1, 2. Kɛzi ɛzoanvolɛ Pɔɔlo hilele kɛ ɔ nye sɔ Nyamenle ɛlolɛ ne ɛ?

ƐZOANVOLƐ Pɔɔlo holale hanle ye wienyi kɛ: “[Nyamenle] ɛlolɛ ne mɔɔ ɔvale ɔlole me la anyɛ gyɛne.” (Kenga 1 Kɔl. 15:9, 10.) Pɔɔlo ze kɛ kɛ mɔɔ ɛnee ɔkpɔ Kilisienema la ati, ɔnfɛta anzɛɛ tɛ ye mɔdenlebɔlɛ a maanle Nyamenle nwunle ye anwunvɔne a.

² Mɔɔ ɔka ekyi Pɔɔlo wu la, ɔhɛlɛle ɔ gɔnwo gyimayɛvo Temɔte kɛ: “Meyɛ yɛ Awulae Kelaese Gyisɛse mɔɔ ɛmaa me anwosesebɛ wɔ me gyima ne anwo la mo. Meyɛ ye mo kɛ yebu me bie na yeva me wɔ ye gyima nu a.” (1 Tem. 1:12-14) Duzu gyima ɔ? Mɔɔ Pɔɔlo ka gyima ɛhye anwo edwɛkɛ ahile mgbanyima mɔɔ bɛwɔ Ɛfɛsɛse asafo ne anu la, ɔhanle kɛ: “Me ngoane ɛdeɛ, mendwenle nwolɛ, amaa meahola meawie Awulae Gyisɛse gyima ne mɔɔ yeva yemaa me kɛ membɔ Edwɛkpa ne mɔɔ fane Nyamenle ɛlolɛ ne anwo la nolo.”​—Gyi. 20:24.

3. Gyima titili boni a bɛvale bɛmaanle Pɔɔlo a? (Nea mɔlebɛbo nvoninli ne.)

 ³ Duzu “edwɛkpa” a Pɔɔlo bɔle ye nolo mɔɔ ɔda Gyihova ɛlolɛ ne ali a? Ɔzele Ɛfɛsɛse Kilisienema ne kɛ: “Bɛde kɛ Nyamenle ɛlolɛ zo ala yɛɛ yeva gyima ɛhye yemaa me kɛ menyɛ a, wɔ bɛ kpalɛ ti.” (Ɛfɛ. 3:1, 2) Bɛmaa Pɔɔlo gyima kɛ ɔbɔ edwɛkpa ne nolo ɔhile bɛdabɛ mɔɔ bɛnle Dwuuma la, amaa bɛaboka menli mɔɔ bɛ nee Kelaese bɛabɔ nu ali tumi wɔ Mɛzaya Belemgbunlililɛ ne anu la anwo. (Kenga Ɛfɛsɛsema 3:5-8.) Kɛzi Pɔɔlo bɔle mɔdenle yɛle ye ɛzonlenlɛ gyima ne la le neazo kɛnlɛma maa yɛ mekɛ ye azo Kilisienema, na ɔhilele kɛ Nyamenle ɛlolɛ ne mɔɔ ɔvale ɔlole ye la “anyɛ gyɛne.”

4, 5. Duzu ati a yɛkola yɛka kɛ ‘Belemgbunlililɛ edwɛkpa ne’ nee “Edwɛkpa ne mɔɔ fane Nyamenle ɛlolɛ ne anwo” la le ko ɛ?

⁴ Wɔ awieleɛ mekɛ ɛhye anu, bɛmaa Gyihova menli gyima kɛ bɛbɔ “Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra.” (Mat. 24:14) Edwɛkpa ɛhye mɔɔ yɛbɔ ye nolo la ko ne ala a le “Edwɛkpa ne mɔɔ fane Nyamenle ɛlolɛ ne anwo la,” ɔluakɛ Gyihova ɛlolɛ ti yɛbalua Kelaese anwo zo yɛanyia nyilalɛ ɛhye mɔ wɔ Belemgbunlililɛ ne abo. (Ɛfɛ. 1:3) Asoo yɛ muala yɛbazukoa Pɔɔlo neazo ne na yɛahile Gyihova ɛlolɛ ne anwo anyezɔlɛ ɔlua mɔdenlebɔlɛ mɔɔ yɛbava yɛayɛ ɛzonlenlɛ gyima ne la azo ɔ?​—Kenga Wulomuma 1:14-16.

⁵ Kɛ ɛtanevolɛma la, yɛnwunle kɛzi yɛlɛnyia Gyihova ɛlolɛ ne azo nvasoɛ la wɔ edwɛkɛ mɔɔ li ɛhye anyunlu la anu. Ɛhye ati, ɔle yɛ gyima kɛ yɛbamaa awie mɔ anwu kɛzi Gyihova ɛlɛda ye ɛlɔlɛ ne ali nee mɔɔ ɔwɔ kɛ bɛ nuhua biala yɛ na yeanyia zolɛ nvasoɛ la. Nyamenle ɛlolɛ ne mɔɔ ɔwɔ kɛ yɛboa awie mɔ yɛmaa bɛnwu ye la bie a le boni mɔ?

6, 7. Saa yɛkilehile ɛkpɔnedeɛ ne anu yɛkile awie mɔ a, kɛzi ɔkile kɛ yɛlɛbɔ edwɛkpa ne mɔɔ fale Nyamenle ɛlolɛ ne anwo la nolo ɛ?

⁶ Kɛmɔ awie biala kola yɛ mɔɔ ɔdaye ɔkulo wɔ ewiade ɛhye anu la ati, ɔmmaa menli dɔɔnwo ɛnnwu ye kɛ bɛle ɛtanevolɛma na ɔwɔ kɛ bɛkpɔne bɛ. Wɔ mekɛ ko ne ala anu, menli dɔɔnwo kola nwu kɛ tɛ debie biala mɔɔ bɛkulo mɔɔ bɛbayɛ la a maa bɛ nye die a. Saa menli dɔɔnwo nee Gyihova Alasevolɛ ɛtɛbɔle adawu a, bɛnnwu ɛtane deɛ holɛ, kɛzi ɔka yɛ nee mɔɔ ɔwɔ kɛ yɛyɛ na bɛalie yɛ bɛavi ɛtane tumi bo la. Saa ahonle kpalɛma nwu kɛ Gyihova ɛlɔlɛ kpole ne nee ye ɛlolɛ ti a ɔzoanle ɔ Ra ne kɛ ɔrakpɔne yɛ ɔvi ɛtane nee ewule nu a, ɔmaa bɛ ahonle tɔ bɛ azule nu.​—1 Dwɔn 4:9, 10.

⁷ Mɔɔ Pɔɔlo ka Gyihova kulovolɛ Ralɛ ne anwo edwɛkɛ la, ɔhɛlɛle kɛ: “Kelaese ewule ne ati bɛva yɛ ɛtane ne mɔ bɛhyɛ yɛ na yɛnyia yɛ ti. Nyamenle ɛlolɛ ne” ati. (Ɛfɛ. 1:7) Kelaese ɛkpɔnelɛ afɔle ne kile kɛ Nyamenle kulo yɛ kpalɛ na ɔmaa yɛnwu Ye ɛlolɛ ne. Ɔyɛ yɛ fɛ kɛ saa yɛnyia Gyisɛse afɔlebɔlɛ ne anu diedi a, bɛbava yɛ ɛtane bɛahyɛ yɛ na yɛanyia adwenle mɔɔ anu te la! (Hib. 9:14) Amgba ɛhye le edwɛkpa mɔɔ ɔwɔ kɛ yɛka nwolɛ edwɛkɛ yɛkile awie mɔ a!

8. Duzu ati a ɔwɔ kɛ ɛtanevolɛma nee Nyamenle bɔ nu bieko a?

⁸ Ɔle yɛ gyima kɛ yɛbamaa awie mɔ anwu kɛ bɛbahola bɛava bɛ Bɔvolɛ  ne agɔnwolɛ. Kolaa na alesama anyia diedi wɔ Gyisɛse afɔlebɔlɛ ne anu la, Nyamenle bu bɛ kɛ bɛle ye agbɔvolɛ. Ɛzoanvolɛ Dwɔn hɛlɛle kɛ: “Awie biala mɔɔ die Ralɛ ne di la lɛ ngoane mɔɔ ɛnlɛ awieleɛ, na mɔɔ kɛkpo kɛ ɔnrɛlie Ralɛ ne ɔnrɛli la ɛnrɛnyia ngoane mɔɔ ɛnlɛ awieleɛ la ɛlɛ, Nyamenle ndeanlɛ ne wɔ ɔ nwo zo dahuu.” (Dwɔn 3:36) Ɔyɛ anyelielɛ kɛ Kelaese ewule ne maa yɛkola yɛ nee Nyamenle bɔ nu bieko la. Pɔɔlo hanle kɛ: “Ninyɛndane mɔɔ bɛyɛle nee bɛ adwenle ɛtane mɔɔ bɛlɛ ye la ati, ɛnee bɛ nee Nyamenle bɛ avinli twe, na bɛle ye agbɔvolɛ. Na kɛkala, ɔlua Kelaese ewule ne azo bɛyɛ Nyamenle agɔnwo mɔ.”​—Kɔl. 1:21, 22.

9, 10. (a) Gyima boni a Kelaese vale maanle ɔ mediema mɔɔ bɛkpokpa bɛ la ɛ? (b) Kɛzi ‘mboane gyɛne’ ne boa bɛ mediema mɔɔ bɛkpokpa bɛ la ɛ?

⁹ Kɛ mɔɔ Pɔɔlo hanle la, Kelaese ɛva “edwɛkɛ ne mɔɔ fane kɛ menli si yɛ ɔ gɔnwo mɔ” anwo la ɛwula ɔ mediema mɔɔ bɛkpokpa bɛ mɔɔ bɛwɔ azɛlɛ ye azo la asa nu. Mɔɔ Pɔɔlo kilehile ɛhye anu ahile ɛvoya mɔɔ limoa Kilisienema ne la, ɔhɛlɛle kɛ: “Nyamenle a ɛyɛ ɛhye amuala a, na yelua Kelaese anwo zo yeyɛ yɛ ɔ gɔnwo mɔ, yɛɛ yemaa yɛ gyima kɛ yɛdayɛ noko yɛhwe menli yɛrayɛ bɛ ɔ gɔnwo mɔ. Yemɔ a le kɛ, Nyamenle lua Kelaese anwo zo ɛlɛtwe menli muala ayɛ bɛ ɔ gɔnwo mɔ. Nyamenle ambu bɛ ɛtane ne mɔ anwo mgbonda antia bɛ na yeva edwɛkɛ ne mɔɔ fane kɛ menli si yɛ ɔ gɔnwo mɔ la yewula yɛ sa nu. Yɛle Kelaese agyakɛ anu gyinlavolɛma, na ɔlua yɛ nwo zo Nyamenle ɛlɛtu folɛ. Zɔhane ati yɛgyi Kelaese agyakɛ anu yɛbodo yɛsɛlɛ bɛ kɛ bɛmaa Nyamenle adenle bɛmaa ɔhakyi bɛ kɛ bɛnle agbɔvolɛ na bɛle ɔ gɔnwo mɔ.”​—2 Kɔl. 5:18-20.

¹⁰ ‘Mboane gyɛne’ ne nwu ye kɛ ɔle nwolɛ adenle kpole kɛ bɛbaboa bɛ mediema mɔɔ bɛkpokpa bɛ la wɔ gyima ɛhye ɛyɛlɛ nu. (Dwɔn 10:16) Kɛ mɔɔ yɛbaha ye la, bɛle Kelaese soanvolɛma yemɔti bɛlɛbɔ mɔdenle bɛahilehile menli sunsum nu nɔhalɛ ne na bɛaboa bɛ bɛamaa bɛ nee Gyihova anyia agɔnwolɛvalɛ. Ɛhye boka edwɛkpa ne mɔɔ fale Nyamenle ɛlolɛ ne anwo daselɛ mɔɔ yɛdi la anwo.

11, 12. Duzu ati a saa menli nwu kɛ Gyihova tie bɛ asɔneyɛlɛ a, ɔle edwɛkpa ɔmaa bɛ ɛ?

¹¹ Menli dɔɔnwo yɛ asɔne ɔluakɛ ɔmaa bɛ nwo tɔ bɛ, na tɛ kɛ bɛze kɛ Nyamenle tie bɛ asɔneyɛlɛ la ati ɔ. Ɔwɔ kɛ bɛnwu kɛ Gyihova ‘tie nzɛlɛlɛ.’ Edwɛndolɛnli Devidi hɛlɛle kɛ: “Wɔmɔ mɔɔ ɛtie yɛ nzɛlɛlɛ la! Wɔ ɛkɛ ne yɛɛ menli kɔsɔɔti ba . . . a. Saa yɛ mɛladonlɛ ne mɔ bo yɛ nwo zo a, ɛfa ɛkyɛ yɛ.”​—Edw. 65:2, 3.

¹² Gyisɛse zele ye ɛdoavolɛma kɛ: “Saa bɛbiza debie biala wɔ me duma nu a, mebayɛ.” (Dwɔn 14:14) Ɔda ali kɛ “debie biala” kile debie biala mɔɔ ɔ nee Gyihova ɛhulolɛdeɛ yia la. Dwɔn maanle yɛ anwosesebɛ kɛ: “Yɛsi pi wɔ Nyamenle anu, yɛɛ yɛdie yɛdi kɛ saa yɛdua ye ɛhulolɛ zo yɛbiza ye debie biala a ɔtie yɛ.” (1 Dwɔn 5:14) Ɔwɔ kɛ yɛkilehile awie mɔ yɛmaa bɛnwu kɛ, asɔneyɛlɛ ɛmmaa bɛ adwenle ɛngyinla ala, emomu ɔle nwolɛ adenle mɔɔ yɛdua zo “yɛbikye Nyamenle belemgbunli ebia ne mɔɔ ɛlolɛ ɛyi ye tɛkɛɛ la anwo” a! (Hib. 4:16) Saa yɛkilehile bɛ yɛmaa bɛnwu kɛzi bɛbayɛ asɔne, Ahenle mɔɔ ɔwɔ kɛ bɛsɛlɛ ye nee ninyɛne mɔɔ ɔwɔ kɛ bɛyɛ nwolɛ asɔne la a, yɛbahola yɛaboa bɛ yɛamaa bɛabikye  Gyihova na bɛanyia arɛlekyekyelɛ wɔ ngyegyelɛ mekɛ nu.​—Edw. 4:1; 145:18.

13, 14. (a) Nwolɛ adenle titili boni a bɛdabɛ mɔɔ bɛkpokpa bɛ la banyia ye kenle bie a? (b) Gyima titili boni a bɛdabɛ mɔɔ bɛkpokpa bɛ la bayɛ amaa alesama a?

¹³ Yɛbanyia Gyihova ɛlolɛ ne azo nvasoɛ bɔbɔ wɔ ewiade fofolɛ ne anu. Mɔɔ Pɔɔlo ka nwolɛ adenle titili mɔɔ Nyamenle ɛva ɛmaa menli 144,000 ne mɔɔ bɛ nee Kelaese bali tumi wɔ ye anwuma Belemgbunlililɛ ne anu la anwo edwɛkɛ la, ɔhɛlɛle kɛ: “Nyamenle anwunvɔnezelɛ ne zonle, yɛɛ ye ɛhulolɛ mɔɔ wɔ yɛ nwo zo la le kpole bo zolɛ, yemɔti mekɛ mɔɔ ɛnee yɛwu sunsum nu wɔ yɛ mɛladonlɛ ti la, ɔvale yɛ nee Kelaese ɔrale ngoane nu. Ɔlua Nyamenle ɛlolɛ ti yɛɛ bɛlie bɛ ngoane a. Yɛ nee Kelaese Gyisɛse ɛyɛ ko la ati, Nyamenle ɛdwazo yɛ nee Kelaese kɛ yɛ nee ye ɛhɔli belemgbunli wɔ anwuma. Ɔyɛle ɛhye amuala ɔhilele ye ɛlolɛ totohyia ne mɔɔ bɛngola bɛnzuzu la nee atiakunlukɛnlɛma mɔɔ ɔlua Kelaese Gyisɛse ati dahuu ɔlɛ ye wɔ yɛ nwo la.”​—Ɛfɛ. 2:4-7.

¹⁴ Yɛnnwu kɛzi yɛka ninyɛne ngɛnlɛma mɔɔ Gyihova bava amaa Kilisienema mɔɔ bɛkpokpa bɛ wɔ mekɛ mɔɔ bɛ nee Kelaese dede arelemgbunli mbia zo ali tumi wɔ anwuma la anwo edwɛkɛ a. (Luku 22:28-30; Fel. 3:20, 21; 1 Dwɔn 3:2) Gyihova bala “ye ɛlolɛ totohyia ne” ali ahile bɛdabɛ titili. Bɛbabɔ nu bɛayɛ “Gyɛlusalɛm fofolɛ,” Kelaese atɔfolɛ raalɛ ne. (Yek. 3:12; 17:14; 21:2, 9, 10) Bɛ nee Gyisɛse bamaa “maanle maanle ne mɔ ngoane,” na bɛamaa alesama mɔɔ yɛ tieyɛ la ali munli ngyikyingyikyi mɔɔ bɛnyɛ ɛtane na bɛawu a.​—Kenga Yekile 22:1, 2, 17.

15, 16. Kɛzi Gyihova bala ye ɛlolɛ ne ali ahile ‘mboane gyɛne’ ne kenle bie ɛ?

¹⁵ Yɛkenga wɔ Ɛfɛsɛsema 2:7 (NW) kɛ Nyamenle bala ye ɛlolɛ totohyia ne ali wɔ “ewiade ne mɔɔ ɛlɛba la anu.” Ɔda ali kɛ, Gyihova bala “ye ɛlolɛ totohyia ne” ali wɔ ngyehyɛleɛ fofolɛ ne mɔɔ bara azɛlɛ ye azo la anu. (Luku 18:29, 30) Gyihova ɛlolɛ totohyia ne mɔɔ ɔbala ye ali wɔ azɛlɛ ye azo la anu ko a le alesama mɔɔ ɔbadwazo bɛ yeavi “ɛbolɔ” la. (Dwobu 14:13-15; Dwɔn 5:28, 29) Bɛbadwazo nɔhavoma mɔɔ bɛwule kolaa na Kelaese awu, yɛɛ ‘mboane gyɛne’ ne anu amra mɔɔ bɛwule nɔhalɛ nu wɔ awieleɛ mekɛ ne anu la amuala bɛara ngoane nu amaa bɛahɔ zo bɛazonle Gyihova.

¹⁶ Bɛbadwazo menli mgbe dɔɔnwo mɔɔ bɛannwu Nyamenle na bɛawu la noko bɛara ngoane nu. Bɛbamaa bɛ nwolɛ adenle bɛamaa bɛazukoa Gyihova anwo debie na bɛagyinla ye tumililɛ ne afoa. Dwɔn hɛlɛle kɛ: “Menwunle mɔwuamra, mgbole nee ngyikyi kɔsɔɔti, kɛ bɛgyigyi belemgbunli ebia kpole ne anyunlu, na bɛbukebuke mbuluku nu wɔ ɛkɛ. Eza bɛbukele teasema buluku ne noko anu, na bɛbuale mɔwuamra ndɛne wɔ mɔɔ bɛyɛle na bɛhɛlɛ bɛ wɔ mbuluku ne mɔ anu la anwo. Nyevile kpule menli mɔɔ yeva bɛ la. Ewule nee Ɛbolɔ yele bɛ ɛdeɛ mɔɔ bɛvale bɛziele la vindele, na bɛbuale bɛ muala ndɛne wɔ mɔɔ bɛyɛle la anwo.” (Yek. 20:12, 13) Nɔhalɛ nu, ɔwɔ kɛ menli mɔɔ bɛbadwazo bɛ la sukoa kɛ bɛbava Baebolo nu ngyinlazo bɛabɔ bɛ ɛbɛla. Bieko, ɔwɔ kɛ bɛdi adehilelɛ fofolɛ mɔɔ bɛbala ye ali wɔ “mbuluku” mɔɔ maa yɛnwu mɔɔ Gyihova kpondɛ kɛ yɛyɛ wɔ ewiade fofolɛ ne anu la azo. Mbuluku ɛhye anu edwɛkɛ ne mɔɔ bɛbala ye ali la noko boka Gyihova ɛlolɛ ne anwo.

17. Mekɛ biala mɔɔ yɛlua daselɛlilɛ nu la, duzu a ɔwɔ kɛ yɛkakye a?

¹⁷ Wɔ awieleɛ mekɛ ɛhye anu, gyima mɔɔ ɔwɔ kɛ yɛyɛ ye ɛsesebɛ la a le kɛ yɛbabɔ Belemgbunlililɛ edwɛkpa ne nolo! (Maake 13:10) Ɔda ali wienyi kɛ edwɛkpa ne da Gyihova ɛlolɛ ne ali. Ɔwɔ kɛ yɛkakye ɛhye wɔ mekɛ biala mɔɔ yɛlua daselɛlilɛ nu la. Bodane mɔɔ ɔti yɛka edwɛkɛ ne la a le kɛ yɛwula Gyihova anyunlunyia. Yɛyɛ ɛhye wɔ mekɛ mɔɔ yɛbamaa awie mɔ anwu kɛ ewiade fofolɛ ne anu nyilalɛ ne boka Gyihova ɛlolɛ ne mɔɔ ɔbala ye ali la anwo la.

18, 19. Kɛzi yɛkile kɛ yɛ nye sɔ Gyihova ɛlolɛ ne ɛ?

¹⁸ Saa yɛlɛdi awie mɔ daselɛ a, yɛbahola yɛamaa bɛanwu kɛ wɔ Kelaese tumililɛ bo, alesama banyia ɛkpɔnelɛ afɔle ne azo nvasoɛ kpalɛ na akee bɛali munli bɔkɔɔ. Baebolo ne ka kɛ: “Kenle ko dedee bɛbaye abɔdeɛ muala bɛavi ɛkpɔlɔlɛ akɛlɛzonlenlɛ nu na yeanyia anyunlunyia fanwodi ne mɔɔ Nyamenle amra lɛ ye la.” (Wlo. 8:21) Gyihova ɛlolɛ totohyia ne a bamaa ɛhye ara nu a.

¹⁹ Yɛnyia nwolɛ adenle kɛ yɛbaha anyelielɛ edwɛkɛ mɔɔ wɔ Yekile 21:4, 5 la yɛahile menli mɔɔ bɛbadie la, ɔse: “[Nyamenle bakyikyi] bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.” Na Gyihova mɔɔ de belemgbunli ebia kpole ne azo la hanle kɛ: “Kɛkala, meyɛ ninyɛne kɔsɔɔti fofolɛ!” Eza ɔzele me kɛ, “Kɛlɛ ɛhye, ɔluakɛ edwɛkɛ ɛhye mɔ le nɔhalɛ yɛɛ bɛfa bɛ rɛle bɛto zolɛ a ɔyɛ boɛ.” Saa yɛfa mɔdenlebɔlɛ yɛbɔ edwɛkpa ɛhye nolo a, ɛnee yɛlɛkile kɛ yɛ nye sɔ Gyihova ɛlolɛ ne!