1. Kɛ mɔɔ Kɔlɔsaema 2:4, 8 maa yɛnwu ye la, kɛzi Seetan bɔ mɔdenle kɛ ɔnyia yɛ adwenle ne azo tumi ɛ?

SEETAN kulo kɛ ɔtwe yɛ ɔfi Gyihova anwo. Amaa yeadwu ye bodane nwo la, ɔbɔ mɔdenle kɛ ɔbanyia yɛ adwenle ne azo tumi. Wɔ adenle fofolɛ zo, ɔkulo kɛ ɔfa yɛ ɔyɛ ye ngɛkɛlɛ na yɛtie ye. Ɔbɔ mɔdenle kɛ ɔdua ninyɛne mɔɔ yɛ nye die nwo la azo yeabɛlɛbɛla yɛ.​—Kenga Kɔlɔsaema 2:4, 8.

2-3. (a) Duzu ati a ɔwɔ kɛ yɛfa kɔkɔbɔlɛ mɔɔ wɔ Kɔlɔsaema 2:8 la anyebolo zo a? (b) Duzu a yɛbazuzu nwo wɔ edwɛkɛ ɛhye anu a?

² Asoo amgba Seetan bɔ mɔdenle kɛ ɔbɛlɛbɛla yɛ ɛnɛ? Ɛhɛe! Esiane kpole ɛhye bahola ado yɛ. Kakye kɛ, tɛ menli mɔɔ ɛnle diedima la a Pɔɔlo hɛlɛle edwɛkɛ mɔɔ wɔ Kɔlɔsaema 2:8 la maanle bɛ a. Ɔhɛlɛle ɔmaanle Kilisienema mɔɔ bɛva sunsum nwuanzanwuanza ne bɛkpokpa bɛ la. (Kɔl. 1:2, 5) Ɛnee Kilisienema zɔhane mɔ wɔ esiane nu, na ɛnɛ yɛ tɛnlabelɛ ne anu yɛ se tɛla bɛ ɛdeɛ ne. (1 Kɔl. 10:12) Duzu ati ɔ? Ɔluakɛ bɛdu Seetan bɛvi anwuma bɛdo azɛlɛ ye azo, na yeva yezie ɔ nye zo kɛ ɔbɛlɛbɛla Nyamenle nɔhalɛ azonvolɛ. (Yek. 12:9, 12, 17) Bieko, yɛde mekɛ mɔɔ amumuyɛma nee adalɛma bahɔ bɛ nyunlu wɔ “ɛtaneyɛlɛ nu” la anu.​—2 Tim. 3:1, 13.

³ Wɔ edwɛkɛ ɛhye anu, yɛbanwu kɛzi Seetan dua “mɛlɛbɛla” adenle zo sɛkye yɛ adwenle la. Yɛbazuzu ye “agyiba” anzɛɛ ye “mɛlɛbɛla” ne mɔ nsa anwo. (Ɛfɛ. 6:11; ɔbdw.) Akee, wɔ edwɛkɛ mɔɔ doa zo la anu, yɛbanwu kɛzi yɛbaho yɛatia Seetan amaa ye ndenle ne mɔ annyia yɛ adwenle ne  azo tumi la. Mɔɔ limoa, bɛmaa yɛzuzu kɛzi Seetan bɛlɛbɛlale Yizilayɛma wɔ Ɛwɔkɛ Azɛlɛ ne azo nee mɔɔ yɛbahola yɛazukoa yɛavi nu la anwo.

4-6. Kɛ mɔɔ Mɛla ne 11:10-15 ka la, nzenzaleɛ boni a ɛnee ɔwɔ kɛ Yizilayɛma yɛ wɔ kɛzi bɛso ɛya wɔ Ɛwɔkɛ Azɛlɛ ne azo la anu a?

⁴ Seetan luale nrɛlɛbɛ adenle zo bɛlɛbɛlale Yizilayɛma maanle bɛzonlenle awozonle. Adenle boni azo? Ɛnee ɔwɔ kɛ Yizilayɛma nyia aleɛ, na ɔvale nwolɛ adenle zɔhane ɔzɔle bɛ ɔnleanle. Mɔɔ Yizilayɛma dwule Ɛwɔkɛ Azɛlɛ ne azo la, ɛnee ɔwɔ kɛ bɛkakyi adenle mɔɔ bɛdua zo bɛso ɛya la. Mɔɔ Yizilayɛma wɔ Yigyibiti la, ɛnee bɛtwe nzule bɛfi Naele ne anu bɛgugua bɛ aleɛ zo. Noko, ɛnee adenle mɔɔ bɛdua zo bɛyɛ ɛbɔ nu gyima wɔ Ɛwɔkɛ Azɛlɛ ne azo la le ngakyile, ɛnee nzule mɔɔ tɔ nee ɛbɔlɛ a bɛfa bɛyɛ bɛ egyinli nu gyima a. (Kenga Mɛla ne 11:10-15; Aye. 18:4, 5) Yemɔti, ɛnee ɔwɔ kɛ Yizilayɛma sukoa ndenle fofolɛ mɔɔ bɛdua zo bɛso ɛya la. Ɛnee ɛhye ɛyɛlɛ ɛnla aze, ɔluakɛ bɛ nuhua dɔɔnwo mɔɔ lɛ anwubielɛ la wule wɔ fienemgbole ne anu.

⁵ Gyihova maanle ye menli ne nwunle kɛ kɛkala bɛ tɛnlabelɛ ne ɛhakyi. Akee ɔvale kɔkɔbɔlɛ ɛhye mɔɔ bie a ɛbaha kɛ ɔnvale ɛyazonlɛ nwo la ɔbokale nwo, ɔhanle kɛ: ‘Bɛnlea boɛ noko na bɛambɛlɛbɛla bɛ nwo, bɛandwe bɛ nwo bɛanvi Gyihova anwo bɛangɔnzonle awozonle na bɛambɔ bɛ ti aze bɛammaa bɛ.’ (Mɛla 11:16, 17) Duzu ati a Gyihova bɔle ye menli ne kɔkɔ wɔ awozonle ɛzonlenlɛ nwo wɔ mekɛ mɔɔ ɔlɛka ndenle fofolɛ mɔɔ bɛbalua zo bɛayɛ bɛ egyinli nu gyima anwo edwɛkɛ la ɛ?

⁶ Ɛnee Gyihova ze ye kɛ, Yizilayɛma babɔ mɔdenle kɛ bɛsukoa ndenle mɔɔ awozonle  ɛzonlenlɛma mɔɔ de bikye bɛ dua zo so ɛya la. Nɔhalɛ nu, ɛnee menli ɛhye mɔ ze egyinli ɛyɛlɛ nye zo tɛla Yizilayɛma, na ɛnee Nyamenle menli ne bazukoa ninyɛne dɔɔnwo avi bɛ ɛkɛ. Noko ɛnee esiane wɔ nu. Ɛnee Keena ɛyazonlɛma zɔhane mɔ sonle bozonle Beeyale. Ɛnee bɛdie bɛdi kɛ, anwomanyunlu le Beeyale ɛdeɛ, na ɔdaye a ɔmaa nzule tɔ a. Ɛnee Gyihova ɛngulo kɛ diedi funli ɛhye nyia ye menli ne anwo zo tumi. Noko, mekɛ ɛlɛkɔ la, ɛnee ɔyɛ a Yizilayɛma fa bɛ nwo wula Beeyale ɛzonlenlɛ nu. (Ɛdi. 25:3, 5; Man. 2:13; 1 Arl. 18:18) Akee nea kɛzi Seetan vale Yizilayɛma yɛle ye ngɛkɛlɛ la.

7. Diedi nwo sɔnea boni a Yizilayɛma yiale wɔ Ɛwɔkɛ Azɛlɛ ne azo a?

⁷ Ɛhane mɔɔ limoa la a le kɛ, ɔluale debie mɔɔ bɛhyia nwo la azo, ɛnee ɔwɔ kɛ bɛnyia nzule bɛgugua bɛ aleɛ zo. Ɛnee nzule ɛnda ɛndɔ wɔ Ɛwɔkɛ Azɛlɛ ne azo ɔvi April kɔdwu September wɔ ɛvolɛ biala anu. Yemɔti, ɛnee saa nzule bɔ ɔ bo kɛ ɔtɔ wɔ October a yɛɛ Yizilayɛma aleɛ yɛ kpalɛ a. Seetan bɛlɛbɛlale Yizilayɛma ɔmaanle bɛdele nganeɛ kɛ, amaa bɛ aleɛ ayɛ kpalɛ la, ɔwɔ kɛ bɛdua ndenle mɔɔ awozonle ɛzonlenlɛma mɔɔ ɛbɔ bɛ ɛyia fa zo yɛ bɛ ɛya la azo. Ɛnee awozonle ɛzonlenlɛma ɛhye mɔ die di kɛ, ɔwɔ kɛ bɛyɛ nyɛleɛ bie mɔ kolaa na awozonle ne mɔ amaa nzule adɔ. Menli mɔɔ ɛnlɛ diedi wɔ Gyihova anu la nyianle adwenle kɛ, ɛhye a baboa bɛ na bɛanyia nzule a, yemɔti bɛvale bɛ nwo bɛwulale awozonle ɛzonlenlɛ nyɛleɛ ɛhye mɔ anu na bɛzonlenle Beeyale.

8. Adenle mɔɔ tɔ zo nwiɔ mɔɔ Seetan vale lile gyima la a le boni? Kilehile nu.

⁸ Seetan vale ɛhane mɔɔ tɔ zo nwiɔ la lile gyima. Ɔmaanle Yizilayɛma vale bɛ adwenle ziele bɛ nwonane nu atiakunluwɔzo zo. Ɛnee saa awozonle ɛzonlenlɛma ɛhye mɔ ɛlɛsonle bɛ nyamenle ne mɔ a, bɛbɔ nla nu ɛbɛlatane. Nyɛleɛ ɛtane ɛhye mɔ bie a le mraalɛ nee mrenyia mɔɔ ɛnee bɔ tuutuu ɛbɛla wɔ asɔne sua nu la. Bɛliele mrenyia mɔɔ fa bɛ gɔnwo mɔ mrenyia la bɛdole nu yɛɛ bɛmaanle nla nu ɛbɛlatane gyɛne nwo adenle. (Mɛla 23:17, 18; 1 Arl. 14:24) Ɛnee awozonle ɛzonlenlɛma ne die di kɛ, nyɛleɛ ɛhye mɔ maa bɛ azɛlɛ ne yɛ kpalɛ na bɛnyia aleɛ. Awozonle ɛzonlenlɛma ne nla nu ɛbɛlatane ne hwehwenle Yizilayɛma dɔɔnwo ɔmaanle bɛzonlenle adalɛ nyamenle ne mɔ. Nɔhalɛ nu, ɛnee Seetan ɛva bɛ ɛyɛ ye ngɛkɛlɛ.

9. Kɛ mɔɔ yɛnwu ye wɔ Hozia 2:16, 17 la, adwenle ngakyile boni a Seetan maanle Yizilayɛma nyianle ye wɔ Gyihova anwo a?

⁹ Ɛhane mɔɔ tɔ zo nsa. Ɔmaanle Yizilayɛma nyianle adwenle ngakyile wɔ Gyihova anwo. Wɔ ngapezonli Gyɛlɛmaya mekɛ zo, Gyihova hanle kɛ adalɛ ngapezoma ne maanle ye menli ne arɛle vile Ye duma ɔlua “bozonle Beeyale” ati. (Gyɛ. 23:27) Ɔkɛyɛ kɛ Nyamenle menli ne gyakyile kɛ bɛbava Gyihova duma ne bɛali gyima, na bɛvale Beeyale duma mɔɔ ɔkile “Menlenlɛ” la bɛziele ɔ gyakɛ anu. Ɛhye ammaa Yizilayɛma annwu ngakyile mɔɔ wɔ Gyihova nee Beeyale avinli la, na yemɔti yeanyɛ se kɛ bɛbava awozonle ɛzonlenlɛ nyɛleɛ bɛafonla Gyihova ɛzonlenlɛ.​—Kenga Hozia 2:16, 17.

10. Ndenle boni mɔ a Seetan fa di gyima ɛnɛ a?

¹⁰ Seetan dua ndenle ko ne ala azo ɛnɛ. Ɔdua ninyɛne mɔɔ menli nye die nwo, nla nu ɛbɛlatane mɔɔ ɔsi nwolɛ adua yɛɛ adwenle ngakyile mɔɔ ɔmaa menli nyia ye wɔ Gyihova anwo la azo ɔ sa ka bɛ. Bɛmaa yɛlimoa yɛzuzu  ɛhane ne mɔɔ tɔ zo nsa mɔɔ ɔvale ɔlile gyima la anwo.

11. Kɛzi Seetan ɛmaa menli ɛnyia adwenle ngakyile wɔ Gyihova anwo ɛ?

¹¹ Seetan maa menli nyia adwenle ngakyile wɔ Gyihova anwo. Wɔ Gyisɛse ɛzoanvolɛ ne mɔ ewule nzi, menli bie mɔ mɔɔ bɛfɛlɛ bɛ nwo Kilisienema la maanle adalɛ ngilehilelɛ dɛlɛle. (Gyi. 20:29, 30; 2 Tɛs. 2:3) Kpɔkyevolɛma ɛhye mɔ bɔle ɔ bo kɛ bɛmaa menli anyia adwenle ngakyile wɔ nɔhalɛ Nyamenle ne anwo. Kɛ neazo la, bɛgyakyile kɛ bɛbava Nyamenle duma ne bɛali gyima wɔ Baebolo ne anu, na bɛvale edwɛkɛkpɔkɛ “Awulae” bɛziele ɔ gyakɛ anu. Ɔluakɛ bɛyele Nyamenle duma kpalɛ ne bɛvile Baebolo ne anu na bɛvale “Awulae” bɛveale ɛkɛ la ati, ɔmaanle ɔyɛle se kɛ Baebolo kengavolɛma bɛanwu ngakyile mɔɔ wɔ Gyihova nee “awulae” mɔ gyɛne mɔɔ Ngɛlɛlera ne ka bɛ nwo edwɛkɛ la anu. (1 Kɔl. 8:5) Bɛvale edwɛkɛkpɔkɛ “Awulae” bɛvɛlɛle Gyihova nee Gyisɛse, yemɔti yeammaa bɛande ɔ bo kɛ ngakyile wɔ Gyihova nee ɔ Ra ne avinli yɛɛ asolo biala gyinlabelɛ. (Dwɔn 17:3) Ɔlua adalɛ ngilehilelɛ ɛhye azo, Nsa-Ko Nyamenle ngilehilelɛ mɔɔ ɛngyi Nyamenle Edwɛkɛ ne azo la liele duma. Ɔlua zo, menli dɔɔnwo se bɛnrɛhola bɛnrɛnwu Nyamenle. Adalɛ kokye!​—Gyi. 17:27.

12. Kɛ mɔɔ bɛhile nu wɔ Wulomuma 1:28-31 la, duzu a adalɛ ɛzonlenlɛ si nwolɛ adua a, na duzu a ɛvi nu ɛra a?

¹² Seetan maa menli fa bɛ adwenle sie bɛ nwonane nu atiakunluwɔzo zo. Wɔ Yizilayɛma mekɛ zo, Seetan luale adalɛ ɛzonlenlɛ zo zile nla nu ɛbɛlatane nwo adua. Ɛnɛ noko, zɔhane ala a ɔyɛ a. Adalɛ ɛzonlenlɛ die nla nu ɛbɛlatane to nu yɛɛ bɛsi nwolɛ adua. Ɛnɛ, menli mɔɔ kile kɛ bɛsonle Nyamenle bɔbɔ la ɛnva ɛbɛlabɔlɛ kpalɛ nwo ngyinlazo ɛnyɛ gyima. Ɛzoanvolɛ Pɔɔlo hanle mɔɔ ɛvi nu ɛra la anwo edwɛkɛ wɔ kɛlata mɔɔ ɔhɛlɛle ɔmaanle Wulomuma la anu. (Kenga Wulomuma 1:28-31.) “Ninyɛne mɔɔ ɔnle kɛ bɛyɛ” la bie a le nla nu ɛbɛlatane ngakyile mɔɔ mrenyia mɔɔ fa bɛ gɔnwo mɔ mrenyia boka nwo la. (Wlo. 1:24-27, 32; Yek. 2:20) Nea kɛzi nwolɛ hyia kɛ yɛbava Baebolo ngilehilelɛ mɔɔ anu la ɛkɛ la yɛayɛ gyima a!

13. Adenle boni bieko a Seetan dua zo bɛlɛbɛla menli a?

¹³ Seetan dua ninyɛne mɔɔ menli hyia nwo la azo bɛlɛbɛla bɛ. Yɛ nye die nwo kɛ yɛbazukoa nwoma amaa yɛaboa yɛ nwo nee yɛ  mbusua. (1 Tim. 5:8) Fane dɔɔnwo ne ala kyesɛ yɛkɔ sukulu na yɛbɔ mɔdenle na yɛahola yɛanwu debie. Noko ɔwɔ kɛ yɛnea boɛ. Maanle dɔɔnwo azo nwomazukoalɛ boa sukoavoma amaa bɛahola bɛayɛ gyima, noko eza bɛkilehile sonla nrɛlɛbɛ wɔ sukulu ɛhye mɔ anu. Bɛka bɛkile sukoavoma kɛ Nyamenle ɛnle ɛkɛ, na ɔnle kɛ bɛdie Baebolo ne bɛdi. Bɛka kɛ saa ɛdie ngakyihakyililɛ ngilehilelɛ ɛto nu a, ɔkile kɛ wɔ adwenle nu ɛbuke na ɛze kɛzi ngoane bɔle ɔ bo la. (Wlo. 1:21-23) Ngilehilelɛ ɛhye mɔ ko tia “Nyamenle nrɛlɛbɛ” ne.​—1 Kɔl. 1:19-21; 3:18-20.

14. Duzu a sonla nrɛlɛbɛ si nwolɛ adua a?

¹⁴ Sonla nrɛlɛbɛ ko tia anzɛɛ tendɛ tia Gyihova tenlene ngyinlazo ne mɔ. Ɔmmaa bɛnla Nyamenle sunsum ne ma ali, emomu, ɔmaa bɛda “nwonane ne gyima ne mɔ” ali. (Gal. 5:19-23) Ɔmaa bɛyɛ kyengye nee anwomemaazo, na yemaa menli ‘ɛyɛ angomedi.’ (2 Tim. 3:2-4) Subane ɛhye mɔ le mɛlɛbɛnwoaze mɔɔ bɛse Nyamenle azonvolɛ ɛnyia ye la angobɛnzi. (2 Sa. 22:28) Kilisienema bie mɔ mɔɔ ɛhɔ yunivɛsiti la ɛmaa sonla nrɛlɛbɛ ɛhakyi bɛ adwenle, na kɛkala bɛnlɛ Nyamenle adwenle. Bɛmaa yɛzuzu ɛhye anwo neazo ko anwo.

15-16. Duzu a ɛsukoa ɛfi adiema raalɛ ne anwubielɛ ne anu a?

¹⁵ Adiema raalɛ bie mɔɔ ɛva ɛvolɛ 15 ɛyɛ dahuu ɛzonlenlɛ gyima ne la ka kɛ: “Kɛ Dasevolɛ mɔɔ bɛzɔne me la, ɛnee megenga yɛɛ mede esiane mɔɔ wɔ yunivɛsiti nwomazukoalɛ nu la anwo edwɛkɛ dɔɔnwo, noko meanva kɔkɔbɔlɛ ɛhye mɔ meanyɛ gyima. Menyianle adwenle kɛ, folɛdulɛ ɛhye mɔ ɛnvale me nwo.” Ngyegyelɛ boni a ɔyiale a? Ɔka kɛ:  “Sukulu ne liele me mekɛ kɔsɔɔti, na ɛnee mengola menyɛ asɔne kɛ mɔɔ meyɛ ye dɛba ne la, yɛɛ ɔluakɛ mefɛ la ati, mengola me nee awie mɔ ɛnzukoa Baebolo ne yɛɛ menziezie me nwo kpalɛ na meahɔ debiezukoalɛ. Me ti yɛle boɛ, mɔɔ menwunle kɛ nwoma kpole ɛzukoalɛ ɛlɛsɛkye me nee Gyihova agɔnwolɛvalɛ ne la, menzile kpɔkɛ kɛ megyakyi, na amgba mengyakyile.”

¹⁶ Kɛzi nwoma kpole ɛzukoalɛ nyianle adiema raalɛ ɛhye adwenle ne azo tumi ɛ? Ɔka kɛ: “Ɔyɛ me nyiane bɔbɔ kɛ mebaha, nɔhalɛ nu, nwomazukoalɛ ɛhye maanle menyɛle kyengye wɔ awie mɔ akɔme nu, titili me mediema Kilisienema, ɛnee mɔɔ bɛyɛ biala la ɛnzɔ me nye, na ɔmaanle mendele me nwo. Ɔliele mekɛ kpalɛ na meahola meagyakyi subane ɛhye mɔ. Anwubielɛ zɔhane ɛmaa menwu kɛ, ɔle esiane kpole kɛ yɛbakpo kɔkɔbɔlɛ mɔɔ yɛ anwuma Selɛ ne dua ye ahyehyɛdeɛ ne azo fa maa yɛ la. Gyihova ze me kpalɛ tɛla kɛzi meze me nwo la. Anrɛɛ ɔwɔ kɛ metie ye!”

17. (a) Duzu a ɔwɔ kɛ yɛsika yɛ bo kɛ yɛbayɛ a? (b) Duzu a yɛbazuzu nwo wɔ edwɛkɛ mɔɔ doa zo la anu a?

¹⁷ Sika ɛ bo kɛ ɛnrɛmaa awie ɛnrɛva “ewiade nrɛlɛbɛ nee mɛlɛbɛla mɔɔ gyi sonla amaamuo zo la” ɛnrɛyɛ wɔ akɛlɛ. Bɔ ɛ nwo bane fi Seetan ndenle ne mɔ anwo dahuu. (1 Kɔl. 3:18; 2 Kɔl. 2:11) Mmamaa ɔmaa ɛnyia adwenle ngakyile wɔ Gyihova anwo. Fa Gyihova ɛbɛlabɔlɛ nwo ngyinlazo mɔɔ kpogya la bɔ wɔ ɛbɛla. Yɛɛ mmamaa Seetan bɛlɛbɛla wɔ ɔmaa ɛkpo Gyihova folɛdulɛ. Noko, saa ɛnwu ye kɛ ewiade nrɛlɛbɛ ne ɛnyia wɔ adwenle ne azo tumi ɛwie noko ɛ? Edwɛkɛ bieko mɔɔ doa zo la bamaa wɔanwu kɛzi Nyamenle Edwɛkɛ ne bahola aboa wɔ yeamaa wɔadudu subane, adwenle nee nyɛleɛ “mɔɔ ɛsosɔ ndinli la.”​—2 Kɔl. 10:4, 5.