1. Kɛzi yɛbazukoa yɛ ɛlɔlɛ Selɛ Gyihova ɛ?

GYIHOVA kulo yɛ kpole kpalɛ. (Dwɔn 3:16) Na yɛkulo kɛ yɛsukoa yɛ ɛlɔlɛ Selɛ ne. Yemɔti yɛbɔ mɔdenle kɛ ‘yɛbali nyane yɛamaa yɛ gɔnwo mɔ na yɛanyia mediema ɛlɔlɛ nee anwunvɔnezelɛ’ yɛamaa menli, “titili bɛdabɛ mɔɔ yɛ nee bɛ lɛ diedi ko la.” (1 Pita 3:8; Gal. 6:10) Saa yɛ sunsum nu mediema ne mɔ bie ɛlɛyia ngyegyelɛ a, yɛkulo kɛ yɛboa ye.

2. Duzu a yɛbazuzu nwo wɔ edwɛkɛ ɛhye anu a?

² Awie biala mɔɔ ɔkulo kɛ ɔboka Gyihova abusua ɛhye anwo la bayia tɛnlabelɛ ngakyile mɔɔ anu yɛ se. (Maake 10:29, 30) Bie a ɔwɔ kɛ yɛgyinla sɔnea ngakyile nloa wɔ mekɛ mɔɔ ewiade ɛhye awieleɛ ne ɛlɛbikye la. Kɛ ɔkɛyɛ na yɛaboa yɛ nwo ngoko ɛ? Bɛmaa yɛzuzu mɔɔ yɛbahola yɛazukoa yɛavi Lɔɔto, Dwobu yɛɛ Nawome anwo edwɛkɛ mɔɔ wɔ Baebolo ne anu la anwo. Eza yɛbazuzu ngyegyelɛ mɔɔ yɛ mediema ɛlɛyia ye ɛnɛ nee kɛzi yɛbahola yɛaboa bɛ yɛamaa bɛagyinla ɔ nloa la anwo.

3. Kɛ mɔɔ 2 Pita 2:7, 8 maa yɛnwu ye la, kpɔkɛ ɛtane boni a Lɔɔto zile a, na duzu a vile nu rale a?

³ Lɔɔto zile kpɔkɛ ɛtane, ɔhɔdɛnlanle Sodɔmma mɔɔ ɛnee bɛ ɛbɛla ɛkpɔlɔ la avinli. (Kenga 2 Pita 2:7, 8.) Ɛnee ezukoa wɔ ɛkɛ, noko Lɔɔto yiale ngyegyelɛ kpole wɔ ɛkɛ. (Mɔl. 13:8-13; 14:12) Ɔbayɛ kɛ ɔ ye anye liele suakpole ne  anwo kpalɛ anzɛɛ ɔ nee ɛkɛ ne amra bie mɔ nyianle agɔnwolɛvalɛ kyengye, yemɔti yeandie Gyihova. Mɔɔ Nyamenle dɔle senle nee sɔlefa vile anwuma la, ɔwule. Na Lɔɔto amra mraalɛ ne mɔ noko ɛ? Mrenyia mɔɔ bɛ nee bɛ yɛle agyalɛ ngyehyɛleɛ la wule wɔ Sodɔm. Lɔɔto sua nee ye agyapadeɛ vile ɔ sa, na mɔɔ yɛ nyane kpalɛ la, ɔ ye wule. (Mɔl. 19:12-14, 17, 26) Wɔ tɛnlabelɛ ɛsesebɛ ɛhye mɔ amuala anu, asoo Gyihova asa nu dole wɔ Lɔɔto anwo? Kyɛkyɛ.

4. Kɛzi Gyihova hilele kɛ ɔlɛ Lɔɔto anwo abotane ɛ? (Nea ɔ nyunlu nvoninli ne.)

⁴ Ɔwɔ nu kɛ Lɔɔto mumua ne a hɔdɛnlanle Sodɔm a, noko Gyihova vile anwunvɔnezelɛ nu zoanle anwumabɔvolɛma kɛ bɛhɔlie ɔ nee ye abusua ne ngoane. Noko, kɛ anrɛɛ ɔbayɛ ye ndɛ yeali anwumabɔvolɛma ne mɛla zo na yeavi Sodɔm la, “Lɔɔto hwenlehwenlenle ɔ bo aze.” Anwumabɔvolɛma ne zɔle ɔ nee ye abusua ne asa kɛ bɛfa bɛ bɛavi sua ne azo. (Mɔl. 19:15, 16) Anwumabɔvolɛma ne zele ye kɛ ɔnriandi ɔhɔ awoka ne mɔ azo lɔ. Kɛ anrɛɛ Lɔɔto badie Gyihova la, ɔhanle kɛ ɔkulo kɛ ɔkɔ sua bie mɔɔ bikye ɛkɛ la azo. (Mɔl. 19:17-20) Gyihova nyianle abotane diele Lɔɔto na ɔmaanle ɔhɔle zɔhane sua ne azo. Mɔɔ Lɔɔto hɔle ɛkɛ la, ye ahonle dule na akee ɔhɔle boka ne mɔɔ Gyihova hanle kɛ ɔhɔ zo la azo. (Mɔl. 19:30) Nea kɛzi Gyihova lale abotane kpole ali a! Kɛzi yɛbazukoa ye ɛ?

5-6. Kɛzi yɛbava 1 Tɛsalonaekama 5:14 yɛayɛ gyima yɛazukoa Nyamenle ɛ?

⁵ Kɛ mɔɔ Lɔɔto yɛle la, ɔdwu mekɛ ne bie a, yɛ diema Kilisienenli bie bahola azi kpɔkɛ ɛtane bie na yeayia nwolɛ ngyegyelɛ kpole. Saa ɔbaye zɔhane a, duzu a ɛbayɛ a? Bie a, ɛbaha wɔahile ye kɛ, ɔlɛbu mɔɔ yelua la, ɛnle adalɛ. (Gal. 6:7) Noko, ɛbahola wɔalua adenle gyɛne mɔɔ ɔle kpalɛ la azo. Ɛbahola wɔazukoa Gyihova wɔ kɛzi ɔboale Lɔɔto la anu. Adenle boni azo?

⁶ Gyihova zoanle anwumabɔvolɛma ne kɛ bɛhɔbɔ Lɔɔto kɔkɔ na eza bɛboa ye amaa yeanyia ngoane wɔ Sodɔm ɛzɛkyelɛ ne anu. Zɔhane ala a saa yɛnwu kɛ yɛ diema bie ɛlɛkɔ ngyegyelɛ nu a, ɔwɔ kɛ yɛbɔ ye kɔkɔ a. Noko eza ɔwɔ kɛ yɛboa ye. Saa ɔnva folɛdulɛ mɔɔ yɛlɛdua Baebolo ne azo yɛava yɛamaa ye la ɔnyɛ gyima ndɛndɛ bɔbɔ a, ɔwɔ kɛ yɛnyia abotane. Sukoa anwumabɔvolɛma nwiɔ ne. Kɛ anrɛɛ yɛbahwe yɛ nwo yɛavi yɛ diema ne anwo la, ɔwɔ kɛ yɛkpondɛ ndenle yɛdua zo yɛboa ye. (1 Dwɔn 3:18) Bie a ɔwɔ kɛ yɛsɔ ɔ sa wɔ sɛkɛlɛneɛ adenle zo, na yɛboa ye yɛmaa ɔfa folɛdulɛ kpalɛ mɔɔ yɛlɛfa yɛamaa ye la ɔyɛ gyima.​—Kenga 1 Tɛsalonaekama 5:14.

7. Kɛzi yɛbahola yɛazukoa Gyihova wɔ adwenle mɔɔ ɔnyianle ye wɔ Lɔɔto anwo la anwo ɛ?

⁷ Anrɛɛ Gyihova bahola ava ye adwenle azie Lɔɔto sinlidɔlɛ zo. Noko nzinlii, ɔvale ye sunsum ne ɔboale ɛzoanvolɛ Pita ɔmaanle ɔhɛlɛle Lɔɔto anwo edwɛkɛ kɛ, ɔle tenlenenli. Yɛ nye die kpole kɛ Gyihova ɛnva ye adwenle ɛnzie yɛ nvonleɛ zo la! (Edw. 130:3) Asoo yɛbahola yɛazukoa Gyihova wɔ adwenle mɔɔ ɔnyianle ye wɔ Lɔɔto anwo la anwo ɔ? Saa yɛfa yɛ adwenle yɛsie subane mgbalɛ mɔɔ yɛ mediema lɛ la azo a, ɔbamaa yɛanyia bɛ nwo abotane. Na ɛhye bamaa bɛdabɛ noko bɛalie moalɛ mɔɔ yɛlɛfa yɛamaa bɛ la bɛado nu.

8. Duzu a anwunvɔnezelɛ baha yɛ yeamaa yɛayɛ a?

⁸ Tɛ kpɔkɛ ɛtane mɔɔ Dwobu zile la ati a  ɔnwunle amaneɛ a, kɛ mɔɔ ɛnee ɔde wɔ Lɔɔto afoa nu la. Noko, ngyegyelɛ mɔɔ anu yɛ se la dole ye, ye agyapadeɛ vile ɔ sa, ye duma zɛkyele yɛɛ anwonyane bɔle ye. Mɔɔ zɛkyele edwɛkɛ ne bɔkɔɔ la a le kɛ, ngakula mɔɔ ɔ nee ɔ ye lɛ bɛ la kɔsɔɔti wule. Eza Dwobu agɔnwo mɔ nsa dole ye ɛzonle. Duzu ati a Dwobu agɔnwo mɔ nsa ne anla anwunvɔnezelɛ ali angile ye a? Ɔluakɛ ɛnee bɛnde tɛnlabelɛ ne abo. Yemɔti, bɛnyianle adwenle mɔɔ ɛndenrɛ la wɔ Dwobu anwo na bɛbuale ye mgbɔvodɛne. Kɛ ɔkɛyɛ na yɛanyɛ nvonleɛ ɛhye bie ɛ? Kakye kɛ, Gyihova ala a ze tɛnlabelɛ mɔɔ awie ɛlɛkɔ nu la kpalɛ a. Tie ahenle mɔɔ ɛlɛnwu amaneɛ la kpalɛ. Mmatie ala; bɔ mɔdenle kɛ ɛbade ahenle nyane ne bie. Adenle ɛhye a ɛbahola wɔalua zo wɔahile kɛ ɛdwenle ɛ diema ne anwo a.

9. Duzu a anwunvɔnezelɛ ɛnrɛmaa yɛnrɛyɛ a, na duzu ati ɔ?

⁹ Saa yɛse anwunvɔne a, yɛnrɛye ngyegyelɛ mɔɔ yɛ mediema ɛlɛyia ye la anwo ndɛne. Awie mɔɔ ye ndɛne la ɛmmaa koyɛlɛ ɛndɛnla asafo ne anu; ɔfa mgbakyemgbakyenu ɔba. (Mrɛ. 20:19; Wlo. 14:19) Sonla zɛhae ɛnle atiakunlukɛnlɛma, ɔndwenle sonla nwo yɛɛ ye edwɛkɛ kola boda ahenle mɔɔ ɛlɛnwu amaneɛ la. (Mrɛ. 12:18; Ɛfɛ. 4:31, 32) Nea kɛzi ɔbayɛ kpalɛ kɛ yɛbakpondɛ ninyɛne mgbalɛ wɔ awie mɔ anwo na yɛaboa bɛ yɛamaa bɛagyinla bɛ ngyegyelɛ nloa a!

10. Duzu a edwɛkɛ mɔɔ wɔ Dwobu 6:2, 3 la maa yɛnwu ye a?

¹⁰ Kenga Dwobu 6:2, 3. Ɛnee ɔdwu mekɛ ne bie a Dwobu ka ‘mgbole.’ Noko nzinlii, ɔnwunle kɛ yeanga ye boɛ. (Dwobu 42:6)  Ɛnɛ, awie mɔɔ ɛlɛyia ngyegyelɛ la bahola aha mgbole mɔɔ tɛ ɔ nye fuu kɛ mɔɔ Dwobu yɛle la. Kɛzi ɔwɔ kɛ yɛyɛ yɛ nyɛleɛ ɛ? Kɛ anrɛɛ yɛbava ɛya la, ɔwɔ kɛ yɛse ye anwunvɔne. Kakye kɛ, Gyihova ambɔ yɛ nuhua ko biala kɛ yɛranwu amaneɛ. Yemɔti saa Gyihova sonvolɛ bie ɛlɛyia ngyegyelɛ kpole na ɔka edwɛkɛ mɔɔ ɔnle ye adenle zo a, ndelebɛbo wɔ nu. Saa bɔbɔ ɔtendɛ ɔtia Gyihova anzɛɛ yɛdayɛ a, ɔnle kɛ yɛfa ɛya ndɛndɛ anzɛɛ yɛbua ye ndɛne wɔ ye edwɛkɛ ne anwo.​—Mrɛ. 19:11.

11. Kɛzi asafo nu mgbanyima bazukoa Ɛlaehu neazo ne wɔ mekɛ mɔɔ bɛlɛtu folɛ la ɛ?

¹¹ Ɔdwu mekɛ ne bie a, ɔbahyia kɛ yɛfa folɛdulɛ nee anzohwenlɛ mɔɔ fɛta la yɛmaa awie mɔɔ ɔlɛgyinla ngyegyelɛ nloa la. (Gal. 6:1) Kɛzi asafo nu mgbanyima bali tɛnlabelɛ zɛhae anwo gyima ɛ? Bɛbɔ mɔdenle bɛsukoa Ɛlaehu mɔɔ vile atiakunlukɛnlɛma nu diele Dwobu la. (Dwobu 33:6, 7) Mɔɔ Ɛlaehu nwunle Dwobu adwenle bɔkɔɔ la yɛɛ ɔvale folɛdulɛ ɔmaanle ye a. Asafo nu mgbanyima mɔɔ sukoa Ɛlaehu neazo ne la bɔ mɔdenle tie awie mɔɔ ɛlɛyia ngyegyelɛ la kpalɛ na bɛte ye tɛnlabelɛ ne abo. Yemɔti saa bɛlɛfa folɛdulɛ bɛamaa ye a, ɔdwu ye ahonle nu kpalɛ.

12. Mɔɔ Nawome ahu nee ɔ mra mrenyia nwiɔ ne wule la, kɛzi ɔgyegyele ye ɛ?

¹² Ɛnee Nawome le raalɛ mɔɔ ɔdi nɔhalɛ na ɔkulo Gyihova. Noko mɔɔ ɔ hu nee ɔ mra mrenyia nwiɔ ne wule la, ɛnee ɔkulo kɛ ɔkakyi ye duma Nawome ne ɔyɛ ye “Maala,” mɔɔ abo kile “Ɛnwonle” la. (Wut. 1:3, 5, 20, 21) Wulutu mɔɔ ɛnee le Nawome ase la betanle ɔ nwo kyengye wɔ sɔnea mekɛ ɛhye anu. Wulutu vale moalɛ mɔɔ Nawome hyia la maanle ye na ɔkyekyele ɔ rɛle. Wulutu luale ɛdendɛlɛ kɛnlɛma zo maanle Nawome nwunle kɛ, ɔkulo ye na ɔbaboa ye.​—Wut. 1:16, 17.

13. Duzu ati a menli mɔɔ bɛ hu anzɛɛ bɛ ye mɔ ɛwu la hyia yɛ moalɛ a?

¹³ Saa yɛ sunsum nu mediema ne mɔ bie ahu anzɛɛ aye wu a, ɔbahyia yɛ moalɛ. Saa menli nwiɔ gya a, bɛyɛ kɛ mbaka nwiɔ mɔɔ bɛlua bɛbikye nwo la. Mekɛ ɛlɛkɔ la, mbaka nwiɔ ne ndinli ne mɔ bɛkabɛka nwolɛ. Yemɔti saa bɛtu baka ne ko na ɔwu a, ko ne mɔɔ ɛha la nwu amaneɛ kpole. Zɔhane ala a saa awie ahu anzɛɛ aye wu a, ɔbahola yeali nyane mekɛ tendenle a. Paula, * mɔɔ ɔ hu wule arɛlevilɛ nu la ka kɛ: “Me ɛbɛlabɔlɛ hakyile, na mendele nganeɛ kɛ menlɛ moalɛ biala. Me gɔnwo kpalɛ ɛwu. Ɔdaye ala a meka me edwɛkɛ mekile ye a. Me nye die a, ɛnee ɔ nye ɛlie yɛɛ ɔboale me wɔ ngyegyelɛ mekɛ nu. Meyia ngyegyelɛ a, ɔdaye a mesu mekile ye a. Mendele nganeɛ kɛ bɛpɛ me foa ko bɛdo ye lɔ.”

14-15. Kɛzi yɛbakyekye awie mɔɔ ɔ hu anzɛɛ ɔ ye ɛwu la arɛle ɛ?

¹⁴ Kɛzi yɛbakyekye awie mɔɔ ɔ hu anzɛɛ ɔ ye ɛwu la arɛle ɛ? Adenle ko mɔɔ limoa la a le kɛ, yɛ nee ahenle badendɛ. Ɔdwu mekɛ ne bie a ɛnnwu mɔɔ ɛka a. Paula mɔɔ yɛlimoa yɛha ɔ nwo edwɛkɛ la ka kɛ: “Meze kɛ ewule maa menli di nyane. Ɔyɛ a bɛsulo kɛ bɛbaha edwɛkɛ ɛtane bie. Noko saa bɛandendɛ bɛangile wɔ fee a, ɔyɛ nyane kpalɛ.” Awie mɔɔ ɛlɛdi nyane la anye ɛnla kɛ yɛbaha edwɛkɛ titili bie. Paula ka kɛ: “Ɔyɛ me fɛ kɛ me gɔnwo mɔ baha ye sikalɛ kɛ, ‘Gyakɔ, ɔyɛ nyane.’”

 ¹⁵ William mɔɔ ɔ ye wule la ɛvolɛ dɔɔnwo ɛpɛ nu la ka kɛ: “Saa awie mɔ ka me ye anwo edwɛkɛ a, me nye sɔ ye; ɔmaa menwu kɛ ɛnee bɛkulo ye yɛɛ bɛbu ye. Ɛhye boa me kpole. Ɔmaa me nye die ɔluakɛ, ɛnee me ye sonle bolɛ maa me yɛɛ ɔboale me kpole.” Bianca mɔɔ ɔ hu ɛwu la kile nu kɛ: “Saa awie mɔ nee me yɛ asɔne na bɛ nee me kenga Ngɛlɛlera ko anzɛɛ nwiɔ a, ɔkyekye me rɛle. Eza saa bɛka me hu anwo edwɛkɛ anzɛɛ bɛtie me wɔ mekɛ mɔɔ melɛka ɔ nwo edwɛkɛ la a, ɔboa me.”

16. (a) Duzu a ɔwɔ kɛ yɛyɛ yɛmaa awie mɔɔ ɔ hu anzɛɛ ɔ ye ɛwu la ɛ? (b) Kɛ mɔɔ yɛnwu ye wɔ Gyemise 1:27 la, gyima boni a bɛva bɛmaa yɛ a?

¹⁶ Kɛ mɔɔ Wulutu betanle kunlavolɛ Nawome anwo kyengye la, ɔwɔ kɛ yɛkɔ zo yɛboa menli mɔɔ bɛ hu anzɛɛ bɛ ye mɔ ɛwu la. Paula mɔɔ yɛlimoa yɛha ɔ nwo edwɛkɛ la ka kɛ: “Mɔɔ me hu wule ɛkɛ ne ala la, menyianle moalɛ dɔɔnwo. Ɔyɛle ekyi la, ɛnee akee awie biala ɛlɛyɛ ye debie. Noko ɛnee metɛdi alɔbɔlɛ kpole. Saa awie mɔ nwu kɛ menli mɔɔ ɛlɛdi nyane la bahyia moalɛ wɔ siane anzɛɛ ɛvolɛ dɔɔnwo anu a, ɔboa kpalɛ.” Nɔhalɛ nu, menli gua ye ngakyile. Wɔ bie mɔ afoa nu, saa bɛ hu anzɛɛ bɛ ye wu a, bɛkola bɛnyia anwosesebɛ ndɛndɛ. Noko wɔ bie mɔ afoa anu, bɛkakye bɛ dɔvolɛ ne ewule na bɛdi nwolɛ nyane mekɛ tendenle. Kɛzi menli di edwɛkɛ nwo nyane la gua ye ngakyile. Bɛmaa yɛhakye kɛ, Gyihova ɛli yɛ eni, na yemaa yɛ gyima kɛ, yɛboa menli mɔɔ bɛ hu mɔ  anzɛɛ bɛ ye mɔ ɛwu la.​—Kenga Gyemise 1:27.

17. Duzu ati a menli mɔɔ bɛ hu anzɛɛ bɛ ye mɔ ɛkpo bɛ la hyia yɛ moalɛ a?

¹⁷ Ɔwɔ kɛ agyalɛma bie mɔ gyinla nyane nee alɔbɔlɛ mɔɔ bɛ hu anzɛɛ bɛ ye mɔɔ bagyakyi bɛ maa bɛdi la anloa. Joyce mɔɔ ɔ hu gyakyile ye hɔvale raalɛ fofolɛ la ka kɛ: “Kɛzi ewolebɔlɛ ne maanle menlile nyane la, saa ewule a hunle me hu bɔbɔ a, anrɛɛ ɔnrɛyɛ me nyane zɔhane. Saa esiane anzɛɛ anwodolɛ bie a maanle ɔwule a, yemɔ anrɛɛ meze kɛ tɛ ɔ nye fuu ɔ. Noko wɔ tɛnlabelɛ ɛhye anu, me hu kpale kɛ ɔkpo me. Mendele nganeɛ kɛ bɛgua me nyunlu aze.”

18. Duzu a yɛbahola yɛayɛ yɛaboa menli mɔɔ kɛkala bɛnlɛ bɛ hu mɔ anzɛɛ bɛ ye mɔ la ɛ?

¹⁸ Saa yɛyɛ ninyɛne ngyikyi yɛboa menli mɔɔ kɛkala bɛnlɛ bɛ hu anzɛɛ bɛ ye la a, ɔbamaa bɛade nganeɛ kɛ yɛkulo bɛ kpalɛ. Bɛhyia agɔnwolɛma kpalɛ nwo bɛtɛla mekɛ biala. (Mrɛ. 17:17) Kɛ ɔkɛyɛ na wɔayɛ agɔnwolɛ kpalɛ wɔamaa menli ɛhye mɔ ɛ? Ɛbahola wɔado ɛsalɛ wɔavɛlɛ bɛ na bɛabɔ nu bɛali aleɛ. Ɛbahola ɛ nee bɛ ahɔlie bɛ nye anzɛɛ bɛahɔ daselɛlilɛ. Eza ɔdwu mekɛ ne bie a ɛbahola wɔado ɛsalɛ wɔavɛlɛ bɛ wɔamaa baraboka wɔ abusua ɛzonlenlɛ ne anwo. Saa ɛyɛ zɔ a, ɛbamaa Gyihova ali fɛlɛko ɔluakɛ “[ɔbikye] mɔɔ nyane ɛha ye la” yɛɛ ɔle “ahunlanvolɛ pepɛdievolɛ.”​—Edw. 34:18; 68:5.

19. Kɛ mɔɔ 1 Pita 3:8 ka la, duzu a wɔbɔ kpɔkɛ kɛ ɛbayɛ a?

¹⁹ Ɔnrɛhyɛ, saa Nyamenle Belemgbunlililɛ ne ɛlɛdi tumi wɔ azɛlɛ ye azo a, ‘yɛ ngyegyelɛ kɔsɔɔti bavi yɛ ti anu.’ Nea kɛzi yɛ nye la mekɛ mɔɔ “ninyɛne dɛba ne mɔ abo zo baminli mɔɔ awie ɛnrɛhakye bɛ bieko” la ade a. (Aye. 65:16, 17) Kɔkpula mekɛ zɔhane, bɛmaa yɛboa yɛ nwo ngoko na yɛlua yɛ ɛdendɛlɛ nee nyɛleɛ zo yɛhile kɛ yɛkulo awie biala mɔɔ wɔ yɛ sunsum nu abusua ne anu la.​—Kenga 1 Pita 3:8.