1-2. Ngyegyelɛ boni mɔ a Gyihova azonvolɛ nɔhavoma bahola ayia a?

 EDWƐKƐ ɛtane mɔɔ sisi la bahola amaa yɛ ɛbɛlabɔlɛ ahakyi arɛlevilɛ nu. Kɛ neazo la, adiema nrenyia nɔhavo bie mɔɔ bɛfɛlɛ ye Luis a la nyianle kansa. Dɔketa ne hanle hilele ye kɛ ɔnrɛhyɛ na yeawu. Ɛnee Monika nee ɔ hu ɛnva Gyihova ɛzonlenlɛ ɛnli nwɔhoa fee. Noko kenle ko bie, Monika nwunle kɛ amuanrɛɛ ɔ hu le tofea. Ɛnee ɔwɔ kɛ adiema raalɛ bie mɔɔ ɔtɛgyale mɔɔ bɛfɛlɛ ye Olivia la tu fi ye sua nu ndɛndɛ ɔluakɛ ɛnee ahumuakyima bie ɛlɛba. Mɔɔ Olivia ziale rale la, ɔnwunle kɛ ahumu ne ɛzɛkye ye sua ne bɔkɔɔ. Mediema ɛhye mɔ mɔɔ yɛha bɛ nwo edwɛkɛ la ɛbɛlabɔlɛ hakyile arɛlevilɛ nu. Mɔɔ ɔdole bɛ la bie ɛdo wɔ ɛlɛ ɔ? Wɔyia tɛnlabelɛ mɔɔ maanle wɔ ɛbɛlabɔlɛ hakyile bɔkɔɔ la ɛlɛ ɔ?

² Kɛ Gyihova azonvolɛ nɔhavoma la, yɛyia ngyegyelɛ yɛɛ yɛ nwo to yɛ kɛ mɔɔ ɔto awie biala la. Bie noko a eza ɔwɔ kɛ yɛgyinla dwazotia anzɛɛ kpɔdekpɔdeyɛlɛ mɔɔ bɛdabɛ mɔɔ bɛkyi Nyamenle menli la fa ba yɛ nwo zo la anloa. Gyihova ɛnzi ninyɛne ɛhye mɔ adenle ɛdeɛ, noko yebɔ ɛwɔkɛ kɛ ɔbaboa yɛ. (Aye. 41:10) Ɔbaboa yɛ yeamaa yɛ nye ahɔ zo alie, yɛasisi kpɔkɛ kpalɛ na yɛahɔ zo yɛali nɔhalɛ yɛamaa ye wɔ mekɛ mɔɔ anu yɛ se kpalɛ bɔbɔ la anu. Wɔ edwɛkɛ ɛhye anu, yɛbazuzu ndenle nna mɔɔ Gyihova dua zo boa yɛ wɔ mekɛ mɔɔ yɛlɛyia tɛnlabelɛ mɔɔ anu yɛ se kpalɛ la anwo. Eza yɛbazuzu mɔɔ ɔhyia kɛ yɛyɛ amaa yɛanyia moalɛ mɔɔ ɔfa ɔmaa yɛ la azo nvasoɛ la anwo.

 GYIHOVA BABƆ Ɛ NWO BANE

3. Saa edwɛkɛ ɛtane bie to yɛ a, duzu a wɔannea a ɔbayɛ se kɛ yɛbayɛ a?

³ Ngyegyelɛ ne. Saa edwɛkɛ ɛtane bie to yɛ a, wɔannea a ɔbayɛ se kɛ yɛbadwenle ninyɛne kpalɛ nwo na yɛasisi kpɔkɛ kpalɛ. Duzu ati ɔ? Bie a ɛnee yɛ ahonle ɛlɛdi nyane kpole kpalɛ. Bie noko a ɛnee adwenleadwenle ɛbo yɛ nwo zo. Ɔbahola yeamaa yɛade nganeɛ kɛ yɛlua ɛleka mɔɔ amungu ne ɛhye kpalɛ na yɛnnwu ɛleka mɔɔ yɛbɔ yɛ ti la. Nea kɛzi mediema mraalɛ nwiɔ ne mɔɔ yɛhanle bɛ nwo edwɛkɛ la dele nganeɛ wɔ mekɛ mɔɔ bɛlɛyia sɔnea la. Olivia hanle kɛ: “Mɔɔ ahumuakyima ne zɛkyele me sua ne la, me nye zo danle me yɛɛ ɛnee mennwu mɔ meyɛ a.” Monika hanle ɔ hu mɔɔ anli nɔhalɛ ammaa ye la anwo edwɛkɛ kɛ: “Mendele nganeɛ kɛ me ahonle ɛbubu bɔkɔɔ. Ɔyɛle me kɛ asɛɛ awie ɛva debie ɛfiti me ahonle ne anu la. Aleɛ kye bɔbɔ a mennwu mɔɔ meyɛ a. Meanla meandwenle nwolɛ ɛlɛ kɛ edwɛkɛ ɛhye bado me.” Moalɛ boni a Gyihova ɛbɔ ɛwɔkɛ kɛ ɔbava yeamaa yɛ wɔ mekɛ mɔɔ adwenleadwenle bavo yɛ nwo zo la ɛ?

4. Duzu a Gyihova ɛva ɛbɔ yɛ ɛwɔkɛ wɔ Felepaema 4:​6, 7 a?

⁴ Mɔɔ Gyihova yɛ la. Yebɔ yɛ ɛwɔkɛ kɛ ɔbava mɔɔ Baebolo ne fɛlɛ ye “Nyamenle anzodwolɛ ne” la yeamaa yɛ. (Kenga Felepaema 4:​6, 7.) Anzodwolɛ ɛhye a maa yɛkola yɛsie ye dii na yɛ ahonle tɔ yɛ azule nu ɔluakɛ yɛ nee Gyihova lɛ agɔnwolɛvalɛ kyengye la ati. Anzodwolɛ ɛhye “bo ndelebɛbo muala azo”; ɔyɛ nwanwane ɔtɛla kɛzi yɛbahola yɛadwenle nwo la. Asoo yera ye ɛlɛ kɛ ɛyɛle asɔne bie na yemɔ anzi ɛnyianle anzodwolɛ bie mɔɔ yɛle wɔ azibɛnwo la ɔ? Nganeɛ zɔhane mɔɔ ɛdele la a le “Nyamenle anzodwolɛ ne.”

5. Kɛzi Nyamenle anzodwolɛ ne bɔ yɛ adwenle nee yɛ ahonle nwo bane ɛ?

⁵ Ngyɛnu zɔhane ala eza hanle kɛ Nyamenle anzodwolɛ ne babɔ “bɛ ahonle nee bɛ adwenle nzuzulɛ nwo bane.” Giliki edwɛkɛkpɔkɛ mɔɔ bɛhile ɔ bo ‘bɔ nwolɛ bane’ la le edwɛkɛkpɔkɛ mɔɔ ɛnee sogyama fa di gyima a. Ɛnee ɔfale sogyama mɔɔ bɛsinza suakpole bie amaa bɛabɔ nwolɛ bane bɛavi ye agbɔvolɛ asa anu la anwo. Menli mɔɔ de suakpole ne azo la da botoo, ɔluakɛ bɛze kɛ sogyama ɛlɛsinza bɛ. Zɔhane ala a saa Nyamenle anzodwolɛ ne bɔ yɛ ahonle nee yɛ adwenle nwo bane a, ɔmaa yɛsie yɛ nwo dii ɔluakɛ yɛze kɛ yɛlɛ banebɔlɛ. (Edw. 4:8) Kɛ mɔɔ ɔdole Hana la, saa yɛ tɛnlabelɛ ne angakyi ɛkɛ ne ala bɔbɔ a, yɛbanyia anzodwolɛ. (1 Sa. 1:​16-18) Yɛɛ saa yɛkola yɛsie yɛ nwo dii a, fane dɔɔnwo ne ala, ɔmaa yɛkola yɛdwenle ninyɛne nwo kpalɛ na yɛsisi kpɔkɛ kpalɛ.

6. Duzu a yɛbahola yɛayɛ amaa yɛanyia Nyamenle anzodwolɛ ne azo nvasoɛ a? (Eza nea nvoninli ne.)

 ⁶ Mɔɔ ɔhyia kɛ yɛyɛ la. Saa wɔ adwenle tufonyia a, fɛlɛ sinzavolɛ ne, kɛ mɔɔ yɛbaha ye la. Adenle boni azo? Yɛ asɔne kɔkpula kɛ ɛbanyia Nyamenle anzodwolɛ ne la. (Luku 11:9; 1 Tɛs. 5:17) Luis mɔɔ yɛhanle ɔ nwo edwɛkɛ la hilehilele kɛzi ɔ nee ɔ ye Ana holale gyinlanle tɛnlabelɛ ne anloa wɔ mekɛ mɔɔ bɛnwunle kɛ ɔnrɛhyɛ na yeawu la. Ɔhanle kɛ: “Saa ɛkɔ tɛnlabelɛ zɛhae anu a, ɔyɛ se kpalɛ kɛ ɛbahola wɔasisi ayileyɛlɛ nee ninyɛne gyɛne nwo kpɔkɛ kpalɛ. Noko asɔneyɛlɛ ɛmaa yɛnyia anzodwolɛ wɔ tɛnlabelɛ ɛhye mɔɔ anu yɛ se la anu.” Luis nee ɔ ye hanle kɛ bɛyɛle asɔne ɛsesebɛ fane dɔɔnwo bɛzɛlɛle Gyihova kɛ ɔmaa bɛnyia anzodwolɛ, bɛzie bɛ nwo dii na ɔmaa bɛ nrɛlɛbɛ ɔmaa bɛsisi kpɔkɛ kpalɛ. Na bɛnwunle kɛ ɔboale bɛ. Saa ɛlɛyia tɛnlabelɛ mɔɔ anu yɛ se la a, yɛ asɔne dahuu na ɛbanwu kɛ Gyihova anzodwolɛ ne ɛlɛbɔ wɔ ahonle nee wɔ adwenle nwo bane.—Wlo. 12:12.

GYIHOVA BAMAA Ɛ NWO AGYINLA WƆ

7. Saa yɛlɛyia sɔnea mɔɔ anu yɛ se la a, wɔannea a kɛzi yɛbade nganeɛ ɛ?

⁷ Ngyegyelɛ ne. Saa yɛkɔ sɔnea bie mɔɔ anu yɛ se la anu a, kɛzi yɛte nganeɛ, kɛzi yɛdwenle nee kɛzi yɛyɛ yɛ nyɛleɛ la bahakyi. Bie a yɛbade nganeɛ kɛ yɛle kɛ meli mɔɔ la nyevile nye na ahumu ɛlɛmaa yeatotɔ la. Ana mɔɔ yɛhanle ɔ nwo edwɛkɛ la hanle kɛ, mɔɔ Luis wule la ɔdele nganeɛ ngakyile dɔɔnwo. Ɔhanle kɛ: “Saa me rɛle bɔ a, mete nganeɛ kɛ me nwo yɛ alɔbɔlɛ. Eza saa menwu kɛ ɔnle ɛkɛ ne bieko a, ɔyɛ me ɛya kpole.” Bieko, saa ɔwɔ kɛ Ana sisi ninyɛne mɔɔ ɛnee dɛba ne Luis di nwolɛ gyima kpalɛ la anwo kpɔkɛ a, ɔmaa ɔ nwo yɛ ye koonwu na ye adwenle tufonyia. Ɔdwu mekɛ ne bie a, ɔte nganeɛ kɛ ɔla nyevile nye na ahumu ɛlɛbɔ ye la. Saa nganeɛdelɛ ɛhye mɔ bɔ ɔ bo kɛ ɔfo yɛ nwo zo a, kɛzi Gyihova boa yɛ ɛ?

8. Kɛ mɔɔ Ayezaya 33:6 kile la, ɛwɔkɛ boni a Gyihova ɛbɔ yɛ a?

⁸ Mɔɔ Gyihova yɛ la. Yebɔ yɛ ɛwɔkɛ kɛ ɔbamaa yɛ nwo agyinla yɛ. (Kenga Ayezaya 33:6.) Saa meli lua nyevile nye na ahumu ɛlɛtu a, ɔmaa ɔtotɔ kpole. Amaa meli dɔɔnwo ahola agyinla ɛtotɔlɛ ɛhye anloa la, bɛyɛ debie bie mɔɔ le kɛ ndɛbalɛ la wɔ meli ne foa ko nee ye foa ko mɔɔ wɔ nyevile ne abo a. Ndɛbalɛ ɛhye mɔ ɛmmaa meli ne ɛntotɔ kpole, na ɔbɔ menli mɔɔ wɔ meli ne anu la anwo bane yɛɛ ɔmmaa bɛ ahonle ɛndu dɔɔnwo. Noko saa meli ne ɛlɛkɔ ɔ nyunlu fɔɔnwo a, yɛɛ ndɛbalɛ ɛhye mɔ yɛ gyima kpalɛ a. Zɔhane ala a saa yɛfa nɔhalɛlilɛ yɛkɔ yɛ nyunlu fɔɔnwo wɔ sɔnea mekɛ nu a, Gyihova bamaa yɛ nwo agyinla yɛ a.

9. Kɛzi yɛ neɛnleanu ninyɛne ne mɔ bahola aboa wɔ yeamaa ɛ nwo agyinla wɔ ɛ? (Eza nea nvoninli ne.)

 ⁹ Mɔɔ ɔhyia kɛ yɛyɛ la. Saa nyanelilɛ bo ɛ nwo zo a, yɛ biala mɔɔ ɛbahola la kɔ zo yɛ sunsum nu ninyɛne. Nɔhalɛ nu, bie a ɛnrɛhola ɛnrɛyɛ ninyɛne dɔɔnwo kɛ mɔɔ ɛnee ɛyɛ ye dɛba la ɛdeɛ, noko kakye kɛ Gyihova lɛ ndelebɛbo. (Fa toto Luku 21:​1-4 anwo.) Eza ye mekɛ sie ahane fa yɛ ɛ ti anwo debiezukoalɛ na fa dwenledwenle ninyɛne nwo. Duzu ati ɔ? Gyihova ɛlua ye ahyehyɛdeɛ ne azo ɛmaa yɛ mbuluku nee vidio ngɛnlɛma mɔɔ gyi Ngɛlɛlera ne azo la amaa yeaboa yɛ yeamaa yɛ nwo agyinla yɛ wɔ mekɛ mɔɔ anu yɛ se la anu. Amaa ɛ sa aha mɔɔ ɛhyia nwo la, ɛbahola wɔava neɛnleanu ninyɛne mɔɔ wɔ wɔ aneɛ nu, le kɛ JW Library^® app, Watch Tower Publications Index yɛɛ Gyihova Alasevolɛ Neɛnleanu Buluku ne mɔ wɔali gyima. Monika, mɔɔ yɛhanle ɔ nwo edwɛkɛ la hanle kɛ, saa ɔnwu kɛ alɔbɔlɛ kpondɛ ahu ye a, ɔfa neɛnleanu ninyɛne ne mɔ ɔdi gyima. Kɛ neazo la, ɔkpondɛ “ɛyavalɛ” nwo edwɛkɛ. Ɔdwu mekɛ ne bie a, ɔkpondɛ “awie mɔɔ bɛye ye bɛmaa” anzɛɛ “nɔhalɛlilɛ” nwo edwɛkɛ. Akee ɔkenga nwolɛ debie kɔkpula kɛ ɔ nwo bagyinla ye la. Ɔhanle kɛ: “Mɔɔ membɔle ɔ bo kɛ meyɛ neɛnleanu ne la, me ahonle dule ekyi. Noko mɔɔ mengɔle zo mengengale la, mendele nganeɛ kɛ asɛɛ Gyihova ɛlɛyɛ me atuu la. Membanwunle kɛ Gyihova te kɛzi mete nganeɛ la abo kpalɛ, na ɛnee ɔlɛboa me.” Eza moalɛ zɛhae mɔɔ Gyihova fa maa wɔ la bahola aboa wɔ too wɔahɔdwu ɛleka mɔɔ nyevile ne ɛgua dii la.—Edw. 119:​143, 144.

GYIHOVA BAZƆ WƆ

10. Saa edwɛkɛ ɛtane bie to yɛ a, bie a kɛzi yɛbade nganeɛ ɛ?

¹⁰ Ngyegyelɛ ne. Saa edwɛkɛ ɛtane bie to yɛ a, ɔyɛ a yɛbade nganeɛ kɛ yɛyɛ bɛtɛɛ yɛɛ yɛnnwu mɔɔ yɛyɛ a. Yɛbahola yɛade nganeɛ kɛ awie mɔɔ ɔ nwo yɛ ndɛ wɔ ɛnriandilɛ ɛzulɛ nu noko kɛkala ɔtia ɔkete la. Bie a ninyɛne mɔɔ ɛnee yɛkola yɛyɛ bɛ dɛba la ɛyɛlɛ bayɛ se amaa yɛ anzɛɛ bie a yɛnrɛnyia ɛhulolɛ kɛ yɛbayɛ ninyɛne mɔɔ ɛnee yɛ nye die nwolɛ la. Kɛ mɔɔ ɔdole Yilaegya la, yɛdayɛ noko yɛbahola yɛade nganeɛ kɛ ɔyɛ se somaa kɛ yɛbadwazo. Yɛkulo kɛ yɛda. (1 Arl. 19:​5-7) Duzu a Gyihova ɛbɔ ɛwɔkɛ kɛ yɛyɛ bɛtɛɛ a ɔbayɛ a?

11. Adenle bieko boni a Gyihova dua zo boa yɛ a? (Edwɛne 94:18)

¹¹ Mɔɔ Gyihova yɛ la. Yebɔ ɛwɔkɛ kɛ ɔbazɔ yɛ. (Kenga Edwɛne 94:18.) Kɛ mɔɔ awie mɔɔ su ɛnriandilɛ la boda a ɔhyia kɛ bɛsɔ ye  amaa yeahola yeadia la, bie a yɛbahyia moalɛ amaa yɛahola yɛahɔ zo yɛazonle Gyihova. Saa yɛkɔ tɛnlabelɛ zɛhae mɔ anu a, Gyihova maa yɛnyia anwodozo kɛ: “Medame Gyihova wɔ Nyamenle ne, melɛ ɛ sa fema ne anu, na melɛka meahile wɔ kɛ, ‘Mmasulo, mebaboa wɔ.’” (Aye. 41:13) Belemgbunli Devidi nyianle moalɛ ɛhye bie. Mɔɔ ɛnee ɔlɛyia sɔnea na ye agbɔvolɛ ɛlɛgyegye ye la, ɔhanle ɔhilele Gyihova kɛ: “Ɛ sa fema ne sɔ me nu.” (Edw. 18:​35, ɔbdw.) Noko adenle boni a Gyihova dua zo sɔ yɛ nu a?

12. Duzu a Gyihova dua zo boa yɛ wɔ mekɛ mɔɔ yɛyɛ bɛtɛɛ la ɛ?

¹² Adenle mɔɔ Gyihova ta dua zo sɔ yɛ la a le kɛ ɔka awie mɔ ɔmaa bɛboa yɛ. Kɛ neazo la, kenle ko bie mɔɔ Devidi yɛle bɛtɛɛ la, ɔ gɔnwo Dwɔnatan hɔkpɔlale ye na ɔmaanle ye anwosesebɛ. (1 Sa. 23:​16, 17) Zɔhane ala a Gyihova kpale Yilaehya kɛ ɔboa Yilaegya a. (1 Arl. 19:​16, 21; 2 Arl. 2:2) Ɛnɛ, bie a Gyihova balua yɛ abusua, yɛ gɔnwo mɔ anzɛɛ asafo nu mgbanyima ne mɔ anwo zo azɔ yɛ. Noko saa yɛ rɛle bɔ a, bie a yɛnrɛhulo kɛ yɛbabikye awie mɔ. Yɛngulo kɛ awie biala gyegye yɛ. Na kɛ awie biala bade nganeɛ la ɛne. Duzu a yɛbahola yɛayɛ amaa Gyihova azɔ yɛ a?

13. Duzu a ɔhyia kɛ yɛyɛ amaa yɛanyia Gyihova moalɛ ne azo nvasoɛ a? (Eza nea nvoninli ne.)

¹³ Mɔɔ ɔhyia kɛ yɛyɛ la. Bɔ mɔdenle kɛ ɛnrɛde ɛ nwo. Kɛmɔ etile ko le namule la ati, saa yɛte yɛ nwo a, ɔmaa yɛdwenle yɛdayɛ mumua ne nee ngyegyelɛ mɔɔ yɛlɛyia la angomekye anwo. Ɛhye ati ɔnrɛmaa yɛnrɛsisi kpɔkɛ kpalɛ. (Mrɛ. 18:1) Nɔhalɛ nu, ɔdwu mekɛ ne bie a yɛ nuhua ko biala kulo kɛ ɔtwe ɔ nwo ɔfi menli nwo ekyii, titili saa yɛyia tɛnlabelɛ mɔɔ ɛnle kpalɛ la wɔ yɛ ɛbɛlabɔlɛ nu. Noko saa yɛte yɛ nwo yɛkyɛ a, ɔbamaa yɛakpo adenle mumua ne mɔɔ Gyihova ɛlɛdua azo azɔ yɛ la. Ɔti ɔnva nwo kɛzi tɛnlabelɛ ne anu bayɛ se la, die moalɛ mɔɔ wɔ abusua ne, ɛ gɔnwo mɔ nee asafo nu mgbanyima ne mɔ fa maa wɔ la to nu. Bu bɛ kɛ bɛle ndenle mɔɔ Gyihova ɛlɛdua zo azɔ wɔ a.—Mrɛ. 17:17; Aye. 32:​1, 2.

GYIHOVA BAKYEKYE Ɛ RƐLE

14. Tɛnlabelɛ mɔɔ maa yɛ ahonle tu la boni mɔ a yɛbahola yɛahɔ nu a?

¹⁴ Ngyegyelɛ ne. Bie a yɛbahɔ tɛnlabelɛ ngakyile mɔɔ bamaa yɛ ahonle adu la anu. Wɔ Baebolo ne anu, Nyamenle azonvolɛ nɔhavoma hanle mekɛ mɔɔ bɛ agbɔvolɛ anzɛɛ ngyegyelɛ gyɛne ti bɛlile nyane na bɛ nwo wosole bɛ la anwo edwɛkɛ. (Edw. 18:4; 55:​1, 5) Zɔhane  ala a bie a yɛlɛyia dwazotia wɔ sukulu, gyima nu, yɛ abusua ne anu anzɛɛ yɛavi arane ne ɛkɛ a. Bie a anwodolɛ bie ati yɛsulo kɛ yɛbawu. Wɔ mekɛ zɛhae mɔ anu, bie a yɛbade nganeɛ kɛ yɛle kɛ kakula ekyi bie la, yɛngola yɛnyɛ ɛhwee. Kɛzi Gyihova boa yɛ wɔ tɛnlabelɛ zɛhae mɔ anu ɛ?

15. Anwodozo boni a Edwɛne 94:19 maa yɛnyia a?

¹⁵ Mɔɔ Gyihova yɛ la. Ɔkyekye yɛ rɛle na ɔmaa yɛ ahonle tɔ yɛ azule nu. (Kenga Edwɛne 94:19.) Bie a ngyɛnu ɛhye bamaa yɛadwenle kakula raalɛ ekyi bie mɔɔ ezule ne ɛlɛkulu la ati ye ahonle ɛdu na ɔngola da la anwo. Yɛbahola yɛapɛ ye nvoninli kɛ ye papa ɛra ɔ nwo ɛkɛ, yemaa ye zo na yelɛ ye ɔ sa zo too nafelɛ ɛva ye la. Ezule ne tɛkulu ɛdeɛ, noko ye papa via ye la ati, ɔ rɛle kyekye na ye ahonle ɛndu. Saa yɛlɛyia sɔnea mɔɔ maa yɛ ahonle tu la a, bie a ɔbahyia kɛ yɛ anwuma Selɛ ne fia yɛ wɔ sɛkɛlɛneɛ adenle zo kɔkpula kɛ yɛ nwo bagyinla yɛ la. Kɛ ɔkɛyɛ na yɛanyia arɛlekyekyelɛ zɛhae yɛavi Gyihova ɛkɛ ɛ?

16. Duzu a yɛbahola yɛayɛ amaa yɛanyia Gyihova arɛlekyekyelɛ ne azo nvasoɛ a? (Eza nea nvoninli ne.)

¹⁶ Mɔɔ ɔhyia kɛ yɛyɛ la. Ta nyia mekɛ maa Gyihova—yɛ asɔne na kenga ye Edwɛkɛ ne. (Edw. 77:​1, 12-14) Akee saa ɛkɔ ngyegyelɛ nu a, bie a debie mɔɔ ɛbalimoa wɔadwenle nwo la a le kɛ ɛbazɛlɛ wɔ anwuma Selɛ ne kɛ ɔboa wɔ. Ka ninyɛne mɔɔ ka wɔ ɛzulolɛ nee mɔɔ gyegye wɔ la kile Gyihova. Maa ɔlua Ngɛlɛlera ne azo ɔdendɛ ɔhile wɔ na ɔkyekye ɛ rɛle. (Edw. 119:28) Bie a ɛbanwu kɛ Baebolo ne ɛleka fɔɔnwo bie bahola akyekye ɛ rɛle wɔ mekɛ mɔɔ ɛzulolɛ baha wɔ la. Kɛ neazo la, yɛbahola yɛanyia arɛlekyekyelɛ yɛavi Dwobu, Edwɛne nee Mrɛlɛbulɛ mbuluku ne mɔ yɛɛ Gyisɛse edwɛkɛ mɔɔ wɔ Mateyu tile 6 la anu. Saa ɛfa wɔ asɔneyɛlɛ ɛto Gyihova anyunlu na ɛkenga ye Edwɛkɛ ne a, ɔbakyekye ɛ rɛle.

17. Anwodozo boni a yɛbahola yɛanyia a?

¹⁷ Yɛbahola yɛanyia anwodozo kɛ, Gyihova nee yɛ balua wɔ mekɛ mɔɔ anu yɛ se la anu. Ɔnrɛha yɛ ngome ɛlɛ. (Edw. 23:4; 94:14) Gyihova ɛbɔ ɛwɔkɛ kɛ ɔbabɔ yɛ nwo bane, ɔbamaa yɛ nwo agyinla yɛ, ɔbaboa yɛ na yeakyekye yɛ rɛle. Ayezaya 26:3 ka ye wɔ Gyihova anwo kɛ: “Ɛbabɔ menli mɔɔ tudu kisa wɔ bɔkɔɔ la anwo bane; ɛbamaa bɛanyia anzodwolɛ dahuu, ɔluakɛ wɔmɔ a bɛ rɛle wɔ wɔ nu a.” Ɔti fa ɛ nwo to Gyihova anwo zo na fa moalɛ mɔɔ Gyihova fa maa yɛ la di gyima. Saa ɛyɛ zɔ a, ɛbanyia anwosesebɛ wɔ mekɛ mɔɔ anu yɛ se bɔbɔ la anu.