie tenlenenli a na tɛ diedi angome azo ɔ.”

⁹ Ɔlua diedi ngakyile ɛhye mɔ ati, Baebolo nwo mbɔlɔba bie mɔ suzu kɛ Pɔɔlo nee Gyemise adwenle anyia wɔ diedi nee gyima nwo edwɛkɛ ne anwo. Bie a ɛsɔfo ne mɔ baha kɛ Pɔɔlo die di kɛ saa bɛbabu awie kɛ ɔle tenlenenli a, debie mɔɔ ɔhyia la ala a le diedi noko Gyemise kilehile kɛ saa awie bazɔ Nyamenle anye a, ɔhyia kɛ ɔyɛ gyima. Abɔlɔba bie mɔɔ kilehile ɛzonlenlɛ nwo debie la hanle ye zɛhae: “Gyemise ande adwenle mɔɔ ɛnee Pɔɔlo lɛ mɔɔ ɔti ɛnee ɔlɛtinli zolɛ kɛ [saa bɛbabu awie tenlenenli a] ɔgyi diedi ala azo na tɛ gyima zo la abo.” Noko Gyihova a maanle Pɔɔlo nee Gyemise hɛlɛle zɔhane edwɛkɛ ne mɔ a. (2 Tim. 3:16) Ɔti bie a adenle sikalɛ bie wɔ ɛkɛ mɔɔ yɛbahola yɛalua zo yɛade bɛ edwɛkɛ ne mɔ abo a. Ɔwɔ kɛ yɛsuzu mɔɔ ɛnee bɛ nuhua ko biala ɛlɛka nwolɛ edwɛkɛ wɔ bɛ ngɛlata ne mɔ anu la anwo amaa yɛade bɛ edwɛkɛ ne mɔ abo kpalɛ.

10. “Gyima” boni mɔ a ɛnee Pɔɔlo ɛlɛka nwolɛ edwɛkɛ a? (Wulomuma 3:​21, 28) (Eza nea nvoninli ne.)

¹⁰ “Gyima” boni mɔ a Pɔɔlo hwenle adwenle hɔle zo wɔ Wulomuma tile 3 nee 4 ne anu a? Mɔɔ ɛnee ɔlɛka nwolɛ edwɛkɛ la a le “mɛla gyima,” Mosisi mɛla ne mɔɔ bɛvale bɛmaanle Yizilayɛma wɔ Saenae Boka ne azo la. (Kenga Wulomuma 3:​21, 28.) Ɔzɔho kɛ wɔ Pɔɔlo  mekɛ zo ɛnee ɔyɛ se ɔmaa Dwuu Kilisienema bie mɔ kɛ bɛbalie bɛado nu kɛ Mosisi Mɛla ne nee gyima ngakyile mɔɔ Mɛla ne ka kɛ bɛyɛ la ɛpɛ nu. Ɔti Pɔɔlo hwenle adwenle hɔle Ebileham neazo ne azo vale hilele kɛ saa Nyamenle babu awie kɛ ɔle tenlenenli a, ɔngyi “mɛla gyima zo.” Ɔgyi diedi zo. Ɛhye maa yɛ anwosesebɛ kpalɛ ɔluakɛ ɔmaa yɛnyia anwodozo kɛ yɛbahola yɛayɛ mɔɔ sɔ Nyamenle anye la. Ɛhye kile kɛ yɛbahola yɛanyia diedi wɔ Nyamenle nee Kelaese anu, na yemɔ bamaa yɛanyia Nyamenle anyunlu ɛlolɛ.

11. “Gyima” boni mɔ a ɛnee Gyemise ɛlɛka nwolɛ edwɛkɛ a?

¹¹ Noko tɛ “mɛla gyima” mɔɔ Pɔɔlo hanle nwolɛ edwɛkɛ la a bɛha nwolɛ edwɛkɛ wɔ Gyemise tile 2 la. Ɛnee Gyemise ɛlɛka gyima anzɛɛ ninyɛne mɔɔ Kilisienema yɛ ye kenle ko biala wɔ bɛ ɛbɛlabɔlɛ nu la anwo edwɛkɛ. Gyima ɛhye mɔ maa yɛnwu kɛ saa Kilisienenli bie lɛ Nyamenle anu diedi anzɛɛ ɔnle ye nu diedi a. Suzu neazo nwiɔ mɔɔ Gyemise vale lile gyima la anwo.

12. Kɛzi Gyemise hilehilele nu kɛ diedi nee gyima lua adenle ko azo ɛ? (Eza nea nvoninli ne.)

¹² Wɔ neazo mɔɔ limoa la anu, Gyemise hanle deɛmɔti ɔnle kɛ Kilisienema yɛ nyeyenu wɔ mekɛ mɔɔ bɛ nee awie mɔ ɛlɛdi la anwo edwɛkɛ. Ɔvale nrenyia bie mɔɔ lale atiakunlukɛnlɛma ali hilele sukoavolɛ bie noko ɔbule ɔ nye ɔguale ehyianli bie anwo zo la edwɛkɛ ne ɔyɛle ɛhye anwo ndonwo. Gyemise hanle kɛ bie a nrenyia ɛhye baha kɛ ɔlɛ diedi, noko gyima mɔɔ boka ye diedi ne anwo la wɔ ni? (Gye. 2:​1-5, 9) Wɔ neazo mɔɔ tɔ zo nwiɔ la anu, Gyemise hanle awie bie mɔɔ ɔnwunle kɛ ɔ ‘diema nrenyia anzɛɛ raalɛ hyia adɛladeɛ anzɛɛ aleɛ’ noko yeamboa ye la anwo edwɛkɛ.  Saa sonla zɛhae ka kɛ ɔlɛ diedi bɔbɔ a, kɛmɔ yeanva gyima yeamboka nwo la ati, nvasoɛ biala ɛnle zo. Kɛ mɔɔ Gyemise hɛlɛle la, “diedi mɔɔ gyima ɛmboka nwolɛ la le wulera.”—Gye. 2:​14-17.

13. Neazo boni a Gyemise hanle nwolɛ edwɛkɛ vale hilele kɛ yɛdua nyɛleɛ zo yɛda yɛ diedi ali a? (Gyemise 2:​25, 26)

¹³ Gyemise hwenle adwenle hɔle Releehabe anwo zo kɛ ɔle awie mɔɔ ɔvale ye nyɛleɛ ɔhilele kɛ ɔlɛ diedi a. (Kenga Gyemise 2:​25, 26.) Ɛnee yede Gyihova anwo edwɛkɛ na ɔnwunle kɛ ɔlɛboa Yizilayɛma. (Dwɔh. 2:​9-11) Ɔluale ye nyɛleɛ zo ɔhilele kɛ ɔlɛ diedi—ɔbɔle Yizilayɛ busiama nwiɔ ne anwo bane wɔ mekɛ mɔɔ bɛ ngoane la esiane nu la. Ɔlua ɛhye ati, bɛbule raalɛ ɛhye mɔɔ ɔnli munli na eza ɔnle Yizilayɛnli la tenlenenli kɛ Ebileham la. Neazo mɔɔ ɔyɛle la si zolɛ kɛ ɔhyia kɛ yɛfa gyima yɛboka yɛ diedi ne anwo.

14. Kɛzi edwɛkɛ mɔɔ Pɔɔlo nee Gyemise hɛlɛle la amuala le ko ɛ?

¹⁴ Ɛnee Pɔɔlo nee Gyemise mɔɔ bɛhɛlɛle Baebolo ne bie la ɛlɛka diedi nee gyima nwo edwɛkɛ wɔ adenle ngakyile zo. Ɛnee Pɔɔlo ɛlɛka ahile Dwuu Kilisienema ne kɛ tɛ Mosisi Mɛla ne mɔɔ bɛbali zolɛ la a bamaa Gyihova alie bɛ ado nu a. Ɛnee Gyemise ɛlɛsi zolɛ kɛ ɔhyia kɛ Kilisienema yɛ ninyɛne mgbalɛ maa awie mɔ fa kile kɛ bɛlɛ diedi.

15. Ninyɛne mɔɔ yɛbahola yɛayɛ yɛava yɛahile kɛ yɛlɛ diedi la bie mɔ a boni? (Eza nea nvoninli ne.)

¹⁵ Tɛ mɔɔ Gyihova ɛlɛka la a le kɛ saa yɛkulo kɛ bɛbu yɛ tenlenema a, ɔwɔ kɛ yɛyɛ mɔɔ Ebileham yɛle la bie pɛpɛɛpɛ. Nɔhalɛ nu, yɛbahola yɛalua yɛ gyima zo yɛala yɛ diedi ne ali wɔ ndenle dɔɔnwo azo. Yɛbahola yɛayɛ menli mɔɔ bɔ zo mɔɔ bɛlɛba yɛ debiezukoalɛ ne mɔ bie la akoaba, yɛaboa yɛ mediema mɔɔ amgba bɛhyia moalɛ la na yɛayɛ kpalɛ yɛamaa yɛ  mbusuafoɔ, ɛhye mɔ amuala le ninyɛne mɔɔ Nyamenle balie ado nu na yeayila yɛ a. (Wlo. 15:7; 1 Tim. 5:​4, 8; 1 Dwɔn 3:18) Gyima titili ko mɔɔ maa bɛnwu kɛ yɛlɛ diedi la a le mɔdenlebɔlɛ mɔɔ yɛfa yɛka edwɛkpa ne yɛkile awie mɔ la. (1 Tim. 4:16) Yɛ muala yɛbahola yɛalua yɛ nyɛleɛ zo yɛahile kɛ yɛlɛ diedi kɛ Gyihova ɛwɔkɛ ne mɔ bara nu yɛɛ ye ndenle ne mɔ di munli. Na saa yɛyɛ ye zɔ a, yɛbanyia anwodozo bɔkɔɔ kɛ Nyamenle babu yɛ tenlenema na yeavɛlɛ yɛ ɔ gɔnwo mɔ.

16. Anyelazo boni a Ebileham nyianle na ɔliele ɔlile a?

¹⁶ Wulomuma tile 4 ne twe adwenle kɔ debie titili bieko mɔɔ yɛbahola yɛazukoa yɛavi Ebileham ɛkɛ la azo: kɛzi anyelazo nwo hyia la. Gyihova bɔle ɛwɔkɛ kɛ, ɔlua Ebileham anwo zo “maanle maanle dɔɔnwo” banyia nyilalɛ. Nea anyelazo kɛnlɛma ko mɔɔ Ebileham nyianle a! (Gyn. 12:3; 15:5; 17:4; Wlo. 4:17) Noko mɔɔ Ebileham lile ɛvolɛ 100 na Sɛla lile ɛvolɛ 90 bɔbɔ la, ɛnee bɛtɛwole. Wɔ sonla nye zo, ɛnee Ebileham nee Sɛla ɛnrɛhola ɛnrɛwo. Ɛhye zɔle Ebileham nleanle kpalɛ. Noko “ɔnyianle anyelazo na ɔliele ɔlile kɛ ɔbayɛ maanle maanle dɔɔnwo bɛ ze.” (Wlo. 4:​18, 19) Na amgba anyelazo zɔhane rale nu. Ɔwole Ayezeke, kakula ne mɔɔ ɛnee bɛ nye la ye ade la.—Wlo. 4:​20-22.

17. Kɛ ɔkɛyɛ na yɛanwu kɛ bɛbahola bɛabu yɛ kɛ Nyamenle agɔnwo mɔ mɔɔ yɛle tenlenema ɛ?

¹⁷ Yɛbahola yɛanyia Nyamenle anyunlu ɛlolɛ na bɛabu yɛ kɛ yɛle ɔ gɔnwo mɔ mɔɔ yɛle tenlenema kɛ mɔɔ ɛnee Ebileham de la. Ɛhye a Pɔɔlo zile zo wɔ mekɛ mɔɔ ɔhɛlɛle kɛ: ‘Tɛ [Ebileham] angomekye a bɛhɛlɛle edwɛkɛ, “bɛbule ye nyɛleɛ ne tenlene” bɛmaanle ye a, na bɛhɛlɛle bɛmaanle yɛdayɛ mɔɔ bɛbabu yɛ nyɛleɛ ne mɔ tenlene la noko, ɔluakɛ yɛdie Mɔɔ dwazole Gyisɛse la yɛdi.’ (Wlo. 4:​23, 24) Ɔhyia kɛ yɛnyia diedi, yɛyɛ gyima na yɛnyia anyelazo kɛ mɔɔ Ebileham yɛle la. Pɔɔlo doale zo hanle yɛ anyelazo ne anwo edwɛkɛ wɔ Wulomuma tile 5 ne anu, na yɛbazuzu ɛhye anwo wɔ edwɛkɛ bieko anu.