1. Kɛzi ɛnee Gyemise abusua ne de ɛ?

 BƐTETELE Gyisɛse adiema Gyemise wɔ abusua mɔɔ bɛbɔ mɔdenle wɔ sunsum nu la anu. Ɛnee ye awovolɛ, Dwosefi nee Mɛle kulo Gyihova kpalɛ na bɛyɛle biala mɔɔ bɛbahola la bɛzonlenle Ye. Gyemise nyianle nyilalɛ bieko​—ɛnee ɔ diema kpanyinli ne banyi arayɛ Mɛzaya ne mɔɔ bɛbɔ ɔ nwo ɛwɔkɛ la. Nea nwolɛ adenle kɛnlɛma mɔɔ Gyemise nyianle kɛ ɔboka abusua zɔhane anwo la!

2. Duzu a maanle Gyemise anye liele ɔ diema kpanyinli ne anwo a?

² Ɛnee ninyɛne dɔɔnwo wɔ ɛkɛ ne mɔɔ ɔbamaa Gyemise anye alie ɔ diema kpanyinli ne anwo a. (Mat. 13:55) Kɛ neazo la, ɛnee Gyisɛse ze Ngɛlɛlera ne anu kpalɛ na mɔɔ ɔlile ɛvolɛ 12 la kilehilevolɛma mɔɔ ɛnee wɔ Gyɛlusalɛm la anye liele ɔ nwo kpalɛ. (Luku 2:46, 47) Ɔbayɛ kɛ Gyemise nee Gyisɛse yɛle kapenta gyima. Saa ɔle zɔ a, ɔkile kɛ ɛnee ɔze ɔ diema ne kpalɛ. Ɛnee Nathan H. Knorr ta ka kɛ: “Saa ɛ nee awie yɛ gyima a ɛnwu ye kpalɛ.” * Eza ɔbayɛ kɛ Gyemise nwunle kɛzi “Gyisɛse hɔle zo nyianle nrɛlɛbɛ, ɔnyinle na ɔnyianle Nyamenle nee menli nyunlu ɛlolɛ” la. (Luku 2:52) Ɛhye ati, bie a yɛ adwenle bayɛ yɛ kɛ ɛnee Gyemise boka Gyisɛse ɛdoavolɛma mɔɔ limoa la anwo. Noko ɔnle zɔ.

3. Mɔɔ Gyisɛse bɔle ye ɛzonlenlɛ gyima ne abo la kɛzi Gyemise yɛle ye nyɛleɛ ɛ?

³ Mɔɔ Gyisɛse ɛlɛyɛ ye ɛzonlenlɛ gyima ne wɔ azɛlɛ ye azo la,  Gyemise anyɛ ye ɛdoavolɛ. (Dwɔn 7:3-5) Ɔbayɛ kɛ ɛnee Gyemise boka Gyisɛse mbusuafoɔ mɔɔ hanle kɛ “yezɛ” la anwo. (Maake 3:21) Na debie biala ɛngile kɛ ɛnee Gyemise wɔ bɛ mame Mɛle anwo ɛkɛ wɔ mekɛ mɔɔ bɛlɛku Gyisɛse wɔ amaneɛnwunlɛ baka ne azo la.​—Dwɔn 19:25-27.

4. Duzu a yɛbazuzu nwo a?

⁴ Nzinlii, Gyemise nyianle diedi wɔ Gyisɛse anu na ɔrayɛle asafo nu kpanyinli mɔɔ bɛbu ye kpalɛ a. Wɔ edwɛkɛ ɛhye anu, yɛbazuzu ninyɛne nwiɔ mɔɔ yɛbahola yɛazukoa yɛavi Gyemise ɛkɛ la anwo: (1) deɛmɔti ɔwɔ kɛ yɛbɛlɛ yɛ nwo aze yɛɛ (2) kɛ ɔkɛyɛ na yɛayɛ kilehilevolɛma kpalɛ la.

5. Mɔɔ bɛdwazole Gyisɛse na ɔyele ɔ nwo ɔhilele Gyemise la, duzu a Gyemise yɛle a?

⁵ Mekɛ boni a Gyemise rayɛle Gyisɛse ɛdoavolɛ mɔɔ ɔdi nɔhalɛ a? Mɔɔ bɛdwazole Gyisɛse la, “ɔyele ɔ nwo ɔhilele Gyemise, yɛɛ akee ɛzoanvolɛma ne amuala.” (1 Kɔl. 15:7) Mɔɔ Gyemise yiale Gyisɛse la, ɔhakyile ye ɛbɛlabɔlɛ bɔkɔɔ. Mɔɔ ɛnee ɛzoanvolɛma ne wɔ ɛbolɔnsam bie azo wɔ Gyɛlusalɛm ɛlɛkendɛ sunsum nwuanzanwuanza ne mɔɔ bɛbɔ nwolɛ ɛwɔkɛ la, ɛnee Gyemise boka bɛ nwo. (Gyi. 1:13, 14) Nzinlii, Gyemise nyianle nwolɛ adenle rabokale ɛvoya mɔɔ limoa la neazo eku ne anwo. (Gyi. 15:6, 13-22; Gal. 2:9) Na kolaa na 62 Y.M. adwu la, sunsum ne hanle ye maanle ɔhɛlɛle kɛlata ɔhɔmaanle Kilisienema mɔɔ bɛkpokpa bɛ la. Kɛlata zɔhane boa yɛ muala ɛnɛ, kɛ yɛbahɔ anwuma anzɛɛ yɛbadɛnla azɛlɛ ye azo. (Gye. 1:1) Ɛvoya mɔɔ limoa tetedwɛkɛ kɛlɛvolɛ Josephus hanle kɛ Dwuuma Ɛsɔfo Kpanyinli Anas ara Ananayase a maanle bɛhunle Gyemise a. Gyemise hɔle zo lile nɔhalɛ maanle Gyihova hɔkpulale kɛ ɔwiele ye azɛlɛ ye azo gyimalilɛ la.

6. Kɛzi ɛnee Gyemise le ngakyile fi ye mekɛ zo ɛzonlenlɛ nu mgbanyima ne mɔ anwo ɛ?

⁶ Ɛnee Gyemise bɛlɛ ɔ nwo aze. Duzu ati a yɛkola yɛka ye zɔ a? Suzu ngakyile mɔɔ wɔ kɛzi Gyemise yɛle ye nyɛleɛ wɔ Gyisɛse anwo nzinlii nee kɛzi ɛzonlenlɛ nu mgbanyima dɔɔnwo yɛle bɛ nyɛleɛ anu la anwo. Mɔɔ Gyemise nwunle daselɛ wienyi mɔɔ kile kɛ Gyisɛse le Nyamenle Ara la, ɔbɛlɛle ɔ nwo aze ɔliele ɔdole nu. Noko ɛsɔfo mgbanyinli mɔɔ bɛwɔ Gyɛlusalɛm la anyɛ zɔ. Kɛ neazo la, ɛnee bɛze ye wienyi kɛ Gyisɛse dwazole Lazalɛse. Kɛ anrɛɛ bɛbalie bɛali kɛ Gyisɛse gyi Gyihova agyakɛ anu la, bɛbɔle mɔdenle kɛ bɛku Gyisɛse nee Lazalɛse. (Dwɔn 11: 53; 12:9-11) Nzinlii mɔɔ bɛdwazole Gyisɛse mumua ne la, bɛbɔle mɔdenle kɛ bɛnrɛmaa menli ɛnrɛde zɔhane edwɛkɛ ne. (Mat. 28:11-15) Anwomemaazo maanle zɔhane ɛzonlenlɛ nu mgbanyima ne mɔ kpole Mɛzaya ne.

7. Duzu ati a ɔnle kɛ yɛmemaa yɛ nwo zo a?

⁷ Mɔɔ yɛsukoa yɛfi nu la: Mmamemaa ɛ nwo zo, nyia ɛhulolɛ kɛ ɛbamaa bɛahilehile wɔ. Kɛ mɔɔ ewule bie kola maa ɔyɛ se kɛ awie ahonle bayɛ gyima kpalɛ la, zɔhane ala a anwomemaazo kola maa ɔyɛ se kɛ yɛbadie Gyihova adehilelɛ a. Falasiima ne kpunlinle bɛ ahonle kpole ɔti yeammaa bɛannwu daselɛ wienyi mɔɔ Nyamenle luale ye sunsum ne azo lale ye ali hilele bɛ la. (Dwɔn 12:37-40) Zɔhane mɔɔ bɛyɛle la yɛle esiane kpole maanle bɛ ɔluakɛ yeammaa bɛannyia dahuu ngoane nwo anyelazo. (Mat. 23:13, 33) Ɔhyia kpalɛ kɛ yɛbamaa Nyamenle Edwɛkɛ ne nee ye sunsum ne ahakyi yɛ subane na yeaha yɛ nzuzulɛ nee yɛ kpɔkɛzilɛ! (Gye. 3:17) Kɛ mɔɔ ɛnee Gyemise bɛlɛ ɔ nwo aze la ati ɔmaanle adenle ɔmaanle Gyihova hilehilele ye. Na kɛ mɔɔ yɛbanwu ye la, ye mɛlɛbɛnwoaze ne ati a ɔholale ɔyɛle kilehilevolɛ kpalɛ a.

8. Duzu a baboa yɛ yeamaa yɛayɛ kilehilevolɛma kpalɛ a?

⁸ Gyemise angɔ sukulu andwu moa. Ye mekɛ zo ɛzonlenlɛ nu mgbanyima ne mɔ bule ye kɛ mɔɔ ɛnee bɛbu ɛzoanvolɛ Pita nee Dwɔn la​—kɛ “bɛnze nwoma yɛɛ bɛnlɛ dibilɛ.” (Gyi. 4:13) Noko saa yɛkenga Baebolo buluku mɔɔ ye duma la zo la a, yɛnwu kɛ ɔbɔle mɔdenle ɔyɛle kilehilevolɛ kpalɛ. Bie a yɛdayɛ noko yɛangɔ sukulu yɛandwu moa kɛ Gyemise la. Noko ɔlua Gyihova sunsum ne moalɛ nee ndetelɛ mɔɔ yɛnyia yɛfi ye ahyehyɛdeɛ ne ɛkɛ la azo, yɛdayɛ noko yɛbahola yɛayɛ kilehilevolɛma kpalɛ. Maa yɛzuzu neazo mɔɔ Gyemise yɛle kɛ kilehilevolɛ nee mɔɔ yɛbahola yɛazukoa yɛavi nu la anwo.

9. Kɛzi ɛnee Gyemise ngilehilelɛ ne de ɛ?

⁹ Gyemise anva edwɛkɛ agbɔkɛ mgbole anzɛɛ ngilenu mɔɔ le kpomgbondee la yeanli gyima. Ɛhye ati, ɛnee ye tievolɛma ze mɔɔ ɔwɔ kɛ bɛyɛ nee kɛzi bɛbayɛ ye la. Kɛ neazo la, suzu adenle sikalɛ mɔɔ Gyemise luale zo hilehilele Kilisienema kɛ ɔwɔ kɛ bɛnyia ɛhulolɛ kɛ bɛbagyinla nzisi nloa mɔɔ bɛnva nwolɛ ɛya la anwo. Ɔhɛlɛle kɛ: “Yɛbu bɛdabɛ mɔɔ bɛgyinlanle kpundii  wɔ sɔnea nloa la anyelielɛma. Bɛde Dwobu kpundiigyinlanlɛ ne anwo edwɛkɛ yɛɛ bɛnwu mɔɔ Gyihova maanle ɔvile nu ɔrale la, kɛ Gyihova lɛ ahunluyelɛyelalɛ yɛɛ ɔse anwunvɔne.” (Gye. 5:11) Yɛ ye nzonlɛ kɛ Gyemise maanle ye edwɛkɛ ne gyinlanle Ngɛlɛlera ne azo. Ɔvale Nyamenle Edwɛkɛ ne ɔboale ye tievolɛma ɔmaanle bɛnwunle kɛ Gyihova yila bɛdabɛ mɔɔ bɛdi nɔhalɛ bɛmaa Ye kɛ Dwobu la dahuu. Gyemise vale edwɛkɛ agbɔkɛ nee ngilenu mɔɔ ɔ bo ɛdelɛ ɛnyɛ se la lile gyima hilehilele bɛ ɛzukoalɛdeɛ ɛhye. Ɛhye maanle ɔhwenle bɛ adwenle ɔziele Gyihova anwo zo na tɛ ɔdaye mumua ne.

10. Adenle ko mɔɔ yɛbalua zo yɛazukoa Gyemise wɔ yɛ ngilehilelɛ nu la a le boni?

¹⁰ Mɔɔ yɛsukoa yɛfi nu la: Mmamaa wɔ edwɛkɛ yɛ kpomgbondee, fa Nyamenle Edwɛkɛ ne kilehile. Tɛ yɛ bodane a le kɛ yɛmaa menli anwu ninyɛne dɔɔnwo mɔɔ yɛze la, emomu yɛmaa bɛanwu ninyɛne mɔɔ Gyihova ze ye nee kɛzi ɔdwenle bɛ nwo kpalɛ la. (Wlo. 11:33) Saa yɛmaa yɛ edwɛkɛ gyinla Ngɛlɛlera ne azo dahuu a, yɛbahola yɛadwu bodane zɔhane anwo. Kɛ neazo la, ɔnle kɛ yɛka yɛkile yɛ Baebolo sukoavoma kɛ yɛdayɛ a anrɛɛ yɛbayɛ ye zɛhae, emomu ɔwɔ kɛ yɛboa bɛ yɛmaa bɛsuzu Baebolo ngyinlazo nwo bɛnwu Gyihova adwenle nee kɛzi ɔte nganeɛ wɔ deɛ ne anwo la. Yemɔ bamaa bɛanyia ɛhulolɛ kɛ bɛyɛ mɔɔ sɔ Gyihova anye la na tɛ mɔɔ sɔ yɛ nye la.

11. Duzu ngyegyelɛ a ɛnee Kilisienema bie mɔ ɛlɛyia wɔ Gyemise mekɛ zo a, na folɛ boni a ɔdule bɛ a? (Gyemise 5:13-15)

¹¹ Gyemise ambu ɔ nye angua ninyɛne zo. Yɛnwu ye wɔ Gyemise kɛlata ne anu kɛ ɛnee ɔze ngyegyelɛ mɔɔ ɔ mediema diedima ɛlɛyia la, na ɔvale adehilelɛ mɔɔ nuhua la ɛkɛ mɔɔ ɔbaboa bɛ yeamaa bɛali zolɛ la ɔmaanle bɛ. Kɛ neazo la, ɛnee Kilisienema bie mɔ ɛnva folɛdulɛ ɛnli gyima ndɛndɛ. (Gye. 1:22) Ɛnee bie mɔ bu azukoavolɛ tɛla ehyianvolɛma. (Gye. 2:1-3) Yɛɛ ɛnee ɔnla aze ɔmmaa bie mɔ kɛ bɛbahomo bɛ nwo zo wɔ bɛ ɛdendɛlɛ nu. (Gye. 3:8-10) Ɛnee zɔhane Kilisienema ne lɛ ngyegyelɛ kpole, noko ɛnee Gyemise lɛ bɛ nuhua diedi kɛ bɛbahakyi. Gyemise lale atiakunlukɛnlɛma ali, noko ɔhanle ye edwɛkɛ ne fɔɔnwo yɛɛ ɔhanle ɔhilele bɛdabɛ mɔɔ bɛhyia sunsum nu moalɛ la kɛ bɛmaa asafo nu mgbanyima ne mɔ ɛboa bɛ.​—Kenga Gyemise 5:13-15.

12. Saa yɛlɛboa yɛ Baebolo sukoavoma a, kɛ ɔkɛyɛ na yɛanyia bɛ nwo adwenle kpalɛ ɛ?

¹² Mɔɔ yɛsukoa yɛfi nu la: Mmabu ɛ nye ɛgua ninyɛne zo, noko nyia awie mɔ anwo adwenle kpalɛ. Bie a ɔbayɛ se yeamaa menli dɔɔnwo mɔɔ bɛlɛsukoa Baebolo ne la kɛ bɛbava folɛdulɛ mɔɔ wɔ nu la bɛali gyima. (Gye. 4:1-4) Bie a ɔbalie mekɛ na bɛagyakyi subane ɛtane bie mɔ na bɛanyia subane kpalɛ. Kɛ mɔɔ Gyemise yɛle la, ɔwɔ kɛ yɛnyia akɛnrasesebɛ yɛka ninyɛne mɔɔ ɔwɔ kɛ yɛ Baebolo sukoavoma nyia anyuhɔlɛ wɔ nu la anwo edwɛkɛ yɛkile bɛ. Eza ɔwɔ kɛ yɛkɔ zo yɛnyia adwenle kpalɛ na yɛnyia anwodozo kɛ Gyihova bahwe bɛlɛvoma ara ɔ nwo na yeamaa bɛ anwosesebɛ yeamaa bɛayɛ nzenzaleɛ wɔ bɛ ɛbɛlabɔlɛ nu.​—Gye. 4:10.

13. Kɛ mɔɔ Gyemise 3:2 kile la, duzu a Gyemise nwunle ye a?

¹³ Gyemise nyianle ɔ nwo adwenle mɔɔ fɛta. Gyemise ande nganeɛ kɛ, ɔlua abusua mɔɔ ɔvi nu anzɛɛ gyimalilɛ mɔɔ ɔnyianle la ati, ɔ nwo hyia anzɛɛ ɔle kpalɛ ɔtɛla ɔ mediema mɔɔ ɛha mɔɔ bɛwɔ asafo ne anu la. Ɔvɛlɛle ɔ gɔnwo mɔ Kilisienema kɛ “me mediema alɔvolɛ.” (Gye. 1:16, 19; 2:5) Yeammaa menli annyia adwenle kɛ ɔdi munli. Emomu, mekɛ mɔɔ ɔka edwɛkɛ ɛhye la, ɔvale ɔ nwo ɔbokale nwo, ɔse: “Yɛ muala yɛfo fane dɔɔnwo.”​—Kenga Gyemise 3:2.

14. Duzu ati a ɔwɔ kɛ yɛnyia ɛhulolɛ kɛ yɛbalie yɛ nvonleɛ yɛado nu a?

 ¹⁴ Mɔɔ yɛsukoa yɛfi nu la: Kakye kɛ yɛ muala yɛle ɛtanevolɛma. Ɔnle kɛ yɛnyia adwenle kɛ yɛtɛla bɛdabɛ mɔɔ yɛkilehile bɛ la wɔ adenle bie azo. Duzu ati ɔ? Saa yɛmaa yɛ Baebolo sukoavo nyia adwenle kɛ nvonleɛ ɛnle yɛ nwo a, bie a ɔbaha kɛ ɔnrɛhola ɔnrɛyɛ mɔɔ Nyamenle kpondɛ la ɛlɛ. Noko saa yɛdie yɛto nu bɔkɔɔ kɛ, tɛ mekɛ ne amuala a ɛnee ɔla aze kɛ yɛbali Baebolo nu ngyinlazo zo na yɛkile kɛzi Gyihova ɛboa yɛ yemaa yɛli zɔhane ngyegyelɛ ne mɔ azo la a, ɔbaboa yɛ sukoavo ne yeamaa yeanwu kɛ ɔdaye noko ɔbahola yeazonle Gyihova.

15. Ka ndonwo mɔɔ Gyemise vale lile gyima la anwo edwɛkɛ ekyi. (Gyemise 3:2-6, 10-12)

¹⁵ Gyemise vale ndonwo mɔɔ ka ahonle la lile gyima. Ɔle nɔhalɛ kɛ sunsum nwuanzanwuanza ne boale ye, noko eza ɔbayɛ kɛ ɔzukoale kɛzi bɛkilehile kpalɛ la ɔvile ndonwo mɔɔ ɔ diema kpanyinli Gyisɛse vale lile gyima la anu. Ndonwo mɔɔ Gyemise vale lile gyima wɔ ye kɛlata ne anu la abo ɛdelɛ ɛnyɛ se, yɛɛ ɛzukoalɛdeɛ ne anu la ɛkɛ.​—Kenga Gyemise 3:2-6, 10-12.

16. Duzu ati a ɔwɔ kɛ yɛfa ndonwo mɔɔ ka ahonle la yɛdi gyima a?

¹⁶ Mɔɔ yɛsukoa yɛfi nu la: Fa ndonwo mɔɔ ka ahonle la di gyima. Saa yɛfa ndonwo mɔɔ ka ahonle la yɛdi gyima a, menli ɛnde mɔɔ yɛlɛka la ala, eza ɔmaa bɛpɛ nwolɛ nvoninli. Ɛhye boa wɔ tievolɛma ɔmaa bɛkakye Baebolo nu nɔhalɛ titili bie mɔ. Ɛnee Gyisɛse ɛbe wɔ kɛzi bɛfa ndonwo kpalɛ bɛdi gyima la anu, na ɔ diema Gyemise zukoale ye neazo ne. Maa yɛzuzu Gyemise ndonwo ne mɔ ko anwo na yɛnlea deɛmɔti ɔka ahonle kpalɛ la.

17. Duzu ati a ndonwo mɔɔ wɔ Gyemise 1:22-25 la ka ahonle kpalɛ a?

¹⁷ Kenga Gyemise 1:22-25. Gyemise neanleɛ nwo ndonwo ne ka ahonle wɔ ndenle dɔɔnwo azo. Ɛnee ɔlɛkilehile ɛzukoalɛdeɛ fɔɔnwo bie, yemɔ a le kɛ, saa yɛbanyia Nyamenle Edwɛkɛ ne azo nvasoɛ a, ɔnle kɛ yɛkenga ala; emomu ɔwɔ kɛ yɛfa yɛyɛ gyima. Gyemise vale ndonwo mɔɔ ye tievolɛma bahola anwu ye ndɛndɛ la a lile gyima a​—awie mɔɔ ɔlɛnea ɔ nwo wɔ neanleɛ nu la. Ɛzukoalɛdeɛ boni a ɛnee ɔlɛkilehile a? Saa awie nea ɔ nyunlu wɔ neanleɛ nu na ɔnwu debie mɔɔ ɛnle kpalɛ mɔɔ ɔwɔ kɛ ɔyɛ ye boɛ na yeanyɛ a, nrɛlɛbɛ biala  ɛnle nu. Zɔhane ala a saa yɛkenga Nyamenle Edwɛkɛ ne na yɛnwu yɛ subane bie mɔɔ ɔwɔ kɛ yɛkakyi ye la na yɛanyɛ nwolɛ ɛhwee a, nrɛlɛbɛ biala ɛnle nu a.

18. Saa yɛlɛfa ndonwo yɛali gyima a, ninyɛne nsa boni a ɔwɔ kɛ yɛyɛ a?

¹⁸ Saa ɛlɛfa ndonwo wɔali gyima a, ɛbahola wɔazukoa Gyemise neazo ne na wɔayɛ ninyɛne nsa ɛhye mɔ: (1) Nea kɛ ndonwo ne fɛta edwɛkɛ titili mɔɔ ɛlɛkilehile nu la. (2) Fa ndonwo mɔɔ wɔ tievolɛma bade ɔ bo ndɛndɛ la di gyima. (3) Maa ɛzukoalɛdeɛ mɔɔ wɔ ndonwo ne anu la anu ɛla ɛkɛ kpalɛ. Saa ɔyɛ se ɔmaa wɔ kɛ ɛbanyia ndonwo mɔɔ fɛta la a, kpondɛ bie wɔ Watch Tower Publications Index ne anu. Wɔ edwɛkɛtile “Illustrations” abo, ɛbanwu neazo dɔɔnwo mɔɔ ɛbahola wɔava wɔali gyima a. Noko kakye kɛ, kɛ mɔɔ maekulofonu maa awie ane finde kpole la, zɔhane ala a ndonwo maa edwɛkɛ titili mɔɔ yɛlɛkilehile la da ali wienyi a. Ɔti yɛ edwɛkɛ titili mɔɔ ɛkulo kɛ ɔda ali la ala anwo ndonwo. Nɔhalɛ nu, tɛ debie titili mɔɔ ɔti yɛkulo kɛ yɛnyia anyuhɔlɛ wɔ yɛ ngilehilelɛ nu la a le kɛ yɛtwe menli adwenle yɛara yɛ nwo zo, emomu yɛkulo kɛ yɛboa menli dɔɔnwo yɛmaa bɛbaboka Gyihova abusua ne mɔɔ bɛ nye die la anwo.

19. Kɛ ɔkɛyɛ na yɛahile kɛ yɛ nye die yɛ sunsum nu abusua ne anwo ɛ?

¹⁹ Yɛmɛ, yɛnlɛ yɛ diema kpanyinli mɔɔ ɔdi munli a, noko yɛnyia nwolɛ adenle yɛ nee sunsum nu abusua kpole ɛlɛbɔ nu azonle Gyihova. Yɛ nee bɛ tu, yɛsukoa ninyɛne yɛfi bɛ ɛkɛ, yɛɛ yɛfa nɔhalɛlilɛ yɛ nee bɛ bɔ nu yɛ edwɛkɛhanlɛ nee ngilehilelɛ gyima ne yɛfa yɛkile kɛ yɛkulo bɛ. Saa yɛbɔ mɔdenle yɛsukoa Gyemise neazo ne na yɛda ye ali wɔ yɛ subane, yɛ nyɛleɛ nee yɛ ngilehilelɛ nu a, ɔwula Gyihova anyunlunyia yɛɛ ɔboa ahonlekpalɛma ɔmaa bɛtwe bɛbikye yɛ anwuma Selɛ ne mɔɔ lɛ ɛlɔlɛ la.