1. Duzu a ɔwɔ kɛ Kilisiene nrenyia yɛ amaa yeanyi sunsum nu a?

 BELEMGBUNLI Devidi hanle hilele Sɔlɔmɔn kɛ: “Maa ɛ nwo ɛyɛ se na kile kɛ ɛle nrenyia.” (1 Arl. 2:​1-3) Kilisiene mrenyia mɔɔ wɔ ɛkɛ ne ɛnɛ la noko hyia folɛdulɛ ɛhye anwo. Saa bɛbahola bɛayɛ zɔ a, kyesɛ bɛsukoa kɛ bɛbali Nyamenle mɛla ne mɔ azo na bɛava Baebolo ngyinlazo bɛali gyima wɔ bɛ ɛbɛlabɔlɛ afoa biala anu. (Luku 2:52) Duzu ati a ɔhyia kpalɛ kɛ mediema mgbavolɛ yɛ mrenyia mɔɔ bɛnyi sunsum nu a?

2-3. Duzu ati a ɔhyia kɛ adiema kpavolɛ nyi sunsum nu a?

² Kilisiene nrenyia lɛ ɛzonlelilɛ dɔɔnwo mɔɔ anwo hyia la wɔ abusua ne nee asafo ne anu. Mediema mgbavolɛ, bie a bɛdwenle ɛzonlelilɛ ngakyile mɔɔ bɛbahola bɛanyia ye kenle bie la anwo. Bie a bɛva bɛyɛ bɛ bodane kɛ bɛbayɛ dahuu ɛzonlenlɛ gyima ne bie, asafo nu azonvolɛ na nzinlii bɛayɛ asafo nu mgbanyima. Eza bie a bɛkulo kɛ bɛgya na bɛwo. (Ɛfɛ. 6:4; 1 Tim. 3:1) Amaa bɛadwu bodane ɛhye mɔ anwo na yeawie bɛ boɛ la, ɔhyia kɛ bɛnyi sunsum nu. b

³ Duzu a baboa bɛ amaa bɛanyi sunsum nu a? Ninyɛne mɔɔ hyia la bie mɔ wɔ ɛkɛ mɔɔ ɔwɔ kɛ bɛsukoa ye ɛyɛlɛ a. Ɛnee duzu a bɛbahola bɛayɛ ye kɛkala amaa bɛaziezie bɛ nwo bɛamaa ɛzonlelilɛ mɔɔ bie a bɛbanyia ye kenle bie la na bɛahola bɛayɛ a?

4. Nienwu a ɛbanwu neazo kpalɛ mɔɔ ɛbahola wɔazukoa a? (Eza nea nvoninli ne.)

⁴ Sukoa menli mɔɔ yɛ neazo kpalɛ la. Neazo kpalɛ dɔɔnwo mɔɔ mgbavolɛ bahola azukoa la wɔ Baebolo ne anu. Ɛnee tete mrenyia zɔhane mɔ kulo Nyamenle na bɛyɛle gyima ngakyile bɛnleanle ye menli ne. Eza ɛbahola wɔanwu mrenyia mɔɔ bɛnyi sunsum nu mɔɔ bɛyɛ neazo kpalɛ la wɔ ɛdawɔ mumua ne wɔ abusua ne nee wɔ asafo ne anu. (Hib. 13:7) Yɛɛ Gyisɛse Kelaese mɔɔ yɛle neazo mɔɔ tɛla biala la noko wɔ ɛkɛ. (1 Pita 2:21) Mekɛ mɔɔ ɛlɛto ɛ rɛle aze wɔazukoa neazo ɛhye mɔ anwo debie la, anrɛɛ dwenle subane ngɛnlɛma mɔɔ mrenyia ɛhye mɔ lale ye ali la anwo. (Hib. 12:​1, 2) Akee suzu kɛzi ɛbahola wɔazukoa bɛ la anwo.

5. Kɛ ɔkɛyɛ na wɔanyia adwenlenubukelɛ ɛ, na duzu ati a ɛhye anwo hyia a? (Edwɛne 119:9)

⁵ Nyia “adwenlenubukelɛ” na bɔ nwolɛ bane. (Mrɛ. 3:21) Awie mɔɔ ye adwenle nu ɛbuke la suzu mɔɔ ɔkulo kɛ ɔyɛ la anwo kolaa na yeazi kpɔkɛ. Ɔti bɔ mɔdenle kɛ ɛbanyia adwenlenubukelɛ na kɔ zo da ye ali. Duzu ati ɔ? Ɔluakɛ mgbavolɛ dɔɔnwo mɔɔ wɔ ewiade ye la gyinla bɛ nzuzulɛ anzɛɛ kɛzi bɛte nganeɛ la azo a bɛsisi kpɔkɛ a. (Mrɛ. 7:7; 29:11) Eza TV zo gyimalilɛ, vidio, Yintanɛte nee sohyia media bahola anyia ɛ nwo zo tumi. Noko kɛ ɔkɛyɛ na wɔanyia adwenlenubukelɛ ɛ? Mɔɔ limoa, sukoa Baebolo ngyinlazo ngakyile nwo debie na dwenle deɛmɔti nvasoɛ wɔ zo la anwo. Akee fa ngyinlazo zɔhane mɔ sisi kpɔkɛ mɔɔ Gyihova anye balie nwolɛ la. (Kenga Edwɛne 119:9.) Saa ɛsukoa kɛ ɛbala adwenlenubukelɛ ali a, ɔbaboa wɔ kpole kpalɛ yeamaa wɔarayɛ Kilisiene nrenyia mɔɔ wɔnyi sunsum nu a. (Mrɛ. 2:​11, 12; Hib. 5:14) Suzu kɛzi adwenlenubukelɛ baboa wɔ wɔ tɛnlabelɛ nwiɔ ɛhye mɔ anu la anwo: (1) kɛzi ɛ nee mediema mraalɛ bali la yɛɛ (2) saa ɛlɛsisi wɔ anwoziezielɛ nwo kpɔkɛ a.

6. Kɛzi adwenlenubukelɛ baboa adiema kpavolɛ yeamaa yeabu mediema mraalɛ ɛ?

⁶ Adwenlenubukelɛ baboa wɔ yeamaa wɔabu mraalɛ. Nvonleɛ biala ɛnle nwo yɛɛ ɔle kpalɛ kɛ adiema kpavolɛ bie anye balie adiema raalɛ bie anwo na yeazi kpɔkɛ kɛ ɔkulo kɛ ɔnwu ye kpalɛ. Noko adiema kpavolɛ mɔɔ  lɛ adwenlenubukelɛ la ɛnrɛha anzɛɛ ɛnrɛhɛlɛ edwɛkɛ anzɛɛ ɛnrɛyɛ debie biala mɔɔ ɔbamaa adiema raalɛ bie ade nganeɛ kɛ ɔkulo ye kyesɛ ɔkpondɛ kɛ ɔgya adiema raalɛ ne. (1 Tim. 5:​1, 2) Saa ɔ nee adiema raalɛ bie ɛlɛtu kɛ bɛbagya a, amaa yeanzɛkye adiema raalɛ ne duma la, ɔnle kɛ ɔ nee ye kɔfea ɛleka bie mɔɔ awie biala ɛmboka bɛ a.—1 Kɔl. 6:18.

7. Saa adiema kpavolɛ ɛlɛsisi ye tɛladeɛwulalɛ nee ye anwoziezielɛ nwo kpɔkɛ a, kɛzi adwenlenubukelɛ bahola aboa ye ɛ?

⁷ Adenle bieko mɔɔ kpavolɛ bahola alua zo ahile kɛ ye adwenle nu ɛbuke la a le kɛzi ɔsisi kpɔkɛ wɔ ye tɛladeɛwulalɛ nee ye anwoziezielɛ nwo la. Fane dɔɔnwo, bɛdabɛ mɔɔ bɛmbu Gyihova anzɛɛ bɛ ɛbɛla ɛzɛkye la a yɛ adɛladeɛ fofolɛ na bɛbɔ nwolɛ nolo a. Adɛladeɛ mɔɔ kyekye bɛ anzɛɛ mɔɔ mrenyia wula a ɔmaa bɛsɔho mraalɛ mɔɔ bɛyɛ la maa ɛbɛlatane nwo adwenle mɔɔ bɛlɛ la da ali. Saa kpavolɛ mɔɔ ɛlɛnyi sunsum nu la ɛlɛkpa tɛladeɛ mɔɔ ɔbawula la a, ɔwɔ kɛ ɔfa Baebolo ngyinlazo ɔdi gyima na ɔsukoa bɛdabɛ mɔɔ bɛyɛ neazo kpalɛ wɔ asafo ne anu la. Ɔbahola yeabiza ɔ nwo kɛ: ‘Asoo kpɔkɛ mɔɔ mesisi la kile kɛ me adwenle nu la ɛkɛ yɛɛ medwenle awie mɔ anwo ɔ? Asoo kɛzi mesiezie me nwo la maa awie mɔ die di kɛ medu me nwo memaa kɛ mesonle Nyamenle ɔ?’ (1 Kɔl. 10:​31-33; Tae. 2:6) Kpavolɛ mɔɔ ye adwenle nu ɛbuke la banyia ɔ mediema mrenyia nee mraalɛ yɛɛ ye anwuma Selɛ ne noko anyunlu ɛlolɛ.

8. Kɛ ɔkɛyɛ na adiema kpavolɛ ahola ayɛ awie mɔɔ bɛkola bɛfa bɛ nwo bɛto ɔ nwo zo ɛ?

⁸ Yɛ awie mɔɔ bɛkola bɛfa bɛ nwo bɛto ɛ nwo zo. Kpavolɛ mɔɔ bɛkola bɛfa bɛ nwo bɛto ɔ nwo zo la di ye ɛzonlelilɛ kɔsɔɔti anwo gyima kpalɛ. (Luku 16:10) Suzu nwolɛ neazo mɔɔ di munli mɔɔ Gyisɛse yɛle la anwo. Yeanva ye gyima yeanli nwɔhoa anzɛɛ yeanyɛ mgbovonle ɛlɛ. Emomu, ɔyɛle gyimalilɛ mɔɔ Gyihova vale maanle ye la kɔsɔɔti, wɔ mekɛ bɔbɔ mɔɔ ɛnee ɔyɛ se kɛ ɔbayɛ zɔ la. Ɛnee ɔkulo menli—titili ye ɛdoavolɛma ne—na ɔvile ye ɛhulolɛ nu ɔvale ye ngoane ɔdole ɛkɛ ne ɔmaanle bɛ. (Dwɔn 13:1) Bɔ mɔdenle kɛ ɛbayɛ gyimalilɛ biala mɔɔ bɛbava bɛamaa wɔ la fa sukoa Gyisɛse. Saa ɛnnwu kɛzi ɛbayɛ ye la a, bɛlɛ ɛ nwo aze na kpondɛ moalɛ fi mediema mɔɔ bɔ mɔdenle la ɛkɛ. Mmamaa ɛ kunlu dwo ekyi bie mɔɔ ɛkola ɛyɛ la ala anwo. (Wlo. 12:11) Emomu, yɛ wɔ gyimalilɛ ne wie bɔkɔɔ, kɛ ɛyɛ wɔamaa “Gyihova, na tɛ menli.” (Kɔl. 3:23) Nɔhalɛ nu, ɛnli munli, ɔti bɛlɛ ɛ nwo aze na die nvonleɛ biala mɔɔ ɛbayɛ la to nu.—Mrɛ. 11:2.

9. Duzu ati a ɔwɔ kɛ adiema kpavolɛ sukoa ninyɛne bie mɔ ɛyɛlɛ a?

⁹ Amaa wɔayɛ nrenyia mɔɔ wɔnyi sunsum nu la, ɔhyia kɛ ɛsukoa ninyɛne bie mɔ ɛyɛlɛ. Ɛhye mɔ baboa wɔ yeamaa wɔalie ɛzonlelilɛ bie mɔ wɔado nu wɔ asafo ne anu, wɔanyia gyima mɔɔ ɛbayɛ wɔanlea ɛ nwo anzɛɛ wɔ abusua ne na ɛ nee awie mɔ anyia agɔnwolɛvalɛ kpalɛ. Suzu ninyɛne ɛhye mɔ bie anwo.

10-11. Saa adiema nrenyia sukoa ɛgengalɛ nee ɛhɛlɛlɛ a, kɛzi ɔboa ɔdaye mumua ne nee awie mɔ ɛ? (Edwɛne 1:​1-3) (Eza nea nvoninli ne.)

 ¹⁰ Sukoa ɛgengalɛ nee ɛhɛlɛlɛ kpalɛ. Baebolo ne ka kɛ saa awie anye balie na yeawie ye boɛ a, ɔwɔ kɛ ɔnyia mekɛ kenle ko biala ɔkenga Nyamenle Edwɛkɛ ne na ɔdwenledwenle nwolɛ kpalɛ. (Kenga Edwɛne 1:​1-3.) Ɛkenga Baebolo ne kenle ko biala a, ɔbamaa wɔanwu adwenle mɔɔ Gyihova lɛ wɔ ninyɛne nwo la na yemɔ baboa wɔ yeamaa wɔadwenle ninyɛne nwo wɔahɔ moa na wɔanwu kɛzi ɛbava Ngɛlɛlera ne wɔali gyima kpalɛ la. (Mrɛ. 1:​3, 4) Yɛhyia mrenyia mɔɔ kola yɛ zɔ la anwo wɔ asafo ne anu. Duzu ati ɔ?

¹¹ Yɛ mediema mrenyia nee mraalɛ hyia mrenyia mɔɔ kola gyinla Baebolo ne azo kilehile bɛ na bɛtu bɛ folɛ la. (Tae. 1:9) Saa ɛkola ɛkenga na ɛkɛlɛ kpalɛ a, ɔbahola yeamaa wɔaziezie ɛdendɛlɛ nee mualɛ mɔɔ ɔbamaa ɛ mediema diedi nu amia la. Eza saa ɛlɛsukoa debie anzɛɛ ɛlɛtie ɛdendɛlɛ wɔ debiezukoalɛ nee nyianu bo a, ɛbahola wɔayɛ kɛlɛtokɛ kpalɛ. Kɛlɛtokɛ ɛhye mɔ mɔɔ ɛbayɛ la bamaa wɔ diedi nu ayɛ se na wɔamaa awie mɔ anwosesebɛ.

12. Duzu a baboa wɔ yeamaa wɔahola wɔali adwelie kpalɛ a?

¹² Sukoa kɛzi bɛdi adwelie kpalɛ la. Ɔwɔ kɛ Kilisiene nrenyia sukoa kɛzi bɛdi adwelie kpalɛ la. Awie mɔɔ ze adwelie di kpalɛ la tie awie mɔ edwɛkɛ na ɔte bɛ nzuzulɛ nee bɛ nganeɛdelɛ bo. (Mrɛ. 20:5) Saa ɔtie ɛnelɛ mɔɔ awie ɛlɛfa adendɛ na ɔnea ɔ nyunlu maanle ne nee kɛzi ɔkeha ɔ nwo la a, ɔkola ɔnwu mɔɔ ɔkpondɛ yeahile la. Saa ɛ nee menli ɛnda ɛnli adwelie a, ɛnrɛhola ɛnrɛyɛ deɛ ɛhye. Saa ɛdua ɛlɛtɔlɔneke ninyɛne zo ɛ nee menli di adwelie dahuu a, ɔbamaa yeayɛ se kɛ ɛ nee bɛ yia a ɛbahola ɛ nee bɛ ali adwelie kpalɛ. Ɔti yɛ debie mɔɔ ɔbamaa wɔanyia nwolɛ adenle ɛ nee awie mɔ ali adwelie la.—2 Dwɔn 12.

13. Duzu bieko a ɔwɔ kɛ kpavolɛ sukoa ye ɛyɛlɛ a? (1 Timote 5:8) (Eza nea nvoninli ne.)

¹³ Sukoa kɛ ɛbayɛ gyima wɔanyia ezukoa wɔanlea ɛ nwo. Ɔwɔ kɛ Kilisiene nrenyia mɔɔ ɛnyi sunsum nu la kola nea ɔ nwo nee ye abusua ne. (Kenga 1 Timote 5:8.) Wɔ maanle bie mɔ anu, bie a mediema mgbavolɛ bazukoa gyima wɔ bɛ papa anzɛɛ bɛ busuanli bie ɛkɛ. Wɔ maanle gyɛne noko anu, bie a bɛbazukoa bɛ sa anloa gyima wɔ sukunwiɔ. Kɛzi ɔde ye biala la, ɔle kpalɛ kɛ ɛbazukoa debie mɔɔ ɔbamaa wɔanyia gyima wɔayɛ la. (Gyi. 18:​2, 3; 20:34; Ɛfɛ. 4:28) Maa menli ɛnwu kɛ ɛle awie mɔɔ ɛyɛ gyima ɛsesebɛ yɛɛ ɛfa ɛ sa ɛka gyima bie a, ɛyɛ too ɛkɔ ye awieleɛ. Saa ɔba ye zɔ a, kɛ ɔde ye biala la, ɔbamaa dahuu wɔanyia gyima wɔayɛ. Subane ngakyile nee ninyɛne mɔɔ yɛzuzu nwo  la noko hyia amaa Kilisiene nrenyia ahola ali ye kenle bie ɛzonlelilɛ nwo gyima. Maa yɛzuzu ɛzonlelilɛ ɛhye mɔ bie anwo.

14. Kɛ ɔkɛyɛ na adiema kpavolɛ ahola ayɛ dahuu ɛzonlenlɛ gyima ne bie ɛ?

¹⁴ Dahuu ɛzonlenlɛ gyima ne. Mediema mrenyia dɔɔnwo mɔɔ bɛnyi sunsum nu la bɔle dahuu ɛzonlenlɛ gyima ne abo wɔ bɛ ngakula nu. Adekpakyelɛ gyima ne boa adiema kpavolɛ maa ɔsukoa kɛzi ɔ nee menli mɔɔ lɛ subane ngakyile la babɔ nu ayɛ gyima la. Eza ɔbaboa ye yeamaa yeazukoa kɛzi ɔbava ezukoa mɔɔ ɔnyia la yeali gyima nrɛlɛbɛ nu amaa ɔ nwo angyele ye la. (Fel. 4:​11-13) Saa ɛkulo kɛ ɛyɛ dahuu ɛzonlenlɛ gyima ne bie a, fa adekpakyelɛ boavolɛ gyima ne bɔ ɔ bo. Menli dɔɔnwo yɛ adekpakyelɛ boavolɛ gyima ne mekɛ ekyii, na yemɔ boa bɛ maa bɛkola bɛyɛ dahuu adekpakyelɛma. Adekpakyelɛ gyima ne bahola amaa wɔanyia nwolɛ adenle wɔayɛ dahuu ɛzonlenlɛ gyima ne afoa ngakyile ne mɔ bie, ɛbahola wɔayɛ suazilɛ gyima ne bie anzɛɛ wɔahɔ Bɛtɛle.

15-16. Kɛ ɔkɛyɛ na adiema kpavolɛ ahola azonle kɛ asafo nu sonvolɛ anzɛɛ kpanyinli ɛ?

¹⁵ Asafo nu sonvolɛ anzɛɛ asafo nu kpanyinli. Ɔwɔ kɛ Kilisiene mrenyia fa yɛ bɛ bodane kɛ bɛbafɛta kɛ asafo nu mgbanyima amaa bɛazonle bɛ mediema. Baebolo ne ka kɛ mrenyia mɔɔ kpondɛ kɛ bɛyɛ gyima ɛhye bie la ‘kulo gyima kpalɛ.’ (1 Tim. 3:1) Kolaa na adiema nrenyia ahola ayɛ asafo nu kpanyinli la, ɔwɔ kɛ ɔdimoa ɔsonle kɛ asafo nu sonvolɛ. Asafo nu azonvolɛ boa mgbanyima ne mɔ wɔ ndenle dɔɔnwo azo. Asafo nu mgbanyima nee azonvolɛ bɛlɛ bɛ nwo aze sonle bɛ mediema mrenyia nee mraalɛ na bɛyɛ dɔɔnwo wɔ ɛzonlenlɛ gyima ne anu. Mediema mgbavolɛ mɔɔ bɛli ɛvolɛ 17 kɔdwu 19 bɔbɔ la bahola azonle kɛ asafo nu azonvolɛ. Yɛɛ bɛbahola bɛakpa asafo nu sonvolɛ mɔɔ ɛli ɛvolɛ 20 ala mɔɔ bɔ ɔ nwo mɔdenle la kɛ asafo nu kpanyinli.

¹⁶ Kɛ ɔkɛyɛ na wɔafɛta wɔamaa ɛzonlelilɛ ɛhye mɔ ɛ? Baebolo ne bobɔ subane ngakyile mɔɔ ɔwɔ kɛ awie nyia amaa yeafɛta kɛ asafo nu sonvolɛ anzɛɛ kpanyinli la. Noko kakye kɛ ɛlɔlɛ mɔɔ ɛlɛ ɛmaa Gyihova, wɔ abusua ne nee asafo ne la a bamaa wɔala subane ɛhye mɔɔ hyia ali a. (1 Tim. 3:​1-13; Tae. 1:​6-9; 1 Pita 5:​2, 3) Bɔ mɔdenle kɛ ɛbade subane ɛhye mɔ ko biala abo. Akee sɛlɛ Gyihova kɛ ɔboa wɔ ɔmaa ɛnyia subane ɛhye mɔ bie. c

17. Kɛ ɔkɛyɛ na adiema kpavolɛ aziezie ɔ nwo arayɛ kunli nee abusua tile ɛ? (Eza nea nvoninli ne.)

¹⁷ Kunli nee abusua tile. Kɛ mɔɔ Gyisɛse hanle  la, Kilisiene mrenyia mɔɔ bɛnyi sunsum nu la bie mɔ ɛngya. (Mat. 19:12) Noko saa ɛsi kpɔkɛ kɛ ɛbagya a, ɛbanyia ɛzonlelilɛ bieko kɛ kunli nee abusua tile. (1 Kɔl. 11:3) Gyihova anye la kɛ kunli bahulo ɔ ye na yeanlea ye wɔ nwonane afoa nu, yeayɛ ɔ gɔnwo kpalɛ na yeaboa ye yeamaa yeahɔ zo yeazonle Gyihova. (Ɛfɛ. 5:​28, 29) Subane ngakyile nee ninyɛne mɔɔ yɛlimoa yɛzukoa wɔ edwɛkɛ ɛhye anu, mɔɔ bie a le kɛ ɛbanyia adwenlenubukelɛ, ɛbabu mraalɛ anzɛɛ ɛbayɛ awie mɔɔ bɛkola bɛfa bɛ nwo bɛto ɛ nwo zo la baboa wɔ wɔ mekɛ mɔɔ wɔgya la. Ɔbaziezie wɔ kpalɛ yeamaa wɔayɛ wɔ kunli nee abusua tile gyima ne.

18. Kɛ ɔkɛyɛ na adiema kpavolɛ aziezie ɔ nwo arayɛ selɛ ɛ?

¹⁸ Selɛ. Saa ɛgya a, bie a ɛbarayɛ selɛ. Kɛ ɔkɛyɛ na wɔazukoa Gyihova amaa wɔayɛ selɛ kpalɛ ɛ? Ɛbahola wɔazukoa ninyɛne dɔɔnwo. (Ɛfɛ. 6:4) Gyihova hanle ye wɔ bagua nu hilele ɔ Ra Gyisɛse kɛ ɔkulo ye yɛɛ ɔdie ye ɔto nu. (Mat. 3:17) Saa ɛwo a, bɔ mɔdenle kɛ ɛbada wɔamaa ɛ mra ne mɔ anwu kɛ ɛkulo bɛ edwɛkɛ. Anrɛɛ ta kanvo bɛ wɔ ninyɛne mgbalɛ mɔɔ bɛyɛ la anwo. Selɛma mɔɔ sukoa Gyihova neazo ne la boa bɛ mra maa bɛbayɛ Kilisiene mrenyia nee mraalɛ mɔɔ bɛnyi sunsum nu. Saa ɛfi ɛlɔlɛ nu ɛnea bɛdabɛ mɔɔ bɛwɔ wɔ abusua ne nee wɔ asafo ne anu la na ɛka ɛkile bɛ kɛ ɛkulo bɛ edwɛkɛ na ɛ nye sɔ mɔɔ bɛyɛ la a, ɔbamaa wɔaziezie ɛ nwo kɛkala wɔamaa ɛzonlelilɛ ɛhye. (Dwɔn 15:9) Ɛhye baboa wɔ yeamaa wɔayɛ kunli nee selɛ kpalɛ kenle bie. Na kɛkala bɔbɔ, ɛbayɛ awie mɔɔ ɛ nwo hyia Gyihova na wɔayɛ moalɛ kpole wɔamaa wɔ abusua ne nee asafo ne.

19-20. Duzu a baboa mediema mgbavolɛ yeamaa bayɛ Kilisiene mrenyia mɔɔ bɛnyi sunsum nu a? (Nea ɔ nyunlu nvoninli ne.)

¹⁹ Mediema mgbavolɛ, ɔwɔ kɛ bɛbɔ mɔdenle kpalɛ na bɛahola bɛayɛ Kilisienema mɔɔ bɛnyi sunsum nu. Ɔhyia kɛ ɛsukoa menli mɔɔ yɛ neazo kpalɛ la, ɛnyia adwenlenubukelɛ, ɛyɛ awie mɔɔ bɛkola bɛfa bɛ nwo bɛto ɛ nwo zo, ɛsukoa ɛ sa nloa gyima na ɛziezie ɛ nwo ɛmaa wɔ kenle bie ɛzonlelilɛ ngakyile.

²⁰ Saa ɛdwenledwenle gyima mɔɔ la ɛ nyunlu mɔɔ ɔwɔ kɛ ɛyɛ la anwo a, bie a ɛbade nganeɛ kɛ ɔbo ɛ nwo zo. Noko ɛbahola wɔayɛ. Kakye kɛ Gyihova lɛ ɛhulolɛ kɛ ɔbaboa wɔ. (Aye. 41:​10, 13) Ɛ mediema mɔɔ wɔ asafo ne anu la noko baboa wɔ. Saa ɛbayɛ Kilisienenli mɔɔ wɔnyi sunsum nu la a, ɛ nye balie na ɛ kunlu adwo ɛ nwo. Yɛ mediema mgbavolɛ, yɛkulo bɛ kpalɛ! Gyihova ɛyila bɛ wɔ mɔdenle mɔɔ bɛlɛbɔ ye kɛkala kɛ bɛbayɛ Kilisiene mrenyia mɔɔ bɛnyi sunsum nu la azo.—Mrɛ. 22:4.