1. Duzu a Gyihova ɛyɛ ɛmaa wɔ a?

KƐ ƆYƐLE mɔɔ ɛrayɛle Gyihova Dasevolɛ ɛ? Mɔɔ limoa, ɛdele “edwɛkpa ne,” bie a wɔ awovolɛ, ɛ gɔnwo bie mɔɔ ɛ nee ye yɛ gyima anzɛɛ ɛ nee ye kɔ sukulu la a hanle hilele wɔ a, anzɛɛ menli mɔɔ ɛlɛyɛ azua nu daselɛlilɛ gyima ne la a hanle hilele wɔ a. (Maake 13:10) Akee awie vale mekɛ dɔɔnwo na ɔbɔle mɔdenle ɔ nee wɔ zukoale Baebolo ne. Mɔɔ bɛlɛsukoa debie la, ɛrahulole Gyihova na ɛnwunle kɛ ɔdaye noko ɔkulo wɔ. Gyihova hwenle wɔ rale nɔhalɛ ne anu na kɛkala kɛmɔ ɛle Gyisɛse Kelaese ɛdoavolɛ la ati, ɛlɛ anyelazo kɛ ɛbadɛnla aze dahuu. (Dwɔn 6:44) Nɔhalɛ nu, ɛ nye liele kɛ Gyihova hanle awie ahonle ɔmaanle ɔhilehilele wɔ nɔhalɛ ne na yelie wɔ yeboka Ye azonvolɛ ne mɔ anwo la.

2. Duzu a yɛbazuzu nwo wɔ edwɛkɛ ɛhye anu a?

² Kɛkala mɔɔ yɛnwu nɔhalɛ ne la, yɛnyia nwolɛ adenle kɛ yɛbaboa awie mɔ yɛamaa bɛaraboka yɛ nwo wɔ ngoane adenle ne azo. Bie a ɔnyɛ se ɔmmaa yɛ kɛ yɛbali daselɛ wɔ azua nu noko ɔyɛ se ɔmaa yɛ kɛ yɛ nee awie bahyehyɛ Baebolo ɛzukoalɛ. Zɔhane a ɔde wɔ wɔ afoa nu ɔ? Saa zɔhane a ɔde a, bie a nzuzulɛ mɔɔ wɔ edwɛkɛ ɛhye anu la bie baboa wɔ. Yɛbazuzu debie mɔɔ ɔka yɛ ɔmaa yɛboa wɔ ɛdoavolɛyɛlɛ gyima ne anu la anwo. Eza yɛbazuzu kɛzi yɛbali ngyegyelɛ mɔɔ ɔmmaa yɛnyɛ Baebolo ɛzukoalɛ la anwo. Mɔɔ limoa, maa yɛzuzu deɛmɔti ɔwɔ kɛ yɛka edwɛkɛ ne yɛkile awie mɔ na eza yɛkilehile bɛ la anwo.

3. Duzu ati a yɛka edwɛkɛ ne a?

³ Mɔɔ Gyisɛse wɔ azɛlɛ ye azo la, ɔmaanle ye ɛdoavolɛma gyima bie mɔɔ ɔ nye le nwiɔ la. Mɔɔ limoa, ɔhanle ɔhilele bɛ kɛ bɛha  Belemgbunlililɛ ne anwo edwɛkpa ne na ɔhilele bɛ kɛzi bɛbayɛ ye la. (Mat. 10:7; Luku 8:1) Kɛ neazo la, Gyisɛse maanle ye ɛdoavolɛma ne nwunle mɔɔ saa awie andie Belemgbunlililɛ ne anwo edwɛkɛ ne anzɛɛ ɔtie a ɔwɔ kɛ bɛyɛ la. (Luku 9:2-5) Eza ɔhanle ɛleka mɔɔ bɛbayɛ edwɛkɛhanlɛ gyima ne bɛahɔdwu la, ɔhanle kɛ ye ɛdoavolɛma “bɛali maanle maanle ne amuala daselɛ.” (Mat. 24:14; Gyi. 1:8) Saa menli tie edwɛkɛ ne o anzɛɛ bɛndie o, ɔwɔ kɛ ɛdoavolɛma ka Nyamenle Belemgbunlililɛ ne nee mɔɔ ɔbayɛ la anwo edwɛkɛ kile bɛ.

4. Kɛ mɔɔ Mateyu 28:18-20 kile la, duzu a ɔwɔ kɛ yɛyɛ yɛboka Belemgbunlililɛ ne anwo edwɛkpa ne mɔɔ yɛbɔ ye nolo la anwo a?

⁴ Debie mɔɔ tɔ zo nwiɔ mɔɔ Gyisɛse hanle kɛ ye ɛdoavolɛma ɛyɛ la a le boni? Ɔhanle ɔhilele ye ɛdoavolɛma kɛ bɛhilehile menli mɔɔ bɛbahola bɛarayɛ ɛdoavolɛma la bɛmaa bɛli debie biala mɔɔ yeha la azo. Noko kɛ mɔɔ bie mɔ kile la, asoo ɛnee bɛbayɛ edwɛkɛhanlɛ nee ngilehilelɛ gyima ne wɔ ɛvoya mɔɔ limoa la ala anu ɔ? Kyɛkyɛ, Gyisɛse hanle kɛ bɛbayɛ gyima ɛhye mɔɔ anwo hyia la too bɛaradwu yɛ mekɛ ye azo bɔbɔ, kɔkpula mekɛ ɛhye awieleɛ. (Kenga Mateyu 28:18-20.) Ɔbayɛ kɛ mɔɔ Gyisɛse yele ɔ nwo hilele ye ɛdoavolɛma mɔɔ bo 500 la a ɔvale zɔhane gyima ne ɔmaanle bɛ a. (1 Kɔl. 15:6) Yɛɛ wɔ yekile ne mɔɔ Gyisɛse vale maanle Dwɔn la anu, ɔmaanle ɔlale ali wienyi kɛ ɔwɔ kɛ ye ɛdoavolɛma kɔsɔɔti boa awie mɔ bɛmaa bɛsukoa Gyihova anwo debie.​—Yek. 22:17.

5. Ndonwo boni a Pɔɔlo yɛle wɔ 1 Kɔlentema 3:6-9 mɔɔ kile kɛ ɔwɔ kɛ yɛyɛ edwɛkɛhanlɛ nee ngilehilelɛ gyima ne yɛbɔ nu a?

⁵ Ɛzoanvolɛ Pɔɔlo vale ɛdoavolɛyɛlɛ gyima ne totole egyinliyɛlɛ nwo, ɔmaanle ɔlale ali kɛ ɔnle kɛ yɛdua ma ne ala. Pɔɔlo hakyele Kɔlentema ne kɛ: “Menluale, Apɔlɔso guguale zolɛ nzule . . . Bɛle Nyamenle egyinli mɔɔ bɛlɛyɛ nuhua gyima.” (Kenga 1 Kɔlentema 3:6-9.) Kɛ Nyamenle “egyinli” nu gyimayɛvoma la, yɛnlua ma ne ala emomu yɛgugua zolɛ nzule na yɛta yɛnea kɛzi ɔlɛnyi la. (Dwɔn 4:35) Noko yɛze kɛ Nyamenle a maa ma ne nyi a.

6. Saa yɛlɛkilehile awie mɔ a, duzu a ɔwɔ kɛ yɛboa bɛ yɛmaa bɛyɛ a?

⁶ Yɛlɛkpondɛ bɛdabɛ mɔɔ “bɛ subane kile kɛ bɛfɛta dahuu ngoane la.” (Gyi. 13:48) Amaa yɛaboa menli ɛhye mɔ yɛamaa bɛayɛ ɛdoavolɛma la, ɔwɔ kɛ yɛboa bɛ yɛmaa (1) bɛte ninyɛne mɔɔ bɛlɛsukoa bɛavi Baebolo ne anu la abo, (2) bɛdie bɛto nu, yɛɛ (3) bɛfa bɛbɔ bɛ ɛbɛla. (Dwɔn 17:3; Kɔl. 2:6, 7; 1 Tɛs. 2:13) Saa Baebolo sukoavoma ɛhye mɔɔ bɛle fofolɛ la ba debiezukoalɛ a, asafo ne anu amra amuala bahola ala ɛlɔlɛ ali ahile bɛ na bɛalie bɛ kɛnlɛma bɛava bɛayɛ neazo bɛamaa bɛ. (Dwɔn 13:35) Ɔwɔ kɛ Baebolo kilehilevolɛ ne nyia mekɛ dɔɔnwo na ɔbɔ mɔdenle ɔboa sukoavo ne ɔmaa ɔtudu diedi nee nyɛleɛ mɔɔ “ɛsosɔ ndinli kpalɛ” la abo. (2 Kɔl. 10:4, 5) Ɔbahola yealie siane dɔɔnwo na wɔahola wɔaboa awie wɔamaa yeayɛ nzenzaleɛ ɛhye mɔ wɔ ye ɛbɛlabɔlɛ nu na ngyikyingyikyi yeafɛta ɛzɔnenlɛ. Noko saa ɔyɛ nzenzaleɛ ɛhye mɔ a ɔbaboa ye kpalɛ.

7. Duzu a ka yɛ maa yɛyɛ edwɛkɛhanlɛ nee ɛdoavolɛyɛlɛ gyima ne a?

⁷ Duzu ati a yɛyɛ edwɛkɛhanlɛ nee ɛdoavolɛyɛlɛ gyima ne a? Mɔɔ limoa, yɛkulo Gyihova la ati ɔ. Saa ɛyɛ biala mɔɔ ɛbahola la ɛdi mɛla mɔɔ se yɛha edwɛkɛ ne na yɛyɛ menli ɛdoavolɛma la azo a, ɛnee ɛlɛkile kɛ ɛkulo Nyamenle. (1 Dwɔn 5:3) Wɔmɔ nea o: Kɛmɔ ɛkulo Gyihova la ati ɛyɛ azua nu daselɛlilɛ gyima ne. Asoo ɛnee ɔla aze kɛ ɛbali zɔhane mɛla ne azo ɔ? Kyɛkyɛ. Mekɛ mɔɔ limoa mɔɔ ɛhɔle daselɛlilɛ la wɔ ahonle andu ɔ? Ye biala anu wɔ ahonle dule! Noko ɛnee ɛze kɛ gyima ɛhye a Gyisɛse  kulo kɛ ɛyɛ a ɔti ɛyɛle. Noko mɔɔ ɛyɛle daselɛlilɛ gyima ne mekɛ ekyi la, akee ye ɛyɛlɛ ɛnyɛ se ɛmmaa wɔ bieko. Na Baebolo ɛzukoalɛ ɛyɛlɛ noko ɛ? Saa nwolɛ edwɛkɛ ba wɔ adwenle nu a, wɔ ahonle tu ɔ? Bie a wɔ ahonle tu. Noko saa ɛsɛlɛ Gyihova kɛ ɔboa wɔ ɔmaa ɛli wɔ ahonle mɔɔ ɔtu la azo na ɛnyia akɛnrasesebɛ ɛyɛ Baebolo ɛzukoalɛ a, Gyihova baboa wɔ yeamaa ɛhulolɛ mɔɔ ɛlɛ kɛ ɛyɛ ɛdoavolɛyɛlɛ gyima ne bie la anu amia.

8. Kɛ mɔɔ Maake 6:34 kile la, duzu bieko a ka yɛ maa yɛkilehile awie mɔ a?

⁸ Mɔɔ tɔ zo nwiɔ, menli nwo ɛlɔlɛ ka yɛ maa yɛkilehile bɛ nɔhalɛ ne. Kenle ko bie, Gyisɛse nee ye ɛdoavolɛ ne mɔ yɛle edwɛkɛhanlɛ gyima ne hyɛle na ɛnee bɛvɛ kpalɛ. Ɛnee bɛlɛkpondɛ ɛleka bɛalie bɛ menle noko menli dɔɔnwo bie nwunle bɛ. Menli ne anwo yɛle Gyisɛse alɔbɔlɛ na ɔbɔle ɔ bo ɔhilehilele bɛ “ninyɛne dɔɔnwo.” (Kenga Maake 6:34.) Kenle zɔhane ɔyɛle gyima ɛsesebɛ ɔnva nwo kɛ ɛnee yevɛ la. Duzu ati ɔ? Gyisɛse vale ye kɛ ɔwɔ menli ne tɛnlabelɛ ne anu. Ɔnwunle kɛzi ɛnee bɛlɛnwu amaneɛ la, ɛnee bɛnlɛ anyelazo biala ɔti ɛnee ɔkulo kɛ ɔboa bɛ. Ɛnɛ noko, menli wɔ tɛnlabelɛ ko ne ala bie anu. Mmamaa kɛzi bɛyɛ bɛ ninyɛne la bɛlɛbɛla wɔ. Bɛle kɛ mboane mɔɔ ɛminli mɔɔ bɛnlɛ mboaneneavolɛ biala mɔɔ ɔkile bɛ adenle la. Ɛzoanvolɛ Pɔɔlo hanle menli ɛhye mɔ anwo edwɛkɛ kɛ bɛnze Nyamenle yɛɛ bɛnlɛ anyelazo biala. (Ɛfɛ. 2:12) Bɛlua ‘adenle ne mɔɔ kɔ ɛzɛkyelɛ nu la azo’! (Mat. 7:13) Saa yɛsuzu kɛzi ɔhyia kɛ menli mɔɔ wɔ yɛ azɛlɛsinli ne anu la sukoa Nyamenle anwo debie la anwo a, ɛlɔlɛ nee anwunvɔnezelɛ baha yɛ yeamaa yɛaboa bɛ. Na adenle kpalɛ mɔɔ yɛbahola yɛalua zo yɛaboa bɛ la a le kɛ yɛ nee bɛ bazukoa Baebolo ne.

9. Kɛ mɔɔ Felepaema 2:13 kile la, kɛzi Gyihova bahola aboa wɔ ɛ?

⁹ Bie a ɛnee ɛngulo kɛ ɛ nee awie bahyehyɛ Baebolo ɛzukoalɛ ɔluakɛ ɛnee ɛze kɛ Baebolo ɛzukoalɛ ɛyɛlɛ balie wɔ mekɛ dɔɔnwo. Saa zɔhane a ɛte nganeɛ a, ka nwolɛ edwɛkɛ kile Gyihova. Sɛlɛ ye kɛ ɔboa wɔ ɔmaa ɛnyia ɛhulolɛ kɛ ɛbakpondɛ awie ɛ nee ye azukoa Baebolo ne. (Kenga Felepaema 2:13.) Ɛzoanvolɛ Dwɔn maa yɛnyia anwodozo kɛ Gyihova babua asɔneyɛlɛ mɔɔ ɔ nee Ye ɛhulolɛdeɛ yia la. (1 Dwɔn 5:14, 15) Ɔti ɛbahola wɔanyia anwodozo kɛ Gyihova baboa wɔ yeamaa wɔanyia ɛhulolɛ kɛ ɛbayɛ ɛdoavolɛyɛlɛ gyima ne bie.

10-11. Duzu a ɔbayɛ kɛ ɔmmaa bie mɔ ɛngola ɛnyɛ Baebolo ɛzukoalɛ a?

¹⁰ Yɛfa mɛla mɔɔ bɛva bɛmaa yɛ kɛ yɛhilehile awie mɔ la anyebolo zo ɔnva nwo kɛ bie a yɛyia ngyegyelɛ mɔɔ ɔmmaa yɛngola yɛnyɛ ɛdoavolɛyɛlɛ gyima ne dɔɔnwo la. Maa yɛzuzu ngyegyelɛ ɛhye mɔ bie nee kɛzi yɛbali zolɛ la anwo.

¹¹ Bie a yɛ tɛnlabelɛ ne ati yɛngola yɛnyɛ dɔɔnwo. Kɛ neazo la, nolobɔlɛma bie mɔ ɛyɛ mgbanyinli anzɛɛ bɛnde kpɔkɛ kpalɛ. Ɛwɔ tɛnlabelɛ ɛhye bie anu ɔ? Saa ɔle zɔ a, suzu ɛzukoalɛdeɛ ko mɔɔ yɛnyia yɛvi COVID-19 ewulenzane ne anu la anwo. Yɛnwu kɛ yɛbahola yɛalua ɛlɛtɔlɔneke ninyɛne zo yɛayɛ Baebolo ɛzukoalɛ kpalɛ! Ɔti saa ɛde wɔ sua nu bɔbɔ a, ɛbahola ɛ nee awie ahyehyɛ Baebolo ɛzukoalɛ na wɔadoa zo wɔayɛ. Nvasoɛ bieko noko ɛne. Menli bie mɔ kulo kɛ bɛsukoa Baebolo ne, noko bɛnle sua nu wɔ mekɛ mɔɔ mediema ne mɔ fa kɔ daselɛlilɛ la. Noko bie a nwonlomɔ mangyee ne anzɛɛ nɔɔzo a bɛwɔ sua nu a. Ɛbahola ɛ nee awie azukoa Baebolo ne wɔ mekɛ ɛhye mɔ anu ɔ? Gyisɛse hilehilele Nekɔdimɛse nɔɔzo, na yemɔ a ɛnee le mekɛ mɔɔ ɔbaboa ye a.​—Dwɔn 3:1, 2.

12. Ninyɛne boni mɔ a maa yɛnyia anwodozo kɛ yɛbahola yɛayɛ kilehilevolɛma kpalɛ a?

¹² Bie a yɛsuzu kɛ yɛnrɛhola yɛnrɛyɛ Baebolo  ɛzukoalɛ. Bie a yɛte nganeɛ kɛ ɔwɔ kɛ yɛnwu ninyɛne dɔɔnwo anzɛɛ ɔwɔ kɛ yɛyɛ kilehilevolɛma kpalɛ kolaa na yɛahola yɛ nee awie azukoa Baebolo ne. Saa zɔhane a ɛte nganeɛ a, suzu ninyɛne nsa mɔɔ bahola aboa wɔ yeamaa wɔanyia anwodozo la anwo. Mɔɔ limoa, Gyihova nwu wɔ kɛ ɛfɛta kɛ ɛkilehile awie mɔ. (2 Kɔl. 3:5) Mɔɔ tɔ zo nwiɔ, Gyisɛse mɔɔ ‘bɛva tumi muala mɔɔ wɔ anwuma nee azɛlɛ ye azo’ bɛmaa ye la ɛmaa wɔ adenle kɛ ɛhilehile awie mɔ. (Mat. 28:18) Yɛɛ mɔɔ tɔ zo nsa, ɛbahola wɔamaa awie mɔ aboa wɔ. Gyihova boale Gyisɛse ɔmaanle ɔnwunle mɔɔ ɔbaha la na ɔbahola yeaboa ɛdawɔ noko. (Dwɔn 8:28; 12:49) Bieko, ɛbahola wɔaha wɔahile wɔ daselɛlilɛ ekpunli zo neavolɛ ne, adekpakyelɛnli anzɛɛ nolobɔlɛnli mɔɔ bɔ mɔdenle la kɛ ɔboa wɔ ɔmaa ɛhyehyɛ Baebolo ɛzukoalɛ na ɛdoa zo ɛyɛ. Adenle ko mɔɔ ɛbahola wɔalua zo wɔanyia anwodozo la a le kɛ ɛ nee nolobɔlɛma ɛhye mɔ ko bahɔyɛ Baebolo ɛzukoalɛ.

13. Duzu ati a ɔwɔ kɛ yɛnyia ɛhulolɛ kɛ yɛbalua ndenle ngakyile zo yɛahilehile awie mɔ ɛ?

¹³ Bie a ɔyɛ se ɔmaa yɛ kɛ yɛbalua ndenle ngakyile zo yɛahilehile anzɛɛ yɛbava ninyɛne fofolɛ yɛali gyima. Kɛkala, adenle mɔɔ yɛdua zo yɛyɛ Baebolo ɛzukoalɛ la ɛhakyi. Nyia Anyelielɛ Dahuu! ne a le buluku titili mɔɔ yɛfa yɛyɛ Baebolo ɛzukoalɛ a, na ɔhyia kɛ yɛsiezie yɛ nwo yɛmaa debiezukoalɛ ne yɛɛ kɛzi yɛfa yɛyɛ debiezukoalɛ la le ngakyile fi mɔɔ yɛyɛ ye dɛba la anwo. Yɛkenga ɛdendɛkpunli ekyi bie ala na akee yɛ nee sukoavo ne ali adwelie dɔɔnwo. Saa yɛlɛkilehile awie a, yɛfa vidio dɔɔnwo yɛɛ ɛlɛtɔlɔneke ninyɛne mɔɔ le kɛ JW Library^® la yɛdi gyima. Saa ɛnze kɛzi bɛfa ninyɛne ɛhye mɔ bɛdi gyima a, ka kile awie maa ɔboa wɔ. Menli yɛ debie ko dedee a ɛnee yeha bɛ nwo. Ɔti ɔnla aze kɛ yɛbazukoa ndenle fofolɛ mɔɔ bɛdua zo bɛyɛ ninyɛne la. Noko ɔlua Gyihova nee awie mɔ moalɛ zo, ɛbanwu ye yɛ na ɛ nye balie kpalɛ kɛ ɛkola ɛdua zo ɛ nee awie mɔ sukoa debie la. Adiema nrenyia adekpakyelɛnli ko hanle kɛ, “adenle ɛhye mɔɔ yɛdua zo yɛyɛ Baebolo ɛzukoalɛ la maa sukoavo ne nee kilehilevolɛ ne amuala anye die.”

14. Saa yɛlɛdi daselɛ wɔ azɛlɛsinli mɔɔ menli ɛndie yɛ edwɛkɛ ne la anu a, duzu a ɔwɔ kɛ yɛkakye a, na kɛzi 1 Kɔlentema 3:6, 7 maa yɛ anwosesebɛ ɛ?

¹⁴ Bie a yɛde azɛlɛsinli mɔɔ ɔyɛ se kɛ yɛ nee menli bahyehyɛ Baebolo ɛzukoalɛ la anu. Menli bie mɔ anye ɛnlie yɛ edwɛkɛ ne anwo yɛɛ bie mɔ dwazo tia yɛ bɔbɔ. Duzu a baboa yɛ yeamaa yɛahɔ zo yɛanyia menli ne anwo adwenle kpalɛ a? Kakye kɛ menli tɛnlabelɛ kola kakyi ndɛndɛ wɔ ewiade ɛhye mɔɔ ngyegyelɛ ɛyi nu la anu na bie a menli mɔɔ mɔlebɛbo ne ɛnee bɛndie yɛ edwɛkɛ ne la banwu kɛ bɛhyia Nyamenle adehilelɛ wɔ bɛ ɛbɛlabɔlɛ nu. (Mat. 5:3) Menli bie mɔɔ dɛba ne ɛnee bɛnlie yɛ mbuluku ne mɔ bie fee la nzinlii liele dole nu kɛ bɛ nee bɛ ɛzukoa Baebolo ne. Eza yɛze kɛ Gyihova a le ma ɛdelɛ gyima ne Amenle a. (Mat. 9:38) Ɔkulo kɛ yɛkɔ zo yɛdua ma ne na yɛgugua zolɛ nzule noko Ɔdaye a ɔbamaa yeanyi a. (1 Kɔl. 3:6, 7) Yɛɛ saa yɛkakye kɛ saa yɛngola yɛnyɛ Baebolo ɛzukoalɛ kɛkala bɔbɔ a, Gyihova bagyinla mɔdenle mɔɔ yɛbɔle kɛ yɛboa awie mɔ la azo a ayila yɛ a na tɛ menli dodo mɔɔ yɛmaanle bɛ mbuluku anzɛɛ yɛ nee bɛ zukoale Baebolo ne la azo a, ɔmaa yɛ anwosesebɛ kpalɛ! *

15. Saa awie maa bɛ nee ye sukoa Baebolo ne na ɔfa mɔɔ ɔlɛsukoa la ɔbɔ ye ɛbɛla a, kɛzi Gyihova te nganeɛ ɛ?

¹⁵ Saa awie sukoa Baebolo nu nɔhalɛ ne na ɔka mɔɔ yezukoa la bie ɔkile awie mɔ a, ɔmaa  Gyihova di fɛlɛko. (Mrɛ. 23:15, 16) Saa Gyihova nwu mɔɔ yɛlɛyɛ ye ɛnɛ wɔ ɛdoavolɛyɛlɛ gyima ne anu la a, ɔ nye die kpole! Kɛ neazo la, ɔnva nwo kɛ ewulenzane rale ewiade amuala wɔ 2020 ɛzonlenlɛ ɛvolɛ ne anu la, yɛyɛle Baebolo ɛzukoalɛ 7,705,765 na ɛhye boale menli 241,994 ɔmaanle bɛyilale bɛ nwo zo bɛmaanle Gyihova na bɛzɔnenle bɛ. Ɛdoavolɛma fofolɛ ɛhye mɔ noko bayɛ Baebolo ɛzukoalɛ na bɛayɛ menli dɔɔnwo ɛdoavolɛma. (Luku 6:40) Nɔhalɛ nu, saa yɛyɛ ɛdoavolɛyɛlɛ gyima ne bie a yɛmaa Gyihova anye die.

16. Bodane kpalɛ boni a ɛbahola wɔava wɔazie ɛ nye zo a?

¹⁶ Menli mɔɔ yɛyɛ bɛ ɛdoavolɛma la le gyima ɛsesebɛ, noko ɔlua Gyihova moalɛ zo yɛbahola yɛayɛ yɛ afoa nu ɛdeɛ yɛahilehile menli mɔɔ bɛle fofolɛ la yɛamaa bɛahulo yɛ anwuma Selɛ ne. Yɛbahola yɛava yɛayɛ yɛ bodane kɛ, yeanyɛ boɛ fee la, yɛ nee sonla ko bazukoa Baebolo ne ɔ? Saa yɛfa nwolɛ adenle biala mɔɔ yɛbanyia la yɛbiza menli mɔɔ yɛbayia bɛ la saa bɛkulo kɛ yɛ nee bɛ sukoa Baebolo ne a, bie a mɔɔ bazi la bayɛ yɛ azibɛnwo. Yɛbahola yɛanyia anwodozo kɛ Gyihova bayila yɛ mɔdenlebɔlɛ ne azo.

17. Saa yɛkola yɛyɛ Baebolo ɛzukoalɛ a, kɛzi yɛbade nganeɛ ɛ?

¹⁷ Yɛnyia nwolɛ adenle kɛ yɛbaha edwɛkɛ ne na yɛahilehile awie mɔ! Gyima ɛhye maa yɛ nye die kpalɛ. Ɛzoanvolɛ Pɔɔlo mɔɔ ɔboale menli dɔɔnwo mɔɔ wɔ Tɛsalonaeka ɔmaanle bɛrayɛle ɛdoavolɛma la hanle kɛzi ɔte nganeɛ la anwo edwɛkɛ kɛ: “Na duzu a le yɛ anyelazo anzɛɛ yɛ anyelielɛ anzɛɛ yɛ fɛlɛkolilɛ abotile wɔ yɛ Awulae Gyisɛse anyunlu wɔ ye ɛralɛ ne anu a? Asoo tɛ yemɔ a le bɛdabɛ? Nɔhalɛ nu, bɛmɛ a bɛle yɛ anyunlunyia nee yɛ anyelielɛ a.” (1 Tɛs. 2:19, 20; Gyi. 17:1-4) Zɔhane ala a menli dɔɔnwo te nganeɛ ɛnɛ a. Adiema raalɛ bie mɔɔ bɛfɛlɛ ye Stéphanie mɔɔ ɔ nee ɔ hu ɛboa menli dɔɔnwo bɛmaa bɛzɔne bɛ la hanle kɛ, “Debie biala ɛnyɛ anyelielɛ ɛndɛla kɛ ɛbaboa menli wɔamaa bɛayila bɛ nwo zo bɛamaa Gyihova.”