Wɔgenga Ɛzinzalɛ Arane mɔɔ ɛra kenlensa ye la kpalɛ ɔ? Nea saa ɛbahola wɔabua kpuya ɛhye mɔ a:

Ninyɛne nna boni a yɛbahola yɛayɛ amaa yɛava ɛnelɛ kpalɛ yɛado edwɛne a?

Ɔwɔ kɛ yɛgyinla kpalɛ na yɛmaa yɛ edwɛne buluku ne zo. Ɔwɔ kɛ yɛdie ɛnwomenle kpole. Saa yɛbuke yɛ nloa na yɛto edwɛne ne kpole a, edwɛne ne bavinde kpalɛ.​—w17.11, m. 5.

Duzu a ɛ nye die nwo wɔ ɛleka mɔɔ Yizilayɛ ɛvealeka azuamgbole ne mɔ wɔ nee bɛ ndenle ne mɔ anwo a?

Ɛnee ɛvealeka azuamgbole ne mɔ le nsia, yɛɛ bɛ ndenle ne mɔ le mgbalɛ. Awie kola kɔ ɛvealeka azuamgbole ne mɔ azo ndɛndɛ mɔɔ ɔnvɛ nwo.​—w17.11, m. 14.

Duzu ati a Nyamenle ɛkpɔnedeɛ ahyɛlɛdeɛ ne mɔɔ ɔlua Gyisɛse anwo zo yeva yemaa la le ahyɛlɛdeɛ mɔɔ tɛla biala mɔɔ yɛbahola yɛanyia a?

Ɔdi ɛhulolɛ mɔɔ yɛlɛ kɛ yɛbadɛnla aze dahuu nee fanwodi mɔɔ yɛkulo kɛ yɛnyia yɛfi ɛtane nee ewule nu la anwo gyima. Kɛmɔ Nyamenle kulo Adam abozoamra la ati, ɔvale Gyisɛse ɔmaanle mekɛ mɔɔ ɛnee yɛtɛde ɛtanevolɛma la.​—wp17.6, m. 6-7.

Kɛzi Edwɛndolɛ 118:22 fale Gyisɛse ewudwazo ne anwo ɛ?

Bɛkpole Gyisɛse kɛ ɔnle Mɛzaya na bɛhunle ye. Amaa Gyisɛse ahola ayɛ “bolɛ mɔɔ anwo hyia kpole kpalɛ” la, ɛnee ɔwɔ kɛ bɛdwazo ye bɛba ngoane nu bieko.​—w17.12, m. 9-10.

Asoo belamunli ralɛ ne anwo zo ala a ɛnee ɔwɔ kɛ Mɛzaya ne dua ba ɔ?

Ɔyɛ a, abusua mɔɔ Gyisɛse vi nu la dua belamunli ralɛ nrenyia ne anwo zo​—noko tɛ mekɛ ne amuala ɔ. Devidi ɛnle Gyɛsi belamunli ralɛ; noko, Mɛzaya ne vi Devidi abusua nu a rale a.​—w17.12, m. 14-15.

Ayileyɛlɛ nwo ngyinlazo boni mɔ a wɔ Baebolo ne anu a?

Wɔ Mosisi Mɛla ne anu, bɛyele menli mɔɔ lɛ ewule bie mɔ la bɛvile menli nu. Ɛnee ɔwɔ kɛ menli wowo bɛ sa anwo wɔ mekɛ mɔɔ bɛkɛzɔ funli nu la. Mɛla ne hilele adenle kpalɛ mɔɔ ɔwɔ kɛ awie dua zo sɔho ɔ gyakɛ la. Ɛnee ɔwɔ kɛ bɛpɛ kakula mrenyiazo wɔ kenle mɔtwɛ ne azo, ɔluakɛ debie mɔɔ maa mogya pɛ la bɔ ɔ bo yɛ gyima wɔ bɛ nu.​—wp18.1, m. 7.

Duzu ati a ɔfɛta kɛ Kilisienenli kulo ɔ nwo a?

Ɔwɔ kɛ yɛkulo yɛ gɔnwo kɛ yɛ nwo. (Maake 12:31) Ɔwɔ kɛ kunlima “kulo bɛ ye mɔ kɛ bɛ nwo.” (Ɛfɛ. 5:28) Nɔhalɛ nu, wɔannea a yɛnrɛnyia ɛlɔlɛ mɔɔ fɛta la yɛnrɛmaa yɛ nwo.​—w18.01, m. 23.

Duzu a ɔwɔ kɛ yɛyɛ amaa yɛanyia anyuhɔlɛ kɛ sunsum nu menli ɛ?

Ɔwɔ kɛ yɛsukoa Nyamenle Edwɛkɛ ne, yɛdwenledwenle nwo na yɛfa yɛyɛ gyima. Eza ɔwɔ kɛ yɛmaa sunsum nwuanzanwuanza ne nyia yɛ adwenle nee yɛ ahonle ne azo tumi, yɛmaa awie mɔ boa yɛ na yɛkile nwolɛ anyezɔlɛ.​—w18.02, m. 26.

Duzu ati a nwɔlɔra neɛnleanu nee kenle bie edwɛkɛ ɛhanlɛ ɛmmaa yɛnnwu kenle bie edwɛkɛ ɛ?

Ngilebɛbo ne zonle, noko nuhua titili ne a le kɛ Baebolo ne tua nyɛleɛ nwiɔ zɔhane.​—wp18.2, m. 4-5.

Kɛzi ɔwɔ kɛ yɛbu ɛsalɛ mɔɔ awie bado avɛlɛ yɛ kɛ yɛrali aleɛ la ɛ?

Saa yɛlie ɛsalɛdolɛ bie yɛdo nu a, ɔwɔ kɛ yɛbɔ mɔdenle yɛdi yɛ edwɛkɛ zo. (Edw. 15:4) Ɔnle kɛ yɛ nye fuu yɛpɛ nu. Bie a ahenle mɔɔ die yɛ ɛyɛvolɛ la ɛbɔ mɔdenle ɛziezie yɛ nzi.​—w18.03, m. 18.

Duzu a mgbanyima nee azonvolɛ bahola azukoa avi Timote ɛkɛ a?

Timote dwenlenle menli nwo kpalɛ yɛɛ ɔvale sunsum nu ninyɛne ɔlimoale. Ɔbɔle mɔdenle wɔ ɛzonlenlɛ nwuanzanwuanza nu, eza ɔvale mɔɔ ɔzukoale la ɔlile gyima. Ɔtetele ɔ nwo dahuu yɛɛ ɔvale ɔ nwo ɔdole Gyihova sunsum ne azo. Mgbanyima nee awie mɔ bahola azukoa ye neazo ne.​—w18.04, m.13-14.