1-2. Zeedɔko a le nwane? (1 Edwɛkɛsisilɛ 12:​22, 26-28)

 PƐ NWOLƐ nvoninli nea. Menli ekpunli mɔɔ bɛbo 340,000 la yiale kɛ bɛsie Devidi belemgbunli bɛamaa yeanlea Yizilayɛ amuala azo. Bɛdɛnlanle awoka ngyikyi ne mɔ mɔɔ bikye Hibulɔn la azo too kenle nsa. Bɛbɔle adawu, bɛzelele yɛɛ bɛdole ayɛlɛyelɛ edwɛne bɛmaanle Gyihova. (1 Ek. 12:39) Ɛnee kpavolɛ bie mɔɔ bɛfɛlɛ ye Zeedɔko la boka menli ekpunli ne anwo, noko bie a menli dɔɔnwo annwu ye. Noko Gyihova kulo kɛ yɛnwu kɛ ɛnee Zeedɔko wɔ ɛkɛ ne bie. (Kenga 1 Edwɛkɛsisilɛ 12:​22, 26-28.) Zeedɔko a le nwane?

² Zeedɔko le ɛsɔfo na ɛnee ɔ nee Ɛsɔfo Kpanyinli Abayata a yɛ gyima a. Ɛnee eza Zeedɔko le ɛnyelɛzodeɛnwunlɛnli mɔɔ ɔkola ɔnwu mɔɔ Nyamenle kpondɛ kɛ bɛyɛ yɛɛ eza ɔmaanle ye nwunu kpole. (2 Sa. 15:27) Saa menli hyia folɛdulɛ mɔɔ nrɛlɛbɛ wɔ nu la a, bɛkɔ Zeedɔko ɛkɛ. Ɛnee eza ɔlɛ akɛnrasesebɛ. Ye subane ɛhye a yɛbazuzu nwo wɔ edwɛkɛ ɛhye anu a.

3. (a) Duzu ati a ɔwɔ kɛ Gyihova azonvolɛ nyia akɛnrasesebɛ a? (b) Duzu a yɛbazuzu nwo wɔ edwɛkɛ ɛhye anu a?

³ Seetan ɛlɛmia ɛtetalɛ mɔɔ ɔfa ɔba Nyamenle menli nwo zo la anu wɔ awieleɛ mekɛ ɛhye anu. (1 Pita 5:8) Ɔwɔ kɛ yɛnyia akɛnrasesebɛ wɔ mekɛ mɔɔ yɛlɛkendɛ kɛ Gyihova baye Seetan nee ye ngyehyɛleɛ ɛtane ne yeavi ɛkɛ la. (Edw. 31:24) Maa yɛzuzu ndenle nsa mɔɔ yɛbahola yɛalua zo yɛazukoa Zeedɔko akɛnrasesebɛ ne la anwo.

 GYINLA NYAMENLE BELEMGBUNLILILƐ NE ANZI

4. Duzu ati a Gyihova menli hyia akɛnrasesebɛ amaa bɛahola bɛagyinla Nyamenle Belemgbunlililɛ ne anzi a? (Eza nea nvoninli ne.)

⁴ Kɛ Gyihova menli la, yɛfi yɛ ahonle muala anu yɛgyinla Nyamenle Belemgbunlililɛ ne anzi, noko yɛhyia akɛnrasesebɛ na yɛahola yɛayɛ zɔ. (Mat. 6:33) Kɛ neazo la, yɛhyia akɛnrasesebɛ na yɛahola yɛava Gyihova ngyinlazo ne mɔ yɛabɔ yɛ ɛbɛla na yɛabɔ Belemgbunlililɛ edwɛkpa ne nolo wɔ ewiade ɛtane ɛhye anu. (1 Tɛs. 2:2) Eza fane dɔɔnwo ne ala, yɛhyia akɛnrasesebɛ amaa yɛangyinla afoa biala wɔ ewiade ɛhye mɔɔ maanyɛlɛ ti mgbakyemgbakyenu wɔ nu dahuu la anu. (Dwɔn 18:36) Gyihova menli dɔɔnwo ezukoa ɛvi bɛ sa, bɛbo bɛ anzɛɛ bɛgua bɛ efiade ɔluakɛ bɛanva bɛ nwo bɛanwulowula maanyɛlɛ nu anzɛɛ bɛangɔ sogya la ati.

5. Duzu ati a ɛnee Zeedɔko hyia akɛnrasesebɛ na yeahola yeagyinla Devidi anzi a?

⁵ Tɛ Devidi mɔɔ bɛsie ye belemgbunli la ala ati a Zeedɔko hɔle Hibulɔn a. Ɔvale ye konle ninyɛne ɔhɔle na ɛnee yeziezie ɔ nwo yemaa konle. (1 Ek. 12:38) Ɛnee ɔlɛ ɛhulolɛ kɛ ɔ nee Devidi bahɔ konle na bɛabɔ Yizilayɛ anwo bane bɛavi ye agbɔvolɛ asa anu. Bie a ɛnee Zeedɔko ɛnlɛ anwubielɛ dɔɔnwo kɛ sogyanli la, noko ɛnee ɔlɛ akɛnrasesebɛ kpalɛ.

6. Kɛzi Devidi yɛle akɛnrasesebɛ nwo neazo kpalɛ maanle Zeedɔko ɛ? (Edwɛne 138:3)

⁶ Nienwu a ɛsɔfo le kɛ Zeedɔko zukoale ye akɛnrasesebɛ ne vile a? Ɛnee menli mɔɔ anwo yɛ se na bɛlɛ akɛnrasesebɛ la ɛbɔ Zeedɔko ɛyia. Ɛhye ati a ɔzukoale bɛ neazo ne la. Kɛ neazo la, akɛnrasesebɛ mɔɔ Devidi lale ye ali ‘lile Yizilayɛma anyunlu hɔle konle la’ maanle Yizilayɛma amuala vile bɛ ahonle nu gyinlanle ɔ nzi. (1 Ek. 11:​1, 2) Mɔɔ Devidi agbɔvolɛ rale ɔ nwo zo la, ɔkpondɛle moalɛ ɔvile Gyihova ɛkɛ. (Edw. 28:7; kenga Edwɛne 138:3.) Eza Zeedɔko zukoale menli le kɛ Gyɛhɔyada nee ɔ ra Bɛnaya mɔɔ le kovolɛ la yɛɛ mbusua  mgbanyima 22 ne mɔɔ gyinlanle Devidi anzi la neazo ne. (1 Ek. 11:​22-25; 12:​26-28) Menli ɛhye mɔ amuala zile kpɔkɛ kɛ bɛbagyinla Devidi tumililɛ ne anzi.

7. (a) Yɛ mekɛ ye azo akɛnrasesebɛ nwo neazo boni a yɛbahola yɛzukoa debie yɛavi nu a? (b) Duzu a yɛsukoa yɛfi Adiema Nsilu neazo ne mɔɔ wɔ vidio ne anu la anu a?

⁷ Saa yɛsuzu menli mɔɔ lale akɛnrasesebɛ ali gyinlanle Gyihova nee ye Belemgbunlililɛ ne anzi la anwo a, ɔmaa yɛdayɛ noko yɛda akɛnrasesebɛ ali. Yɛ Belemgbunli Gyisɛse Kelaese bɔle mɔdenle ɛsesebɛ kɛ ɔnrɛgyinla Seetan maanyɛlɛ ngyehyɛleɛ ne afoa wɔ mekɛ mɔɔ ɔwɔ azɛlɛ ye azo la. (Mat. 4: 8-11; Dwɔn 6:​14, 15) Ɔvale ɔ nwo ɔdole Gyihova anwo zo dahuu amaa yeala akɛnrasesebɛ ali. Wɔ yɛ mekɛ ye azo noko, yɛlɛ mediema mgbavolɛ mɔɔ bɛzi kpɔkɛ kɛ bɛnrɛhɔ sogya anzɛɛ bɛnrɛva bɛ nwo bɛnrɛwulowula maanyɛlɛ ngyehyɛleɛ biala anu la. Yɛmaa wɔ anwosesebɛ kɛ ɛgenga bɛ anwubielɛ ne bie wɔ jw.org. a

BOA Ɛ MEDIEMA

8. Mekɛ boni a bie a mgbanyima bahyia akɛnrasesebɛ amaa bɛava moalɛ mɔɔ bɛ mediema hyia nwo la bɛamaa bɛ a?

⁸ Gyihova menli lɛ ɛhulolɛ kɛ bɛbaboa bɛ nwo ngoko. (2 Kɔl. 8:4) Noko ɔdwu mekɛ ne bie a yɛhyia akɛnrasesebɛ na yɛahola yɛayɛ zɔ. Kɛ neazo la, mɔɔ konle bie zile la, mgbanyima mɔɔ wɔ ɛkɛ ne la nwunle kɛ bɛ mediema ne mɔ hyia anwosesebɛmaanlɛ, moalɛ, Baebolo, mbuluku mɔɔ gyi Baebolo ne azo, aleɛ, adɛladeɛ nee dabelɛ. Ɔlua ɛlɔlɛ mɔɔ bɛlɛ bɛmaa mboane ne la ati, mgbanyima ne mɔ vale bɛ ngoane dole esiane nu amaa bɛahola bɛava mɔɔ mediema hyia la bɛamaa bɛ. (Dwɔn 15:​12, 13) Ɛhye mɔɔ bɛyɛle la maanle bɛzukoale Zeedɔko akɛnrasesebɛ ne.

9. Kɛ mɔɔ 2 Samoɛle 15:​27-29 kile la, duzu a Devidi hanle hilele Zeedɔko kɛ ɔyɛ a? (Eza nea nvoninli ne.)

⁹ Ɛnee Devidi ngoane la esiane nu. Ɔ ra Abesalɛm zile kpɔkɛ kɛ ɔdie belemgbunlililɛ ne yeavi ɔ sa nu. (2 Sa. 15:​12, 13) Ɛnee ɔwɔ kɛ Devidi yɛ ye ndɛndɛ fi Gyɛlusalɛm! Devidi  zele ye sonvolɛma ne kɛ: “Bɛdwazo bɛmaa yɛnriandi, ɔluakɛ yɛ nuhua ko biala ɛnrɛvi Abesalɛm asa!” (2 Sa. 15:14) Mɔɔ ye sonvolɛma ne ɛlɛkɔ la, Devidi nwunle kɛ ɔwɔ kɛ awie tɛnla Gyɛlusalɛm amaa yeanwu Abesalɛm adwenle ngyehyɛlɛ na yeaha nwolɛ edwɛkɛ yeahile ye. Ɔti ɔzoanle Zeedɔko nee ɛsɔfoma bie mɔ kɛ bɛzia bɛhɔ suakpole ne azo bɛhɔyɛ busiama. (Kenga 2 Samoɛle 15:​27-29.) Ɛnee ɔwɔ kɛ bɛmaa bɛ nye da ɛkɛ kpalɛ. Mɔɔ Devidi hanle hilele ɛsɔfoma ɛhye mɔ kɛ bɛyɛ la anzi yɛ ɛzulolɛ kpalɛ yɛɛ ɔbamaa bɛ ngoane ala esiane nu bɔbɔ. Wɔmɔ nea o, saa Abesalɛm mɔɔ le angomedi, ɔyɛ basabasa na ɔyele ye papa ɔmaanle la nwunle kɛ Zeedɔko nee ɛsɔfoma gyɛne ɛlɛdi ye busia amaa bɛabɔ Devidi anwo bane a, anrɛɛ duzu a ɔbava yeayɛ bɛ a?

10. Kɛzi Zeedɔko nee menli mɔɔ ɔ nee bɛ lua la bɔle Devidi anwo bane ɛ?

¹⁰ Devidi vale adwenle bie na ɔvale ɔluale Zeedɔko nee ɔdaye Devidi ɔ gɔnwo Huhyae mɔɔ di nɔhalɛ la anwo zo. (2 Sa. 15:​32-37) Huhyae yɛle mɔɔ Devidi hanle la, ɔyɛle ɔ nwo kɛ asɛɛ ɔwɔ Abesalɛm afoa na ɔmaanle ye adwenle wɔ kɛzi ɔbahola yeateta Devidi la anwo. Na adwenle zɔhane bamaa Devidi anyia mekɛ aziezie ɔ nwo amaa Abesalɛm ɛtetalɛ ne. Akee Huhyae hanle adwenle mɔɔ ɔbɔle la anwo edwɛkɛ hilele Zeedɔko nee Abayata. (2 Sa. 17:​8-16) Bɛdabɛ noko bɛbɔle Devidi amaneɛ. (2 Sa. 17:17) Gyihova boale Zeedɔko nee ɔ gɔnwo mɔ ɛsɔfoma ne ɔmaanle bɛbɔle Devidi anwo bane.—2 Sa. 17:​21, 22.

11. Kɛzi yɛbahola yɛazukoa Zeedɔko akɛnrasesebɛ ne wɔ mekɛ mɔɔ yɛlɛboa yɛ mediema la ɛ?

¹¹ Saa bɛka kɛ yɛboa yɛ mediema wɔ mekɛ mɔɔ anu yɛ se la anu a, kɛ ɔkɛyɛ na yɛala Zeedɔko akɛnrasesebɛ ne bie ali ɛ? (1) Di adehilelɛ zo. Ɔhyia kɛ yɛbayɛ ko wɔ tɛnlabelɛ zɛhae mɔ anu. Di adehilelɛ mɔɔ bɛ maanle ne anu Bɛtɛle ne bava amaa bɛ la azo. (Hib. 13:17) Ɔwɔ kɛ asafo nu mgbanyima ta neɛnlea ngyehyɛleɛ mɔɔ bɛ asafo ne ɛyɛ ɛziezie bɛ nwo ɛmaa esiane mekɛ nee adehilelɛ mɔɔ ahyehyɛdeɛ ne bava  amaa wɔ mekɛ mɔɔ esiane ɛlɛba arazi la anu. (1 Kɔl. 14:​33, 40) (2) Nyia akɛnrasesebɛ, noko maa ɛ nye ɛla ɛkɛ. (Mrɛ. 22:3) Fa wɔ adwenle di gyima. Mmafa ɛ nwo ɛto esiane mɔɔ nwolɛ ɛngyia la anu. (3) Fa ɛ nwo to Gyihova anwo zo. Kakye kɛ ɔhyia Gyihova kpole kpalɛ kɛ ɛ nee ɛ mediema banyia anwobanebɔlɛ. Ɔbahola yeaboa wɔ yeamaa wɔaboa ɛ mediema wɔamaa bɛabɔ bɛ nwo bane.

12-13. Duzu a ɛsukoa ɛfi Viktor nee Vitalii anwubielɛ ne anu a? (Eza nea nvoninli ne.)

¹² Suzu Viktor nee Vitalii, mediema mrenyia nwiɔ mɔɔ bɛnyi sunsum nu mɔɔ ɛnee bɛfa aleɛ nee nzule bɛkɔmaa bɛ mediema diedima wɔ Ukraine la neazo ne anwo. Viktor hanle kɛ, “Yɛwolole ɛleka biala yɛhɔkpondɛle aleɛ. Fane dɔɔnwo ne ala ɛnee yɛte kɛ bɛlɛtoto adu wɔ ɛleka mɔɔ bikye yɛ la. Adiema nrenyia ko vale ye aleɛ mɔɔ yeva yezie ye sua bie anu la hyɛle yɛ. Ɛhye maanle nolobɔlɛma dɔɔnwo asa hanle mɔɔ bɛbahyia nwo wɔ mekɛ bie anu la. Mɔɔ yɛlɛsesa aleɛ ne yɛagua kale ne anu la, bɔmbo ko radɔle yɛ nwo ɛkɛ ne ɛleka bie, noko yeande. Ɛnee adenle kɛyɛ mita 20 (futuu 66) ala a la yɛ avinli a. Menzɛlɛle Gyihova wɔ alehyenlɛ ne anu amuala kɛ ɔmaa me akɛnrasesebɛ mɔɔ mehyia nwo amaa meahɔ zo meaboa mediema ne mɔ la.”

¹³ Vitalii hanle kɛ, “Ɛnee yɛhyia akɛnrasesebɛ kpole. Adenle mɔɔ menlimoale mempɛle la lile dɔnehwele 12. Menyɛle asɔne too mengɔndwule ɛleka mɔɔ mekɔ la.” Ɛnee Vitalii lɛ akɛnrasesebɛ noko eza ɔmaanle ɔ nye lale ɛkɛ. Ɔdoale zolɛ kɛ: “Mengɔle zo menzɛlɛle Gyihova kɛ ɔmaa me nrɛlɛbɛ na ɔmaa membɛlɛ me nwo aze. Kale adenle mɔɔ maanle ne anu mgbanyima hilele kɛ yɛva zo la ala a menvale zo a. Mɔɔ menwunle kɛzi mediema mrenyia nee mraalɛ bɔle nu yɛle gyima la, ɔmaanle me diedi nu mianle. Bɛyeyele ninyɛne mɔɔ duale adenle ne la bɛvile ɛkɛ, bɛboɔboale aleɛ nee ninyɛne mɔɔ mediema ne mɔ bahyia nwo la anloa na bɛvale bɛguale kale ne anu, yɛɛ saa yɛdwu sua bie azo na ɔwɔ kɛ yɛgyinla yɛdie yɛ menle a, bɛmaa yɛ ɛleka yɛtɛnla.”

KƆ ZO DI NƆHALƐ MAA GYIHOVA

14. Saa yɛ kulovolɛ bie anli nɔhalɛ ammaa Gyihova a, wɔannea a kɛzi ɔbaha yɛ ɛ?

¹⁴ Sɔnea mɔɔ maa yɛdi nyane kpalɛ la anu ko a le kɛ yɛ busuanli anzɛɛ yɛ gɔnwo bie bagyakyi Gyihova ɛzonlenlɛ. (Edw. 78:40; Mrɛ. 24:10) Saa yɛbikye ahenle ne kpalɛ a, ɔmaa ɔyɛ se kɛ yɛbalie tɛnlabelɛ ne yɛado nu. Saa wɔhɔ tɛnlabelɛ ɛhye mɔɔ yɛ nyane la bie anu ɛlɛ a, Zeedɔko nɔhalɛlilɛ nwo neazo ne bahola amaa wɔ anwosesebɛ.

15. Duzu ati a ɛnee Zeedɔko hyia akɛnrasesebɛ na yeahɔ zo yeali nɔhalɛ yeamaa Gyihova a? (1 Arelemgbunli 1:​5-8)

¹⁵ Zeedɔko hɔle zo lile nɔhalɛ maanle Gyihova wɔ mekɛ mɔɔ ɔ gɔnwo kpalɛ Abayata kpale kɛ ɔnrɛli nɔhalɛ la. Ɛhye zile wɔ Devidi tumililɛ ne awieleɛ. Mɔɔ Devidi la ye ewule ɛkpa zo la, ɔ ra nrenyia Adonaegya bɔle mɔdenle kɛ ɔdie belemgbunli ebia ne mɔɔ Gyihova bɔle ɛwɔkɛ kɛ ɔbava yeamaa Sɔlɔmɔn la. (1 Ek. 22:​9, 10) Abayata kpale kɛ ɔbagyinla Adonaegya anzi. (Kenga 1 Arelemgbunli 1:​5-8.) Ɛhye mɔɔ Abayata yɛle la ammaa yeanli nɔhalɛ yeammaa Devidi nee Gyihova! Nea kɛzi Zeedɔko bali nyane na ɔ sa nu ado la! Ɛnee ɔ nee Abayata ɛbɔ nu ɛyɛ ɛsɔfo gyima ne too kɛyɛ ɛvolɛ 40. (2 Sa. 8:17) Bɛbɔle nu bɛnleanle “nɔhalɛ Nyamenle ne Ɛlɛka ne.” (2 Sa. 15:29) Mɔlebɛbo ne bɛ mu nwiɔ bɛgyinlanle Devidi belemgbunlililɛ ne anzi yɛɛ bɛyɛle ninyɛne gyɛne dɔɔnwo.—2 Sa. 19:​11-14.

16. Duzu a ɔbayɛ kɛ ɔboale Zeedɔko ɔmaanle ɔhɔle zo ɔlile nɔhalɛ a?

¹⁶ Abayata anli nɔhalɛ ɛdeɛ noko Zeedɔko hɔle zo lile nɔhalɛ maanle Gyihova. Ɛnee Devidi ze kɛ Zeedɔko bali nɔhalɛ dahuu. Mɔɔ  Adonaegya adwenle ɛtane ne lale ali la, Devidi kpale Zeedɔko, Neetan nee Bɛnaya kɛ bɛkpokpa Sɔlɔmɔn kɛ belemgbunli. (1 Arl. 1:​32-34) Ɔbayɛ kɛ kɛmɔ Zeedɔko nee Gyihova azonvolɛ nɔhavoma le kɛ Neetan yɛɛ menli gyɛne mɔɔ bɛgyinlanle Belemgbunli Devidi anzi la dule la ati, bɛmaanle ye anwosesebɛ. (1 Arl. 1:​38, 39) Mɔɔ Sɔlɔmɔn rayɛle belemgbunli la, “ɔkpale ɛsɔfo Zeedɔko ɔziele Abayata agyakɛ anu.”—1 Arl. 2:35.

17. Saa awie mɔɔ bikye wɔ la anli nɔhalɛ ammaa Gyihova a, kɛ ɔkɛyɛ na wɔazukoa Zeedɔko ɛ?

¹⁷ Kɛ ɔkɛyɛ na wɔazukoa Zeedɔko ɛ? Saa awie mɔɔ bikye wɔ la kpa kɛ ɔnrɛzonle Gyihova a, maa Gyihova ɛnwu ye kɛ ɛbahɔ zo wɔali nɔhalɛ wɔamaa ye. (Dwɔh. 24:15) Gyihova bamaa wɔ anwosesebɛ nee akɛnrasesebɛ mɔɔ ɛhyia nwo la. Dua asɔneyɛlɛ zo fa ɛ nwo to ɔ nwo zo na bikye ɛ gɔnwo mɔ diedima mɔɔ di nɔhalɛ la. Wɔ nɔhalɛlilɛ ne sonle bolɛ maa Gyihova na ɔbamaa wɔ nwolɛ ahatualɛ.—2 Sa. 22:26.

18. Duzu a ɛsukoa ɛfi Marco nee Sidse anwubielɛ ne anu a?

¹⁸ Suzu Marco nee ɔ ye Sidse mɔɔ bɛ mra mraalɛ nwiɔ ne mɔɔ ɛnee bɛnyi la vile nɔhalɛ ne anu la edwɛkɛ ne anwo. Marco hanle kɛ: “Ɛnyia ɛ mra ne mɔ anwo ɛlɔlɛ kpole ɔvi kenle mɔɔ ɛbawo bɛ la. Ɛyɛ debie biala ɛbɔ bɛ nwo bane. Ɔti saa bɛkpa kɛ bɛnrɛzonle Gyihova bieko a, ɔmaa wɔ ɛbolɛ te kpalɛ.” Ɔdoale zolɛ kɛ: “Noko Gyihova ɛlɛboa yɛ yeamaa yɛagyinla ɔ nloa. Ɔnea kɛ saa meyɛ bɛtɛɛ a, me ye anwo bayɛ se, yɛɛ saa me ye yɛ bɛtɛɛ a, me nwo bayɛ se.” Sidse doale zolɛ kɛ: “Saa Gyihova ammaa yɛ anwosesebɛ mɔɔ yɛhyia nwo la a, anrɛɛ yɛnrɛhola ɔ nloa gyinla. Ɛnee dahuu medi nyane yɛɛ mete nganeɛ kɛ medame a meammaa yɛ mra ne mɔ anzonle Gyihova a, ɔti menganle kɛzi mete nganeɛ la mengilele ye. Yeangyɛ, adiema raalɛ bie mɔɔ menwunle ye la ɛhyɛ kpalɛ la rale me ɛkɛ, ɔvale ɔ sa ɔguale me bati, ɔnleanle me nyunlu na ɔhanle kɛ: ‘Sidse, kakye kɛ nvonleɛ ne ɛnvi wɔ!’ Ɔlua Gyihova moalɛ zo, melɛkola meava anyelielɛ meazonle ye bieko.”

19. Duzu a wɔbɔ kpɔkɛ kɛ ɛbayɛ a?

¹⁹ Gyihova kulo kɛ ye azonvolɛ kɔsɔɔti nyia akɛnrasesebɛ kɛ Zeedɔko la. (2 Tim. 1:7) Noko ɔngulo kɛ yɛfa yɛ nwo yɛto yɛdayɛ mumua ne yɛ anwosesebɛ zo. Ɔkulo kɛ yɛfa yɛ nwo yɛto ɔ nwo zo. Ɔti saa ɛkɔ tɛnlabelɛ bie anu na ɛhyia akɛnrasesebɛ a, sɛlɛ Gyihova. Ɛbahola wɔanyia anwodozo kɛ ɔbamaa wɔanyia akɛnrasesebɛ kɛ Zeedɔko la!—1 Pita 5:10.