GILIKI edwɛkɛkpɔkɛ ne mɔɔ bɛhile ɔ bo “ehwili” wɔ Ewiade Fofolɛ Ngilebɛbo ne anu la kola kile ehwili biala. (Gyi. 8:​28, 29, 38) Noko ɔzɔho kɛ ɛnee Yiteyopeanli ne de ehwili mɔɔ le kpole tɛla mɔɔ ɛnee bɛfa bɛkɔ konle anzɛɛ bɛfa bɛsu ɛnriandilɛ la anu. Nea deɛmɔti yɛkola yɛka ye zɔ la bie mɔ.

Ɛnee Yiteyopeanli ne le awie mɔɔ lɛ dibilɛ kpole mɔɔ yepɛ adenle tendenle a. Ɛnee “nrenyia ɛhye lɛ tumi na ɔnea Kandase, Yiteyopea ɔbahyema ne ezukoa kɔsɔɔti azo.” (Gyi. 8:27) Ɛnee ɛnɛ mekɛ ye azo Sudan nee Yigyibiti nyiakɛ boka tete Yiteyopea anwo. Ɔwɔ nu kɛ bie a nrenyia ne andɛnla ehwili ko ne ala anu wɔ ye adendulɛ ne amuala anu ɛdeɛ, noko ɔbayɛ kɛ ɛnee ɔlɛ ninyɛne dɔɔnwo mɔɔ ɔlɛfa yeadu adenle tendenle ɛhye a. Ɛnee ehwili mɔɔ menli fa tu adenle wɔ ɛvoya mɔɔ limoa Y.M. anu la lɛ bɛ gyakɛ nna yɛɛ bɛdu zolɛ. Acts—An Exegetical Commentary buluku ne hanle kɛ: “Ɛnee ɛleka wɔ ehwili ne anu mɔɔ bɛkola bɛfa ninyɛne bɛgua nu, saa bɛlɛfa bɛadu adenle a ɔmmaa bɛ nwo ɛngyele bɛ yɛɛ bie a bɛkola bɛfa bɛpɛ adenle tendenle.”

Ɛnee Yiteyopeanli ne ɛlɛkenga debie wɔ mekɛ mɔɔ Felepe hɔle ɔ nwo ɛkɛ ne la. Kɛlɛtokɛ ne hanle kɛ ‘Felepe nriandile hɔle nwolɛ na ɔdele kɛ [Yiteyopea kpanyinli ne] ɛlɛkenga ngapezonli Ayezaya buluku ne kpole.’ (Gyi. 8:30) Ɛnee bɛnyɛ adendulɛ ehwili ne mɔ wɔ adenle mɔɔ ɔkola ɔtia ndɛndɛ la azo. Kɛmɔ ɛnee ehwili ne ɛndia ndɛndɛ la ati, ɔmaanle kpanyinli ne holale gengale debie yɛɛ eza ɔboale Felepe ɔmaanle ɔholale ɔnriandile ɔdoale ehwili ne.

Yiteyopeanli ne maanle “Felepe vole radɛnlanle ɔ nwo ɛkɛ.” (Gyi. 8:31) Wɔ ehwili mɔɔ bɛfa bɛsu ɛnriandilɛ la anu, ahenle mɔɔ ɛlɛka la gyinla nu. Noko wɔ adendulɛ ehwili ne mɔ anu, ɛleka wɔ nu mɔɔ Yiteyopea kpanyinli ne nee Felepe bahola adɛnla a.

Ɔlua edwɛkɛ mɔɔ Nyamenle maanle bɛhɛlɛle ye wɔ Gyima ne tile 8 nee daselɛ mɔɔ tetedwɛkɛ maa ɔda ali la ati, kenlensa ye yɛ mbuluku ne mɔ yɛ Yiteyopea kpanyinli ne anwo nvoninli kɛ ɔde ehwili mɔɔ le kpole tɛla ngyikyi ne mɔ mɔɔ bɛfa bɛkɔ konle anzɛɛ bɛfa bɛsu ɛnriandilɛ la anu.