“HƐLLO! Ɛnɛ kɛ ɛ nwo de ɛ?”

Nɔhalɛ nu, bie a wɔbiza awie ahye zɛhae ɛlɛ. Bie bɔbɔ a eza ɛzomaanle ye anzɛɛ ɛyɛle ye atuu. Amaamuo nee edwɛkɛ agbɔkɛ mɔɔ bɛfa bɛdi gyima la bahola ayɛ ngakyile wɔ ɛleka dɔɔnwo, noko asɛɛ ahyebizalɛ ne amuala le ko. Nɔhalɛ nu, saa awie ɛmbiza ahye anzɛɛ bɛbiza ye ahye a ɔnlie zo a, bɛbu ye kɛ ɔnlɛ ɛlɔlɛ anzɛɛ ɔmbu debie.

Noko, tɛ awie biala a kulo ahyebizalɛ a. Nyianezelɛ ti, bie mɔ ɛngulo ahyebizalɛ anzɛɛ bɛte nganeɛ kɛ nvasoɛ ɛnle bɛ nwo zo. Ɔyɛ bie mɔ ɛse kɛ bɛbabiza menli mɔɔ ka aneɛ gyɛne, asolo bɛ amaamuo anzɛɛ bɛ ɛzukoa gyinlabelɛ la ahye. Noko, ahyebizalɛ sikalɛ bɔbɔ kola boa kpalɛ.

Biza ɛ nwo kɛ: ‘Duzu a ahyebizalɛ kola yɛ a? Duzu a Nyamenle Edwɛkɛ ne maa menwu ye wɔ ahyebizalɛ nwo a?’

Mɔɔ ɛzoanvolɛ Pita liele Kɔnileɛse, Maanle Maanle ne anu sonla mɔɔ limoa rale Kilisiene asafo ne anu la, ɔhanle kɛ: “Nyamenle ɛnnea sonla nyunlu.” (Gyi. 10:34) Nzinlii, Pita hɛlɛle kɛ Nyamenle kulo kɛ “menli kɔsɔɔti nu bɛ nwo.” (2 Pita 3:9) Wɔannea a, ɛbaha kɛ tɛkese zɔhane fale awie mɔɔ ɛlɛsukoa nɔhalɛ ne la anwo. Noko, eza Pita dule Kilisienema folɛ kɛ: “Bɛli menli kɔsɔɔti eni, bɛhulo mediema muala.” (1 Pita 2:17) Asoo ɔnrɛyɛ kpalɛ kɛ yɛbabiza awie mɔ ahye ɔnva nwo bɛ abusua, amaamuo anzɛɛ ɛleka mɔɔ bɛvi la ɔ? Ɛhye bahile kɛ yɛdi bɛ eni yɛɛ yɛkulo bɛ.

Ɛzoanvolɛ Pɔɔlo dule asafo ne anu amra folɛ kɛ: “Bɛlie bɛ nwo ngoko kɛ mɔɔ Kelaese noko liele bɛ la.” (Wlo. 15:7) Pɔɔlo hanle mediema mɔɔ ‘boale’ ye la anwo edwɛkɛ dɔɔnwo. Ɔwɔ kɛ yɛdayɛ noko yɛboa yɛ mediema mrenyia nee mraalɛ kpalɛ wɔ mekɛ mɔɔ Seetan ɛlɛmia Nyamenle menli mɔɔ ɔlɛteta bɛ anu la.​—Kɔl. 4:11, ɔbdw.; Yek. 12:12, 17.

Ngɛlɛlera ne maa yɛnwu kɛ ahyebizalɛ boa kpalɛ tɛla awie mɔ mɔɔ ɔmaa bɛ ahonle adɔ bɛ azule nu la.

Mekɛ dwule mɔɔ ɔwɔ kɛ bɛfa Nyamenle Ara ne ngoane bɛwula Mɛle awodeɛ nu la, Gyihova zoanle anwumabɔvolɛ maanle ɔ nee ye dendɛle. Anwumabɔvolɛ ne bɔle ɔ bo kɛ, “Anzodwolɛ ɛha wɔ, wɔmɔ mɔɔ bɛlo wɔ a, Gyihova nee wɔ de.” Edwɛkɛ ne “gyegyele [Mɛle] kpalɛ,” na ɛnee ɔnde ɔ bo kɛ anwumabɔvolɛ ɛlɛtendɛ ahile ye la. Mɔɔ anwumabɔvolɛ ne nwunle ɛhye la, ɔhanle kɛ: “Mmasulo Mɛle, ɔluakɛ wɔnyia Nyamenle anyunlu ɛlolɛ.” Ɔhilele nu kɛ, ɛnee ɔle Nyamenle bodane kɛ ɔbawo Mɛzaya ne. Kɛ anrɛɛ Mɛle bamaa edwɛkɛ ne ahɔ zo agyegye ye la, ɔdiele na ɔbuale kɛ: “Nea! Gyihova sonvolɛ bɛlɛra a le me! Mɔɔ wɔha la ɛyɛ zɔ ɛmaa me.”​—Luku 1:26-38.

Anwumabɔvolɛ ne nyianle adenle yɛle Gyihova kpɔmavolɛ; noko, yeanyia adwenle kɛ ɔnfɛta kɛ ɔbiza dasanli mɔɔ ɔnli munli la ahye. Ɔlimoa ɔbizale ahye. Duzu a yɛsukoa yɛfi zɔhane neazo ne anu a? Ɔwɔ kɛ yɛnyia ɛhulolɛ kɛ yɛbabiza awie mɔ ahye na yɛamaa bɛ anwosesebɛ. Edwɛkɛ ekyi bie bɔbɔ mɔɔ yɛbaha la bamaa awie mɔ anyia anwodozo kɛ amgba bɛboka Gyihova menli ne anwo.

Pɔɔlo ranwunle menli dɔɔnwo mɔɔ bɛwɔ asafo mɔɔ wɔ Ehyea Ekyi nee Abolokyi la. Ɔbizale menli titili bie mɔ dɔɔnwo ahye wɔ ye ngɛlata ne mɔ anu. Yɛnwu ɛhye wɔ Wulomuma tile 16. Pɔɔlo bizale mediema Kilisienema dɔɔnwo ahye. Ɔbɔle “yɛ diema  raalɛ” Fobi duma, na ɔdule mediema folɛ kɛ ‘bɛlie ye wɔ Awulae anu kɛ mɔɔ ɔfɛta nwuanzanwuanzama la, na bɛva moalɛ biala mɔɔ ɔhyia nwolɛ la bɛmaa ye.’ Pɔɔlo bizale Pelesela nee Akoyela ahye na ɔhanle kɛ, “tɛ me ngome a meyɛ bɛ mo a, emomu asafo ne mɔ mɔɔ wɔ maanle maanle ne anu la amuala noko.” Ɔbizale menli mɔɔ ɛnɛ bɛnze bɛ kpalɛ la ahye​—“me kulovolɛ Ɛpaenɛtɛse” yɛɛ “Telaefina nee Telaefosa, mraalɛ mɔɔ ɛlɛyɛ gyima ɛsesebɛ wɔ Awulae anu la.” Ɛhɛe, Pɔɔlo vile ye ɛhulolɛ nu bizale ɔ mediema ahye.​—Wlo. 16:1-16.

Mɔɔ bɛnwunle kɛ bɛkakye bɛ kpalɛ la, nea kɛzi bɛ nye liele a. Nea kɛzi ɛlɔlɛ mɔɔ bɛlɛ bɛmaa Pɔɔlo nee bɛ nwo ngoko la anu mianle a! Mɔɔ bɛdele zɔhane ahyebizalɛ ne la, ɔmaanle Kilisienema gyɛne anwosesebɛ ɔmaanle bɛgyinlanle kpundii wɔ diedi ne anu. Nɔhalɛ nu, ahyebizalɛ mɔɔ bɛfa bɛkile awie anwo anyelielɛ na bɛkanvo ye la maa agɔnwolɛvalɛ nu mia na ɔmaa koyɛlɛ tɛnla Nyamenle azonvolɛ avinli.

Mɔɔ Pɔɔlo dwule meli agyinlaleɛ mɔɔ wɔ Putiyɔle na ɔlɛkɔ Wulomu la, Kilisienema mɔɔ wɔ ɛkɛ la rale nyiakɛ rayiale ye. Mɔɔ Pɔɔlo nwunle bɛ la, “ɔyɛle Nyamenle mo na ɔnyianle akɛnrasesebɛ.” (Gyi. 28:13-15) Ɔdwu mekɛ ne bie a, yɛbahola yɛazele anzɛɛ yɛayɛ awie bye bye yɛava yɛabiza ye ahye. Noko, yemɔ kola maa awie anwosesebɛ, bɔbɔ awie mɔɔ arɛle ɛbɔ anzɛɛ ɔlɛdi nyane la.

Ɛnee ɔwɔ kɛ ɛdoavolɛ Gyemise fa folɛdulɛ mɔɔ anwo hyia la maa. Kilisienema bie mɔ zɛkyele agyalɛ wɔ sunsum nu, ɔluakɛ bɛvale ewiade ne agɔnwolɛ. (Gye. 4:4) Noko, yɛ kɛzi Gyemise bɔle ye kɛlata ne abo la nzonlɛ:

“Gyemise, Nyamenle nee Awulae Gyisɛse Kelaese akɛlɛ, ɛlɛkɛlɛ ahɔmaa mbusua ekpunli 12 ne mɔɔ ɛde ɛkponde la: Mebiza bɛ!” (Gye. 1:1) Ɔda ali kɛ, ye ahyebizalɛ ne maanle ye kengavolɛma nwunle kɛ bɛ muala bɛlɛ gyinlabelɛ ko wɔ Nyamenle anyunlu, ɔti, yeanyɛ se kɛ bɛbadie ye folɛdulɛ ne. Ɛhɛe, ɛbulɛ nu mɔɔ bɛfi bɛbiza ahye la kola buke adenle maa bɛsuzu ninyɛne mɔɔ anwo hyia kpalɛ la anwo.

Ahyebizalɛ kpalɛ mɔɔ le sikalɛ bɔbɔ la ɔwɔ kɛ fi ahonle nu na ɔda nɔhalɛ ɛlɔlɛ ali. Ɛhye le zɔ saa bɔbɔ awie anwu ye a. (Mat. 22:39) Adiema raalɛ bie mɔɔ wɔ Ireland la dwule Belemgbunlililɛ Asalo ɛkɛ la ɛnee ɔka ekyi bɛbɔ debiezukoalɛ bo. Mɔɔ ɔlɛwolo la, adiema nrenyia ko hakyile ɔ nwo, ɔzelele, na ɔhanle kɛ “Hɛllo. Ɔyɛ anyelielɛ kpalɛ kɛ menwu wɔ a.” Adiema raalɛ ne hɔdɛnlanle aze.

Dapɛne ekyi pɛle nu la, ɔbikyele adiema ne na ɔzele ye kɛ, kenlensa ye melɛyia ngyegyelɛ bie wɔ sua nu. Ɔhanle kɛ, “Zɔhane nɔsolɛ ne ɛnee meva ɛya kpalɛ, ɔti ɔhale ekyi na meamba debiezukoalɛ. Mengakye edwɛkɛ dɔɔnwo mɔɔ bɛhanle ye wɔ debiezukoalɛ ne abo la, wɔ ahyebizalɛ ne ala. Ɔmaanle me nye liele kpalɛ. Meda wɔ ase.”

Ɛnee adiema nrenyia ne ɛnze kɛzi ye ahyebizalɛ sikalɛ ne boale la. Ɔhanle kɛ: “Mɔɔ adiema raalɛ ne hanle kɛzi me ahyebizalɛ ne boale ye la, ɔyɛle me fɛ kɛ menyɛle zɔ la. Eza ɔmaanle me nye liele.”

Sɔlɔmɔn hɛlɛle kɛ: “Fuandi wɔ kpanwo ne to azule ne anye, na kenle bie ɛ sa baha ye.” (Nol. 11:1) Saa yɛnwu nvasoɛ mɔɔ wɔ yɛ ahyebizalɛ zo a, titili yɛ mediema Kilisienema a, ɔmaa yɛ nee awie mɔ anye die. Ɔti, bɛmmamaa yɛbu yɛ nye yɛgua tumi mɔɔ wɔ ahyebizalɛ nu la azo ɛlɛ.