1. Kɛ mɔɔ bɛhɛlɛ ye wɔ Edwɛne 18:46 la, duzu a Devidi vale Gyihova totole nwo a?

 YƐDE ewiade mɔɔ ngyegyelɛ mɔɔ yɛ nye ɛnla la bahola azɛkye anzɛɛ ahakyi yɛ ɛbɛlabɔlɛ bɔkɔɔ la anu. Noko yɛ nye die kɛ yɛbahola yɛahɔ Gyihova ɛkɛ yɛamaa yeaboa yɛ la! Wɔ edwɛkɛ mɔɔ li ɛhye anyunlu la anu, bɛhakyele yɛ kɛ Gyihova a le tease Nyamenle ne a na yeziezie ɔ nwo kɛ ɔbaboa yɛ dahuu. Saa yɛnyia moalɛ yɛfi ye ɛkɛ a, ɔmaa yɛnyia anwodozo kɛ “Gyihova de aze!” (Kenga Edwɛne 18:46.) Noko mɔɔ Devidi hanle edwɛkɛ ɛhye wiele ala la, ɔvɛlɛle Nyamenle kɛ “me Bodane.” Duzu ati a ɔvale Gyihova, tease Nyamenle ne ɔtotole debie mɔɔ ngoane ɛnle nu—bodane nwo a?

2. Duzu ati a ɔwɔ kɛ yɛmaa Gyihova mɔɔ Devidi vɛlɛle ye “me Bodane” la kyia yɛ a?

² Wɔ edwɛkɛ ɛhye anu, yɛbazuzu deɛmɔti bɛfɛlɛ Gyihova bodane nee mɔɔ edwɛkɛ zɔhane maa yɛnwu ye wɔ ɔ nwo la anwo. Eza yɛbanwu kɛzi yɛbahola yɛabu ye kɛ yɛ Bodane la. Akee yɛbazuzu kɛzi yɛbahola yɛazukoa Gyihova subane ne mɔ mɔɔ le kɛ bodane la anwo.

DEƐMƆTI GYIHOVA LE BODANE LA

3. Kɛzi Baebolo ne ta fa edwɛkɛkpɔkɛ “bodane” di gyima ɛ? (Nea nvoninli ne.)

³ Baebolo ne fa Gyihova toto “bodane” nwo amaa yeaboa yɛ yeamaa yɛade ye subane ne mɔ bie abo kpalɛ. Saa bɛlɛye ye ayɛlɛ kɛ ɔle Nyamenle mɔɔ awie biala nee ye ɛnzɛ a yɛɛ bɛta bɛfa bɛdi gyima a. Bɛlimoale bɛhanle Gyihova anwo edwɛkɛ kɛ ɔle “Bodane ne” wɔ Ditilɔnomi 32:4. Hana hanle ye wɔ asɔneyɛlɛ nu kɛ, “bodane biala ɛnle kɛ yɛ Nyamenle ne la.” (1 Sa. 2:2) Habakɛke vɛlɛle Gyihova “me Bodane.” (Hab. 1:12) Edwɛne 73 kɛlɛvolɛ ne hanle kɛ, “Nyamenle le bodane maa me ahonle.” (Edw. 73:26) Yɛɛ Gyihova hanle ɔdaye mumua ne ɔ nwo edwɛkɛ kɛ ɔle bodane. (Aye. 44:8) Maa yɛzuzu subane nsa mɔɔ Gyihova lɛ mɔɔ le kɛ bodane nee kɛzi yɛbahola yɛava ye yeayɛ “yɛ Bodane” la anwo.—Dit. 32:31.

4. Kɛzi Gyihova le ɛvealeka ɛ? (Edwɛne 94:22)

 ⁴ Gyihova le ɛvealeka. Kɛ mɔɔ ahumu kpole bie ɛlɛtu a awie kola kɔfea bodane kpole bo la, zɔhane ala a Gyihova noko bɔ yɛ nwo bane wɔ mekɛ mɔɔ yɛbayia tɛnlabelɛ mɔɔ anu yɛ se la. (Kenga Edwɛne 94:22.) Ɔbɔ yɛ nwo bane na ɔnrɛmaa yɛnrɛnwu amaneɛ dahuu. Yebɔ yɛ ɛwɔkɛ dɔɔnwo bɔbɔ kɛ: Awieleɛ bɔkɔɔ ne ɔbaye debie biala mɔɔ ɔmmaa yɛ nzo nu ɛndwo yɛ na ɔmaa yɛnwu amaneɛ la yeavi ɛkɛ.—Yiz. 34:​25, 26.

5. Kɛzi Gyihova bahola ayɛ yɛ Ɛvealeka ɛ?

⁵ Adenle ko mɔɔ yɛbahola yɛalua zo yɛava Gyihova yɛayɛ yɛ Ɛvealeka la a le kɛ yɛbayɛ asɔne. Saa yɛyɛ asɔne a, Gyihova bava “Nyamenle anzodwolɛ ne” mɔɔ bɔ yɛ ahonle nee yɛ adwenle nwo bane la amaa yɛ. (Fel. 4:​6, 7) Suzu adiema nrenyia Artem, mɔɔ ye diedi ti bɛdole ye efiade la anwubielɛ ne anwo. Mɔɔ ɔtɛda efiade la, nrenyia bie mɔɔ ye gyima a le kɛ ɔbanleɛnlea edwɛkɛ nu la bizebizale ye edwɛkɛ fane dɔɔnwo, ɔ nee ye anli ye boɛ yɛɛ ɔguale ɔ nyunlu aze. Artem hanle kɛ: “Mekɛ biala mɔɔ nrenyia ne bavɛlɛ me kɛ ɔbizebiza me edwɛkɛ la, ɔye adwenleadwenle ɔto me nwo. . . . Dahuu mesɛlɛ Gyihova. Menzɛlɛle ye kɛ ɔboa me ɔmaa menzie me nwo dii na ɔmaa me nrɛlɛbɛ. Ɛhye ammaa meandɔ nrenyia ne ɛhane nu. . . . Kɛmɔ Gyihova boale me la ati, ɛnee ɔle kɛ asɛɛ megyi bane bie mɔɔ bɛva awolɛ bɛdo la anzi la.”

6. Duzu ati a yɛbahola yɛava yɛ nwo yɛado Gyihova anwo zo dahuu a? (Ayezaya 26:​3, 4)

⁶ Yɛkola yɛfa yɛ nwo yɛto Gyihova anwo zo. Gyihova le kɛ bodane mɔɔ bɛngola ɔ bo tu la, dahuu ɔwɔ ɛkɛ ne ɔmaa yɛ. Yɛbahola yɛava yɛ nwo yɛado ɔ nwo zo ɔluakɛ ɔdaye a ɔle “dahuu Bodane ne a.” (Kenga Ayezaya 26:​3, 4.) Ɔde aze dahuu, ɔti ɔbahɔ zo yeali ye ɛwɔkɛ ne mɔ azo, yeadie yɛ asɔneyɛlɛ na yeava moalɛ mɔɔ yɛhyia nwo la yeamaa yɛ. Eza yɛbahola yɛava yɛ nwo yɛado Gyihova anwo zo ɔluakɛ ɔdi nɔhalɛ ɔmaa bɛdabɛ mɔɔ bɛsonle ye la. (2 Sa. 22:26) Ɔ rɛle ɛnrɛvi mɔɔ yɛyɛ la ɛlɛ na ɔbamaa yɛ nwolɛ ahatualɛ dahuu.—Hib. 6:10; 11:6.

7. Saa yɛfa yɛ nwo yɛto Gyihova anwo zo a, nvasoɛ boni a yɛbanyia a? (Eza nea nvoninli ne.)

⁷ Saa yɛfa yɛ nwo yɛto Gyihova anwo zo bɔkɔɔ a, ɛnee yɛlɛmaa yeayɛ yɛ Bodane. Yɛdie yɛdi kɛ saa yɛtie ye wɔ tɛnlabelɛ mɔɔ anu yɛ se bɔbɔ la anu a, yɛbanyia nyilalɛ. (Aye. 48:​17, 18) Saa yɛnwu kɛ ɔlɛboa yɛ a, anwodozo mɔɔ yɛlɛ wɔ ye nu la yɛ kpole. Yɛbanyia anwodozo kɛ Gyihova ala a bahola aboa yɛ yeamaa yɛagyinla sɔnea biala anloa a, ɔnva nwo kɛzi nuhua yɛ se la. Fane dɔɔnwo ne ala, saa yɛkɔ tɛnlabelɛ mɔɔ yɛnnyia awie mɔɔ ɔbaboa yɛ la anu a, ɔmaa yɛnwu kɛzi yɛbahola yɛava yɛ nwo yɛado Gyihova anwo zo dahuu la. Vladimir hanle kɛ, “Mekɛ mɔɔ bɛdole me efiade ekyii la a le mekɛ kpalɛ mɔɔ tɛla biala wɔ me nee Nyamenle agɔnwolɛvalɛ ne anu a. Menzukoale kɛ mebanyia anwodozo kpole wɔ Gyihova anu ɔluakɛ ɛnee yeha me ngome yɛɛ menrɛhola menrɛyɛ tɛnlabelɛ ne anwo ɛhwee.”

8. (a) Duzu ati a yɛkola yɛka kɛ Gyihova gyi ye pi a? (b) Saa Nyamenle le yɛ Bodane a, nvasoɛ boni a yɛnyia a? (Edwɛne 62:​6, 7)

⁸ Gyihova gyi ye pi. Gyihova le kɛ bodane anzɛɛ boka kpole la, ɔgyi ye pi. Ye subane nee  bodane mɔɔ ɔlɛ la ɛngakyi. (Mal. 3:6) Mɔɔ Adam nee Yive dele atua wɔ Yidɛn tola ne anu la, Gyihova angakyi bodane mɔɔ ɔlɛ ɔmaa alesama la. Kɛ mɔɔ ɛzoanvolɛ Pɔɔlo hɛlɛle la, Gyihova ‘ɛngola ɛmkpo ɔ nwo.’ (2 Tim. 2:13) Ɛhye kile kɛ ɔnva nwo mɔɔ bazi anzɛɛ mɔɔ awie mɔ bayɛ la, Gyihova ɛnrɛhakyi ye subane, bodane mɔɔ ɔlɛ ɔmaa alesama anzɛɛ ye ngyinlazo ne mɔ ɛlɛ. Kɛmɔ yɛ Nyamenle ne gyi ye pi la ati, yɛze kɛ ɔbalie yɛ ngoane yɛɛ ɔbaboa yɛ yeamaa yɛagyinla tɛnlabelɛ mɔɔ anu yɛ se la anloa.—Kenga Edwɛne 62:​6, 7.

9. Duzu a ɛsukoa ɛfi Tatyana anwubielɛ ne anu a?

⁹ Saa yɛfa yɛ adwenle yɛsie Gyihova subane ne mɔ azo na yɛmaa bodane mɔɔ ɔlɛ ɔmaa alesama la tɛnla yɛ adwenle nu dahuu a, ɛnee yɛlɛfa ye yɛayɛ yɛ Bodane. Yɛyɛ ye zɔ a ɔbaboa yɛ yeamaa yɛahɔ zo yɛazie yɛ nwo dii na yɛali nɔhalɛ wɔ mekɛ mɔɔ yɛgyi sɔnea nloa la. (Edw. 16:8) Adiema raalɛ bie mɔɔ bɛfɛlɛ ye Tatyana mɔɔ bɛdole ye efiade wɔ ɔdaye mumua ne ye sua nu ɔlua ye diedi ne ati la nwunle kɛ ɛhye le nɔhalɛ. Ɔhanle kɛ: “Ɔhale me ngomekye. Mɔlebɛbo ne ɛnee ɔnla aze fee. Ɛnee me rɛle ta bɔ.” Noko mɔɔ ɔvale ye adwenle ɔziele kɛzi ye sɔnea ne fale Gyihova nee bodane mɔɔ ɔlɛ la anwo azo la, ɔholale ɔziele ɔ nwo dii na ɔgyinlanle ɔ nloa. Ɔhanle kɛ: “Mɔɔ mendele deɛmɔti ɛhye ɛlɛsi la abo la, ɔmaanle mengakyele kɛ kɛmɔ mekulo Gyihova la ati a mehɔ tɛnlabelɛ ɛhye mɔ anu a. Yemɔ boale me maanle mengyakyile kɛ mebadwenle me ngome me nwo.”

10. Kɛ ɔkɛyɛ na Gyihova ayɛ yɛ Bodane ɛnɛ ɛ?

¹⁰ Ɔnrɛhyɛ biala, yɛbayia sɔnea mɔɔ ɔbahyia kɛ yɛfa yɛ nwo yɛto Gyihova anwo zo yɛtɛla mekɛ biala la. Ɛnɛ a le mekɛ mɔɔ ɔhyia kɛ yɛnyia Gyihova anu diedi kɛ ɔbaboa yɛ yeamaa yɛali nɔhalɛ yɛamaa ye wɔ tɛnlabelɛ biala anu a. Kɛ ɔkɛyɛ na yɛayɛ zɔ ɛ? Kenga kɛlɛtokɛ mɔɔ wɔ Baebolo ne anu yɛɛ yɛ mekɛ ye azo Alasevolɛ anwubielɛ ngakyile. Yɛ kɛzi Nyamenle ɛla subane mɔɔ le kɛ bodane la ali ɛva ɛboa ye azonvolɛ la nzonlɛ. Dwenledwenle kɛlɛtokɛ zɔhane mɔ anwo kpalɛ. Ɛyɛ zɔ a ɔbahola yeaboa wɔ yeamaa wɔava Gyihova wɔayɛ wɔ Bodane.

SUKOA GYIHOVA SUBANE NE MƆ MƆƆ LE KƐ BODANE LA

11. Duzu ati a yɛkulo kɛ yɛsukoa Gyihova subane ne mɔ mɔɔ le kɛ bodane la ɛ? (Nea ɛlɛka “ Bodane Maa Mediema Mgbavolɛ.”)

¹¹ Yɛnwu kɛzi Gyihova da ye ali kɛ ɔle bodane la. Akee bɛmaa yɛzuzu kɛzi yɛbazukoa ye subane ne mɔ mɔɔ le kɛ bodane la. Saa yɛyɛ biala mɔɔ yɛbahola la yɛsukoa Gyihova subane ne mɔ a, yɛbahola yɛamaa yɛ mediema anwosesebɛ. Kɛ neazo la, Gyisɛse donle Saemɔn duma Sifase (ɔkile “Pita”), na ɔ bo kile “Bodane.” (Dwɔn 1:42) Ɛhye kile kɛ ɔbakyekye asafo ne arɛle na yeamaa yeagyinla kpundii. Bɛvale asafo nu mgbanyima bɛtotole “bodane kpole bie” anwo. Ɛhye kile kɛzi bɛbɔ menli mɔɔ wɔ asafo ne anu anwo bane la. (Aye. 32:2) Nɔhalɛ nu, saa yɛ muala yɛsukoa Gyihova subane ne mɔ mɔɔ le kɛ bodane la a, asafo ne nyia zolɛ nvasoɛ.—Ɛfɛ. 5:1.

12. Kɛ ɔkɛyɛ na yɛayɛ ɛvealeka yɛamaa awie mɔ ɛ?

 ¹² Yɛ ɛvealeka maa ɛ mediema. Ɔdwu mekɛ ne bie a yɛmaa yɛ mediema mɔɔ esiane, basabasayɛlɛ anzɛɛ konle ti bɛnriandi bɛvi bɛ azua nu la batɛnla yɛ sua nu. Mekɛ mɔɔ ninyɛne nu ɛlɛyɛ se wɔ “mekɛ mɔɔ li awieleɛ la anu” la, yɛbanyia nwolɛ adenle dɔɔnwo yɛaboa yɛ nwo ngoko. (2 Tim. 3:1) Eza yɛbahola yɛakyekye yɛ mediema arɛle na yɛala ɛlɔlɛ ali yɛahile bɛ. Adenle ko mɔɔ yɛbahola yɛalua zo yɛayɛ zɔ la a le kɛ saa bɛba Belemgbunlililɛ Asalo ɛkɛ a, yɛ nee bɛ babɔ adawu na yɛakyekye bɛ rɛle. Yemɔ bamaa asafo ne anu ayɛ ɛleka mɔɔ bɛba a bɛ nwo tɔ bɛ a. Yɛde ewiade mɔɔ menli nee awie mɔ di ye atisesebɛ nu, bɛnla ɛlɔlɛ ali yɛɛ ɛvɛlɛ wɔ nu la anu. Ɔti saa yɛ mediema ba debiezukoalɛ a, yɛkulo kɛ yɛyɛ biala mɔɔ yɛbahola la yɛmaa bɛ nwo tɔ bɛ, bɛte nganeɛ kɛ yɛkulo bɛ yɛɛ bɛlɛ anwobanebɔlɛ.

13. Kɛzi mgbanyima bahola ayɛ ɛvealeka amaa awie mɔ ɛ? (Eza nea nvoninli ne.)

¹³ Mgbanyima bahola ayɛ ɛvealeka amaa asafo ne anu amra mɔɔ gyi tɛnlabelɛ mɔɔ anu yɛ se la anloa la. Saa esiane si anzɛɛ awie mɔ hyia ayileyɛlɛ arɛlevilɛ nu a, mgbanyima ne mɔ tudu nwolɛ agyakɛ yɛ ngyehyɛleɛ boa bɛ mediema. Eza bɛboa yɛ wɔ sunsum nu. Mediema anye balie nwo kɛ bɛbaha bɛ edwɛkɛ bɛahile asafo nu kpanyinli mɔɔ bɛze kɛ ɔbadendɛ kɛnlɛma yeahile bɛ, yeadie bɛ na yeabɔ mɔdenle kɛ ɔbade bɛ edwɛkɛ bo la. Subane zɛhae mɔ boa awie mɔ maa bɛte nganeɛ kɛ bɛdwenle bɛ nwo; ɔnrɛmaa ɔnrɛyɛ se kɛ bɛbava adehilelɛ mɔɔ asafo nu kpanyinli bie gyinlanle Baebolo ne azo vale maanle bɛ la bɛali gyima.—1 Tɛs. 2:​7, 8, 11.

14. Kɛ ɔkɛyɛ na yɛahile kɛ bɛkola bɛfa bɛ nwo bɛto yɛ nwo zo ɛ?

¹⁴ Yɛ awie mɔɔ bɛkola bɛfa bɛ nwo bɛto ɛ nwo zo. Yɛkulo kɛ yɛyɛ menli mɔɔ awie mɔ kola fa bɛ nye to yɛ nwo zo, titili wɔ ngyegyelɛ mekɛ nu. (Mrɛ. 17:17) Kɛ ɔkɛyɛ na yɛayɛ menli mɔɔ  bɛkola bɛfa bɛ nwo bɛto yɛ nwo zo ɛ? Yɛbahola yɛabɔ mɔdenle kɛ yɛbala subane kpalɛ ali dahuu, bie a le kɛ yɛbali yɛ ɛwɔkɛ zo na yɛayɛ biala mɔɔ yɛbahola la yɛali yɛ mekɛ zo. (Mat. 5:37) Eza yɛbahola yɛava moalɛ mɔɔ awie mɔ hyia nwo la yɛamaa bɛ. Bieko, yɛnea kɛ yɛbava adehilelɛ mɔɔ wɔ gyimalilɛ biala mɔɔ bɛbava bɛamaa yɛ anwo la yɛayɛ gyima.

15. Saa mgbanyima yɛ menli mɔɔ bɛkola bɛfa bɛ nwo bɛto bɛ nwo zo la a, kɛzi ɔboa asafo ne ɛ?

¹⁵ Mgbanyima mɔɔ bɛkola bɛfa bɛ nwo bɛto bɛ nwo zo la boa asafo ne kpalɛ. Adenle boni azo? Saa nolobɔlɛma ze kɛ bɛbahola bɛavɛlɛ asafo nu mgbanyima, titili daselɛlilɛ ekpunli zo neavolɛma wɔ mekɛ biala mɔɔ bɛhyia moalɛ la a, ɔmaa bɛ adwenleadwenle zo te. Eza saa nolobɔlɛma ze kɛ mgbanyima ne mɔ lɛ ɛhulolɛ kɛ bɛbaboa bɛ a, ɔmaa bɛte nganeɛ kɛ bɛdwenle bɛ nwo. Yɛɛ saa mgbanyima ne mɔ ammaa bɛ folɛdulɛ angyinla bɛdabɛ mumua ne bɛ nzuzulɛ zo, emomu bɛmaa ɔgyinla Baebolo ne nee ninyɛne ngakyile mɔɔ akɛlɛ nɔhavo ne ɛyɛ la azo a, ɔmaa bɛ mediema diedima die bɛ di. Eza mediema lɛ asafo nu kpanyinli mɔɔ kola fa fealeranu edwɛkɛ sie na ɔdi ye ɛwɔkɛ zo la anu anwodozo.

16. Saa yɛgyi ye pi a, kɛzi ɔboa yɛ nee awie mɔ ɛ?

 ¹⁶ Si pi. Saa yɛle menli mɔɔ yɛsi pi yɛyɛ mɔɔ tenrɛ la na yɛgyinla Baebolo ngyinlazo ala azo yɛsisi kpɔkɛ a, ɔbamaa yɛayɛ neazo kpalɛ yɛamaa awie mɔ. Saa yɛnyia diedi nee nɔhalɛ ndelebɛbo kpole a, ɔbamaa yɛagyinla kpundii wɔ nɔhalɛ ne anu. Yɛnle menli mɔɔ yɛ adwenle yɛ yɛ nwiɔ nwiɔ, yɛngola yɛnzi pi anzɛɛ bɛkola bɛfa adalɛ ngilehilelɛ nee ewiade nzuzulɛ bɛbɛlɛbɛla yɛ a. (Ɛfɛ. 4:14; Gye. 1:​6-8) Saa yɛte amaneɛbɔlɛ ɛtane bie a, diedi mɔɔ yɛlɛ wɔ Gyihova nee ye ɛwɔkɛ ne mɔ anu la ɛmmaa yɛ nwo ɛnwoso yɛ. (Edw. 112:​7, 8) Eza yɛkola yɛboa menli mɔɔ bie a bɛlɛyia ngyegyelɛ la.—1 Tɛs. 3:​2, 3.

17. Duzu a maa mgbanyima kola boa awie mɔ maa bɛ nwo gyinla bɛ a?

¹⁷ Ɔwɔ kɛ mgbanyima yɛ menli mɔɔ bɛ nye gyi bɛ ti anwo, bɛyɛ bɛ ninyɛne pɛpɛɛpɛ yɛɛ bɛte edwɛkɛ bo. Mrenyia ɛhye mɔ boa awie mɔ maa bɛ nwo gyinla bɛ yɛɛ kɛmɔ mɔɔ bɛkilehile la “gyi nɔhalɛ edwɛkɛ ne azo kpundii” la ati ɔmaa asafo ne anwo yɛ se. (Tae. 1:9; 1 Tim. 3:​1-3) Mgbanyima ne mɔ dua bɛ neazo nee bɛ mboanekpɔlalɛ gyima ne azo boa nolobɔlɛma maa bɛkɔ debiezukoalɛ nee daselɛlilɛ na bɛyɛ bɛtianwo debiezukoalɛ dahuu. Saa mediema ɛlɛyia ngyegyelɛ mɔɔ maa adwenleadwenle tɔ bɛ nwo la a, mgbanyima ne mɔ bahola amaa bɛ anwosesebɛ bɛamaa bɛava bɛ adwenle bɛazie Gyihova nee ye ɛwɔkɛ ne mɔ azo.

18. Duzu ati a yɛkulo kɛ yɛye Gyihova ayɛlɛ na yɛbikye ye kpalɛ a? (Eza nea ɛlɛka “ Adenle Mɔɔ Ɛbalua Zo Wɔabikye Gyihova.”)

¹⁸ Saa yɛsuzu Gyihova subane ngɛnlɛma ne mɔ anwo a, yɛbahola yɛaha mɔɔ Belemgbunli Devidi hanle la bie: “Ayɛlɛyelɛ ɛha Gyihova, me bodane.” (Edw. 144:1) Gyihova le Nyamenle mɔɔ yɛbahola yɛava yɛ nwo yɛado ɔ nwo zo dahuu a. Wɔ yɛ ngoane mekɛ kɔsɔɔti anu, mekɛ mɔɔ yɛyɛ mrelera bɔbɔ la, yɛbahola yɛaha kɛ: “Ɔle me Bodane,” na yɛlɛ anwodozo kɛ ɔbaboa yɛ yeamaa yɛabeta ye dahuu.—Edw. 92:​14, 15.