YƐ NUHUA ko biala kulo kɛ bɛbu ye kɛ ɔle sonla kpalɛ. Noko, ɔnla aze kɛ yɛbala kpalɛyɛlɛ ali wɔ ewiade ye anu. Menli dɔɔnwo “ɛngulo kpalɛyɛlɛ.” (2 Tim. 3:3) Bie a bɛbali sonla ngyinlazo mɔɔ ɔlɛ ye wɔ kpalɛ nee ɛtane nwo la azo na bɛaha kɛ ‘kpalɛ le ɛtane yɛɛ ɛtane le kpalɛ.’ (Aye. 5:20) Eza ɔyɛ se kɛ yɛbayɛ kpalɛ ɔlua kɛzi bɛtetele yɛ nee yɛ sinlidɔlɛ ti. Yemɔti, bie a yɛbade nganeɛ kɛ Anne * mɔɔ ɛva ɛvolɛ dɔɔnwo ɛzonle Gyihova noko ɔhanle kɛ, “menlie menli kɛ mebahola meayɛ sonlakpalɛ” la.

Ɔyɛ anyelielɛ kɛ, yɛ muala yɛbahola yɛala kpalɛyɛlɛ ali. Ɔle Nyamenle sunsum nwuanzanwuanza ne ma, ye sunsum ne lɛ tumi tɛla ngyegyelɛ biala mɔɔ yɛlɛ la. Bɛmaa yɛzuzu mɔɔ kpalɛyɛlɛ kile nee kɛzi yɛbahola yɛala subane ɛhye ali kpalɛ la anwo.

Yɛka ye sikalɛ a, kpalɛyɛlɛ le subane mɔɔ maa awie yɛ mɔɔ le kpalɛ. Ɔkile ɛbɛla kpalɛ ɛbɔlɛ mɔɔ ngehanleɛ biala ɛnle nwo la. Saa yɛda kpalɛyɛlɛ ali a, ɔboa awie mɔ. Ninyɛne mgbalɛ mɔɔ bɛyɛ bɛboa awie mɔ la a maa bɛnwu subane kɛnlɛma ɛhye a.

Bie a wɔnwu ye kɛ menli ta yɛ ninyɛne mgbalɛ maa bɛ mbusua nee bɛ gɔnwo mɔ, noko asoo ɛke ala a ɔwɔ kɛ yɛ kpalɛyɛlɛ ne dwu ɔ? Nɔhalɛ nu, ɔyɛ a ɔyɛ se kɛ yɛbala subane ɛhye ali, ɔluakɛ Baebolo ne ka kɛ, “tenlenenli biala ɛnle azɛlɛ ye azo mɔɔ kpalɛ ngome ala a ɔyɛ na ɔnyɛ ɛtane ɛlɛ a.” (Nol. 7:20) Ɛzoanvolɛ Pɔɔlo hanle ye nɔhalɛ nu kɛ: “Meze kɛ wɔ me nu, kile kɛ, wɔ me nwonane nu, debie kpalɛ biala ɛnle nu.” (Wlo. 7:18) Yemɔti saa yɛkulo kɛ yɛnyia subane ɛhye a, ndelebɛbo wɔ nu kɛ yɛbahɔ ahenle mɔɔ le kpalɛyɛlɛ Ɛvileka la ɛkɛ.

Gyihova Nyamenle a fa kpalɛyɛlɛ nwo ngyinlazo maa a. Yɛkenga ye wɔ Gyihova anwo kɛ: “Ɛle kpalɛ yɛɛ [wɔ gyima le] kpalɛ; kilehile me wɔ mɛla ne mɔ.” (Edw. 119:68) Bɛmaa yɛzuzu Gyihova kpalɛyɛlɛ ne foa nwiɔ mɔɔ bɛha nwolɛ edwɛkɛ wɔ ɛke la anwo.

Gyihova le kpalɛ. Kpalɛyɛlɛ boka Gyihova subane nwo. Suzu mɔɔ zile wɔ mekɛ mɔɔ Gyihova hanle ɛhye hilele Mosisi la anwo, ɔhanle kɛ: “Mebamaa wɔanwu me kpalɛyɛlɛ ne amuala.” Mɔɔ Mosisi nwunle Gyihova anyunlunyia nee ye kpalɛyɛlɛ ne la, ɔdele edwɛkɛ ɛhye: “Medame a mele [Gyihova] a, [Gyihova] mɔɔ mele anwunvɔnezelɛ nee atiakunlukɛnlɛma Nyamenle, menva ɛya mgbane mgbane, yɛɛ ɛhulolɛ kpundii nee nɔhalɛlilɛ ɛyi me tɛkɛɛ. Me ɛhulolɛ kpole ne keda apenle apenle nwo zo. Mefa amumuyɛ, mɛladonlɛ yɛɛ ɛtane mekyɛ; noko ɛhye ɛngile kɛ menrɛdea bɛ.” (Ade. 33:19; 34:6, 7) Yɛlɛ debie mɔɔ maa yɛkola yɛka kɛ, Gyihova da kpalɛyɛlɛ ali wɔ debie biala mɔɔ ɔyɛ la anu a. Ɔwɔ nuhua kɛ Gyisɛse yɛle kpalɛyɛlɛ nwo neazo kɛnlɛma kɛ dasanli la ɛdeɛ, noko ɔhanle kɛ: “Awie biala ɛnle kpalɛ kɛ Nyamenle angomekye.”​—Luku 18:19.

Gyihova gyima le kpalɛ. Nyamenle da kpalɛyɛlɛ  ali wɔ debie biala mɔɔ ɔyɛ la anu. “[Gyihova] le kpalɛ maa awie biala, ye anwunvɔnezelɛ wɔ debie biala mɔɔ yebɔ la anwo zo.” (Edw. 145:9) Gyihova ɛnyɛ nyenyenu wɔ ye kpalɛyɛlɛ nwo, ɔmaa ngoane yɛɛ ɔmaa alesama nyia debie biala mɔɔ bamaa bɛadɛnla aze la. (Gyi. 14:17) Ɔda ye kpalɛyɛlɛ ne ali wɔ mekɛ mɔɔ ɔkɛva yɛ ɛtane ɔkɛhyɛ yɛ la. Edwɛndolɛnli ne hɛlɛle kɛ: “O [Gyihova], ɛle kpalɛ yɛɛ fakyɛ wɔ wɔ afoa.” (Edw. 86:5) Yɛbahola yɛanyia anwodozo kɛ, ‘Gyihova ɛnrɛva debie kpalɛ biala ɛnrɛvea bɛdabɛ mɔɔ bɛdi nɔhalɛ la.’​—Edw. 84:11.

Bɛbɔle yɛ kɛ Nyamenle ɛsaso, yemɔti yɛkola yɛyɛ menli mgbalɛ yɛɛ yɛkola yɛyɛ kpalɛ. (Mɔl. 1:27) Noko, Nyamenle Edwɛkɛ ne tu ye azonvolɛ folɛ kɛ ‘bɛzukoa kpalɛyɛlɛ.’ (Aye. 1:17) Kɛ ɔkɛyɛ na yɛazukoa kɛ yɛbayɛ kpalɛ ɛ? Suzu ndenle nsa mɔɔ yɛbahola yɛalua zo yɛayɛ ɛhye la anwo.

Mɔɔ limoa, yɛbahola yɛazɛlɛ sunsum nwuanzanwuanza ne mɔɔ boa Kilisienema ɔmaa bɛfi ahonle nu bɛda kpalɛyɛlɛ ali la. (Gal. 5:22) Ɛhɛe, Nyamenle sunsum ne bahola aboa yɛ amaa yɛahulo mɔɔ le kpalɛ na yɛahyi ɛtane. (Wlo. 12:9) Nɔhalɛ nu, Baebolo ne ka kɛ Gyihova bahola amaa “[yɛagyinla] kpundii wɔ gyima nee edwɛkɛ kpalɛ biala anu.”​—2 Tɛs. 2:16, 17.

Mɔɔ tɔ zo nwiɔ, ɔwɔ kɛ yɛkenga Nyamenle Edwɛkɛ ne. Saa yɛyɛ ye zɔ a, Gyihova bahola ahilehile yɛ wɔ “kpalɛyɛlɛ adenle kɔsɔɔti” anu na ‘yeaziezie yɛ yeamaa gyima kpalɛ biala.’ (Mrɛ. 2:9; 2 Tim. 3:17) Saa yɛkenga na yɛdwenledwenle nwolɛ a, ɔmaa yɛnwu Nyamenle nee ye ɛhulolɛdeɛ nwo edwɛkɛ dɔɔnwo. Ɛhye maa yɛnyia mɔɔ yɛbagyinla zo yɛazi kpɔkɛ wɔ mekɛ mɔɔ yɛhyia nwo la.​—Luku 6:45; Ɛfɛ. 5:9.

Mɔɔ tɔ zo nsa, yɛbɔ mɔdenle kɛ yɛbazukoa “mɔɔ le kpalɛ la.” (3 Dwɔn 11) Neazo dɔɔnwo wɔ Baebolo ne anu mɔɔ yɛbahola yɛazukoa a. Nɔhalɛ nu, Gyihova nee Gyisɛse a ɛyɛ neazo mɔɔ di munli a. Noko, eza yɛbahola yɛazuzu menli gyɛne mɔɔ bɛha bɛ nwo edwɛkɛ kɛ bɛlale kpalɛyɛlɛ ali la anwo. Bɛ nuhua nwiɔ mɔɔ ba adwenle nu la a le Tabeta nee Baanabase. (Gyi. 9:36; 11:22-24) Saa ɛkenga bɛ nwo edwɛkɛ nee mɔɔ bɛyɛle bɛboale awie mɔ la a, ɔbaboa ɛdawɔ noko. Nyia mekɛ suzu kɛzi ɛbahola wɔayɛ ninyɛne wɔaboa wɔ abusua anzɛɛ wɔ asafo ne anu amra la anwo. Eza kakye kɛzi menli nwiɔ zɔhane nyianle bɛ kpalɛyɛlɛ ne azo nvasoɛ la. Ɛdawɔ noko ɛbahola wɔanyia zɔhane nyilalɛ ne bie.

Eza yɛbahola yɛazuzu yɛ mekɛ ye azo menli  mɔɔ lale kpalɛyɛlɛ ali la neazo ne mɔ anwo. Kɛ neazo la, suzu asafo nu mgbanyima mɔɔ yɛ gyima ɛsesebɛ na ‘bɛkulo kpalɛyɛlɛ’ la anwo nea. Yɛkakye mediema mraalɛ noko mɔɔ bɛfa bɛ edwɛkɛ nee bɛ neazo ‘bɛkilehile mɔɔ le kpalɛ’ la. (Tae. 1:8; 2:3) Adiema raalɛ bie mɔɔ bɛfɛlɛ ye Roslyn la ka kɛ: “Me gɔnwo bie bɔ mɔdenle boa asafo ne anu amra na ɔmaa bɛ anwosesebɛ. Ɔdwenle bɛ tɛnlabelɛ nwo na ɔfa ahyɛlɛdeɛ ngyikyi ɔmaa bɛ anzɛɛ ɔboa bɛ wɔ ndenle gyɛne zo. Menwu ye kɛ amgba ɔle sonla kpalɛ.”

Gyihova maa yɛ anwosesebɛ kɛ yɛyɛ “mɔɔ le kpalɛ la.” (Emɔso 5:14) Saa yɛyɛ zɔ a, yɛbahulo Gyihova ngyinlazo ne mɔ na yɛamia kpɔkɛ mɔɔ yɛbɔ kɛ yɛyɛ mɔɔ le kpalɛ la anu.

Ɔnle kɛ yɛnyia adwenle kɛ kpalɛyɛlɛ kile kɛ yɛbayɛ ninyɛne mgbole anzɛɛ yɛbabɔ afɔle mgbole bie. Ɛnea a awie mɔɔ dɔlɔ nvoninli la bahola ava brush ne abɔ paint ne anu ko ala na yeava yeadɔlɔ nvoninli ne amuala yeawie ɔ? Kyɛkyɛ. Emomu, kyesɛ ɔfa brush ne ɔbɔ paint ne anu ngyikyi ngyikyi fane dɔɔnwo na yeahola yɛadɔlɔ nvoninli ne yeawie. Zɔhane ala a, ninyɛne ngyikyi dɔɔnwo mɔɔ yɛyɛ yɛboa awie mɔ la maa bɛnwu yɛ kpalɛyɛlɛ ne a.

Baebolo ne tu yɛ folɛ kɛ “yɛziezie” yɛ nwo yɛzie kɛ yɛbayɛ kpalɛ. (2 Tim. 2:21; Tae. 3:1) Saa yɛbɔ mɔdenle yɛnwu tɛnlabelɛ mɔɔ awie mɔ wɔ nu la a, ɔbamaa yɛakpondɛ adenle yɛalua zo yɛayɛ mɔɔ ‘sɔ yɛ gɔnwo anye wɔ ye boɛlilɛ ti, yɛava yɛamaa ye anwosesebɛ.’ (Wlo. 15:2) Bie a yɛbahola yɛava debie mɔɔ yɛlɛ la bie yɛamaa bɛ. (Mrɛ. 3:27) Bie a yɛbahola yɛamaa awie arali aleɛ wɔ yɛ sua nu na yɛalie yɛ nye. Saa yɛze awie mɔɔ ɛnde kpɔkɛ a, yɛbahola yɛahɛlɛ ye kɛlata, yɛahɔkpɔla ye anzɛɛ yɛavɛlɛ ye. Ɛhɛe, bie a yɛbava nwolɛ adenle biala mɔɔ yɛbanyia la yɛaha “edwɛkɛ kpalɛ mɔɔ hyia na ɔmaa anwosesebɛ, [yɛɛ] nvasoɛ wɔ zo maa bɛdabɛ mɔɔ bɛtie la.”​—Ɛfɛ. 4:29.

Yɛyɛ kpalɛ yɛmaa awie biala yɛfa yɛsukoa Gyihova. Yemɔti yɛnyɛ nyeyenu. Adenle titili ko a le kɛ, yɛbabɔ Belemgbunlililɛ edwɛkpa ne nolo yɛahile menli kɔsɔɔti. Kɛ mɔɔ Gyisɛse hanle la, yɛyɛ kpalɛ yɛmaa menli bɔbɔ mɔɔ bɛkpɔ yɛ la. (Luku 6:27) Ɔnle ɛtane kɛ ɛbala atiakunlukɛnlɛma ali na wɔayɛ kpalɛ wɔamaa awie mɔ, ɔluakɛ “mɛla biala ɛntia ɛhye mɔ.” (Gal. 5:22, 23) Saa bɛdwazo bɛtia yɛ bɔbɔ na yɛda subane kpalɛ ali a, ɔmaa menli ba nɔhalɛ ne anu na bɛye Nyamenle ayɛlɛ.​—1 Pita 3:16, 17.

“Mɔɔ di boɛ la banyia ye nyɛleɛ kpalɛ nwo ahatualɛ.” (Mrɛ. 14:14) Ahatualɛ ne bie a le boni? Saa yɛyɛ kpalɛ yɛmaa awie mɔ a, bɛdabɛ noko bɛ nee yɛ di ye boɛ. (Mrɛ. 14:22) Saa bɛanyɛ zɔ bɔbɔ a, nzinlii yɛ kpalɛyɛlɛ ne bamaa bɛagyakyi dwazotia mɔɔ bɛfa bɛba yɛ nwo zo la.​—Wlo. 12:20.

Menli dɔɔnwo ɛnwu ye kɛ, bɛnyianle nyilalɛ wɔ mekɛ mɔɔ bɛhyile ɛtane na bɛyɛle mɔɔ le kpalɛ la. Fa Nancy anwubielɛ ne kɛ neazo. Ɔka kɛ: “Mɔɔ melɛnyi la, ɛnee saa melɛyɛ debie a mendwenle nwo, membɔle nla nu ɛbɛlatane yɛɛ ɛnee membu debie. Noko, mekɛ mɔɔ membɔle ɔ bo kɛ mesukoa Nyamenle ngyinlazo na meava meabɔ me ɛbɛla la, me nye bɔle ɔ bo kɛ ɔdie. Kɛkala mebu me nwo yɛɛ bɛdi me eni.”

Debie titili mɔɔ ɔti ɔwɔ kɛ yɛda kpalɛyɛlɛ ali la a le kɛ, ɔmaa Gyihova anye die. Saa menli dɔɔnwo bɔbɔ annwu ye a, Gyihova nwu ye. Ɔze debie kpalɛ biala mɔɔ yɛyɛ nee mɔɔ yɛdwenle nwo la. (Ɛfɛ. 6:7, 8) Duzu a bavi nu ara a? “Sonlakpalɛ biala sɔ [Gyihova] anye.” (Mrɛ. 12:2) Yemɔti bɛmaa yɛhɔ zo yɛla kpalɛyɛlɛ ali. Ɔluakɛ, Gyihova ɛbɔ ɛwɔkɛ kɛ, “anyunlunyia nee enililɛ yɛɛ anzodwolɛ wɔ ɛkɛ maa awie biala mɔɔ yɛ kpalɛ la.”​—Wlo. 2:10.