Wɔgenga Ɛzinzalɛ Arane mɔɔ ɛra ɛvolɛ ɛhye anu la kpalɛ ɔ? Nea saa ɛbahola wɔabua kpuya ɛhye mɔ a:

Kɛzi ɔwɔ kɛ bɛ nee mraalɛ di la anwo neazo boni a Gyihova ɛyɛ a?

Ɔnyɛ nyeyenu, ɔngulo mrenyia edwɛkɛ ɔndɛla mraalɛ. Nyamenle tie bɛ, ɔdwenle kɛzi bɛte nganeɛ nee bɛ ngyegyelɛ nwo. Yɛɛ ɔdie ɔdi kɛ bɛbahola bɛayɛ ye gyima ne.—w24.01, m. 15-16.

Kɛ ɔkɛyɛ na yɛava edwɛkɛ mɔɔ wɔ Ɛfɛsɛsema 5:7 mɔɔ se “bɛ nee bɛ mmatu” la yɛali gyima ɛ?

Ɛnee ɛzoanvolɛ Pɔɔlo ɛlɛbɔ yɛ kɔkɔ kɛ yɛ nee menli mɔɔ bɛbamaa yeayɛ se kɛ yɛbali Nyamenle ngyinlazo ne mɔ azo la mmatu. Menli ɛhye mɔ bie a le bɛdabɛ mɔɔ yɛ nee bɛ bɔ nu yɛ ninyɛne nee bɛdabɛ mɔɔ yɛ nee bɛ di adwelie wɔ sohyia media azo la.—w24.03, m. 22-23.

Adalɛ edwɛkɛ boni mɔ a ɔwɔ kɛ yɛtwe yɛ nwo yɛfi nwo a?

Ɔwɔ kɛ yɛnea yɛ nwo boɛ wɔ edwɛkɛ mɔɔ bɛanlimoa bɛanneɛnlea nu mɔɔ yɛ gɔnwo mɔ mɔɔ bɛlɛ adwenle kpalɛ la fa nwa yɛ, email mɔɔ menli mɔɔ yɛnze bɛ la fa nwa yɛ yɛɛ kpɔkyevolɛma mɔɔ bɛyɛ bɛ nwo kɛ bɛ nye die nɔhalɛ ne anwo la anwo.—w24.04, m. 12.

Duzu a yɛze wɔ kɛzi Gyihova babua Belemgbunli Sɔlɔmɔn nee bɛdabɛ mɔɔ bɛwule wɔ Sodɔm nee Gɔmɔla yɛɛ Azuyilɛ ne anu la ndɛne la anwo a, na duzu a yɛnze a?

Yɛnze kɛ amgba Gyihova ɛbua bɛ ndɛne kɛ bɛnrɛdwazo bɛ bieko. Noko yɛze kɛ ɔze nɔhalɛ mɔɔ wɔ edwɛkɛ ne anu la amuala yɛɛ ɔse anwunvɔne kpalɛ.—w24.05, m. 3-4.

Kɛmɔ Nyamenle le “Bodane ne” la ati, anwodozo boni a ɔmaa yɛnyia a? (Dit. 32:4)

Yɛbahola yɛanyia ɛvealeka wɔ Gyihova anu. Yɛkola yɛfa yɛ nwo yɛto ɔ nwo zo, dahuu ɔdi ye ɛwɔkɛ zo. Yɛɛ ɔsi pi, ye subane nee ye bodane ne mɔ ɛngakyi.—w24.06, m. 26-28.

Duzu a baboa wɔ yeamaa wɔahola wɔadɛnla asafo fofolɛ nu a?

Fa ɛ nwo to Gyihova anwo zo, yeboa ye azonvolɛ wɔ tete ne na ɔbaboa ɛdawɔ noko. Mmafa wɔ asafo dɛba ne ɛtoto fofolɛ ne anwo. Fa ɛ nwo wula gyimalilɛ ngakyile mɔɔ wɔ asafo fofolɛ ne yɛ la anu na kpondɛ agɔnwolɛma fofolɛ.—w24.07, m. 26-28.

Ɛzukoalɛdeɛ boni mɔ a wɔ ndonwo nsa ne mɔɔ wɔ Mateyu tile 25 ne la anu a?

Mboane nee mbɔnkye nwo ndonwo ne maa yɛnwu kɛzi ɔhyia kɛ yɛkɔ zo yɛdi nɔhalɛ la. Mbɛlɛra badwema nee ahoasea ne mɔ anwo ndonwo ne maa yɛnwu kɛ ɔwɔ kɛ yɛsiezie yɛ nwo na yɛmaa yɛ nye da ɛkɛ. Yɛɛ talɛnte nwo ndonwo ne maa yɛnwu kɛzi ɔhyia kɛ yɛmaa yɛ nye bolo gyima ɛsesebɛ ɛyɛlɛ nwo la.—w24.09, m. 20-24.

Kɛzi ɛnee abenlana ne mɔɔ wɔ Sɔlɔmɔn ɛzonlenlɛsua ne anyunlu la anwumahɔlɛ de ɛ?

Tete bɛsanloangɛlɛlera bie mɔ ka ye wɔ 2 Edwɛkɛsisilɛ 3:4 kɛ abenlana ne le “kubit 120,” mɔɔ kile kɛ ye anwumahɔlɛ ne le mita 53 (fuutu 175). Noko ngɛlɛlera gyɛne mɔɔ menli dɔɔnwo lɛ nu anwodozo la ka kɛ ɔle “kubit 20,” kile kɛ ye anwumahɔlɛ le mita ngɔnla (fuutu 30). Ɔlua ɛzonlenlɛsua ne bane ne ɛzamo ti, ɔbahola yeazɔ abenlana “kubit 20” ne kpundii.—w24.10, m. 31.

Saa bɛka kɛ ɔwɔ kɛ asafo nu sonvolɛ ‘aye yɛ ko’ a, ɔkile duzu? (1 Tim. 3:12)

Ɔkile kɛ ɔwɔ kɛ ɔgya raalɛ ko ala na ɔnle kɛ ɔbɔ adwɔmane ɛbɛla. Eza ɔnle kɛ ɔnyia mraalɛ gyɛne anwo ɛhulolɛ wɔ adenle mɔɔ ɛnfɛta la azo.—w24.11, m. 19.

Duzu ati a yɛkola yɛka kɛ edwɛkɛ mɔɔ wɔ Dwɔn 6:53 la ɛngile adenle mɔɔ yɛbalua zo yɛali Awulae Nɔsolɛ Aleɛ ne la ɛ?

Edwɛkɛ mɔɔ wɔ Dwɔn 6:53 la maa yɛnwu kɛzi ɔhyia kɛ yɛdi Gyisɛse anwo nane ne na yɛno ye mogya ne la. Gyisɛse hanle edwɛkɛ ɛhye wɔ ɛvolɛ 32 Y.M. wɔ Galeli. Ɔhanle ɔhilele Dwuuma mɔɔ ɛnee ɔhyia kɛ bɛnyia ye nu diedi la. Noko ɛhye anzi ɛvolɛ ko, ɔhyehyɛle Awulae Nɔsolɛ Aleɛ ne wɔ Gyɛlusalɛm. Wɔ ɛke ɛnee Gyisɛse ɛlɛtendɛ ahile bɛdabɛ mɔɔ ɔ nee bɛ bali tumi wɔ anwuma la.—w24.12, m. 10-11.