1-3. Ngyegyelɛ boni mɔ a kola maa Gyihova menli su a?

 ƐZUNLE la, ɛnɛ le kenle nyɛ? Ɔdwu mekɛ ne bie a, anyelielɛ maa yɛsu. Noko fane dɔɔnwo ne ala, nyane mɔɔ wɔ yɛ ahonle nu la a maa yɛsu a. Kɛ neazo la, saa yɛ dɔvolɛ bie wu a ɔmaa yɛsu. Lorilei, adiema raalɛ bie mɔɔ wɔ United States la hanle kɛ: “Ɔdwu mekɛ ne bie a me ra raalɛ ne ewule ne maa medi nyane kpole mɔɔ ɔyɛ kɛ asɛɛ debie biala ɛngola ɛnkyekye me rɛle a. Mekɛ zɔhane anu, ɛnee mesuzu kɛ menrɛhola ɔ nloa gyinla.” *

² Ninyɛne gyɛne noko kola maa yɛsu. Hiromi, adiema raalɛ adekpakyelɛnli bie mɔɔ wɔ Japan la hanle kɛ: “Kɛmɔ menli mɔɔ meyia bɛ wɔ daselɛlilɛ nu la le anyetele la ati, ɔyɛ a ɔmaa me sa nu to. Ɔdwu mekɛ ne bie a mefa ɛzunlɛ mesɛlɛ Gyihova kɛ ɔboa me ɔmaa menyia awie mɔɔ ɛlɛkpondɛ nɔhalɛ ne la.”

³ Wɔde nganeɛ kɛ mediema mraalɛ ɛhye mɔ la ɛlɛ ɔ? Yɛ nuhua dɔɔnwo ɛde nganeɛ zɔ. (1 Pita 5:9) Yɛkulo kɛ ‘yɛfa fɛlɛkolilɛ yɛsonle Gyihova,’ noko bie a nyanelilɛ, bɛsanudolɛ anzɛɛ tɛnlabelɛ mɔɔ sɔ yɛ nɔhalɛlilɛ nea la maa yɛfa ɛzunlɛ a yɛsonle ye a. (Edw. 6:6; 100:2) Saa yɛte nganeɛ zɛhae a, duzu a yɛbahola yɛayɛ a?

4. Duzu a yɛbazuzu nwo wɔ edwɛkɛ ɛhye anu a?

⁴ Yɛbahola yɛazukoa Gyisɛse neazo ne. Ɔdwu mekɛ ne bie  a ɔdaye noko ɔyia tɛnlabelɛ mɔɔ ɔmaa ‘ɔsu’ a. (Dwɔn 11:35; Luku 19:41; 22:44; Hib. 5:7) Maa yɛzuzu tɛnlabelɛ zɔhane mɔ anwo. Saa yɛyɛ zɔ a yɛbanyia ɛzukoalɛdeɛ dɔɔnwo. Eza yɛbazuzu mɔɔ yɛbahola yɛayɛ wɔ mekɛ mɔɔ yɛbayia tɛnlabelɛ mɔɔ ɔbahola yeamaa yɛazu la anwo.

5. Duzu a edwɛkɛ mɔɔ wɔ Dwɔn 11:32-36 la maa yɛnwu ye wɔ Gyisɛse anwo a?

⁵ Wɔ ɛvolɛ 32 Y.M. fɔsɛlɛ mekɛ ne anu, Gyisɛse agɔnwo kpalɛ Lazalɛse anwo dole ye na ɔwule. (Dwɔn 11:3, 14) Ɛnee Lazalɛse lɛ ɔ mediema mraalɛ nwiɔ, Mɛle nee Maata, na ɛnee Gyisɛse kulo abusua ɛhye edwɛkɛ kpalɛ. Ye ewule ne maanle ɔ mediema mraalɛ ne mɔ anwo bubule bɛ. Mɔɔ Lazalɛse wule la, Gyisɛse hɔle Bɛtani, ɛleka mɔɔ Mɛle nee Maata de la. Mɔɔ Maata dele kɛ Gyisɛse ɛlɛba la, ɔnriandile ɔhɔyiale ye. Nea kɛzi ɛnee ɔlɛdi alɔbɔlɛ wɔ mekɛ mɔɔ ɔhanle kɛ: “Awulae, saa ɛwɔ ɛke a anrɛɛ me diema ne anwu” la. (Dwɔn 11:21) Mɔɔ Gyisɛse nwunle Mɛle nee awie mɔ kɛ bɛlɛsu la, yeangyɛ ɔdaye noko ‘ɔzunle.’​—Kenga Dwɔn 11:32-36.

6. Duzu a maanle Gyisɛse zunle mekɛ zɔhane a?

⁶ Duzu a maanle Gyisɛse zunle mekɛ zɔhane a? Insight on the Scriptures ne bua kɛ: “Gyisɛse agɔnwo Lazalɛse ewule ne nee nyane mɔɔ Lazalɛse amediema mraalɛ ne mɔ ɛlɛdi la maanle ‘nyane kpole hanle ye na ɔzunle.’” * Bie a ɛnee Gyisɛse ɛlɛdwenle nyane mɔɔ ɔ gɔnwo kpalɛ Lazalɛse hɔle nu wɔ mekɛ mɔɔ ɔnde kpɔkɛ nee kɛzi Lazalɛse dele nganeɛ wɔ mekɛ mɔɔ ɔnwunle kɛ ɔnrɛhyɛ ɔbawu la anwo. Debie bieko mɔɔ maanle Gyisɛse zunle la a le kɛzi Lazalɛse ewule ne hanle ɔ mediema mraalɛ Mɛle nee Maata la. Saa ɛ gɔnwo kpalɛ anzɛɛ wɔ busuanli bie ɛwu ɛlɛ a, ɛnee ɛdawɔ noko wɔde nganeɛ zɛhae ɛlɛ. Suzu ɛzukoalɛdeɛ nsa mɔɔ ɛbahola wɔnyia wɔavi edwɛkɛ ɛhye anu la anwo.

7. Gyisɛse agɔnwo mɔ ati ɔzunle, na duzu a ɛhye maa yɛnwu ye wɔ Gyihova anwo a?

 ⁷ Gyihova te kɛzi yɛte nganeɛ la abo. Gyisɛse le ɔ Ze “ɛsaso pɛpɛɛpɛ.” (Hib. 1:3) Mɔɔ Gyisɛse zunle la ɔlale kɛzi ɔ Ze te nganeɛ la ali. (Dwɔn 14:9) Saa wɔ dɔvolɛ bie ɛwu a, ɛbahola wɔanyia anwodozo kɛ Gyihova nwu nyane mɔɔ ɛlɛdi la yɛɛ ɔdaye noko ɔyɛ ye nyane. Ɔkulo kɛ ɔyɛ wɔ ahonle ne mɔɔ ɛbubu la ayile.​—Edw. 34:18; 147:3.

8. Duzu ati a yɛbahola yɛanyia anwodozo kɛ Gyisɛse badwazo yɛ alɔvolɛ mɔɔ ɛwu la ɛ?

⁸ Gyisɛse kulo kɛ ɔdwazo wɔ alɔvolɛ mɔɔ ɛwu la. Kolaa na Gyisɛse azu la, ɔhanle ɔhilele Maata kɛ: “Ɛ diema ne badwazo.” Maata liele Gyisɛse lile. (Dwɔn 11:23-27) Kɛmɔ ɛnee Maata le Gyihova sonvolɛ nɔhavo la ati, ɛnee ɔze menli mɔɔ ngapezoma, Yilaegya nee Yilaehya dwazole bɛ wɔ ɛvolɛ dɔɔnwo mɔɔ ɛze ɛhɔ la. (1 Arl. 17:17-24; 2 Arl. 4:32-37) Eza ɔbayɛ kɛ ɛnee yede menli mɔɔ Gyisɛse ɛdwazo bɛ la anwo edwɛkɛ. (Luku 7:11-15; 8:41, 42, 49-56) Ɛdawɔ noko ɛbahola wɔanyia anwodozo kɛ ɛbanwu wɔ alɔvolɛ mɔɔ ɛwu la bieko. Kɛmɔ Gyisɛse zunle wɔ mekɛ mɔɔ ɔlɛkyekye ɔ gɔnwo mɔ mɔɔ ɛlɛdi nyane la arɛle la ati, ɔmaa yɛnwu kɛ ewudwazo ne la ye ahonle nwo kpalɛ!

9. Kɛ ɔkɛyɛ na yɛaboa bɛdabɛ mɔɔ bɛlɛdi nyane kɛ mɔɔ Gyisɛse yɛle la ɛ? Maa neazo.

⁹ Ɛbahola wɔaboa bɛdabɛ mɔɔ bɛlɛdi nyane la. Gyisɛse nee Maata nee Mɛle anzu ala, eza ɔdiele bɛ na ɔkyekyele bɛ rɛle. Yɛbahola yɛayɛ zɔhane ala yɛamaa bɛdabɛ mɔɔ bɛlɛdi nyane la. Dan, asafo nu kpanyinli bie mɔɔ ɔde Australia la hanle kɛ: “Mɔɔ me ye wule la, ɛnee mehyia awie mɔɔ ɔbaboa me a. Agyalɛma dɔɔnwo rakpɔlale me alehyenlɛ nee aledwolɛ na bɛdiele me. Bɛmaanle me adenle bɛmaanle menganle kɛzi melɛdi nyane la na yeanyɛ bɛ nyiane kɛ bɛbanwu kɛ melɛsu. Eza bɛboale me wɔ me gyimayɛlɛ ngakyile le kɛ me kale ne ɛkpudalɛ, gua ɛlilɛ nee aleɛdonlɛ nu ɔluakɛ ɛnee mengola menyɛ. Yɛɛ ɛnee bɛta bɛ nee me yɛ asɔne. Bɛlale ye ali kɛ bɛle agɔnwolɛma kpalɛ nee mediema mɔɔ ‘bɛwo bɛ bɛmaa anwongyelelɛ mekɛ a.’”​—Mrɛ. 17:17.

10. Duzu edwɛkɛ a wɔ Luku 19:36-40 a?

¹⁰ Gyisɛse hɔdwule Gyɛlusalɛm wɔ Naesan 9, 33 Y.M. Mɔɔ ɔlɛbikye suakpole ne azo la, menli rabɔle ye yiale na bie mɔ vale bɛ adɛladeɛ rasesɛle adenle ne anu hilele kɛ bɛdie ye bɛto nu kɛ bɛ Belemgbunli. Ɛnee ɔle anyelielɛ mekɛ amgba. (Kenga Luku 19:36-40.) Ɔti ɛnee ye ɛdoavolɛma ne anye ɛnla mɔɔ zile nzinlii la. “Mɔɔ [Gyisɛse] bikyele ɛkɛ ne la, ɔnleanle suakpole ne na ɔzunle.” Mɔɔ Gyisɛse ɛlɛsu la, ɔhanle munzule mɔɔ ɔnrɛhyɛ ɔbado menli mɔɔ wɔ Gyɛlusalɛm la anwo edwɛkɛ.​—Luku 19:41-44.

11. Duzu ati a Gyisɛse zunle maanle menli mɔɔ wɔ Gyɛlusalɛm la ɛ?

¹¹ Gyisɛse lile nyane ɔluakɛ ɛnee ɔze kɛ ɔnva nwo kɛ ye sua zo amra ɛlɛdie ye kɛnlɛma la, bɛ nuhua dɔɔnwo ɛnrɛdie Belemgbunlililɛ edwɛkɛ ne. Ɛhye ati, bɛbazɛkye Gyɛlusalɛm na bɛahye Dwuuma dɔɔnwo mɔɔ bɛbanyia bɛ ti la bɛahɔ akɛlɛzonlenlɛ nu. (Luku 21:20-24) Alɔbɔlɛ edwɛkɛ ne a le kɛ, kɛ mɔɔ Gyisɛse hanle la, bɛ nuhua dɔɔnwo anlie ye anli. Kɛzi menli dɔɔnwo mɔɔ de ɛleka mɔɔ ɛwɔ la yɛ bɛ nyɛleɛ wɔ Belemgbunlililɛ edwɛkɛ ne anwo ɛ? Saa menli ekyi bie ala a tie nɔhalɛ ne mɔɔ ɛlɛkilehile bɛ la a, duzu a ɛbahola wɔazukoa wɔavi Gyisɛse ɛzunlɛ ne anu a? Maa yɛzuzu ɛzukoalɛdeɛ nsa bieko anwo.

12. Gyisɛse kpalɛzoamra ati ɔzunle na duzu a ɛhye maa yɛnwu ye wɔ Gyihova anwo a?

 ¹² Gyihova dwenle menli nwo. Gyisɛse ɛzunlɛ ne maa yɛnwu kɛzi Gyihova dwenle menli nwo kpalɛ la. “Ɔngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo.” (2 Pita 3:9) Ɛnɛ, saa yɛkɔ zo yɛbɔ mɔdenle kɛ yɛboa menli yɛamaa bɛazukoa Belemgbunlililɛ edwɛkpa ne a, ɛnee yɛlɛda ye ali kɛ yɛkulo bɛ.​—Mat. 22:39. *

13-14. Kɛzi Gyisɛse lale ahunluyelɛyelalɛ ali hilele menli ɛ, na kɛ ɔkɛyɛ na yɛanyia zɔhane subane ne bie ɛ?

¹³ Gyisɛse yɛle gyima ɛsesebɛ wɔ ɛzonlenlɛ gyima ne anu. Ɔhɔle zo ɔvale nwolɛ adenle biala mɔɔ ɔnyianle la ɔhilehile menli ɔvale ɔhilele kɛ ɔkulo bɛ. (Luku 19:47, 48) Duzu a hanle Gyisɛse maanle ɔyɛle zɔ a? Ɔ kunlu yelɛyelale ye maanle bɛ. Ɔdwu mekɛ ne bie a, menli dɔɔnwo kulo kɛ bɛtie Gyisɛse edwɛkɛ ne ɔti ɔ nee ye ɛdoavolɛma ‘ɛnnyia adenle ɛnli debie bɔbɔ.’ (Maake 3:20) Na mekɛ mɔɔ ɛnee nrenyia bie kulo kɛ ɔ nee Gyisɛse tendɛ nɔɔzo la ɔnyianle ɛhulolɛ kɛ ɔ nee ye badendɛ. (Dwɔn 3:1, 2) Menli mɔɔ diele Gyisɛse la anu dɔɔnwo anyɛ ye ɛdoavolɛma. Noko ɔlile awie biala mɔɔ dele ye edwɛkɛ ne la daselɛ bɔkɔɔ. Ɛnɛ, yɛkulo kɛ awie biala nyia nwolɛ adenle te edwɛkpa ne bie. (Gyi. 10:42) Amaa yɛahola yɛayɛ ɛhye la, bie a ɔwɔ kɛ yɛyɛ nzenzaleɛ wɔ adenle mɔɔ yɛdua zo yɛdi daselɛ la anu.

¹⁴ Nyia ɛhulolɛ kɛ ɛbayɛ nzenzaleɛ mɔɔ hyia la. Saa yɛangakyihakyi mekɛ mɔɔ yɛfa yɛdi daselɛ la a, bie a yɛnrɛnyia menli mɔɔ bɛbadie edwɛkpa ne la. Adekpakyelɛnli bie mɔɔ bɛfɛlɛ ye Matilda la hanle kɛ: “Me nee me hu bɔ mɔdenle kɛ yɛbali menli daselɛ wɔ mekɛ ngakyile nu. Nwonlomɔ mangyee ne ala yɛkɔ ɛleka mɔɔ gyima gyima wɔ la. Ɔdwu ewiazo mɔɔ menli dɔɔnwo ɛvinde la a, yɛfa daselɛlilɛ ehwili ne yɛkɔgyinla ɛleka bie. Yɛnwu ye kɛ ɔlɛkɔ nɔsolɛ nu a yɛkɔto menli wɔ bɛ azua nu.” Tɛ mekɛ mɔɔ ɔle kpalɛ maa yɛ la ala a ɔwɔ kɛ yɛdi daselɛ a, emomu ɔwɔ kɛ yɛnyia ɛhulolɛ kɛ yɛbayɛ nzenzaleɛ amaa yɛahola yɛali menli daselɛ wɔ mekɛ mɔɔ yɛ sa baha bɛ la. Saa yɛyɛ zɔ a, yɛbahola yɛanyia anwodozo kɛ Gyihova anye balie.

15. Kɛ mɔɔ bɛhɛlɛ ye wɔ Luku 22:39-44 la, nɔe ne mɔɔ aleɛ kye a Gyisɛse bawu la, duzu a zile a?

¹⁵ Wɔ Naesan 14, 33 Y.M. nɔe ne, Gyisɛse hɔle Gɛtesɛmani tola ne anu. Wɔ ɛkɛ ne, ɔhanle mɔɔ wɔ ye ahonle nu la ɔhilele Gyihova. (Kenga Luku 22:39-44.) Wɔ tɛnlabelɛ ɛsesebɛ zɔhane anu, Gyisɛse luale “ɛnelɛ kpole nee ɛzunlɛ zo ɔvale ye modolɛ” ɔdole Nyamenle anyunlu. (Hib. 5:7) Duzu a Gyisɛse yɛle nwolɛ asɔne wɔ nɔe zɔhane a? Ɔzɛlɛle Gyihova kɛ ɔmaa ye anwosesebɛ ɔmaa ɔhɔ zo ɔli nɔhalɛ na ɔyɛ Ye ɛhulolɛdeɛ. Gyihova diele ɔ Ra ne modolɛ nzɛlɛlɛ ne na ɔmaanle anwumabɔvolɛ ramaanle ye anwosesebɛ.

16. Duzu ati a Gyisɛse arɛle bɔle wɔ mekɛ mɔɔ ɔlɛyɛ asɔne wɔ Gɛtesɛmani tola ne anu la ɛ?

¹⁶ Kɛmɔ menli babu Gyisɛse kɛ ɔmbu Nyamenle duma ne la ati, ɔmaanle ɔ rɛle bɔle, na mekɛ mɔɔ ɔlɛyɛ asɔne wɔ Gɛtesɛmani tola ne anu la ɔzunle. Ɛnee eza ɔze ɛzonlelilɛ kpole mɔɔ la ɔ nwo zo la​—kɛ ɔbade ɔ Ze duma nwo. Saa ɛlɛyia tɛnlabelɛ ɛsesebɛ mɔɔ ɛlɛsɔ nɔhalɛ mɔɔ ɛdi wɔamaa Gyihova la anlea a, duzu a ɛbahola wɔazukoa wɔavi Gyisɛse ɛzunlɛ ne anu a? Maa yɛzuzu ɛzukoalɛdeɛ nsa bieko anwo.

17. Duzu a yɛsukoa yɛfi Gyihova ɛkɛ wɔ kɛzi ɔbuale Gyisɛse asɔneyɛlɛ ne la anu a?

¹⁷ Gyihova tie wɔ modolɛ nzɛlɛlɛ. Gyihova diele asɔne mɔɔ Gyisɛse vile ye ahonle nu yɛle la. Duzu ati ɔ? Ɔluakɛ ɛnee Gyisɛse bodane titili a le kɛ ɔbali nɔhalɛ yeamaa ɔ Ze na yeade Ye duma nwo. Saa yɛ bodane titili a le kɛ yɛbali nɔhalɛ yɛamaa Gyihova na yɛade ye duma nwo a, ɔbabua asɔne mɔɔ yɛyɛ kɛ ɔboa yɛ la.​—Edw. 145:18, 19.

18. Kɛzi Gyisɛse le kɛ agɔnwolɛ mɔɔ ɔte yɛ edwɛkɛ bo la ɛ?

¹⁸ Gyisɛse te yɛ nganeɛdelɛ bo. Saa yɛ rɛle bɔ na yɛnyia agɔnwolɛ mɔɔ te yɛ edwɛkɛ bo, titili mɔɔ ɛyia yɛ ngyegyelɛ bie ɛlɛ la na ɔkyekye yɛ rɛle a, nea kɛzi yɛ nye die a. Gyisɛse le kɛ zɔhane agɔnwolɛ ne la. Saa awie yɛ bɛtɛɛ anzɛɛ ɔhyia moalɛ a, ɔze kɛzi ɔde la. Ɔte yɛ bɛtɛɛyɛlɛ bo na ɔbanlea kɛ yɛ sa baha moalɛ mɔɔ yɛhyia nwo la “wɔ mekɛ kpalɛ nu.” (Hib. 4:15, 16) Kɛ mɔɔ Gyisɛse maanle anwumabɔvolɛ bie boale ye wɔ Gɛtesɛmani tola ne anu la, ɔwɔ kɛ yɛdayɛ noko yɛnyia  ɛhulolɛ kɛ yɛbalie moalɛ mɔɔ Gyihova balua buluku, vidio, ɛdendɛlɛ, asafo nu kpanyinli anzɛɛ agɔnwolɛ bie mɔɔ ɛnyi sunsum nu anwo zo ava amaa yɛ la yɛado nu.

19. Saa ɛlɛyia ngyegyelɛ mɔɔ sɔ wɔ nɔhalɛlilɛ nea la a, kɛ ɔkɛyɛ na wɔanyia anwosesebɛ wɔagyinla ɔ nloa ɛ? Maa neazo.

¹⁹ Gyihova bamaa wɔ “Nyamenle anzodwolɛ ne.” Kɛzi Gyihova bamaa wɔ anwosesebɛ ɛ? Saa yɛyɛ asɔne a yɛbanyia “Nyamenle anzodwolɛ ne mɔɔ bo ndelebɛbo muala azo la.” (Fel. 4:6, 7) Anzodwolɛ ne mɔɔ Gyihova fa maa la maa yɛsie yɛ nwo dii na yɛdwenle ninyɛne kpalɛ nwo. Zɔhane a adiema raalɛ bie mɔɔ bɛfɛlɛ ye Luz la nwunle ye a. Ɔhanle kɛ: “Ɛnee me nwo ta yɛ me koonwu. Ɔdwu mekɛ ne bie a ɔmaa mete nganeɛ kɛ Gyihova ɛngulo me. Noko saa mete nganeɛ zɔ a, meka mekile Gyihova ndɛndɛ. Asɔneyɛlɛ boa me maa mesie me nwo dii.” Ye anwubielɛ ne maa yɛnwu kɛ asɔneyɛlɛ bahola amaa yɛanyia anzodwolɛ.

20. Duzu a yɛzukoa yɛvi Gyisɛse ɛzunlɛ ne anu a?

²⁰ Nea ɛzukoalɛdeɛ ngɛnlɛma mɔɔ kyekye yɛ rɛle mɔɔ yɛzukoa yɛvi Gyisɛse ɛzunlɛ ne anu a! Ɔkakye yɛ kɛ yɛboa yɛ gɔnwo mɔ mɔɔ ɛlɛdi nyane la na yɛnyia anwodozo kɛ saa yɛ alɔvolɛ wu a, Gyihova nee Gyisɛse baboa yɛ. Ɔmaa yɛ anwosesebɛ kɛ yɛva ahunluyelɛyelalɛ yɛha edwɛkɛ ne na yɛhilehile menli ɔluakɛ Gyihova Nyamenle nee Gyisɛse Kelaese da subane kɛnlɛma ɛhye bie ali. Eza yɛnwu kɛ Gyihova nee ye kulovolɛ Ralɛ ne te kɛzi yɛte nganeɛ la abo. Bɛte yɛ bɛtɛɛyɛlɛ bo na bɛkulo kɛ bɛboa yɛ bɛmaa yɛgyinla ɔ nloa na ɛhye kyekye yɛ rɛle kpalɛ. Bɛmaa yɛhɔ zo yɛva mɔɔ yɛzukoa la yɛli gyima kɔkpula kenle mɔɔ Gyihova bamaa ye ɛwɔkɛ ɛhye mɔɔ yebɔ kɛ “ɔbakyikyi bɛ nye anwo monle kɔsɔɔti” la ara nu la!​—Yek. 21:4.