1. Kɛ mɔɔ Mateyu 24:9 kile la, duzu ati a saa ewiade ne kpɔ yɛ a ɔnle kɛ ɔsi yɛ nwo a?

GYIHOVA bɔle yɛ kɛ yɛla ɛlɔlɛ ali yɛhile awie mɔ na awie mɔ noko ɛla ɛlɔlɛ ali ɛhile yɛ. Ɛhye ati saa awie kpɔ yɛ a, ɔmaa yɛdi nyane na bie bɔbɔ a, ɔmaa ɛzulolɛ ka yɛ. Kɛ neazo la, adiema raalɛ bie mɔɔ bɛfɛlɛ ye Georgina mɔɔ ɔde Europe la hanle kɛ: “Mɔɔ menlile ɛvolɛ 14 la, me mame kpɔle me ɔluakɛ melɛsonle Gyihova la ati. Mendele nganeɛ kɛ yekpo me na menyianle adwenle kɛ bie menle sonla kpalɛ.” * Adiema nrenyia bie mɔɔ bɛfɛlɛ ye Danylo la hɛlɛle kɛ: “Mɔɔ sogyama bole me, bɛbɔle me aholoba na bɛnwunlonwunlanle me ɔluakɛ mele Gyihova Dasevolɛ la ati la, me ahonle dule kpalɛ na mendele nganeɛ kɛ bɛgua me nyunlu aze.” Ɛkpɔlɛ zɛhae yɛ nyane noko ɔnyɛ yɛ azibɛnwo. Gyisɛse hanle kɛ bɛbakpɔ yɛ.​—Kenga Mateyu 24:9.

2-3. Duzu ati a bɛkpɔ Gyisɛse ɛdoavolɛma a?

² Ewiade ne kpɔ Gyisɛse ɛdoavolɛma. Duzu ati ɔ? Ɔluakɛ yɛle kɛ Gyisɛse la, yɛnle “ewiade ne afoa.” (Dwɔn 15:17-19) Ɔti ɔnva nwo kɛ yɛbu alesama arane ne mɔ la, yɛnzonle bɛ anzɛɛ bɛ sɛkɛlɛneɛ ne mɔ. Yɛsonle Gyihova angomekye. Yɛdie yɛto nu kɛ Nyamenle a lɛ adenle nea alesama anwo zo a, noko Seetan nee ɔ ‘ra’ ne ɛnlie nwolɛ adenle ɛhye mɔɔ ɔlɛ la ɛndo nu. (Gyn. 3:1-5, 15) Yɛbɔ nolo kɛ Nyamenle Belemgbunlililɛ ne a le alesama anyelazo kokye a na ɔnrɛhyɛ, Belemgbunlililɛ ne bazɛkye menli mɔɔ dwazo tia ye la kɔsɔɔti. (Dan. 2:44; Yek. 19:19-21) Edwɛkɛ zɔhane le edwɛkpa maa bɛlɛvoma noko ɔle edwɛkɛ ɛtane ɔmaa amumuyɛma.​—Edw. 37:10, 11.

³ Eza kɛ mɔɔ yɛfa Nyamenle tenlene ngyinlazo ne mɔ yɛbɔ yɛ ɛbɛla la ati bɛkpɔ yɛ. Ngyinlazo ɛhye mɔ le ngakyile kolaa fi  ewiade ne ɛbɛla mɔɔ ɛkpɔlɔ bɔkɔɔ la anwo. Kɛ neazo la, ɛnɛ menli dɔɔnwo die nla nu ɛbɛlatane mɔɔ ɛnle kpalɛ fee mɔɔ le kɛ mɔɔ Sodɔm nee Gomɔlama bɔle a Nyamenle zɛkyele bɛ la to nu! (Dwu. 7) Kɛ mɔɔ yɛdi Baebolo ngyinlazo mɔɔ fale ɛbɛla ɛhye mɔ anwo la azo la ati, menli dɔɔnwo golo yɛ nwo na bɛka kɛ yɛle kyengye.​—1 Pita 4:3, 4.

4. Saa awie mɔ kpɔ yɛ a subane boni mɔ a baboa yɛ yeamaa yɛagyinla kpundii a?

⁴ Saa awie mɔ kpɔ yɛ na bɛbɔ yɛ aholoba a, duzu a baboa yɛ amaa yɛagyinla kpundii a? Ɔwɔ kɛ yɛnyia diedi kɛ Gyihova baboa yɛ. Yɛ diedi ne le kɛ enyinlike la, ɔkola ɔnua “amumuyɛnli ne ɛda ne mɔ mɔɔ ɛlɛsɔ la amuala.” (Ɛfɛ. 6:16) Noko saa yɛnyia diedi a ɛnee ɔtɛwiele. Eza yɛhyia ɛlɔlɛ nwo. Duzu ati ɔ? Ɔluakɛ ɛlɔlɛ ‘ɛnva ɛya ndɛndɛ.’ Ɔto ɔ rɛle aze wɔ ninyɛne mɔɔ yɛ nyane la anu yɛɛ ɔgyinla ɔ muala anloa. (1 Kɔl. 13:4-7, 13) Akee bɛmaa yɛnlea kɛzi ɛlɔlɛ mɔɔ yɛbanyia yɛamaa Gyihova, yɛ mediema diedima nee yɛ agbɔvolɛ bɔbɔ la baboa yɛ yeamaa yɛagyinla ɛkpɔlɛ nloa la.

5. Duzu a ɛlɔlɛ mɔɔ Gyisɛse lɛ maa ɔ Ze la maanle ye anwosesebɛ maanle ɔyɛle a?

⁵ Nɔe ne mɔɔ aleɛ kye a Gyisɛse agbɔvolɛ bahu ye la, ɔhanle ɔhilele ye ɛdoavolɛma mɔɔ di nɔhalɛ la kɛ: “Mekulo Selɛ ne [ɔti] melɛyɛ mɔɔ Selɛ ne ɛha ɛhile me kɛ menyɛ la ala.” (Dwɔn 14:31) Ɛlɔlɛ mɔɔ Gyisɛse lɛ maa Gyihova la maanle ye anwosesebɛ maanle ɔgyinlanle sɔnea mɔɔ ɛnee la ɔ nyunlu la anloa. Ɛlɔlɛ mɔɔ yɛlɛ yɛmaa Gyihova la bahola aboa yɛdayɛ noko yɛamaa yɛagyinla sɔnea nloa.

6. Kɛ mɔɔ Wulomuma 5:3-5 kile la, kɛzi Gyihova azonvolɛ bu ɛkpɔlɛ ɛ?

⁶ Nyamenle anwo ɛlɔlɛ mɔɔ Gyihova azonvolɛ lɛ la ɛboa bɛ ɛmaa bɛgyinla dwazotia nloa dahuu. Kɛ neazo la, mɔɔ Dwuuma kɔɔto kpole ne duale ɛzoanvolɛma ne kɛ bɛmmabɔ edwɛkpa ne nolo la, ɛlɔlɛ mɔɔ bɛlɛ bɛmaa Nyamenle la hanle bɛ maanle bɛdiele “Nyamenle kɛ tumivolɛ na tɛ menli ɔ.” (Gyi. 5:29; 1 Dwɔn 5:3) Nyamenle anwo ɛlɔlɛ ɛhye noko boa yɛ mediema maa bɛgyinla ɛkpɔlɛ mɔɔ arane mɔɔ ati yɛ se na bɛlɛ tumi fa ba bɛ nwo zo la anloa. Saa ewiade ne kpɔ yɛ a, yɛmmaa yɛ sa nu ɛndo, emomu yɛbu ye kɛ ɔle nwolɛ adenle mɔɔ yɛnyia kɛ yɛbagyinla ɔ nloa.​—Gyi. 5:41; kenga Wulomuma 5:3-5.

7. Saa yɛ mbusuafoɔ dwazo tia yɛ a, duzu a ɔwɔ kɛ yɛyɛ a?

⁷ Saa yɛ mbusuafoɔ dwazo tia yɛ a, bie a ɔbayɛ se kɛ yɛbahola yɛagyinla ɔ nloa. Saa yɛbɔ ɔ bo kɛ yɛsukoa Gyihova anwo debie a, bie a yɛ mbusuafoɔ bie mɔ badwenle kɛ bɛbɛlɛbɛla yɛ. Wɔannea a bie mɔ noko badwenle kɛ yɛlɛsɛ. (Fa toto Maake 3:21 anwo.) Bie a bɛbadwazo bɛatia yɛ ɛsesebɛ. Noko ɔnle kɛ ɛhye si yɛ nwo. Gyisɛse hanle kɛ: “Sonla agbɔvolɛ bayɛ ye sua nu amra.” (Mat. 10:36) Noko ɔnva nwo mɔɔ yɛ mbusuafoɔ bava ayɛ yɛ biala la, yɛnrɛbu bɛ kɛ bɛle yɛ agbɔvolɛ. Nɔhalɛ ne a le kɛ, saa ɛlɔlɛ mɔɔ yɛlɛ yɛmaa Gyihova la ɛlɛyɛ kpole a, ɔbamaa ɛlɔlɛ mɔɔ yɛlɛ yɛmaa menli la ayɛ kpole. (Mat. 22:37-39) Noko yɛnrɛbu yɛ nye yɛnrɛgua mɛla nee ngyinlazo mɔɔ wɔ Baebolo ne anu la azo amaa menli anye alie yɛ nwo.

8-9. Mɔɔ bɛdwazole bɛtiale adiema raalɛ bie ɛsesebɛ la, duzu a boale ye maanle ɔgyinlanle kpundii a?

⁸ Georgina mɔɔ yɛlimoa yɛha ɔ nwo edwɛkɛ la bɔle mɔdenle gyinlanle kpundii ɔnva nwo kɛ ye mame dwazole tiale ye ɛsesebɛ la. Georgina hilehilele nu kɛ: “Me nee me mame a bɔle ɔ bo kɛ yɛ nee Alasevolɛ ne mɔ sukoa Baebolo ne a. Noko siane nsia anzi mɔɔ ɛnee mekulo kɛ mekɔ debiezukoalɛ la, me mame subane hakyile bɔkɔɔ. Menwunle kɛ ɛnee ɔtie kpɔkyevolɛma edwɛkɛ, na ɔ nee me ɛlɛtendɛ a bɛ  adalɛ edwɛkɛ ne bie ala a ɔka a. Ɛnee eza ɔbɔ me aholoba, ɔtudu me ti enrinli ne, ɔmia me kɔmenzia yɛɛ ɔfuandi me mbuluku ne mɔ ɔgua ye lɔ. Mɔɔ menlile ɛvolɛ 15 la, bɛzɔnenle me. Me mame bɔle mɔdenle kɛ ɔmaa meagyakyi Gyihova ɛzonlenlɛ, ɔti ɔvale me ɔhɔle ɛleka bie mɔɔ ngakula mraalɛ mɔɔ te atua la a wɔ ɛkɛ la. Ɛnee bɛ nuhua bie mɔ no nyiletane yɛɛ bie mɔ yɛ basabasa. Saa awie mɔɔ ɔwɔ kɛ ɔkulo wɔ na ɔnea wɔ la dwazo tia wɔ a, ɔ nloa ɛgyinlanlɛ ɛnla aze fee.”

⁹ Duzu a boale Georgina maanle ɔ gyinlanle ɔ nloa a? Ɔhanle kɛ: “Kenle ko ne mɔɔ mengengale Baebolo ne amuala menwiele la, kenle zɔhane a me mame dwazole tiale me a. Ɛnee menyia anwodozo bɔkɔɔ kɛ menwu nɔhalɛ ne na mendele nganeɛ kɛ mebikye Gyihova kpalɛ. Ɛnee meta meyɛ asɔne na ɔdiele me. Mɔɔ ɛnee mewɔ ɛleka mɔɔ me mame vale me hɔle la, adiema raalɛ bie dole ɛsalɛ vɛlɛle me wɔ ye sua nu na yɛbɔle nu yɛzukoale Baebolo ne. Wɔ zɔhane mekɛ ne anu, saa yɛkɔ debiezukoalɛ a, mediema ne mɔ maa me anwosesebɛ. Biala bule me kɛ meboka ye abusua ne anwo. Menwunle ye bɔkɔɔ kɛ Gyihova anwo yɛ se tɛla menli mɔɔ dwazo tia yɛ la, ɔnva nwo kɛzi bɛde la.”

10. Duzu a yɛlɛ anwodozo kɛ Gyihova yɛ Nyamenle ne bayɛ amaa yɛ dahuu a?

¹⁰ Ɛzoanvolɛ Pɔɔlo hɛlɛle kɛ debie biala “ɛnrɛhola ɛnrɛhwe yɛ ɛnrɛvi Nyamenle ɛlɔlɛ ne mɔɔ wɔ yɛ Awulae Kelaese Gyisɛse anu la anwo.” (Wlo. 8:38, 39) Bie a yɛbanwu amaneɛ wɔ mekɛ bie anu noko Gyihova nee yɛ balua dahuu, ɔbakyekye yɛ rɛle na yeamaa yɛ anwosesebɛ. Na kɛ mɔɔ Georgina anwubielɛ ne maa yɛnwu ye la, eza Gyihova dua yɛ mediema mɔɔ wɔ asafo ne anu la anwo zo boa yɛ.

11. Kɛzi ɛlɔlɛ mɔɔ Gyisɛse hanle nwolɛ edwɛkɛ wɔ Dwɔn 15:12, 13 la baboa ye ɛdoavolɛma ɛ? Maa neazo.

¹¹ Nɔe ne mɔɔ aleɛ kye a Gyisɛse bawu la, ɔhakyele ye ɛdoavolɛma ne kɛ bɛhulo bɛ nwo ngoko. (Kenga Dwɔn 15:12, 13.) Ɛnee ɔze kɛ tunwomaa ɛlɔlɛ baboa bɛ yeamaa bɛayɛ ko na bɛagyinla ɛkpɔlɛ mɔɔ ewiade ne fa ba bɛ nwo zo la anloa. Suzu neazo mɔɔ asafo mɔɔ wɔ Tɛsalonaeka la yɛle la anwo. Mɔɔ bɛdele asafo ne ala la, menli mɔɔ wɔ nu la yiale ɛkpɔlɛ. Noko mediema mɔɔ wɔ ɛkɛ la yɛle nɔhalɛlilɛ nee ɛlɔlɛ nwo neazo. (1 Tɛs. 1:3, 6, 7) Pɔɔlo maanle bɛ anwosesebɛ kɛ bɛhɔ zo bɛla ɛlɔlɛ ali na “bɛyɛ bɛmaa ɔbo zo” bɔbɔ. (1 Tɛs. 4:9, 10) Ɛlɔlɛ  baha bɛ yeamaa bɛakyekye mɔɔ arɛle ɛbɔ la arɛle na bɛaboa mɔɔ ɛyɛ bɛtɛɛ la. (1 Tɛs. 5:14) Bɛlile Pɔɔlo adehilelɛ ne azo ɔluakɛ wɔ ye kɛlata ne mɔɔ tɔ zo nwiɔ mɔɔ ɔhɛlɛle ye wɔ kɛyɛ ɛvolɛ ko anzi la anu, ɔholale ɔhanle ɔhilele bɛ kɛ: “Bɛ ɛlɔlɛ mɔɔ bɛ nuhua ko biala lɛ ye wɔ ɔ gɔnwo anwo la ɛlɛyɛ kpole.” (2 Tɛs. 1:3-5) Bɛ ɛlɔlɛ ne boale bɛ maanle bɛgyinlanle tɛnlabelɛ mɔɔ anu yɛ se nee dwazotia nloa.

12. Mekɛ bie mɔɔ konle zile maanle bie anu la, kɛzi mediema mɔɔ wɔ ɛkɛ la lale ɛlɔlɛ ali hilele bɛ nwo ɛ?

¹² Suzu Danylo mɔɔ yɛlimoa yɛha ɔ nwo edwɛkɛ la nee ɔ ye anwubielɛ ne anwo. Mɔɔ konle mɔɔ zile maanle ne anu la bie dwule bɛ sua ne azo la, bɛhɔle debiezukoalɛ dahuu. Bɛyɛle biala mɔɔ bɛbahola la wɔ daselɛlilɛ nu na bɛ nee bɛ mediema hyɛle aleɛ mɔɔ bɛlɛ la. Noko kenle ko bie, sogyama mɔɔ dedɛ adu la rale Danylo sua nu ɛkɛ. Danylo hanle kɛ: “Bɛhanle bɛtinlinle zo kɛ menlie mendo nu kɛ menle Dasevolɛ bieko. Kɛ mɔɔ meanyɛ la ati, bɛbole me na bɛyɛle kɛ bɛto me etu, na bɛdole etu ne bɔbɔ bɛvale me ti zo. Kolaa na bɛavi ɛkɛ ne la, bɛhanle kɛ bɛbazia bɛara na bɛahye me ye bɛ nee ye ala. Noko ndɛndɛ ne ala yɛ mediema ne mɔ maanle yɛvole keteke yɛhɔle sua fofolɛ zo. Me rɛle ɛnrɛvi ɛlɔlɛ mɔɔ mediema zɔhane mɔ lale ye ali hilele yɛ la ɛlɛ. Mɔɔ yɛhɔdwule sua fofolɛ ne azo la, mediema mɔɔ wɔ ɛkɛ la maanle yɛ aleɛ na bɛboale yɛ bɛmaanle yɛnyianle gyima nee sua! Ɛhye maanle yɛholale yɛliele mediema mɔɔ bɛdabɛ noko bɛlɛnriandi bɛavi ɛleka mɔɔ konle ne wɔ la.” Anwubielɛ ɛhye mɔ maa ɔda ali kɛ ɛlɔlɛ mɔɔ yɛlɛ yɛmaa yɛ nwo la kola boa yɛ maa yɛgyinla ɛkpɔlɛ nloa.

13. Saa menli kpɔ yɛ a, kɛzi sunsum nwuanzanwuanza ne boa yɛ maa yɛkɔ zo yɛsonle Gyihova ɛ?

¹³ Gyisɛse hanle hilele ye ɛdoavolɛma kɛ bɛhulo bɛ kpɔvolɛma. (Mat. 5:44, 45) Asoo ɛhye ɛyɛlɛ la aze? Kyɛkyɛ, ɔnla aze fee! Noko ɔlua Nyamenle sunsum nwuanzanwuanza ne moalɛ zo yɛbahola yɛayɛ. Nyamenle sunsum ne ma ne bie a le ɛlɔlɛ, abotane, atiakunlukɛnlɛma, mɛlɛbɛnwoaze yɛɛ bɛnwozohomonlɛ. (Gal. 5:22, 23) Subane ɛhye mɔ boa yɛ maa yɛgyinla ɛkpɔlɛ nloa. Menli mɔɔ dwazo tia yɛ la dɔɔnwo ɛhakyi bɛ subane ɔluakɛ bɛ hu, bɛ ye, bɛ ra anzɛɛ awie mɔɔ de bɛ kpalɛzo mɔɔ le diedinli la lale zɔhane subane kpalɛ ne mɔ bie ali hilele bɛ la ati. Bɛ nuhua dɔɔnwo  bɔbɔ ɛrayɛ yɛ mediema. Yemɔti saa ɔyɛ se kɛ ɛbahulo menli mɔɔ kɛmɔ ɛlɛsonle Gyihova la ati bɛkpɔ wɔ la a, sɛlɛ ye kɛ ɔmaa wɔ sunsum nwuanzanwuanza. (Luku 11:13) Na nyia anwodozo bɔkɔɔ kɛ Nyamenle ndenle le kpalɛ dahuu.​—Mrɛ. 3:5-7.

14-15. Kɛzi Wulomuma 12:17-21 boale Yasmeen maanle ɔlale ɛlɔlɛ ali ɔhilele ɔ hu ɔnva nwo kɛ ɔkpɔle ye ɛsesebɛ la ɛ?

¹⁴ Suzu Yasmeen mɔɔ ɔde Middle East la neazo ne anwo. Mɔɔ ɔrayɛle Gyihova Dasevolɛ la, ɔ hu nyianle adwenle kɛ bɛbɛlɛbɛla ye na ɔbɔle mɔdenle kɛ ɔmaa yeagyakyi Gyihova ɛzonlenlɛ. Ɔbɔle ye aholoba na ɔhanle ɔhilele ye mbusuafoɔ, ɛsɔfo bie yɛɛ silikyevolɛ bie kɛ bɛnwunlonwunla ye na bɛdo ye ɛzonle kɛ ɔlɛsɛkye ye abusua ne. Mekɛ bie mɔɔ bɛhɔle debiezukoalɛ la, ɔ hu hɔle ɛkɛ ne bɔbɔ hɔbɔle mediema ne mɔ aholoba! Ɛnee Yasmeen ta su ɔluakɛ ɛnee ɔ hu nee ye ɛnli ye boɛ.

¹⁵ Saa Yasmeen kɔ debiezukoalɛ a, mediema ne mɔ kyekye ɔ rɛle na bɛmaa ye anwosesebɛ. Mgbanyima ne mɔ maanle ye anwosesebɛ kɛ ɔva edwɛkɛ mɔɔ wɔ Wulomuma 12:17-21 la ɔli gyima. (Kenga.) Yasmeen hanle kɛ: “Ɛnee ɔnla aze. Noko menzɛlɛle Gyihova kɛ ɔboa me na menyɛle biala mɔɔ mebahola la menvale mɔɔ Baebolo ne ka la menyɛle gyima. Yemɔti saa me hu anye fuu yɛ egyaade ɛkɛ ne ɛnwea a, mekpoa. Ɔbɔ me aholoba a, metendɛ bɛtɛɛ mekile ye. Na mɔɔ ɔ nwo dole ye la, meneanle ye.”

16-17. Duzu a ɛsukoa ɛfi Yasmeen neazo ne anu a?

¹⁶ Kɛ mɔɔ Yasmeen lale ɛlɔlɛ ali hilele ɔ hu la ati, debie kpalɛ vile nu rale. Ɔhanle kɛ: “Akee me hu liele me lile kpalɛ ɔluakɛ ɔze kɛ mebaha nɔhalɛ dahuu. Saa yɛlɛka Nyamenle ɛzonlenlɛ nwo edwɛkɛ a, ɔtie me kpalɛ na ɔliele ɔdole nu kɛ ɔnrɛyɛ basabasa bieko wɔ sua nu. Kɛkala ɔmaa me anwosesebɛ kɛ anrɛɛ mengɔ debiezukoalɛ. Me nee me hu avinli ɛyɛ kpalɛ yɛɛ anzodwolɛ ɛra sua nu. Me nye la kɛ me hu bazukoa Gyihova anwo debie na yɛabɔ nu yɛazonle ye.”

¹⁷ Yasmeen neazo ne maa ɔda ali kɛ ɛlɔlɛ to “ɔ rɛle aze wɔ debie biala anu, . . . ɔlɛ debie biala anu anyelazo, ɔgyinla debie biala anloa.” (1 Kɔl. 13:4, 7) Ɛkpɔlɛ anloa kola yɛ se na ɔyɛ nyane, noko ɛlɔlɛ anwo yɛ se kpalɛ tɛla ye. Ɛlɔlɛ kola maa menli kakyi bɛ adwenle. Yɛɛ yɛda ɛlɔlɛ ali a ɔmaa Gyihova anye die. Noko saa dwazotiama kɔ zo kpɔ yɛ bɔbɔ a, yɛ nye bahola alie. Adenle boni azo?

18. Saa bɛkpɔ yɛ a, duzu ati a yɛ nye bahola alie a?

¹⁸ Gyisɛse hanle kɛ: “Anyelielɛ ɛha bɛ wɔ mekɛ mɔɔ menli kɛkpɔ bɛ” la. (Luku 6:22) Tɛ yɛdayɛ a yɛse bɛkpɔ yɛ a. Yɛɛ yɛngulo kɛ bɛkpɔ yɛ ɔlua yɛ diedi ne ati. Ɔti saa bɛkpɔ yɛ a duzu ati a yɛ nye bahola alie a? Suzu ninyɛne nsa bie anwo. Mɔɔ limoa, saa yɛgyinla nu a, yɛnyia Nyamenle anyunlu ɛlolɛ. (1 Pita 4:13, 14) Mɔɔ tɔ zo nwiɔ, ɔmaa yɛ diedi ne di munli na nuhua mia kpalɛ. (1 Pita 1:7) Yɛɛ mɔɔ tɔ zo nsa, yɛbanyia ahatualɛ mɔɔ tɛla biala​—dahuu ngoane.​—Wlo. 2:6, 7.

19. Mekɛ mɔɔ bɛbole ɛzoanvolɛma ne la, duzu ati a bɛ nye liele a?

¹⁹ Mɔɔ bɛdwazole Gyisɛse la, yeangyɛ ɛzoanvolɛma ne nyianle anyelielɛ mɔɔ Gyisɛse hanle nwolɛ edwɛkɛ la bie. Mɔɔ bɛbole bɛ na bɛduale bɛ kɛ bɛmmaka edwɛkɛ ne la, bɛlile fɛlɛko. Duzu ati ɔ? “Ɔluakɛ bɛbule bɛ kɛ [Gyisɛse] duma ne ati ɔfɛta kɛ bɛgua bɛ nyunlu aze.” (Gyi. 5:40-42) Kɛzi ɛnee bɛkulo bɛ Menle ne la le kpole tɛla kɛzi ɛnee bɛsulo bɛ agbɔvolɛ ne mɔ la. Na bɛluale edwɛkpa ne mɔɔ bɛbɔle ye nolo “mɔɔ bɛangyakyi” la azo bɛhilele kɛzi bɛkulo bɛ Menle ne la. Ɛnɛ, yɛ mediema dɔɔnwo yia ngyegyelɛ, noko bɛkɔ zo bɛfa nɔhalɛlilɛ bɛsonle Nyamenle. Bɛze kɛ Gyihova arɛle ɛnrɛvi gyima mɔɔ bɛyɛle nee ɛlɔlɛ mɔɔ bɛlale ye ali wɔ ye duma ne anwo la.​—Hib. 6:10.

20. Duzu a yɛbazuzu nwo wɔ edwɛkɛ bieko anu a?

²⁰ Mekɛ ala mɔɔ ewiade ɛhye tɛbɔ ɛkɛ la, yemɔ yɛbayia ɛkpɔlɛ. (Dwɔn 15:19) Noko ɔnle kɛ yɛmaa yɛ ahonle tu. Kɛ mɔɔ yɛbanwu ye wɔ edwɛkɛ bieko anu la, Gyihova bamaa menli mɔɔ di nɔhalɛ maa ye la “anwosesebɛ na yeabɔ bɛ nwo bane.” (2 Tɛs. 3:3) Ɔti bɛmaa yɛhɔ zo yɛnyia ɛlɔlɛ yɛmaa Gyihova, yɛ mediema yɛɛ yɛ agbɔvolɛ bɔbɔ. Saa yɛfa folɛdulɛ ɛhye yɛdi gyima a, yɛbayɛ ko na yɛ diedi ne anu amia, yɛbawula Gyihova anyunlunyia na yɛamaa yeala ali kɛ ɛlɔlɛ nwo yɛ se kpalɛ tɛla ɛkpɔlɛ.