Saa yɛbazɔ Gyihova anye a, ɔwɔ kɛ yɛnyia diedi. Noko akee, Baebolo ne ka kɛ “tɛ menli ne amuala a lɛ diedi a.” (2 Tɛs. 3:2) Mɔɔ ɛzoanvolɛ Pɔɔlo hanle edwɛkɛ ɛhye la, ɛnee ɔlɛkile “ɛtanevolɛma nee amumuyɛma” mɔɔ ɛnee bɛlɛyɛ ye kpɔdekpɔde na ɔhyia kɛ bɛdie ye bɛfi bɛ sa nu la. Noko eza mɔɔ ɔhanle ye wɔ diedi nwo la fale menli gyɛne nwo. Menli bie mɔ ɛmkpondɛ kɛ bɛbalie daselɛ mɔɔ kile kɛ Nyamenle a le Bɔvolɛ ne mɔɔ bɔle debie biala la bɛado nu. (Wlo. 1:20) Bie a awie mɔ noko baha kɛ bɛdie debie anzɛɛ awie bie mɔɔ lɛ tumi kpole kpalɛ la bɛdi. Noko yemɔ angomekye ɛngile kɛ bɛlɛ diedi mɔɔ ɔbamaa bɛazɔ Gyihova anye la.

Ɔwɔ kɛ yɛanyia anwodozo bɔkɔɔ kɛ Gyihova wɔ ɛkɛ na ɔmaa bɛdabɛ mɔɔ bɛlɛ diedi mɔɔ gyi ye kpundii la “ahatualɛ.” (Hib. 11:6) Diedi le Gyihova sunsum nwuanzanwuanza ne ma ne foa. Saa awie yɛ asɔne sɛlɛ Gyihova sunsum nwuanzanwuanza ne a, ɔbahola yeava yeamaa ye. (Luku 11:​9, 10, 13) Adenle titili ko mɔɔ yɛbahola yɛalua zo yɛanyia sunsum nwuanzanwuanza ne la a le kɛ yɛbagenga Nyamenle Edwɛkɛ ne. Akee yɛbahola yɛadwenle mɔɔ yɛgenga la anwo na yɛabɔ mɔdenle kɛ yɛbava mɔɔ yɛzukoa la yɛabɔ yɛ ɛbɛla. Gyihova sunsum ne bahola anyia yɛ ɛbɛlabɔlɛ zo tumi, na yeaboa yɛ yeamaa yɛanyia diedi na yɛazɔ ɔ nye.