EDWƐKƐ 4
Deɛmɔti Yɛkɔ Ngakyelɛlilɛ Ne Abo La
“Bɛhɔ zo bɛyɛ ɛhye bɛva bɛhakye me.”—LUKU 22:19.
EDWƐNE 20 Ɛvale Ɛ Ra Ne Mɔɔ Sonle Bolɛ La Ɛmaanle
MƆƆ YƐBAZUKOA *
1-2. (a) Mekɛ boni anu a yɛkakye yɛ dɔvolɛ bie mɔɔ ɛwu la a? (b) Wɔ nɔe ne mɔɔ aleɛ kye a Gyisɛse bawu la, duzu a ɔhanle kɛ yɛyɛ a?
SAA yɛ dɔvolɛ bie wule la ɛhyɛ bɔbɔ a, yɛtɛkakye ye. Mekɛ mɔɔ ɔwule la dwu biala a yɛkakye ye.
2 Ɛvolɛ biala yɛboka menli mgbe dɔɔnwo mɔɔ wɔ ewiade amuala mɔɔ yia kakye awie bie mɔɔ yɛkulo ye edwɛkɛ kpalɛ, Gyisɛse Kelaese, ewule ne la anwo. (1 Pita 1:8) Yɛyia yɛkakye ahenle mɔɔ vale ye ngoane yɛle ɛkpɔnedeɛ liele yɛ vile ɛtane nee ewule nu la. (Mat. 20:28) Nɔhalɛ nu, ɛnee Gyisɛse kulo kɛ ye ɛdoavolɛma kakye ye ewule ne. Nɔe ne mɔɔ aleɛ kye a ɔbawu la, ɔyɛle nɔsolɛ nu aleɛ titili bie anwo ngyehyɛleɛ na ɔhanle kɛ: “Bɛhɔ zo bɛyɛ ɛhye bɛva bɛhakye me.” *—Luku 22:19.
3. Duzu a yɛbazuzu nwo wɔ edwɛkɛ ɛhye anu a?
3 Menli mɔɔ kɔ Kelaese ewule Ngakyelɛlilɛ ne abo la anu ekyi bie a lɛ anwuma anyelazo a. Noko menli mgbe dɔɔnwo mɔɔ lɛ anyelazo kɛ bɛbadɛnla azɛlɛ ye azo la kɔ ɔ bo. Wɔ edwɛkɛ ɛhye anu, yɛbazuzu deɛmɔti menli ekpunli nwiɔ ne amuala anye la kɛ bɛbahɔ Ngakyelɛlilɛ ne abo ɛvolɛ biala la anwo. Eza yɛbazuzu nvasoɛ mɔɔ yɛkɔ a yɛbanyia la anwo. Maa yɛlimoa yɛzuzu deɛmɔti bɛdabɛ mɔɔ bɛkpokpa bɛ la kɔ Ngakyelɛlilɛ ne abo la anwo.
DEƐMƆTI BƐDABƐ MƆƆ BƐKPOKPA BƐ LA KƆ Ɔ BO LA
4. Duzu ati a bɛdabɛ mɔɔ bɛkpokpa bɛ la di Ngakyelɛlilɛ aleɛ ne bie a?
4 Ɛvolɛ biala bɛdabɛ mɔɔ bɛkpokpa bɛ la anye la kɛ bɛbahɔ Ngakyelɛlilɛ ne abo amaa bɛali paano ne na bɛanlo nwanye ne bie. Duzu ati a bɛdi paano ne na bɛno nwanye ne bie wɔ adenle mɔɔ fɛta la azo a? Amaa yɛabua zɔhane kpuya ne la, maa yɛzuzu mɔɔ zile nɔe ne mɔɔ aleɛ kye a Gyisɛse bawu la anwo. Mɔɔ bɛlile Akpabɛnwo aleɛ ne bɛwiele la, Gyisɛse vale mɔɔ ɛnɛ bɛfɛlɛ ye Awulae Nɔsolɛ Aleɛ ne la ziele ɛkɛ. Ɔvale paano nee nwanye ɔmaanle ye ɛzoanvolɛ nɔhavoma 11 ne na ɔhanle ɔhilele bɛ kɛ bɛli na bɛnlo. Gyisɛse hanle ngyekyeleɛ nwiɔ—ngyekyeleɛ fofolɛ ne nee Belemgbunlililɛ ngyekyeleɛ ne anwo edwɛkɛ hilele bɛ. * (Luku 22:19, 20, 28-30) Ngyekyeleɛ ɛhye mɔ bukele nwolɛ adenle maanle ɛzoanvolɛ zɔhane mɔ nee menli gyɛne ekyi kɛ bɛhɔyɛ arelemgbunli nee ɛsɔfoma wɔ anwuma. (Yek. 5:10; 14:1) Menli mɔɔ bɛkpokpa bɛ la mɔhama, * mɔɔ wɔ ngyekyeleɛ nwiɔ ɛhye anu la ala a kola di paano ne na bɛno nwanye ne bie wɔ Ngakyelɛlilɛ ne abo a.
5. Duzu a bɛdabɛ mɔɔ bɛkpokpa bɛ la ze ye wɔ bɛ anyelazo ne anwo a?
5 Debie bieko mɔɔ ɔti bɛdabɛ mɔɔ bɛkpokpa bɛ la kɔ Ngakyelɛlilɛ ne abo la a le ɛhye: Ɔmaa bɛnyia adenle bɛdwenledwenle bɛ anyelazo ne anwo. Gyihova ɛmaa bɛ anyelazo kɛnlɛma kɛ bɛbanyia sonlabaka mɔɔ ɛnwu na ɔmkpɔlɔ ɛlɛ la wɔ anwuma na bɛ nee Gyisɛse Kelaese mɔɔ bɛwula ye anyunlunyia nee menli 144,000 ne mɔɔ ɛha la ali tumi wɔ anwuma. Mɔɔ tɛla biala la, bɛ nee Gyihova Nyamenle mumua ne badɛnla! (1 Kɔl. 15:51-53; 1 Dwɔn 3:2) Menli mɔɔ bɛkpokpa bɛ la ze kɛ bɛbanyia nwolɛ adenle ɛhye mɔ wɔ anwuma. Noko saa bɛbanyia adenle bɛahɔ anwuma nehane a, ɔwɔ kɛ bɛdi nɔhalɛ too bɛkɔ ewule nu. (2 Tim. 4:7, 8) Saa bɛdabɛ mɔɔ bɛkpokpa bɛ la dwenledwenle bɛ anwuma anyelazo ne anwo a, ɔmaa bɛ nye die kpole. (Tae. 2:13) Na “mboane gyɛne” ne noko ɛ? (Dwɔn 10:16) Duzu ati a bɛkɔ Ngakyelɛlilɛ ne abo a?
DEƐMƆTI MBOANE GYƐNE NE KƆ Ɔ BO LA
6. Duzu ati a mboane gyɛne ne kɔ Ngakyelɛlilɛ ne abo ɛvolɛ biala a?
6 Mboane gyɛne ne kɔ Ngakyelɛlilɛ ne abo, tɛ kɛ bɛkali paano ne bie anzɛɛ bɛkanlo nwanye ne bie, emomu bɛkanlea bie. Ɛvolɛ 1938 a le mekɛ mɔɔ limoa mɔɔ bɛdole ɛsalɛ bɛvɛlɛle bɛdabɛ mɔɔ bɛlɛ azɛlɛ ye azo anyelazo la kɛ bɛrɛla Ngakyelɛlilɛ ne abo a. March 1, 1938, The Watchtower ne hanle kɛ: “Ɔbayɛ kpalɛ kɛ mboane gyɛne ne bara ayia ɛhye abo na bɛanlea mɔɔ bɛyɛ ye wɔ ɛkɛ ne la bie. . . . Ɔwɔ kɛ ɔyɛ anyelielɛ mekɛ ɔmaa bɛ na amgba noko ɔmaa bɛdabɛ noko bɛ nye die.” Kɛ mɔɔ bɛdabɛ mɔɔ bɛto bɛ sa bɛfɛlɛ bɛ wɔ atɔfolɛlielɛ bo anye die la, zɔhane ala a mboane gyɛne ne kɔ Ngakyelɛlilɛ ne abo a bɛ nye die a.
7. Duzu ati a mboane gyɛne ne kulo kɛ bɛtie Ngakyelɛlilɛ ɛdendɛlɛ ne a?
7 Mboane gyɛne ne noko dwenledwenle bɛ anyelazo ne anwo. Bɛkulo kɛ bɛtie Ngakyelɛlilɛ ɛdendɛlɛ ne ɔluakɛ nwolɛ edwɛkɛ dɔɔnwo fale mɔɔ Kelaese nee menli 144,000 mɔɔ ɔ nee bɛ bali tumi la bayɛ amaa alesama mɔɔ di nɔhalɛ wɔ Ɛvolɛ Apenle Ko Tumililɛ ne abo la anwo. Wɔ Belemgbunli Gyisɛse Kelaese tumililɛ bo, menli ɛhye mɔɔ ɛlɛdi tumi wɔ anwuma la baboa bɛamaa bɛahakyi azɛlɛ ne paladaese na bɛaboa alesama bɛamaa bɛali munli. Nea kɛzi ɔyɛ anyelielɛ kɛ menli mgbe dɔɔnwo mɔɔ bahɔ Ngakyelɛlilɛ ne abo la badwenledwenle kɛzi Baebolo ngapezo le kɛ Ayezaya 35:5, 6; 65:21-23 yɛɛ Yekile 21:3, 4 bara nu la anwo a. Saa bɛpɛ bɛ nee bɛ alɔvolɛ anwo nvoninli kɛ bɛwɔ ewiade fofolɛ ne anu a, ɔmaa kenle bie anyelazo mɔɔ bɛlɛ nee kpɔkɛ mɔɔ bɛbɔ kɛ bɛnrɛgyakyi Gyihova ɛzonlenlɛ la anu mia.—Mat. 24:13; Gal. 6:9.
8. Debie bieko mɔɔ ɔti mboane gyɛne ne kɔ Ngakyelɛlilɛ ne abo la a le boni?
8 Nea debie bieko mɔɔ ɔti mboane gyɛne ne kulo kɛ bɛkɔ Ngakyelɛlilɛ ne abo la. Bɛkulo kɛ bɛda ye ali kɛ bɛkulo bɛdabɛ mɔɔ bɛkpokpa bɛ la yɛɛ bɛgyi bɛ nzi. Nyamenle Edwɛkɛ ne hanle dole ɛkɛ ne kɛ bɛdabɛ mɔɔ bɛkpokpa bɛ nee bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo la babɔ nu ayɛ gyima. Adenle boni azo? Maa yɛzuzu neazo ekyi anwo.
9. Duzu a ngapezo mɔɔ wɔ Zɛkalaya 8:23 la maa yɛnwu ye wɔ kɛzi mboane gyɛne ne bu bɛdabɛ mɔɔ bɛkpokpa bɛ la anwo a?
9 Kenga Zɛkalaya 8:23. Ngapezo ɛhye ka kɛzi mboane gyɛne ne bu bɛ mediema mɔɔ bɛkpokpa bɛ la anwo edwɛkɛ kɛnlɛma. Edwɛkɛ agbɔkɛ “Dwuunli” nee “bɛ” gyi ɛkɛ ne maa ekpunli ko ne ala—bɛdabɛ mɔɔ bɛkpokpa bɛ la mɔhama ne. (Wlo. 2:28, 29) “Mrenyia bulu mɔɔ bɛvi aneɛ mɔɔ maanle maanle ne mɔ ka la amuala anu” la gyi ɛkɛ ne maa mboane gyɛne ne. “Bɛbarazɔ Dwuunli tɛladeɛ nu ɛsesebɛ,” kile kɛ bɛbava bɛ nwo bɛabeta menli mɔɔ bɛkpokpa bɛ la kyengye wɔ nɔhalɛ ɛzonlenlɛ nu. Ɔti ɔdwu nɔsolɛ mɔɔ bɛfa bɛyɛ Ngakyelɛlilɛ ne la a, mboane gyɛne ne ba ɔ bo fa kile kɛ bɛbeta bɛdabɛ mɔɔ bɛkpokpa bɛ la kyengye.
10. Duzu a Gyihova ɛyɛ ɛmaa ngapezo mɔɔ wɔ Yizikeɛle 37:15-19, 24, 25 la ɛra nu a?
10 Kenga Yizikeɛle 37:15-19, 24, 25. Gyihova ɛmaa ngapezo ɛhye ɛra nu ɔlua bɛdabɛ mɔɔ bɛkpokpa bɛ nee mboane gyɛne ne mɔɔ yemaa koyɛlɛ ɛra bɛ avinli la azo. Ngapezo ne hanle mbaka nwiɔ anwo edwɛkɛ. Bɛdabɛ mɔɔ bɛlɛ anwuma anyelazo la le kɛ “Dwuda baka ne” (abusua mɔɔ ɛnee bɛkpa Yizilayɛ arelemgbunli wɔ nu la), yɛɛ bɛdabɛ mɔɔ bɛlɛ azɛlɛ ye azo anyelazo la le kɛ “Yifelaem baka ne.” * Gyihova baha ekpunli nwiɔ ne abɔ nu amaa bɛayɛ “baka ko.” Ɛhye kile kɛ bɛbabɔ nu bɛayɛ gyima wɔ bɛ Belemgbunli ko, Kelaese Gyisɛse tumililɛ bo. Ɛvolɛ biala, bɛdabɛ mɔɔ bɛkpokpa bɛ nee mboane gyɛne ne bɔ nu kɔ Ngakyelɛlilɛ ne abo, bɛbɔ nu kɛ “mboane ekpunli ko” wɔ “neavolɛ ko” abo.—Dwɔn 10:16.
11. Kɛzi “mboane ne” mɔɔ bɛha bɛ nwo edwɛkɛ wɔ Mateyu 25:31-36, 40 la, boa Kelaese amediema ne mɔ ɛ?
11 Kenga Mateyu 25:31-36, 40. “Mboane ne” mɔɔ wɔ ndonwo ɛhye anu la gyi ɛkɛ ne maa tenlenema mɔɔ de aze wɔ awieleɛ mekɛ ne anu mɔɔ lɛ anyelazo kɛ bɛbadɛnla azɛlɛ ye azo la, ɛhye kile mboane gyɛne ne. Bɛfa nɔhalɛlilɛ bɛboa Kelaese amediema mɔɔ bɛha la bɛmaa bɛyɛ bɛ gyima kpole mɔɔ le ewiade amuala edwɛkɛhanlɛ nee ɛdoavolɛyɛlɛ gyima ne la.—Mat. 24:14; 28:19, 20.
12-13. Ndenle gyɛne boni mɔ azo a mboane gyɛne ne dua boa Kelaese amediema ne mɔ a?
12 Ɛvolɛ biala ɔka ekyi Ngakyelɛlilɛ ne dwu zo a, mboane gyɛne ne to ɛsalɛ fɛlɛ anyelielɛma wɔ ewiade amuala kɛ bɛrɛla Ngakyelɛlilɛ ne bie bɛfa bɛboa Kelaese amediema ne mɔ. (Nea ɛlɛka “ Ɛlɛsiezie Ɛ Nwo Wɔamaa Ngakyelɛlilɛ Mekɛ Ne Ɔ?”) Eza bɛboa bɛmaa bɛyɛ Ngakyelɛlilɛ ne anwo ngyehyɛleɛ biala mɔɔ hyia la amaa bɛahola bɛayɛ ye wɔ asafo biala anu wɔ ewiade amuala, ɔnva nwo kɛ awie biala ɛnli aleɛ ne bie wɔ asafo dɔɔnwo anu la. Mboane gyɛne ne anye die nwo kɛ bɛboa Kelaese amediema ne mɔ wɔ ndenle zɛhae azo. Mboane ɛhye mɔ ze kɛ Gyisɛse bu mɔɔ bɛlɛyɛ bɛamaa ɔ mediema mɔɔ bɛkpokpa bɛ la kɛ bɛlɛyɛ bɛamaa ɔdaye mumua ne.—Mat. 25:37-40.
13 Duzu bieko ati a yɛ muala, ɔnva nwo anyelazo mɔɔ yɛlɛ la, yɛkɔ Ngakyelɛlilɛ ne abo a?
DEƐMƆTI YƐ MUALA YƐKƆ Ɔ BO LA
14. Kɛzi Gyihova nee Gyisɛse ɛla ɛlɔlɛ kpole ali ɛhile yɛ ɛ?
14 Yɛ nye sɔ ɛlɔlɛ mɔɔ Gyihova nee Gyisɛse ɛla ye ali ɛhile yɛ la. Gyihova ɛla ye ɛlɔlɛ ne ali ɛhile yɛ wɔ ndenle dɔɔnwo azo noko nuhua ko tɛla bɛ muala. Ɛlɔlɛ mɔɔ tɛla biala mɔɔ yɛ Nyamenle ne ɛla ye ali ɛhile yɛ la a le ɔ Ra ne mɔɔ sonle bolɛ mɔɔ ɔmaanle ɔranwunle amaneɛ na ɔwule ɔmaanle yɛ la. (Dwɔn 3:16) Gyisɛse noko vile ye ɛhulolɛ nu vale ye ngoane maanle yɛ vale lale ɛlɔlɛ kpole ali hilele yɛ. (Dwɔn 15:13) Yɛnrɛhola yɛnrɛdua ɛlɔlɛ mɔɔ Gyihova nee Gyisɛse ɛla ye ali ɛhile yɛ la anwo kakɛ ɛlɛ. Noko yɛbahola yɛava kɛzi yɛbɔ yɛ ɛbɛla alehyenlɛ biala la yɛahile kɛ yɛ nye sɔ mɔɔ bɛyɛ la. (Kɔl. 3:15) Yɛɛ yɛkɔ Ngakyelɛlilɛ ne abo amaa yɛahakye ɛlɔlɛ mɔɔ bɛlale ye alie bɛhilele yɛ la na yɛdayɛ noko yɛahile kɛ yɛkulo bɛ.
15. Duzu ati a ɛkpɔnedeɛ ahyɛlɛdeɛ ne sonle bolɛ kpalɛ maa bɛdabɛ mɔɔ bɛkpokpa bɛ nee mboane gyɛne ne a?
15 Ɛkpɔnedeɛ ahyɛlɛdeɛ ne sonle bolɛ kpalɛ maa yɛ. (Mat. 20:28) Ɛkpɔnedeɛ ne sonle bolɛ maa menli mɔɔ bɛkpokpa bɛ la ɔluakɛ ɔbamaa bɛ anyelazo kɛnlɛma ne ara nu. Diedi mɔɔ bɛlɛ ye wɔ Kelaese afɔlebɔlɛ ne anu la ati, Gyihova bu bɛ tenlenema na yeva bɛ yeyɛ ɔ mra. (Wlo. 5:1; 8:15-17, 23) Mboane gyɛne ne noko anye sɔ ɛkpɔnedeɛ ne. Kɛmɔ bɛlɛ diedi wɔ Kelaese afɔlebɔlɛ ne anu la ati, Nyamenle die bɛ to nu. Bɛkola bɛfa ɛzonlenlɛ nwuanzanwuanza bɛmaa yɛɛ bɛlɛ anyelazo kɛ bɛbavi “anwongyelelɛ kpole ne anu.” (Yek. 7:13-15) Adenle ko mɔɔ menli mɔɔ bɛkpokpa bɛ nee mboane gyɛne ne bahola alua zo ahile kɛ bɛ nye sɔ ɛkpɔnedeɛ ne la a le kɛ bɛbahɔ Ngakyelɛlilɛ ne abo ɛvolɛ biala.
16. Duzu bieko ati a yɛkɔ Ngakyelɛlilɛ ne abo a?
16 Debie bieko mɔɔ ɔti yɛkɔ Ngakyelɛlilɛ ne abo la a le kɛ yɛkulo kɛ yɛtie Gyisɛse. Ɔnva nwo anyelazo mɔɔ yɛlɛ la, yɛ nuhua ko biala kulo kɛ ɔdi mɛla mɔɔ Gyisɛse vale maanle wɔ nɔsolɛ ne mɔɔ ɔvale Ngakyelɛlilɛ ne ɔziele ɛkɛ ne la azo. Ɔse: “Bɛhɔ zo bɛyɛ ɛhye bɛva bɛhakye me.”—1 Kɔl. 11:23, 24.
KƐZI YƐ MUALA YƐKƆ A ƆBOA YƐ LA
17. Kɛzi Ngakyelɛlilɛ ne boa yɛ maa yɛbikye Gyihova ɛ?
17 Ɔmaa yɛbikye Gyihova. (Gye. 4:8) Ngakyelɛlilɛ ne maa yɛnyia adenle yɛdwenledwenle anyelazo mɔɔ Gyihova ɛva ɛmaa yɛ nee ɛlɔlɛ kpole mɔɔ yela ye ali yehile yɛ la anwo. (Gyɛ. 29:11; 1 Dwɔn 4:8-10) Saa yɛdwenle anyelazo mɔɔ yɛlɛ ye kenle bie nee ɛlɔlɛ kpole mɔɔ Nyamenle lɛ maa yɛ la anwo a, ɔmaa ɛlɔlɛ mɔɔ yɛdayɛ noko yɛlɛ yɛmaa Gyihova la yɛ kpole na agɔnwolɛvalɛ mɔɔ wɔ yɛ avinli la anu mia.—Wlo. 8:38, 39.
18. Saa yɛdwenledwenle Gyisɛse neazo ne anwo a, duzu a ɔka yɛ ɔmaa yɛyɛ a?
18 Ɔka yɛ ɔmaa yɛsukoa Gyisɛse neazo ne. (1 Pita 2:21) Saa ɔka ekyi Ngakyelɛlilɛ ne dwu a, yɛfa yɛ adwenle yɛsie dapɛne mɔɔ li awieleɛ wɔ Gyisɛse ɛbɛlabɔlɛ nu, ye ewule nee ye ewudwazo ne anwo edwɛkɛ mɔɔ wɔ Baebolo ne anu la azo. Akee ɔdwu Ngakyelɛlilɛ kenle ne nɔsolɛ nu a, ɛdendɛlɛ mɔɔ bɛmaa la maa yɛkakye ɛlɔlɛ mɔɔ Gyisɛse lɛ maa yɛ la. (Ɛfɛ. 5:2; 1 Dwɔn 3:16) Saa yɛkenga Gyisɛse tunwomaa neazo ne na yɛdwenledwenle nwo a, ɔka yɛ ɔmaa yɛkɔ zo yɛbɔ yɛ ɛbɛla “kɛ mɔɔ Kelaese bɔle ye ɛbɛla” la.—1 Dwɔn 2:6.
19. Kɛ ɔkɛyɛ na yɛahɔ zo yɛadɛnla Nyamenle ɛlɔlɛ ne anu ɛ?
19 Ɔmaa yɛsukoa kɛ yɛbahɔ zo yɛadɛnla Nyamenle ɛlɔlɛ ne anu. (Dwu. 20, 21) Saa yɛyɛ biala mɔɔ yɛbahola la yɛtie Nyamenle, yɛte ye duma nwo na yɛmaa ye ahonle di fɛlɛko a, yɛbahɔ zo yɛadɛnla ye ɛlɔlɛ ne anu. (Mrɛ. 27:11; Mat. 6:9; 1 Dwɔn 5:3) Ngakyelɛlilɛ ne ka yɛ ɔmaa yɛsi kpɔkɛ kɛ yɛbabɔ yɛ ɛbɛla alehyenlɛ biala wɔ adenle mɔɔ le kɛ asɛɛ yɛlɛka yɛahile Gyihova kɛ, ‘Mekulo kɛ mekɔ zo metɛnla wɔ ɛlɔlɛ ne anu dahuu’ la azo!
20. Duzu ati a yɛkɔ Ngakyelɛlilɛ ne abo a?
20 Saa yɛ anyelazo a le kɛ yɛbadɛnla aze dahuu wɔ anwuma anzɛɛ azɛlɛ ye azo a, debie kpalɛ bie ati a yɛkɔ Ngakyelɛlilɛ ne abo a. Saa yɛyia nu ɛvolɛ biala wɔ kenle zɔhane a, yɛkakye awie mɔɔ yɛkulo ye, Gyisɛse Kelaese ewule ne. Mɔɔ tɛla biala la, yɛkakye ɛlɔlɛ kpole mɔɔ bɛla ye ali bɛhile yɛ la—ɛlɔlɛ mɔɔ Gyihova lale ye ali hilele yɛ ɔlua ɔ Ra ne mɔɔ ɔvale ye ɔyɛle ɛkpɔnedeɛ la azo. Ɛvolɛ ɛhye, bɛbayɛ Ngakyelɛlilɛ ne wɔ Yalɛ, April 15, 2022 nɔsolɛ nu. Yɛkulo Gyihova nee ɔ Ra ne, ɔti saa Gyisɛse ewule Ngakyelɛlilɛ ne dwu a, debie mɔɔ hyia yɛ kpole kpalɛ la a le kɛ yɛbahɔ ɔ bo.
-
Duzu ati a menli mɔɔ bɛkpokpa bɛ la kɔ Ngakyelɛlilɛ ne abo a?
-
Duzu ati a mboane gyɛne ne kɔ Ngakyelɛlilɛ ne abo a?
-
Saa yɛ muala yɛkɔ Ngakyelɛlilɛ ne abo a, kɛzi ɔboa yɛ ɛ?
EDWƐNE 16 Bɛhanvo Gyaa, Yekpokpa Ɔ Ra Ne
^ Saa yɛ anyelazo a le kɛ yɛbahɔ anwuma anzɛɛ yɛbadɛnla azɛlɛ ye azo paladaese ne anu o, yɛ nye la kɛ yɛbahɔ Ngakyelɛlilɛ ne abo ɛvolɛ biala. Edwɛkɛ ɛhye bahilehile deɛmɔti yɛkɔ ɔ bo nee nvasoɛ mɔɔ yɛnyia yɛfi zolɛ la anu.
^ Eza bɛha edwɛkɛ ɛhye kɛ, “Anrɛɛ bɛyɛ ɛhye bɛva bɛhakye me” (BAEBOLO).
^ Saa ɛkpondɛ ngyekyeleɛ fofolɛ ne nee Belemgbunlililɛ ngyekyeleɛ ne anwo edwɛkɛ dɔɔnwo a, nea edwɛkɛ, “Bɛbayɛ ‘Ɛsɔfoma Nee Arelemgbunli’” mɔɔ wɔ October 15, 2014, Ɛzinzalɛ Arane ne m. 10-15 la anu.
^ EDWƐKƐ MƆƆ BƐHILEHILE NU: Edwɛkɛ menli mɔɔ bɛkpokpa bɛ la mɔhama a le Kilisienema mɔɔ bɛkpokpa bɛ mɔɔ bɛtɛte ngoane nu wɔ azɛlɛ ye azo la.
^ Saa ɛkpondɛ mbaka nwiɔ ne mɔɔ bɛva bɛbɔ nu la anwo ngapezo ne mɔɔ wɔ Yizikeɛle 37 la anwo edwɛkɛ dɔɔnwo a, nea Bɛva Nɔhalɛ Ɛzonlenlɛ Bɛzie Ɛkɛ Ne Bieko! buluku ne m.130-135, ɛden. 3-17.
