Bɛtetele bie mɔ wɔ ɛleka mɔɔ mrenyia dɔɔnwo bu mraalɛ kɛ bɛ nwo ɛngyia la. Kɛ neazo la, maangyebakyi zo neavolɛ bie mɔɔ bɛfɛlɛ ye Hans mɔɔ wɔ Bolivia la hanle kɛ: “Bɛtetele mrenyia bie mɔ wɔ amaamuo mɔɔ maa mrenyia yɛ anwomemaazo la anu. Mrenyia ɛhye mɔ die di kɛ bɛ nwo hyia tɛla mraalɛ ɔti bɛmbu bɛ.” Shengxian, asafo nu kpanyinli bie mɔɔ wɔ Taiwan la hanle kɛ: “Wɔ ɛleka mɔɔ mede la, mrenyia dɔɔnwo te nganeɛ kɛ ɔnle kɛ mraalɛ fa bɛ nloa wulowula bɛ edwɛkɛ nu. Saa nrenyia bie ka adwenle mɔɔ raalɛ bie hilele wɔ edwɛkɛ bie anwo la a, ɔ gɔnwo mɔ ɛnrɛbu ye.” Mrenyia bie mɔ noko da adwenletane mɔɔ bɛlɛ wɔ mraalɛ nwo la ali wɔ ndenle gyɛne zo. Kɛ neazo la, bie a bɛbɔ ngoayɛ mɔɔ kile kɛ bɛmbu mraalɛ la.

Noko ɔyɛ anyelielɛ kɛ, ɔnva nwo amaamuo mɔɔ bɛtetele nrenyia bie wɔ nu la, ɔbahola yeahakyi. Ɔbahola yeali nganeɛ mɔɔ ɔte kɛ mrenyia anwo hyia tɛla mraalɛ la azo. (Ɛfɛ. 4:​22-24) Saa ɔbahola yeayɛ ɛhye a, kyesɛ ɔsukoa Gyihova neazo ne. Wɔ edwɛkɛ ɛhye anu, yɛbazuzu ninyɛne ɛhye mɔ anwo: kɛzi Gyihova nee mraalɛ di la, kɛzi mediema mrenyia bahola azukoa kɛ bɛ nee mraalɛ bali kɛ mɔɔ Gyihova yɛ ye la nee kɛzi asafo nu mgbanyima bayɛ kɛzi bɛda ɛbulɛ ali bɛkile mediema mraalɛ la anwo neazo la.

KƐZI GYIHOVA NEE MRAALƐ DI Ɛ?

Gyihova yɛ kɛzi ɔwɔ kɛ bɛ nee mraalɛ di la anwo neazo mɔɔ di munli. Kɛmɔ ɔle Selɛ mɔɔ lɛ ahunluyelɛyelalɛ la ati, ɔkulo ye alesama abusua ne amuala. (Dwɔn 3:16) Na mediema mraalɛ nɔhavoma le kɛ ɔ mra mraalɛ mɔɔ sonle bolɛ maa ye. Suzu ndenle ɛhye mɔ mɔɔ Gyihova dua zo di mraalɛ eni la anwo.

Ɔnyɛ nyeyenu. Gyihova bɔle mrenyia nee mraalɛ kɛ ye ɛsaso. (Gyn. 1:27) Yeanyɛ mrenyia  mɔɔ bɛ adwenle nu ɛbuke anzɛɛ bɛze ninyɛne dɔɔnwo yɛ tɛla mraalɛ a; yɛɛ ɔngulo mrenyia edwɛkɛ ɔndɛla mraalɛ. (2 Ek. 19:7) Gyihova maanle mrenyia nee mraalɛ adwenle ko ne ala mɔɔ bɛkola bɛte Baebolo nu nɔhalɛ bo na bɛda ye subane ngɛnlɛma ne mɔ bie ali a. Eza kɛzi Gyihova bu diedi mɔɔ mrenyia lɛ la, zɔhane ala a ɔbu diedi mɔɔ mraalɛ lɛ la noko a—saa bɛlɛ anyelazo kɛ bɛbadɛnla aze dahuu wɔ paladaese azɛlɛ zo o, saa bɛbayɛ arelemgbunli nee ɛsɔfoma wɔ anwuma o. (2 Pita 1:​1, ɔbdw.) Ɔda ali wienyi kɛ, Gyihova ɛnlɛ mraalɛ nwo adwenletane.

Ɔtie bɛ. Gyihova dwenle kɛzi mraalɛ te nganeɛ nee bɛ ngyegyelɛ nwo. Kɛ neazo la, ɔdiele Relahyɛle nee Hana asɔneyɛlɛ na ɔbuale bɛ. (Gyn. 30:22; 1 Sa. 1:​10, 11, 19, 20) Eza Gyihova maanle Baebolo kɛlɛvolɛma hɛlɛle mrenyia mɔɔ diele mraalɛ la anwo edwɛkɛ wɔ Baebolo ne anu. Kɛ neazo la, Ebileham lile Gyihova adehilelɛ zo na ɔdiele ɔ ye Sɛla. (Gyn. 21:​12-14) Belemgbunli Devidi diele Abegɛle. Nɔhalɛ nu, Devidi dele nganeɛ kɛ Gyihova a zoanle Abegɛle kɛ ɔradendɛ ɔhile ye a. (1 Sa. 25:​32-35) Gyisɛse mɔɔ da ɔ Ze subane ne mɔ bie ali pɛpɛɛpɛ la diele ye mame Mɛle. (Dwɔn 2:​3-10) Neazo ɛhye mɔ kile kɛ adenle ko mɔɔ Gyihova dua zo kile kɛ ɔbu mraalɛ la a le kɛ ɔbadie bɛ.

Ɔdie bɛ ɔdi. Kɛ neazo la, ɛnee Gyihova die Yive di kɛ ɔbaboa yeamaa bɛanlea azɛlɛ ye kɔsɔɔti azo. (Gyn. 1:28) Zɔhane mɔɔ Gyihova yɛle la maanle ɔlale ali kɛ, ɛnee ɔmbu ye kɛ ɔ nwo ɛngyia kɛ ɔ hu Adam la, emomu ɔle awie mɔɔ fɛta ye a. Eza Gyihova nyianle ngapezo mraalɛ Dɛbola nee Hɛleda anu anwodozo kɛ bɛbadu ye menli ne, mɔɔ ndɛnebuavolɛ bie nee belemgbunli bie boka nwo la folɛ. (Ndɛ. 4:​4-9; 2 Arl. 22:​14-20) Ɛnɛ, Gyihova ɛva ye gyima ɛwula mraalɛ sa. Mediema mraalɛ nɔhavoma ɛhye mɔ sonle kɛ nolobɔlɛma, adekpakyelɛma yɛɛ edwɛkpatɛlɛvolɛma. Bɛboa bɛmaa bɛsisi Belemgbunlililɛ Asalo nee Bɛtɛle azua ngakyile na bɛnea zolɛ boɛ. Bie mɔ yɛ gyima wɔ Bɛtɛle; bie mɔ noko yɛ gyima wɔ edwɛbohilelɛ ɔfese ne mɔ anu. Mediema mraalɛ ɛhye mɔ le kɛ ɛlɔne kpole mɔɔ Gyihova dua bɛ nwo zo di ye bodane nwo gyima a. (Edw. 68:11) Ɔda ali wienyi kɛ, Gyihova ɛmbu mraalɛ kɛ bɛnlɛ anwosesebɛ anzɛɛ bɛngola ɛhwee yɛ.

KƐZI MEDIEMA MRENYIA BAHOLA AZUKOA KƐ BƐ NEE MRAALƐ BALI KƐ GYIHOVA LA Ɛ?

Mediema mrenyia, amaa yɛanwu kɛ yɛ nee mediema mraalɛ mɔɔ wɔ asafo ne anu lɛ ɛlɛdi kɛ mɔɔ Gyihova yɛ ye la, ɔwɔ kɛ yɛfa nɔhalɛlilɛ yɛneɛnlea adwenle mɔɔ yɛlɛ wɔ bɛ nwo nee kɛzi yɛyɛ bɛ la anu. Yɛbahola yɛayɛ zɔ a, yɛhyia moalɛ. Kɛ mɔɔ bɛpɛ awie X-ray a, ɔmaa bɛnwu ewule mɔɔ wɔ ye ahonle nu la, zɔhane ala a agɔnwolɛ kpalɛ nee Nyamenle Edwɛkɛ ne bahola aboa yɛ yeamaa yɛanwu mraalɛ nwo adwenletane biala mɔɔ yesosɔ ndinli wɔ yɛ nu la a. Kɛ ɔkɛyɛ na yɛanyia moalɛ zɔhane ɛ?

Biza ɛ gɔnwo kpalɛ bie. (Mrɛ. 18:17) Yɛbahola yɛabiza yɛ gɔnwo bie mɔɔ yɛdie ye yɛdi, mɔɔ menli ze ye kɛ ɔ ti akunlu le kɛnlɛma yɛɛ ɔlɛ ndelebɛbo la kpuya le kɛ: “Ɛnea a kɛzi me nee mediema mraalɛ di ɛ? Asoo bɛbahola bɛaha kɛ mebu bɛ ɔ? Asoo ɔwɔ kɛ meyɛ nzenzaleɛ wɔ kɛzi me nee bɛ di la anu ɔ?” Saa ɛ gɔnwo ne ka nzenzaleɛ mɔɔ ɔwɔ kɛ ɛyɛ la a, mmabɔ mɔdenle kɛ ɛfa edwɛkɛ wɔayeye ɛ nloa. Emomu nyia ɛhulolɛ kɛ ɛbayɛ nzenzaleɛ mɔɔ hyia la.

Sukoa Nyamenle Edwɛkɛ ne. Adenle kpalɛ mɔɔ yɛbahola yɛalua zo yɛanwu kɛ yɛ nee mediema mraalɛ di ye boɛ la a le kɛ yɛbalua Nyamenle Edwɛkɛ ne azo yɛanleɛnlea yɛ subane nee yɛ nyɛleɛ nu. (Hib. 4:12) Mekɛ mɔɔ yɛlɛsukoa Baebolo ne la, yɛbanwu mrenyia mɔɔ bɛ nee mraalɛ lile ye boɛ nee mrenyia mɔɔ bɛanyɛ zɔ la. Akee yɛbahola yɛava bɛ nyɛleɛ ne yɛatoto yɛ ɛdeɛ ne anwo. Bieko, saa yɛfa ngɛlɛlera ngakyile yɛtoto nwo a, ɔnrɛmaa yɛnrɛyɛ nvonleɛ kɛ yɛbahyibehyiba ngyɛnu ko bie mɔɔ yɛze la amaa yeayɛ kɛ nvonleɛ biala ɛnle mraalɛ nwo adwenletane mɔɔ yɛlɛ la anwo. Kɛ neazo la, 1 Pita 3:7 ka kɛ bɛli yelɛ ‘eni kɛ ɔle kɛ buakɛ mɔɔ ɔnlɛ anwosesebɛ la.’ a Asoo ɛhye kile kɛ ɔ nwo ɛngyia—ye adwenle nu ɛtɛbukele kpalɛ anzɛɛ ɔnze ninyɛne dɔɔnwo yɛ—kɛ nrenyia la ɔ? Kyɛkyɛ! Fa Pita edwɛkɛ ne toto Galeehyeama 3:​26-29 anwo, ɛleka mɔɔ ɔhanle kɛ Gyihova ɛkpa mraalɛ nee mrenyia kɛ bɛ nee Gyisɛse ɛhɔli tumi wɔ anwuma la. Saa yɛsukoa  Nyamenle Edwɛkɛ ne na yɛbiza yɛ gɔnwo kpalɛ bie yɛmaa ɔka kɛzi yɛ nee mraalɛ di la anwo edwɛkɛ ɔkile yɛ a, yɛbazukoa kɛ yɛbava ɛbulɛ mɔɔ fɛta la yɛamaa yɛ mediema mraalɛ ne mɔ.

KƐZI ASAFO NU MGBANYIMA KILE KƐ BƐBU MEDIEMA MRAALƐ Ɛ?

Asafo nu mgbanyima mɔɔ bɛlɛ ɛlɔlɛ la bu mediema mraalɛ mɔɔ wɔ asafo ne anu la, ɔti mediema mrenyia mɔɔ wɔ asafo ne anu la noko bahola azukoa bɛ neazo ne na bɛabu mediema mraalɛ ne mɔ. Kɛzi mgbanyima ne mɔ yɛ kɛzi bɛbu mediema mraalɛ la anwo neazo ɛ? Suzu ndenle fɔɔnwo bie mɔ mɔɔ bɛdua zo bɛyɛ zɔ la anwo.

Bɛkanvo mediema mraalɛ. Ɛzoanvolɛ Pɔɔlo yɛle neazo kpalɛ mɔɔ asafo nu mgbanyima bahola azukoa a. Ɔhanvole mediema mraalɛ dɔɔnwo wɔ bagua nu wɔ ye kɛlata ne mɔɔ ɔhɛlɛle ɔhɔmaanle Wulomu asafo ne la anu. (Wlo. 16:12) Mɔɔ bɛgengale Pɔɔlo kɛlata ne bɛhilele asafo ne la, ɛnea a kɛzi zɔhane mediema mraalɛ ne mɔ dele nganeɛ ɛ? Zɔhane ala a mgbanyima noko fi bɛ ahonle nu kanvo mediema mraalɛ wɔ bɛ subane ngɛnlɛma nee gyima mɔɔ bɛyɛ bɛmaa Gyihova la anwo a. Ɛhye maa mediema mraalɛ ne mɔ nwu kɛ asafo ne anu amra bu bɛ kpalɛ yɛɛ bɛsonle bolɛ bɛmaa bɛ. Bie a anwosesebɛmaanlɛ edwɛkɛ bie mɔɔ asafo nu kpanyinli bie baha ahile mediema mraalɛ la a le mɔɔ bɛhyia nwolɛ wɔ mekɛ mɔɔ bɛlɛfa nɔhalɛlilɛ bɛazonle Gyihova la a.—Mrɛ. 15:23.

Saa mgbanyima ɛlɛkanvo mediema mraalɛ a, bɛka edwɛkɛ mɔɔ le nɔhalɛ la yɛɛ bɛka ninyɛne fɔɔnwo anwo edwɛkɛ. Duzu ati ɔ? Adiema raalɛ bie mɔɔ bɛfɛlɛ ye Jessica la hanle kɛ: “Ɔyɛ anyelielɛ kɛ mediema mrenyia baha ahile adiema raalɛ bie kɛ, ‘moo o.’ Noko saa bɛkanvo yɛ wɔ debie fɔɔnwo bie le kɛ, yɛ mra ne mɔ mɔɔ yɛkilehile bɛ yɛmaa bɛtɛnla aze koonwu wɔ debiezukoalɛ bo anzɛɛ mɔdenle mɔɔ yɛbɔ yɛkɔfa Baebolo sukoavo bie yɛba debiezukoalɛ la anwo a, yemɔ yɛ nye die nwolɛ kpole.” Saa mgbanyima ne mɔ kanvo mediema mraalɛ wɔ  debie fɔɔnwo bie anwo a, bɛmaa bɛte nganeɛ kɛ bɛ nwo hyia wɔ asafo ne anu yɛɛ bɛsonle bolɛ.

Bɛtie mediema mraalɛ. Mgbanyima mɔɔ bɛbɛlɛ bɛ nwo aze la ze kɛ adwenle kpalɛ ɛnle sonla ko ati anu. Mgbanyima zɛhae mɔ maa mediema mraalɛ adenle kɛ bɛhile bɛ adwenle, na saa mediema mraalɛ ne mɔ ɛlɛtendɛ a, bɛtie bɛ kpalɛ. Saa mgbanyima yɛ zɔhane a, ɔmaa bɛmaa mediema mraalɛ ne mɔ anwosesebɛ yɛɛ ɔboa bɛdabɛ mgbanyima mumua ne. Adenle boni azo? Asafo nu kpanyinli bie mɔɔ bɛfɛlɛ ye Gerardo, mɔɔ ɔyɛ gyima wɔ Bɛtɛle la hanle kɛ: “Menwu ye kɛ saa memaa mediema mraalɛ kile bɛ adwenle wɔ debie bie anwo a, ɔboa me ɔmaa meyɛ me gyima ne kpalɛ. Fane dɔɔnwo ne ala, bie a ɛnee bɛyɛ gyima ne bɛhyɛ bɛdɛla mediema mrenyia dɔɔnwo.” Wɔ asafo ne anu, mediema mraalɛ dɔɔnwo le adekpakyelɛma ɔti bɛze menli mɔɔ wɔ azɛlɛsinli ne anu la anwo edwɛkɛ dɔɔnwo. Kpanyinli bie mɔɔ bɛfɛlɛ ye Bryan la hanle kɛ: “Yɛ mediema mraalɛ yɛ ninyɛne dɔɔnwo boa ahyehyɛdeɛ ne. Ɔti maa bɛ anwubielɛ ne ɛboa wɔ!”

Mgbanyima mɔɔ bɛ nye gyi bɛ ti anwo la ɛmbɔ mediema mraalɛ nzuzulɛ ɛngua. Duzu ati ɔ? Kpanyinli bie mɔɔ bɛfɛlɛ ye Edward la hanle kɛ: “Adwenle mɔɔ adiema raalɛ bie bahile anzɛɛ anwubielɛ bie mɔɔ ɔlɛ la bahola aboa adiema nrenyia bie yeamaa yeanwu edwɛkɛ bie anye zo kpalɛ, na yeamaa yeade awie mɔ edwɛkɛ bo.” (Mrɛ. 1:5) Saa kpanyinli bie ɛnrɛhola ɛnrɛva adiema raalɛ bie nzuzulɛ ɛnrɛli gyima bɔbɔ a, ɔbahola yeayɛ ye mo kɛ yehile ye adwenle na yeha mɔɔ ɔze ye wɔ deɛ ne anwo la.

Bɛtete mediema mraalɛ. Mgbanyima mɔɔ bɛnwu ninyɛne bɛkɔ moa la kpondɛ ndenle dua zo tete mediema mraalɛ. Kɛ neazo la, bɛbahola bɛahile mediema mraalɛ kɛzi bɛnea daselɛlilɛ ayia zo la amaa saa ɔba ye kɛ adiema nrenyia mɔɔ bɛzɔne ye la ɛnle ɛkɛ a, bɛanlea zo. Bɛbahola bɛahile bɛ kɛzi bɛfa adwinli mbulalɛ anzɛɛ milahyinli bie bɛyɛ gyima la amaa saa bɛlɛyɛ teokelase azua boɛ anzɛɛ bɛlɛsisi fofolɛ a, bɛahola bɛaboa. Neavolɛma mɔɔ wɔ Bɛtɛle la ɛtete mediema mraalɛ amaa bɛahola bɛayɛ gyima ngakyile le kɛ ninyɛne mɔɔ ɛzɛkye mɔɔ bɛsiezie bɛ boɛ, kɛzi bɛkɔdi gua, ezukoa nwo mgbondabulɛ, kɛzi bɛfa ninyɛne bɛgua kɔmpita zo nee dɔɔnwo mɔɔ boka nwo la. Saa mgbanyima tete mediema mraalɛ a, ɛnee bɛlɛmaa yeala ali kɛ bɛbu bɛ kɛ bɛbahola ninyɛne bie mɔ yɛ yɛɛ bɛkola bɛfa bɛ nwo bɛto bɛ nwo zo.

Mediema mraalɛ dɔɔnwo fa ndetelɛ mɔɔ bɛnyia bɛvi mgbanyima ne mɔ ɛkɛ la boa awie mɔ. Kɛ neazo la, mediema mraalɛ bie mɔ fa ndetelɛ mɔɔ bɛnyianle ye wɔ mekɛ mɔɔ bɛlɛsisi azua ngakyile la boa maa bɛsisi azua bɛmaa awie mɔ wɔ mekɛ mɔɔ esiane bie bazi la. Bie mɔ noko fa kɛzi bɛtetele bɛ wɔ bagua nu daselɛlilɛ ne anu la tete mediema mraalɛ dɔɔnwo amaa bɛahola bɛayɛ bie. Kɛzi mediema mraalɛ bu mgbanyima ne mɔ mɔɔ bɛtetele bɛ la ɛ? Adiema raalɛ bie mɔɔ bɛfɛlɛ ye Jennifer la hanle kɛ: “Mɔɔ yɛlɛsi Belemgbunlililɛ Asalo bie la, mediema mɔɔ nea yɛ nwo zo la ko nyianle mekɛ tetele me. Ɔnwunle gyima mɔɔ menyɛle la na ɔhanvole me wɔ nwolɛ. Ɛnee me nye die nwo kɛ me nee ye babɔ nu ayɛ gyima ɔluakɛ ɔmaanle mendele nganeɛ kɛ me nwo hyia yɛɛ ɔdie me ɔdi.”

KƐZI YƐTETE MEDIEMA MRAALƐ KƐ YƐ MBUSUAFOƆ A ƆBOA YƐ LA

Yɛkulo yɛ mediema mraalɛ nɔhavoma edwɛkɛ kɛ mɔɔ Gyihova yɛ ye la! Ɔti yɛ nee bɛ di kɛ bɛle yɛ mbusuafoɔ la. (1 Tim. 5:​1, 2) Bɛsonle bolɛ bɛmaa yɛ yɛɛ yɛ nye die nwo kɛ yɛ nee bɛ bɔ nu yɛ gyima la. Saa bɛnwu kɛ yɛkulo bɛ edwɛkɛ yɛɛ yɛboa bɛ a, ɔmaa yɛ nye die kpalɛ. Adiema raalɛ bie mɔɔ bɛfɛlɛ ye Vanessa la hanle kɛ: “Meyɛ Gyihova mo kpole kpalɛ kɛ yemaa meraboka ye ahyehyɛdeɛ ne mɔɔ mediema mrenyia mɔɔ bɛmaa me anwosesebɛ kpalɛ la ɛyi nuhua la anwo la.” Adiema raalɛ bie mɔɔ wɔ Taiwan la hanle kɛ: “Meyɛ Gyihova nee ye ahyehyɛdeɛ ne mo kpole kpalɛ kɛ bɛdwenle mraalɛ nwo na bɛbu bɛ la. Ɛhye maa me diedi nu yɛ se na ɔmaa me nye sɔ nwolɛ adenle mɔɔ menyia kɛ meboka Gyihova ahyehyɛdeɛ ne anwo la kpalɛ.”

Saa Gyihova nwu kɛ Kilisiene mrenyia nɔhavoma ɛlɛbɔ mɔdenle abu mraalɛ na bɛ nee bɛ ali kɛ mɔɔ ɔyɛ ye la a, ɔ nye die kpalɛ! (Mrɛ. 27:11) Asafo nu kpanyinli bie mɔɔ bɛfɛlɛ ye Benjamin mɔɔ vi Scotland la hanle kɛ: “Mrenyia dɔɔnwo mɔɔ wɔ ewiade ye la ɛmbu mraalɛ fee. Ɔti saa mraalɛ ba Belemgbunlililɛ Asalo a, yɛkulo kɛ bɛnwu ye kɛ yɛbu bɛ yɛɛ yɛkulo bɛ.” Bɛmaa yɛ muala yɛzukoa Gyihova na yɛla ɛlɔlɛ nee ɛbulɛ mɔɔ fɛta yɛ mediema mraalɛ ne mɔ la ali yɛhile bɛ.—Wlo. 12:10.