1. Ɔnva nwo kɛ Gyihova a le Anwuma Anwumanli ne la, nzɔne a ɔmaa menli yɛ a?

GYIHOVA a le Anwuma Anwumanli ne a. Ɔdaye a ɔbɔle debie biala a, na ye nrɛlɛbɛ nee ye tumi ɛnlɛ ɔ nloa. Mɔɔ ɔmaanle Dwobu nwunle ɛhye la, Dwobu hanle kɛ: “Meze kɛ ɛkola ɛyɛ ninyɛne muala, yɛɛ awie ɛngola ɛnzɛkye wɔ ngyehyɛlɛ biala.” (Dwobu 42:2) Gyihova kola yɛ debie biala mɔɔ yezuzu nwo la mɔɔ ɔngyia awie biala moalɛ a. Noko kɛmɔ ɔkulo menli la ati, ɔmaa bɛ nee ye bɔ nu yɛ gyima amaa ye bodane ara nu.

2. Gyima mɔɔ anwo hyia la boni a Gyihova maanle Gyisɛse yɛle a?

² Nyamenle bɔle ɔ Ra Gyisɛse kolaa na yeabɔ awie gyɛne biala nee debie gyɛne biala. Akee Gyihova maanle ɔ Ra ne boale ye ɔmaanle ɔbɔle ninyɛne gyɛne mɔɔ ɛha la. (Dwɔn 1:1-3, 18) Ɛzoanvolɛ Pɔɔlo hɛlɛle Gyisɛse anwo edwɛkɛ kɛ: “Ɔ  nwo zo a Nyamenle luale bɔle ninyɛne kɔsɔɔti a: mɔɔ wɔ anwuma o nee mɔɔ wɔ aze o, mɔɔ bɛnwu bɛ nee mɔɔ bɛnnwu bɛ la amuala, ewiade ye anu tumima nee arelemgbunli nee bɛdabɛ mɔɔ bɛsie ɛnɛ mekɛ ye anu awozinli ewiade ye nee sunsum nu ɛlɔnema; Nyamenle luale Kelaese anwo zo a bɔle ninyɛne kɔsɔɔti a, yɛɛ Kelaese ati a ɔbɔle bɛ a.” (Kɔlɔsaema 1:15-17) Yemɔti Gyihova vale gyima mɔɔ hyia la maanle ɔ Ra ne, na ɔhanle nwolɛ edwɛkɛ ɔhilele awie mɔ. Enililɛ boni ɛne!

3. Gyima boni a Gyihova vale maanle Adam a, na nzɔne ati ɔ?

³ Eza Gyihova maanle alesama nee ye bɔle nu yɛle gyima. Kɛ neazo la, ɔmaanle Adam totonle nane nane ne mɔ aluma. (Mɔlebɛbo 2:19, 20) Nea kɛzi gyima ɛhye maanle Adam anye liele a! Ɔdɔle alagye ɔzukoale kɛzi nane nane ɛhye mɔ de nee bɛ nyɛleɛ kolaa na yeado ko biala duma. Gyihova a bɔle nane nane ne mɔ amuala a, yemɔti anrɛɛ ɔdaye mumua ne ɔbahola yeatoto bɛ aluma. Noko ɔmaanle Adam nwunle kɛzi ɔkulo ye la ɔlua nane nane ne mɔ mɔɔ ɔmaanle ɔtotonle bɛ aluma la azo. Eza Nyamenle maanle Adam gyima kɛ ɔmaa azɛlɛ ne amuala ɛyɛ paladaese. (Mɔlebɛbo 1:27, 28) Noko amozi Adam zile kpɔkɛ kɛ ɔ nee Nyamenle ɛnrɛyɛ gyima bieko, na yemaa ɔ nee ɔ bo zo amra amuala ɛlɛnwu amaneɛ kpalɛ.​—Mɔlebɛbo 3:17-19, 23.

4. Kɛzi awie mɔ nee Nyamenle bɔle nu yɛle gyima maanle ye bodane rale nu ɛ?

⁴ Amozi, Nyamenle maanle menli gyɛne nee ye bɔle nu yɛle gyima. Nowa bobɔle ɛlɛne, na ɔmaanle ɔ nee ye abusua ne nyianle ngoane wɔ Azuyilɛ ne anu. Mosisi yele Yizilayɛ maanle ne vile Yigyibiti. Dwɔhyua lile Yizilayɛma anyunlu hɔle Ɛwɔkɛ Azɛlɛ ne azo. Sɔlɔmɔn zile Gyɛlusalɛm ɛzonlenlɛ sua ne. Mɛle wole Gyisɛse. Nɔhavoma ɛhye mɔ nee menli gyɛne dɔɔnwo nee Gyihova bɔle nu yɛle gyima maanle ye bodane rale nu.

5. Gyima boni a yɛbahola yɛayɛ bie a, na asoo ɛnee ɔwɔ kɛ Gyihova maa yɛyɛ bie ɔ? (Nea mɔlebɛbo nvoninli ne.)

⁵ Ɛnɛ, Gyihova se yɛyɛ biala mɔɔ yɛbahola la yɛboa ye Belemgbunlililɛ ne. Ninyɛne dɔɔnwo wɔ ɛkɛ mɔɔ yɛbahola yɛayɛ yɛava yɛazonle Nyamenle a. Yɛɛ ɔnva nwo kɛ yɛ muala yɛnrɛhola yɛnrɛyɛ gyima ko ne ala wɔ ye ɛzonlenlɛ nu la, yɛ muala yɛbahola yɛabɔ edwɛkpa ne nolo. Gyihova mumua ne kola yɛ gyima ɛhye. Anrɛɛ ɔbahola yeadendɛ yeavi anwuma yeahile menli wɔ azɛlɛ ye azo. Gyisɛse hanle kɛ Gyihova bahola amaa awolɛ bɔbɔ aha Ye Belemgbunlililɛ ne azo Belemgbunli ne anwo edwɛkɛ ahile awie mɔ. (Luku 19:37-40) Noko Gyihova ɛmaa yɛ adenle kɛ yɛyɛ ye “egyinli nu gyimayɛvoma.” (1 Kɔlentema 3:9) Ɛzoanvolɛ Pɔɔlo hɛlɛle kɛ: “Kɛmɔ yɛ nee [Nyamenle] bɔ nu yɛ gyima la, yɛbodo yɛsɛlɛ bɛ kɛ bɛmmamaa Nyamenle ɛlolɛ ne mɔɔ bɛ sa ɛha ye la yɛ mgbane.” (2 Kɔlentema 6:1) Ɔle enililɛ kpole kɛ Nyamenle ɛlɛmaa yɛ nee ye abɔ nu ayɛ gyima la. Bɛmaa yɛnlea deɛmɔti ɛhye maa yɛ nye die kpole la.

6. Kɛzi Nyamenle belamunli Ralɛ ne hanle ye Papa mɔɔ ɔ nee ye bɔle nu yɛle gyima la anwo edwɛkɛ ɛ?

⁶ Nyamenle mɔɔ Gyihova azonvolɛ nee ye bɔ nu yɛ gyima la ɛmaa bɛ nye ɛlie dahuu.  Kolaa na Nyamenle belamunli Ralɛ ne ara azɛlɛ ye azo la, ɔhanle kɛ: “Medame a [Gyihova] lumuale bɔle me a, . . . ɛnee me nee ye a lua a, kɛ mele dwinvolɛ mɔɔ medi me ti anwo; memaa ɔ nye die dahuu, yɛɛ dahuu biala me nye die wɔ ɔ nyunlu.” (Mrɛlɛbulɛ 8:22, 30) Mɔɔ Gyisɛse nee ye Papa yɛ gyima la, ɛnee ɔ nye die ɔluakɛ ɔholale ɔyɛle ninyɛne dɔɔnwo yɛɛ ɛnee ɔze kɛ Gyihova kulo ye. Na yɛdayɛ noko ɛ?

7. Nzɔne ati a edwɛkɛhanlɛ gyima ne maa yɛ nye die ɛ?

⁷ Gyisɛse hanle kɛ saa yɛkyɛ awie debie anzɛɛ awie kyɛ yɛ debie a, ɔmaa yɛ nye die. (Gyima ne 20:35) Mɔɔ yɛnwunle nɔhalɛ ne la, yɛ nye liele, noko nzɔne ati a yɛka nɔhalɛ ne anwo edwɛkɛ yɛkile awie mɔ a ɔmaa yɛ nye die ɛ? Yemɔ a le kɛ yɛnwu kɛ Baebolo nu ndelebɛbo mɔɔ bɛnyia la maa bɛ nye die na bɛ nee Nyamenle ɛlɛnyia agɔnwolɛvalɛ. Saa yɛnwu kɛ bɛlɛyɛ nzenzaleɛ wɔ kɛzi bɛdwenle nee bɛ ɛbɛlabɔlɛ nu a, ɔmaa yɛ nye die. Edwɛkɛhanlɛ gyima ne anwo hyia yɛɛ ɔmaa yɛ kunlu dwo yɛ nwo. Ɔbahola yeamaa menli mɔɔ bɛbayɛ Nyamenle agɔnwo la anyia dahuu ngoane.​—2 Kɔlentema 5:20.

8. Edwɛkɛ boni a awie mɔ ɛha wɔ anyelielɛ mɔɔ wɔ Gyihova mɔɔ bɛ nee ye bɔ nu yɛ gyima la anwo a?

⁸ Yɛze kɛ saa yɛboa awie mɔ yɛmaa bɛsukoa Nyamenle anwo debie a, ɛnee yɛlɛyɛ Gyihova ɛhulolɛdeɛ yɛɛ ɔ nye sɔ mɔdenle mɔɔ yɛlɛbɔ yɛazonle ye la. Ɛhye noko maa yɛ nye die. (Kenga 1 Kɔlentema 15:58.) Marco mɔɔ de Italy la ka kɛ: “Kɛmɔ meze kɛ Gyihova ɛnle kɛ awie gyɛne mɔɔ ɔ rɛle bavi me mɔdenlebɔlɛ ne la ati, ɔmaa me nye die kpalɛ.” Franco mɔɔ ɔdaye noko ɔsonle wɔ Italy la ka kɛ: “Gyihova dua ye Edwɛkɛ ne nee sunsum nu nziezielɛ mɔɔ ɔyɛ la azo ɔkakye yɛ dahuu kɛ ɔkulo yɛ na mɔɔ yɛlɛyɛ yɛamaa ye la amuala sonle bolɛ, ɔnva nwo kɛ bie a  yɛ nye zo a yɛtɛyɛle ɛhwee la. Ɛhye ati a Nyamenle mɔɔ me nee ye bɔ nu yɛ gyima la ɛmaa me ɛbɛlabɔlɛ ne ɛgyinla kpɔkɛ zo na me nye die la.”

9. Nzɔne abusuabɔlɛ a ɛnee wɔ Gyihova nee Gyisɛse avinli a, na nzɔne ati ɔ?

⁹ Saa yɛ nee menli mɔɔ yɛkulo bɛ la bɔ nu yɛ gyima a, ɔmaa yɛbikye bɛ. Ɔmaa yɛnwu bɛ subane kpalɛ. Yɛnwu bodane mɔɔ bɛlɛ nee kɛzi bɛlɛbɔ mɔdenle kɛ bɛbadwu nwolɛ la. Ɔbayɛ kɛ Gyisɛse nee Gyihova yɛle gyima ɛvolɛ mgbe mgbe dɔɔnwo. Ɛlɔlɛ mɔɔ bɛlɛ bɛmaa bɛ nwo la anu mianle kpalɛ yemɔti debie biala angola anzɛkye bɛ abusuabɔlɛ ne. Gyisɛse hanle kɛzi bɛ abusuabɔlɛ ne anu mia la anwo edwɛkɛ kɛ: “Selɛ ne nee medame yɛle ko.” (Dwɔn 10:30) Ɛnee koyɛlɛ wɔ bɛ avinli kpalɛ, na bɛbɔle nu bɛyɛle gyima.

10. Kɛmɔti a edwɛkɛ ne mɔɔ yɛka la maa yɛbikye Nyamenle nee awie mɔ ɛ?

¹⁰ Gyisɛse zɛlɛle Gyihova kɛ ɔbɔ ye ɛdoavolɛma ne anwo bane. Nzɔne ati ɔ? Ɔzɛlɛle kɛ: “Amaa bɛayɛ ko kɛ ɛdawɔ nee medame yɛle la.” (Dwɔn 17:11) Saa yɛfa Nyamenle ngyinlazo yɛbɔ yɛ ɛbɛla na yɛyɛ edwɛkɛhanlɛ gyima ne bie a, ɔmaa yɛnwu ye subane ngɛnlɛma ne mɔ kpalɛ. Ɔmaa yɛnwu deɛmɔti ɔwɔ kɛ yɛnyia ye nu anwodozo na yɛfa ye adehilelɛ yɛyɛ gyima la. Na saa yɛbikye Nyamenle a, ɔdaye noko ɔbikye yɛ. (Kenga Gyemise 4:8.) Eza yɛbikye yɛ mediema ɔluakɛ yɛ muala yɛyia tɛnlabelɛ ko ne ala mɔɔ kola gyegye yɛ anzɛɛ ɔmaa yɛ nye die la, yɛɛ yɛlɛ bodane ko. Yɛyɛ gyima yɛbɔ nu, yɛ nye die bɔ nu yɛɛ yɛbɔ nu yɛgyinla ngyegyelɛ nloa. Octavia mɔɔ de Britain la ka kɛ: “Gyihova mɔɔ me nee ye bɔ nu yɛ gyima la maa mebikye awie mɔ.” Ɔkilehile nu kɛ ɔbikye awie mɔ ɔluakɛ ɔ nee bɛ lɛ “bodane ko yɛɛ ninyɛne ko ne ala a bɛyɛ a.” Zɔhane ala a yɛ muala yɛte nganeɛ a. Saa yɛnwu kɛzi yɛ mediema ɛlɛbɔ mɔdenle kɛ bɛbayɛ Gyihova ɛhulolɛdeɛ la a, ɔmaa yɛbikye bɛ.

11. Nzɔne ati a yɛbabikye Gyihova nee yɛ mediema kpalɛ wɔ ewiade fofolɛ ne anu ɛ?

¹¹ Kɛkala, ɛlɔlɛ mɔɔ yɛlɛ yɛmaa Nyamenle nee yɛ mediema la anu yɛ se, noko nuhua bayɛ se kpalɛ wɔ ewiade fofolɛ ne anu. Dwenle gyima mɔɔ yɛ anyelielɛ mɔɔ yɛbayɛ ye kenle bie la amuala anwo nea! Yɛbalie menli mɔɔ bɛbadwazo bɛ la na yɛahilehile bɛ Gyihova anwo debie. Eza yɛbayɛ gyima yɛamaa azɛlɛ ne ayɛ paladaese. Ɔbayɛ anyelielɛ kpole kɛ yɛbabɔ nu yɛayɛ gyima na ngyikyingyikyi yɛali munli wɔ Kelaese tumililɛ bo. Alesama kɔsɔɔti babikye bɛ nwo nee Gyihova mɔɔ ɔbamaa ‘tease abɔdeɛ biala akunlu adwo ɔ nwo’ la kpalɛ.​—Edwɛndolɛ 145:16.

12. Kɛzi edwɛkɛhanlɛ gyima ne bɔ yɛ nwo bane ɛ?

¹² Ɔwɔ kɛ yɛbɔ agɔnwolɛvalɛ mɔɔ yɛ nee Gyihova lɛ la anwo bane. Yɛde Seetan  ewiade nu yɛɛ yɛnli munli, yemɔti kɛzi yɛdwenle nee kɛzi yɛyɛ yɛ nyɛleɛ la bahola ayɛ kɛ ewiade ne la. Ɔle kɛ yɛlɛweɛ azule na azule ne ɛlɛpia yɛ ahɔ ɛleka mɔɔ yɛngulo kɛ yɛkɔ la. Yemɔti ɔwɔ kɛ yɛfa yɛ anwosesebɛ muala yɛweɛ yɛkɔ ɛleka mɔɔ yɛkpondɛ kɛ yɛkɔ la. Zɔhane ala a ɔwɔ kɛ yɛbɔ mɔdenle kɛ yɛnrɛmaa Seetan ewiade ne ɛnrɛnyia yɛ nwo zo tumi a. Yemɔti kɛzi edwɛkɛhanlɛ gyima ne bɔ yɛ nwo bane ɛ? Saa yɛka Gyihova nee Baebolo ne anwo edwɛkɛ a, ɔmaa yɛfa yɛ adwenle yɛsie ninyɛne mɔɔ anwo hyia na ɔle kpalɛ la azo, tɛ ninyɛne mɔɔ ɔbamaa yɛ diedi aha aze la. (Felepaema 4:8) Edwɛkɛhanlɛ ne maa yɛ diedi nu mia ɔluakɛ ɔmaa yɛkakye Nyamenle ɛwɔkɛ ne mɔ nee ye ngyinlazo mɔɔ vi ɛlɔlɛ nu la. Eza ɔmaa yɛnyia subane mɔɔ yɛhyia amaa yɛahola yɛabɔ yɛ nwo bane yɛavi Seetan nee ye ewiade ne anwo la.​—Kenga Ɛfɛsɛsema 6:14-17.

13. Kɛzi Dasevolɛ bie mɔɔ vi Australia la te nganeɛ wɔ edwɛkɛhanlɛ ne anwo ɛ?

¹³ Saa yɛbɔ mɔdenle yɛka edwɛkɛ ne, yɛsukoa debie na yɛboa awie mɔ wɔ asafo ne anu a, ɔbɔ yɛ nwo bane ɔluakɛ ɔmmaa yɛndwenledwenle yɛ ngyegyelɛ ne mɔ anwo somaa. Joel mɔɔ de Australia la ka kɛ: “Edwɛkɛhanlɛ gyima ne maa menwu mɔɔ ɛlɛkɔ zo la. Ɔmaa mekakye ngyegyelɛ mɔɔ menli ɛlɛyia nee kɛzi Baebolo ngyinlazo mɔɔ melɛfa meayɛ gyima wɔ me ɛbɛlabɔlɛ nu ɛboa me la. Edwɛkɛhanlɛ gyima ne maa mekɔ zo mebɛlɛ me nwo aze; na ɔmaa mefa me nwo meto Gyihova nee me mediema nwo zo.”

14. Kɛzi edwɛkɛhanlɛ ne mɔɔ yɛtɛgyakyile la maa yɛnwu kɛ Nyamenle sunsum ne ɛlɛboa yɛ ɛ?

¹⁴ Edwɛkɛhanlɛ gyima ne maa yɛnwu kɛ amgba Nyamenle sunsum ne ɛlɛboa yɛ. Kɛ neazo la: Fa ye kɛ ɔle wɔ gyima kɛ ɛbahyɛ paano wɔamaa wɔ sua zo amra. Bɛndua wɔ kakɛ wɔ ɛhye anwo, yɛɛ kakɛ biala mɔɔ ɛbabɔ la, ɔwɔ kɛ ɛtua wɔ debie. Eza menli dɔɔnwo anye ɛnlie paano ne anwo, na bie mɔ bɔbɔ kpɔ wɔ kɛ ɛfa ɛbɛlɛ bɛ la. Mekɛ tendenle nyɛ a ɛbava wɔayɛ gyima ɛhye a? Ɔnrɛhyɛ na ɛ sa nu ado, na bie a ɛbagyakyi. Noko yɛ nuhua dɔɔnwo yɛ edwɛkɛhanlɛ gyima ne ɛvolɛ biala, ɔnva nwo kɛ ɛhye sɛkye yɛ mekɛ nee ezukoa, na bɔbɔ bie mɔ golo yɛ nwo anzɛɛ ka yɛ ɛya la. Ɛhye kile kɛ Nyamenle sunsum ne ɛlɛboa yɛ.

15. Kɛzi edwɛkɛhanlɛ gyima ne fale bodane mɔɔ Nyamenle lɛ maa alesama la anwo ɛ?

¹⁵ Kɛzi edwɛkɛhanlɛ gyima ne fale bodane mɔɔ Gyihova lɛ maa alesama la anwo ɛ? Ɛnee Nyamenle bodane a le kɛ alesama badɛnla aze dahuu, yemɔti ɛtane mɔɔ Adam yɛle la angakyi ye bodane ne. (Ayezaya 55:11) Nyamenle yɛle ngyehyɛleɛ amaa balie yɛ bɛavi ɛtane nee ewule nu. Wɔ adenle boni azo? Gyisɛse rale azɛlɛ ye azo na ɔvale ye ngoane ɔbɔle afɔle. Noko amaa yɛanyia ye  afɔlebɔlɛ ne azo nvasoɛ la, ɔwɔ kɛ yɛtie Nyamenle. Yemɔti Gyisɛse maanle menli nwunle mɔɔ Nyamenle kpondɛ kɛ bɛyɛ la, na ɔzele ye ɛdoavolɛma ne kɛ bɛyɛ zɔhane ala. Saa yɛka edwɛkɛ ne na yɛboa awie mɔ yɛmaa bɛfa Nyamenle agɔnwolɛ ɛnɛ a, ɛnee yɛ nee Nyamenle ɛlɛyɛ gyima abɔ nu yɛamaa ngyehyɛleɛ mɔɔ yeyɛ kɛ ɔdua zo yealie alesama yeavi ɛtane nee ewule nu la ara nu.

16. Kɛzi yɛ edwɛkɛhanlɛ ne fale Nyamenle mɛla titili ne anwo ɛ?

¹⁶ Saa yɛboa awie mɔ yɛmaa bɛnwu dahuu ngoane adenle ne a, ɔkile kɛ yɛkulo bɛ yɛɛ yɛkulo Gyihova. Ɔkpondɛ kɛ “menli kɔsɔɔti nwu nɔhalɛ ne na bɛnyia ngoane.” (1 Temɔte 2:4) Mekɛ mɔɔ Falasiinli bie bizale Gyisɛse kɛ Nyamenle mɛla ne anu titili ne a le boni la, Gyisɛse hanle kɛ: “Fa wɔ ahonle muala, wɔ ɛkɛla muala, nee wɔ adwenle muala kulo Awulae wɔ Nyamenle ne. Ɛhye a le mɛla titile kpalɛ mɔɔ hyia a. Mɔɔ tɔ zo nwiɔ la le kɛ ɛhendeɛ ne la, ɔse: Kulo ɛ gɔnwo kɛ ɛdawɔ ɛ nwo la.” (Mateyu 22:37-39) Saa yɛbɔ edwɛkpa ne nolo a, ɛnee yɛlɛdi mɛla ɛhye azo.​—Kenga Gyima ne 10:42.

17. Kɛzi ɛte nganeɛ wɔ nwolɛ adenle mɔɔ yɛnyia yɛlɛbɔ edwɛkpa ne nolo la anwo ɛ?

¹⁷ Nea nyilalɛ kpole mɔɔ yɛnyia a! Gyihova ɛmaa yɛ gyima mɔɔ maa yɛ nye die, ɔmaa yɛbikye ye nee yɛ mediema na ɔbɔ agɔnwolɛvalɛ mɔɔ yɛ nee ye lɛ la anwo bane a. Eza ɔmaa yɛnyia adenle yɛkile kɛ yɛkulo Nyamenle nee awie mɔ. Gyihova lɛ azonvolɛ mgbe dɔɔnwo wɔ ewiade amuala, na asolo tɛnlabelɛ mɔɔ biala wɔ nu a. Noko ɔnva nwo kɛ yɛle ngakula anzɛɛ mgbanyinli, yɛlɛ bie anzɛɛ yɛnlɛ bie, yɛ nwo yɛ se anzɛɛ yɛ nwo ɛnyɛ se la, yɛbɔ mɔdenle kɛ yɛbaha yɛ diedi ne anwo edwɛkɛ yɛahile awie mɔ. Yɛte nganeɛ kɛ Chantel mɔɔ vi France mɔɔ hanle kɛ: “Ahenle mɔɔ lɛ tumi kpole wɔ aleɛabo, debie biala Bɔvolɛ ne nee anyelielɛ Nyamenle ne ka kile me kɛ: ‘Kɔ! Fi wɔ ahonle nu tendɛ maa me. Meva me tumi ne, me Edwɛkɛ Baebolo ne, moalɛ mɔɔ vi anwuma, agɔnwolɛma mɔɔ wɔ azɛlɛ ye azo, ndetelɛ mɔɔ ɛlɛkɔ zo yɛɛ adehilelɛ titili wɔ ye mekɛ nu memaa wɔ.’ Nea nwolɛ adenle kpole mɔɔ ɔle kɛ yɛbayɛ gyima mɔɔ Gyihova ɛva ɛmaa yɛ na yɛ nee yɛ Nyamenle ne abɔ nu ayɛ gyima a!”