Ɛzoanvolɛ Pɔɔlo hɛlɛle hɔmaanle ɔ gɔnwo asafo nu kpanyinli Timote kɛ: “Meka meahile wɔ wɔ Nyamenle nee Kelaese Gyisɛse yɛɛ anwumabɔvolɛma mɔɔ bɛkpa bɛ la anyunlu kɛ di adehilelɛ ɛhye mɔ azo, na mmanea menli nyunlu anzɛɛ mmayɛ nyeyenu biala.”—1 Tim. 5:21.

Mɔɔ limoa, yɛbahola yɛazuzu anwumabɔvolɛma mɔɔ bɛmboka anwumabɔvolɛma ekpunli ɛhye anwo la anwo. Ɔda ali wienyi kɛ tɛ bɛmɛ a le menli 144,000 ne. Mɔɔ Pɔɔlo hɛlɛle edwɛkɛ ɛhye hɔmaanle Timote la, ɛnee bɛtɛbɔle ɔ bo kɛ bɛdwazo Kilisienema mɔɔ bɛkpokpa bɛ la bɛahɔ anwuma. Ɛnee ɛzoanvolɛma ne nee menli gyɛne mɔɔ bɛkpokpa bɛ la ɛtɛnyianle ɛtɛyɛle sunsum nu abɔdeɛ, ɔti tɛ bɛdabɛ a bɛle “anwumabɔvolɛma mɔɔ bɛkpa bɛ” la.—1 Kɔl. 15:​50-54; 1 Tɛs. 4:​13-17; 1 Dwɔn 3:2.

Eza “anwumabɔvolɛma mɔɔ bɛkpa bɛ” la ɛnrɛhola ɛnrɛyɛ anwumabɔvolɛma mɔɔ bɛyɛle anzosesebɛ wɔ Azuyilɛ mekɛ ne anu la. Ɔluakɛ zɔhane anwumabɔvolɛ ne mɔ lile Seetan anzi na bɛrayɛle Gyisɛse agbɔvolɛ. (Gyn. 6:2; Luku 8:​30, 31; 2 Pita 2:4) Kenle bie, bɛbagua bɛ wɔ kuma kuloonwu bie anu too ɛvolɛ 1,000, na yemɔ anzi bɛava bɛ bɛaboka Abɔnsam anwo bɛazɛkye bɛ.—Dwu. 6; Yek. 20:​1-3, 10.

Ɔti “anwumabɔvolɛma mɔɔ bɛkpa bɛ” mɔɔ Pɔɔlo hanle bɛ nwo edwɛkɛ la bahola ayɛ anwumabɔvolɛma mɔɔ bɛwɔ anwuma mɔɔ bɛboa “Nyamenle nee Kelaese,” mɔɔ bɛdabɛ noko bɛhanle bɛ nwo edwɛkɛ wɔ ngyɛnu ko ne ala anu la.

Anwumabɔvolɛ nɔhavoma apenle apenle dɔɔnwo a wɔ ɛkɛ a. (Hib. 12:​22, 23) Ɔnle kɛ yɛnyia adwenle kɛ Gyihova fa gyimalilɛ ko ne ala maa bɛ nuhua ko biala wɔ mekɛ ko ne ala anu. (Yek. 14:​17, 18) Kakye kɛ, kenle ko nɔɔzo bie Gyihova maanle anwumabɔvolɛ ko hunle Aselea sogyama 185,000. (2 Arl. 19:35) Bie noko a bɛmaa anwumabɔvolɛma bie mɔ gyima kɛ “bɛbaboɔboa ninyɛne kɔsɔɔti mɔɔ maa awie mɔ tɔ aze nee menli mɔɔ yɛ ninyɛndane la anloa bɛavi [Gyisɛse] Belemgbunlililɛ ne anu.” (Mat. 13:​39-41) Ɔbayɛ kɛ bɛmaa bie mɔ noko gyima kɛ “bɛbaboɔboa bɛdabɛ mɔɔ yekpa bɛ la anloa” bɛahɔ anwuma. (Mat. 24:31) Yɛɛ bɛmaa anwumabɔvolɛma bie mɔ gyima kɛ ‘bɛbɔ yɛ nwo bane wɔ yɛ ndenle kɔsɔɔti anu.’—Edw. 91:11; Mat. 18:10; fa toto Mateyu 4:11; Luku 22:43 anwo.

“Anwumabɔvolɛma mɔɔ bɛkpa bɛ” mɔɔ bɛha bɛ nwo edwɛkɛ wɔ 1 Timote 5:21 la bahola ayɛ anwumabɔvolɛma mɔɔ bɛmaa bɛ gyimalilɛ titili kɛ bɛnlea Nyamenle menli la. Wɔ edwɛkɛ mɔɔ boka nwo la anu, Pɔɔlo vale folɛdulɛ mɔɔ nrɛlɛbɛ wɔ nu mɔɔ fale asafo nu mgbanyima nee kɛzi ɔwɔ kɛ bɛdi bɛ eni la anwo la maanle. Ɔwɔ kɛ mgbanyima ne mɔ di bɛ ɛzonlelilɛ nwo gyima mɔɔ ‘bɛnnea menli nyunlu anzɛɛ bɛnyɛ nyeyenu biala,’ yɛɛ ɔnle kɛ bɛsi kpɔkɛ anzɛɛ bɛbua ndɛne mɔɔ bɛnlimoa bɛndwenle nwolɛ kpalɛ a. Deɛmɔti ɔwɔ kɛ bɛfa folɛdulɛ ne mɔɔ sunsum ne maanle Pɔɔlo hɛlɛle la anyebolo zo la a le kɛ bɛlɛyɛ gyima wɔ “Nyamenle nee Kelaese Gyisɛse yɛɛ anwumabɔvolɛma mɔɔ bɛkpa bɛ la anyunlu.” Ɛhye maa ɔda ali wienyi kɛ bɛmaa anwumabɔvolɛma bie mɔ gyimalilɛ kɛ bɛnlea asafo ne azo. Gyimalilɛ ɛhye mɔ bie a le kɛ bɛbabɔ asafo ne anwo bane, bɛbanlea edwɛkɛhanlɛ gyima ne azo na bɛaha mɔɔ bɛbanwu ye la anwo edwɛkɛ bɛahile Gyihova.—Mat. 18:10; Yek. 14:6.