Bɛwole me wɔ December 22, 1929 wɔ Noville, namule ekyi bie mɔɔ ɛya ngakyile ngɔnla a wɔ ɛkɛ mɔɔ bikye Bastogne wɔ Belgian Ardennes la. Mekakye mekɛ mɔɔ ɛnee me nee me awovolɛ de ɛya ne anu na yɛ nye die la. Ɛnee me nee me diema kakula Raymond fa yɛ sa twihwi yɛ nlankɛ ne mɔ nyɛfonzule kenle ko biala na yɛboa yɛmaa bɛfa aleɛ bɛba sua nu. Ɛnee yɛ namule ne azo amra amuala bɔ nu yɛ gyima na bɛboa bɛ nwo.

Ɛnee me awovolɛ, Emile nee Alice ati ɛmi Kateleke asɔne ne anu. Molɛ biala bɛkɔ Mass mɔɔ bɛbɔ la bie. Noko wɔ 1939 ne anu, adekpakyelɛma bie mɔɔ bɛvi England la rale yɛ namule ne azo na bɛmaanle me papa hɛlale Consolation magazine ne mɔɔ ɛnee ɔba siane biala la bie (kɛkala bɛfɛlɛ ye Awake!). Ɛkɛ ne ala me papa nwunle kɛ mɔɔ ɔgengale ye wɔ magazine ne anu la le nɔhalɛ na ɔmaanle ɔbɔle ɔ bo kɛ ɔkenga Baebolo ne. Mɔɔ ɔgyakyile Mass ɛhɔlɛ la, yɛ kpalɛ ne azo amra mɔɔ ɛnee bɛle ɔ gɔnwo mɔ la dwazole tiale ye ɛsesebɛ. Bɛtinlitinlinle me papa anwo zo kɛ ɔmmagyakyi Kateleke asɔne ne, na ɛhye vale kpolerazulɛ dɔɔnwo rale.

Saa menwu kɛ bɛlɛyɛ me papa zɔhane a, ɔyɛ me nyane kpalɛ. Ɛhye a maanle memkpondɛle moalɛ menvile Gyihova ɛkɛ wɔ asɔne mɔɔ menvile ne ahonle nu menyɛle mɔɔ wɔ edwɛkɛ ɛhye mɔlebɛbo la anu la a. Mɔɔ bɛgyakyile bɛ dwazotia ne la, me nye liele kpalɛ. Ɛhye maanle menwunle ye wienyi kɛ Gyihova le “asɔneyɛlɛ Tievolɛ.”

Nazi Germany hɔtetale Belgium wɔ May 10, 1940, ɛhye maanle menli dɔɔnwo vile maanle ne anu. Yɛ abusua ne nriandile hɔle France nyiakɛ.  Mɔɔ yɛlɛkɔ la, ɔyɛ a yɛkɔfinde ɛleka mɔɔ Germany sogyama nee France sogyama ɛlɛko ɛsesebɛ la.

Nzinlii mɔɔ yɛziale yɛrale yɛ namule ne azo la, yɛnwunle kɛ bɛwua yɛ ninyɛne dɔɔnwo. Yɛ twea Bobbie angomekye a yɛhɔdole ye wɔ ɛkɛ a. Edwɛkɛ ɛhye mɔ maanle membizale kɛ, ‘Duzu ati a konle nee amaneɛnwunlɛ ɛbu zo a?’

Wɔ zɔhane mekɛ ne, Adiema Emile Schrantz, a asafo nu kpanyinli mɔɔ eza ɔle adekpakyelɛnli mɔɔ di nɔhalɛ la rakpɔlale yɛ na ɔboale me kpalɛ. Ɔgyinlanle Baebolo ne azo ɔhilehilele deɛmɔti yɛnwu amaneɛ la anu wienyi yɛɛ ɔbuale kpuya gyɛne mɔɔ melɛ la. Me nee Gyihova nyianle agɔnwolɛvalɛ kyengye na menliele menlile kɛ ɔle Nyamenle mɔɔ lɛ ɛlɔlɛ.

Kolaa na konle ne ara ye awieleɛ bɔbɔ la, ɛnee yɛ abusua ne ta nee mediema ne mɔ yia na yɛbɔ adawu. Wɔ August 1943, Adiema José-Nicolas Minet ramaanle ɛdendɛlɛ wɔ yɛ namule ne azo. Ɔbizale kɛ, “Nwane a ɔkulo kɛ bɛsɔne ye a?” Me nee me papa maanle yɛ sa zo. Bɛzɔnenle yɛ wɔ azudenle ekyi bie mɔɔ bikye yɛ ɛya ne la anu.

Wɔ December 1944, Germany sogyama tetale Europe adɔleɛma kpole bie, bɛfɛlɛ ye Bulge Konle ne na yemɔ a le ɛtetalɛ mɔɔ li awieleɛ a. Ɛnee yɛde yɛbikye ɛleka mɔɔ konle ne ɛlɛkɔ zo la, ɔti yɛhɔveale yɛ azɛlɛ bo sua ne mɔɔ wɔ yɛ sua ne abo la anu too asɛɛ siane ko. Kenle ko bie mɔɔ menvindele kɛ mekamaa nane ne mɔ aleɛ la, bɔmbo bie dele wɔ ɛya ne anu na ɔkpale sua ne mɔɔ yɛfa yɛ ninyɛne yɛsie nu la azo. America sogyanli bie mɔɔ vea ɛleka mɔɔ nane ne mɔ wɔ la deanle nu kɛ, “Da azɛlɛ nwo!” Menriandile mengɔnlale ɔ nwo ɛkɛ na ɔyele ye kyɛlɛ ne ɔkpolole me ti ɔbɔle me nwo bane.

Wɔ konle ne anzi, yɛbɔle mɔdenle kɛ yɛ nee mediema mɔɔ wɔ Liège asafo nu la bada ali adwelie. Bɛwɔ yɛ sɔlɔ na adenle mɔɔ la yɛ avinli la bayɛ kɛyɛ kilomita 90 (mayɛle 56). Yeangyɛ, yɛholale yɛdele ekpunli ekyi bie wɔ Bastogne. Membɔle ɔ bo kɛ meyɛ gyima wɔ ɛleka mɔɔ bɛdielie adwule la na menyianle nwolɛ adenle menzukoale mɛla nwo debie. Nzinlii, menyɛle arane nu gyima bie. Wɔ 1951 yɛyɛle maangyebakyi nyianu wɔ Bastogne. Menli kɛyɛ ɛya ko hɔle bie yɛɛ adiema raalɛ Elly Reuter mɔɔ bɔ  mɔdenle kpalɛ wɔ adekpakyelɛ gyima ne anu la noko hɔle bie. Ɔvale basekɛ ɔpɛle adenle kilomita 50 (mayɛlɛ 31) amaa yeahola yeahɔ nyianu ne bie. Yeangyɛ, yɛhulole yɛ nwo na yɛbɔle ɔ bo kɛ yɛtu na yɛagya. Bɛdole ɛsalɛ bɛvɛlɛle Elly kɛ ɔhɔ Geleade Sukulu wɔ United States. Ɔhɛlɛle ɔhɔle ewiade amuala gyima ne ati na ɔhilehilele deɛmɔti ɔnrɛhola ɔnrɛlie ɛsalɛdolɛ ne ɔnrɛdo nu la anu. Adiema Knorr mɔɔ ɛnee li ahyehyɛdeɛ ne anyunlu la buale ye kɛ bie a kenle ko dedee ɔ nee ɔ hu bahɔ Geleade. Yɛgyale February 1953.

Wɔ ɛvolɛ ko ne ala anu, me nee Elly hɔle New World Society nyianu ne mɔɔ bɛyɛle ye wɔ Yankee Stadium, New York la bie. Wɔ ɛkɛ ne, menyiale adiema bie mɔɔ hanle kɛ ɔbamaa me gyima mɔɔ ye ahatualɛ ne le kpalɛ la na ɔhanle kɛ mendu membɛla United States. Mɔɔ yɛhanle nwolɛ edwɛkɛ yɛhilele Gyihova wɔ asɔneyɛlɛ nu la, me nee Elly zile kpɔkɛ kɛ yɛnrɛyɛ gyima ne na yɛziale yɛhɔle Belgium kɛ yɛkaboa ekpunli ekyi ne mɔɔ wɔ Bastogne mɔɔ nolobɔlɛma kɛyɛ bulu a wɔ nu la. Wɔ ɛvolɛ ko anzi, yɛ nye liele kɛ yɛwole yɛ ra nrenyia Serge la. Mɔɔ yɛ alɔbɔlɛ la a le kɛ, mɔɔ Serge lile siane nsuu la ɔ nwo dole ye na ɔwule. Yɛhanle yɛ nyanelilɛ ne yɛhilele Gyihova wɔ asɔneyɛlɛ nu na ewudwazo nwo anyelazo ne maanle yɛ anwosesebɛ.

Wɔ October 1961, menyianle gyima bie mɔɔ ɔnrɛlie me mekɛ dɔɔnwo na ɔbamaa meahola meabɔ adekpakyelɛ gyima ne abo la. Kenle zɔhane ala, Belgium ɔfese sonvolɛ ne vɛlɛle me wɔ fonu zo. Ɔbizale me saa mebahola meazonle kɛ maangyebakyi sonvolɛ a (ɛnɛ bɛfɛlɛ ye maangyebakyi zo neavolɛ). Membizale ye kɛ, “Yɛnrɛhola yɛnrɛzonle kɛ adekpakyelɛma mekɛ ekyii kolaa na yɛabɔ gyimalilɛ fofolɛ ɛhye abo ɔ?” Ɔliele ɔdole nu kɛ yɛyɛ ye zɔ. Mɔɔ yɛyɛle adekpakyelɛ gyima ne siane mɔtwɛ la, yɛbɔle maangyebakyi zo neavolɛ gyima ne abo wɔ September 1962.

Wɔ ɛvolɛ nwiɔ anzi, bɛvɛlɛle yɛ kɛ yɛrazonle wɔ Brussels Bɛtɛle. Yɛbɔle gyima bo wɔ ɛkɛ wɔ October 1964. Gyimalilɛ fofolɛ ɛhye maanle yɛnyianle nyilalɛ dɔɔnwo. Mɔɔ Adiema Knorr rakpɔlale yɛ Bɛtɛle ne wɔ 1965 la, yeangyɛ bɛkpale me kɛ ɔfese sonvolɛ na ɔzinle me nwo. Nzinlii bɛvɛlɛle yɛ bɛmaanle yɛhɔle Geleade Sukulu mɔɔ tɔ zo 41 la bie. Adiema Knorr edwɛkɛ mɔɔ ɔhanle ye ɛvolɛ 13 mɔɔ ɛze ɛhɔ la ɛra nu! Yɛwiele sukulu ne la yɛziale yɛhɔle Belgium Bɛtɛle.

Kɛmɔ menzukoale mɛla nwo debie la ati, menyia nwolɛ adenle meboa memaa yɛho yɛlie fanwodi mɔɔ yɛlɛ yɛsonle yɛ Nyamenle ne la wɔ Europe nee ɛleka gyɛne wɔ ɛvolɛ dɔɔnwo anu. (Fel. 1:7) Ɛhye ɛmaa meyia arane mgbanyima mɔɔ wɔ maanle mɔɔ bo 55 la anu, ɛleka mɔɔ bɛva bɛ sa bɛdo yɛ gyima ne foa bie azo anzɛɛ ɔ muala azo la. Saa meyia arane mgbanyima ne mɔ a, menga kɛ mezukoa mɛla nwo debie, emomu meka kɛ “mele Nyamenle sonvolɛ.” Dahuu medua asɔneyɛlɛ  zo mekpondɛ adehilelɛ mefi Gyihova ɛkɛ ɔluakɛ meze kɛ “belemgbunli [anzɛɛ ndɛnebuavolɛ] ahonle le kɛ azudenle wɔ Gyihova asa anu. Ɔkile ye adenle ɔkɔ ɛleka biala mɔɔ Ɔkulo la.”—Mrɛ. 21:1.

Anwubielɛ ko mɔɔ metɛkakye la a le adwelie bie mɔɔ me nee Europe Maanle Mɛlalilɛ Ayia ne anu sonla bie lile la. Menzɛlɛle nwolɛ adenle fane dɔɔnwo kɛ mekulo kɛ me nee ye tendɛ, na nzinlii ɔliele ɔdole nu. Ɔhanle kɛ, “Mebamaa wɔ mitini nnu, mitini ko bɔbɔ ɛnrɛla zo.” Menzile me ti aze na membɔle ɔ bo kɛ meyɛ asɔne. Nrenyia ne ahonle dule ekyi na ɔbizale me debie mɔɔ melɛyɛ la. Memaanle me ti zo na menganle kɛ, “Ɛnee melɛyɛ Nyamenle mo ɔluakɛ ɛboka ye azonvolɛ ne mɔ anwo.” Ɔbizale me kɛ, “Boni a ɛkile a?” Membukele Wulomuma 13:4 mengilele ye. Ɛnee ɔkɔ asɔne ɔti Baebolo tɛkese ɛhye maanle ɔdiele me edwɛkɛ. Ɔti boni bieko a zile? Ɔ nee me bɔle adawu mitini 30, na yɛ adawubɔlɛ zɔhane hɔle boɛ. Ɔhanle bɔbɔ kɛ ɔ nye sɔ gyima mɔɔ Gyihova Alasevolɛ yɛ la kpalɛ.

Wɔ ɛvolɛ dɔɔnwo anu, Gyihova menli ɛli afoa biala mɔɔ yɛngyi, ngakula ɛtetelɛ, adwuledualɛ yɛɛ ninyɛne gyɛne nwo edwɛkɛ dɔɔnwo wɔ Europe kɔɔto ngakyile nu. Ɔle nwolɛ adenle kɛnlɛma mɔɔ menyianle memboale wɔ edwɛkɛ ɛhye mɔ anu dɔɔnwo anu a, na ɔmaanle medame mumua ne menwunle kɛzi Gyihova maanle yɛlile konim la. Gyihova Alasevolɛ ɛli konim wɔ edwɛkɛ mɔɔ bo 140 mɔɔ bɛlile wɔ Europe Kɔɔto Mɔɔ Nea Sonla Fanwodi Nwo Edwɛkɛ Zo anu la anu!

Nzinlii, me nee Adiema Philip Brumley mɔɔ ɛnee wɔ ewiade amuala gyima ne ati yɛɛ Adiema Valter Farneti mɔɔ ɛnee wɔ Italy la bɔle nu yɛle gyima amaa yɛaboa yɛ mediema mɔɔ wɔ Cuba la yɛamaa bɛanyia fanwodi ɔluakɛ ɛnee bɛva bɛ sa bɛdo yɛ gyima ne foa bie azo. Mengɛlɛle Cuba maanle agyakɛnugyinlavolɛ ne mɔɔ wɔ Belgium la kɛlata na yɛ nee arane nu kpanyinli ne mɔɔ bɛkpa ye kɛ ɔli yɛ edwɛkɛ ne nwo gyima la hɔyiale. Mɔlebɛbo ne, yɛangola yɛanziezie edwɛkɛ mɔɔ maanle arane ne lile mɛla zɔhane tiale yɛ la.

Mɔɔ yɛluale asɔneyɛlɛ zo yɛkpondɛle adehilelɛ yɛvile Gyihova ɛkɛ la anzi, yɛzɛlɛle arane ne kɛ ɔmaa yɛhɛla Baebolo yɛrɛla Cuba na bɛmaanle yɛ adenle bɛmaanle yɛhɛlale Baebolo 5,000. Yɛ sa hanle Baebolo ne na yɛhyɛle yɛmaanle mediema ne mɔ, ɔti yɛdele nganeɛ kɛ Gyihova ɛlɛyila yɛ mɔdenlebɔlɛ ne azo. Eza yɛzɛlɛle bɛ kɛ bɛmaa yɛhɛla Baebolo 27,500 bieko. Ɔdaye noko bɛmaanle yɛ adenle. Kɛmɔ yɛboale yɛ mediema mɔɔ wɔ Cuba la yɛmaanle awie biala nyianle ɔ ti anwo Baebolo la ati, ɔmaanle me nye liele kpalɛ.

 Mehɔ Cuba fane dɔɔnwo kɛ mekaboa meamaa yɛalie nwolɛ adenle wɔ arane ne ɛkɛ yɛayɛ yɛ gyima ne. Yemɔ ɛmaa me nee arane mgbanyima dɔɔnwo ɛnyia agɔnwolɛvalɛ kpalɛ bie.

Wɔ 1994, mekɛ mɔɔ ɛnee bɛlɛkuhu menli mɔɔ ka Tutsi aneɛ ne la wɔ Rwanda la, bɛhunle menli mɔɔ bo 1,000,000 la. Alɔbɔlɛ edwɛkɛ ne a le kɛ, bɛhunle yɛ mediema bie mɔ noko. Yeangyɛ biala bɛkpale mediema ekpunli bie kɛ bɛva moalɛ bɛhɔmaa yɛ mediema mɔɔ wɔ maanle ne anu la.

Mɔɔ yɛ ekpunli ɛdeɛ ne hɔdwule maanle ne suakpole Kigali azo la, yɛnwunle kɛ bɛtoto adu dɔɔnwo bɛfitifiti edwɛkɛbohilelɛ ɔfese ne nee ɛleka mɔɔ bɛkɛla yɛ mbuluku ne mɔ bɛgua la bane ne anu. Yɛdele yɛ mediema mɔɔ bɛpepɛle bɛ bɛhunle bɛ la anwo alɔbɔlɛ edwɛkɛ dɔɔnwo. Noko eza yɛdele kɛzi yɛ mediema ne mɔ lale nɔhalɛ ɛlɔlɛ ali hilele bɛ nwo la. Kɛ neazo la, yɛyiale adiema nrenyia bie mɔɔ ka Tutsi aneɛ mɔɔ Alasevolɛ abusua bie mɔɔ bɛka Hutu aneɛ la vale ye veale kuma bie anu too kenle 28 la. Wɔ ayia bie mɔɔ yɛyɛle ye wɔ Kigali la abo, yɛbɔle mɔdenle yɛgyinlanle Baebolo ne azo yɛkyekyele yɛ mediema mɔɔ bo 900 la arɛle.

Akee yɛpɛle yɛdɔle Zaire (ɛnɛ bɛfɛlɛ ye Democratic Republic of the Congo) kɛ yɛkakpondɛ yɛ mediema dɔɔnwo mɔɔ bɛvi Rwanda mɔɔ bɛnriandi bɛhɔ tutanema azokoɛleɛ ngakyile mɔɔ bikye suakpole Goma la. Ɛnee yɛnnwu bɛ ɔti yɛyɛle asɔne kɛ Gyihova ɛboa yɛ ɛmaa yɛnwu bɛ. Akee yɛnwunle kɛ awie ɛlɛba yɛ nwo ɛkɛ na yɛbizale ye saa ɔze Gyihova Alasevolɛ ne mɔ bie a. Ɔhanle kɛ, “Ɛhɛe, mele Dasevolɛ. Me nye balie nwo kɛ mebamaa bɛanwu moalɛ kɔmatii ne.” Mɔɔ yɛ nee moalɛ kɔmatii ne yɛle ayia bie mɔɔ maa anwosesebɛ la wiele la, yɛyiale mediema kɛyɛ 1,600; yɛkyekyele bɛ rɛle na yɛmaanle bɛ anwosesebɛ. Eza yɛgengale kɛlata bie mɔɔ Neazo Eku ne hɛlɛle bɛ la yɛhilele bɛ. Arɛlekyekyelɛ edwɛkɛ bie mɔɔ wɔ kɛlata ne anu mɔɔ mediema ne mɔ dele la hanle bɛ ahonle kpalɛ, ɔse: “Yɛyɛ asɔne yɛmaa bɛ dahuu. Yɛze kɛ Gyihova ɛnrɛkpo bɛ.” Neazo Eku ne edwɛkɛ ɛhye le nɔhalɛ bɔkɔɔ. Ɛnɛ, Alasevolɛ mɔɔ bo 30,000 la ɛlɛfa anyelielɛ azonle Gyihova wɔ Rwanda!

Mengyale Elly la, yɛdɛnlanle ɛvolɛ kɛyɛ 58, na wɔ 2011 me kulovolɛ Elly wule. Mɔɔ menganle me nyanelilɛ ne mengilele Gyihova wɔ asɔneyɛlɛ nu la, ɔkyekyele me rɛle. Eza Belemgbunlililɛ ne anwo edwɛkpa ne mɔɔ menganle mengilele awie mɔ la kyekyele me rɛle.

Mebo ɛvolɛ 90 ɛdeɛ, noko dapɛne biala mekɔka edwɛkpa ne mekile awie mɔ. Eza me nye die kɛ mekola meboa Legal Department ne mɔɔ wɔ Belgium Bɛtɛle ɛke, mefa me anwubielɛ ne meboa awie mɔ na meboa memaa bɛmaa mgbavolɛ nee mbɛlɛra mɔɔ wɔ Bɛtɛle abusua ne anu anwosesebɛ la.

Mekɛ mɔɔ limoa mɔɔ menyɛle asɔne la, ɛvolɛ kɛyɛ 84 ɛpɛ nu. Ɛnee ɔle ɛbɛlabɔlɛ kɛnlɛma mɔɔ maanle membikyele Gyihova dahuu la mɔlebɛbo. Ɔyɛ me anyelielɛ kɛ wɔ me ngoane mekɛ kɔsɔɔti anu Gyihova ɛdie me asɔneyɛlɛ la.—Edw. 66:19. b