1. Ngyegyelɛ boni mɔ a ɔwɔ kɛ yɛgyinla ɔ nloa a, noko duzu ati a Gyihova anye die ye nɔhalɛ azonvolɛ nwo a? (Nea mɔlebɛbo nvoninli ne mɔ.)

KƐ MƆƆ ɛze ye la, ewiade ɛhye anu ɛbɛlabɔlɛ ɛnla aze. Mediema mrenyia nee mraalɛ dɔɔnwo ɛnde kpɔkɛ fee. Bie mɔ ɛyɛ mgbanyinli, noko bɛlɛnea bɛ mbusuafoɔ mɔɔ bɛyɛ mgbanyinli la. Bie mɔ noko ɛlɛbɔ mɔdenle kɛ bɛbamaa bɛ mbusua asa aha bɛ ngyianlɛdeɛ. Yɛze kɛ bɛ nuhua dɔɔnwo ɛlɛbɔ mɔdenle agyinla ngyegyelɛ ɛhye mɔ dɔɔnwo anloa, tɛ ko ala! Ɔhyia mekɛ, anwosesebɛ nee ezukoa na bɛahola bɛali ɛhye mɔ anwo gyima. Noko bɛze ye wienyi kɛ Gyihova baboa bɛ. Ninyɛne bayɛ boɛ ɔluakɛ ɛwɔkɛ mɔɔ yebɔ yɛ la ɛne. Nea kɛzi Gyihova anye die bɛ diedi ne anwo a!

2. Kɛzi Ayezaya 40:29 maa yɛ anwosesebɛ ɛ? Nvonleɛ kpole boni a yɛbahola yɛayɛ a?

² Ɔyɛ a ɛte nganeɛ kɛ ngyegyelɛ mɔɔ ɛlɛyia la anloa yɛ se somaa ɔ? Saa ɔle zɔ a, ɛnee ɔtɛkale ɛ ngome. Baebolo ne ka kɛ Nyamenle tete nɔhalɛ azonvolɛ bie mɔ dele nganeɛ kɛ bɛnrɛhola bɛ ngyegyelɛ ne mɔ anloa gyinla bieko. (1 Arl. 19:4; Dwobu 7:7) Noko, kɛ anrɛɛ bɛbamaa bɛ sa nu ado la, bɛvale bɛ nwo bɛdole Gyihova anwo zo. Yeanye bɛ rɛle yeando bɛ sa nu, ɔluakɛ yɛ Nyamenle ne maa “mɔɔ anye zo ɛbulu la anwo gyinla ye.”  (Aye. 40:29) Ɔyɛ alɔbɔlɛ kɛ, ɛnɛ Nyamenle azonvolɛ bie mɔ te nganeɛ kɛ saa bɛlɛyia ngyegyelɛ wɔ ɛbɛlabɔlɛ nu a, ɔwɔ kɛ bɛgyakyi Gyihova ɛzonlenlɛ ekyii. Bɛte nganeɛ kɛ Gyihova ɛzonlenlɛ le adesoa, tɛ nyilalɛ. Bɛgyakyi Baebolo ɛgengalɛ, debiezukoalɛ nee daselɛlilɛ ɛhɔlɛ, kɛ mɔɔ Seetan kpondɛ la.

3. (a) Duzu a ɔwɔ kɛ yɛyɛ na Seetan ammaa yɛ sa nu ando ɛ? (b) Duzu a yɛbazuzu nwo wɔ edwɛkɛ ɛhye anu a?

³ Abɔnsam ze ye kɛ saa yɛmaa yɛ nye bolo Gyihova ɛzonlenlɛ a ɔbamaa yɛ nwo ayɛ se, noko ɔngulo kɛ yɛ nwo yɛ se. Ɔti, saa ɛte ɛvɛlɛ nganeɛ wɔ nwonane nee nganeɛdelɛ nu a, mmagyakyi Gyihova ɛzonlenlɛ. Bɛhɔ zo bɛbikye ye kpalɛ, ɔluakɛ “ɔbamaa bɛazi pi, ɔbamaa bɛayɛ se.” (1 Pita 5:10; Gye. 4:8) Wɔ edwɛkɛ ɛhye anu yɛbazuzu ninyɛne nwiɔ mɔɔ bahola ado yɛ sa nu wɔ Gyihova ɛzonlenlɛ nu yɛɛ kɛzi Baebolo ngyinlazo kola boa yɛ maa yɛgyinla ɔ nloa la anwo. Noko mɔɔ limoa, kɛ mɔɔ Ayezaya 40:26-31 ka la, bɛmaa yɛva yɛ adwenle yɛzie kɛzi Gyihova maa yɛ anwosesebɛ la azo.

4. Duzu a yɛsukoa yɛfi Ayezaya 40:26 anu a?

⁴ Kenga Ayezaya 40:26. Awie biala ɛtɛkolale ɛtɛtianle nwɔlɔra mɔɔ wɔ anwuma la ɛlɛ. Abɔdeɛ nwo nrɛlɛbɛvolɛma die di kɛ nwɔlɔra mgbe mgbe 400 a wɔ yɛ Nwɔlɔra Ekpunli ne angomekye anu a. Noko, Gyihova maa ɛwɔlɔra ko biala duma. Duzu a yɛsukoa yɛfi nu a? Saa Gyihova anye die ye abɔdeɛ mɔɔ ngoane ɛnle nu la anwo a, ɛnee dwenle kɛzi ɔte nganeɛ ɔmaa ɛdawɔ mɔɔ ɛsonle ye, tɛ kɛ bɛhyehyɛ wɔ kɛ ɛyɛ zɔ, emomu ɛkulo ye la ati la! (Edw. 19:1, 3, 14) Yɛ anwuma Selɛ ne ze ɛ nwo edwɛkɛ biala. “Bɛ ti zo enrinli bɔbɔ [yedia] ɔ muala.” (Mat. 10:30) Na edwɛndolɛnli ne maa yɛnyia anwodozo kɛ: ‘Gyihova ze mɔɔ ɛnze nwolɛ bie kɔ nu la.’ (Edw. 37:18) Nɔhalɛ nu, ɔnwu sɔnea mɔɔ ɛyia la, na ɔkola ɔmaa wɔ anwosesebɛ ɔmaa ɛgyinla ko biala anloa.

5. Kɛzi yɛkola yɛnwu ye kɛ Gyihova kola maa yɛ anwosesebɛ ɛ?

⁵ Kenga Ayezaya 40:28. Tumi kɔsɔɔti le Gyihova ɛdeɛ. Fa tumi dodo mɔɔ ɔfa ɔmaa yɛ sɛnzɛne ne la kɛ neazo. David Bodanis mɔɔ kɛlɛ abɔdeɛ nwo edwɛkɛ la hɛlɛle kɛ: “Kɛkɛ ko biala, tumi mɔɔ vi yɛ Sɛnzɛne ne anu ba la nee [bɔmbo mɔɔ bo mgbe mgbe] mɔɔ bɛdo la sɛ. Abɔdeɛ nwo nrɛlɛbɛvolɛ bie noko bule mgbonda kɛ “kɛkala, wɔ kɛkɛ ko anu, tumi mɔɔ vi sɛnzɛne ne anu la bahola ali alesama ngyianlɛ nwo gyima wɔ ɛvolɛ 200,000 anu!” Asoo awie kola su kpolera kɛ Ahenle mɔɔ maa sɛnzɛne ne “tumi” la ɛnrɛhola ɛnrɛmaa yɛ anwosesebɛ mɔɔ yɛhyia amaa yɛagyinla ngyegyelɛ biala mɔɔ yɛbayia la anloa ɔ?

6. Adenle boni azo a Gyisɛse gyɛnvayile ne ɛnyɛ ɛnlomboɛ ɛ, na yɛnwu ye zɔ a kɛzi ɔboa yɛ ɛ?

⁶ Kenga Ayezaya 40:29. Gyihova ɛzonlenlɛ maa yɛ nye die kpalɛ. Gyisɛse zele ye ɛdoavolɛma kɛ: “Bɛva me gyɛnvayile ne bɛdo bɛ kɔme zo.” Na ɔdoale zo kɛ: “Bɛ nwo kɛdɔ bɛ. Na me gyɛnvayile ne ɛmmaa bɛ kɔme ɛnyɛ bɛ nyane, yɛɛ me adesoa ɛnyɛ ɛnlomboɛ.” (Mat. 11:28-30) Nea kɛzi edwɛkɛ zɔhane le nɔhalɛ a! Ɔyɛ na yɛlɛkɔ debiezukoalɛ anzɛɛ daselɛlilɛ a yɛte nganeɛ kɛ yɛvɛ. Noko saa yɛkpɔne na yɛba sua nu a, kɛzi yɛte nganeɛ ɛ? Yɛ nye die​—ɔmaa yɛkola yɛgyinla sɔnea biala mɔɔ yɛbayia wɔ ɛbɛlabɔlɛ nu la anloa. Gyisɛse gyɛnvayile ne ɛnyɛ ɛnlomboɛ amgba!

7. Ka anwubielɛ mɔɔ kile kɛ Mateyu 11:28-30 le nɔhalɛ la.

 ⁷ Adiema raalɛ bie mɔɔ yɛbavɛlɛ ye Kayla la ɛnee ɔwɔ kɛ gyinla ɛvɛlɛ mɔɔ ɔta ɔte, adwenle nu ngyegyelɛ yɛɛ ɔ ti mɔɔ ta kpakye ye kpalɛ la anloa. Nɔhalɛ nu, ɔyɛ a ɔyɛ se ɔmaa ye kɛ ɔbahɔ debiezukoalɛ. Noko, mɔɔ ɔhɔle ayia bie la anzi, ɔhɛlɛle kɛ: “Ɛnee ɛdendɛlɛ ne fale bɛsanudolɛ nwo. Kɛzi bɛmaanle ɛdendɛlɛ ne la hanle me ahonle, na ɔmaanle menzunle. Ɔhakyele me kɛ, yɛ ayia ne mɔ abo a le ɛleka mɔɔ ɔwɔ kɛ mekɔ a.” Nea kɛzi ɔ nye liele kɛ ɔbɔle mɔdenle ɔhɔle a!

8, 9. Mɔɔ ɛzoanvolɛ Pɔɔlo hɛlɛle kɛ: “Saa meyɛ bɛtɛɛ a ɛnee me nwo ɛyɛ se kpalɛ” la, duzu a ɛnee ɔlɛkile a?

⁸ Kenga Ayezaya 40:30. Bie a yɛlɛ ahyɛlɛdeɛ dɔɔnwo, noko tɛ ninyɛne ne amuala a yɛbahola yɛayɛ a. Ɔle ɛzukoalɛdeɛ ɔmaa yɛ muala. Ɛnee ɛzoanvolɛ Pɔɔlo kola yɛ ninyɛne dɔɔnwo, noko ɛnee ɔngola ɔnyɛ debie biala mɔɔ ɔkulo la. Mɔɔ ɔlale ye nganeɛdelɛ ali ɔhilele Gyihova la, ɔzele ye kɛ: “Me tumi ne di munli wɔ bɛtɛɛyɛlɛ nu.” Pɔɔlo dele Gyihova edwɛkɛ ne abo. Ɔvale ɔrale awieleɛ kɛ: “Saa meyɛ bɛtɛɛ a ɛnee me nwo ɛyɛ se kpalɛ.” (2 Kɔl. 12:7-10) Duzu a ɔkile a?

⁹ Pɔɔlo nwunle kɛ saa Nyamenle amboa ye a, ninyɛne dɔɔnwo wɔ ɛkɛ mɔɔ ɔnrɛhola ye yɛ. Nyamenle sunsum nwuanzanwuanza ne kola maa Pɔɔlo nyia anwosesebɛ mɔɔ ɔhyia la. Tɛ yemɔ angome, Nyamenle sunsum ne bahola amaa Pɔɔlo anyia anwosesebɛ ayɛ gyima mɔɔ saa ɔhale ɔ ngome a, anrɛɛ ɔnrɛhola ye yɛ la. Zɔhane ala a ɔde ye wɔ yɛ afoa nu a. Saa anwosesebɛ mɔɔ yɛlɛ la vi Gyihova ɛkɛ a, yɛ nwo bayɛ se amgba!

10. Kɛzi Gyihova boale Devidi maanle ɔgyinlanle ye ngyegyelɛ ne mɔ anloa ɛ?

¹⁰ Edwɛndolɛnli Devidi nwunle kɛ Nyamenle sunsum nwuanzanwuanza ne ɛboa ye fane dɔɔnwo. Ɔdole edwɛne kɛ: “Nɔhalɛ, ɛmaa medi ɛlɔne nwo zo konim, medua me Nyamenle ne tumi zo mesɛkye bɛ nwo banebɔlɛ.” (Edw. 18:29) Kɛ mɔɔ bane tendenle ɛvolɛ ɛnla aze la, ɔyɛ a yɛ ngyegyelɛ ne mɔ le mgbole mɔɔ yɛ ngome yɛngola yɛnli nwolɛ gyima a. Yɛhyia Gyihova moalɛ.

11. Ka kɛzi sunsum nwuanzanwuanza ne boa yɛ ɔmaa yɛgyinla yɛ ngyegyelɛ nloa la anwo edwɛkɛ.

¹¹ Kenga Ayezaya 40:31. Tɛ kɔleɛ mumua ne anwosesebɛ a fa ye kɔ anwuma kpalɛ a. Anwoma wuluwulu maa ɔkola ɔkɔ anwuma, ɛhye ɛmmaa kɔleɛ ne ɛnzɛkye ye anwosesebɛ. Ɔti, saa ɛnyia gyimalilɛ bie mɔɔ ɔyɛ se a kakye anloma kɔleɛ. Sɛlɛ Gyihova kɛ ɔlua “boavolɛ ne, sunsum nwuanzanwuanza ne” azo ɔmaa wɔ “anwosesebɛ.” (Dwɔn 14:26) Ɔyɛ anyelielɛ kɛ yɛ saa bahola aha ye mekɛ biala. Eza yɛbahola yɛazɛlɛ Gyihova kɛ ɔboa yɛ, titili saa akɛsakɛsa bie ba yɛ nee yɛ diema bie avinli wɔ asafo ne anu a. Noko duzu ati a akɛsakɛsa ɛhye mɔ ba ɛ?

12, 13. (a) Duzu ati a akɛsakɛsa ba Kilisienema avinli a? (b) Duzu a Dwosefi edwɛkɛ ne maa yɛnwu ye wɔ Gyihova anwo a?

¹² Akɛsakɛsa ba yɛ avinli, ɔluakɛ yɛ muala yɛnli munli. Ɔti, ɔdwu mekɛ ne bie a yɛ mediema diedima edwɛkɛ nee bɛ nyɛleɛ bagyegye yɛ anzɛɛ yɛ ɛdeɛ baha bɛ ɛya. Ɛhye kola yɛ sɔnea kpole. Kɛ mɔɔ sɔnea gyɛne de la, Gyihova maa yɛ adenle yɛkile kɛ yɛdi nɔhalɛ na yɛsukoa kɛ yɛ nee mediema mrenyia nee mraalɛ mɔɔ bɛyila bɛ nwo zo na ɔkulo bɛ la babɔ nu ayɛ gyima wɔ koyɛlɛ nu ɔnva nwo kɛ bɛtɔ sinli la.

¹³ Dwosefi edwɛkɛ ne maa yɛnwu kɛ Gyihova ɛnzi sɔnea mɔɔ ye azonvolɛ kɔ nu la adenle. Kɛmɔ ɛnee ɔ mediema ne mɔ kpɔ ye la ati, bɛdɔnenle kpavolɛ Dwosefi bɛmaanle bɛ nee ye hɔle akɛlɛzonlenlɛ nu wɔ Yigyibiti. (Mɔl. 37:28) Gyihova  nwunle mɔɔ ɛnee ɛlɛkɔ zo la, na kɛzi bɛ nee ɔ gɔnwo Dwosefi mɔɔ ɔle tenlenenli lile la yɛle ye nyane. Noko, yeanyɛ nwolɛ ɛhwee. Nzinlii mɔɔ bɛdole Dwosefi ɛzonle kɛ ɔkulo kɛ ɔto Pɔtefaa aye ne bɔna na bɛdole ye efiade la, eza Gyihova anyɛ nwolɛ debie. Noko, asoo Nyamenle kpole Dwosefi? Kyɛkyɛ. Baebolo ne hanle kɛ: ‘Ɛnee Gyihova nee Dwosefi lua yɛɛ debie biala mɔɔ ɔyɛle la, Gyihova maanle ɔyɛle kpalɛ.’​—Mɔl. 39:21-23.

14. Saa yɛanva ɛya yɛanzie yɛ nu a, kɛzi ɔbaboa yɛ ɛ?

¹⁴ Neazo bieko ɛne. Bɛ nee menli bie mɔ anli ye boɛ, noko Devidi ɛdeɛ bɛsisile ye kpalɛ. Noko, Nyamenle agɔnwo zɔhane anva ɛya anzie ye nu. Emomu, ɔhɛlɛle kɛ: “Mmafa ɛya, yɛɛ mmamaa wɔ ahonle futu! Mmafonla ɛ nwo; ɔwie munzule.” (Edw. 37:8) Ndelebɛbo kpalɛ mɔɔ yɛlɛ mɔɔ ɔti ɔnle kɛ ‘yɛfa’ ɛya la a le kɛ yɛkulo kɛ yɛsukoa Gyihova mɔɔ “ɔ nee yɛ ɛnli ye kɛmɔ yɛ ɛtane ne mɔ si de la.” (Edw. 103:10) Noko, eza saa yɛanva ɛya yɛanzie yɛ nu a, yɛnyia zolɛ nvasoɛ gyɛne dɔɔnwo. Ɛya kola maa yɛyia ngyegyelɛ le kɛ mogya molozo nee ahonle ewule. Ɔkola ɔsɛkye yɛ ɛbolɛ nee yɛ kunlu ninyɛne bie mɔ mɔɔ yɛdi aleɛ a bɛyɛ nwolɛ gyima la. Saa yɛfa ɛya a, yɛndwenle kpalɛ. Bie a yɛ edwɛkɛ anzɛɛ nyɛleɛ bie bagyegye awie mɔ, na ɛhye kola maa yɛdi nyane mekɛ tendenle. Ɔti, ɔle kpalɛ kɛ yɛbazie yɛ nwo dii. Baebolo ne ka kɛ, “anzonudwolɛ maa nwonane ba bɛ nwo.” (Mrɛ. 14:30) Ɔti, saa awie mɔ gyegye yɛ a, duzu a yɛbahola yɛayɛ amaa yɛ sa aha yɛ diema ne ɛ? Saa yɛfa Baebolo nu folɛdulɛ kpalɛ ne yɛyɛ gyima a, yɛbahola yɛali nwolɛ gyima bɔkɔɔ.

15, 16. Saa awie gyegye yɛ a, duzu a ɔwɔ kɛ yɛyɛ a?

¹⁵ Kenga Ɛfɛsɛsema 4:26. Saa menli mɔɔ ɛnzonle Gyihova la nee yɛ anli ye boɛ a ɔnzi yɛ nwo. Noko saa yɛ gɔnwo diedinli bie anzɛɛ yɛ busuanli bie ka edwɛkɛ anzɛɛ yɛ debie maa ɔgyegye yɛ a, bie a ɔbazi yɛ nwo kpole. Fa ye kɛ yɛngola yɛmmaa yɛ rɛle ɛnvi mɔɔ zile la. Asoo yɛbava ɛya ne yɛazie yɛ nu ɛvolɛ dɔɔnwo ɔ? Anzɛɛ yɛbali folɛ mɔɔ Baebolo ne tu yɛ kɛ yɛziezie edwɛkɛ ne ndɛndɛ la azo? Saa yɛanyɛ ye zɔ a, ɔbamaa yɛayɛ se kpalɛ kɛ yɛbamaa anzodwolɛ adɛnla yɛ nee yɛ diema ne avinli.

¹⁶ Fa ye kɛ ɛ diema bie ɛgyegye wɔ, na ɛngola ɛnye ɛnvi wɔ adwenle nu. Debie kpalɛ boni a ɛbahola wɔayɛ amaa anzodwolɛ adɛnla bɛ avinli a? Mɔɔ limoa, fi wɔ ahonle nu sɛlɛ Gyihova. Sɛlɛ ye kɛ ɔboa wɔ ɔmaa ɛ nee ɛ diema ne ɛhola ɛli adwelie  kpalɛ. Kakye kɛ, ɔboka Gyihova agɔnwo mɔ anwo. (Edw. 25:14) Nyamenle kulo ye. Gyihova nee ɔ gɔnwo mɔ di ye wɔ atiakunlukɛnlɛma zo, na ɔ nye la kɛ yɛbayɛ zɔ. (Mrɛ. 15:23; Mat. 7:12; Kɔl. 4:6) Bieko, dwenledwenle mɔɔ ɛkɔ a ɛbaha la anwo. Mmadwenle kɛ ɛ diema ne yɛle ye adwenle kɛ ɔgyegye wɔ; nyia ɔ nwo adwenle kpalɛ. Bie a ɔvonle anzɛɛ wɔande tɛnlabelɛ ne abo. Ɛbahola wɔabɔ adawubɔlɛ ne abo zɛhae, “Bie a medame a ninyɛne ɛlɛgyegye me a, noko mekɛ mɔɔ ɛdendɛle ɛhile me anoma la mendele nganeɛ kɛ . . . ” Saa adwelielilɛ ne ammaa anzodwolɛ amba ɛ nee ɛ diema ne avinli a, kpondɛ mekɛ fofolɛ na ɛ nee ye bɛziezie. Yɛ asɔne maa ɛ diema ne; sɛlɛ Gyihova kɛ ɔyila ye. Sɛlɛ Nyamenle kɛ ɔboa wɔ ɔmaa ɛva wɔ adwenle ɛzie subane mgbalɛ mɔɔ ɛ diema ne lɛ la azo. Ɔnva nwo biala mɔɔ bazi la, ɛbahola wɔanyia anwodozo kɛ Gyihova anye sɔ mɔdenle mɔɔ ɛbabɔ kɛ ɛkpondɛ kɛ ɛ sa ka ɛ diema ne​—Nyamenle agɔnwo ne la.

17. Saa yɛyɛ ɛtane a, kɛzi Gyihova boa yɛ amaa yɛade kpɔkɛ ɛ? Duzu ati a ɔwɔ kɛ yɛfa zɔhane nziezielɛ ne yɛdi gyima ɛ?

¹⁷ Bie mɔ te nganeɛ kɛ bɛnfɛta kɛ bɛbazonle Gyihova, ɔluakɛ bɛyɛ ɛtane kpole. Adwenle nu fɔlɛbualɛ kola maa yɛ anzodwolɛ, anyelielɛ nee anwosesebɛ wie. Belemgbunli Devidi mɔɔ ye adwenle gyegyele ye la hanle kɛ: “Saa meanga me ɛtane a, me adwenle ɛnla, mekponle toonwo menwa. Ɔluakɛ alehyenlɛ nee aledwolɛ kɔsɔɔti ɛ sa yɛle ɛnlomboɛ me nwo zo.” Ɔyɛ anyelielɛ kɛ Devidi lile ye ngyegyelɛ ne anwo gyima kɛ awie mɔɔ yenyi sunsum nu la. Ɔhɛlɛle kɛ, “Menganle me ɛtane mengilele wɔ; na ɛvale me ɛtane ɛhyɛle me.” (Edw. 32:3-5) Saa wɔyɛ ɛtane kpole a, Gyihova ɛziezie ɔ nwo kɛ ɔboa wɔ yeamaa wɔade kpɔkɛ. Noko, ɔwɔ kɛ ɛdie moalɛ mɔɔ ɔdua asafo ne azo ɔfa ɔmaa la ɛto nu. (Mrɛ. 24:16; Gye. 5:13-15) Mmakyɛ nwo​—ngoane mɔɔ ɛbanyia ye kenle bie la la esiane nu! Noko, fa ye kɛ bɛvale wɔ ɛtane ne bɛhyɛle wɔ la yehyɛ, noko wɔ adwenle tɛbua wɔ fɔlɛ. Duzu a ɛbayɛ a?

18. Kɛzi Pɔɔlo neazo ne kola boa menli mɔɔ bɛte nganeɛ kɛ bɛnfɛta la ɛ?

¹⁸ Ɔda ali kɛ ɔdwu mekɛ ne bie a, ɛnee ɛzoanvolɛ Pɔɔlo adwenle bua ye fɔlɛ. Ɔhanle kɛ: “Medame a mele ekyi kpalɛ wɔ ɛzoanvolɛma ne anu a, na menfɛta kɛ bɛkɛvɛlɛ me ɛzoanvolɛ ɔluakɛ menyɛle Nyamenle asafo ne kpɔdekpɔde.” Akee ɔdoale zolɛ kɛ: “Noko ɔlua Nyamenle ɛlolɛ ne azo mele kɛ mɔɔ mede la.” (1 Kɔl. 15:9, 10) Gyihova liele Pɔɔlo dole nu kɛ mɔɔ ɔde la, na ɛnee ɔ nye la kɛ Pɔɔlo mumua ne banwu ye zɔ. Saa amgba wɔnlu ɛ nwo wɔ ɛtane bie mɔ mɔɔ ɛyɛle la anwo, wɔha wɔhile Gyihova yɛɛ mgbanyima ne mɔ a, nyia anwodozo kɛ Gyihova bava ahyɛ wɔ. Ɔti, die Gyihova edwɛkɛ ne di, na die to nu kɛ yeva yehyɛ wɔ!​—Aye. 55:6, 7.

19. Yɛ ɛvolɛdwɛkɛ maa 2018 a le boni, na duzu ati a ɔfɛta ɛ?

¹⁹ Mekɛ ɛhye awieleɛ ne ɛlɛbikye la, yɛ nye la kɛ ngyegyelɛ mɔɔ yɛbayia la bayɛ kpole. Noko, nyia anwodozo kɛ Ahenle ne mɔɔ “ɔmaa mɔɔ anye zo ɛbulu la anwo gyinla ye, ɔmaa mɔɔ ɛnlɛ anwosesebɛ la anwosesebɛ” la bamaa wɔanyia mɔɔ ɛhyia biala la amaa wɔahɔ zo wɔazonle ye. (Aye. 40:29; Edw. 55:22; 68:19) Wɔ 2018 ne anu, mekɛ biala mɔɔ yɛbayia nu wɔ Belemgbunlililɛ Asalo ɛkɛ na yɛkɛnwu yɛ ɛvolɛdwɛkɛ ne la, yɛbahakye nɔhalɛ edwɛkɛ ɛhye mɔɔ anwo hyia la: “Bɛdabɛ mɔɔ bɛ rɛle wɔ [Gyihova] anu la, bɛbanyia anwosesebɛ fofolɛ.”​—Aye. 40:31.