1, 2. Kɛzi Gyihova fi atiakunlukɛnlɛma nu fa ninyɛne mɔɔ ɔlɛ la boa yɛ ɛ?

GYIHOVA le atiakunlukɛnlɛma Nyamenle. Debie biala mɔɔ yɛlɛ la vi ye ɛkɛ. Gyihova a lɛ ezukoa nvutuke, dwɛtɛ fufule nee agudeɛ gyɛne mɔɔ wɔ azɛlɛ ye azo a, na ɔfa ɔdi gyima amaa yɛahola yɛadɛnla aze. (Edw. 104:13-15; Hagae 2:8) Edwɛkɛ dɔɔnwo wɔ Baebolo ne anu mɔɔ maa yɛnwu kɛzi Gyihova vale ye abɔdeɛ lile gyima wɔ nwanwane adenle zo boale ye menli la.

² Gyihova maanle Yizilayɛ maanle ne mana nee nzule too ɛvolɛ 40 wɔ fienemgbole ne anu. (Ade. 16:35) ‘Ɔmaanle bɛ debie biala.’ (Nih. 9:20, 21) Gyihova luale ngapezonli Yilaehya anwo zo yɛle nwanwane debie maanle kunlavolɛ raalɛ nɔhavo ne nwole ekyi ne yɛle dɔɔnwo. Nyamenle ahyɛlɛdeɛ ne maanle ɔholale ɔduale ɔ nwo kakɛ, na ɔnyianle bie ɔnleanle ɔ nwo nee ɔ mra mrenyia ne mɔ. (2 Arl. 4:1-7) Ɔlua Gyihova moalɛ zo, Gyisɛse maanle menli aleɛ nee ezukoa wɔ mekɛ mɔɔ ɛnee bɛhyia nwo la wɔ nwanwane adenle zo.​—Mat. 15:35-38; 17:27.

3. Duzu a yɛbazuzu nwo wɔ edwɛkɛ ɛhye anu a?

³ Gyihova kola fa debie biala mɔɔ ɔkulo la ɔdi gyima ɔboa ye  abɔdeɛ. Noko akee, ɔlɛto ɛsalɛ yeavɛlɛ ye azonvolɛ kɛ bɛva bɛ nwonane afoa nu ninyɛne bɛboa gyima mɔɔ ye ahyehyɛdeɛ ne ɛlɛyɛ la. (Ade. 36:3-7; kenga Mrɛlɛbulɛ 3:9.) Duzu ati a Gyihova anye la kɛ yɛbava yɛ ninyɛne mɔɔ sonle bolɛ la yɛamaa ye ɛ? Kɛzi Gyihova azonvolɛ mɔɔ dɛnlanle aze tete ne la boale ye gyima ɛ? Kɛzi ahyehyɛdeɛ ne fa ndoboa di gyima ɛnɛ ɛ? Edwɛkɛ ɛhye babua kpuya ɛhye mɔ.

4. Saa yɛboa Gyihova gyima ne a, ɛnee yɛlɛkile duzu?

⁴ Yɛye ndoboa yɛmaa Gyihova ɔlua ɛhulolɛ nee anyezɔlɛ mɔɔ yɛlɛ yɛmaa ye la ati. Saa yɛdwenle mɔɔ Gyihova ɛyɛ ɛmaa yɛ la amuala anwo a, ɔsi yɛ nwo. Belemgbunli Devidi ka ninyɛne mɔɔ bɛbahyia nwo na bɛahola bɛazi ɛzonlenlɛ sua ne anwo edwɛkɛ la, ɔhanle kɛ debie biala mɔɔ yɛlɛ la vi Gyihova ɛkɛ ɔti mɔɔ yeva yemaa yɛ la a yɛfa yɛmaa ye a.​—Kenga 1 Edwɛkɛsisilɛ 29:11-14.

5. Kɛzi Ngɛlɛlera ne maa yɛnwu kɛ ndoboa mɔɔ yɛfi ahonle nu yɛye la le nɔhalɛ ɛzonlenlɛ ne foa titili ɛ?

⁵ Ndoboa mɔɔ yɛye la noko boka Gyihova ɛzonlenlɛ nwo. Ɛzoanvolɛ Dwɔn dele ye wɔ yekile bie anu kɛ, Gyihova azonvolɛ mɔɔ wɔ anwuma la ɛlɛka kɛ: “Gyihova yɛ Nyamenle, ɛfɛta kɛ ɛdie anyunlunyia, enililɛ nee tumi, ɔluakɛ ɛdawɔ a ɛbɔle ninyɛne kɔsɔɔti a, na wɔ ɛhulolɛ zo a bɛwɔ ɛkɛ na ɛbɔle bɛ a.” (Yek. 4:11) Nɔhalɛ nu, ɔfɛta kɛ yɛwula Gyihova anyunlunyia na yɛdi ye eni, ɔti yɛkulo kɛ yɛyɛ biala mɔɔ yɛbahola la yɛmaa ye. Gyihova luale Mosisi anwo zo zele Yizilayɛ maanle ne kɛ bɛli ɛvoyia fane nsa wɔ ɛvolɛ ne anu. Kɛ mɔɔ ɛnee ɛvoyia ɛhye mɔ boka bɛ ɛzonlenlɛ nwo la ati, ɛnee ɔnle kɛ Yizilayɛma ‘dɛ bɛ sa mgbane ba.’ (Mɛla 16:16) Ɛnɛ noko, ndoboa mɔɔ yɛfi ahonle nu yɛye yɛboa gyima mɔɔ Gyihova ahyehyɛdeɛ ne foa mɔɔ wɔ azɛlɛ ye azo ɛlɛyɛ la le yɛ ɛzonlenlɛ ne foa titili.

6. Kɛmɔti a ndoboa ɛyelɛ le kpalɛ maa yɛ a? (Nea mɔlebɛbo nvoninli ne.)

⁶ Saa yɛye ndoboa a, ɔboa yɛ tɛla kɛ yɛbalie la. (Kenga Mrɛlɛbulɛ 29:21.) Bie a yɛbahola yɛadwenle kakula mɔɔ ɔfa ezukoa ekyii mɔɔ ye awovolɛ fa maa ye la bie tɔ debie kyɛ bɛ la anwo. Nea kɛzi awovolɛ ne mɔ anye balie ahyɛlɛdeɛ ɛhye anwo la! Maa yɛva kakula bie mɔɔ ɔle adekpakyelɛnli mɔɔ ɔ nee ye awovolɛ de na ɔfa ezukoa ekyi ɔmaa bɛ kɛ bɛva bɛdua kakɛ mɔɔ bɛbɔ ye wɔ sua nu la bie kɛ neazo. Awovolɛ ne mɔ anye ɛnla ɛhye adenle ɛdeɛ, noko bie a bɛbalie ahyɛlɛdeɛ ɛhye ɔluakɛ ɔle adenle mɔɔ kakula ne balua zo ahile kɛ ɔ nye sɔ mɔɔ bɛyɛ bɛmaa ye la kɔsɔɔti. Zɔhane ala a saa yɛfa yɛ ninyɛne mɔɔ sonle bolɛ la yɛye ndoboa a Gyihova nwu ye yɛɛ ɔle kpalɛ ɔmaa yɛ a.

7, 8. Kɛzi Gyihova tete azonvolɛ yele ndoboa maanle bɛvale bɛlile (a) ninyɛne fɔɔnwo bie mɔ anwo gyima ɛ? (b) bɛboale ye gyima ne ɛ?

⁷ Baebolo ne maa yɛnwu kɛ Gyihova menli yele ndoboa boale ye gyima ne. Ɔdwu mekɛ ne bie a bɛye ndoboa bɛfa bɛdi ninyɛne fɔɔnwo bie mɔ anwo gyima. Mosisi maanle Yizilayɛma anwosesebɛ kɛ, bɛye ndoboa bɛmaa bɛva bɛzi ndanlɛ sua ne. Nzinlii, Belemgbunli Devidi yɛle zɔhane ala wɔ ɛzonlenlɛ sua ne ɛzilɛ nwo. (Ade. 35:5; 1 Ek. 29:5-9) Wɔ Belemgbunli Dwowahye mekɛ zo, ɛsɔfo ne mɔ maanle bɛvale ezukoa mɔɔ bɛnyianle ye la bɛyɛle Gyihova ɛzonlenlɛ sua ne boɛ. (2 Arl. 12:4, 5) Mediema mɔɔ wɔ alimoa Kilisiene asafo ne anu dele kɛ bɛhyia moalɛ ɔlua ɛhɔne  mɔɔ zile la, bɛbɔle “kpɔkɛ kɛ awie biala ɛva debie biala mɔɔ ɔkɛnyia la ɛrɛla na bɛva bɛhɔmaa mediema mɔɔ wɔ Dwudiya la.”​—Gyi. 11:27-30.

⁸ Gyihova menli noko vale ezukoa boale bɛdabɛ mɔɔ ɛnee bɛli gyima ne anyunlu la. Kɛ neazo la, wɔ Mosisi Mɛla ne abo, Livaema ne annyia agyadeɛ kɛ mbusua ekpunli mɔɔ ɛha la. Ɔti, ɛnee Yizilayɛma mɔɔ ɛha la fa ɛkpɔ ko ngyɛnu bulu maa Livaema ne. Ɛhye maanle Livaema vale bɛ adwenle ziele gyima mɔɔ bɛyɛ ye wɔ ndanlɛsua ne anu la azo. (Ɛdi. 18:21) Zɔhane ala a, nzinlii Gyisɛse nee ye ɛzoanvolɛ ne mɔ noko nyianle mraalɛ “gyɛne dɔɔnwo mɔɔ vale bɛ ninyɛne boale bɛ la” ahunlunyele ne azo nvasoɛ a.​—Luku 8:1-3.

9. Wɔ tete ne, nienwu a bɛnyianle ndoboa bɛvile a?

⁹ Nɔhalɛ nu, asolo ɛleka mɔɔ bɛnyianle ndoboa ɛhye mɔ bɛvile a. Ɔbayɛ kɛ ninyɛne mɔɔ sonle bolɛ mɔɔ bɛ nee ye vi Yigyibiti rale la bie a bɛvale bɛzile ndanlɛ sua ne wɔ fienemgbole ne anu a. (Ade. 3:21, 22; 35:22-24) Wɔ ɛvoyia mɔɔ limoa la anu, Kilisienema bie mɔ dɔnenle ninyɛne mɔɔ bɛlɛ, le kɛ azɛlɛ nee azua na bɛvale ezukoa ne bɛrɛlɛle ɛzoanvolɛma ne. Ɛzoanvolɛ ne mɔ hyɛle ninyɛne ɛhye mɔ maanle awie biala kɛ mɔɔ bɛ ngyianlɛ de la. (Gyi. 4:34, 35) Bie mɔ ye ezukoa to ahane na bɛfa bɛye ndoboa bɛboa gyima ne dahuu. (1 Kɔl. 16:2) Ɔti, menli kɔsɔɔti​—sukoavolɛma nee ehyianvolɛma amuala yele ndoboa.​—Luku 21:1-4.

10, 11. (a) Kɛzi yɛbahola yɛazukoa Gyihova azonvolɛ mɔɔ bɛyele ndoboa bɛboale Gyihova gyima wɔ tete ne la ɛ? (b) Kɛzi ɛte nganeɛ wɔ nwolɛ adenle mɔɔ wɔnyia ye kɛ ɛbaboa Belemgbunlililɛ gyima ne la ɛ?

¹⁰ Ɛnɛ noko, bie a bɛbaha bɛahile yɛ kɛ yɛye ndoboa yɛmaa bɛva bɛli ninyɛne titili bie mɔ anwo gyima. Kɛ neazo la, asoo bɛlɛyɛ ngyehyɛleɛ bɛazi Belemgbunlililɛ Asalo fofolɛ bɛamaa wɔ asafo ne ɔ? Anzɛɛ bɛlɛsiezie bɛ Belemgbunlililɛ Asalo ne ɔ? Bie a bɛbaha bɛahile yɛ kɛ bɛhyia ezukoa mɔɔ bɛfa bɛaziezie Bɛtɛle azua mɔɔ wɔ yɛ maanle ne anu, bɛfa bɛaboa maangyeba nyianu mɔɔ yɛbahɔ anzɛɛ yɛ mediema mɔɔ esiane bie ɛdo bɛ la. Eza yɛye ndoboa yɛboa gyima mɔɔ bɛyɛ ye wɔ ewiade amuala gyima ne ati nee Bɛtɛle ngakyile mɔɔ wɔ ewiade la. Bɛfa yɛ ndoboa ne bɛboa edwɛkpatɛlɛvolɛma, adekpakyelɛ titilima nee maangyebakyi zo neavolɛma. Wɔ asafo ne noko bɔ kpɔkɛ ye ezukoa boa Nyianu Asalo nee Belemgbunlililɛ Asalo mɔɔ bɛlɛsisi wɔ ewiade amuala la, na ɛhye boa yɛ mediema mɔɔ wɔ ewiade amuala la.

¹¹ Yɛ kɔsɔɔti yɛbahola yɛaboa gyima mɔɔ Gyihova ɛlɛyɛ ye wɔ awieleɛ mekɛ ɛhye anu la. Menli mɔɔ ye ndoboa la dɔɔnwo duma ɛmboka nwo. Saa yɛlɛfa ezukoa yɛagua ndoboa ɛlɛka ne anu wɔ Belemgbunlililɛ Asalo anzɛɛ yɛdua jw.org azo yɛye a, yɛmmaa awie mɔ gyɛne ɛnnwu dodo mɔɔ yɛyele la. Na saa ɛte nganeɛ kɛ wɔ ndoboa mɔɔ ɛye la le ekyii somaa ɛ? Nɔhalɛ nu, ndoboa dɔɔnwo ne ala mɔɔ yɛ sa ka ye la vi ahyɛlɛdeɛ ngyikyi mɔɔ yɛnyia ye ɛnɛ, tɛla kɛ menli ekyii bie baye ye mgbole la. Yɛ mediema mɔɔ bɛnlɛ bie bɔbɔ la sukoa alimoa Kilisienema mɔɔ ɛnee wɔ Masidonea la. Ɛnee bɛdi “ehyia kpole,” noko bɛzɛlɛle kɛ bɛmaa bɛnyia kyɛfoa wɔ moalɛ gyima ne anu.​—2 Kɔl. 8:1-4.

12. Kɛzi ahyehyɛdeɛ ne bɔ mɔdenle fa ndoboa di gyima wɔ adenle kpalɛ zo ɛ?

¹² Neazo Eku ne dua asɔneyɛlɛ zo bɔ mɔdenle kɛ bɛbayɛ nɔhavo nee nrɛlɛbɛvolɛ wɔ kɛzi bɛfa ahyehyɛdeɛ ne ezukoa bɛdi gyima la anwo. (Mat. 24:45) Bɛyɛ ezukoa mɔɔ bɛ sa ka ye nee kɛzi  bɛbava bɛali gyima la anwo ngyehyɛleɛ kpalɛ. (Luku 14:28) Wɔ tete ne, ɛnee mrenyia nɔhavoma mɔɔ nea ndoboa zo la nea kɛ bɛbava bɛali gyima wɔ Gyihova ɛzonlenlɛ nu ala. Kɛ neazo la, Ɛzela vale ndoboa mɔɔ ɔnyianle ɔvile Pɛhyea belemgbunli ne ɛkɛ mɔɔ bie a le nvutuke, dwɛtɛ fufule nee ninyɛne gyɛne mɔɔ bɛsese ye bolɛ a ɔbayɛ ɛnɛ (U.S.) dɔla mgbe $100 la ziale hɔle Gyɛlusalɛm. Ɛzela bule ezukoa ɛhye kɛ afɔle mɔɔ bɛvi ahonle nu bɛye bɛmaa Gyihova na ɔvale adehilelɛ kpalɛ ɔmaanle amaa yeabɔ agyadeɛ ɛhye anwo bane wɔ adenle mɔɔ zolɛ yɛ ɛzulolɛ na bɛbayia dwazotia wɔ zo la azo. (Ɛzela 8:24-34) Ɛzoanvolɛ Pɔɔlo maanle bɛyele ndoboa na bɛvale bɛboale mediema mɔɔ ɛnee wɔ Dwudiya la. Ɔnleanle ɔnwunle kɛ menli mɔɔ vale ezukoa ne hɔle la ‘bava nɔhalɛlilɛ ayɛ debie biala wɔ Gyihova nee menli nyunlu.’ (Kenga 2 Kɔlentema 8:18-21.) Ɛnɛ, yɛ ahyehyɛdeɛ ne sukoa Ɛzela nee Pɔɔlo neazo ne na bɛfa ndoboa bɛdi gyima wɔ adenle kpalɛ zo.

13. Duzu ati a ahyehyɛdeɛ ne ɛyɛ nzenzaleɛ bie mɔ kenle nsa ye ɛ?

¹³ Abusua bie bahola ayɛ nzenzaleɛ wɔ kɛzi bɛnea bɛ ezukoa zo la anu, amaa bɛambɔ kakɛ dɔɔnwo bɛandɛla mɔɔ bɛnyia ye la. Anzɛɛ bɛbalua ndenle ngakyile zo bɛatete ninyɛne zo amaa bɛahola bɛayɛ dɔɔnwo wɔ Gyihova ɛzonlenlɛ nu. Zɔhane ala a Gyihova ahyehyɛdeɛ ne yɛ a. Kenle nsa ye, ninyɛne fofolɛ mɔɔ yɛ anyelielɛ la ɛlɛkɔ zo. Ɔdwu mekɛ ne bie a, ɛhye maa bɛbɔ kakɛ dɔɔnwo bɛtɛla ndoboa mɔɔ bɛ sa ka ye la. Ɔti, ahyehyɛdeɛ ne kpondɛ ndenle dua zo te kakɛ zo amaa bɛahola bɛava wɔ ndoboa mɔɔ ɛfi ahonle nu ɛye la bɛayɛ gyima dɔɔnwo.

14-16. (a) Duzu ninyɛne a bɛfa wɔ ndoboa mɔɔ ɛye la bɛyɛ a? (b) Ndenle boni mɔ azo a nziezielɛ ɛhye mɔ ɛboa wɔ ɛ?

¹⁴ Gyihova azonvolɛ dɔɔnwo mɔɔ ɛzonle ɛhyɛ la ta ka kɛ bɛtɛnwunle mekɛ mɔɔ sunsum nu nziezielɛ dɔɔnwo ɛbu zo zɛhae la bie ɛlɛ. Ɛnɛ, yɛnyia jw.org nee JW Broadcasting. Bɛyɛ New World Translation of the Holy Scriptures ne wɔ aneɛ dɔɔnwo anu. Wɔ 2014/2015, bɛyɛle “Bɛlumua Bɛkpondɛ Nyamenle Belemgbunlililɛ Ne!” Maanle Maanle Avinli Kenle Nsa Nyianu ne wɔ nwɔhoalilɛleka mgbole bie mɔ mɔɔ wɔ ewiade amuala wɔ azuamgbole 14 azo. Bɛdabɛ mɔɔ bɛrale la anye liele kpalɛ.

 ¹⁵ Menli dɔɔnwo ɛhile nvasoɛ mɔɔ bɛlɛnyia bɛavi Gyihova ahyehyɛdeɛ ne ɛkɛ la anwo anyezɔlɛ. Kɛ neazo la, agyalɛma bie mɔɔ bɛlɛsonle wɔ Asia la hɛlɛle kɛ: “Yɛlɛka edwɛkɛ ne wɔ sua ekyii bie azo. Ɔti, ɔyɛ a yɛte nganeɛ kɛ yɛwɔ moa, na ɔnyɛ se kɛ yɛ rɛle bavi kɛzi Gyihova gyima ne le kpole la. Noko, saa yɛnea JW Broadcasting gyimalilɛ ne a, ɔmaa yɛnwu kɛ yɛboka ewiade amuala mediemayɛlɛ ne anwo. Yɛ mediema mrenyia nee mraalɛ anye die JW Broadcasting ne anwo kpalɛ. Yɛta yɛte kɛ bɛlɛka kɛ, saa bɛnea siane biala ɛdeɛ mɔɔ ba la a, ɔmaa bɛte nganeɛ kɛ bɛbikye Neazo Eku ne. Ɛnɛ, bɛfa Nyamenle ahyehyɛdeɛ ne mɔɔ bɛboka nwo la bɛtu bɛ nwo kpole.”

¹⁶ Kɛkala, Belemgbunlililɛ Asalo mɔɔ bɛlɛsisi anzɛɛ bɛlɛyɛ bɛ boɛ wɔ ewiade amuala la bayɛ kɛyɛ 2,500. Asafo ko mɔɔ wɔ Honduras la bɔle ɔ bo kɛ bɛkɔ bɛ Belemgbunlililɛ Asalo fofolɛ ne anu la bɛhɛlɛle kɛ: “Yɛ nye die kɛ yɛboka Gyihova ewiade amuala abusua ne nee ewiade amuala mediemayɛlɛ ne anwo la, na ɛhye mɔ ɛboa ɛmaa anyelazo mɔɔ yɛlɛ kɛ yɛbazi Belemgbunlililɛ Asalo wɔ yɛ sua ne azo la ɛra nu.” Menli dɔɔnwo ɛhile anyezɔlɛ ko ne ala wɔ mekɛ mɔɔ bɛ sa hanle Baebolo nee mbuluku gyɛne mɔɔ bɛhile ɔ bo bɛhɔ bɛ aneɛ nu, bɛnyia moalɛ gyima ne azo nvasoɛ anzɛɛ bɛkɛnwu kɛ bagua nu daselɛlilɛ ne ɛlɛso ma wɔ ɛleka mɔɔ bɛwɔ la.

17. Kɛzi adenle mɔɔ ahyehyɛdeɛ ne ɛlɛdua zo ayɛ gyima ne ɛnɛ la di daselɛ kɛ Gyihova ɛlɛboa ɛ?

¹⁷ Menli mɔɔ ɛnle Gyihova Alasevolɛ la ɛnde deɛmɔti yɛkola yɛfa ndoboa ala a yɛyɛ gyima ɛhye mɔ kɔsɔɔti la abo. Gyima nu kpanyinli bie rakpɔlale ɛleka mɔɔ bɛpelente yɛ mbuluku ne mɔ la ko. Ɔzinle ɔ nwo kɛ menli mɔɔ yɛ gyima ɛhye la ɛdu bɛ nwo ɛmaa, bɛfa ndoboa a bɛyɛ gyima ɛhye a yɛɛ bɛnyɛ ngyehyɛleɛ bɛnlielie ezukoa bɛnvi awie mɔ ɛkɛ la. Ɔhanle kɛ anrɛɛ ɔnle kɛ yɛkola yɛyɛ mɔɔ yɛyɛ la. Yɛdie yɛto nu! Yɛze kɛ yɛlɛyɛ ɛhye, ɔluakɛ Gyihova a ɛlɛboa gyima ne a.​—Dwobu 42:2.

18. (a) Saa yɛboa Belemgbunlililɛ gyima ne a, nyilalɛ boni a yɛbanyia a? (b) Kɛzi yɛbahola yɛatete yɛ mra nee menli mɔɔ bɛle fofolɛ la yɛamaa bɛaye ndoboa ɛ?

¹⁸ Gyihova ɛli yɛ eni yemaa yɛnyia nwolɛ adenle yɛlɛboa gyima kpole mɔɔ bɛlɛyɛ ye ɛnɛ la. Yebɔ yɛ ɛwɔkɛ kɛ saa yɛboa Belemgbunlililɛ gyima ne a, ɔbayila yɛ dɔɔnwo. (Mal. 3:10) Gyihova bɔ yɛ ɛwɔkɛ kɛ, saa yɛbuke yɛ sa nu yɛfa yɛmaa a, yɛbanyia nyilalɛ. (Kenga Mrɛlɛbulɛ 11:24, 25.) Eza saa yɛfa debie yɛmaa a ɔmaa yɛ nye die, ɔluakɛ “anyelielɛ dɔɔnwo wɔ ɛmaanlɛ nu tɛla ɛlielɛ.” (Gyi. 20:35) Yɛnyia nwolɛ adenle kɛ yɛbalua yɛ edwɛkɛ nee yɛ neazo zo yɛatete yɛ mra nee fofolɛma yɛamaa bɛanwu kɛzi bɛbahola bɛaye ndoboa na ɔlua zo bɛanyia nyilalɛ dɔɔnwo la.

19. Kɛzi edwɛkɛ ɛhye ɛmaa wɔ anwosesebɛ ɛ?

¹⁹ Debie biala mɔɔ yɛlɛ la vi Gyihova ɛkɛ. Saa yɛye ndoboa a, ɔkile kɛ yɛ nye sɔ mɔɔ yeyɛ yemaa yɛ la amuala. (1 Ek. 29:17) Mɔɔ bɛye ndoboa bɛava bɛazi ɛzonlenlɛ sua ne la, “menli ne yeyele bɛ ahonle nu vale ninyɛne ne manle [Gyihova] na bɛ nye liele kɛ bɛhola bɛyeye ninyɛne dɔɔnwo zɛhae a.” (1 Ek. 29:9) Bɛmaa yɛdayɛ noko yɛva ninyɛne mɔɔ Gyihova ɛva ɛmaa yɛ la bie yɛmaa ye amaa yɛanyia anyelielɛ nee ahunlundwolɛ.