1-2. Kɛ mɔɔ Edwɛne 25:14 kile la, duzu a ɔwɔ kɛ yɛyɛ amaa yɛ nee Gyihova anyia agɔnwolɛvalɛ kyengye a?

 SAA ɛkulo kɛ ɛ nee awie nyia agɔnwolɛvalɛ kyengye a, subane boni mɔ a ɛsuzu kɛ nwolɛ hyia a? Bie a ɛbaha kɛ ɔwɔ kɛ agɔnwolɛma kpalɛ kulo bɛ nwo na bɛboa bɛ nwo. Bie a ɔnrɛra wɔ adwenle nu kɛ ɛzulolɛ le subane mɔɔ anwo hyia wɔ agɔnwolɛvalɛ kpalɛ nu a. Noko kɛ mɔɔ edwɛkɛtile tɛkese ne kile la, ɔwɔ kɛ bɛdabɛ mɔɔ bɛkulo kɛ bɛ nee Gyihova nyia agɔnwolɛvalɛ kyengye la ‘sulo’ ye.​—Kenga Edwɛne 25:14.

² Ɔnva nwo mekɛ tendenle mɔɔ yɛva yɛzonle Gyihova la, ɔhyia kɛ yɛ muala yɛsulo ye wɔ adenle kpalɛ zo. Noko saa bɛka kɛ yɛzulo Nyamenle a, ɔkile duzu? Kɛ ɔkɛyɛ na yɛazukoa kɛ yɛbazulo Gyihova ɛ? Kɛzi yɛbazulo Nyamenle la anwo neazo boni a yɛsukoa yɛfi awuke zo neavolɛ Obadaya, Ɛsɔfo Kpanyinli Gyɛhɔyada yɛɛ Belemgbunli Gyɛhowahye ɛkɛ a?

3. Kilehile kɛzi ɛzulolɛ kola bɔ yɛ nwo bane la anu.

³ Saa yɛnwu kɛ esiane bie bahola ado yɛ a, wɔannea a ɛzulolɛ baha yɛ. Ɛzulolɛ ɛhye le kpalɛ na ɔka yɛ ɔmaa yɛyɛ yɛ ninyɛne nrɛlɛbɛ nu. Saa yɛlua boka bie azo na yɛsulo kɛ yɛbadɔ aze a, ɔnrɛmaa yɛnrɛbikye ɔ nloa somaa. Saa yɛwɔ tɛnlabelɛ mɔɔ ɔbahola yeamaa yɛaboda la anu a, ɛzulolɛ bamaa yɛanriandi  yɛavi ɛkɛ. Saa yɛsulo kɛ yɛ nee awie mɔɔ yɛkulo ye la avinli bazɛkye a, ɔnrɛmaa yɛnrɛha edwɛkɛ anzɛɛ yɛnrɛyɛ debie mɔɔ ɔbagyegye ye la.

4. Gyihova anwo ɛzulolɛ boni a Seetan kulo kɛ yɛnyia a?

⁴ Seetan kulo kɛ menli nyia Gyihova anwo ɛzulolɛ mɔɔ ɛnle kpalɛ. Seetan kpondɛ kɛ yɛnyia adwenle mɔɔ Ɛlaefaze nyianle la bie​—kɛ Gyihova di nzenralɛ, ɔle Nyamenle mɔɔ dahuu yeva ɛya yɛɛ ɛyɛ debie biala a ɔnzɔ ɔ nye. (Dwobu 4:18, 19) Seetan kulo kɛ Gyihova anwo ka yɛ ɛzulolɛ na yɛgyakyi Ye ɛzonlenlɛ. Amaa yɛandɔ ɛhane zɔhane anu la, ɔwɔ kɛ yɛsulo Nyamenle wɔ adenle kpalɛ zo.

5. Saa bɛka kɛ ɛzulo Nyamenle a, ɔkile duzu?

⁵ Awie mɔɔ sulo Nyamenle la kulo Ye na ɔngulo kɛ ɔyɛ debie biala mɔɔ ɔbazɛkye ɔ nee Ye agɔnwolɛvalɛ ne la. Ɛnee Gyisɛse lɛ “nyamenlezulolɛ” ɛhye bie. (Hib. 5:7) Gyihova anwo anga ye ɛzulolɛ. (Aye. 11:2, 3) Emomu, ɔnyianle ɛlɔlɛ kpole ɔmaanle Nyamenle na ɛnee ɔkulo kɛ ɔtie ye. (Dwɔn 14:21, 31) Yɛbu Gyihova kpole kpalɛ kɛ mɔɔ Gyisɛse yɛle la ɔluakɛ ɔle ɛlɔlɛ, ɔze nrɛlɛbɛ, ɔdi pɛlepɛle yɛɛ ɔlɛ tumi. Eza yɛze kɛ Gyihova kulo yɛ kpalɛ na ɔdwenle kɛzi yɛyɛ yɛ nyɛleɛ wɔ ye adehilelɛ nwo la anwo. Yɛbahola yɛamaa Gyihova ali nyane anzɛɛ ɔ nye alie.​—Edw. 78:41; Mrɛ. 27:11.

6. Adenle ko mɔɔ yɛbahola yɛalua zo yɛazukoa kɛ yɛbazulo Nyamenle la a le boni? (Edwɛne 34:11)

⁶ Bɛanva Gyihova ɛzulolɛ bɛanwo yɛ; ɔwɔ kɛ yɛsukoa. (Kenga Edwɛne 34:11.) Adenle ko mɔɔ yɛbahola yɛalua zo yɛayɛ zɔ la a le kɛ yɛbanlea abɔdeɛ. Saa yɛnea kɛzi “ninyɛne mɔɔ ɔbɔle la” da ye nrɛlɛbɛ, ye tumi yɛɛ ɛlɔlɛ kpole mɔɔ ɔlɛ ɔmaa yɛ la ali a, ɔmaa yɛbu ye kpalɛ na yɛkulo ye. (Wlo. 1:20) Adiema raalɛ Adrienne hanle kɛ: “Saa menea kɛzi ninyɛne mɔɔ Gyihova ɛbɔ la da ye nrɛlɛbɛ ne ali la a, ɔsi me nwo kpole, na ɔboa me ɔmaa menwu kɛ ɔze mɔɔ le kpalɛ ɔmaa me la.” Ninyɛne ɛhye mɔ mɔɔ ɔdwenledwenlenle nwolɛ la maanle ɔhanle kɛ, “Mengulo kɛ meyɛ debie mɔɔ bazɛkye me nee Gyihova mɔɔ maanle me ngoane la avinli la.” Ɛbahola wɔaye mekɛ wɔazie ahane dapɛne ɛhye wɔava wɔadwenledwenle abɔdeɛ bie anwo ɔ? Saa ɛyɛ ye zɔ a, ɔbamaa wɔanyia ɛbulɛ nee ɛlɔlɛ kpole wɔamaa Gyihova.​—Edw. 111:2, 3.

7. Kɛzi asɔneyɛlɛ baboa yɛ yeamaa yɛazulo Gyihova wɔ adenle kpalɛ zo ɛ?

⁷ Adenle bieko mɔɔ yɛbahola yɛalua zo yɛazulo Nyamenle la a le kɛ yɛbayɛ asɔne dahuu. Mekɛ mɔɔ yɛlɛyɛ asɔne dɔɔnwo la, ɛnee yɛlɛnwu Gyihova kpalɛ. Mekɛ biala mɔɔ yɛbayɛ asɔne kɛ ɔmaa yɛ anwosesebɛ ɔmaa yɛgyinla sɔnea bie anloa la, ɔmaa yɛkakye kɛzi ɔlɛ tumi la. Saa yɛyɛ Gyihova mo wɔ ɔ Ra ne mɔɔ ɔvale ɔmaanle yɛ kɛ ahyɛlɛdeɛ la anwo a, ɔmaa yɛkakye kɛzi ɔkulo yɛ la. Yɛɛ saa yɛbodo Gyihova kɛ ɔboa yɛ wɔ yɛ ngyegyelɛ bie anwo a, ɔmaa yɛkakye kɛzi ɔze nrɛlɛbɛ la. Asɔneyɛlɛ zɛhae mɔ maa yɛbu Gyihova kpalɛ. Na bɛmaa yɛmia kpɔkɛ mɔɔ yɛbɔ kɛ yɛnrɛmaa debie biala ɛnrɛzɛkye yɛ nee ye agɔnwolɛvalɛ ne la anu.

8. Duzu a yɛbahola yɛayɛ amaa yɛahɔ zo yɛazulo Nyamenle a?

⁸ Saa yɛfa yɛyɛ yɛ bodane kɛ yɛsukoa Baebolo ne amaa yɛazukoa debie yɛavi menli mɔɔ yɛle neazo kpalɛ anzɛɛ neazo ɛtane la ɛkɛ a, ɔbamaa yɛahɔ zo yɛazulo Nyamenle. Maa yɛzuzu Gyihova azonvolɛ nɔhavoma nwiɔ, Belemgbunli Ehabe awuke zo neavolɛ Obadaya yɛɛ Ɛsɔfo Kpanyinli Gyɛhɔyada anwo. Akee yɛbazuzu Dwuda Belemgbunli Gyɛhowahye mɔɔ ɔbɔle ɔ bo kɛnlɛma noko nzinlii ɔgyakyile Gyihova ɛzonlenlɛ la anwo.

9. Kɛzi Gyihova ɛzulolɛ boale Obadaya ɛ? (1 Arelemgbunli 18:3, 12)

⁹ Baebolo ne bɔle Obadaya b duma la, ɔhanle kɛ: “Obadaya le awie mɔɔ sulo Gyihova kpalɛ.” (Kenga 1 Arelemgbunli 18:3, 12.) Kɛzi ɛzulolɛ ɛhye boale Obadaya ɛ? Ɔmaanle ɔlile nɔhalɛ yɛɛ ɛnee bɛkola bɛfa bɛ nwo bɛto ɔ nwo zo; ɔti belemgbunli ne maanle ɔnleanle ye sua nu ɛkɛ ne amra anwo zo. (Fa toto Nihɛmaya 7:2 anwo.) Eza ɔmaanle ɔnyianle akɛnrasesebɛ kpole​—ɛnee ɔhyia subane ɛhye anwo kpalɛ. Ɔdɛnlanle aze wɔ mekɛ mɔɔ Belemgbunli Ehabe atisesebɛ mɔɔ “yɛle ɛtane kpole wɔ Gyihova anye zo dɛlale [arelemgbunli] mɔɔ bɛlimoale ɔ nyunlu la amuala” la ɛlɛdi tumi la. (1 Arl. 16:30) Eza ɛnee Ehabe aye Gyɛzɛbɛle mɔɔ sonle Beeyale la kpɔ Gyihova kpalɛ ɔti ɔbɔle mɔdenle kɛ ɔnrɛmaa awie biala ɛnrɛzonle Gyihova wɔ Yizilayɛ sɔlɔ Belemgbunlililɛ ne anu amuala. Ɔhunle Nyamenle ngapezoma ne mɔ anu dɔɔnwo bɔbɔ. (1 Arl. 18:4) Ɔda ali kɛ, Obadaya zonlenle Gyihova wɔ mekɛ mɔɔ anu yɛ se la anu.

10. Kɛzi Obadaya lale akɛnrasesebɛ kpole ali ɛ?

¹⁰ Kɛzi Obadaya lale akɛnrasesebɛ kpole ali ɛ? Mɔɔ Gyɛzɛbɛle kuhu Nyamenle ngapezoma ne mɔ la, Obadaya vale bɛ nuhua 100 na ɔhyɛle bɛ nu nwiɔ ‘ɔvale 50 biala ɔveale bolɛ bɔne ko anu na ɔhɔle zo ɔmaanle bɛ aleɛ nee nzule.’ (1 Arl. 18:13, 14) Saa Gyɛzɛbɛle hyele ye a, anrɛɛ ɔbahu ye. Nɔhalɛ nu, Obadaya le sonla na ɛnee ɔngulo kɛ ɔwu. Noko ɛnee ɔkulo Gyihova nee bɛdabɛ mɔɔ bɛsonle Ye la ɔtɛla ɔ nwo.

11. Kɛzi Gyihova azonvolɛ mɔɔ bɛwɔ ɛkɛ ɛnɛ la le kɛ Obadaya ɛ? (Eza nea nvoninli ne.)

¹¹ Ɛnɛ, Gyihova azonvolɛ dɔɔnwo de maanle mɔɔ bɛva bɛ sa bɛdo yɛ gyima ne azo la anu. Mediema ɛhye mɔ mɔɔ sonle bolɛ la bu arane mgbanyima, noko kɛ mɔɔ Obadaya yɛle la, bɛfa mɔɔ le Gyihova ɛdeɛ la bɛmaa Ye​—bɛsonle ɔ ngomekye. (Mat. 22:21) Bɛtie Nyamenle na tɛ menli bɛfa bɛkile kɛ bɛsulo Nyamenle. (Gyi. 5:29) Bɛdua edwɛkpa ne mɔɔ bɛkɔ zo bɛbɔ ye nolo nee debiezukoalɛ mɔɔ bɛfea bɛ nwo bɛyɛ la azo a bɛyɛ ɛhye a. (Mat. 10: 16, 28) Bɛbɔ mɔdenle kɛ bɛbamaa bɛ mediema anyia sunsum nu aleɛ mɔɔ bɛhyia nwo la. Suzu Henri mɔɔ de Africa maanle bie mɔɔ bɛvale bɛ sa bɛdole yɛ gyima ne azo mekɛ bie anu la neazo ne anwo. Mɔɔ bɛvale bɛ sa bɛdole yɛ gyima ne azo la, Henri dule ɔ nwo maanle kɛ ɔbava sunsum nu aleɛ yeahɔmaa ɔ mediema diedima. Ɔhanle kɛ: “Mele awie mɔɔ mese nyiane. Ɔti medie medi kɛ kɛmɔ mebu Gyihova kpole la ati a menyianle akɛnrasesebɛ menyɛle zɔ a.” Ɛnea a ɛbahola wɔala Henri akɛnrasesebɛ ne bie ali ɔ? Saa ɛsulo Nyamenle kpalɛ a, ɛbahola wɔayɛ zɔ.

12. Kɛzi Ɛsɔfo Kpanyinli Gyɛhɔyada nee ɔ ye lile nɔhalɛ kpole maanle Gyihova ɛ?

¹² Ɛnee Ɛsɔfo Kpanyinli Gyɛhɔyada sulo Gyihova, na yemɔ maanle ɔlile nɔhalɛ na ɔmaanle awie mɔ anwosesebɛ kɛ bɛzonle Gyihova. Ɛhye lale ali wɔ mekɛ mɔɔ Gyɛzɛbɛle ara raalɛ Atalaya vale anyesesebɛ liele Dwuda belemgbunlililɛ ne la. Tɛ mgbane ala a ɛnee menli ne sulo Atalaya a. Ɛnee ɔ ti yɛ se kpalɛ yɛɛ ɔ nye bolo tumililɛ kpalɛ ɔti ɔbɔle mɔdenle kɛ ɔku dehelɛ abusua ne anu amra amuala​—ɔdaye mumua ne ye nlɔnra! (2 Ek. 22:10, 11) Ngakula zɔhane mɔ ko a le Gyɛhowahye na ɔnyianle ɔ ti ɔluakɛ Gyɛhɔyada aye Gyehohyabeya liele ye ngoane. Ɔ nee ɔ hu vale kakula ne veale na bɛnleanle ye. Ɛhye maanle Gyɛhɔyada nee Gyehohyabeya holale boale amaa Devidi abusua ɛlɔnwɔne ne mɔɔ di belemgbunli la abo zo ambɔ. Gyɛhɔyada lile nɔhalɛ maanle Gyihova na yeammaa Atalaya anga ye ɛzulolɛ.​—Mrɛ. 29:25.

13. Mɔɔ Gyɛhowahye lile ɛvolɛ nsuu la, kɛzi Gyɛhɔyada lale nɔhalɛlilɛ ali bieko ɛ?

¹³ Mɔɔ Gyɛhowahye lile ɛvolɛ nsuu la, Gyɛhɔyada lale ye ali bieko kɛ ɔdi nɔhalɛ ɔmaa Gyihova. Ɔvale adwenle bie. Saa debie biala kɔ boɛ a, Gyɛhowahye bayɛ belemgbunli, Devidi koliagya mɔɔ fɛta. Noko saa ninyɛne angɔ boɛ a, ye biala anu bɛbahu Gyɛhɔyada. Ɔlua Gyihova moalɛ zo, adwenle ne mɔɔ ɔvale la hɔle boɛ. Mgbanyima ne mɔ nee Livaema ne boale Gyɛhɔyada maanle bɛziele Gyɛhowahye belemgbunli na bɛhunle Atalaya. (2 Ek. 23:1-5, 11, 12, 15; 24:1) “Akee Gyɛhɔyada nee belemgbunli ne nee menli ne yɛɛ Gyihova yɛle ngyekyeleɛ kɛ bɛbahɔ zo bɛayɛ Gyihova menli dahuu.” (2 Arl. 11:17) Eza Gyɛhɔyada maanle “nlenkɛ mgbole sinzavolɛma gyinlegyinlanle Gyihova sua ne nlenkɛ mgbole ne anwo, amaa awie biala mɔɔ ɔ nwo ɛnde wɔ adenle biala azo la angola anwolo ɛkɛ.”​—2 Ek. 23:19.

14. Kɛmɔ Gyɛhɔyada lile Gyihova eni la ati, kɛzi bɛlile ɔdaye noko eni ɛ?

¹⁴ Ɛnee Gyihova ɛlimoa ɛha kɛ: “Mebali menli mɔɔ di me eni la eni.” Nɔhalɛ nu, ɔmaanle Gyɛhɔyada ahatualɛ. (1 Sa. 2:30) Kɛ neazo la, ɔmaanle bɛhɛlɛle ɛsɔfo kpanyinli ɛhye gyima kpalɛ ne wɔ Baebolo ne anu bɛmaanle yɛ ɛhilehilelɛ. (Wlo. 15:4) Na mɔɔ Gyɛhɔyada wule la, “bɛziele ye wɔ Devidi Suakpole ne azo bɛbokale arelemgbunli ne mɔ anwo, ɔlua ninyɛne mgbalɛ mɔɔ ɔyɛle ɔmaanle Yizilayɛma, nɔhalɛ Nyamenle ne nee Ye sua ne la ati” bɛvale bɛlile ye eni kpole.​—2 Ek. 24:15, 16.

15. Duzu a yɛbahola yɛazukoa yɛavi Gyɛhɔyada edwɛkɛ ne anu a? (Eza nea nvoninli ne.)

¹⁵ Gyɛhɔyada edwɛkɛ ne bahola aboa yɛ muala yeamaa yɛazulo Nyamenle. Kilisiene neavolɛma bahola azukoa Gyɛhɔyada ɔlua bɛ nye mɔɔ bɛbamaa yeala ɛkɛ dahuu na bɛabɔ Nyamenle mboane ne anwo bane la azo. (Gyi. 20:28) Kɛ mɔɔ Gyɛhɔyada yɛle la, bɛdabɛ mɔɔ bɛyɛ mgbanyinli la bahola azukoa kɛ saa bɛsulo Gyihova na bɛkɔ zo bɛdi nɔhalɛ a, ɔbahola yeava bɛ yeali gyima yeamaa Ye bodane  ara nu. Ɔmkpo bɛ ɛlɛ. Mgbavolɛ nee mbɛlɛra bahola ayɛ kɛzi Gyihova nee Gyɛhɔyada lile la nzonlɛ na bɛala enililɛ nee ɛbulɛ ali bɛahile nɔhavoma mɔɔ ɛyɛ mgbanyinli, titili bɛdabɛ mɔɔ bɛva ɛvolɛ dɔɔnwo bɛzonle nɔhalɛ nu la, bɛava bɛazukoa Gyihova. (Mrɛ. 16:31) Akee yɛ muala yɛbahola yɛazukoa debie yɛavi mgbanyima nee Livaema ne mɔɔ boale Gyɛhɔyada la ɛkɛ. Bɛmaa yɛva nɔhalɛlilɛ yɛboa ‘menli mɔɔ li yɛ nyunlu la’ ɔlua tieyɛ mɔɔ yɛbayɛ la azo.​—Hib. 13:17.

16. Duzu a kile kɛ ɛnee Belemgbunli Gyɛhowahye anwo ɛnyɛ se wɔ sunsum nu a?

¹⁶ Gyɛhɔyada boale Belemgbunli Gyɛhowahye maanle ɔyɛle sonlakpalɛ. (2 Arl. 12:2) Ɛhye ati mɔɔ belemgbunli ne le kakula la, ɛnee ɔkulo kɛ ɔsɔ Gyihova anye. Noko mɔɔ Gyɛhɔyada wule la, Gyɛhowahye diele Dwuda mgbanyima mɔɔ bɛkpɔkye la. Duzu a vile nu rale a? Ɔ nee ye maanlema bɔle “ɔ bo kɛ bɛsonle ɛzonlenlɛ mbaka ne mɔ nee ananze ne mɔ.” (2 Ek. 24:4, 17, 18) Ɔyɛle Gyihova nyane kpalɛ, na “ɔhɔle zo ɔzoanle ngapezoma wɔ bɛ avinli kɛ bɛva bɛ bɛzia bɛrɛla . . . , noko bɛkpole kɛ bɛbadie.” Bɛandie Gyɛhɔyada ara Zɛkalaya, mɔɔ ɛnee ɔnle Gyihova ngapezonli nee ɛsɔfo ala, emomu ɛnee eza ɔle Gyɛhowahye papa adiema raalɛ ara la bɔbɔ. Kɛ anrɛɛ Belemgbunli Gyɛhowahye bala anyezɔlɛ ali ahile abusua ne mɔɔ boale ye kpalɛ la, yeanyɛ ye zɔ, emomu ɔmaanle bɛhunle Zɛkalaya.​—2 Ek. 22:11; 24:19-22.

17. Duzu a dole Gyɛhowahye a?

 ¹⁷ Gyɛhowahye angɔ zo anzulo Gyihova, ɔti ninyɛne angɔ boɛ ammaa ye. Ɛnee Gyihova ɛha kɛ: “Menli mɔɔ ɛmbu me la, menrɛva bɛ menrɛyɛ ɛhwee.” (1 Sa. 2:30) Nzinlii Selea ɛlɔnema ekyi bie lile Gyɛhowahye “ɛlɔnema mɔɔ bɛzonle kpalɛ la” anwo zo konim na ‘bɛbodale ye kpole bie.’ Mɔɔ Seleama ne hɔle la, Gyɛhowahye mumua ne sonvolɛma hunle ye ɔluakɛ ɔhunle Zɛkalaya la ati. Bɛnwunle kɛ ɔnfɛta kɛ bɛsie belemgbunli amumuyɛ ɛhye bɔbɔ wɔ “ɛleka mɔɔ bɛsie arelemgbunli ne mɔ la.”​—2 Ek. 24:23-25; nea Mateyu 23:35 study note, “son of Barachiah.”

18. Kɛ mɔɔ Gyɛlɛmaya 17:7, 8 kile la, kɛ ɔkɛyɛ na yɛanyɛ kɛ Gyɛhowahye ɛ?

¹⁸ Duzu a yɛbahola yɛazukoa yɛavi Gyɛhowahye neazo ne anu a? Ɛnee ɔle kɛ baka mɔɔ ye ndinli ne ɛngɔ moa ɔti kyesɛ bɛfa takola bɛsɔ ye la. Mɔɔ takola ne​—Gyɛhɔyada​—vile ɛkɛ na ɛkpɔkyelɛ anwoma ne bɔle la, Gyɛhowahye dule dɔle aze. Edwɛkɛ ɛhye maa yɛnwu kɛ, ɔnle kɛ yɛgyinla neazo kpalɛ mɔɔ yɛ mediema Kilisienema, mɔɔ yɛ mbusuafoɔ boka nwo la yɛ la ala azo a yɛsulo Nyamenle a. Amaa yɛ nwo ayɛ se wɔ sunsum nu la, ɔwɔ kɛ yɛsukoa debie, yɛdwenledwenle nwo na yɛyɛ asɔne dahuu yɛfa yɛmia yɛ Nyamenlezonlenlɛ nee ɛbulɛ mɔɔ yɛlɛ yɛmaa Nyamenle la anu.​—Kenga Gyɛlɛmaya 17:7, 8; Kɔl. 2:6, 7.

19. Duzu a Gyihova kulo kɛ yɛyɛ a?

¹⁹ Gyihova ɛngulo kɛ yɛyɛ ninyɛne mɔɔ bo yɛ nwo zo la. Bɛha mɔɔ ɔkulo kɛ yɛyɛ la wɔ Nolobɔvo 12:13 kɛ: “Sulo nɔhalɛ Nyamenle ne na di ye mɛla ne mɔ azo, ɔluakɛ sonla gyima mɔɔ ɔwɔ kɛ ɔyɛ la kɔsɔɔti ɛne.” Saa yɛsulo Nyamenle a, yɛbahola yɛagyinla sɔnea ngakyile mɔɔ yɛbayia ye kenle bie la anloa na yɛagyinla kpundii kɛ mɔɔ Obadaya nee Gyɛhɔyada yɛle la. Debie biala ɛnrɛhola ɛnrɛzɛkye yɛ nee Gyihova agɔnwolɛvalɛ ne.