1-2. (a) Saa yɛdwenledwenle Gyisɛse ɛbɛlabɔlɛ nee ye ɛzonlenlɛ gyima ne anwo a, wɔannea a kɛzi ɔbaha yɛ ɛ? (b) Duzu a yɛbazuzu nwo wɔ edwɛkɛ ɛhye anu a?

 SAA yɛ kulovolɛ bie wu a, yɛ nwo dɔ ye kpalɛ! Saa yɛdwenle mɔɔ sisile kolaa na yeawu la anwo, titili saa ɔnwunle amaneɛ dɔɔnwo a, bie a yɛbali nyane kpole. Noko saa nzinlii, yɛdwenle debie bie mɔɔ ɔhilehilele yɛ anzɛɛ debie bie mɔɔ ɔyɛle anzɛɛ ɔhanle ɔvale ɔmaanle yɛ anwosesebɛ anzɛɛ ɔmaanle yɛzelele la anwo a, ɛnee eza yɛ nye ɛbɔ ɔ bo kɛ ɔdie.

² Zɔhane ala a saa yɛkenga Gyisɛse amaneɛnwunlɛ nee ye ewule ne anwo edwɛkɛ a ɔmaa yɛdi nyane a. Wɔ Ngakyelɛlilɛ mekɛ ne anu, yɛdie mekɛ yɛdwenledwenle nvasoɛ mɔɔ wɔ Gyisɛse ɛkpɔnelɛ afɔlebɔlɛ ne azo la anwo. (1 Kɔl. 11:24, 25) Noko saa yɛdwenledwenle mɔɔ Gyisɛse hanle nee mɔɔ ɔyɛle wɔ mekɛ mɔɔ ɔwɔ azɛlɛ ye azo la anwo a, ɔmaa yɛ nye die kpole. Eza saa yɛdwenledwenle ninyɛne mɔɔ Gyisɛse ɛlɛyɛ ye kɛkala nee mɔɔ ɔbayɛ yeamaa yɛ kenle bie la anwo a, ɔmaa yɛ anwosesebɛ. Yɛdwenledwenle ninyɛne ɛhye mɔ nee ɛlɔlɛ mɔɔ ɔlɛ ɔmaa yɛ la anwo a, ɔbahola yeaha yɛ yeamaa yɛayɛ ninyɛne bie mɔ mɔɔ kile kɛ yɛ nye sɔ mɔɔ yeyɛ yemaa yɛ la, kɛ mɔɔ yɛbanwu ye wɔ edwɛkɛ ɛhye anu la.

3. Ninyɛne boni mɔ ati a ɔwɔ kɛ yɛkile ɛkpɔnedeɛ ne anwo anyezɔlɛ a?

³ Saa yɛdwenledwenle Gyisɛse ɛbɛlabɔlɛ nee ye ewule ne anwo a, ɔmaa yɛ nye die kpalɛ. Gyisɛse hanle nyilalɛ mɔɔ  Nyamenle Belemgbunlililɛ ne bava ara la anwo edwɛkɛ hilele menli wɔ ye ɛzonlenlɛ gyima ne amuala anu. Yɛ nye die Belemgbunlililɛ ne anwo nɔhalɛ edwɛkɛ ɛhye mɔ anwo kpalɛ. Yɛ nye sɔ ɛkpɔnedeɛ ne ɔluakɛ yebuke nwolɛ adenle yemaa yɛ nee Gyihova nee Gyisɛse ɛnyia agɔnwolɛvalɛ kpalɛ. Bɛdabɛ mɔɔ bɛda ye ali kɛ bɛlɛ Gyisɛse anu diedi la eza lɛ anyelazo kɛ bɛbadɛnla aze dahuu na bɛanwu bɛ alɔvolɛ mɔɔ ɛwu la bieko. (Dwɔn 5:28, 29; Wlo. 6:23) Yɛtɛyɛle debie biala mɔɔ ɔti ɔwɔ kɛ yɛ sa ka nyilalɛ ɛhye mɔ a; yɛɛ yɛnrɛhola yɛnrɛdua mɔɔ Nyamenle nee Kelaese ɛyɛ ɛmaa yɛ la anwo kakɛ ɛlɛ. (Wlo. 5:8, 20, 21) Noko yɛbahola yɛamaa bɛanwu kɛ yɛ nye sɔ mɔɔ bɛyɛ bɛmaa yɛ la kpalɛ. Adenle boni azo?

4. Kɛzi Mɛle Magedalene hilele kɛ ɔ nye sɔ mɔɔ Gyisɛse ɛyɛ ɛmaa ye la ɛ? (Nea nvoninli ne.)

⁴ Suzu Dwuunli raalɛ bie mɔɔ bɛfɛlɛ ye Mɛle Magedalene la neazo ne anwo. Ɛnee ɔwɔ tɛnlabelɛ mɔɔ ɛnle kpalɛ fee la anu ɔluakɛ ɛnee sunsum ɛtane nsuu ɛlɛgyegye ye. Bie a ɛnee ɔte nganeɛ kɛ awie biala ɛnrɛhola ɛnrɛboa ye. Ɔti nea kɛzi ɔ nye balie wɔ mekɛ mɔɔ Gyisɛse dule zɔhane sunsum ɛtane ne mɔ vile ɔ nwo la! Mɔɔ Gyisɛse yɛle la hanle ye maanle ɔyɛle ye ɛdoavolɛ na ɔvale ye mekɛ, ye anwosesebɛ nee ninyɛne mɔɔ ɔlɛ la ɔboale ye wɔ ye ɛzonlenlɛ gyima ne anu. (Luku 8:1-3) Mɛle anye liele mɔɔ Gyisɛse yɛle maanle ye la anwo kpole ɛdeɛ, noko bie a ɛnee ɔnze kɛ bɔ zo mɔɔ Gyisɛse bamaa ye ahyɛlɛdeɛ kpole kpalɛ a. Ɔbava ye ngoane yeado ɛkɛ yeamaa alesama, “amaa awie biala mɔɔ kɛla ye ali kɛ ɔlɛ diedi wɔ ye nu la” anyia dahuu ngoane. (Dwɔn 3:16) Noko Mɛle hɔle zo lile nɔhalɛ maanle Gyisɛse vale hilele kɛ ɔ nye sɔ mɔɔ yeyɛ yemaa ye la. Mɔɔ Gyisɛse ɛlɛte nyane wɔ amaneɛnwunlɛ baka ne azo la, ɛnee Mɛle gyi ɔ nwo ɛkɛ ɔluakɛ ɛnee ɔdwenle Gyisɛse anwo yɛɛ ɔkulo kɛ ɔkyekye bɛdabɛ mɔɔ bɛwɔ ɛkɛ la arɛle. (Dwɔn 19:25) Mɔɔ Gyisɛse wule la, Mɛle nee mraalɛ gyɛne nwiɔ vale ayilevuanlɛ rale kɛ bɛfa bɛakpokpa ye funli ne. (Maake 16:1, 2) Mɛle nyianle  ye nɔhalɛlilɛ ne anwo ahatualɛ kpole. Ɔyiale Gyisɛse mɔɔ bɛdwazo ye la na ɔ nee ye dendɛle​—ɔle nwolɛ adenle mɔɔ ɛdoavolɛma ne dɔɔnwo annyia ye a.​—Dwɔn 20:11-18.

5. Kɛ ɔkɛyɛ na yɛahile mɔɔ Gyihova nee Gyisɛse ɛyɛ ɛmaa yɛ la amuala anwo anyezɔlɛ ɛ?

⁵ Yɛdayɛ noko yɛbahola yɛava yɛ mekɛ, yɛ anwosesebɛ, nee nwonane afoa nu ninyɛne mɔɔ yɛlɛ la yɛaboa Belemgbunlililɛ gyima ne yɛava yɛahile kɛ yɛ nye sɔ mɔɔ Gyihova nee Gyisɛse ɛyɛ ɛmaa yɛ la amuala. Kɛ neazo la, yɛbahola yɛadu yɛ nwo yɛamaa yɛaboa yɛamaa bɛasisi azua mɔɔ bɛfa bɛdi gyima wɔ nɔhalɛ ɛzonlenlɛ nu la na yɛaboa yɛamaa bɛanlea zolɛ boɛ.

6. Duzu ati a yɛkola yɛka kɛ ɛkpɔnedeɛ ne le ahyɛlɛdeɛ maa yɛ nuhua ko biala a?

⁶ Saa yɛsuzu kɛzi Gyihova nee Gyisɛse kulo yɛ kpole la anwo a, ɔka yɛ ɔmaa yɛdayɛ noko yɛkulo bɛ. (1 Dwɔn 4:10, 19) Saa yɛnwu kɛ Gyisɛse wule maanle yɛdayɛ mumua ne a, ɔmaa yɛkulo bɛ kpole kpalɛ. Ɛzoanvolɛ Pɔɔlo nwunle ɛhye, na mɔɔ ɔkɛlɛ ye anyezɔlɛ ne anwo edwɛkɛ yeahɔmaa Galeehyeama la, ɔhanle kɛ: “Nyamenle Ara ne . . . hulole me na ɔvale ɔ nwo ɔmaanle me.” (Gal. 2:20) Ɔlua ɛkpɔnedeɛ ne ati, Gyihova ɛhwe wɔ ɛra ɔ nwo amaa wɔahola wɔayɛ ɔ gɔnwo. (Dwɔn 6:44) Kɛmɔ wɔnwu ye kɛ Gyihova ɛnwu debie kpalɛ bie wɔ wɔ nu yɛɛ yedua kakɛ kpole amaa wɔahola wɔayɛ ɔ gɔnwo la ati, asoo ɔmmaa ɛ nye ɛnlie ɔ? Ɔmmaa ɛlɔlɛ mɔɔ ɛlɛ ɛmaa Gyihova nee Gyisɛse la ɛnyɛ kpole ɔ? Ɔle kpalɛ kɛ yɛbabiza yɛ nwo kɛ, ‘Duzu a ɛlɔlɛ zɔhane baha me yeamaa meayɛ a?’

7. Kɛ mɔɔ yɛnwu ye wɔ nvoninli ne anu la, kɛ ɔkɛyɛ na yɛ muala yɛahile kɛ yɛkulo Gyihova nee Gyisɛse ɛ? (2 Kɔlentema 5:14, 15; 6:1, 2)

⁷ Ɛlɔlɛ mɔɔ yɛlɛ yɛmaa Nyamenle nee Kelaese la ka yɛ ɔmaa yɛkulo awie mɔ. (Kenga  2 Kɔlentema 5:14, 15; 6:1, 2.) Adenle ko mɔɔ yɛdua zo yɛkile kɛ yɛlɛ ɛlɔlɛ la a le kɛ yɛbabɔ mɔdenle wɔ daselɛlilɛ gyima ne anu. Yɛdi awie biala mɔɔ yɛyia ye la daselɛ. Yɛnyɛ nyeyenu, yɛngyinla kɛzi awie anwo nane de, ye abusua, ye ezukoa gyinlabelɛ anzɛɛ dibilɛ mɔɔ ɔlɛ ye wɔ ewiade ne anu la azo na yɛali ye daselɛ. Wɔ adenle ɛhye azo, ɛnee yɛlɛbɔ yɛ ɛbɛla yɛamaa ɔ nee Gyihova bodane mɔɔ yemɔ a le kɛ ‘ɔdie menli ngakyile kɔsɔɔti na bɛanyia nɔhalɛ ne anwo nɔhalɛ ndelebɛbo’ la ayia.​—1 Tim. 2:4.

8. Kɛ ɔkɛyɛ na yɛala ɛlɔlɛ ali yɛahile yɛ mediema ɛ?

⁸ Eza saa yɛda ɛlɔlɛ ali yɛkile yɛ mediema a, ɛnee yɛlɛkile kɛ yɛkulo Nyamenle nee Kelaese. (1 Dwɔn 4:21) Yɛmaa bɛnwu kɛ yɛdwenle bɛ nwo kpalɛ na yɛboa bɛ wɔ mekɛ mɔɔ bɛlɛyia sɔnea ngakyile la. Saa bɛ kulovolɛ bie wu a, yɛkyekye bɛ rɛle, bɛnde kpɔkɛ a yɛkɔkpɔla bɛ, yɛɛ yɛbɔ mɔdenle yɛmaa bɛ anwosesebɛ wɔ mekɛ mɔɔ bɛ sa nu bado la. (2 Kɔl. 1:3-7; 1 Tɛs. 5:11, 14) Yɛkɔ zo yɛyɛ asɔne yɛmaa bɛ ɔluakɛ yɛze kɛ “tumi kpole wɔ tenlenenli modolɛ nzɛlɛlɛ nu.”​—Gye. 5:16.

9. Duzu bieko a yɛyɛ yɛkile kɛ yɛkulo yɛ mediema a?

⁹ Eza saa yɛbɔ mɔdenle yɛ nee yɛ mediema tɛnla anzodwolɛ nu a, ɛnee ɔkile kɛ yɛkulo bɛ. Yɛbɔ mɔdenle yɛsukoa kɛzi Gyihova fa ɛtane kyɛ la. Saa Gyihova nyianle ɛhulolɛ kɛ ɔbamaa ɔ ra ne awu amaa yɛ ɛtane a, ɛnee duzu ati a ɔnle kɛ yɛnyia ɛhulolɛ kɛ saa yɛ mediema yɛ yɛ ɛtane a yɛbava yɛahyɛ bɛ a? Yɛngulo kɛ yɛyɛ kɛ akɛlɛ atisesebɛ ne mɔɔ Gyisɛse hanle ɔ nwo edwɛkɛ wɔ ye ndonwo ne mɔ anu ko anu la. Ɔ menle ne vale kakɛ kpole mɔɔ ɔtua ye la hyɛle ye bɔbɔ ɛdeɛ, noko akɛlɛ zɔhane anva ɔ gɔnwo akɛlɛ kakɛ ekyi mɔɔ ɔtua ye la angyɛ ye. (Mat. 18:23-35) Saa akɛsakɛsa ɛra ɛ nee awie mɔɔ wɔ asafo ne anu la avinli a, asoo ɛbalimoa wɔadudu agyakɛ wɔakpondɛ anzodwolɛ kolaa na wɔahɔ Ngakyelɛlilɛ ne ɔ? (Mat. 5:23, 24) Ɛyɛ ye zɔ a, ɔkile kɛ ɛlɛ Gyihova nee Gyisɛse anwo ɛlɔlɛ kpole.

10-11. Kɛzi mgbanyima bahola ahile kɛ bɛkulo Gyihova nee Gyisɛse ɛ? (1 Pita 5:1, 2)

¹⁰ Kɛzi mgbanyima bahola ahile kɛ bɛkulo Gyihova nee Gyisɛse ɛ? Adenle titili ko mɔɔ bɛbahola bɛalua zo bɛayɛ zɔ la a le kɛ bɛbanlea Gyisɛse mboane ne. (Kenga 1 Pita 5:1, 2.) Gyisɛse maanle ɛzoanvolɛ Pita dele edwɛkɛ ɛhye abo kpalɛ. Mɔɔ Pita kpole Gyisɛse fane nsa la anzi, bie a ɛnee ɔ nye la kɛ ɔbanyia adenle yeahile kɛ ɔkulo Gyisɛse. Mɔɔ bɛdwazole Gyisɛse la, ɔbizale Pita kɛ: “Dwɔn ara Saemɔn, ɛkulo me ɔ?” Yɛbahola yɛalie yɛali kɛ Pita bayɛ biala mɔɔ ɔbahola la yeava yeahile kɛ ɔkulo ɔ Menle ne. Gyisɛse hanle hilele Pita kɛ: “Nea me mboane ngyikyi ne.” (Dwɔn 21:15-17) Na wɔ Pita ɛbɛlabɔlɛ mɔɔ ɛha la amuala anu, ɔvile ɛlɔlɛ nu ɔnleanle Awulae mboane ne ɔvale ɔhilele kɛ ɔkulo Gyisɛse.

¹¹ Mgbanyima, kɛ ɔkɛyɛ na bɛahile kɛ edwɛkɛ mɔɔ Gyisɛse hanle hilele Pita la anwo hyia bɛdabɛ noko wɔ Ngakyelɛlilɛ mekɛ ne anu ɛ? Anrɛɛ bɛda bɛyɛ mboanekpɔlalɛ gyima ne na bɛbɔ mɔdenle kpalɛ kɛ bɛbaboa bɛdabɛ mɔɔ bɛgyakyi Gyihova ɛzonlenlɛ la bɛamaa bɛazia bɛarazonle Gyihova bɛva bɛhile kɛzi bɛkulo Gyihova nee Gyisɛse la. (Yiz. 34:11, 12) Eza bɛbahola bɛamaa Baebolo sukoavoma nee anyelielɛma mɔɔ rale Ngakyelɛlilɛ ne bie la anwosesebɛ. Bɛyɛ biala mɔɔ bɛbahola la bɛlie menli ɛhye mɔ mɔɔ bɛbahola bɛarayɛ Kelaese ɛdoavolɛma la kɛnlɛma.

12. Duzu ati a yɛdwenledwenle mɔɔ Gyisɛse hanle wɔ nɔe ne mɔɔ aleɛ kye a ɔbawu la anwo a ɔbamaa yɛ akɛnrasesebɛ a? (Dwɔn 16:32, 33)

¹² Nɔe ne mɔɔ aleɛ kye a Gyisɛse bawu la, ɔhanle ɔhilele ye ɛdoavolɛma ne kɛ:  “Bɛbanwu amaneɛ dɔɔnwo wɔ ewiade ye anu, noko bɛnyia akɛnrasesebɛ! Meli ewiade ne anwo zo konim.” (Kenga Dwɔn 16:32, 33.) Duzu a boale Gyisɛse ɔmaanle ɔlale akɛnrasesebɛ ali wɔ ye agbɔvolɛ anyunlu na ɔlile nɔhalɛ ɔhɔle ewule nu a? Ɔvale ɔ nwo ɔdole Gyihova anwo zo. Kɛmɔ ɛnee Gyisɛse ze kɛ ye ɛdoavolɛma bayia sɔnea ko ne ala bie la ati, ɔzɛlɛle Gyihova kɛ ɔnlea bɛ nwo zo. (Dwɔn 17:11) Kɛzi ɛhye maa yɛnyia akɛnrasesebɛ ɛ? Ɔluakɛ Gyihova anwo yɛ se tɛla yɛ kpɔvolɛ biala. (1 Dwɔn 4:4) Ɔnwu debie biala. Yɛdie yɛdi bɔkɔɔ kɛ saa yɛfa yɛ nwo yɛto Gyihova anwo zo a, ɔbaboa yɛ yeamaa yɛali yɛ ɛzulolɛ zo na yɛala akɛnrasesebɛ ali.

13. Kɛzi Dwosefi mɔɔ vi Arelematia la lale akɛnrasesebɛ ali ɛ?

¹³ Suzu Dwosefi mɔɔ vi Arelematia la neazo ne anwo. Ɛnee Dwuuma ne bu ye kpalɛ. Ɛnee ɔboka Sanhedelin, Dwuuma kɔɔto kpole ne anwo. Noko mɔɔ Gyisɛse ɛlɛyɛ ye ɛzonlenlɛ gyima ne la, ɛnee Dwosefi ɛnlɛ akɛnrasesebɛ fee. Dwɔn hanle kɛ ɛnee ɔle “Gyisɛse ɛdoavolɛ noko Dwuuma anwo ɛzulolɛ ti yeanye ɔ nyunlu.” (Dwɔn 19:38) Ɛnee Dwosefi anye die Belemgbunlililɛ edwɛkɛ ne anwo ɛdeɛ, noko yeammaa awie mɔ annwu ye kɛ ɔlɛ diedi wɔ Gyisɛse anu. Bie a ɛnee ɔsulo kɛ saa menli nwu kɛ ɔle Gyisɛse ɛdoavolɛ a, bɛnrɛbu ye bieko. Noko Baebolo ne maa yɛnwu kɛ mɔɔ Gyisɛse wule la, akee “ɔnyianle akɛnrasesebɛ ɔhɔle Paelɛte ɛkɛ ɔhɔzɛlɛle Gyisɛse funli ne.” (Maake 15:42, 43) Akee Dwosefi maanle bɛnwunle ye wienyi kɛ ɔle Gyisɛse ɛdoavolɛ.

14. Saa sonla nwo ɛzulolɛ gyegye wɔ a, duzu a ɔwɔ kɛ ɛyɛ a?

¹⁴ Wɔyia sonla nwo ɛzulolɛ ɛlɛ kɛ Dwosefi la ɔ? Saa ɛkɔ sukulu anzɛɛ gyima a, ɔyɛ a ɔyɛ wɔ nyiane kɛ ɛbamaa awie mɔ anwu kɛ ɛle Gyihova Dasevolɛ ɔ? Ɛngulo kɛ ɛyɛ nolobɔlɛnli anzɛɛ ɛmaa bɛsɔne wɔ ɔluakɛ ɛdwenle mɔɔ bie a awie mɔ baha ye wɔ ɛ nwo la anwo ɔ? Mmamaa nganeɛdelɛ ɛhye mɔ maa ɛgyakyi kɛ ɛbayɛ mɔɔ ɛze kɛ ɔle kpalɛ la. Fi wɔ ahonle nu sɛlɛ Gyihova. Ka kile ye kɛ ɔmaa wɔ akɛnrasesebɛ ɔmaa ɛyɛ ye ɛhulolɛdeɛ. Saa ɛnwu kɛzi Gyihova ɛlɛbua wɔ asɔneyɛlɛ ne mɔ la a, ɔbamaa wɔanyia anwosesebɛ nee akɛnrasesebɛ kpole.​—Aye. 41:10, 13.

15. Mɔɔ Gyisɛse yele ɔ nwo hilele ye ɛdoavolɛma ne la, duzu a anyelielɛ ngome maanle bɛyɛle a? (Luku 24:52, 53)

¹⁵ Mɔɔ Gyisɛse wule la, ɛdoavolɛma ne lile nyane kpole. Fa ye kɛ ɛwɔ bɛ tɛnlabelɛ ne anu. Bɛ gɔnwo kpalɛ vile bɛ sa, yɛɛ eza bɛdele  nganeɛ kɛ asɛɛ bɛ anyelazo ɛwie. (Luku 24:17-21) Noko mɔɔ Gyisɛse yele ɔ nwo hilele bɛ la, ɔnyianle mekɛ ɔboale bɛ ɔmaanle bɛdele kɛzi ɔmaanle Baebolo ngapezo rale nu la abo. Eza ɔmaanle bɛ gyima bie mɔɔ hyia la kɛ bɛyɛ. (Luku 24:26, 27, 45-48) Ɔkadwu kenle 40 na Gyisɛse azia ahɔ anwuma la, ɛnee ye ɛdoavolɛma ne nyanelilɛ ne ɛhakyi anyelielɛ kpole. Kɛmɔ bɛnwunle kɛ bɛ Menle ne tɛte aze na yeziezie ɔ nwo kɛ ɔbaboa bɛ yeamaa bɛayɛ bɛ gyima fofolɛ ne la ati, ɔmaanle bɛ nye liele. Bɛ anyelielɛ ne maanle bɛhɔle zo bɛyele Gyihova ayɛlɛ.​—Kenga Luku 24:52, 53; Gyi. 5:42.

16. Kɛ ɔkɛyɛ na yɛazukoa Gyisɛse ɛdoavolɛma ne ɛ?

¹⁶ Kɛ ɔkɛyɛ na yɛazukoa Gyisɛse ɛdoavolɛma ne ɛ? Yɛbahola yɛanyia anyelielɛ wɔ Gyihova ɛzonlenlɛ nu wɔ ɛvolɛ ne amuala anu na tɛ Ngakyelɛlilɛ mekɛ ne ala anu. Ɛhye kile kɛ ɔwɔ kɛ yɛfa Nyamenle Belemgbunlililɛ ne yɛdimoa yɛ ɛbɛlabɔlɛ nu. Kɛ neazo la, menli dɔɔnwo ɛyɛ nzenzaleɛ wɔ mekɛ mɔɔ bɛfa bɛyɛ gyima la anu amaa bɛahola bɛahɔ daselɛlilɛ, debiezukoalɛ na bɛayɛ abusua ɛzonlenlɛ dahuu. Bie mɔ bɔbɔ ɛgyakyi nwonane afoa nu ninyɛne mɔɔ awie mɔ bu ye kɛ nwolɛ hyia la ɛkpondɛlɛ amaa bɛahola bɛava bɛ bɛali gyima dɔɔnwo wɔ asafo ne anu anzɛɛ bɛahola bɛahɔzonle wɔ ɛleka mɔɔ bɛhyia Belemgbunlililɛ nolobɔlɛma dɔɔnwo la. Yɛhyia kpundiigyinlanlɛ amaa yɛahola yɛahɔ zo yɛazonle Gyihova ɛdeɛ, noko Gyihova ɛbɔ yɛ ɛwɔkɛ kɛ saa yɛfa Belemgbunlililɛ ne yɛdimoa yɛ ɛbɛlabɔlɛ nu a, ɔbayila yɛ kpalɛ.​—Mrɛ. 10:22; Mat. 6:32, 33.

17. Duzu a wɔbɔ kpɔkɛ kɛ ɛbayɛ ye wɔ Ngakyelɛlilɛ mekɛ ɛhye anu a? (Nea nvoninli ne.)

¹⁷ Yɛ nye la kɛ yɛbahɔ ngakyelɛlilɛ ne bie wɔ Dwɛkɛ, April 4. Noko mmakendɛ ɛmaa zɔhane mekɛ ne dwu na wɔadwenledwenle Gyisɛse ɛbɛlabɔlɛ nee ye ewule ne yɛɛ ɛlɔlɛ mɔɔ ɔ nee Gyihova ɛla ye ali ɛhile yɛ la anwo. Fa nwolɛ adenle biala mɔɔ ɛbanyia la dwenledwenle ɛhye mɔ anwo wɔ Ngakyelɛlilɛ mekɛ ne amuala anu. Kɛ neazo la, ye mekɛ sie ahane fa kenga edwɛkɛ mɔɔ wɔ ɛlɛka ne mɔɔ ɔ ti ne se “Gyisɛse Dapɛne Mɔɔ Li Amozi Wɔ Azɛlɛ Ye Azo,” mɔɔ wɔ Ewiade Fofolɛ Ngilebɛbo ne Mokanwo B12 la na dwenledwenle nwolɛ. Saa ɛlɛyɛ zɔ a, kpondɛ Baebolo nu edwɛkɛ mɔɔ bamaa anyezɔlɛ, ɛlɔlɛ, akɛnrasesebɛ nee anyelielɛ mɔɔ ɛlɛ la ayɛ kpole la. Akee kpondɛ ndenle fɔɔnwo mɔɔ ɛbahola wɔalua zo wɔala wɔ anyezɔlɛ ali la. Ɛbahola wɔanyia anwodozo kɛ Gyisɛse anye balie biala mɔɔ ɛbayɛ wɔava wɔahakye ye wɔ Ngakyelɛlilɛ mekɛ ɛhye anu la anwo.​—Yek. 2:19.