1-2. Kɛzi Kilisienenli bahola ayɛ kɛ ɛbolɔnsam tendenle ɛ? (1 Kɔlentema 15:58)

 WƆ ƐVOLƐ 1978 anu, bɛzile ɛbolɔnsam tendenle bie mɔɔ le ndazo 60 la wɔ Tokyo, Japan. Kɛmɔ ɛnee azɛlɛ ta kpusu wɔ suakpole zɔhane azo la ati, ɛnee menli ɛngola ɛnnwu ye saa ɔbahola gyinla a. Duzu a maanle ɔholale gyinla a? Menli mɔɔ zile sua ne la zile maanle ɔ nwo yɛle se kpalɛ noko eza bɛyɛle ye mɔɔ azɛlɛ ne kpusu a ɔkola ɔgyinla ɔ nloa a. Kilisienema le kɛ zɔhane ɛbolɔnsam ne la. Wɔ adenle boni azo?

² Ɔwɔ kɛ Kilisienenli nwu mekɛ mɔɔ ɔhyia kɛ ɔgyinla kpundii nee mekɛ mɔɔ ɔhyia kɛ ɔkakyi ye adwenle wɔ ninyɛne nwo la. Saa ɔba ye wɔ Gyihova mɛla nee ye ngyinlazo ne mɔ anwo a, ɔwɔ kɛ ɔsi ɔ gyakɛ aze na ɔsi pi. (Kenga 1 Kɔlentema 15:58.) “Ɔyɛ tieyɛ” na ɔndie mɔɔ awie mɔ baha la. Noko ɔwɔ kɛ ɔda “ndelebɛbo” ali anzɛɛ ɔkakyi ye adwenle wɔ mekɛ mɔɔ tɛnlabelɛ ne maa adenle anzɛɛ ɔhyia kɛ ɔyɛ zɔ la. (Gye. 3:17) Kilisienenli mɔɔ lɛ adwenle zɛhae la ɛnyɛ kyengye somaa anzɛɛ ɛntoto ninyɛne aze. Wɔ edwɛkɛ ɛhye anu, yɛbazuzu kɛzi yɛbahola yɛazi pi la anwo. Eza yɛbanwu ndenle nnu mɔɔ Seetan bɔ mɔdenle dua zo kɛ ɔfa yeazɛkye kpɔkɛ mɔɔ yɛbɔ la nee kɛzi yɛbaho yɛatia ye a.

3. Mɛlamaavolɛ Bedevinli ne mɛla ne mɔ boni a wɔ Gyima ne 15:28, 29 a?

³ Gyihova le Mɛlamaavolɛ Bedevinli, na dahuu ɔfa ye mɛla ne mɔ mɔɔ nuhua la ɛkɛ la ɔmaa ye menli. (Aye. 33:22) Kɛ neazo la, ɛvoya mɔɔ limoa la anu neazo eku ne hanle ninyɛne nsa mɔɔ ɔwɔ kɛ Kilisienema si bɛ gyakɛ aze wɔ nu la anwo edwɛkɛ: (1) ɔwɔ kɛ bɛkpo awozonlezonlenlɛ na bɛsonle Gyihova angomekye, (2) ɔwɔ kɛ bɛbu mogya kɛ ɔle nwuanzanwuanza yɛɛ (3) ɔwɔ kɛ bɛdi ɛbɛlabɔlɛ nwo ngyinlazo mɔɔ kpogya mɔɔ wɔ  Baebolo ne anu la azo. (Kenga Gyima ne 15:28, 29.) Kɛ ɔkɛyɛ na Kilisienema azi bɛ gyakɛ aze wɔ ninyɛne nsa ɛhye mɔ anu ɛnɛ ɛ?

4. Duzu a yɛyɛ yɛkile kɛ yɛsonle Gyihova angomekye a? (Yekile 4:11)

⁴ Yɛkpo awozonlezonlenlɛ, na yɛsonle Gyihova angomekye. Gyihova hanle hilele Yizilayɛma kɛ bɛzonle ɔ ngomekye. (Dit. 5:6-10) Na mɔɔ Abɔnsam zɔle Gyisɛse nleanle la, Gyisɛse maanle ɔlale ali wienyi kɛ ɔwɔ kɛ yɛsonle Gyihova angomekye. (Mat. 4:8-10) Ɔti yɛnzonle ananze. Eza yɛnzonle menli. Kɛ neazo la, yɛnyɛ ɛzonlenlɛ nu mgbanyima, maanyɛlɛ nu mgbanyima anzɛɛ menli mɔɔ bɛlie duma wɔ nwɔhoalilɛ nee anyelielɛ ninyɛne nu la kɛ asɛɛ bɛle nyamenle. Yɛgyinla Gyihova afoa na yɛsonle ahenle mɔɔ ‘ɔbɔle ninyɛne kɔsɔɔti’ la angomekye.​—Kenga Yekile 4:11.

5. Duzu ati a yɛdi Gyihova mɛla mɔɔ fale kɛzi ngoane nee mogya le nwuanzanwuanza anwo la azo a?

⁵ Yɛdi Gyihova mɛla mɔɔ fale kɛzi ngoane nee mogya le nwuanzanwuanza anwo la azo. Duzu ati ɔ? Ɔluakɛ Gyihova se mogya gyi ɛkɛ ne maa ngoane, ɔle ahyɛlɛdeɛ mɔɔ sonle bolɛ mɔɔ vi ye ɛkɛ a. (Lɛv. 17:14) Mekɛ mɔɔ limoa mɔɔ Gyihova hanle hilele alesama kɛ bɛli nane la, ɔhanle kɛ bɛmmadi ye mogya ne. (Gyn. 9:4) Ɔzile mɛla ɛhye azo wɔ Mosisi Mɛla ne mɔɔ ɔvale ɔmaanle Yizilayɛma la anu. (Lɛv. 17:10) Yɛɛ ɔmaanle ɛvoya mɔɔ limoa la anu neazo eku ne vale adehilelɛ hɔmaanle Kilisienema kɔsɔɔti kɛ ‘bɛhwe bɛ nwo bɛvi mogya nwo.’ (Gyi. 15:28, 29) Saa yɛlɛsi ayileyɛlɛ mɔɔ yɛbalie yɛado nu la anwo kpɔkɛ a, yɛsi yɛ gyakɛ aze wɔ mɛla ɛhye anwo. b

6. Mɔdenle boni a yɛbɔ amaa yɛava Gyihova ɛbɛlabɔlɛ nwo ngyinlazo mɔɔ kpogya la yɛabɔ yɛ ɛbɛla a?

⁶ Yɛfa Gyihova ɛbɛlabɔlɛ nwo ngyinlazo mɔɔ kpogya la ala a yɛbɔ yɛ ɛbɛla a. (Hib. 13:4) Ɛzoanvolɛ Pɔɔlo luale ndonwo zo dule yɛ folɛ kɛ ‘yɛhu’ yɛ sonlabaka ne nvɛyeba ne mɔ​—kile kɛ, yɛyɛ debie biala mɔɔ yɛbahola la yɛye atiakunluwɔzo ɛtane yɛvi yɛ nu. Yɛnnea anzɛɛ yɛnyɛ debie biala mɔɔ ɔbahola yeamaa yɛabɔ adwɔmane ɛbɛla la. (Kɔl. 3:5; Dwobu 31:1) Saa yɛyia sɔnea a, yɛkpo adwenle anzɛɛ debie biala mɔɔ bahola azɛkye yɛ nee Nyamenle agɔnwolɛvalɛ ne la.

7. Duzu a ɔwɔ kɛ yɛbɔ kpɔkɛ kɛ yɛbayɛ a, na duzu ati ɔ?

⁷ Gyihova anye la kɛ ‘yɛbavi ahonle nu yɛayɛ tieyɛ.’ (Wlo. 6:17) Ye adehilelɛ le kpalɛ maa yɛ dahuu yɛɛ yɛnrɛhola yɛnrɛhakyi ye mɛla ne mɔ. (Aye. 48:17, 18; 1 Kɔl. 6:9, 10) Yɛbɔ mɔdenle kɛ yɛbayɛ mɔɔ sɔ Gyihova anye na yɛala subane mɔɔ edwɛndolɛnli ne mɔɔ hanle kɛ, “Mebɔ kpɔkɛ kɛ mebali wɔ ngyehyɛleɛ ne mɔ azo mekɛ biala meahɔdwu awieleɛ” la lale ye ali la bie. (Edw. 119:112) Noko Seetan babɔ mɔdenle kɛ ɔmaa yɛ sa nu ado. Ndenle boni mɔ a ɔdua zo ɔyɛ zɔ a?

8. Kɛzi Seetan bɔ mɔdenle kɛ ɔdua kpɔdekpɔdeyɛlɛ zo yeazɛkye kpɔkɛ mɔɔ yɛbɔ la ɛ?

⁸ Kpɔdekpɔdeyɛlɛ. Abɔnsam bɔ mɔdenle kɛ ɔdua basabasayɛlɛ nee bɛ nwo zo ɛtinlitinlilɛ zo yeazɛkye kpɔkɛ mɔɔ yɛbɔ la. Ye bodane a le kɛ ‘ɔkye yɛ yeali,’ kile kɛ ɔsɛkye yɛ nee Gyihova agɔnwolɛvalɛ ne. (1 Pita 5:8) Kɛmɔ ɛnee alimoa Kilisienema ɛbɔ kpɔkɛ kɛ bɛbagyinla kpundii la ati, bɛnwunlonwunlanle bɛ, bɛbole bɛ yɛɛ bɛhunle bie mɔ. (Gyi. 5:27, 28, 40; 7:54-60) Seetan kɔ zo fa kpɔdekpɔdeyɛlɛ di gyima ɛnɛ. Yɛnwu ɛhye wɔ atisesebɛ nyɛleɛ mɔɔ bɛda ye ali bɛkile yɛ mediema mɔɔ wɔ Russia nee maanle gyɛne nu yɛɛ kɛzi dwazotiama yɛ yɛ kpɔdekpɔde la.

9. Maa deɛmɔti ɔhyia kɛ yɛnea boɛ wɔ ɛtinlitinlilɛ mɔɔ ɛnla ali wienyi anwo la anwo neazo.

 ⁹ Ɛtinlitinlilɛ mɔɔ ɛnla ali wienyi. Ɛye kpɔdekpɔdeyɛlɛ ɛsie ahane a, eza Seetan fa ‘agyibadolɛ’ di gyima. (Ɛfɛ. 6:11) Fa adiema nrenyia bie mɔɔ bɛfɛlɛ ye Bob mɔɔ ɛnee ɔwɔ kɛ bɛyɛ ye apelehyɛne kpole bie la edwɛkɛ ne kɛ neazo. Ɔhanle ɔhilele dɔketama ne kɛ ɔnva nwo mɔɔ bazi biala la, bɛmmamaa ye mogya. Dɔketa ne mɔɔ bayɛ apelehyɛne ne la liele dole nu kɛ ɔbayɛ mɔɔ yeha la. Noko nɔe ne mɔɔ aleɛ kye a bɛbayɛ apelehyɛne ne la, dɔketa gyɛne mɔɔ baboa wɔ apelehyɛne ɛyɛlɛ ne anu la rale Bob anwo ɛkɛ wɔ mekɛ mɔɔ ye abusua ne ɛhɔ sua nu la. Ɔhanle ɔhilele Bob kɛ bɛnrɛva mogya bɛnrɛyɛ apelehyɛne ne noko bɛbava bie bɛazie bɛ nwo amaa saa ɔhyia bie arɛlevilɛ nu a bɛava bɛamaa ye. Bie a dɔketa ne nyianle adwenle kɛ saa Bob abusua ne ɛnle ɔ nwo ɛkɛ ne a, ɔbahakyi ye adwenle. Noko Bob zile ɔ gyakɛ aze, ɔhanle kɛ ɔnva nwo mɔɔ bazi biala la bɛmmamaa ye mogya.

10. Duzu ati a sonla nzuzulɛ le ɛhane a? (1 Kɔlentema 3:19, 20)

¹⁰ Sonla nzuzulɛ. Saa yɛgyinla kɛzi menli dwenle ninyɛne nwo la azo yɛsuzu ninyɛne nwo a, bie a yɛbabu yɛ nye yɛagua Gyihova nee ye ngyinlazo ne mɔ azo. (Kenga 1 Kɔlentema 3:19, 20.) “Ewiade ɛhye anu nrɛlɛbɛ” maa menli ta di bɛ nwonane nu atiakunluwɔzo nzi. Kilisienema mɔɔ wɔ Pɛgamɛm nee Tayataela la bie mɔ liele awozonle ɛzonlenlɛ nee ɛbɛlatane nwo adwenle mɔɔ ɛnee menli dɔɔnwo lɛ wɔ zɔhane azuamgbole ne mɔ azo la dole nu. Gyisɛse hwile asafo nwiɔ zɔhane mɔ anyunlu kɛ bɛsosɔle adwɔmane ɛbɛla zo la. (Yek. 2:14, 20) Ɛnɛ, menli bɔ mɔdenle kɛ bɛtinlitinli yɛ nwo zo bɛamaa yɛalie nzuzulɛ mɔɔ ɛndenrɛ la yɛado nu. Bie a yɛ mbusuafoɔ nee yɛ gɔnwo mɔ babɔ mɔdenle kɛ bɛmaa yɛalie yɛali kɛ yɛlɛyɛ kyengye somaa na ɔwɔ kɛ yɛbulu Gyihova mɛla ne mɔ azo. Kɛ neazo la, bie a bɛbaha kɛ saa yɛdi yɛ atiakunluwɔzo nzi a, nvonleɛ biala ɛnle nwo na ɛbɛlabɔlɛ nwo ngyinlazo mɔɔ wɔ Baebolo ne anu la ɛkpa nwo.

11. Mekɛ mɔɔ yɛlɛgyinla kpundii la, duzu a ɔnle kɛ yɛyɛ a?

¹¹ Ɔdwu mekɛ ne bie a, yɛbanyia adwenle kɛ adehilelɛ mɔɔ Gyihova fa maa yɛ la anu ɛnla ɛkɛ ne kpalɛ. Bie a yɛbabɔ mɔdenle bɔbɔ kɛ ‘yɛbayɛ debie yɛamaa yeadɛla mɔɔ bɛhɛlɛ la.’ (1 Kɔl. 4:6) Ɛnee Gyisɛse mekɛ zo ɛzonlenlɛ nu mgbanyima ne mɔ di ɛtane ɛhye anwo fɔlɛ. Kɛmɔ bɛvale sonla amaamuo bɛbokale Mɛla ne anwo la ati, bɛmaanle ɔyɛle adesoa ɛlomboɛ ɔmaanle menli ne. (Mat. 23:4) Gyihova dua ye Edwɛkɛ ne nee ye ahyehyɛdeɛ ne azo maa yɛ adehilelɛ mɔɔ nuhua la ɛkɛ. Yɛnlɛ debie biala mɔɔ yɛbagyinla zo yɛava adehilelɛ ne bie yɛaboka mɔɔ ɔfa ɔmaa yɛ la anwo a. (Mrɛ. 3:5-7) Ɔti yɛnyɛ debie yɛmmaa ɔndɛla mɔɔ bɛhɛlɛ wɔ Baebolo ne anu la anzɛɛ yɛnli mɛla wɔ ninyɛne mɔɔ awie biala lɛ nwolɛ adenle si ɔ ti anwo kpɔkɛ wɔ nwolɛ la yɛmmaa yɛ mediema diedima.

12. Kɛzi Seetan fa “mɛlɛbɛla mgbane” di gyima ɛ?

¹² Mɛlɛbɛla. Seetan dua “mɛlɛbɛla mgbane” nee “ewiade ye mɔlebɛbo ninyɛne zo” minli menli na ɔkpakyekpakye bɛ nu. (Kɔl. 2:8) Wɔ ɛvoya mɔɔ limoa la anu, ɛnee ninyɛne ɛhye mɔ bie a le ewiade nrɛlɛbɛ mɔɔ gyi sonla amaamuo, Dwuuma ngilehilelɛ mɔɔ ɛngyi Ngɛlɛlera ne azo, yɛɛ ngilehilelɛ mɔɔ bɛkilehile kɛ ɔwɔ kɛ Kilisienema di Mosisi Mɛla ne azo la azo. Ninyɛne ɛhye mɔ bɛlɛbɛlale menli ɔluakɛ ɔmaanle bɛyele bɛ adwenle bɛvile Gyihova mɔɔ le nɔhalɛ nrɛlɛbɛ Ɛvileka ne la anwo zo. Ɛnɛ, Seetan dua TV nee riledio yɛɛ sohyia media zo maa edwɛkɛ mɔɔ ɛngyi kpɔkɛ zo nee adalɛ amaneɛbɔlɛ mɔɔ vi maanyɛlɛ mgbanyima  ne mɔ ɛkɛ ne la salo. Yɛtetele ɛhye mɔ dɔɔnwo wɔ COVID-19 ewulenzane mekɛ ne anu. c Adwenleadwenle mgbane mɔɔ dɔle bɛdabɛ mɔɔ bɛdiele mɛlɛbɛla edwɛkɛ ɛhye mɔ anwo la bie andɔ Gyihova Alasevolɛ mɔɔ diele adehilelɛ mɔɔ yɛ ahyehyɛdeɛ ne vale maanle la anwo.​—Mat. 24:45.

13. Duzu ati a ɔwɔ kɛ yɛnea boɛ na ninyɛne andwehwe yɛ adwenle a?

¹³ Ninyɛne mɔɔ twehwe adwenle. Ɔwɔ kɛ yɛfa yɛ adwenle yɛsie “ninyɛne mɔɔ hyia kpalɛ la” azo. (Fel. 1:9, 10) Ninyɛne mɔɔ twehwe adwenle la bahola alie yɛ mekɛ dɔɔnwo na yeaye yɛ adwenle yeavi ninyɛne mɔɔ hyia kpalɛ la azo. Saa yɛfa yɛ adwenle yɛsie ɛbɛlabɔlɛ nu ninyɛne le kɛ aleɛlilɛ, nzanlonlɛ, anyelielɛ ninyɛne nee gyima zo somaa a, ɔbahola yeahwehwe yɛ adwenle. (Luku 21:34, 35) Eza dahuu yɛte nzakadolɛ nee maanyɛlɛ nu kpolerazulɛ nwo amaneɛbɔlɛ dɔɔnwo. Ɔwɔ kɛ yɛnea boɛ amaa kpolerazulɛ ɛhye mɔ andwehwe yɛ adwenle. Saa yɛanyɛ ye zɔ a, bie a yɛbabɔ ɔ bo yɛagyinla bɛ nuhua bie afoa wɔ yɛ adwenle nee yɛ ahonle nu. Seetan dua ndenle ɛhye mɔ mɔɔ yɛzuzu nwolɛ la amuala azo kɛ ɔfa yeazɛkye kpɔkɛ mɔɔ yɛbɔ kɛ yɛyɛ mɔɔ le kpalɛ la. Maa yɛzuzu kɛzi yɛbahola yɛaho yɛatia ye na yɛahɔ zo yɛagyinla kpundii la anwo.

14. Debie ko mɔɔ baboa yɛ yeamaa yɛahɔ zo yɛagyinla Gyihova afoa la a le boni?

¹⁴ Dwenledwenle ɛ nwo zo ɛyilalɛ nee wɔ ɛzɔnenlɛ ne anwo. Ɛyɛle ninyɛne zɔhane mɔ ɔluakɛ ɛkulo kɛ ɛgyinla Gyihova afoa. Kakye debie mɔɔ boale wɔ ɔmaanle ɛliele ɛdole nu kɛ wɔnwu nɔhalɛ ne la. Ɛzukoale Gyihova anwo nɔhalɛ ndelebɛbo na ɛnyianle ɛbulɛ nee ɛlɔlɛ kpole ɛmaanle ye kɛ wɔ anwuma Selɛ. Ɛnyianle diedi na ɔhanle wɔ ɔmaanle ɛnlunle ɛ nwo. Ɛgyakyile kɛ ɛbayɛ ninyɛne mɔɔ Gyihova kyi la na ɛbɔle ɔ bo kɛ ɛyɛ mɔɔ sɔ ɔ nye la. Mɔɔ ɛnwunle kɛ Nyamenle ɛva wɔ ɛtane ɛhyɛ wɔ la, wɔ ahonle dɔle wɔ azule nu. (Edw. 32:1, 2) Ɛhɔle debiezukoalɛ na ɛbɔle ɔ bo kɛ ɛka ninyɛne ngɛnlɛma mɔɔ wɔzukoa la anwo  edwɛkɛ wɔahile awie mɔ. Kɛ Kilisienenli mɔɔ wɔyila ɛ nwo zo na bɛzɔne wɔ la, kɛkala ɛlua adenle ne mɔɔ kɔ ngoane nu la azo na wɔbɔ kpɔkɛ kɛ ɛnrɛvi zolɛ.​—Mat. 7:13, 14.

15. Duzu ati a yɛsukoa debie na yɛdwenledwenle nwolɛ a nvasoɛ wɔ zo a?

¹⁵ Sukoa Nyamenle Edwɛkɛ ne na dwenledwenle nwo. Kɛ mɔɔ baka bie ndinli kɔ moa a ɔmaa ɔ nwo yɛ se la, zɔhane ala a Nyamenle Edwɛkɛ ne maa yɛ diedi nu yɛ se a ɔmaa yɛkola yɛgyinla kpundii a. Saa baka bie ɛlɛnyi a, ye ndinli ne mɔ kɔ moa yɛɛ ɔtende ɔkɔ ɛleka dɔɔnwo. Saa yɛsukoa debie na yɛdwenledwenle nwolɛ a, ɔmaa yɛ diedi nu yɛ se na yɛnyia anwodozo kpole kɛ Nyamenle ndenle ne mɔ a le kpalɛ a. (Kɔl. 2:6, 7) Dwenledwenle kɛzi Gyihova adehilelɛ, ye folɛdulɛ nee ye banebɔlɛ boale ye azonvolɛ wɔ tete ne la anwo. Kɛ neazo la, mɔɔ anwumabɔvolɛ bie ɛlɛtɔ alagye azuzu ɛzonlenlɛsua ne mɔɔ wɔ Yizikeɛle ɛnyelɛzodeɛnwunlɛ ne anu la, Yizikeɛle vale ye adwenle ziele zolɛ kpalɛ. Ɛnyelɛzodeɛnwunlɛ ɛhye maanle Yizikeɛle anwosesebɛ, na ɔmaa yɛnwu kɛzi yɛbahola yɛali Gyihova nɔhalɛ ɛzonlenlɛ nwo ngyinlazo ne mɔ azo la anwo ɛzukoalɛdeɛ ngɛnlɛma. d (Yiz. 40:1-4; 43:10-12) Saa yɛdayɛ noko yɛtɔ alagye yɛsukoa Nyamenle Edwɛkɛ ne anu ninyɛne mɔɔ anu pi la na yɛdwenledwenle nwolɛ a, ɔbaboa yɛ.

16. Kɛzi ahonle mɔɔ gyi kpundii la bɔle Bob anwo bane ɛ? (Edwɛne 112:7)

¹⁶ Nyia ahonle mɔɔ gyi kpundii. Belemgbunli Devidi dole kɛzi ɔbahulo Gyihova dahuu la anwo edwɛne kɛ: “Me ahonle gyi ye kpundii, O Nyamenle.” (Edw. 57:7) Yɛdayɛ noko yɛbahola yɛanyia ahonle mɔɔ gyi kpundii na yɛava yɛ nwo yɛado Gyihova anwo zo bɔkɔɔ. (Kenga Edwɛne 112:7.) Nea kɛzi ɛhye boale Bob mɔɔ yɛlimoa yɛha ɔ nwo edwɛkɛ la. Mɔɔ bɛhanle bɛhilele ye kɛ bɛbava mogya bɛazie bɛ nwo amaa saa ɔhyia bie arɛlevilɛ nu a bɛava bɛamaa ye la, ɛkɛ ne ala ɔbuale bɛ kɛ saa ɔnwu kɛ bɛkulo kɛ bɛmaa ye mogya a, ɔbavi asopiti ɛkɛ ne ndɛndɛ. Nzinlii Bob hanle kɛ: “Meandwehwenle me bo aze yɛɛ mɔɔ ɔbavi nu ara la noko angyegye me.”

17. Duzu a yɛbahola yɛazukoa yɛavi Bob anwubielɛ ne anu a? (Eza nea nvoninli ne.)

 ¹⁷ Bob holale gyinlanle kpundii ɔluakɛ ɔlimoale ɔbɔle kpɔkɛ kɛ ɔbagyinla kpundii kolaa na yeahɔ asopiti ɛkɛ. Mɔɔ limoa, ɛnee ɔlɛ ɛhulolɛ kɛ ɔbamaa Gyihova anye alie. Mɔɔ tɔ zo nwiɔ, ɔdɔle alagye ɔzukoale mɔɔ Baebolo ne nee yɛ mbuluku ne mɔ ka wɔ kɛzi ngoane nee mogya le nwuanzanwuanza la anwo kpalɛ. Mɔɔ tɔ zo nsa, ɔliele ɔdole nu kɛ saa ɔdi Gyihova adehilelɛ zo a ɔbanyia nyilalɛ dahuu. Yɛdayɛ noko yɛbahola yɛanyia ahonle mɔɔ gyi kpundii ɔnva nwo sɔnea ngakyile mɔɔ yɛbayia la.

18. Kɛzi Balake neazo ne maa yɛnwu kɛ ɔwɔ kɛ yɛfa yɛ nwo yɛto Gyihova anwo zo ɛ? (Nea ɔ nyunlu nvoninli ne.)

¹⁸ Fa ɛ nwo to Gyihova anwo zo. Nea kɛzi Balake vale ɔ nwo dole Gyihova adehilelɛ zo la ati ɔwiele ye boɛ la. Bɛannwu enyinlike anzɛɛ atwɛ biala wɔ Yizilayɛ maanle ne amuala anu ɛdeɛ, noko Gyihova hanle hilele ye kɛ ɔ nee Keena sogya kpanyinli Sesɛla ɛlɔne ne mɔɔ bɛdedɛ akodeɛ la ɛhɔho. (Ndɛ. 5:8) Ngapezonli raalɛ Dɛbola hanle hilele Balake kɛ ɔtolo ɔhɔ bɔnza ne anu ɔhɔyia Sesɛla nee ye konle ehwili 900 ne. Ɛnee Balake ze kɛ wɔ bɔnza ne anu azɛlɛ sɛsɛ ne azo, ɔbayɛ se kɛ bɛ nee menli mɔɔ dede konle ehwili ne mɔ anu la baho bɔbɔ ɛdeɛ, noko ɔdiele. Mɔɔ sogyama ne tolole Teebɔ Boka ne la, Gyihova maanle ezule dɔle. Sesɛla konle ehwili ne mɔ miminle ndɛtɛlɛ ne anu, na Gyihova maanle Balake lile konim. (Ndɛ. 4:1-7, 10, 13-16) Zɔhane ala a saa yɛfa yɛ nwo yɛto Gyihova nee adehilelɛ mɔɔ ɔdua ye ahyehyɛdeɛ ne azo ɔfa ɔmaa yɛ la azo a, ɔbamaa yɛali konim a.​—Dit. 31:6.

19. Duzu ati a ɛkulo kɛ ɛgyinla kpundii dahuu a?

¹⁹ Mekɛ ala mɔɔ yɛtɛte ngoane nu wɔ ewiade ɛhye anu la, ɔwɔ kɛ yɛbɔ mɔdenle dahuu kɛ yɛbagyinla kpundii. (1 Tim. 6:11, 12; 2 Pita 3:17) Bɛmaa yɛbɔ kpɔkɛ kɛ yɛnrɛmaa kpɔdekpɔdeyɛlɛ, ɛtinlitinlilɛ mɔɔ ɛnla ali wienyi, sonla nzuzulɛ, mɛlɛbɛla yɛɛ ninyɛne mɔɔ twehwe adwenle la ɛnrɛbɔ yɛ ɛnrɛhɔ ɛnrɛra. (Ɛfɛ. 4:14) Emomu, yɛbagyinla yɛ gyakɛ azo, yɛagyinla kpundii wɔ ɛzonlenlɛ mɔɔ yɛfa yɛamaa Gyihova la anu na yɛazi pi kɛ yɛbali ye mɛla ne mɔ azo. Noko ɔwɔ kɛ yɛda ndelebɛbo ali. Wɔ edwɛkɛ bieko anu, yɛbazuzu kɛzi Gyihova nee Gyisɛse le kɛzi bɛda ndelebɛbo ali la anwo neazo mɔɔ di munli la anwo.