EDWƐKƐ 3
EDWƐNE 35 ‘Nwu Ninyɛne Mɔɔ Hyia Kpalɛ’
Sisi Kpɔkɛ Mɔɔ Sɔ Gyihova Anye La
“Gyihova ɛzulolɛ le nrɛlɛbɛ mɔlebɛbo, yɛɛ Nwuanzanwuanza Ko ne ɛnwunlɛ le ndelebɛbo.”—MRƐ. 9:10.
BODANE
Kɛzi yɛbalua deɛnwunlɛ, ndelebɛbo nee adwenlenunwunlɛ zo yɛasisi kpɔkɛ kpalɛ la.
1. Ngyegyelɛ boni a yɛ muala yɛyia a?
KENLE ko biala yɛsisi kpɔkɛ. Kpɔkɛzilɛ bie mɔ ɛnyɛ se, bie a le aleɛ mɔɔ yɛbali ye nwonlomɔ anzɛɛ mekɛ mɔɔ yɛbava yɛala la. Ninyɛne bie mɔ noko anwo kpɔkɛzilɛ ɛnla aze. Bɛkola bɛka yɛ kpɔkɛdelɛ, yɛ anyelielɛ, yɛ alɔvolɛ anzɛɛ yɛ ɛzonlenlɛ. Yɛkulo kɛ yɛ kpɔkɛzilɛ ne mɔ boa yɛ nee yɛ abusua ne amuala. Mɔɔ tɛla biala la, yɛ nye la kɛ yɛ kpɔkɛzilɛ ne mɔ bazɔ Gyihova anye.—Wlo. 12:1, 2.
2. Duzu a baboa wɔ yeamaa wɔasisi kpɔkɛ kpalɛ a?
2 Saa ɛbahola wɔazi kpɔkɛ kpalɛ a, ɔwɔ kɛ (1) ɛnwu edwɛkɛ ne anu kpalɛ, (2) ɛnwu Gyihova adwenle wɔ edwɛkɛ ne anwo yɛɛ (3) ɛsuzu ndenle ngakyile noko anwo. Yɛbazuzu ninyɛne nsa ɛhye mɔ anwo wɔ edwɛkɛ ɛhye anu, yɛɛ eza ɔbaboa yɛ yeamaa yɛanwu kɛzi yɛbatete yɛ adwenle ne la.—Mrɛ. 2:11.
NWU EDWƐKƐ NE ANU KPALƐ
3. Yɛ deɛmɔti ɔhyia kɛ yɛnwu edwɛkɛ bie anu kpalɛ kolaa na yɛazi kpɔkɛ la anwo neazo.
3 Debie mɔɔ limoa mɔɔ ɔbamaa wɔazi kpɔkɛ kpalɛ la a le kɛ ɛbanwu edwɛkɛ ne akunlu nee ɔ nzi. Duzu ati a ɛhye anwo hyia a? Fa ye kɛ awie mɔɔ ɛnde kpɔkɛ fee la ɛhɔ dɔketa bie ɛkɛ. Asoo dɔketa ne badwazo ala ayɛ wuliravolɛ ne ayile mɔɔ ɔnrɛlimoa ɔnrɛnleɛnlea ye ewule ne anu anzɛɛ ɔnrɛbiza ye kpuya biala ɔ? Kyɛkyɛ. Saa ɛdawɔ noko ɛdimoa ɛsuzu wɔ tɛnlabelɛ ne anwo na ɛte ɔ bo kpalɛ a, ɔbamaa wɔasisi kpɔkɛ kpalɛ. Kɛ ɔkɛyɛ na wɔahola wɔayɛ zɔ ɛ?
4. Kɛ mɔɔ Mrɛlɛbulɛ 18:13 kile la, kɛ ɔkɛyɛ na wɔanwu kɛ wɔnwu edwɛkɛ ne anu kpalɛ ɛ? (Eza nea nvoninli ne.)
4 Saa ɛbiza kpuya ngakyile a, ɔbahola yeamaa wɔanwu edwɛkɛ ne anu kpalɛ. Kɛ neazo la, fa ye kɛ awie mɔ ɛlɛkɔ ahɔlielie bɛ nye na bɛdo ɛsalɛ bɛvɛlɛ wɔ. Ɔwɔ kɛ ɛkɔ ɔ? Saa ɛnze ahenle mɔɔ ɛlɛyɛ gyimalilɛ ne la kpalɛ anzɛɛ ɛnze nwolɛ ngyehyɛleɛ biala a, ɔhyia kɛ ɛbiza ye kpuya le kɛ ɛhye mɔ: “Nienwu a bɛbayɛ gyimalilɛ ne a, na bɛbayɛ ye mekɛ boni? Menli dɔɔnwo bara bie ɔ? Nwane a banlea zo a? Nwane mɔ a bara bie a? Nwɔhoa ngakyile boni a bɛbali wɔ ɛkɛ a? Bɛbava nza mɔɔ bo la bɛara ɔ bo ɔ?” Ɛnyia kpuya ɛhye mɔ anwo mualɛ a ɔbaboa wɔ yeamaa wɔazi kpɔkɛ kpalɛ.—Kenga Mrɛlɛbulɛ 18:13.
Biza kpuya ngakyile amaa wɔanwu edwɛkɛ ne anu kpalɛ (Nea ɛdendɛkpunli 4) a
5. Saa ɛnwu edwɛkɛ ne anu kpalɛ a, duzu a ɔwɔ kɛ ɛyɛ a?
5 Saa ɛnwu edwɛkɛ ne anu kpalɛ a, akee suzu mɔɔ ɔbahɔ zo wɔ ɛkɛ la anwo kɔ moa. Kɛ neazo la, saa ɛnwu kɛ menli mɔɔ bɛmbu Baebolo ngyinlazo la bara bie anzɛɛ nza mɔɔ bo la babu na awie biala banlo dodo biala mɔɔ ɔkulo la noko ɛ? Asoo ɛnwu kɛ gyimalilɛ ne bahola ahakyi ayɛ anyelielɛ mgbane mgbane ɔ? (1 Pita 4:3) Bieko, saa mekɛ mɔɔ bɛbava bɛayɛ gyimalilɛ ne la nee mekɛ mɔɔ ɛbava wɔahɔ debiezukoalɛ anzɛɛ daselɛlilɛ la yia noko ɛ? Mekɛ mɔɔ wɔnwu edwɛkɛ ne anu kpalɛ la, akee ɛbahola wɔazi kpɔkɛ kpalɛ. Noko debie bieko wɔ ɛkɛ mɔɔ ɔwɔ kɛ ɛyɛ a. Kɛkala wɔmɔ wɔnwu kɛzi tɛnlabelɛ ne de la o; noko kɛzi Gyihova te nganeɛ wɔ nwo ɛ?—Mrɛ. 2:6.
SUZU ADWENLE MƆƆ GYIHOVA LƐ LA ANWO
6. Kɛ mɔɔ Gyemise 1:5 kile la, duzu ati a ɔwɔ kɛ yɛsɛlɛ Gyihova kɛ ɔboa yɛ a?
6 Sɛlɛ Gyihova kɛ ɔboa wɔ ɔmaa ɛnwu adwenle mɔɔ ɔlɛ wɔ edwɛkɛ ne anwo la. Gyihova ɛbɔ ɛwɔkɛ kɛ ɔbamaa yɛ nrɛlɛbɛ amaa yɛanwu kɛ saa kpɔkɛ bie mɔɔ yɛlɛsi la bazɔ ɔ nye a. “Ɔfi atiakunlukɛnlɛma nu ɔmaa menli kɔsɔɔti” nrɛlɛbɛ zɛhae mɔɔ “ɔnva nwolɛ ɛya” a.—Kenga Gyemise 1:5.
7. Kɛ ɔkɛyɛ na wɔanwu adwenle mɔɔ Gyihova lɛ wɔ edwɛkɛ bie anwo la ɛ? Maa neazo.
7 Saa ɛyɛ asɔne ɛsɛlɛ Gyihova kɛ ɔhile wɔ adenle a, tie mualɛ mɔɔ ɔbava yeamaa wɔ la kpalɛ. Kɛ neazo la: Saa ɛlɛtu adenle na ɛminli a, bie a ɛbabiza ekulomeni bie wɔamaa yeaboa wɔ. Noko saa ahenle ɛtɛmaanle wɔ mualɛ a, asoo ɛbavi ɔ nwo ɛkɛ ne wɔahɔ? Kyɛkyɛ. Ɛbadie adehilelɛ mɔɔ ɔbava yeamaa wɔ la kpalɛ. Zɔhane ala a saa ɛsɛlɛ Gyihova kɛ ɔmaa wɔ nrɛlɛbɛ a, bɔ mɔdenle kɛ ɛbanwu mualɛ ne, ɔlua Baebolo ne anu mɛla nee ngyinlazo ngakyile mɔɔ fale wɔ tɛnlabelɛ ne anwo mɔɔ ɛbanwu ye la azo. Kɛ neazo la, saa ɛlɛsi kpɔkɛ kɛ ɛbahɔ gyimalilɛ ne mɔɔ yɛlimoa yɛha nwolɛ edwɛkɛ la abo anzɛɛ ɛnrɛhɔ a, ɛbahola wɔazuzu mɔɔ Baebolo ne ka ye wɔ anyelielɛ mgbane mgbane, agɔnwolɛ ɛtane nee kɛzi ɔhyia kɛ yɛbava Belemgbunlililɛ ne yɛalimoa ninyɛne mɔɔ yɛkulo la anyunlu la anwo.—Mat. 6:33; Wlo. 13:13; 1 Kɔl. 15:33.
8. Saa ɛhyia moalɛ amaa wɔanwu edwɛkɛ mɔɔ ɛlɛkpondɛ la a, duzu a ɛbahola wɔayɛ a? (Eza nea nvoninli ne.)
8 Noko ɔyɛ a ɛbahyia moalɛ amaa wɔnwu edwɛkɛ mɔɔ ɛlɛkpondɛ la. Ɛbahola wɔabiza adiema nrenyia anzɛɛ raalɛ bie mɔɔ bɔ mɔdenle la. Noko saa ɛdawɔ mumua ne ɛyɛ nwolɛ neɛnleanu a ɔbaboa wɔ. Edwɛkɛ dɔɔnwo mɔɔ baboa wɔ la wɔ Gyihova Alasevolɛ Neɛnleanu Buluku ne nee Kilisiene Ɛbɛlabɔlɛ Nwo Ngɛlɛlera ne mɔɔ yɛfa yɛyɛ neɛnleanu la anu. Kakye kɛ wɔ bodane a le kɛ ɛsi kpɔkɛ mɔɔ sɔ Gyihova anye la.
Suzu adwenle mɔɔ Gyihova lɛ la anwo (Nea ɛdendɛkpunli 8) b
9. Kɛ ɔkɛyɛ na yɛanwu kɛ yɛ kpɔkɛzilɛ bazɔ Gyihova anye ɛ? (Ɛfɛsɛsema 5:17)
9 Kɛ ɔkɛyɛ na yɛanwu kɛ yɛ kpɔkɛzilɛ bazɔ Gyihova anye ɛ? Mɔɔ limoa la, ɔhyia kɛ yɛnwu ye kpalɛ. Baebolo ne hanle kɛ: “Nwuanzanwuanza Ko ne ɛnwunlɛ le ndelebɛbo.” (Mrɛ. 9:10) Amgba, saa yɛbanyia nɔhalɛ ndelebɛbo a, kyesɛ yɛnwu Gyihova subane ne mɔ, ye bodane nee ninyɛne mɔɔ ɔkulo anzɛɛ ɔkyi la. Biza ɛ nwo kɛ, ‘Ɔlua mɔɔ meze wɔ Gyihova anwo la ati, kpɔkɛ boni a mesi a ɔbazɔ ɔ nye a?’—Kenga Ɛfɛsɛsema 5:17.
10. Duzu ati a Baebolo ngyinlazo hyia kpalɛ tɛla amaamuo a?
10 Ɔdwu mekɛ ne bie a, amaa yɛazɔ Gyihova anye la, ɔwɔ kɛ yɛyɛ ninyɛne mɔɔ menli mɔɔ bikye yɛ kpalɛ la anye ɛnlie nwolɛ la. Kɛ neazo la, bie a adwenle kpalɛ bie ati awovolɛ bie mɔ bagyinla zo kyengye kɛ ɔwɔ kɛ bɛ ra raalɛ bie gya nrenyia mɔɔ ɛnyia ɔ nwo anzɛɛ ɔbahola yeadua ɔ ti asoa kpole la ɔnva nwo kɛ bie a nrenyia ne ɛmbɔ mɔdenle wɔ sunsum nu la. Nɔhalɛ nu, bɛkulo kɛ bɛ ra raalɛ ne nyia awie mɔɔ ɔbahola ye nea la, noko nwane a baboa ye yeamaa yeanyia anyuhɔlɛ wɔ sunsum nu a? Kɛzi Gyihova nwu edwɛkɛ ɛhye ɛ? Mualɛ ne wɔ Mateyu 6:33. Bɛha bɛhile Kilisienema wɔ ɛkɛ ne kɛ “bɛhɔ zo bɛlimoa bɛkpondɛ Belemgbunlililɛ ne.” Yɛdi yɛ awovolɛ eni yɛɛ yɛbu menli mɔɔ wɔ yɛ sua zo la ɛdeɛ, noko mɔɔ hyia yɛ kpalɛ la a le kɛ yɛbamaa Gyihova anye alie.
SUZU NDENLE NGAKYILE NOKO ANWO
11. Subane boni a Felepaema 1:9, 10 ka kɛ ɔbaboa wɔ yeamaa wɔazuzu ndenle ngakyile nwo a?
11 Saa ɛnwu Baebolo ngyinlazo mɔɔ fale wɔ kpɔkɛzilɛ ne anwo la ɛwie a, akee ɔwɔ kɛ ɛsuzu ndenle ngakyile mɔɔ wɔ ɛkɛ la anwo. (Kenga Felepaema 1:9, 10.) Adwenlenunwunlɛ baboa wɔ yeamaa wɔanwu mɔɔ bavi adenle ko biala mɔɔ ɛbalua zo wɔayɛ deɛ ne la anu ara la. Ɔdwu mekɛ ne bie a ɔnyɛ se kɛ ɛbazi kpɔkɛ. Noko tɛ mekɛ ne amuala a ɔla aze kɛ ɛbasisi kpɔkɛ a. Adwenlenunwunlɛ baboa wɔ yeamaa wɔasisi kpɔkɛ kpalɛ bɔbɔ wɔ tɛnlabelɛ mɔɔ anu yɛ se la anu.
12-13. Kɛ ɔkɛyɛ na adwenlenunwunlɛ aboa wɔ yeamaa wɔazi gyimayɛlɛ nwo kpɔkɛ kpalɛ ɛ?
12 Maa yɛyɛ neazo bie. Fa ye kɛ ɛlɛkpondɛ gyima mɔɔ ɛbayɛ wɔanlea wɔ abusua ne la. Wɔnyia gyima ngakyile nwiɔ. Wɔzuzu gyima ne anwo ninyɛne dɔɔnwo le kɛ gyima holɛ, mekɛ mɔɔ ɛbava wɔayɛ gyima ne, adenle mɔɔ ɛbapɛ wɔahɔ nee mɔɔ bokɛboka nwo la anwo. Ngɛlɛlera ne ɛndendɛ ɛntia gyima nwiɔ ne anu biala. Bie a ɛ nye die ko anwo ɔlua kɛzi gyima ne de anzɛɛ ɔluakɛ ahatualɛ ne le kpole. Noko ninyɛne gyɛne wɔ ɛkɛ mɔɔ ɔwɔ kɛ ɛsuzu nwo kolaa na wɔazi kpɔkɛ a.
13 Kɛ neazo la, asoo gyima ne anu biala baha mekɛ mɔɔ ɛfa ɛkɔ debiezukoalɛ la ɔ? Gyima ne anu biala baha mekɛ mɔɔ ɛbanyia wɔamaa wɔ abusua ne nee mekɛ mɔɔ bɛbava bɛayɛ sunsum nu ninyɛne la ɔ? Ɛbiza ɛ nwo kpuya ɛhye mɔ a ɔbaboa wɔ yeamaa wɔava “ninyɛne mɔɔ hyia kpalɛ la”—wɔ ɛzonlenlɛ nee wɔ abusua ne ngyianlɛ—wɔalimoa ezukoa nyunlu. Ɛhye bamaa wɔazi kpɔkɛ mɔɔ Gyihova bayila zo la.
14. Saa yɛda adwenlenunwunlɛ nee ɛlɔlɛ ali a, kɛzi ɔbaboa yɛ amaa yɛammaa awie mɔ amkpo aze ɛ?
14 Eza adwenlenunwunlɛ boa yɛ maa yɛdwenle kɛzi yɛ kpɔkɛzilɛ baha awie mɔ la anwo amaa yɛammaa “awie mɔ amkpo aze.” (Fel. 1:10) Ɛhye anwo hyia wɔ mekɛ mɔɔ yɛlɛsisi yɛ ti anwo kpɔkɛ ngakyile wɔ tɛladeɛwulalɛ nee anwoziezielɛ nwo la. Kɛ neazo la, bie a yɛ nye die kɛzi bɛkpomgba tɛladeɛ bie anzɛɛ anwoziezielɛ bie anwo. Noko saa ɔbagyegye menli mɔɔ wɔ asafo ne anu anzɛɛ menli mɔɔ bɛnle nu la noko ɛ? Adwenlenunwunlɛ baboa yɛ yeamaa yɛadwenle bɛ nganeɛdelɛ nwo. Ɛlɔlɛ baha yɛ yeamaa yɛakpondɛ “awie mɔ” boɛyɛlɛ na yɛabɛlɛ yɛ nwo aze. (1 Kɔl. 10:23, 24, 32; 1 Tim. 2:9, 10) Yemɔ bamaa yɛazi kpɔkɛ mɔɔ kile kɛ yɛkulo awie mɔ yɛɛ yɛbu bɛ la.
15. Ngyehyɛleɛ boni a ɔwɔ kɛ ɛyɛ amaa wɔali kpɔkɛ bie mɔɔ ɛzile la anwo gyima a?
15 Saa ɛlɛsi kpɔkɛ bie mɔɔ hyia kpalɛ la a, dwenle ninyɛne mɔɔ ɔwɔ kɛ ɛyɛ na wɔahola wɔali nwolɛ gyima la anwo. Gyisɛse hilehilele yɛ kɛ ‘yɛsese ye bolɛ’ ne. (Luku 14:28) Ɔti suzu mekɛ dodo, ninyɛne mɔɔ ɛbahyia yɛɛ mɔdenle mɔɔ ɔwɔ kɛ ɛbɔ amaa wɔali wɔ kpɔkɛzilɛ ne anwo gyima la anwo. Ɔdwu mekɛ ne bie a ɔwɔ kɛ ɛka nwolɛ edwɛkɛ ɛkile wɔ abusua ne amaa wɔanwu mɔɔ ɔhyia kɛ bɛ nuhua ko biala yɛ fa boa la. Duzu ati a ngyehyɛleɛ zɛhae anwo hyia a? Ɔbahola yeamaa wɔanwu kɛ ɔhyia kɛ ɛyɛ nzenzaleɛ bie wɔ wɔ kpɔkɛzilɛ ne anu anzɛɛ ɛdua adenle gyɛne zo ɛyɛ deɛ ne a yemɔ baboa kpalɛ. Yɛɛ saa ɛka nwolɛ edwɛkɛ ɛkile wɔ abusua ne na ɛtie mɔɔ bɛlɛ bɛka la a, ɔbamaa bɛanyia ɛhulolɛ kɛ bɛboa wɔ bɛamaa wɔ kpɔkɛzilɛ ne awie boɛ.—Mrɛ. 15:22.
SI KPƆKƐ MƆƆ ƆBAWIE BOƐ LA
16. Duzu a baboa wɔ yeamaa wɔazi kpɔkɛ mɔɔ ɔbawie boɛ la ɛ? (Eza nea ɛlɛka, “ Kɛ Ɔkɛyɛ Na Wɔazi Kpɔkɛ Kpalɛ La.”)
16 Saa wɔli ninyɛne mɔɔ yɛlimoa yɛha nwolɛ edwɛkɛ la azo a, ɛnee wɔziezie ɛ nwo kɛ ɛbazi kpɔkɛ kpalɛ. Wɔzukoa ninyɛne mɔɔ baboa wɔ nee ngyinlazo mɔɔ bamaa wɔazi kpɔkɛ mɔɔ sɔ Gyihova anye la. Akee ɛbahola wɔazɛlɛ Gyihova kɛ ɔboa wɔ ɔmaa wɔ kpɔkɛzilɛ ne ɛwie boɛ.
17. Duzu titili a bamaa wɔasisi kpɔkɛ kpalɛ a?
17 Saa wɔsisi kpɔkɛ ngakyile mɔɔ wiele boɛ la wɔ dɛba ne bɔbɔ a, kakye kɛ debie titili mɔɔ baboa wɔ yeamaa wɔasisi kpɔkɛ kpalɛ la a le kɛ ɛbava ɛ nwo wɔado nrɛlɛbɛ ne mɔɔ vi Gyihova ɛkɛ la azo, na tɛ ɛdawɔ wɔ nrɛlɛbɛ anzɛɛ anwubielɛ zo ɔ. Gyihova ala a bahola amaa wɔ nɔhalɛ deɛnwunlɛ, ndelebɛbo yɛɛ adwenlenunwunlɛ a—ninyɛne ɛhye mɔ a maa yɛnwu nrɛlɛbɛ a. (Mrɛ. 2:1-5) Gyihova bahola aboa wɔ yeamaa wɔasisi kpɔkɛ mɔɔ sɔ ɔ nye la.—Edw. 23:2, 3.
EDWƐNE 28 Awie Mɔɔ Gyihova Fa Ye Agɔnwolɛ
