1. Amaa yɛanyi sunsum nu la, duzu a ɔwɔ kɛ yɛyɛ a?

 SAA yɛnea kɛzi ngakula nyi ndɛndɛ yɛ mgbanyinli la a, ɔsi yɛ nwo kpole. Ɔzɔho kɛ bɛnyɛ ɛnyilɛ ɛhye anwo ɛhwee. Noko saa yɛbanyi sunsum nu a, yemɔ ɔwɔ kɛ yɛyɛ nwolɛ debie. b (1 Kɔl. 13:11; Hib. 6:1) Amaa yɛadwu zɔhane bodane ne anwo la, ɔhyia kɛ yɛ nee Gyihova nyia agɔnwolɛvalɛ kyengye. Eza yɛhyia ye sunsum nwuanzanwuanza ne wɔ mekɛ mɔɔ yɛlɛsukoa kɛ yɛbanyia subane kpalɛ, yɛlɛsukoa ninyɛne bie mɔ ɛyɛlɛ na yɛlɛsiezie yɛ nwo yɛamaa ɛzonlelilɛ mɔɔ yɛbanyia ye kenle bie la.—Mrɛ. 1:5.

2. Duzu a yɛsukoa yɛfi Gyɛnɛsese 1:27 anu a, na duzu a yɛbazuzu nwo wɔ edwɛkɛ ɛhye anu a?

² Gyihova bɔle alesama mrenyia nee mraalɛ. (Kenga Gyɛnɛsese 1:27.) Yɛkola yɛnwu ye wienyi kɛ mrenyia nee mraalɛ sonlabaka ne mɔ le ngakyile, noko eza mrenyia nee mraalɛ le ngakyile wɔ ndenle gyɛne zo. Kɛ neazo la, Gyihova maanle mrenyia gyima fɔɔnwo bie yɛɛ ɔmaanle mraalɛ noko gyima fɔɔnwo bie, ɔti bɛhyia subane bie mɔ yɛɛ ɔwɔ kɛ bɛnwu ninyɛne bie mɔ yɛ amaa bɛahola bɛayɛ bɛ gyima mɔɔ bɛva bɛmaa bɛ la. (Gyn. 2:18) Wɔ edwɛkɛ ɛhye anu, yɛbazuzu mɔɔ adiema bɛlɛra bahola ayɛ amaa yearayɛ raalɛ mɔɔ yenyi sunsum nu la anwo. Wɔ edwɛkɛ bieko anu, yɛbazuzu mɔɔ mediema mgbavolɛ bahola ayɛ la anwo.

3-4. Nienwu a mediema mbɛlɛra banyia menli mɔɔ yɛ neazo kpalɛ la na bɛazukoa bɛ a? (Eza nea nvoninli ne.)

³ Baebolo ne ka mraalɛ dɔɔnwo mɔɔ lɛ subane ngɛnlɛma mɔɔ hulole Gyihova na bɛzonlenle ye la anwo edwɛkɛ. (Nea edwɛkɛ, “Mraalɛ Mɔɔ Bɛ Nwo Edwɛkɛ Wɔ Baebolo Ne Anu—Duzu A Yɛsukoa  Yɛfi Bɛ Ɛkɛ A?” wɔ jw.org.) Kɛ mɔɔ yɛ edwɛkɛtile tɛkese ne kile la, ɛnee “bɛ nye ka aze” yɛɛ “bɛdi nɔhalɛ wɔ debie biala anu.” Eza mediema mbɛlɛra bahola anwu mraalɛ mɔɔ bɛnyi sunsum nu mɔɔ bɛbahola bɛazukoa bɛ neazo ne mɔ la wɔ bɛdabɛ mumua ne bɛ asafo ne mɔ anu.

⁴ Mediema mbɛlɛra, duzu ati a bɛmkpondɛ mediema mraalɛ mɔɔ bɛnyi sunsum nu mɔɔ bɛbahola bɛazukoa bɛ neazo ne la ɛ? Bɛnlea bɛ subane ngɛnlɛma ne mɔ; akee bɛzuzu kɛzi bɛbahola bɛala bɛ subane ne bie ali la anwo. Wɔ ɛdendɛkpunli mɔɔ doɔdoa zo la anu, yɛbazuzu subane titili nsa mɔɔ ɔhyia kɛ mraalɛ mɔɔ bɛnyi sunsum nu la nyia la anwo.

5. Duzu ati a saa raalɛ bie banyi sunsum nu a ɔhyia mɛlɛbɛnwoaze a?

⁵ Saa awie bayɛ Kilisienenli mɔɔ yenyi sunsum nu la a, subane mɔɔ hyia la anu ko a le mɛlɛbɛnwoaze. Saa raalɛ bɛlɛ ɔ nwo aze a, ɔbamaa ɔ nee Gyihova nee awie mɔ anyia agɔnwolɛvalɛ kpalɛ. (Gye. 4:6) Kɛ neazo la, raalɛ mɔɔ kulo Gyihova la babɛlɛ ɔ nwo aze alie tileyɛlɛ nwo ngyinlazo ne mɔɔ ye anwuma Selɛ ne ɛhyehyɛ la yeado nu. (1 Kɔl. 11:3) Zɔhane ngyinlazo ne yɛ gyima fɔɔnwo bie wɔ asafo ne nee abusua ngyehyɛleɛ ne anu. c

6. Mɛlɛbɛnwoaze nwo debie boni a mediema mbɛlɛra bahola azukoa avi Relebɛka ɛkɛ a?

⁶ Suzu Relebɛka neazo ne anwo. Ɛnee ɔle raalɛ mɔɔ ze nrɛlɛbɛ na wɔ ye ngoane mekɛ kɔsɔɔti anu, ɔlale akɛnrasesebɛ ali yɛɛ ɛnee ɔze mekɛ nee kɛzi ɔwɔ kɛ ɔda nyɛleɛ bie ali la. (Gyn. 24:58; 27:​5-17) Noko ɛnee ɔbu debie yɛɛ ɔlɛ ɛhulolɛ kɛ ɔbali adehilelɛ zo. (Gyn. 24:​17, 18, 65) Saa ɛbɛlɛ ɛ nwo aze ɛdie Gyihova ngyehyɛleɛ ɛto nu kɛ mɔɔ Relebɛka yɛle la a, ɛbayɛ neazo kpalɛ wɔamaa wɔ abusua ne nee asafo ne.

7. Kɛ ɔkɛyɛ na mediema mbɛlɛra azukoa Ɛseta na bɛahile kɛ bɛze ninyɛne mɔɔ bɛlɛ adenle bɛyɛ la ɛ?

⁷ Subane bieko mɔɔ ɔhyia kɛ Kilisienema kɔsɔɔti mɔɔ bɛnyi sunsum nu nyia la a le kɛ bɛbanwu ninyɛne mɔɔ bɛlɛ adenle bɛyɛ la. Baebolo ne maa yɛ anwosesebɛ kɛ yɛbɛlɛ yɛ nwo aze na  yɛnwu ninyɛne mɔɔ yɛlɛ adenle yɛyɛ la. (Mrɛ. 11:2) Ɛnee Ɛseta le raalɛ mɔɔ sulo Nyamenle yɛɛ ɔze ninyɛne mɔɔ ɔlɛ adenle ɔyɛ la. Ye subane ɛhye ammaa yeammemaa ɔ nwo zo. Ɔdiele folɛ mɔɔ ye busuanli Mɔdekae mɔɔ tɛla ye kpanyinli la dule ye la na ɔlile zo. (Ɛseta 2:​10, 20, 22) Saa ɛdawɔ noko ɛkpondɛ folɛdulɛ kpalɛ na ɛfa ɛdi gyima a, ɛbahola wɔala subane zɔhane bie ali.—Tae. 2:​3-5.

8. Kɛ mɔɔ 1 Timote 2:​9, 10 kile la, saa adiema bie ze ninyɛne mɔɔ ɔlɛ adenle ɔyɛ la a, kɛzi ɔbaboa ye yeamaa yeaziezie ɔ nwo kpalɛ ɛ?

⁸ Ɛseta hilele kɛ ɔze ninyɛne mɔɔ ɔlɛ adenle ɔyɛ la wɔ adenle gyɛne zo. Ɛnee Ɛseta “anwo yɛ fɛ yɛɛ ɔgyi zo sengɔɔnwo,” noko yeambɔ mɔdenle kɛ ɔtwe menli adwenle yeara ɔ nwo zo. (Ɛseta 2:​7, 15) Kɛ ɔkɛyɛ na Kilisiene raalɛ azukoa Ɛseta neazo ne ɛ? Bɛha debie ko mɔɔ ɔbahola yeazukoa la anwo edwɛkɛ wɔ 1 Timote 2:​9, 10. (Kenga.) Ɛzoanvolɛ Pɔɔlo dule Kilisiene mraalɛ folɛ kɛ bɛva mɛlɛbɛnwoaze nee adwenle mɔɔ anu la ɛkɛ la bɛwula bɛ adɛladeɛ. Giliki edwɛkɛ agbɔkɛ mɔɔ bɛvale bɛlile gyima wɔ ɛke la kile kɛ ɔwɔ kɛ Kilisiene raalɛ wula adɛladeɛ mɔɔ kile kɛ ɔbu awie mɔ yɛɛ ɔdwenle kɛzi awie mɔ te nganeɛ wɔ ye adɛladeɛ nwo la anwo. Yɛ nye die yɛ mediema mraalɛ mɔɔ fa folɛdulɛ ɛhye di gyima la anwo kpole!

9. Duzu a yɛsukoa yɛfi Abegɛle neazo ne anu a?

⁹ Adwenlenunwunlɛ le subane bieko mɔɔ ɔwɔ kɛ Kilisiene mraalɛ nyia amaa bɛanyi sunsum nu a. Duzu a le adwenlenunwunlɛ? Yemɔ a le kpɔkɛ kpalɛ ɛzilɛ—ɔkile kɛ ɛbanwu mɔɔ le kpalɛ nee mɔɔ le ɛtane la na akee wɔakpa kɛ ɛbayɛ mɔɔ le kpalɛ la. Suzu Abegɛle neazo ne anwo. Ɔ hu zile kpɔkɛ ɛtane bie mɔɔ anrɛɛ ɔbamaa munzule ado menli mɔɔ wɔ ye sua nu ɛkɛ ne amuala la. Abegɛle yɛle nwolɛ debie ndɛndɛ. Kɛmɔ ɔnwunle mɔɔ le kpalɛ na ɔyɛle la ati, ɔliele bɛ ngoane. (1 Sa. 25:​14-23, 32-35) Eza adwenlenunwunlɛ boa yɛ maa yɛnwu mekɛ mɔɔ ɔwɔ kɛ yɛtendɛ nee mekɛ mɔɔ ɔwɔ kɛ yɛyɛ koonwu la. Yɛɛ ɔboa yɛ ɔmaa yɛkile menli nwo anyelielɛ noko mekɛ ko ne ala yɛnyɛ ninyɛne mɔɔ ɔbahola yeagyegye bɛ la.—1 Tɛs. 4:11.

10-11. Saa ɛsukoa ɛgengalɛ nee ɛhɛlɛlɛ kpalɛ a, kɛzi ɔbaboa wɔ nee awie mɔ ɛ? (Eza nea nvoninli ne.)

¹⁰ Ɔhyia kɛ Kilisiene raalɛ sukoa kɛzi bɛyɛ ninyɛne bie mɔ la. Saa kakula raalɛ bie sukoa kɛzi bɛyɛ ninyɛne bie mɔ la wɔ ye ngakula nu a, ɔbaboa ye wɔ ye ngoane mekɛ kɔsɔɔti anu. Suzu neazo ekyi anwo.

¹¹ Sukoa ɛgengalɛ nee ɛhɛlɛlɛ kpalɛ. Wɔ amaamuo bie mɔ anu, bɛmbu ɛgengalɛ nee ɛhɛlɛlɛ kɛ ɔle ninyɛne mɔɔ ɔhyia kɛ mraalɛ sukoa a. Noko ɔhyia kɛ Kilisienema kɔsɔɔti sukoa ɛgengalɛ nee ɛhɛlɛlɛ. d (1 Tim. 4:13) Ɔti mmamaa debie biala si wɔ adenle kɛ ɛbazukoa ɛgengalɛ  nee ɛhɛlɛlɛ kpalɛ. Kɛzi ɔbaboa wɔ ɛ? Ɔbahola yeaboa wɔ yeamaa wɔanyia gyima anzɛɛ wɔ wɔ gyimayɛlɛ nu. Ɔbaboa wɔ yeamaa wɔazukoa Nyamenle Edwɛkɛ ne kpalɛ na wɔahilehile awie mɔ. Mɔɔ tɛla biala la, ɔbamaa wɔabikye Gyihova kpalɛ wɔ mekɛ mɔɔ ɛlɛkenga ye Edwɛkɛ ne na wɔadwenledwenle nwolɛ la.—Dwɔh. 1:8; 1 Tim. 4:15.

12. Kɛzi Mrɛlɛbulɛ 31:26 baboa wɔ yeamaa wɔahola ɛ nee awie mɔ ali adwelie kpalɛ ɛ?

¹² Sukoa kɛzi bɛdi adwelie kpalɛ la. Ɔhyia kɛ Kilisienema kola nee awie mɔ di adwelie kpalɛ. Ɛdoavolɛ Gyemise dule yɛ folɛ wɔ ɛhye anwo, ɔhanle kɛ: “Ɔwɔ kɛ awie biala yɛ ye ndɛ tie edwɛkɛ, ɔmmapele ɔ nwo ɔtendɛ.” (Gye. 1:19) Saa awie mɔ ɛlɛtendɛ na ɛtie bɛ edwɛkɛ ne kpalɛ a, ɛnee ɛlɛkile kɛ ɛte bɛ edwɛkɛ bo anzɛɛ ɛte bɛ “nyane bo.” (1 Pita 3:8) Saa ɛsuzu kɛ ɛnde edwɛkɛ mɔɔ ahenle ɛlɛka anzɛɛ kɛzi ɔte nganeɛ la abo kpalɛ a, biza ye kpuya mɔɔ fɛta la. Akee nyia mekɛ ekyii dwenle mɔɔ ɛbaha la anwo kolaa na wɔadendɛ. (Mrɛ. 15:​28, ɔbdw.) Biza ɛ nwo kɛ: ‘Asoo mɔɔ melɛba mearaha la le nɔhalɛ yɛɛ ɔmaa anwosesebɛ? Asoo ɔkile ɛbulɛ nee atiakunlukɛnlɛma?’ Sukoa mediema mraalɛ mɔɔ bɛnyi sunsum nu mɔɔ bɛze adwelie di kpalɛ la. (Kenga Mrɛlɛbulɛ 31:26.) Tie kɛzi bɛtendɛ bɛkile awie mɔ la kpalɛ. Saa ɛsukoa kɛzi bɛdi adwelie la kpalɛ a, ɔbamaa ɛ nee awie mɔ anyia agɔnwolɛvalɛ kpalɛ.

13. Kɛ ɔkɛyɛ na wɔazukoa kɛzi bɛnea sua nu la ɛ? (Eza nea nvoninli ne.)

¹³ Sukoa kɛzi bɛnea sua nu la. Wɔ ɛleka dɔɔnwo, mraalɛ a yɛ sua nu gyima dɔɔnwo a. Wɔ mame anzɛɛ adiema raalɛ gyɛne mɔɔ bɔ mɔdenle la bahola aboa wɔ yeamaa wɔazukoa kɛzi bɛyɛ ninyɛne bie mɔ la. Adiema raalɛ bie mɔɔ bɛfɛlɛ ye Cindy la hanle kɛ: “Ahyɛlɛdeɛ mɔɔ sonle bolɛ mɔɔ me mame vale maanle me la anu ko a le kɛ ɔhilehilele me kɛzi ɛyɛ gyima ɛsesebɛ a ɔmaa ɛ nye die la. Kɛmɔ menzukoale kɛzi bɛto aleɛ, bɛsiezie sua nu, bɛkpomgba debie na bɛdi gua la ati, ɔmmaa ɛbɛlabɔlɛ ɛnyɛ se ɛmmaa me na ɔmaa mekola meyɛ dɔɔnwo wɔ Gyihova ɛzonlenlɛ nu. Eza me mame hilehilele me kɛzi bɛdie nyɛvolɛ la, na yemɔ ɛmaa meyia mediema mrenyia nee mraalɛ dɔɔnwo mɔɔ mebahola meazukoa bɛ neazo ne la.” (Mrɛ. 31:​15, 21, 22) Raalɛ mɔɔ anye bolo ye gyima nwo na ɔdie nyɛvolɛ, mɔɔ yezukoa kɛzi bɛtoto ninyɛne boɛ wɔ sua nu la le nyilalɛ maa ye abusua ne nee asafo ne.—Mrɛ. 31:​13, 17, 27; Gyi. 16:15.

14. Duzu a ɛsukoa ɛfi Crystal anwubielɛ ne anu a, na duzu a ɔwɔ kɛ ɛfa wɔ adwenle ɛsie zo a?

¹⁴ Sukoa kɛ ɛ ngomekye ɛbahola wɔayɛ wɔ ninyɛne bie mɔ. Ɔwɔ kɛ Kilisienema mɔɔ bɛnyi sunsum nu la fa sie bɛ nye zo kɛ bɛbazukoa kɛzi bɛ ngomekye bɛbayɛ bɛ ninyɛne bie mɔ la. (2 Tɛs. 3:​7, 8) Adiema raalɛ bie mɔɔ bɛfɛlɛ ye Crystal la hanle kɛ: “Me awovolɛ boale me maanle memkpale debie mɔɔ mebazukoa wɔ sukunwiɔ amaa yeaboa me kenle bie wɔ me ɛbɛlabɔlɛ nu la. Me papa maanle me anwosesebɛ kɛ menzukoa ezukoa nwo  mgbondabulɛ na yemɔ boale me kpalɛ.” Tɛ kɛzi ɛbanyia gyima la anwo ninyɛne ala a ɔwɔ kɛ ɛsukoa a, eza ɔwɔ kɛ ɛsukoa kɛzi ɛbava ezukoa mɔɔ ɛnyia la wɔali gyima nrɛlɛbɛ nu amaa ɛ nwo angyele wɔ la. (Mrɛ. 31:​16, 18) Saa wɔambɔ kakɛ mɔɔ nwolɛ ɛngyia na ɛmaa ɛ kunlu dwo ekyi mɔɔ ɛlɛ la anwo a, ɔbamaa wɔava wɔ adwenle wɔazie wɔ sunsum nu bodane ne mɔ azo.—1 Tim. 6:8.

15-16. Kɛzi mediema mraalɛ mɔɔ bɛtɛgyale la boa awie mɔ ɛ? (Maake 10:​29, 30)

¹⁵ Saa ɛnyia subane ngɛnlɛma na ɛnwu kɛzi bɛyɛ ninyɛne bie mɔ la a, ɔbaboa wɔ wɔ ɛzonlelilɛ mɔɔ ɛbanyia ye kenle bie la anu. Nea mɔɔ ɛbahola wɔayɛ la anwo neazo bie mɔ.

¹⁶ Ɛbahola wɔali belazinli mekɛ ekyii. Kɛ mɔɔ Gyisɛse hanle la, mraalɛ bie mɔ ɛkpa kɛ bɛnrɛgya, saa bɔbɔ menli anye ɛnlie belazinlililɛ nwo wɔ ɛleka mɔɔ bɛwɔ la a. (Mat. 19:​10-12) Ɔbahola yeara ye noko kɛ tɛnlabelɛ bie mɔ ati a bie mɔ di belazinli a. Nyia anwodozo kɛ Gyihova nee Gyisɛse ɛmbu bɛ nye ɛngua Kilisienema mɔɔ bɛtɛgyale la anwo zo. Mediema mraalɛ mɔɔ bɛtɛgyale la yɛ neazo kpalɛ wɔ asafo mɔɔ wɔ ewiade amuala la anu. Kɛmɔ bɛkulo menli na bɛdwenle bɛ nwo la ati, ɔmaa bɛbayɛ kɛ mediema mraalɛ nee mame mɔ bɛmaa menli dɔɔnwo.—Kenga Maake 10:​29, 30; 1 Tim. 5:2.

17. Duzu a adiema bɛlɛra bahola ayɛ ye kɛkala amaa yeayɛ dahuu ɛzonlenlɛ gyima ne bie a?

¹⁷ Ɛbahola wɔayɛ dahuu ɛzonlenlɛ gyima ne bie. Mediema mraalɛ yɛ dɔɔnwo wɔ ewiade amuala edwɛkɛhanlɛ gyima ne anu. (Edw. 68:11) Ɛbahola wɔayɛ ngyehyɛleɛ kɛkala wɔayɛ dahuu ɛzonlenlɛ gyima ne bie ɔ? Ɛbahola wɔayɛ adekpakyelɛnli, wɔaboa suazilɛ gyima ne anzɛɛ wɔahɔ Bɛtɛle. Yɛ wɔ bodane ne anwo asɔne. Ɛ nee bɛdabɛ mɔɔ bɛdwu bodane zɔhane anwo la ɛdendɛ na maa bɛhile wɔ mɔɔ ɔhyia kɛ ɛyɛ amaa wɔahola wɔayɛ bie la. Akee yɛ ngyehyɛleɛ mɔɔ ɔbaboa wɔ amaa wɔahola wɔadwu wɔ bodane ne anwo la. Saa ɛdwu wɔ bodane nwo a, ɔbamaa wɔanyia nwolɛ adenle wɔayɛ dɔɔnwo wɔ Gyihova ɛzonlenlɛ nu.

18. Duzu ati a ɔwɔ kɛ adiema raalɛ nea boɛ kpalɛ wɔ awie mɔɔ ɔbagya ye la anwo a? (Eza nea nvoninli ne.)

¹⁸ Ɛbahola wɔazi kpɔkɛ kɛ ɛbagya. Subane nee ninyɛne ngakyile mɔɔ yɛzuzu nwolɛ la baboa wɔ yeamaa wɔayɛ yelɛ kpalɛ. Noko saa ɛlɛsuzu nwo kɛ ɛkulo kɛ ɛkɔ agyalɛ a, ɔwɔ kɛ ɛnea boɛ kpalɛ wɔ awie mɔɔ ɛbakpa kɛ ɛbagya ye la anwo. Ɛhye le kpɔkɛ mɔɔ ɔhyia mɔɔ ɛbasisi la  anu ko. Kakye kɛ ɛbaravea nrenyia ne mɔɔ ɛbagya ye la tileyɛlɛ bo. (Wlo. 7:2; Ɛfɛ. 5:​23, 33) Ɔti biza ɛ nwo kɛ: ‘Asoo ɔle Kilisienenli mɔɔ yenyi sunsum nu ɔ? Ɔlɛfa sunsum nu ninyɛne yealimoa ye ɛbɛlabɔlɛ nu ɔ? Ɔsisi kpɔkɛ mɔɔ nrɛlɛbɛ wɔ nu ɔ? Ɔdie ye nvonleɛ ɔto nu ɔ? Ɔbu mraalɛ ɔ? Asoo ɔbahola yeaboa me wɔ sunsum nu, yeamaa me sa aha mɔɔ mehyia nwo wɔ nwonane nu na yeayɛ me gɔnwo kpalɛ ɔ? Asoo ɔdi ye ɛzonlelilɛ nwo gyima kpalɛ ɔ? Kɛ neazo la, gyimalilɛ ngakyile boni a ɔlɛ wɔ asafo ne anu a, na kɛzi ɔdi nwolɛ gyima ɛ?’ (Luku 16:10; 1 Tim. 5:8) Nɔhalɛ nu, saa ɛkulo kɛ ɛnyia kunli kpalɛ a, ɔwɔ kɛ ɛdawɔ noko ɛyɛ awie mɔɔ ɛbayɛ yelɛ kpalɛ.

19. Duzu ati a bɛka kɛ yelɛ le “boavolɛ” a ɔle enililɛ ɔmaa ye a?

¹⁹ Baebolo ne ka kɛ yelɛ kpalɛ le ɔ hu “boavolɛ” nee “awie mɔɔ fɛta ye.” (Gyn. 2:18) Asoo ɛhye kile kɛ yelɛ anwo ɛngyia ɔ? Kyɛkyɛ! Emomu ɔle enililɛ bɔbɔ ɔmaa ye. Nɔhalɛ nu, Baebolo ne ta ka kɛ Gyihova le “boavolɛ.” (Edw. 54:4; Hib. 13:6) Saa nrenyia ne sisi kpɔkɛ wɔ abusua ne anu na yelɛ ne boa ye maa ɔkɔ zo a, ɛnee amgba ɔle boavolɛ kpalɛ. Na kɛmɔ ɔkulo Gyihova la ati, ɔbɔ ɔ nwo mɔdenle amaa ɔ hu anyia duma kpalɛ. (Mrɛ. 31:​11, 12; 1 Tim. 3:11) Ɛbahola wɔamia ɛlɔlɛ mɔɔ ɛlɛ ɛmaa Gyihova la anu na wɔayɛ boavolɛ wɔamaa awie mɔ wɔ sua nu nee asafo ne anu amaa wɔaziezie ɛ nwo kɛkala wɔamaa ɛzonlelilɛ ɛhye mɔɔ bie a ɛbanyia ye kenle bie la.

20. Duzu a ɛrɛladane bahola ayɛ aboa ye abusua a?

²⁰ Ɛbahola wɔayɛ ɛrɛladane. Saa ɛgya a, bie a ɛ nee ɛ hu bawo ngakula. (Edw. 127:3) Ɔti nrɛlɛbɛ wɔ nu kɛ ɛbadwenle kɛzi ɛbayɛ ɛrɛladane kpalɛ la anwo. Subane ngakyile nee kɛzi bɛyɛ ninyɛne bie mɔ la anwo debie mɔɔ yɛzukoa wɔ edwɛkɛ ɛhye anu la baboa wɔ wɔ mekɛ mɔɔ ɛbahɔ agyalɛ na wɔawo la. Saa ɛda ɛlɔlɛ, atiakunlukɛnlɛma nee abotane ali a, ɔbamaa anyelielɛ ara wɔ sua nu na ɛ mra bade nganeɛ kɛ bɛlɛ anwobanebɔlɛ yɛɛ bɛkulo bɛ.—Mrɛ. 24:3.

21. Kɛzi yɛnwu yɛ mediema mraalɛ ne mɔ ɛ, na duzu ati ɔ? (Nea ɔ nyunlu nvoninli ne.)

²¹ Yɛ mediema mraalɛ, ɔlua mɔɔ bɛyɛ bɛmaa Gyihova nee ye menli ne la ati, yɛkulo bɛ kpalɛ. (Hib. 6:10) Bɛyɛ gyima ɛsesebɛ amaa bɛanyia Kilisiene subane ngɛnlɛma, bɛazukoa kɛzi bɛyɛ ninyɛne bie mɔ mɔɔ ɔbaboa bɛ nee awie mɔ wɔ ɛbɛlabɔlɛ nu la na bɛsiezie bɛ nwo bɛmaa ɛzonlelilɛ mɔɔ bie a bɛbanyia ye kenle bie la. Bɛsonle bolɛ kpalɛ bɛmaa Gyihova ahyehyɛdeɛ ne!