Ɛnee me papa le kpanyinli wɔ United Church of Canada ne mɔɔ wɔ ɛkɛ la anu, ɔti dapɛne biala ɔfa medame nee me diema raalɛ ne ɔkɔ Sunday school, na yɛkpɔne a yɛ nee ye ahɔ asɔne ne mɔɔ bɛyɛ ye nwonlomɔ 11:00 la bie. Ɔdwu ewiazo a, yɛ nee yɛ Mame kɔ debiezukoalɛ. Ɛnee ɔnyɛ se fee kɛ yɛbanwu ngakyile mɔɔ wɔ ɛzonlenlɛ nwiɔ ne anu la.

Me mame hanle ye diedi fofolɛ ne anwo edwɛkɛ hilele Bob nee Marion Hutcheson mɔɔ ɛnee bɛle ɔ gɔnwo mɔ dɛba la, na bɛdabɛ noko bɛliele nɔhalɛ ne bɛdole nu. Wɔ 1958, Hutcheson abusua ne vale medame nee bɛ mra mrenyia nsa ne hɔle Divine Will International Assembly ne mɔɔ bɛyɛle ye kenle mɔtwɛ wɔ New York City la bie. Saa meto me nye me nzi a, menwu kɛ ɛnee ɔnla aze kɛ bɛ nee me bahɔ, noko nyianu zɔhane le ninyɛne mɔɔ maa me nye die la anu ko.

Mɔɔ mele kakula kpavolɛ la, ɛnee yɛsie nyɛmoa na me nye liele bɛ ɛnleanlɛ nwo. Ɛnee ɔwɔ me adwenle nu kpalɛ kɛ mebayɛ dɔketa mɔɔ nea nane nane. Me mame hanle ɛhye anwo edwɛkɛ hilele asafo nu kpanyinli bie. Ɔmaanle mengakyele kɛ yɛde “mekɛ mɔɔ li awieleɛ la anu” na ɔhanle kɛzi ɛvolɛ dɔɔnwo mɔɔ mebava meahɔ yunivɛsiti la baha me nee Gyihova agɔnwolɛvalɛ ne la. (2 Tim. 3:1) Ɛhye ati menzile kpɔkɛ kɛ menrɛhɔ yunivɛsiti.

 Noko ɛnee metɛdwenle mɔɔ mewie sukunwiɔ a mebayɛ la anwo. Ɛnee mekɔ daselɛlilɛ dapɛne awieleɛ biala ɛdeɛ, noko ɛnee me nye ɛnlie nwo yɛɛ yeamba me adwenle nu kɛ mebahola meayɛ adekpakyelɛnli. Mekɛ zɔhane, ɛnee me papa nee ɔ diema nrenyia bie mɔɔ bɛnle Alasevolɛ la ɛlɛmaa me anwosesebɛ kɛ meva me mekɛ kɔsɔɔti menyɛ gyima wɔ kɔmpɛlɛ kpole bie mɔɔ wɔ Toronto la anu. Ɛnee me papa adiema ne lɛ gyinlabelɛ kpole wɔ ɛkɛ ɔti menliele mendole nu kɛ mebayɛ gyima ne.

Wɔ Toronto, kɛmɔ ɛnee dahuu memkpɔne gyima ndɛ yɛɛ me nee menli mɔɔ bɛnle diedima la dule la ati, ɛnee menda menyɛ sunsum nu ninyɛne. Mɔlebɛbo ne, ɛnee me nee me nenyia mɔɔ ɛnle Dasevolɛ la a de a, noko mɔɔ ɔwule la, ɛnee ɔwɔ kɛ menyia ɛleka fofolɛ metɛnla.

Hutcheson abusua ne mɔɔ bɛ nee me hɔle 1958 nyianu ne bie la rayɛle kɛ me awovolɛ. Bɛmaanle membandɛnlanle bɛ sua nu na bɛboale me bɛmaanle menyinle sunsum nu. Bɛzɔnenle me nee bɛ ra John wɔ 1960. John yɛle adekpakyelɛnli na ɔmaanle menwunle kɛ ɔwɔ kɛ meyɛ dɔɔnwo wɔ ɛzonlenlɛ gyima ne anu. Mediema mɔɔ wɔ asafo ne anu la nwunle kɛ menyia anyuhɔlɛ wɔ sunsum nu, na nzinlii bɛkpale me kɛ Teokelase Ɛzonlenlɛ Sukulu sonvolɛ. a

Wɔ 1966, mengyale Randi Berge, adekpakyelɛnli bie mɔɔ bɔ mɔdenle na ɔlɛ ɛhulolɛ kɛ ɔbahɔzonle wɔ ɛleka mɔɔ bɛhyia moalɛ kpole la. Yɛ neavolɛ adenduvo ne anye raliele yɛ nwo, na ɔmaanle yɛ anwosesebɛ kɛ yɛhɔboa asafo ne mɔɔ wɔ Orillia, Ontario la. Ɔti yɛdule yɛhɔle ɛkɛ.

Mɔɔ yɛdwule Orillia ala la, medame noko menyɛle dahuu adekpakyelɛnli. Me nye liele kɛ Randi la! Mɔɔ melɛbɔ mɔdenle kɛ bɛbayɛ adekpakyelɛnli kpalɛ la, membanwunle kɛzi ɛfa Baebolo ne ɛdi gyima na ɛnwu kɛ menli ɛde nɔhalɛ ne abo a ɔyɛ anyelielɛ la. Yɛ nye liele kɛ yɛboale agyalɛma bie mɔɔ wɔ Orillia la yɛmaanle bɛyɛle nzenzaleɛ wɔ bɛ ɛbɛlabɔlɛ nu na bɛrayɛle Gyihova azonvolɛ la.

Mɔɔ yɛhɔle Toronto bie la, yɛyiale Arnold MacNamara mɔɔ boka mediema mɔɔ li gyima ne anyunlu wɔ Bɛtɛle la. Ɔbizale yɛ kɛ saa yɛ nye balie nwo kɛ yɛbayɛ adekpakyelɛ titilima a. Ɛkɛ ne ala menganle kɛ: “Yɛbayɛ! Saa yɛnrɛhɔ Quebec ɛdeɛ a!” Ɛnee Canadama mɔɔ wɔ Quebec la ka Fenlanze, na kɛmɔ ɛnee basabasayɛlɛ ta kɔ zo wɔ ɛkɛ la ati, ɛnee Canadama mɔɔ ka Nrelenza la ɛnlɛ bɛ nwo adwenle kpalɛ na medame noko menyianle adwenle zɔhane bie. Mekɛ zɔhane, maanyɛlɛ fane bie mɔɔ wɔ Quebec la anu amra hanle kɛ bɛkulo kɛ bɛte bɛ nwo bɛfi Canada anwo.

Arnold hanle kɛ: “Mekɛ ɛhye noko mɔɔ, Quebec ala a Bɛtɛle ɛlɛfa adekpakyelɛ titilima ahɔ a.” Ɛkɛ ne ala menliele mendole nu kɛ mebahɔ. Ɛnee meze ye dɛba kɛ Randi anye die nwo kɛ ɔbahɔ lɔ. Nzinlii membanwunle kɛ, ɔle kpɔkɛ kpalɛ mɔɔ yɛsisile wɔ yɛ ɛbɛlabɔlɛ nu la anu ko!

Mɔɔ bɛmaanle yɛvale dapɛne nnu yɛzukoale Fenlanze yɛwiele la, me nee Randi yɛɛ agyalɛma bie hɔle Rimouski mɔɔ wɔ Montreal sɔlɔ aduduleɛ la, adenle ne tendenle le kɛyɛ kilomita 540 (ma 336). Mɔɔ mengengale nolobɔlɛ bie wɔ debiezukoalɛ bo la, yɛɛ menwunle ye wienyi kɛ yɛlɛ ninyɛne dɔɔnwo yɛsukoa a. Kɛ anrɛɛ mebaha kɛ menli dɔɔnwo vi “Austria” bara yɛ nyianu ne bie la, menganle kɛ menli dɔɔnwo vi “soholo” bara nyianu ne bie.

Mɔɔ yɛdayɛ menli nna yɛwɔ Rimouski la, mediema mraalɛ nna mɔɔ bɔ mɔdenle mɔɔ bɛtɛgyale yɛɛ Huberdeau abusua ne nee bɛ mra mraalɛ nwiɔ rabokale yɛ nwo. Huberdeau abusua ne hayele sua kpole bie mɔɔ ekpumgbunli nsuu a wɔ nu la, na adekpakyelɛma mɔɔ de ɛkɛ ne la amuala boale maanle bɛduale nwolɛ kakɛ ne. Ɛnee yɛfɛlɛ sua ne White House ɔluakɛ ɛnee bɛpenti ye mpila ne mɔ nee ɔ nyunlu fufule. Fane dɔɔnwo menli kɛyɛ 12 anzɛɛ 14 a de ɛkɛ a. Kɛmɔ me nee Randi le adekpakyelɛ titilima la ati, yɛkɔ daselɛlilɛ nwonlomɔ, ewiazo nee nɔsolɛ, ɔti saa dahuu yɛnyia awie mɔɔ ɔ nee yɛ bahɔ daselɛlilɛ​—bɔbɔ wɔ mekɛ mɔɔ ɛyɛlɛ ne ɛra kpalɛ la nɔsolɛ nu a​—yɛ nye die nwo.

Yɛ nee adekpakyelɛ nɔhavoma zɔhane mɔ agɔnwolɛvalɛ ne yɛle kyengye kpalɛ na bɛrayɛle kɛ yɛ mbusuafoɔ. Ɔdwu mekɛ ne bie a yɛwuda senle na yɛ muala yɛtɛnlɛdɛnla nwolɛ anzɛɛ yɛ muala yɛbɔ nu yɛto aleɛ. Ɛnee yɛ mediema mrenyia ne mɔ ko ze edwɛnebɔlɛ ninyɛne nye zo, ɔti ɔdwu Folɛ nɔsolɛ nu a yɛta yɛto edwɛne na yɛsi agole.

Gyima mɔɔ yɛyɛle ye wɔ Rimouski la zole ma! Wɔ ɛvolɛ nnu anu, yɛ Baebolo sukoavoma dɔɔnwo nyianle anyuhɔlɛ na bɛzɔnenle bɛ. Nolobɔlɛma mɔɔ wɔ asafo ne anu la rayɛle 35, na yɛ nye liele kpalɛ.

Mɔɔ yɛwɔ Quebec la, yɛnyianle ndetelɛ kpalɛ kɛ edwɛkpakavolɛma. Yɛnwunle kɛzi Gyihova boale yɛ wɔ yɛ ɛzonlenlɛ gyima ne anu na ɔmaanle yɛ sa hanle mɔɔ yɛhyia nwo la. Eza yɛ nye raliele menli mɔɔ ka Fenlanze, bɛ aneɛ ne yɛɛ bɛ amaamuo ne anwo​—na yemɔ maanle yɛ nye raliele menli gyɛne noko amaamuo nwo.​—2 Kɔl. 6:13.

Arɛlevilɛ nu, Bɛtɛle hanle hilele yɛ kɛ yɛdu yɛhɔ Tracadie mɔɔ wɔ New Brunswick aduduleɛ ɛnweazo la. Ɛnee ɛhye le ngyegyelɛ ɔluakɛ ɛnee bɔ zo mɔɔ yɛhaye sua bie a, yɛɛ sukulu bie vale me kɛ menva me mekɛ ne foa mengile debie wɔ ɛkɛ. Bieko, ɛnee bɔ zo mɔɔ yɛ Baebolo sukoavoma bie mɔ ɛrayɛ nolobɔlɛma a, yɛɛ ɛnee yɛgua yɛ Belemgbunlililɛ Asalo ne ɛzilɛ zo.

Yɛyɛle yɛ ɛhɔlɛ ne anwo asɔne dapɛne awieleɛ ne amuala na yɛhɔnleanle Tracadie, ɛnee ɔ nee Rimouski  ɛnle ko fee. Noko yɛzile kpɔkɛ kɛ kɛmɔ Gyihova kulo kɛ yɛkɔ ɛkɛ ne la ati, yɛbahɔ. Yɛzɔle Gyihova yɛnleanle na yɛnwunle kɛ ɔyele ninyɛne mɔɔ ɛlɛsi yɛ adenle la ngoko ngoko. (Mal. 3:10) Kɛmɔ Randi anwo yɛ se wɔ sunsum nu, ɔtu ɔ nwo ɔmaa yɛɛ ɔ nwo yɛ ɛzelekɛ la ati, yeammaa yɛ ɛhɔlɛ ne anyɛ se.

Asafo nu kpanyinli kokye mɔɔ ɛnee wɔ yɛ asafo fofolɛ ne anu la a le Robert Ross. Ɔ nee ɔ ye Linda hɔyɛle adekpakyelɛ gyima ne wɔ ɛkɛ, na mɔɔ bɛwole bɛ belamunli ralɛ ne la, bɛzile kpɔkɛ kɛ bɛbadɛnla ɛkɛ. Ɛnee bɛ ra nrenyia ne le kakula bɔbɔ ɛdeɛ, noko kɛzi bɛliele yɛ kɛnlɛma, kɛzi bɛgyi bɛ gyakɛ azo kpundii nee mɔdenle mɔɔ bɛbɔ wɔ ɛzonlenlɛ gyima ne anu la maanle me nee Randi anwosesebɛ kpalɛ.

Mɔɔ yɛyɛle adekpakyelɛ gyima ne ɛvolɛ nwiɔ wɔ Tracadie la, eza yɛdele anyelielɛ edwɛkɛ bie mɔɔ yɛ nye ɛnla​—bɛhanle kɛ yɛhɔyɛ neavolɛ adenduvo gyima ne bie. Yɛyɛle gyima ɛvolɛ nsuu wɔ Nrelenza maangyebakyi ne mɔ anu, na akee bɛmaanle yɛhɔle maangyebakyi mɔɔ bɛka Fenlanze mɔɔ wɔ Quebec la anu. Ɛnee yɛ maangyeba zo neavolɛ Léonce Crépeault kanvo me wɔ me ɛdendɛlɛ ne mɔ anwo. Noko nzinlii ɛnee ɔta ɔbiza me kɛ, “Ɛnea a bɛdele ɔ muala abo kpalɛ ɔ?” b Ɛhye boale me maanle menvale me adwenle menziele kɛzi mebamaa me ngilehilelɛ ne anu ala ɛkɛ na bɛade ɔ bo ndɛndɛ la azo.

Gyimalilɛ mɔɔ me rɛle ɛnrɛvi la anu ko a le mɔɔ menyianle ye wɔ 1978 “Victorious Faith” Maanle Maanle Avinli Nyianu ne mɔɔ bɛyɛle ye wɔ Montreal anu la. Menyɛle gyima wɔ ɛleka mɔɔ bɛto aleɛ la. Ɛnee yɛ nye la kɛ menli 80,000 bara, yɛɛ bɛyɛle ngyehyɛleɛ fofolɛ mɔɔ yɛbalua zo yɛamaa bɛ aleɛ a. Debie biala hakyile bɔkɔɔ: ahyɛnze mɔɔ yɛbava yɛado aleɛ ne, aleɛ holɛ ko mɔɔ yɛbado yɛɛ kɛzi yɛbado aleɛ ne la. Ɛnee yɛlɛ felegye mgbole 20 na ɔdwu mekɛ ne bie a ɛnee bɛzɛkye. Kolaa na nyianu ne kenle mɔɔ limoa la abɔ ɔ bo la, yɛangola yɛanwolo setediyɔm ɛkɛ ne bɔbɔ yɛanziezie yɛ ninyɛne, ɔlua nwɔhoalilɛ bie mɔɔ bɛbayɛ ye wɔ ɛkɛ la ati, ɔti ɛnee ɔwɔ kɛ yɛkendɛ too nɔɔzo. Yɛɛ ɛnee ɔwɔ kɛ yɛsɔ senle yɛto nwonlomɔ nu aleɛ kolaa na maanle nu atete! Yɛvɛle kpalɛ, noko menzukoale ninyɛne dɔɔnwo menvile mediema gyɛne mɔɔ dule bɛ nwo maanle la gyima ɛsesebɛ, bɛ sunsum nu anyuhɔlɛ nee kɛzi bɛ nwo yɛ anyelielɛ la anu. Yɛbikyele yɛ nwo kpalɛ, na yemaa yɛyɛ agɔnwolɛma too  yeradwu ɛnɛ. Ɔyɛ anyelielɛ kpalɛ kɛ yɛhɔle nyianu titili ɛhye mɔɔ bɛyɛle ye wɔ Quebec, ɛleka ko ne ala mɔɔ ɛnee bɛdwazo bɛtia yɛ ɛsesebɛ wɔ 1940 nee 1950 ne anu la bie la!

Menzukoale ninyɛne dɔɔnwo menvile me mediema neavolɛma gyɛne ɛkɛ wɔ yɛ nyianu mgbole mɔɔ yɛyɛle ye wɔ Montreal la abo. Wɔ ɛvolɛ ko anu, David Splane mɔɔ ɛnɛ ɔboka Neazo Eku ne anwo la a nleanle nyianu gyimalilɛ ne azo a. Mekɛ mɔɔ bɛhanle kɛ menyɛ zɔhane gyima ne wɔ nyianu bie mɔɔ bɛyɛle ye nzinlii anu la, David boale me kpalɛ.

Wɔ 2011, mɔɔ ɛnee yɛva ɛvolɛ 36 yɛyɛ neavolɛ adenduvoma gyima ne la, bɛhanle kɛ membanyɛ Asafo Mgbanyima Sukulu ne kilehilevolɛ. Me nee Randi lale ɛkpa ngakyile 75 azo wɔ ɛvolɛ nwiɔ anu, noko nvasoɛ rale zo. Dapɛne biala kara awieleɛ la, ɛnee anyelielɛ ɛyi mgbanyima ne mɔ tɛkɛɛ, ɔluakɛ bɛnwunle kɛzi bɛ sunsum nu gyinlabelɛ ne anwo hyia Neazo Eku ne la.

Nzinlii mengilele debie wɔ Belemgbunlililɛ Edwɛkpakavolɛma Sukulu ne anu. Kɛmɔ ɛnee ninyɛne dɔɔnwo wɔ ngyehyɛleɛ ne azo la ati, ɛnee sukoavoma ne ta fɛ kpalɛ: yɛkile bɛ debie dɔnehwele nsuu alehyenlɛ biala, nɔsolɛ biala bɛfa dɔnehwele nsa bɛsukoa gyima mɔɔ yɛva yɛmaa bɛ la yɛɛ dapɛne biala bɛyɛ gyimalilɛ nna anzɛɛ nnu. Me nee kilehilevolɛ ɛhendeɛ ne hilehilele nu hilele bɛ kɛ bɛnrɛhola bɛnrɛyɛ kyesɛ Gyihova boa bɛ. Me rɛle ɛnrɛvi kɛzi ɔzinle sukoavoma ne anwo kɛ, kɛmɔ bɛvale bɛ nwo bɛdole Gyihova anwo zo la ati bɛholale bɛyɛle ninyɛne dɔɔnwo bɛdɛlale kɛzi bɛzuzule la ɛlɛ.

Kɛmɔ me mame hilele awie mɔ anwo anyelielɛ la ati, ɔboale ye Baebolo sukoavoma ɔmaanle bɛnyianle anyuhɔlɛ yɛɛ ɔboale me papa bɔbɔ ɔmaanle ɔhakyile ye subane wɔ nɔhalɛ ne anwo. Me mame wule la ye kenle nsa, ɔzinle yɛ nwo kɛ me papa radiele bagua nu ɛdendɛlɛ bie wɔ debiezukoalɛ bo la, na ɔdoale zo ɔhɔle debiezukoalɛ too ɛvolɛ 26. Bɛanzɔne me Papa ɛlɛ ɛdeɛ, noko mgbanyima ne mɔ hanle hilele me kɛ dahuu ɔdaye a ɔdimoa wɔ debiezukoalɛ bo a.

Me mame noko yɛle neazo kɛnlɛma maanle me nee me mediema mraalɛ ne mɔ. Me mediema mraalɛ nsa ne nee bɛ hu mɔ ɛlɛsonle Gyihova nɔhalɛ nu. Bɛ nuhua nwiɔ yɛ gyima wɔ Bɛtɛle​—ko wɔ Portugal yɛɛ ko noko wɔ Haiti.

Ɛnɛ, me nee Randi le adekpakyelɛ titilima wɔ Hamilton, Ontario. Mɔɔ ɛnee yɛyɛ neavolɛ adenduvo gyima ne la, yɛhɔzɔhonle awie mɔ yɛmaanle bɛyɛle bɛ sia kɔkpɔla nee Baebolo ɛzukoalɛ. Noko kɛkala yɛ nye die nwo kɛ yɛbanwu kɛ yɛdayɛ mumua ne yɛ Baebolo sukoavoma ɛlɛnyia anyuhɔlɛ wɔ sunsum nu. Na mekɛ mɔɔ yɛlɛbikye yɛ mediema mɔɔ wɔ yɛ asafo fofolɛ ne anu kpalɛ la, yɛnwu kɛzi Gyihova boa bɛ wɔ mekɛ kpalɛ nee mekɛ ɛtane nu la, na yemɔ maa yɛ anwosesebɛ.

Saa yɛto yɛ nye yɛ nzi a, yɛ nye sɔ kɛzi menli dɔɔnwo hilele yɛ nwo anyelielɛ la kpalɛ. Yɛdayɛ noko yɛbɔ mɔdenle yɛmaa awie mɔ nwu kɛzi yɛdwenle bɛ nwo la, yɛmaa bɛ anwosesebɛ kɛ bɛyɛ biala mɔɔ bɛbahola la bɛmaa Gyihova. (2 Kɔl. 7:6, 7) Kɛ neazo la, wɔ abusua ko bie anu, ɛnee yelɛ ne, bɛ ra nrenyia yɛɛ bɛ ra raalɛ ne amuala yɛ dahuu ɛzonlenlɛ gyima ne bie. Membizale kunli ne kɛ saa yɛdwenle adekpakyelɛ gyima ne anwo a. Ɔhanle ɔhilele me kɛ ɔlɛnea adekpakyelɛma nsa. Ɔti membizale ye kɛ, “Ɛbahola wɔanlea bɛ kpalɛ wɔadɛla Gyihova ɔ?” Memaanle ye anwosesebɛ kɛ ɔnyia anyelielɛ ne mɔɔ bɛlɛnyia la bie. Ɔkadwu siane nsia la ɛnee yeyɛ adekpakyelɛnli.

Me nee Randi bahɔ zo aha Gyihova “nwanwane gyima ne mɔ” anwo edwɛkɛ ahile “awolɛndoazo fofolɛ,” na yɛ nye la kɛ bɛ nye balie ye ɛzonlenlɛ nwo kɛ yɛdayɛ la.​—Edw. 71:17, 18.