1. Kɛzi ɛdendɛlɛ bie mɔɔ bɛmaanle ye wɔ 1935 nyianu bie abo la hanle kpavolɛ bie ɛ?

MƆƆ bɛzɔnenle kpavolɛ ɛhye wɔ 1926 la ɛnee yeli ɛvolɛ 18. Ɛnee ye awovolɛ le Baebolo Sukoavoma, kɛ ɛnee bɛfɛlɛ Gyihova Alasevolɛ wɔ zɔhane mekɛ ne la ɛne. Ye awovolɛ wole mrenyia nsa yɛɛ mraalɛ nwiɔ, na bɛtetele bɛ bɛmaanle bɛzonlenle Gyihova Nyamenle na bɛzukoale Gyisɛse Kelaese. Kɛ mɔɔ ɛnee Baebolo Sukoavoma ne mɔ amuala yɛ la, ɛnee kpavolɛ ɛhye noko di paano ne na ɔno nwanye ne bie ɛvolɛ biala wɔ Awulae Nɔsolɛ Aleɛ ne abo. Noko ye anyelazo ne hakyile wɔ mekɛ mɔɔ ɔdiele ɛdendɛlɛ titili bie mɔɔ ɔ ti ne se “The Great Multitude” (“Menli Ekpunli Kpole Ne”) la. Adiema J. F. Rutherford a maanle zɔhane ɛdendɛlɛ ne wɔ 1935 nyianu bie abo wɔ Washington, D.C., U.S.A. a. Duzu a bɛdele ɔ bo wɔ nyianu zɔhane abo a?

2. Nɔhalɛ edwɛkɛ boni a Adiema Rutherford hilehilele nuhua wɔ ye ɛdendɛlɛ ne anu a?

² Wɔ Adiema Rutherford ɛdendɛlɛ ne anu, ɔmaanle bɛnwunle menli mɔɔ bayɛ “ekpunli kpole” ne mɔɔ bɛha bɛ nwo edwɛkɛ wɔ Yekile 7:9 la. Kolaa na bɛamaa ɛdendɛlɛ ɛhye la, ɛnee bɛsuzu kɛ ekpunli ɛhye bahɔ anwuma noko bɛ nɔhalɛlilɛ ne ɛndwu menli mɔɔ bɛkpokpa bɛ la ɛdeɛ ne. Adiema Rutherford vale Ngɛlɛlera ne hilehilele nuhua kɛ bɛamkpa ekpunli kpole ne kɛ bɛbadɛnla anwuma. Emomu, bɛle  Kelaese mboane gyɛne * mɔɔ bɛbanyia bɛ ti wɔ “anwongyelelɛ kpole ne anu” na bɛadɛnla aze dahuu wɔ azɛlɛ ye azo a. (Yek. 7:14) Gyisɛse hanle kɛ: “Melɛ mboane gyɛne mɔɔ bɛnle tunli ɛhye anu a; ɔwɔ kɛ mefa bɛdabɛ noko meba, na bɛbadie me ne na bɛayɛ mboane ekpunli ko, bɛanyia neavolɛ ko.” (Dwɔn 10:16) Mboane gyɛne ne le Gyihova Alasevolɛ nɔhavoma mɔɔ lɛ anyelazo kɛ bɛbadɛnla Paladaese azɛlɛ zo dahuu a. (Mat. 25:31-33, 46) Bɛmaa yɛnlea kɛzi ndelebɛbo fofolɛ ɛhye hakyile Gyihova menli dɔɔnwo mɔɔ adiema nrenyia ne mɔɔ ɛli ɛvolɛ 18 boka nwo la ɛbɛlabɔlɛ la.​—Edw. 97:11; Mrɛ. 4:18.

3-4. Kɛzi menli dɔɔnwo dele bɛ anyelazo ne abo wɔ 1935 nyianu ne abo ɛ, na duzu ati ɔ?

³ Akee menli mɔɔ hɔle nyianu ne la anye liele kpole wɔ mekɛ mɔɔ tendɛvolɛ ne hanle kɛ: “Mesɛlɛ bɛ, menli mɔɔ bɛlɛ anyelazo kɛ bɛbadɛnla azɛlɛ ye azo dahuu la ɛdwazo” la. Awie bie mɔɔ ɛnee wɔ nyianu ne abo la hanle kɛ, menli kɛyɛ 20,000 ne anu foa ko nee ɔ nzi dwazole. Akee Adiema Rutherford hanle kɛ: “Bɛnlea! Menli ekpunli kpole ne!” Akee menli ne vale anyelielɛ bɔle bɛ sa nu kpole. Menli mɔɔ dwazole la nwunle kɛ bɛtɛkpale bɛ kɛ bɛhɔ anwuma. Ɛnee bɛze kɛ bɛtɛfale Nyamenle sunsum ne bɛtɛkpokpale bɛ. Ye alehyenlɛ nu bɛzɔnenle menli 840 kɛ Gyihova Alasevolɛ, na ɛnee bɛ nuhua dɔɔnwo boka mboane gyɛne ne anwo.

⁴ Wɔ ɛdendɛlɛ zɔhane anzi, kpavolɛ ne mɔɔ yɛlimoa yɛha ɔ nwo edwɛkɛ la nee menli gyɛne dɔɔnwo anli Ngakyelɛlilɛ aleɛ ne bieko. Menli dɔɔnwo dele nganeɛ kɛ adiema bie mɔɔ ɔhanle kɛ: “Mekɛ mɔɔ li awieleɛ mɔɔ menlile ngakyelɛlilɛ aleɛ ne bie la a le 1935. Menwunle kɛ Gyihova ɛtɛfale ye sunsum ne ɛtɛkpokpale me kɛ mendɛnla anwuma; emomu, ɛnee melɛ anyelazo kɛ mebadɛnla azɛlɛ ye azo na meaboa meamaa bɛayɛ ye paladaese.” (Wlo. 8:16, 17; 2 Kɔl. 1:21, 22) Ɔvi mekɛ zɔhane, ekpunli kpole ne anu amra anwo ɛlɛso na bɛ nee menli mɔɔ bɛkpokpa bɛ la mɔhama ne ɛlɛbɔ nu ayɛ gyima. *

5. Kɛzi Gyihova bu bɛdabɛ mɔɔ bɛgyakyi kɛ bɛbali Ngakyelɛlilɛ aleɛ ne bie la ɛ?

⁵ Kɛzi Gyihova bu bɛdabɛ mɔɔ bɛgyakyile kɛ bɛbali Ngakyelɛlilɛ aleɛ ne ɔvi 1935 mɔɔ ba la ɛ? Ɛnɛ noko, bie a dasevolɛ bie mɔɔ bɛzɔne ye la di Ngakyelɛlilɛ aleɛ ne bie, noko bie a nzinlii ɔbanwu kɛ bɛtɛfale sunsum nwuanzanwuanza ne bɛtɛkpokpale ye. Kɛzi Gyihova bu sonla zɛhae ɛ? (1 Kɔl. 11:28) Kɛ mɔɔ ɛnee bie mɔ ɛnde bɛ anyelazo ne abo la ati, bɛlile Ngakyelɛlilɛ aleɛ ne bie. Noko saa bɛdie bɛto nu kɛ bɛvo, bɛgyakyi ye ɛlilɛ na bɛkɔ zo bɛfa nɔhalɛlilɛ bɛsonle Gyihova a, ye biala anu ɔbava bɛ yeaboka mboane gyɛne ne anwo. Ɔnva nwo kɛ bɛnli aleɛ ne bie la, bɛkɔ Ngakyelɛlilɛ ne abo ɔluakɛ bɛ nye sɔ mɔɔ Gyihova nee Gyisɛse ɛyɛ ɛmaa bɛ la kpalɛ.

6. Duzu a Gyisɛse ɛha ɛhile anwumabɔvolɛ ne mɔ kɛ bɛyɛ a?

⁶ Kɛmɔ ɔnrɛhyɛ na anwongyelelɛ kpole ne ara la ati, ɔhyia kɛ yɛsuzu mɔɔ Yekile tile 7 ka  fale Kilisienema mɔɔ bɛkpokpa bɛ nee ekpunli kpole ne mɔɔ bɛboka mboane gyɛne ne anwo la anwo. Gyisɛse zele anwumabɔvolɛ ne mɔ kɛ bɛhɔ zo bɛzɔ ɛzɛkyelɛ anwoma nna ne anu. Ɔnle kɛ bɛmaa zɔhane anwoma ne mɔ bɔ azɛlɛ ye azo kɔkpula kɛ bɛbazɔ Kilisienema mɔɔ bɛkpokpa bɛ la anloa, mɔɔ yemɔ a le kɛ awieleɛ bɔkɔɔ ne Gyihova balie bɛ ado nu kɛ bɛle nɔhavoma. (Yek. 7:1-4) Ahatualɛ mɔɔ Kelaese amediema mɔɔ bɛkpokpa bɛ la banyia wɔ bɛ nɔhalɛlilɛ nwo la a le kɛ bɛbayɛ arelemgbunli nee ɛsɔfoma na bɛ nee ye ali tumi wɔ anwuma. (Yek. 20:6) Saa Gyihova, Gyisɛse nee anwumabɔvolɛ ne mɔ nwu kɛ menli 144,000 ne mɔɔ bɛkpokpa bɛ la asa ɛha bɛ anwuma ahatualɛ ne a, bɛ nye balie kpole.

7. Kɛ mɔɔ Yekile 7:9, 10 kile la, nwane mɔ a Dwɔn nwunle bɛ wɔ ɛnyelɛzodeɛnwunlɛ ne anu a, na duzu a ɛnee bɛlɛyɛ a? (Nea ɔ nyunlu nvoninli ne.)

⁷ Mɔɔ Dwɔn hanle menli 144,000 mɔɔ bɛle arelemgbunli nee ɛsɔfoma la anwo edwɛkɛ wiele la, eza ɔnwunle debie bie mɔɔ yɛ anyelielɛ la, “menli ekpunli kpole bie” mɔɔ nyianle bɛ ti wɔ Amagɛdɔn ne anu la. Ekpunli ɛhye anu amra anwo zonle kpalɛ tɛla ekpunli mɔɔ limoa la, ɔluakɛ bɛnze bɛ dodo. (Kenga Yekile 7:9, 10.) Ɛnee bɛwula adɛladeɛ fufule ndendenle, mɔɔ kile kɛ bɛhwenle bɛ nwo bɛvile Seetan ewiade ne anu “ngehanleɛ” nwo na bɛlile nɔhalɛ bɛmaanle Nyamenle nee Kelaese. (Gye. 1:27) Ɛnee bɛlɛteɛdea nu kɛ ɔlua mɔɔ Gyihova nee Gyisɛse, Nyamenle Boaneralɛ ne, ɛyɛ la ati a bɛlie bɛ ngoane a. Eza ɛnee bɛdedɛ arɛlɛ mrɛlakɛ, mɔɔ kile kɛ, bɛfa anyelielɛ bɛdie bɛto nu kɛ Gyisɛse a le awie mɔɔ Gyihova ɛkpa ye kɛ belemgbunli a.​—Fa toto Dwɔn 12:12, 13 anwo.

8. Duzu a Yekile 7:11, 12 maa yɛnwu ye wɔ Gyihova abusua ne mɔɔ wɔ anwuma la anwo a?

⁸ Kenga Yekile 7:11, 12. Mɔɔ anwuma amra nwunle ekpunli kpole ne la, duzu a bɛyɛle a? Dwɔn nwunle kɛ Gyihova abusua ne mɔɔ wɔ a anwuma la amuala anye ɛlie na bɛlɛye Nyamenle ayɛlɛ. Saa yekile ɛhye ba nu na ekpunli kpole ne nyia ngoane wɔ anwongyelelɛ kpole ne anu a, Gyihova abusua ne mɔɔ wɔ anwuma la anye balie kpole.

9. Kɛ mɔɔ Yekile 7:13-15 kile la, duzu a ekpunli kpole ne ɛlɛyɛ ye kɛkala a?

⁹ Kenga Yekile 7:13-15. Dwɔn hanle kɛ menli ekpunli kpole ne “ɛkpo bɛ adɛladeɛ ne mɔ nwohyee wɔ Boaneralɛ ne mogya ne anu.” Ɛhye kile kɛ bɛlɛ adwenle mɔɔ anu te yɛɛ bɛnyia Gyihova anyunlu ɛlolɛ. (Aye. 1:18) Bɛle Kilisienema mɔɔ bɛyila bɛ nwo zo, bɛzɔne bɛ na bɛlɛ Gyisɛse afɔlebɔlɛ ne anu diedi kpole yɛɛ bɛ nee Gyihova lɛ agɔnwolɛvalɛ kpalɛ. (Dwɔn 3:36; 1 Pita 3:21) Ɛhye ati, bɛfɛta kɛ bɛgyinla Nyamenle belemgbunli ebia ne anyunlu na “bɛsonle ye alehyenlɛ nee aledwolɛ” wɔ ye sunsum nu ɛzonlenlɛsua ne mɔɔ wɔ azɛlɛ ye azo la alienwo ɛkɛ. Kɛkala bɔbɔ, bɛbɔ mɔdenle bɛyɛ Belemgbunlililɛ edwɛkɛhanlɛ nee ɛdoavolɛyɛlɛ gyima ne dɔɔnwo, bɛfa Nyamenle Belemgbunlililɛ ne bɛdimoa bɛ ɛbɛlabɔlɛ nu.​—Mat. 6:33; 24:14; 28:19, 20.

10. Duzu a ekpunli kpole ne anye la kɛ bɛbanyia a, na ɛwɔkɛ boni a bɛbanwu kɛ yera nu a?

¹⁰ Ekpunli kpole ne mɔɔ bapɛ anwongyelelɛ kpole ne la lɛ anwodozo kɛ Nyamenle bahɔ zo anlea bɛ, ɔluakɛ “Mɔɔ de belemgbunli ebia ne azo la badɛlɛ ye ɛdanlɛsua ne anu wɔ bɛ nwo zo.” Akee ɛwɔkɛ mɔɔ mboane gyɛne ne anye ɛla ye ade ɛhyɛ la bara nu bɔkɔɔ: “[Nyamenle bakyikyi] bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ  nee ɛzunlɛ nee nyane ɛnle ɛkɛ bieko.”​—Yek. 21:3, 4.

11-12. (a) Nyilalɛ boni a Yekile 7:16, 17 ka kɛ ekpunli kpole ne banyia ye kenle bie a? (b) Duzu a mboane gyɛne ne bahola ayɛ ye wɔ Ngakyelɛlilɛ ne abo a, na duzu ati ɔ?

¹¹ Kenga Yekile 7:16, 17. Noko kɛkala, ɛhɔne ku Gyihova menli bie mɔ ɔluakɛ bɛnlɛ ezukoa mɔɔ bɛbava bɛadɔ aleɛ mɔɔ sa bɛ a, anzɛɛ bɛlɛyia ngyegyelɛ gyɛne ɔlua konle konle ti. Bɛgua bie mɔ noko efiade ɔlua bɛ diedi ti. Noko akee, ekpunli kpole ne anye die ɔluakɛ bɛze kɛ saa bɛnyia bɛ ti wɔ ɛtane ewiade ɛhye ɛzɛkyelɛ ne anu a, bɛbanyia nwonane nu nee sunsum nu aleɛ dɔɔnwo dahuu. Saa bɛsɛkye Seetan ewiade ne a, Gyihova ɛya “wuluwulu kpole” ne mɔɔ ɔbawola yeagua maanle maanle ne mɔ anwo zo la bie ɛnrɛha menli ekpunli kpole ne. Saa anwongyelelɛ kpole ne ba awieleɛ a, Gyisɛse bahile menli ɛhye mɔ adenle ahɔ “[dahuu] ngoane nzubula nwo.” Wɔmɔ dwenle nwolɛ nea: Ekpunli kpole ne noko lɛ anyelazo kɛnlɛma kpalɛ. Menli mgbe mgbe dɔɔnwo a ɛdɛnla azɛlɛ ye azo a, noko bie a ekpunli kpole ne anu amra ɛnrɛwu ɛlɛ!​—Dwɔn 11:26.

¹² Mboane gyɛne ne noko anye sɔ anyelazo kɛnlɛma mɔɔ Gyihova nee Gyisɛse ɛmaa bɛnyia la! Gyihova amkpa bɛ kɛ bɛhɔ anwuma, noko ɛhye ɛngile kɛ menli mɔɔ bahɔ anwuma la anwo hyia ye kpalɛ tɛla bɛ. Ekpunli nwiɔ ne amuala bahola aye Nyamenle nee Kelaese ayɛlɛ. Adenle ko mɔɔ bɛdua zo bɛyɛ ɛhye la a le kɛ bɛbahɔ Awulae Nɔsolɛ Aleɛ ne abo.

13-14. Duzu ati a ɔwɔ kɛ awie biala kɔ Kelaese ewule Ngakyelɛlilɛ ne abo a?

¹³ Kenlensa ye, saa menli 1,000 kɔ Ngakyelɛlilɛ bie abo a, bie a sonla ko ala a bali paano ne na yeanlo nwanye ne bie a. Wɔ asafo dɔɔnwo anu, awie biala ɛnli bie. Menli mɔɔ kɔ Ngakyelɛlilɛ ne abo la anu dɔɔnwo lɛ anyelazo kɛ bɛbadɛnla azɛlɛ ye azo. Ɛnee akee duzu ati a bɛkɔ Awulae Nɔsolɛ Aleɛ ne abo a? Kɛ mɔɔ menli kɔ bɛ gɔnwo bie atɔfolɛlielɛ bo la, zɔhane ala a yɛdayɛ noko yɛkɔ Ngakyelɛlilɛ ne abo a. Bɛkɔ ɛkɛ bɛfa bɛkile kɛ bɛkulo menli mɔɔ ɛlɛgya la, na bɛgyi bɛ nzi. Zɔhane ala a mboane gyɛne ne kɔ Ngakyelɛlilɛ ne abo a, ɔluakɛ bɛkulo kɛ Kelaese nee menli mɔɔ bɛkpokpa bɛ la nwu kɛ  bɛkulo bɛ, na bɛgyi bɛ nzi. Eza mboane gyɛne ne kɔ Ngakyelɛlilɛ ne abo fa kile kɛ bɛ nye sɔ Gyisɛse afɔlebɔlɛ ne mɔɔ bamaa bahola bɛadɛnla aze dahuu wɔ azɛlɛ ye azo la.

¹⁴ Debie titili bieko mɔɔ ɔti mboane gyɛne ne kɔ Ngakyelɛlilɛ ne abo la a le kɛ, bɛkulo kɛ bɛdi Gyisɛse mɛla zo. Mekɛ mɔɔ limoa mɔɔ Gyisɛse nee ye ɛzoanvolɛ nɔhavoma ne di Awulae Nɔsolɛ Aleɛ ne la, ɔzele bɛ kɛ: “Bɛhɔ zo bɛyɛ ɛhye bɛva bɛhakye me.” (1 Kɔl. 11:23-26) Ɔti mekɛ ala mɔɔ menli mɔɔ bɛkpokpa bɛ la bie mɔ tɛbɔ azɛlɛ ye azo la, mboane gyɛne ne bɛahɔ zo ahɔ Ngakyelɛlilɛ ne abo. Na mboane gyɛne ne to ɛsɛlɛ fɛlɛ awie biala kɛ ɔmaa bɛhɔ Ngakyelɛlilɛ ne abo.

15. Duzu a yɛbahola yɛayɛ yɛaye Nyamenle nee Kelaese ayɛlɛ wɔ Ngakyelɛlilɛ ne abo a?

¹⁵ Saa yɛkɔ Ngakyelɛlilɛ ne abo a, yɛnyia adenle yɛdua edwɛne nee asɔneyɛlɛ zo yɛye Nyamenle nee Kelaese ayɛlɛ. Ɛdendɛlɛ mɔɔ bɛbamaa wɔ ɛvolɛ ɛhye anu la ati ne se, “Kile Kɛ Ɛ Nye Sɔ Mɔɔ Nyamenle Nee Kelaese Ɛyɛ Ɛmaa Wɔ La!” Ɔbamaa yɛ nye azɔ mɔɔ Gyihova nee Kelaese ɛyɛ ɛmaa yɛ la kpalɛ. Mekɛ mɔɔ bɛlɛfa paano ne nee nwanye ne bɛaze yɛ nyunlu la, ɔbamaa yɛadwenle mɔɔ bɛgyi ɛkɛ bɛmaa la anwo​—Gyisɛse nwonane ne nee ye mogya ne. Yɛbahakye kɛ Gyihova maanle ɔ Ra ne wule maanle yɛ amaa yɛahola yɛanyia ngoane. (Mat. 20:28) Awie biala mɔɔ kulo yɛ anwuma Selɛ ne nee ɔ Ra ne la banyia ɛhulolɛ kɛ ɔbahɔ Ngakyelɛlilɛ ne bie.

16. Ndenle boni mɔ azo a bɛdabɛ mɔɔ bɛkpokpa bɛ nee mboane gyɛne ne le ko a?

¹⁶ Bɛdabɛ mɔɔ bɛkpokpa bɛ nee mboane gyɛne ne le ko wɔ adenle bie azo. Gyihova kulo bɛ muala. Ekpunli nwiɔ ne amuala sonle bolɛ maa ye. Ɔluakɛ ye kulovolɛ Ralɛ ne ngoane a ɔvale ɔdɔle bɛ muala a. Ngakyile mɔɔ wɔ nu la ala a le kɛ asolo ekpunli biala anyelazo. Ɔwɔ kɛ ekpunli nwiɔ ne amuala kɔ zo di nɔhalɛ maa Nyamenle nee Kelaese. (Edw. 31:23) Eza kakye kɛ, Nyamenle sunsum ne kola yɛ gyima wɔ yɛ muala yɛ nwo zo. Ɛhye kile kɛ, Gyihova fa sunsum nwuanzanwuanza mɔɔ awie biala bahyia nwo la maa ye.

17. Duzu a menli mɔɔ bɛkpokpa bɛ la mɔhama ne anye la ye ade a?

¹⁷ Bɛanva anwuma anyelazo ne bɛanwo Kilisienema mɔɔ bɛkpokpa bɛ la. Nyamenle a vale maanle bɛ a. Bɛdwenle bɛ anyelazo ne anwo, bɛyɛ nwolɛ asɔne na bɛ nye la ye ɛsesebɛ kɛ bɛ sa baha bɛ ahatualɛ ne wɔ anwuma. Bɛnze kɛzi bɛ sunsum nu sonlabaka ne bayɛ bɔbɔ a. (Fel. 3:20, 21; 1 Dwɔn 3:2)  Noko bɛ nye la kɛ bɛbanwu Gyihova, Gyisɛse, anwumabɔvolɛ ne mɔ nee menli gyɛne mɔɔ bɛkpokpa bɛ la. Bɛ nye la kɛ bɛ nee bɛ babɔ nu adɛnla anwuma Belemgbunlililɛ ne anu.

18. Duzu a mboane gyɛne ne anye la ye ade a?

¹⁸ Mboane gyɛne ne anye la kɛ bɛbadɛnla azɛlɛ ye azo dahuu. Ɛhye le debie mɔɔ alesama kɔsɔɔti kulo kɛ bɛnyia a. (Nol. 3:11) Bɛ nye la mekɛ mɔɔ bɛbaboa bɛamaa bɛayɛ azɛlɛ ye amuala paladaese la ade. Bɛ nye la mekɛ mɔɔ bɛbasisi bɛ azua, bɛayɛ bɛ tola na bɛatete ngakula mɔɔ te kpɔkɛ kpalɛ la. (Aye. 65:21-23) Bɛ nye la kɛ bɛbahɔ azɛlɛ ye azo ɛleka dɔɔnwo bahɔnlea awoka, ɛhoayelɛ nee nyevile na bɛazukoa Gyihova abɔdeɛ ngakyile ne mɔ anwo debie. Noko mɔ tɛla biala la, bɛ nye bɛalie kpole kɛ bɛ nee Gyihova agɔnwolɛvalɛ ne anu bahɔ zo amia dahuu la.

19. Nwolɛ adenle boni a Ngakyelɛlilɛ ne bamaa yɛ nuhua ko biala anyia a, na yɛbayɛ ɛvolɛ ɛhye Ngakyelɛlilɛ ne kenlenzu?

¹⁹ Gyihova ɛmaa ye sonvolɛ biala mɔɔ ɛyila ɔ nwo zo la anyelazo kɛnlɛma. (Gyɛ. 29:11) Ngakyelɛlilɛ ne maa yɛ nuhua biala nyia nwolɛ adenle kpole ye Nyamenle nee Kelaese ayɛlɛ wɔ mɔɔ bɛyɛ bɛmaa yɛ amaa yɛanyia dahuu ngoane la anwo. Nɔhalɛ nu, Ngakyelɛlilɛ ne a le ayia titili maa nɔhalɛ Kilisienema wɔ ɛvolɛ biala anu a. Bɛbayɛ ye wɔ Folɛ, March 27, 2021 wɔ mekɛ mɔɔ ewia ne ɛhɔdɔ la. Ɛvolɛ ɛhye, menli dɔɔnwo bahola ayɛ Ngakyelɛlilɛ ne wɔ anzodwolɛ nu. Bie mɔ bayia dwazotia noko bɛbahɔ. Bie mɔ noko bayɛ Ngakyelɛlilɛ ne wɔ efiade. Mekɛ mɔɔ Gyihova, Gyisɛse nee Nyamenle abusua ne mɔɔ wɔ anwuma la ɛlɛnea yɛ la, ɔrɛla ye kɛ asafo, ekpunli nee awie biala bali Ngakyelɛlilɛ ne kɛnlɛma!