1. Duzu ati a yɛkola yɛka kɛ ɛnee Ebileham anyelazo ne gyi ye kpundii a?

 GYIHOVA bɔle ɔ gɔnwo Ebileham ɛwɔkɛ kɛ, maanle maanle kɔsɔɔti mɔɔ wɔ azɛlɛ ye azo la balua ɔ ra ne anwo zo anyia nyilalɛ. (Gyn. 15:5; 22:18) Kɛmɔ ɛnee Ebileham lɛ diedi kpole wɔ Nyamenle anu la ati, ɔliele ɔlile kɛ Nyamenle bali ye ɛwɔkɛ ne azo. Noko mɔɔ Ebileham lile ɛvolɛ 100 na ɔ ye lile ɛvolɛ 90 bɔbɔ la, ɛnee agyalɛma ɛhye mɔɔ di nɔhalɛ la ɛtɛwole. (Gyn. 21:​1-7) Noko Baebolo ne ka kɛ: ‘[Ebileham] nyianle anyelazo na ɔliele ɔlile kɛ ɔbayɛ maanle maanle dɔɔnwo bɛ ze kɛ mɔɔ bɛhanle la.’ (Wlo. 4:18) Ɛze kɛ Ebileham anyelazo ne rale nu. Ɔwole Ayezeke, kakula ne mɔɔ ɛnee ɔ nye la ye ade mekɛ tendenle la. Duzu a maanle Ebileham nyianle anwodozo kpole ɛhye a?

2. Duzu ati a Ebileham liele lile bɔkɔɔ kɛ Gyihova ɛwɔkɛ ne bara nu a?

² Kɛmɔ ɛnee Ebileham ze Gyihova kpalɛ la ati, “ɔliele ɔlile bɔkɔɔ kɛ, mɔɔ Nyamenle ɛbɔ nwolɛ ɛwɔkɛ la” bara nu. (Wlo. 4:21) Ɔlua Ebileham diedi ne ati, Gyihova liele ye dole nu na ɔbule ye kɛ ɔle sonla tenlene. (Gye. 2:23) Kɛ mɔɔ Wulomuma 4:18 kile la, ɛnee Ebileham lɛ diedi nee anyelazo. Akee maa yɛzuzu edwɛkɛ mɔɔ ɛzoanvolɛ Pɔɔlo hanle ye wɔ anyelazo nwo mɔɔ wɔ Wulomuma tile 5 ne la anwo.

3. Duzu a Pɔɔlo hanle ye wɔ anyelazo nwo a?

³ Pɔɔlo hilehilele deɛmɔti yɛbahola yɛalie yɛali kɛ yɛ ‘anyelazo ɛhye ɛnrɛye yɛ rɛle ɛnrɛdo yɛ sa nu’ la anu. (Wlo. 5:5)  Eza ɔboa yɛ ɔmaa yɛnwu kɛzi yɛ Kilisiene anyelazo ne bahola ayɛ kpole la. Mekɛ mɔɔ yɛlɛsuzu ninyɛne mɔɔ Pɔɔlo diedianle bɛ wɔ Wulomuma 5:​1-5 anwo la, dwenle mɔɔ ɛdawɔ mumua ne wɔnwu ye la anwo nea. Bie a ɛbanwu kɛ mekɛ ɛlɛkɔ la ɛnee anyelazo mɔɔ ɛlɛ la ɛlɛyɛ kpole. Eza mɔɔ yɛlɛsuzu nwolɛ la bamaa yɛanwu kɛzi yɛbamaa yɛ anyelazo ne ayɛ kpole kpalɛ adɛla kɛkala la. Maa yɛlimoa yɛzuzu anyelazo kɛnlɛma bie mɔɔ Pɔɔlo hanle kɛ ɔnrɛye yɛ rɛle ɔnrɛdo yɛ sa nu la anwo.

4. Duzu a bɛha nwolɛ edwɛkɛ wɔ Wulomuma 5:​1, 2 a?

⁴ Kenga Wulomuma 5:​1, 2. Pɔɔlo hɛlɛle zɔhane edwɛkɛ ne hɔmaanle Wulomu asafo ne. Ɛnee mediema mɔɔ wɔ ɛkɛ ne la ɛzukoa Gyihova nee Gyisɛse anwo debie, bɛla ye ali kɛ bɛlɛ diedi na bɛrayɛ Kilisienema. Ɔti Nyamenle luale bɛ ‘diedi zo bule bɛ tenlenema’ na ɔvale sunsum nwuanzanwuanza ne ɔkpokpale bɛ. Amgba bɛnyianle anyelazo kɛnlɛma mɔɔ gyi ye kpundii.

5. Anyelazo boni a Kilisienema mɔɔ bɛkpokpa bɛ la lɛ a?

⁵ Nzinlii, Pɔɔlo hɛlɛle anyelazo mɔɔ Ɛfɛsɛse Kilisienema mɔɔ bɛkpokpa bɛ la nyianle la anwo edwɛkɛ hɔmaanle bɛ. Anyelazo zɔhane bamaa bɛanyia debie mɔɔ bɛbava bɛamaa “nwuanzanwuanzama ne kɛ agyapadeɛ la.” (Ɛfɛ. 1:18) Eza Pɔɔlo maanle Kɔlɔsaema nwunle ɛleka mɔɔ bɛbanyia bɛ anyelazo ne la. Ɔvɛlɛle ye “anyelazo ne mɔɔ ɛlɛkendɛ bɛ wɔ anwuma la.” (Kɔl. 1:​4, 5) Ɔti Kilisienema mɔɔ bɛkpokpa bɛ la anyelazo a le kɛ bɛbadwazo bɛ na bɛamaa bɛ dahuu ngoane wɔ anwuma na bɛ nee Kelaese ali tumi.—1 Tɛs. 4:​13-17; Yek. 20:6.

6. Duzu a adiema nrenyia ko mɔɔ bɛkpokpa ye la hanle ye wɔ ye anyelazo ne anwo a?

⁶ Kilisienema mɔɔ bɛkpokpa bɛ la bu anyelazo zɔhane kɛ ɔsonle bolɛ. Bɛ nuhua ko a le Adiema Frederick Franz. Ɔhanle kɛzi ɔte nganeɛ wɔ anyelazo ɛhye anwo la anwo edwɛkɛ kɛ: “Kɛ ɔde ye biala la yɛ anyelazo ne bara nu, na menli 144,000 ne mɔɔ boka mboane ekpunli ekyi ne anwo la anu biala bɛnyia mɔɔ  Nyamenle ɛva ɛbɔ ye ɛwɔkɛ la. Yɛ ahatualɛ ne bayɛ kpole kpalɛ adɛla kɛzi yɛsuzu bɔbɔ la.” Adiema Franz vale nɔhalɛlilɛ zonlenle Nyamenle wɔ ɛvolɛ dɔɔnwo anu, na wɔ 1991, eza ɔzile zolɛ kɛ: “[Yɛ] anyelazo ne tɛsonle bolɛ tɛmaa yɛ. . . . Mekɛ tendenle mɔɔ yɛlɛfa yɛahendɛ la, ɛnee yɛ nye ɛlɛdie nwolɛ kpalɛ. Ɔle debie mɔɔ ɔhyia kɛ yɛkendɛ ye a, saa bɔbɔ ɔwɔ kɛ yɛfa ɛvolɛ mgbe ko yɛkendɛ a. Yɛ anyelazo ne sonle bolɛ kpole kpalɛ maa me ɛnɛ tɛla mekɛ mɔɔ ɛze la.”

7-8. Anyelazo boni a menli dɔɔnwo lɛ a? (Wulomuma 8:​20, 21)

⁷ Menli dɔɔnwo mɔɔ bɛsonle Gyihova ɛnɛ la lɛ anyelazo gyɛne. Anyelazo zɔhane bie a ɛnee Ebileham noko lɛ a—yemɔ a le kɛ bɛbanyia dahuu ngoane wɔ azɛlɛ ye azo wɔ Nyamenle Belemgbunlililɛ ne anu. (Hib. 11:​8-10, 13) Pɔɔlo hɛlɛle nyilalɛ mɔɔ bɛdabɛ mɔɔ bɛlɛ zɔhane anyelazo ne la banyia la anwo edwɛkɛ. (Kenga Wulomuma 8:​20, 21.) Mekɛ mɔɔ ɛlimoale ɛzukoale kenle bie nwo ɛwɔkɛ mɔɔ wɔ Baebolo ne anu la anwo debie la, duzu a ɛ nye liele nwolɛ kpalɛ a? Asoo yemɔ a le kɛ kenle ko dedee ɛbali munli mɔɔ ɛnrɛyɛ ɛtane bieko la ɔ? Anzɛɛ mɔɔ ɛ nye liele nwolɛ la a le kɛ bɛbadwazo wɔ alɔvolɛ bɛara ngoane nu bieko wɔ paladaese ɔ? “Anyelazo” ne mɔɔ Nyamenle ɛva ɛmaa yɛ la ati, ɛ nye la ninyɛne ngɛnlɛma dɔɔnwo ade.

⁸ Saa yɛ nye la kɛ yɛbanyia dahuu ngoane wɔ anwuma o anzɛɛ azɛlɛ ye azo o, ɔle anyelazo kɛnlɛma mɔɔ maa yɛdi fɛlɛko a. Na yɛ anyelazo ɛhye anu bahola ayɛ se bɔbɔ. Edwɛkɛ bieko mɔɔ Pɔɔlo hɛlɛle la maa yɛnwu kɛzi ɔbahola yeara ye zɔ la. Maa yɛzuzu mɔɔ ɔhanle ye wɔ yɛ anyelazo ne anwo la anwo. Yɛyɛ zɔ a, ɔbamaa yɛanyia anwodozo bɔkɔɔ kɛ yɛ anyelazo ne bahɔ zo ayɛ kpole na ɔnrɛye yɛ rɛle ɔnrɛdo yɛ sa nu ɛlɛ.

9-10. Kɛ mɔɔ Pɔɔlo neazo ne maa yɛnwu ye la, duzu a Kilisienema anye bahola ala ye ade a? (Wulomuma 5:3) (Eza nea nvoninli ne mɔ.)

⁹ Kenga Wulomuma 5:3. Yɛ ye nzonlɛ kɛ, bie a amaneɛnwunlɛ bamaa yɛ anyelazo ayɛ  kpole. Ɛhye bahola azi yɛ nwo. Nɔhalɛ ne a le kɛ Kelaese ɛdoavolɛma kɔsɔɔti bahola amaa bɛ nye ala kɛ bɛbanwu amaneɛ. Dwenle Pɔɔlo neazo ne anwo. Ɔhanle ɔhilele bɛdabɛ mɔɔ bɛwɔ Tɛsalonaeka la kɛ: “Mekɛ mɔɔ yɛwɔ bɛ nwo lɔ la, yɛhanle yɛhilele bɛ kɛ yɛbanwu amaneɛ, na yemɔ a ɛzi mɔɔ bɛnwu ye la.” (1 Tɛs. 3:4) Ɔhɛlɛle ɔhɔmaanle Kɔlentema ne noko kɛ: “Mediema, yɛkulo kɛ bɛnwu kɛ yɛnwunle amaneɛ dɔɔnwo . . . mɔɔ ɔhale yɛ nee ewule a.”—2 Kɔl. 1:8; 11:​23-27.

¹⁰ Kilisienema mɔɔ wɔ ɛkɛ ne ɛnɛ la bahola amaa bɛ nye ala kɛ bɛbanwu amaneɛ bie mɔ. (2 Tim. 3:12) Na ɛdawɔ noko ɛ? Mɔɔ ɛnyianle Gyisɛse anu diedi na ɛbɔle ɔ bo kɛ ɛdi ɔ nzi la, wɔyia amaneɛnwunlɛ bie ɔ? Bie a ɛ gɔnwo mɔ nee wɔ mbusuafoɔ golole ɛ nwo. Bie a bɛ nee wɔ anli ye boɛ. Kɛmɔ wɔbɔ kpɔkɛ kɛ ɛbali nɔhalɛ wɔ debie biala anu la ati, asoo yemaa wɔyia ngyegyelɛ wɔ gyima nu ɔ? (Hib. 13:18) Asoo arane ne dwazole tiale wɔ ɔlua wɔ diedi ne mɔɔ ɛhanle nwolɛ edwɛkɛ ɛhilele awie mɔ la ati ɔ? Noko ɔnva nwo ngyegyelɛ biala mɔɔ yɛbayia la, Pɔɔlo se yɛli fɛlɛko. Duzu ati ɔ?

11. Duzu ati a ɔhyia kɛ yɛbɔ kpɔkɛ kɛ yɛbagyinla sɔnea biala anloa kpundii a?

¹¹ Saa yɛlɛnwu amaneɛ a, yɛbahola yɛali fɛlɛko ɔlua mɔɔ yɛbanyia yɛavi nu la ati. Kɛ mɔɔ Wulomuma 5:3 ka la, “amaneɛnwunlɛ boa yɛ maa yɛgyinla kpundii.” Kilisienema kɔsɔɔti banwu amaneɛ, ɔti ɔwɔ kɛ bɛ muala bɛkola bɛgyinla kpundii. Ɔhyia kɛ yɛbɔ kpɔkɛ kɛ, yɛbagyinla sɔnea biala mɔɔ yɛbayia la anloa kpundii. Saa yɛyɛ zɔ a, yɛɛ yɛ sa baha mɔɔ yɛ nye la zolɛ la a. Yɛngulo kɛ yɛbayɛ kɛ menli mɔɔ ɛnee wɔ Gyisɛse adwenle nu wɔ mekɛ mɔɔ ɔlɛka ma mɔɔ guale awolɛ nu la anwo edwɛkɛ la. Mɔlebɛbo ne, bɛvale anyelielɛ bɛliele edwɛkɛ ne, noko mɔɔ ‘anwongyelelɛ rale anzɛɛ bɛyɛle bɛ kpɔdekpɔde wɔ edwɛkɛ ne anwo la’ ɔdendanle bɛ gyakɛ anu. (Mat. 13:​5, 6, 20, 21) Nɔhalɛ nu, saa yɛlɛyia dwazotia anzɛɛ sɔnea a ɔnla aze anzɛɛ ɔnyɛ fɛ, noko saa yɛgyinla kpundii a, ɔboa yɛ. Wɔ adenle boni azo?

12. Saa yɛgyinla sɔnea nloa a, kɛzi ɔboa yɛ ɛ?

¹² Ɛzoanvolɛ Gyemise hɛlɛle nvasoɛ mɔɔ wɔ kpundiigyinlanlɛ zo la anwo edwɛkɛ. Ɔhɛlɛle kɛ: “Noko bɛmaa kpundiigyinlanlɛ ɛwie ye gyima, amaa bɛali munli bɔkɔɔ mɔɔ edwɛkɛ biala ɛnle bɛ nwo wɔ ninyɛne kɔsɔɔti anu, na bɛangyia debie biala anwo.” (Gye. 1:​2-4) Ɛnee Gyemise ɛlɛkile kɛ kpundiigyinlanlɛ lɛ gyima yɛ. Gyima boni a kpundiigyinlanlɛ lɛ ye yɛ a? Ɔbahola yeaboa wɔ yeamaa wɔanyia abotane, diedi na wɔava ɛ nwo wɔado Nyamenle anwo zo bɔkɔɔ. Noko saa yɛgyinla sɔnea nloa a, ɔboa yɛ wɔ adenle titili bieko azo.

13-14. Duzu a kpundiigyinlanlɛ maa yɛnyia a, na kɛzi ɔka yɛ anyelazo ne ɛ? (Wulomuma 5:4)

¹³ Kenga Wulomuma 5:4. Pɔɔlo hɛlɛle kɛ kpundiigyinlanlɛ maa “yɛnyia Nyamenle anyunlu ɛlolɛ.” Wɔ kpundiigyinlanlɛ ne bamaa Gyihova alie wɔ ado nu. Ɛhye ɛngile kɛ Gyihova anye die nwo kɛ ɛlɛyia sɔnea anzɛɛ ngyegyelɛ la. Ɛdawɔ a Nyamenle anye die ɛ nwo a. Wɔ kpundiigyinlanlɛ ne maa ɛnyia Gyihova anyunlu ɛlolɛ. Ɛhye le nyilalɛ kpole!—Edw. 5:12.

¹⁴ Kakye kɛ Ebileham gyinlanle sɔnea nloa kpundii na ɔnyianle Nyamenle anyunlu ɛlolɛ. Gyihova nwunle ye kɛ ɔle ɔ gɔnwo na ɔbule ye tenlenenli. (Gyn. 15:6; Wlo. 4:​13, 22) Yɛdayɛ noko yɛbahola yɛayɛ kɛ Ebileham la. Tɛ gyima dodo mɔɔ yɛyɛ wɔ Nyamenle ɛzonlenlɛ nu anzɛɛ nwolɛ adenle ngakyile mɔɔ yɛlɛ la a bamaa yɛanyia Nyamenle anyunlu ɛlolɛ a. Saa yɛfa nɔhalɛlilɛ yɛgyinla kpundii a, yɛɛ yɛbanyia ɔ nyunlu ɛlolɛ a. Na ɔnva nwo ɛvolɛ mɔɔ yɛli, tɛnlabelɛ mɔɔ yɛwɔ nu anzɛɛ  yɛ anwosesebɛ, yɛ muala yɛbahola yɛagyinla kpundii. Ɛlɛfa nɔhalɛlilɛ wɔagyinla sɔnea bie anloa kpundii kɛkala ɔ? Saa ɔle zɔ a, ɛnee kakye kɛ wɔnyia Nyamenle anyunlu ɛlolɛ. Saa yɛnwu kɛ yɛnyia Nyamenle anyunlu ɛlolɛ a, ɔkola ɔmaa anyelazo mɔɔ yɛlɛ kɛ Ye ɛwɔkɛ ne mɔ bara nu la yɛ kpole kpalɛ.

15. Edwɛkɛ boni bieko a Pɔɔlo hanle a, na duzu ati a ɔbahola yeazi bie mɔ anwo a?

¹⁵ Kɛ mɔɔ Pɔɔlo hilehilele nu la, saa yɛgyinla sɔnea nloa kpundii a, ɔmaa yɛnyia Gyihova anyunlu ɛlolɛ. Yɛ kɛzi Pɔɔlo doale ye edwɛkɛ ne azo la nzonlɛ: “Nyamenle anyunlu ɛlolɛ . . . maa yɛnyia anyelazo, yɛɛ anyelazo ɛhye ɛnye yɛ rɛle ɛndo yɛ sa nu.” (Wlo. 5:​4, 5) Ɛhye bahola azi bie mɔ anwo. Duzu ati ɔ? Ɔluakɛ Pɔɔlo limoale hanle ye wɔ Wulomuma 5:2 kɛ ɛnee Wulomu Kilisienema zɔhane lɛ anyelazo dɛba, ‘bɛlɛ anyelazo kɛ bɛbanyia Nyamenle anyunlunyia ne.’ Ɔti bie a awie babiza kɛ, ‘Saa ɛnee zɔhane Kilisienema ne lɛ anyelazo dɛba a, ɛnee duzu ati a Pɔɔlo hanle anyelazo nwo edwɛkɛ nzinlii wɔ ye edwɛkɛ ne anu a?’

16. Kɛzi awie anyelazo bɔ ɔ bo nyi ɛ? (Eza nea nvoninli ne mɔ.)

¹⁶ Saa yɛmaa ɔtɛnla yɛ adwenle nu kɛ anyelazo le debie mɔɔ ɔyɛ kpole a, ɔbamaa yɛade mɔɔ ɛnee Pɔɔlo ɛlɛka la abo. Maa yɛva ɛhye kɛ neazo: Ɛkakye mekɛ mɔɔ ɛlimoale ɛdele anyelazo kɛnlɛma mɔɔ wɔ Nyamenle Edwɛkɛ ne anu la anwo edwɛkɛ la ɔ? Mekɛ zɔhane bie a ɛnyianle adwenle kɛ, ɔnrɛhola ɛnrɛra ye ɛlɛ kɛ yɛbadɛnla aze dahuu wɔ paladaese azɛlɛ zo. Noko mekɛ mɔɔ ɛlɛsukoa Gyihova nee ɛwɔkɛ mɔɔ wɔ Baebolo ne anu la anwo ninyɛne dɔɔnwo la, ɛliele ɛlile bɔkɔɔ kɛ anyelazo ɛhye bara nu amgba.

17. Saa ɛyila ɛ nwo zo na bɛsɔne wɔ a, kɛzi wɔ anyelazo ne kɔ zo yɛ kpole ɛ?

¹⁷ Mɔɔ ɛyilale ɛ nwo zo na bɛzɔnenle wɔ bɔbɔ la, wɔ anyelazo ne hɔle zo yɛle kpole wɔ mekɛ mɔɔ ɛlɛsukoa ninyɛne dɔɔnwo na ɛlɛnyi sunsum nu la. (Hib. 5:13–6:1) Bie a wɔnwu kɛ  edwɛkɛ mɔɔ wɔ Wulomuma 5:​2-4 la le nɔhalɛ. Ɛnwunle amaneɛ dɔɔnwo, noko ɛgyinlanle kpundii na Nyamenle maanle ɛnwunle kɛ wɔnyia ɔ nyunlu ɛlolɛ. Kɛmɔ ɛze kɛ wɔnyia Nyamenle anyunlu ɛlolɛ la ati, yemaa wɔnyia anyelazo kpole kɛ ɛ sa baha ninyɛne mɔɔ yebɔ nwolɛ ɛwɔkɛ la. Wɔ anyelazo ne ɛyɛ kpole ɛdɛla mɔlebɛbo ne. Wɔnwu ye bɔkɔɔ kɛ ɔbara nu. Ɔsonle bolɛ ɔmaa wɔ kpalɛ, ɔka wɔ ɛbɛlabɔlɛ kɔsɔɔti na ɔkakyi kɛzi ɛ nee wɔ abusua ne di, kɛzi ɛsisi kpɔkɛ nee kɛzi ɛfa wɔ mekɛ ɛdi gyima la.

18. Anwodozo boni a Gyihova maa yɛnyia a?

¹⁸ Ɛzoanvolɛ Pɔɔlo eza hanle anyelazo mɔɔ ɛnyia Nyamenle anyunlu ɛlolɛ a ɔmaa ɛnyia la anwo edwɛkɛ bie mɔɔ hyia la. Ɔmaa ɛnyia anwodozo kɛ wɔ anyelazo ne bara nu. Duzu ati a ɛbahola wɔalie wɔali a? Akee Pɔɔlo hanle edwɛkɛ ɛhye mɔɔ vi Nyamenle ɛkɛ mɔɔ maa yɛnyia anwodozo la hilele Kilisienema: “Anyelazo ɛhye ɛnye yɛ rɛle ɛndo yɛ sa nu; ɔluakɛ bɛlua sunsum nwuanzanwuanza ne mɔɔ bɛva bɛmaa yɛ la azo bɛmaa Nyamenle ɛlɔlɛ ne ɛyi yɛ ahonle ne mɔ tetɛkɛɛ.” (Wlo. 5:5) Ɔwɔ kɛ ɛdie ɛdi bɔkɔɔ kɛ anyelazo zɔhane—mɔɔ le wɔ anyelazo ne, bara nu.

19. Anwodozo boni a yɛbahola yɛanyia wɔ yɛ anyelazo ne anwo a?

¹⁹ Dwenledwenle ɛwɔkɛ mɔɔ Gyihova bɔle Ebileham nee kɛzi ɔnyianle Nyamenle anyunlu ɛlolɛ na ɔrayɛle Ɔ gɔnwo la anwo. Ebileham anyelazo ne anyɛ mgbane. Baebolo ne hanle kɛ: “Mɔɔ Ebileham nyianle abotane la, ɔ sa hanle ɛwɔkɛ ɛhye.” (Hib. 6:15; 11:​9, 18; Wlo. 4:​20-22) Ɔ sa anzi aze ɛlɛ. Ɛdawɔ noko ɛbahola wɔanyia anwodozo bɔkɔɔ kɛ, saa ɛkɔ zo ɛdi nɔhalɛ a, ɛbanyia ahatualɛ mɔɔ ɛ nye la la. Wɔ anyelazo ne bara nu; ɔbamaa wɔali fɛlɛko, ɔnrɛye ɛ rɛle ɔnrɛdo ɛ sa nu! (Wlo. 12:12) Pɔɔlo hɛlɛle kɛ: “Nyamenle ne mɔɔ maa anyelazo la ɛmaa anyelielɛ nee anzodwolɛ ɛyi bɛ tɛkɛɛ, kɛmɔ bɛva bɛ rɛle bɛwula ye nu la ati, amaa ɔlua sunsum nwuanzanwuanza ne tumi zo bɛ anyelazo ayɛ kpole.”—Wlo. 15:13.