Gyihova kulo kɛ menli nwiɔ mɔɔ bɛbagya bɛ nwo la anye die, bɛ agyalɛ ne tɛnla ɛkɛ ne dahuu na bɛbikye bɛ nwo kpalɛ. (Mat. 19:4-6) Saa ɛkulo kɛ ɛgya a, kɛ ɔkɛyɛ na wɔanyia awie kpalɛ wɔagya ye ɛ? Kɛmɔ Gyihova a bɔle yɛ la ati, ɔze mɔɔ yɛyɛ a yɛ nye balie wɔ agyalɛ nu la. Ɔti, saa ɛfa ngyinlazo mɔɔ yeva yemaa yɛ la ɛdi gyima a, ɔbaboa wɔ kpalɛ. Maa yɛzuzu zɔhane ngyinlazo ne mɔ bie anwo.

Mɔɔ limoa, ɔwɔ kɛ yɛnwu kɛ: “Ahonle le mɛlɛbɛla tɛla debie biala yɛɛ ɔ nwo yɛ ɛvɛlɛ.” (Gyɛ. 17:9) Saa awie ɛlɛkpondɛ awie mɔɔ ɔbagya ye na ɔnyia bie a, nganeɛdelɛ mɔɔ bɛlɛ bɛmaa bɛ nwo la anu yɛ se ndɛndɛ na yemɔ maa ɔyɛ se kɛ bɛbazi kpɔkɛ kpalɛ. Saa menli gyinla kɛzi bɛte nganeɛ bɛmaa bɛ nwo la ala azo gya a, nzinlii bɛbanlu bɛ nwo. (Mrɛ. 28:26) Ɛhye ati a nrɛlɛbɛ ɛnle nu kɛ menli nwiɔ bɛaha kɛzi bɛte nganeɛ bɛmaa bɛ nwo la ahile bɛ nwo anzɛɛ bɛabɔ ɛwɔkɛ kɛ bɛbagya bɛ nwo kolaa na bɛanwu bɛ nwo kpalɛ la.

Mrɛlɛbulɛ 22:3 ka kɛ: “Sonla mɔɔ anye gyi ɔ ti anwo la nwu esiane na ɔfa ɔ nwo ɔfea, noko mɔɔ ɛnlɛ anwubielɛ la kɔ ɔ nyunlu fɔɔnwo na ɔnwu nwolɛ amaneɛ.” Esiane boni a wɔ nu kɛ yɛbalua wɛbsaete zo yɛakpondɛ awie mɔɔ yɛbagya ye la ɛ? Ɔyɛ alɔbɔlɛ kɛ, menli bie mɔ ɛyia nyɛvolɛ wɔ yintanɛte zo, bɛbɔle ɔ bo kɛ bɛ nee bɛ tu na nzinlii bɛnwunle kɛ, menli mɔɔ bɛ nee bɛ dule la ɛbɛlɛbɛla bɛ. Eza adalɛma kakyi bɛ duma nee bɛ nwo edwɛkɛ biala fa bɛlɛbɛla menli mɔɔ ɛnze nwolɛ bie la na bɛwua bɛ nwo ezukoa. Ɔdwu mekɛ ne bie a, adalɛma ɛhye mɔ ka kɛ bɛle Gyihova Alasevolɛ.

Suzu esiane bieko mɔɔ wɔ nu la anwo. Wɛbsaete ɛhye mɔ kile kɛ bɛkola bɛdua kɔmpita zo bɛbu mgbonda bie mɔɔ maa bɛkola bɛnwu menli nwiɔ mɔɔ fɛta kɛ bɛgya bɛ nwo la. Noko, daselɛ biala ɛnle ɛkɛ mɔɔ kile kɛ ɛhye kola yɛ boɛ a. Nrɛlɛbɛ ɛnle nu kɛ yɛbava yɛ nwo yɛado kɔmpita gyimalilɛ mɔɔ menli ɛyɛ la azo kɛ ɔbaboa yɛ yeamaa yɛazi debie mɔɔ hyia le kɛ agyalɛ la anwo kpɔkɛ. Kɛzi yɛkola yɛfa kɔmpita zo gyimalilɛ yɛtoto Baebolo ngyinlazo nwo bɔbɔ ɛ?​—Mrɛ. 1:7; 3:5-7.

Ngyinlazo bie mɔɔ wɔ Mrɛlɛbulɛ 14:15 la ka kɛ: “Sonla mɔɔ ye adwenle ɛtɛtinli la die  edwɛkɛ biala di, noko mɔɔ anye gyi ɔ ti anwo la dwenle ɔ gyakɛ biala mɔɔ ɔlɛtu la anwo.” Kolaa na wɔazi kpɔkɛ kɛ awie bayɛ kunli anzɛɛ yelɛ kpalɛ la, ɔwɔ kɛ ɛnwu ye kpalɛ. Noko saa ɛyia ahenle wɔ yintanɛte ne azo a, ɛnrɛhola ɛnrɛyɛ zɔ. Saa bɛnwu bɛ nuhua ko biala anwo edwɛkɛ mɔɔ yeva yegua yintanɛte ne azo na bɛfa mekɛ dɔɔnwo bɛdua yintanɛte ne azo bɛtendɛ bɔbɔ a, asoo ɛbahola wɔaha kɛ ɛze ahenle kpalɛ? Menli mɔɔ nyianle adwenle kɛ bɛnyia bɛ kulovolɛ la anloa hale nwolɛ wɔ mekɛ mɔɔ bɛyiale ahenle mumua ne la.

Edwɛndolɛnli ne hanle kɛ: “Me nee adalɛma ɛndɛnla, yɛɛ me nee nabalabama ɛndu.” (Edw. 26:4). Menli dɔɔnwo dwenle kɛ nvonleɛ biala ɛnle nwolɛ kɛ bɛbabɔ adalɛ wɔ wɛbsaete ɛhye mɔ mɔɔ bɛdua zo bɛkpondɛ agyalɛ la azo amaa bɛanyia awie mɔɔ bɛbagya ye la. Bie a bɛbavea subane ɛtane mɔɔ bɛlɛ la azo anzɛɛ subane ɛtane mɔɔ bɛlɛ la ɛnrɛla ali wɔ mekɛ mɔɔ bɛ nee awie mɔ ɛlɛdi adwelie wɔ yintanɛte ne azo la. Bie mɔ ka kɛ bɛle Gyihova Alasevolɛ ɛdeɛ, noko asoo bɛzɔne bɛ? Asoo bɛnyi wɔ sunsum nu? Asoo bɛ nee Gyihova lɛ agɔnwolɛvalɛ kpalɛ? Asoo bɛle menli mɔɔ bɛbu bɛ wɔ asafo ne anu? Anzɛɛ bɛnyɛ neazo kpalɛ anzɛɛ bɛle ‘agɔnwolɛma ɛtane’? (1 Kɔl. 15:33; 2 Tim. 2:20, 21) Asoo Baebolo ngyinlazo mɔɔ yɛfa yɛdi gyima la maa bɛ adenle kɛ bɛkola bɛgya? Ɔwɔ kɛ ɛnwu kpuya ɛhye mɔ anwo mualɛ, noko saa ɛ nee Alasevolɛ mɔɔ bɛze ahenle kpalɛ la ɛtɛtendɛle a, ɛnrɛnwu mualɛ ne. (Mrɛ. 15:22) Nɔhalɛ nu, Gyihova sonvolɛ mɔɔ di nɔhalɛ la ɛnrɛnyia adwenle ɛlɛ kɛ ɔ nee awie mɔɔ ‘ɛnle diedinli’ la badu.​—2 Kɔl. 6:14; 1 Kɔl. 7:39.

Kɛmɔ esiane wɔ nu kɛ yɛbalua wɛbsaete zo yɛakpondɛ agyalɛ la ati, adenle kpalɛ wɔ ɛkɛ mɔɔ yɛbahola yɛalua zo yɛakpondɛ awie mɔɔ yɛbahola yɛagya ye la. Nienwu a ɛbahola wɔayia awie mɔɔ bayɛ yelɛ anzɛɛ kunli kpalɛ a? Saa bɛtɛtuale bagua nu ayia a, Gyihova Alasevolɛ yia bɛ mediema wɔ debiezukoalɛ, maanzinli nyianu, maangyebakyi nyianu nee nyianu gyɛne bo na bɛnwu bɛ nwo kpalɛ.

Saa yɛnrɛhola yɛnrɛyɛ ayia ɛhye mɔ wɔ bagua nu le kɛ wɔ COVID-19 ewulenzane mekɛ ne anu a, yɛdua ɛlɛtɔlɔneke ninyɛne zo yɛyɛ asafo debiezukoalɛ, na yɛkola yɛyia mediema gyɛne mɔɔ bɛtɛgyale la wɔ ɛkɛ. Yɛbanwu kɛzi bɛfa bɛ nwo bɛwula debiezukoalɛ ne mɔ anu la na yɛade bɛ diedi ne mɔɔ bɛlɛda ye ali wɔ mekɛ mɔɔ bɛbamaa mualɛ la. (1 Tim. 6:11, 12) Eza bɛbahola bɛalua breakout room foa ne azo bɛadendɛ. Ayia ɛhye mɔ mɔɔ yɛ nee yɛ mediema diedima ekpunli ngakyile dua ɛlɛtɔlɔneke ninyɛne zo yɛ la bamaa wɔanwu kɛzi ahenle mɔɔ ɛ nye die ɔ nwo la nee awie mɔ di la, na yemɔ bamaa wɔanwu ahenle subane kpalɛ. (1 Pita 3:4) Saa ɛnwu ahenle kpalɛ a, nzinlii ɛbahola wɔanlea saa bɛlɛ bodane ko, bɛfa ngyinlazo ko ne ala bɛbɔ bɛ ɛbɛla yɛɛ saa bɛ mu nwiɔ bɛfɛta kɛ bɛgya bɛ nwo a.

Saa menli mɔɔ ɛtɛgyale la dua Baebolo ngyinlazo zo kpondɛ awie mɔɔ bɛbagya ye la a, ɔmaa bɛ nye die wɔ agyalɛ nu. Ɔle kɛ mɔɔ ɛrɛlɛ ɛhye ka la: “Sonla mɔɔ kɛnyia yelɛ [anzɛɛ kunli] kpalɛ la ɛnyia debie kpalɛ, yɛɛ ɔnyia Gyihova anyunlu ɛlolɛ.”​—Mrɛ. 18:22.