1. Duzu a kile kɛ ɛnee Ngɛlɛlera ne anwo hyia Gyisɛse a?

 FA YE kɛ Gyisɛse ɛlɛkilehile la ɛnee ɛwɔ ɛkɛ, ɛnea a kɛzi ɔbayɛ ɛ? Ɛnee ɔta ɔtwe adwenle ɔkɔ Ngɛlɛlera Nwuanzanwuanza ne azo mɔɔ ɔnnea nu a! Nɔhalɛ nu, wɔ Gyisɛse edwɛkɛ mɔɔ ɔlimoale ɔhanle wɔ ye ɛzɔnenlɛ ne anzi nee mɔɔ ɔhanle kolaa na yeawu la bie mɔ anu, ɔhwenle adwenle ɔhɔle Ngɛlɛlera ne azo. b (Dit. 8:3; Edw. 31:5; Luku 4:4; 23:46) Na wɔ ɛvolɛ nsa nee foa mɔɔ ɔvale ɔyɛle gyima, ɔvi mekɛ mɔɔ bɛzɔnenle ye kɔdwu mekɛ mɔɔ ɔwule la anu, ɛnee ɔta ɔkenga Ngɛlɛlera ne, ɔtwe adwenle ɔkɔ zo na ɔkilehile nu wɔ bagua nu.​—Mat. 5:17, 18, 21, 22, 27, 28; Luku 4:16-20.

2. Mɔɔ Gyisɛse ɛlɛnyi la, duzu a boale ye maanle ɔdele Ngɛlɛlera ne abo kpalɛ a? (Nea ɔ nyunlu nvoninli ne.)

² Wɔ ɛvolɛ dɔɔnwo anu kolaa na Gyisɛse abɔ ye ɛzonlenlɛ gyima ne abo la, ɛnee ɔkenga Nyamenle Edwɛkɛ ne yɛɛ ɔta ɔte kɛ bɛlɛkenga. Ye biala anu, ɛnee ɔte kɛ Mɛle nee Dwosefi twe adwenle kɔ Ngɛlɛlera ne azo wɔ mekɛ mɔɔ bɛ nee abusua ne ɛlɛdi adwelie wɔ sua nu kenle ko biala la. c (Dit. 6:6, 7) Yɛbahola yɛalie yɛali kɛ ɛnee Gyisɛse nee ye abusua ne kɔ ɛzonlenlɛsua ne anu Ɛnwomenlelielɛ kenle biala. (Luku 4:16) Saa bɛlɛkenga Ngɛlɛlera ne a, ɔtie ye kpalɛ. Nzinlii, Gyisɛse nwunle kɛzi ɔdaye mumua ne ɔbagenga zɔhane Ngɛlɛlera Nwuanzanwuanza ne la. Ɛhye ati ɔranwunle Ngɛlɛlera ne anu kpalɛ, eza ɔ nye raliele nwolɛ na ɔmaanle bɛhanle kɛzi ɔbɔ ye ɛbɛla la. Kɛ neazo la, kakye mɔɔ zile wɔ ɛzonlenlɛsua ne anu wɔ mekɛ mɔɔ ɛnee yeli  ɛvolɛ 12 pɛ la. Kɛzi ɛnee “[Gyisɛse] te edwɛkɛ bo nee ye nyelebɛnloa ne zinle” kilehilevolɛma mɔɔ ɛnee bɛze Mosisi Mɛla ne kpalɛ la anwo.​—Luku 2:46, 47, 52.

3. Duzu a yɛbazuzu nwo edwɛkɛ ɛhye anu a?

³ Saa yɛdayɛ noko yɛkenga Ngɛlɛlera ne dahuu a, yɛbanwu Nyamenle Edwɛkɛ ne anu kpalɛ na yɛ nye alie nwolɛ. Noko, kɛ ɔkɛyɛ na yɛanyia mɔɔ yɛkenga la azo nvasoɛ kpalɛ ɛ? Yɛbahola yɛazukoa debie yɛavi edwɛkɛ mɔɔ Gyisɛse hanle hilele bɛdabɛ mɔɔ ɛnee bɛze Mɛla ne kpalɛ mɔɔ bie mɔ a le mɛla kilehilevolɛma, Falasiima nee Sadusiima la anu. Ɛnee ɛzonlenlɛ nu mgbanyima zɔhane mɔ kenga Ngɛlɛlera ne dahuu, noko ɛnee bɛnnyia mɔɔ bɛkenga la azo nvasoɛ. Gyisɛse hanle ninyɛne nsa mɔɔ anrɛɛ ɔwɔ kɛ bɛyɛ amaa bɛanyia mɔɔ bɛkenga la azo nvasoɛ kpalɛ la. Edwɛkɛ mɔɔ ɔhanle ɔhilele bɛ la baboa yɛ yeamaa yɛanyia anyuhɔlɛ wɔ (1) kɛzi yɛte mɔɔ yɛkenga la abo la, (2) yɛanwu nɔhalɛ mɔɔ sonle bolɛ la, yɛɛ (3) yɛamaa Nyamenle Edwɛkɛ ne ahakyi yɛ la anu.

4. Duzu a Luku 10:25-29 kilehile yɛ wɔ Nyamenle Edwɛkɛ ne ɛgengalɛ nwo a?

⁴ Yɛkulo kɛ yɛte mɔɔ yɛkenga ye wɔ Nyamenle Edwɛkɛ ne anu la abo. Tɛ ye zɔ a, yɛnrɛnyia mɔɔ yɛkenga la azo nvasoɛ kpalɛ. Kɛ neazo la, suzu adawu bie mɔɔ Gyisɛse nee “nrenyia bie mɔɔ ze Mɛla ne kpalɛ la” bɔle la anwo. (Kenga Luku 10:25-29.) Mɔɔ nrenyia ne bizale Gyisɛse mɔɔ ɔhyia kɛ ɔyɛ na yeanyia dahuu ngoane la, Gyisɛse hwenle ye adwenle hɔle Nyamenle Edwɛkɛ ne azo na ɔbizale ye kɛ: “Duzu a bɛhɛlɛ ye wɔ Mɛla ne anu a? Kɛzi ɛte mɔɔ ɛkenga la abo ɛ?” Nrenyia ne holale buale ye kpalɛ ɔlua ngɛlɛlera ne mɔɔ se ɔwɔ kɛ yɛkulo Nyamenle nee yɛ gɔnwo mɔɔ ɔhwenle adwenle ɔhɔle zo la azo. (Lɛv. 19:18; Dit. 6:5) Noko nea edwɛkɛ bieko mɔɔ nrenyia ne bizale la: “Nwane bɔbɔ a le me gɔnwo a?” Nrenyia ne maanle ɔlale ali kɛ yeande mɔɔ ɔgengale la abo kpalɛ. Ɛhye ati yeannwu kɛzi ɔbava zɔhane ngɛlɛlera ne mɔ yeali gyima kpalɛ wɔ ye ɛbɛlabɔlɛ nu la.

5. Saa yɛyɛ asɔne na yɛto yɛ rɛle aze yɛkenga debie a, kɛzi ɔbaboa yɛ yeamaa yɛade ɔ bo kpalɛ ɛ?

⁵ Saa yɛsukoa kɛzi bɛkenga debie kpalɛ la a, ɔbaboa yɛ yeamaa yɛade Nyamenle Edwɛkɛ ne abo kpalɛ. Nzuzulɛ bie mɔ mɔɔ bahola aboa wɔ la ɛne. Yɛ asɔne kolaa na wɔabɔ wɔ ɛgengalɛ ne abo. Yɛhyia Gyihova moalɛ amaa yɛahola yɛade Ngɛlɛlera ne abo, ɔti yɛbahola yɛazɛlɛ ye kɛ ɔva ye sunsum nwuanzanwuanza ne ɔboa yɛ amaa yɛava yɛ adwenle yɛazie mɔɔ yɛlɛkenga la azo. Akee to ɛ rɛle aze kenga. Yemɔ baboa wɔ yeamaa wɔade mɔɔ ɛlɛkenga la abo. Saa ɛkenga ye kpole anzɛɛ ɛbɔ Baebolo ne mɔɔ bɛhye la ɔdio ne wɔ mekɛ mɔɔ ɛlɛnea wɔ Baebolo ne anu la a, bie a ɔbaboa wɔ kpalɛ. Saa ɛte edwɛkɛ mɔɔ ɔwɔ ɔdio ne anu la na ɛnwu mɔɔ bɛhɛlɛ ye wɔ Baebolo ne anu la a, ɔbaboa wɔ yeamaa wɔade ɔ bo, wɔahakye na wɔazukoa ninyɛne dɔɔnwo wɔavi nu. (Dwɔh. 1:8) Saa ɛwie wɔ ɛgengalɛ ne a, yɛ asɔne bieko na yɛ Gyihova mo wɔ ye ahyɛlɛdeɛ ɛhye anwo na sɛlɛ ye kɛ ɔboa wɔ ɔmaa ɛva mɔɔ wɔgenga la ɛli gyima.

6. Saa ɛlɛkenga debie na ɛbiza ɛ nwo kpuya na ɛyɛ kɛlɛtokɛ a, kɛzi ɔbahola yeaboa wɔ ɛ? (Eza nea nvoninli ne.)

⁶ Nzuzulɛ nwiɔ ɛhye baboa wɔ yeamaa wɔade Baebolo ne abo kpalɛ. Biza ɛ nwo kpuya wɔ mɔɔ ɛlɛkenga la anwo. Saa ɛlɛkenga edwɛkɛ bie wɔ Baebolo ne anu a, biza ɛ nwo kɛ: ‘Menli titili boni a wɔ nu a? Nwane a ɛlɛtendɛ la? Nwane  a ɔ nee ye ɛlɛtendɛ la, na duzu ati ɔ? Nienwu yɛɛ mekɛ boni a edwɛkɛ ne ɛlɛsi a?’ Kpuya ɛhye mɔ baboa wɔ yeamaa wɔadwenle mɔɔ ɛlɛkenga la anwo na wɔanwu edwɛkɛ titili mɔɔ wɔ nu la. Eza ɛlɛkenga a yɛ kɛlɛtokɛ ngyikyi. Ɛhye maa ɛdwenle edwɛkɛ ne anwo ɛkɔ moa na ɔboa wɔ ɔmaa ɛte ɔ bo kpalɛ. Eza ɔbaboa wɔ yeamaa wɔahakye mɔɔ ɛlɛkenga la. Kɛlɛ kpuya mɔɔ ɛlɛ wɔ mɔɔ ɛlɛkenga anwo la to ɛkɛ, yɛ nwolɛ neɛnleanu na kɛlɛ mɔɔ ɛbanwu ye la, pɛ edwɛkɛ titili mɔɔ wɔ nu la sikalɛ, kɛlɛ kɛzi ɛbava mɔɔ wɔzukoa la wɔali gyima anzɛɛ kɛzi ɛte nganeɛ wɔ nwolɛ la to ɛkɛ. Bie a ɛbanwu kɛ saa ɛyɛ kɛlɛtokɛ a, ɔkola ɔboa wɔ ɔmaa ɛnwu Nyamenle Edwɛkɛ ne kɛ ɔhɛlɛle ɔmaanle wɔ.

7. Saa yɛlɛkenga debie a subane boni a yɛhyia nwo a, na duzu ati ɔ? (Mateyu 24:15)

⁷ Gyisɛse hanle subane bie mɔɔ ɔwɔ kɛ yɛnyia amaa yɛade mɔɔ yɛkenga la abo la​—yemɔ a le nwunu. (Kenga Mateyu 24:15.) Duzu a le nwunu? Yemɔ a le kɛzi yɛkola yɛnwu ye kɛ edwɛkɛ bie zɔho bɛ nwo nee ngakyile mɔɔ wɔ bɛ avinli, amaa yɛahola yɛanwu adwenle mɔɔ wɔ edwɛkɛ ne anu mɔɔ ɔnla ali ndɛndɛ la. Eza Gyisɛse maanle yɛnwunle kɛ yɛhyia nwunu amaa yɛahola yɛanwu ninyɛne mɔɔ ɛlɛmaa Baebolo ngapezo ara nu la. Eza yɛhyia nwunu amaa yɛahola yɛanyia debie biala mɔɔ yɛkenga ye wɔ Baebolo ne anu la azo nvasoɛ kpalɛ.

8. Saa yɛlɛkenga debie a, kɛ ɔkɛyɛ na yɛala nwunu ali ɛ?

⁸ Gyihova a maa ye azonvolɛ nyia nwunu a. Ɔti yɛ asɔne na sɛlɛ ye kɛ ɔboa wɔ ɔmaa ɛnyia subane ɛhye. (Mrɛ. 2:6) Kɛ ɔkɛyɛ na wɔayɛ debie mɔɔ nee wɔ asɔneyɛlɛ ne yia la ɛ? Tɔ alagye dwenledwenle mɔɔ ɛlɛkenga la anwo na nea kɛzi ɔfale ninyɛne gyɛne mɔɔ ɛze la anwo la. Saa ɛfa yɛ mbuluku mɔɔ yɛfa yɛsukoa Baebolo ne mɔɔ le kɛ Gyihova Alasevolɛ Neɛnleanu Buluku la ɛdi gyima a, ɔbahola yeaboa wɔ yeamaa wɔayɛ ɛhye. Mbuluku ɛhye mɔ baboa wɔ yeamaa wɔanwu ndelebɛbo mɔɔ wɔ Baebolo nu  edwɛkɛ bie anu la na wɔanwu kɛzi ɛbava wɔali gyima wɔ wɔ ɛbɛlabɔlɛ nu la. (Hib. 5:14) Saa ɛlɛkenga debie na ɛda nwunu ali a, ɔbamaa wɔade Ngɛlɛlera ne abo kpalɛ.

9. Ngɛlɛlera ne anu nɔhalɛ mɔɔ anwo hyia la boni a Sadusiima ne anlie ando nu a?

⁹ Ɛnee Sadusiima ne ze Hibulu Ngɛlɛlera ne mbuluku nnu ne mɔɔ limoa la anu edwɛkɛ ne kpalɛ, noko bɛanlie nɔhalɛ bie mɔɔ anwo hyia mɔɔ wɔ nu la bɛando nu. Kɛ neazo la, suzu mualɛ mɔɔ Gyisɛse vale maanle bɛ wɔ mekɛ mɔɔ bɛbizale ye ewudwazo ne anwo edwɛkɛ la anwo. Ɔbizale bɛ kɛ: “Asoo bɛtɛkengale ye wɔ Mosisi buluku ne anu wɔ kpɔkɛ ne anwo edwɛkɛ ne anu kɛ, Nyamenle zele ye kɛ: ‘Mame a mele Ebileham Nyamenle ne nee Ayezeke Nyamenle ne nee Gyekɔbo Nyamenle ne a’?” (Maake 12:18, 26) Ɛnee Sadusiima ne ɛgenga edwɛkɛ zɔhane fane dɔɔnwo ɛdeɛ, noko Gyisɛse edwɛkɛ ne maanle ɔlale ali kɛ ɛnee bɛnlie Ngɛlɛlera ne anu nɔhalɛ edwɛkɛ bie mɔɔ anwo hyia mɔɔ yemɔ a le ewudwazo ne la bɛndo nu.​—Maake 12:27; Luku 20:38. d

10. Saa yɛlɛkenga debie a, duzu a ɔwɔ kɛ yɛmaa yɛ adwenle kɔ zo a?

¹⁰ Duzu a yɛsukoa yɛfi nu a? Saa yɛlɛkenga debie a, yɛkulo kɛ yɛmaa yɛ adwenle kɔ ngyɛnu bie anzɛɛ mɔɔ Baebolo ne anu edwɛkɛ ne kilehile yɛ la azo. Tɛ mɔlebɛbo ngilehilelɛ ne mɔ ala a yɛkulo kɛ yɛnwu ye a, emomu, eza yɛkulo kɛ yɛnwu nɔhalɛ mɔɔ anu pi nee ngyinlazo mɔɔ ɛnla ali wienyi la.

11. Kɛ ɔkɛyɛ na wɔava 2 Timote 3:16, 17 wɔali gyima amaa wɔanwu nɔhalɛ mɔɔ sonle bolɛ mɔɔ wɔ Baebolo ne anu la ɛ?

¹¹ Saa ɛlɛkenga Baebolo ne a, kɛ ɔkɛyɛ na wɔanwu nɔhalɛ mɔɔ sonle bolɛ la ɛ? Suzu mɔɔ 2 Timote 3:16, 17 ka la anwo. (Kenga.) Yɛ ye nzonlɛ kɛ ‘Ngɛlɛlera ne amuala le kpalɛ maa’ (1) ngilehilelɛ, (2) bɛ nyunlu ɛhwilɛ, (3) ninyɛne ɛdenrɛdenrɛlɛ, yɛɛ (4) menli ɛtetelɛ. Ɛbahola wɔanyia nvasoɛ nna ɛhye mɔ wɔavi Baebolo mbuluku mɔɔ ɛnda ɛnva ɛnli gyima bɔbɔ la anu. Suzu edwɛkɛ ne anwo amaa wɔanwu mɔɔ ɔkilehile wɔ wɔ Gyihova, ye bodane ne anzɛɛ ye ngyinlazo ne mɔ anwo la. Nea deɛmɔti ɔle kpalɛ ɔmaa bɛ nyunlu ɛhwilɛ la. Nea kɛzi ngyehyɛnu ne mɔ boa wɔ ɔmaa ɛnwu adwenle anzɛɛ subane ɛtane nee kɛzi ɛbahola wɔahwe ɛ nwo wɔavi nwo amaa wɔahɔ zo wɔali nɔhalɛ wɔamaa Gyihova la. Suzu kɛzi ɛbahola wɔava edwɛkɛ ne mɔɔ ɛlɛkenga la wɔadenrɛdenrɛ adwenle mɔɔ ɛndenrɛ, bie a mɔɔ awie ɛha ye wɔ daselɛlilɛ nu la anwo. Eza nea kɛzi ngyehyɛnu ne mɔ batete wɔ amaa wɔanyia Gyihova adwenle la. Saa ɛmaa ninyɛne nna ɛhye mɔ tɛnla wɔ adwenle nu a, ɛbanwu nɔhalɛ mɔɔ sonle bolɛ la dɔɔnwo mɔɔ bamaa wɔ Baebolo ɛgengalɛ ne azo ara nvasoɛ kpole a.

12. Duzu ati a Gyisɛse bizale Falasiima ne kɛ, ‘Asoo bɛtɛkengale ɔ’ a?

¹² Eza Gyisɛse bizale Falasiima ne kɛ, ‘Asoo bɛtɛkengale ɔ?’ vale lale ye ali kɛ bɛlɛ Ngɛlɛlera ne anwo adwenle mɔɔ ɛndenrɛ. (Mat. 12:1-7) e Mekɛ zɔhane, Falasiima ne hanle kɛ Gyisɛse ɛdoavolɛma ne ɛdo Ɛnwomenlelielɛ Kenle mɛla ne. Mɔɔ Gyisɛse bua bɛ la, ɔhanle Ngɛlɛlera ne anu neazo nwiɔ na ɔhwenle adwenle ɔhɔle ngyɛnu bie mɔɔ wɔ Hozia buluku ne anu la azo ɔvale ɔhilele kɛ Falasiima ne ɛnde deɛmɔti bɛhyehyɛle Ɛnwomenlelielɛ kenle mɛla ne la abo yɛɛ bɛanze anwunvɔne. Duzu ati a Nyamenle Edwɛkɛ ne mɔɔ mrenyia ɛhye mɔ kenga la angakyi bɛ a? Ɔluakɛ ɛnee bɛkenga Ngɛlɛlera ne kɛ bɛkpondɛ edwɛkɛ wɔ nu bɛabua awie mɔ fɔlɛ yɛɛ ɛnee bɛle anwomemaazo. Yemɔ ammaa bɛande mɔɔ bɛgengale la abo.​—Mat. 23:23; Dwɔn 5:39, 40.

13. Saa yɛlɛkenga Baebolo ne a subane boni a ɔwɔ kɛ yɛnyia a, na duzu ati ɔ?

¹³ Yɛsukoa ye wɔ Gyisɛse edwɛkɛ ne anu kɛ, ɔhyia kɛ yɛfa adwenle kpalɛ yɛkenga Baebolo ne. Ɔnle kɛ yɛyɛ kɛ Falasiima ne la, emomu, ɔwɔ kɛ yɛbɛlɛ yɛ nwo aze na yɛnyia ɛhulolɛ kɛ yɛbamaa bɛahilehile yɛ. Ɔwɔ kɛ ‘yɛbɛlɛ yɛ nwo aze yɛdie Nyamenle edwɛkɛ ne mɔɔ yelua ye wɔ yɛ nu la yɛto nu.’ (Gye. 1:21) Saa yɛyɛ zɔ a, yɛbamaa Nyamenle Edwɛkɛ ne ahakyi kɛzi yɛde la. Saa yɛamkpondɛ edwɛkɛ wɔ nu yɛambua awie mɔ fɔlɛ anzɛɛ yɛammemaa yɛ nwo zo a, ɛzukoalɛdeɛ mɔɔ fale anwunvɔnezelɛ, ahunluyelɛyelalɛ yɛɛ ɛlɔlɛ nwo mɔɔ wɔ Baebolo ne anu la bahakyi yɛ.

14. Kɛ ɔkɛyɛ na yɛanwu kɛ yɛlɛmaa Baebolo ne ahakyi yɛ ɛ? (Eza nea nvoninli ne.)

¹⁴ Kɛzi yɛ nee awie mɔ di la a bahile kɛ yɛlɛmaa Nyamenle Edwɛkɛ ne ahakyi yɛ a. Kɛmɔ Falasiima ne ammaa Nyamenle Edwɛkɛ  ne angakyi bɛ subane la ati, ɔmaanle bɛbuale “bɛdabɛ mɔɔ edwɛkɛ ɛnle bɛ nwo la fɔlɛ.” (Mat. 12:7) Zɔhane ala a kɛzi yɛnwu awie mɔ na yɛ nee bɛ di la bahile kɛ saa yɛlɛmaa Nyamenle Edwɛkɛ ne ahakyi yɛ a. Kɛ neazo la, asoo yɛta yɛka kpalɛ mɔɔ yɛnwu ye wɔ awie mɔ anu la anwo edwɛkɛ anzɛɛ yɛta yɛka nvonleɛ mɔɔ yɛnwu ye wɔ bɛ nwo la ɔ? Asoo yɛse anwunvɔne yɛɛ yɛlɛ ɛhulolɛ kɛ yɛbava ɛtane yɛahyɛ anzɛɛ yɛtendɛ yɛtia awie mɔ na yɛfa bɛ nwo ɛya yɛsie yɛ nu ɔ? Kɛzi yɛbabua kpuya ɛhye mɔ la bamaa yɛanwu ye kɛ saa yɛlɛmaa mɔɔ yɛkenga la ahakyi yɛ nzuzulɛ, yɛ nganeɛdelɛ nee yɛ nyɛleɛ a.​—1 Tim. 4:12, 15; Hib. 4:12.

15. Kɛzi ɛnee Gyisɛse te nganeɛ wɔ Ngɛlɛlera Nwuanzanwuanza ne anwo ɛ?

¹⁵ Ɛnee Gyisɛse kulo Ngɛlɛlera Nwuanzanwuanza ne kpalɛ na bɛhanle kɛzi ɛnee ɔte nganeɛ wɔ nwolɛ la anwo ngapezo wɔ Edwɛne 40:8 kɛ: “O me Nyamenle, me nye die nwo kɛ mebayɛ wɔ ɛhulolɛdeɛ, yɛɛ wɔ mɛla ne wɔ me ahonle nu.” Ɛhye ati, ɔ nye liele na ɔhɔle zo ɔzonlenle Gyihova. Saa yɛdayɛ noko yɛbɔ mɔdenle kɛ yɛmaa Nyamenle Edwɛkɛ ne aha yɛ ahonle a, yɛ nye balie na yɛahɔ zo yɛazonle Gyihova.​—Edw. 1:1-3.

16. Duzu a ɛbahola wɔayɛ amaa wɔanyia Nyamenle Edwɛkɛ ne ɛgengalɛ zo nvasoɛ kpalɛ a? (Nea ɛlɛka, “ Gyisɛse Edwɛkɛ Ne Bahola Aboa Wɔ Yeamaa Wɔade Mɔɔ Ɛlɛkenga La Abo.”)

¹⁶ Bɛmaa yɛnyia anyuhɔlɛ wɔ yɛ Baebolo ɛgengalɛ nu kɛ mɔɔ Gyisɛse edwɛkɛ mɔɔ ɔhanle nee ye neazo ne kile la. Amaa yɛade Baebolo nu edwɛkɛ bie abo kpalɛ la, ɔwɔ kɛ yɛyɛ asɔne, yɛto yɛ rɛle aze yɛkenga, yɛbizebiza yɛ nwo kpuya na yɛyɛ kɛlɛtokɛ ngyikyi. Saa yɛfa yɛ mbuluku ne mɔ mɔɔ gyi Baebolo ne azo la yɛyɛ neɛnleanu kpalɛ a, ɔbamaa yɛala nwunu ali wɔ yɛ ɛgengalɛ nu. Saa yɛkpondɛ nɔhalɛ mɔɔ sonle bolɛ la wɔ Ngɛlɛlera ne anu, bɔbɔ wɔ edwɛkɛ mɔɔ yɛnda yɛngenga la anu a, ɔbamaa yɛanwu kɛzi yɛbava edwɛkɛ mɔɔ wɔ nu la yɛali gyima kpalɛ la. Yɛɛ saa yɛkɔ zo yɛfa subane kpalɛ yɛkenga Nyamenle Edwɛkɛ ne a, ɔbamaa yeahakyi yɛ. Saa yɛbɔ mɔdenle yɛyɛ ninyɛne ɛhye mɔ a, ɔbamaa yɛanyia yɛ Baebolo ɛgengalɛ ne azo nvasoɛ kpalɛ na yɛabikye Gyihova kpalɛ.​—Edw. 119:17, 18; Gye. 4:8.