NƆHALƐ nu, ɛ nye die ahyɛlɛdeɛ ngakyile mɔɔ Gyihova ɛva ɛmaa wɔ la anwo, bie a le nwolɛ adenle mɔɔ yeva yemaa wɔ kɛ ɛbahola wɔazi kɛzi ɛbava ahyɛlɛdeɛ ɛhye mɔ wɔali gyima la anwo kpɔkɛ la. Mɔɔ yɛ anyelielɛ la a le kɛ, Baebolo ne ka kɛ nwanye le ahyɛlɛdeɛ mɔɔ vi Nyamenle ɛkɛ a, na ɔka bɔbɔ kɛ: “Aleɛ maa bɛsele, yɛɛ nwanye maa ɛbɛlabɔlɛ yɛ anyelielɛ.” (Nol. 10:19; Edw. 104:15) Noko bie a wɔnwu kɛ, menli bie mɔ lɛ nza nwo ngyegyelɛ. Eza menli mɔɔ wɔ ewiade ɛleka ngakyile la lɛ adwenle ngakyile wɔ nzanlonlɛ nwo. Ɔti duzu a baboa Kilisienema yeamaa bɛasisi nzanlonlɛ nwo kpɔkɛ kpalɛ a?

Ɔnva nwo ɛleka mɔɔ yɛde anzɛɛ amaamuo mɔɔ bɛvale bɛhilehilele yɛ la, saa yɛmaa yɛ nzuzulɛ nee yɛ kpɔkɛzilɛ gyinla Nyamenle nza nwo ngyinlazo ne azo a, ɔbaboa yɛ na yeawie yɛ boɛ dahuu.

Bie a wɔyɛ ye nzonlɛ kɛ, menli dɔɔnwo mɔɔ wɔ ewiade ye la ta no nza yɛɛ bɛno ye dɔɔnwo. Bie mɔ no nza ɔluakɛ bɛsuzu kɛ ɔmaa bɛ nwo tɔ bɛ. Bie mɔ noko no fa gyinla bɛ ngyegyelɛ nloa. Yɛɛ wɔ ɛleka bie mɔ saa ɛno nza dɔɔnwo a, bɛbu ye kɛ ɛ nye ɛbuke anzɛɛ ɛ nwo yɛ se.

Noko Kilisienema nyia adehilelɛ mɔɔ nrɛlɛbɛ wɔ nu la fi bɛ Bɔvolɛ ne mɔɔ lɛ ɛlɔlɛ la ɛkɛ. Kɛ neazo la, yemaa yɛnwu ngyegyelɛ mɔɔ wɔ nza dɔɔnwo ɛnlonlɛ nu la. Bie a wɔgenga awie mɔɔ bo nza nee ngyegyelɛ mɔɔ ɔyia la bie mɔ anwo edwɛkɛ dɔɔnwo wɔ Mrɛlɛbulɛ 23:​29-35. a Daniel, asafo nu kpanyinli bie mɔɔ wɔ Europe la hanle kɛzi ɛnee ye ɛbɛlabɔlɛ de kolaa na yearayɛ nɔhalɛ Kilisienenli la anwo edwɛkɛ. Ɔse: “Nza dɔɔnwo ɛnlonlɛ maanle mensisile kpɔkɛ ɛtane na mengɔle tɛnlabelɛ ngakyile mɔɔ ɛnle kpalɛ la anu. Kɛkala bɔbɔ saa mekakye a, ɔmaa medi nyane kpalɛ.”

Kɛ ɔkɛyɛ na Kilisienema asisi kpɔkɛ kpalɛ na bɛakpo ngyegyelɛ mɔɔ nza dɔɔnwo ɛnlonlɛ fa ba la ɛ? Debie titili mɔɔ baboa yɛ la a le kɛ yɛbamaa adwenle mɔɔ Nyamenle lɛ wɔ nwo la ahile yɛ nzuzulɛ nee yɛ nyɛleɛ adenle.

Maa yɛnlea mɔɔ Baebolo ne ka wɔ nza nwo nee adwenle mɔɔ menli bie mɔ fa no la.

Nyamenle Edwɛkɛ ne ɛndendɛ ɛntia nza ekyi ɛnlonlɛ. Nɔhalɛ nu, Baebolo ne ka kɛ nwanye ɛnlonlɛ kola yɛ anyelielɛ debie. Ɔka kɛ: “Fa anyelielɛ di wɔ aleɛ na fa ahonle nu fɛlɛkolilɛ no wɔ nwanye.” (Nol. 9:7) Gyisɛse nlonle nwanye wɔ mekɛ bie mɔ anu, na zɔhane ala a Gyihova azonvolɛ nɔhavoma bie mɔ yɛle a.—Mat. 26:​27-29; Luku 7:34; 1 Tim. 5:23.

Nyamenle Edwɛkɛ ne ɛndendɛ ɛntia nza ekyi ɛnlonlɛ ɛdeɛ, noko ɔtendɛ ɔtia nzabolɛ. Ɔka ye wienyi kɛ: “Bɛmmabo nza.” (Ɛfɛ. 5:18) Yɛɛ ɔka bɔbɔ kɛ “nzabovoma . . . ɛnrɛnyia Nyamenle Belemgbunlililɛ ne.” (1 Kɔl. 6:10) Amgba Gyihova anye ɛnlie nza dɔɔnwo ɛnlonlɛ yɛɛ nzabolɛ nwo fee. Yɛmmaa yɛ amaamuo ɛngile yɛ mɔɔ ɔwɔ kɛ yɛyɛ la, emomu, yɛgyinla adwenle mɔɔ Nyamenle lɛ la azo a yɛsisi kpɔkɛ a.

Bie mɔ te nganeɛ kɛ bɛbahola bɛanlo nza dɔɔnwo noko bɛnrɛbo ɛlɛ. Noko ɛhye anzi yɛ ɛzulolɛ kpalɛ. Ngɛlɛlera ne maa ɔda ali wienyi kɛ, saa nrenyia anzɛɛ raalɛ ‘yɛ akɛlɛ maa nza’ a, ɔbahola yeamaa yeabɔ ɛbɛlatane na yeayɛ ɛtane yeatia Gyihova. (Tae. 2:3; Mrɛ. 20:1) Gyisɛse bɔle yɛ kɔkɔ kɛ “nza dɔɔnwo ɛnlonlɛ” ɛnrɛhola ɛnrɛmaa awie ɛnrɛhɔ Nyamenle ewiade fofolɛ ne anu. (Luku 21:​34-36)  Duzu a bahola aboa Kilisienenli bie amaa yeandɔ ngyegyelɛ mɔɔ nza dɔɔnwo ɛnlonlɛ fa ba la anu a?

Esiane wɔ nu kɛ awie bamaa ɛleka mɔɔ bɛtetele ye la ahile ye adwenle mɔɔ ɔwɔ kɛ ɔnyia wɔ nzanlonlɛ nwo la. Saa ɔba ye wɔ aleɛ nee nza nwo a, Kilisienema da nrɛlɛbɛ ali amaa bɛayɛ mɔɔ sɔ Gyihova anye la. Baebolo ne kakye yɛ kɛ: “Saa bɛlɛdi o, bɛlɛno o, anzɛɛ bɛlɛyɛ debie gyɛne biala o, bɛyɛ ɔ muala bɛwula Nyamenle anyunlunyia.” (1 Kɔl. 10:31) Suzu kpuya nee Baebolo ngyinlazo ɛhye mɔ anwo:

Kɛmɔ mekulo kɛ awie mɔ anye die me nwo la ati a meno nza ɔ? Ɛzɛdɔso 23:2 ka kɛ: “Mmadi menli dɔɔnwo anzi.” Wɔ ɛke, ɛnee Gyihova ɛlɛbɔ Yizilayɛma kɔkɔ kɛ bɛmmadi menli mɔɔ yɛ mɔɔ ɔngulo la anzi. Folɛdulɛ zɔhane baboa Kilisienema noko ɛnɛ. Saa yɛmaa awie mɔ nyia yɛ adwenle nee kpɔkɛ mɔɔ yɛsisi la azo tumi a, ɔbamaa yɛahwe yɛ nwo yɛavi Gyihova anwo na ɔnrɛmaa yɛnrɛli ye ngyinlazo ne mɔ azo.—Wlo. 12:2.

Asoo meno nza amaa menli abu me kɛ me nwo yɛ se ɔ? Wɔ amaamuo bie mɔ anu, menli dɔɔnwo ta no nza dɔɔnwo na bɛnnwu ye kɛ nvonleɛ wɔ nwo. (1 Pita 4:3) Noko yɛ mɔɔ 1 Kɔlentema 16:13 maa yɛ anwosesebɛ kɛ yɛyɛ la nzonlɛ: “Bɛzinza, bɛgyinla kpundii wɔ diedi ne anu, bɛnyia akɛnrasesebɛ, bɛmaa bɛ nwo ɛyɛ se.” Asoo nza bahola aboa awie yeamaa ɔ nwo ayɛ se ɔ? Kyɛkyɛ, ɔmaa ye anwosesebɛ ka aze. Nza ɛmmaa awie ɛndwenle ninyɛne nwo ɛngɔ moa yɛɛ ɔnsisi kpɔkɛ kpalɛ. Ɔti nza dɔɔnwo ɛnlonlɛ ɛngile kɛ awie lɛ anwosesebɛ, emomu ɔda ye ali kɛ ahenle le koasea. Ayezaya 28:7 ka awie mɔɔ nza ti ɔminli la anwo edwɛkɛ kɛ ɔtotɔ yɛɛ ɔnzi pi.

Anwosesebɛ kpalɛ vi Gyihova ɛkɛ, na saa yɛsinza na yɛgyinla kpundii wɔ diedi ne anu a, yɛɛ yɛ sa baha ye a. (Edw. 18:32) Saa Kilisienenli bie bahola ayɛ ɛhye a, kyesɛ ɔmaa ɔ nye da ɛkɛ na ɔyɛ ye ninyɛne ndɛndɛ ɔfa ɔbɔ ɔ nwo bane ɔfi debie biala mɔɔ ɔbazɛkye ɔ nee Gyihova agɔnwolɛvalɛ ne la. Mɔɔ Gyisɛse wɔ azɛlɛ ye azo la, ɔlale subane zɔhane bie ali, na menli dɔɔnwo bule ye ɔluakɛ ɛnee ɔlɛ akɛnrasesebɛ yɛɛ dahuu ɔyɛ mɔɔ le kpalɛ la.

 Asoo meno nza amaa meaye me adwenle meavi me ngyegyelɛ ne mɔ azo ɔ? Sunsum ne hanle edwɛndolɛnli bie maanle ɔhɛlɛle kɛ: “Mɔɔ adwenleadwenle bole me nwo zo la, ɛkyekyele me rɛle na ɛmaanle me ahonle dɔle me azule nu.” (Edw. 94:19) Saa wɔ ngyegyelɛ bo ɛ nwo zo a, fa ɛ nwo to Gyihova anwo zo, tɛ nza ɔ. Adenle kpalɛ mɔɔ ɛbahola wɔalua zo wɔayɛ ɛhye la a le kɛ ɛbayɛ asɔne dahuu. Eza menli dɔɔnwo ɛnwu kɛ saa bɛkpondɛ folɛdulɛ kpalɛ bɛfi bɛ gɔnwo bie mɔɔ ɛnyi sunsum nu la ɛkɛ a, ɔboa kpalɛ. Nɔhalɛ nu, saa awie no nza kɛ ɔfa yeagyinla ngyegyelɛ mɔɔ ɔlɛyia la anloa a, ɔmmaa ɔnnyia ɛhulolɛ kɛ ɔbayɛ mɔɔ le kpalɛ la. (Hozia 4:11) Daniel mɔɔ yɛlimoa yɛha ɔ nwo edwɛkɛ la hanle kɛ: “Adwenleadwenle dɔle me nwo yɛɛ ɛnee me adwenle bua me fɔlɛ. Menonle nza amaa meaye me adwenle meavi me tɛnlabelɛ ne azo, noko me ngyegyelɛ ne yɛle kpole. Me gɔnwo mɔ hwenle bɛ nwo vile me nwo yɛɛ mendele nganeɛ kɛ nvasoɛ ɛnle me nwo zo.” Duzu a boale Daniel a? Ɔhanle kɛ: “Menwunle kɛ ɛnee mehyia Gyihova, na tɛ nza ɔ. Mɔɔ menyɛle ye zɔ la, mengolale mengyinlanle me ngyegyelɛ ne mɔ anloa na menlile zolɛ konim.” Nɔhalɛ ne a le kɛ, Gyihova wɔ ɛkɛ ne dahuu kɛ ɔboa yɛ, saa bɔbɔ yɛte nganeɛ kɛ yɛnrɛhola yɛnrɛyɛ yɛ tɛnlabelɛ ne anwo ɛhwee a.—Fel. 4:​6, 7; 1 Pita 5:7.

Saa ɔyɛ a ɛno nza a, duzu ati a ɛmbiza ɛ nwo kpuya ɛhye mɔ ɛnnea saa ɔwɔ kɛ ɛyɛ nzenzaleɛ wɔ kɛzi ɛno ye la anu a: ‘Asoo me busuanli bie anzɛɛ me gɔnwo kpalɛ bie ɛha kɛzi me nzanlonlɛ ne gyegye ye la anwo edwɛkɛ ɔ?’ Saa bɛha bie bɛhile wɔ a, ɔkile kɛ ɛlɛnyia subane anzɛɛ ɛlɛyia ngyegyelɛ bie mɔɔ ɛnze ye a. ‘Asoo meno nza dɔɔnwo kɛkala metɛla dɛba ne ɔ?’ Kɛ awie mɔɔ nza ɛtɛgyale ye noko ɔka ekyii ɔgya ye la tɛnlabelɛ ne de la ɛne. ‘Saa kenle kɛyɛ nsa bie anzɛɛ mekɛ ekyii pɛ nu na metɛnonle nza a, mengola me nwo sɔ ɔ?’ Saa zɔhane a ɔde a, ɛnee bie a nzanlonlɛ ɛha ɛ nwo anzɛɛ yegya wɔ. Bie a ɛbahyia dɔketa bie mɔɔ ze nwolɛ edwɛkɛ la moalɛ amaa wɔahola wɔali ngyegyelɛ ne azo.

 Kɛmɔ nzanlonlɛ maa bɛyia ngyegyelɛ dɔɔnwo la ati, Kilisienema bie mɔ ɛzi kpɔkɛ kɛ bɛnrɛnlo nza biala mɔɔ anu yɛ se la. Bie mɔ noko ɛzi kpɔkɛ kɛ bɛnrɛnlo nza ɔluakɛ ɔnyɛ bɛ fɛ. Saa ɛ gɔnwo bie ɛzi kpɔkɛ zɛhae bie a, ɛbahola wɔala atiakunlukɛnlɛma ali na wɔalie ye kpɔkɛzilɛ ne wɔado nu, mmatendɛ ɛtia ye.

Anzɛɛ bie a Kilisienenli bie ɛnwu kɛ nrɛlɛbɛ wɔ nu kɛ ɔbazi dodo mɔɔ ɔbanlo la anwo kpɔkɛ. Anzɛɛ ɔdaye mumua ne ɔbali mɛla wɔ mekɛ mɔɔ ɔbanlo bie la anwo, bie a dapɛne biala ɔbanlo ko anzɛɛ ɔlɛdi aleɛ a ɔbanlo ekyi. Bie mɔ noko ɛzi nza holɛ ko mɔɔ bɛbanlo la anwo kpɔkɛ, bie a le kɛ bɛbanlo nwanye anzɛɛ biya ekyi noko bɛnrɛnlo nza mɔɔ anu yɛ se, saa bɔbɔ bɛva bɛfonla menlemenle nza a. Saa awie di ɔdaye mumua ne ye nzanlonlɛ nwo mɛla a, ɔnrɛyɛ se kɛ ɔbali zolɛ. Na saa Kilisienenli mɔɔ ɛnyi sunsum nu la bɔ kpɔkɛ zɛhae na ɔsi ɔ gyakɛ aze kɛ ɔfa yeali gyima a, ɔnle kɛ ɔmaa adwenle mɔɔ awie mɔ banyia wɔ ɔ nwo la gyegye ye.

Saa yɛlɛsi nzanlonlɛ nwo kpɔkɛ a, ɔwɔ kɛ yɛsuzu adwenle mɔɔ awie mɔ lɛ la noko anwo. Wulomuma 14:21 ka kɛ: “Ɔle kpalɛ kɛ ɛnrɛli nane anzɛɛ ɛnrɛnlo nza anzɛɛ ɛnrɛyɛ debie biala mɔɔ kɛmaa ɛ diema kɛkpo aze la.” Kɛ ɔkɛyɛ na wɔava folɛdulɛ ɛhye wɔali gyima ɛ? Da mediema ɛlɔlɛ ali. Saa ɛsuzu kɛ ɛno nza a ɔbagyegye awie a, asoo ɛlɔlɛ ti ɛnrɛgyakyi ɔ? Saa ɛyɛ ye zɔ a, ɔkile kɛ ɛdwenle awie mɔ nganeɛdelɛ nwo yɛɛ ɛbu bɛ, na ɛlɛkpondɛ bɛ boɛyɛlɛ na tɛ ɛ ngome wɔ ɛdeɛ.—1 Kɔl. 10:24.

Eza bie a arane ne lɛ nzanlonlɛ nwo mɛla na ɔwɔ kɛ ɔka Kilisienenli bie kpɔkɛzilɛ. Bie a mɛla zɔhane mɔ kile ɛvolɛ mɔɔ awie di a ɔkola ɔno nza la anzɛɛ ɔtua kɛ ɔnle kɛ awie no nza fa ka kale anzɛɛ fa milahyinli bie yɛ gyima.—Wlo. 13:​1-5.

Gyihova ɛli yɛ eni na yemaa yɛ ahyɛlɛdeɛ ngakyile, na nuhua ko a le fanwodi mɔɔ yɛlɛ kɛ yɛbakpa kɛzi yɛbava ye ahyɛlɛdeɛ ne mɔ yɛali gyima la. Yɛkola yɛkpa mɔɔ yɛbali nee mɔɔ yɛbanlo la. Ɔrɛla ye kɛ, yɛbava fanwodi ɛhye yɛayɛ ninyɛne mɔɔ sɔ yɛ anwuma Selɛ ne anye la amaa yɛahile kɛ ahyɛlɛdeɛ ɛhye sonle bolɛ maa yɛ.