1. Ngyegyelɛ boni mɔ a bie a Gyihova menli bayia a?

ƐLƐYIA ngyegyelɛ bie mɔɔ anu yɛ se ɔ? Bie a awie mɔɔ wɔ asafo ne anu la ɛyɛ debie ɛmaa yegyegye wɔ. (Gye. 3:2) Anzɛɛ kɛ mɔɔ ɛsonle Gyihova la ati, bie a menli mɔɔ ɛ nee bɛ yɛ gyima anzɛɛ ɛ nee bɛ kɔ sukulu la golo ɛ nwo. (1 Pita 4:3, 4) Anzɛɛ bie a wɔ mbusuafoɔ ɛlɛbɔ mɔdenle kɛ bɛmaa wɔagyakyi debiezukoalɛ ɛhɔlɛ anzɛɛ bɛnrɛmaa ɛnrɛha wɔ diedi ne anwo edwɛkɛ ɛnrɛhile awie mɔ. (Mat. 10:35, 36) Saa sɔnea ne anu yɛ se kpalɛ a, bie a ɛbade nganeɛ kɛ ɛgyakyi Gyihova ɛzonlenlɛ a, ɔbaboa wɔ. Noko ɛbahola wɔanyia anwodozo kɛ, ɔnva nwo kɛzi wɔ ngyegyelɛ ne de biala la, Gyihova bamaa wɔ nrɛlɛbɛ mɔɔ ɛbava wɔali nwolɛ gyima nee anwosesebɛ mɔɔ ɛbava wɔagyinla ɔ nloa la.

2. Kɛmɔ Wulomuma 15:4 kile la, saa yɛkenga Nyamenle Edwɛkɛ ne a, kɛzi ɔbaboa yɛ ɛ?

² Gyihova maanle bɛhɛlɛle alesama mɔɔ ɛnli munli mɔɔ gyinlanle sɔnea mɔɔ anu yɛ se anloa la anwo edwɛkɛ wɔ Baebolo ne anu. Duzu ati ɔ? Amaa yɛazukoa debie yɛavi bɛ edwɛkɛ ne anu. Zɔhane a Gyihova maanle ɛzoanvolɛ Pɔɔlo hɛlɛle ye wɔ Wulomuma 15:4 a. (Kenga.) Saa yɛkenga edwɛkɛ ɛhye mɔ a, ɔkyekye yɛ rɛle na ɔmaa yɛnyia anyelazo. Noko amaa yɛanyia Baebolo ne azo nvasoɛ la, ɔnle kɛ yɛkenga ala. Ɔwɔ kɛ yɛmaa Ngɛlɛlera ne kakyi kɛzi yɛdwenle nee kɛzi yɛte nganeɛ la. Kɛ neazo la, saa yɛhyia adehilelɛ mɔɔ baboa yɛ yeamaa yɛali ngyegyelɛ fɔɔnwo bie anwo gyima la a, duzu a yɛbahola yɛayɛ a? Yɛbahola yɛayɛ ninyɛne nna ɛhye mɔ: (1) Yɛ asɔne, (2) Pɛ edwɛkɛ ne anwo nvoninli, (3) Dwenledwenle nwolɛ, yɛɛ (4) Fa di gyima. Bɛmaa yɛzuzu kɛzi  yɛbayɛ nuhua ko biala la anwo. * Akee yɛbalua ndenle ɛhye mɔ azo yɛazukoa debie yɛavi mɔɔ zile Belemgbunli Devidi nee ɛzoanvolɛ Pɔɔlo ɛbɛlabɔlɛ nu la anu.

3. Kolaa na wɔabɔ ɔ bo kɛ ɛkenga Baebolo ne la, duzu a ɔwɔ kɛ ɛyɛ a, na duzu ati ɔ?

³ (1) Yɛ asɔne. Kolaa na wɔabɔ ɔ bo kɛ ɛkenga Baebolo ne la, sɛlɛ Gyihova kɛ ɔboa wɔ ɔmaa ɛnwu kɛzi ɛbanyia mɔɔ ɛlɛkenga la azo nvasoɛ la. Kɛ neazo la, saa ɛlɛkpondɛ folɛdulɛ bie mɔɔ baboa wɔ yeamaa wɔali ngyegyelɛ bie anwo gyima la a, sɛlɛ Gyihova kɛ ɔmaa ɛnwu ngyinlazo bie mɔɔ baboa wɔ la wɔ ye Edwɛkɛ ne anu.​—Fel. 4:6, 7; Gye. 1:5.

4. Duzu a baboa wɔ yeamaa wɔade Baebolo ne anu edwɛkɛ bie abo kpalɛ a?

⁴ (2) Pɛ edwɛkɛ ne anwo nvoninli. Gyihova bɔle yɛ mɔɔ yɛkola yɛpɛ ninyɛne nwo nvoninli wɔ yɛ adwenle nu. Amaa wɔade Baebolo nu edwɛkɛ bie abo kpalɛ la, bɔ mɔdenle pɛ mɔɔ ɛlɛkɔ zo la anwo nvoninli na fa ye kɛ ɛdawɔ a ɛle ahenle ne mɔɔ bɛlɛka ɔ nwo edwɛkɛ la. Bɔ mɔdenle kɛ ɛbanwu ninyɛne mɔɔ ahenle ne nwunle ye na wɔade nganeɛ kɛ ɔdaye la.

5. Duzu a le edwɛkɛ nwo ɛdwenledwenlenlɛ, na kɛ ɔkɛyɛ na wɔayɛ ɛ?

⁵ (3) Dwenledwenle nwolɛ. Edwɛkɛ nwo ɛdwenledwenlenlɛ kile kɛ ɛsuzu mɔɔ ɛlɛkenga la anwo wɔahɔ moa na wɔanwu kɛzi ɛbava wɔali gyima la. Ɔboa wɔ ɔmaa ɛnwu adwenle mɔɔ wɔ edwɛkɛ ne anu la na ɛte ɔ bo kpalɛ. Saa ɛkenga Baebolo ne na wɔandwenledwenle nwolɛ a, ɔle kɛ ɛdanlɛ mɔɔ bɛpepɛ bɛgua ɛkponle zo na bɛtɛkpomgbale la. Saa ɛdwenledwenle nwolɛ a, ɔle kɛ ɛlɛfa ɛdanlɛ azinli ne wɔasisa zo wɔakpomgba wɔamaa yeayɛ tɛladeɛ la. Saa ɛkulo kɛ ɛdwenledwenle edwɛkɛ nwo a, bie a kpuya ɛhye mɔ mɔɔ ɛbabiza ɛ nwo la baboa wɔ: ‘Duzu a ahenle mɔɔ bɛlɛka ɔ nwo edwɛkɛ la yɛle vale lile ye ngyegyelɛ ne anwo gyima a? Kɛzi Gyihova boale ye ɛ? Kɛzi mebava ɛzukoalɛdeɛ mɔɔ wɔ nu la meali gyima amaa yeaboa me yeamaa meagyinla ngyegyelɛ nloa ɛ?’

6. Duzu ati a ɔwɔ kɛ yɛfa mɔɔ yɛsukoa la yɛdi gyima a?

⁶ (4) Fa di gyima. Gyisɛse hanle kɛ, saa yɛanva mɔɔ yɛsukoa la yɛanli gyima a, yɛbayɛ kɛ nrenyia bie mɔɔ zile ye sua wɔ ɛnwea nu la. Ɔyɛ gyima ɛsesebɛ, noko ye ɛvɛlɛ bayɛ mgbane. Duzu ati ɔ? Ɔluakɛ saa anwoma bɔ sua ne na nzule bu aze a, ɔbabubu. (Mat. 7:24-27) Zɔhane ala a saa yɛyɛ asɔne, yɛpɛ edwɛkɛ ne anwo nvoninli wɔ yɛ adwenle nu, yɛdwenledwenle nwolɛ na yɛanva mɔɔ yɛzukoa la yɛanyɛ gyima a, ɛnee yɛvɛ mgbane a. Saa yɛyia yɛ diedi ne anwo sɔnea anzɛɛ bɛkpɔ yɛ a, yɛnrɛhola gyinla. Noko, saa yɛfa mɔɔ yɛsukoa la yɛdi gyima a, ɔmaa yɛsi kpɔkɛ kpalɛ, yɛnyia anzodwolɛ kpole na yɛ diedi nu mia. (Aye. 48:17, 18) Bɛmaa yɛlua ndenle nna ɛhye mɔ mɔɔ yɛzuzu nwo la azo yɛnlea mɔɔ yɛbahola yɛazukoa yɛavi mɔɔ zile Belemgbunli Devidi ɛbɛlabɔlɛ nu anu la.

7. Baebolo nu edwɛkɛ boni a yɛbazuzu nwo kɛkala a?

⁷ Ɛ gɔnwo anzɛɛ wɔ busuanli bie ɛye ɛ rɛle ɛdo ɛ sa nu ɔ? Saa bie ɛdo wɔ a, ɛsuzu Belemgbunli Devidi ara Abesalɛm mɔɔ yele ye papa maanle na ɔbɔle mɔdenle kɛ ɔdie belemgbunlililɛ ne yeavi ɔ sa nu la edwɛkɛ ne anwo a, ɔbaboa wɔ.​—2 Sa. 15:5-14, 31; 18:6-14.

8. Amaa Gyihova aboa wɔ la, duzu a ɛbahola wɔayɛ a?

⁸ (1) Yɛ asɔne. Saa ɛkenga edwɛkɛ ne ɛwie a, akee ka kɛzi ɛtane mɔɔ bɛyɛ wɔ la maa ɛte nganeɛ la anwo edwɛkɛ fɔɔnwo kile Gyihova. (Edw. 6:6-9) Akee sɛlɛ Gyihova kɛ ɔboa wɔ ɔmaa ɛnwu ngyinlazo mɔɔ baboa wɔ yeamaa wɔanwu mɔɔ ɔwɔ kɛ ɛyɛ ɛgyinla tɛnlabelɛ ne anloa la.

9. Duzu a zile Devidi nee Abesalɛm avinli a?

 ⁹ (2) Pɛ edwɛkɛ ne anwo nvoninli. Dwenle mɔɔ hɔle zo wɔ edwɛkɛ ɛhye anu la anwo, na pɛ kɛzi ɔhanle Belemgbunli Devidi la anwo nvoninli wɔ wɔ adwenle nu. Devidi ara Abesalɛm vale ɛvolɛ dɔɔnwo yɛle biala mɔɔ ɔbahola la kɛ ɔmaa menli ne ahulo ye. (2 Sa. 15:7) Mɔɔ Abesalɛm nwunle kɛ yenyia mekɛ kpalɛ la, ɔzoanle busiama wɔ Yizilayɛ amuala kɛ bɛhɔli menli ne adwenle bɛmaa bɛlie ye bɛdo nu kɛ ɔdaye a ɔle bɛ belemgbunli a. Ɔlile Ahetɔfɛle mɔɔ le Devidi agɔnwo kpalɛ na ɔtu ye folɛ la bɔbɔ adwenle ɔmaanle ɔvale ɔ nwo ɔwulale atuadelɛ ne anu. Abesalɛm ziele ɔ nwo belemgbunli, na akee ɔbɔle mɔdenle kɛ ɔkye Devidi mɔɔ ɔbayɛ kɛ ɛnee ɔnde kpɔkɛ fee wɔ zɔhane mekɛ ne la na yeahu ye. (Edw. 41:1-9) Devidi dele nwolɛ bie na ɔnriandile ɔvile Gyɛlusalɛm. Awieleɛ bɔkɔɔ ne, Abesalɛm ɛlɔnema nee Devidi ɛlɔnema mɔɔ di nɔhalɛ la honle. Abesalɛm ɛlɔnema ne annyia ɛleka angyinla; na bɛhunle Devidi ara Abesalɛm.

10. Duzu a anrɛɛ Belemgbunli Devidi bahola ayɛ a?

¹⁰ Akee pɛ kɛzi Devidi bade nganeɛ wɔ mekɛ mɔɔ ninyɛne ɛhye mɔ ɛlɛsisi ɔ nwo zo la anwo nvoninli wɔ wɔ adwenle nu nea. Ɛnee ɔkulo Abesalɛm edwɛkɛ yɛɛ ɔdie Ahetɔfɛle ɔdi. Noko menli nwiɔ ɛhye mɔ mɔɔ bikye ye kpalɛ la yele ye maanle. Bɛmaanle ɔlile nyiane kpole kpalɛ yɛɛ bɛbɔle mɔdenle bɔbɔ kɛ bɛku ye. Anrɛɛ Devidi bahola anyia adwenle kɛ ɔ gɔnwo mɔ mɔɔ ɛha la noko gyi Abesalɛm anzi, ɔti ɔnrɛlie bɛ ɔnrɛli bieko. Anrɛɛ ɔbahola yeadwenle ɔ ngomekye ɔ nwo na yeabɔ mɔdenle kɛ ɔ ngomekye ɔnriandi yeavi maanle ne anu. Anzɛɛ, anrɛɛ ɔbahola yeamaa ɔ sa nu ado na yeado ye adwenle nu. Noko Devidi anyɛ ɛhye mɔ anu biala. Emomu, ɔgyinlanle ngyegyelɛ ɛhye mɔɔ anu yɛ se la anloa. Duzu a boale ye maanle ɔyɛle zɔ a?

11. Duzu a Devidi yɛle wɔ tɛnlabelɛ ɛsesebɛ ɛhye anu a?

¹¹ (3) Dwenledwenle nwolɛ. Ngyinlazo boni a ɛnwu ye wɔ edwɛkɛ ne anu a? Bua kpuya ɛhye, “Duzu a Devidi yɛle vale lile ye ngyegyelɛ ne anwo gyima a?” Devidi ammaa ye ahonle andu yɛɛ yeampele ɔ nwo yeanzi kpɔkɛ mɔɔ nrɛlɛbɛ ɛnle nu la. Eza yeammaa ɛzulolɛ anvo ɔ nwo zo na yeanyɛ tusie. Emomu, ɔzɛlɛle Gyihova kɛ ɔboa ye. Eza ɔhanle ɔhilele ɔ gɔnwo mɔ kɛ bɛboa ye. Yɛɛ ɔlile kpɔkɛ mɔɔ ɔzile la anwo gyima ndɛndɛ. Ɔnva nwo kɛ edwɛkɛ ne gyegyele Devidi la, yeamkpo kɛ ɔbalie awie mɔ gyɛne yeali anzɛɛ ɔbanyia bɛ nwo adwenle ɛtane. Ɔhɔle zo ɔnyianle Gyihova nee ɔ gɔnwo mɔ anu anwodozo.

12. Duzu a Gyihova yɛle boale Devidi a?

¹² Kɛzi Gyihova boale Devidi ɛ? Saa ɛyɛ nwolɛ neɛnleanu ekyi a, ɛbanwu kɛ, Gyihova maanle Devidi anwosesebɛ mɔɔ ɔhyia la ɔmaanle ɔgyinlanle ngyegyelɛ ɛhye anloa. (Edw. 3:1-8; ɔtidwɛkɛ) Gyihova yilale kpɔkɛ mɔɔ Devidi zile la azo. Na ɔboale Devidi agɔnwo mɔ mɔɔ di nɔhalɛ la ɔmaanle bɛhonle bɛliele bɛ belemgbunli ne.

13. Saa awie yɛ debie maa ɔgyegye wɔ kpole a, kɛ ɔkɛyɛ na wɔazukoa Devidi neazo ne ɛ? (Mateyu 18:15-17)

¹³ (4) Fa di gyima. Biza ɛ nwo kɛ, ‘Kɛ ɔkɛyɛ na meazukoa Devidi ɛ?’ Ɔwɔ kɛ ɛdi ngyegyelɛ ne anwo gyima ndɛndɛ. Nea tɛnlabelɛ ne anwo na di Gyisɛse folɛdulɛ mɔɔ wɔ Mateyu tile 18 la azo anzɛɛ fa ngyinlazo mɔɔ wɔ nuhua la di gyima. (Kenga Mateyu 18:15-17.) Noko ɔnle kɛ ɛgyinla kɛzi ɛte nganeɛ la azo ɛpele ɛ nwo ɛsi kpɔkɛ. Ɔwɔ kɛ ɛsɛlɛ Gyihova kɛ ɔboa wɔ ɔmaa ɛzie ɛ nwo dii na ɔmaa wɔ nrɛlɛbɛ mɔɔ ɛbava wɔali ngyegyelɛ ne anwo gyima la. Mmanyia adwenle kɛ ɛnrɛlie ɛ gɔnwo mɔ ɛnrɛli bieko. Emomu, nyia ɛhulolɛ kɛ ɛbalie moalɛ biala mɔɔ bɛbava bɛamaa wɔ la wɔado nu. (Mrɛ. 17:17) Mɔɔ hyia kpalɛ la, fa folɛdulɛ mɔɔ Gyihova dua ye Edwɛkɛ ne azo fa maa wɔ la di gyima.​—Mrɛ. 3:5, 6.

14. Mekɛ boni a edwɛkɛ mɔɔ wɔ 2 Timote 1:12-16; 4:6-11, 17-22 la bahola amaa wɔ anwosesebɛ a?

¹⁴ Kɛ mɔɔ ɛlɛsonle Gyihova la ati, wɔ mbusuafoɔ ɛlɛdwazo atia wɔ ɔ? Anzɛɛ ɛde maanle mɔɔ  bɛva bɛ sa bɛdo Gyihova menli ne ɛzonlenlɛ gyima ne azo la anu ɔ? Saa ɛwɔ tɛnlabelɛ zɔhane bie anu a, bie a ɛkenga 2 Timote 1:12-16 nee 4:6-11, 17-22 * a, ɔbamaa wɔ anwosesebɛ. Mɔɔ Pɔɔlo kɛlɛ edwɛkɛ ɛhye la, ɛnee ɔla efiade.

15. Duzu a ɛbahola wɔayɛ nwolɛ asɔne a?

¹⁵ (1) Yɛ asɔne. Kolaa na wɔagenga zɔhane edwɛkɛ ne mɔ la, ka wɔ ngyegyelɛ ne nee kɛzi ɔmaa ɛte nganeɛ la anwo edwɛkɛ fɔɔnwo kile Gyihova. Akee sɛlɛ Gyihova kɛ ɔboa wɔ ɔmaa ɛnwu ngyinlazo mɔɔ wɔ Pɔɔlo edwɛkɛ ne anu mɔɔ baboa wɔ yeamaa wɔanwu mɔɔ ɔwɔ kɛ ɛyɛ ɛgyinla tɛnlabelɛ ne anloa la.

16. Duzu a dole Pɔɔlo a?

¹⁶ (2) Pɛ edwɛkɛ ne anwo nvoninli. Fa ye kɛ ɛdawɔ a ɛle Pɔɔlo a. Bɛgua ye kyeenyi na bɛdo ye efiade wɔ Wulomu. Bɛdo ye efiade ɛlɛ, noko mekɛ ɛhye mɔɔ ɛnee ɔze kɛ bɛbahu ye. Ɛnee ɔ gɔnwo mɔ bie mɔ ɛkpo ye yɛɛ ɔdaye mumua ne yewie fɛ.​—2 Tim. 1:15.

17. Duzu a anrɛɛ Pɔɔlo bahola ayɛ a?

¹⁷ Anrɛɛ Pɔɔlo bahola ava ye adwenle azie mekɛ mɔɔ ɛpɛ nu la azo na yeanyia adwenle kɛ saa yeanyɛ Kilisienenli mɔɔ bɔ mɔdenle a, anrɛɛ bɛangye ye bɛando efiade. Anrɛɛ ɔbahola yeava mrenyia mɔɔ wɔ Ehyea maanzinli ne anu mɔɔ kpɔle ye la anwo ɛya, yɛɛ bie a anrɛɛ ɔnrɛlie ɔ gɔnwo mɔ mɔɔ ɛha la ɔnrɛli bieko. Noko Pɔɔlo anyɛ ɛhye mɔ anu biala. Duzu a maanle ye anwodozo ne yɛle kpole na ɔnyianle anyelazo a?

18. Duzu a Pɔɔlo yɛle wɔ tɛnlabelɛ ɛsesebɛ ɛhye anu a?

¹⁸ (3) Dwenledwenle nwolɛ. Bua kpuya ɛhye, “Duzu a Pɔɔlo yɛle vale lile ye ngyegyelɛ ne anwo gyima a?” Ɛnee Pɔɔlo ze bɔbɔ kɛ ɔnrɛhyɛ ɔbawu, noko yeammaa ɔ rɛle anvi kɛ mɔɔ hyia kpalɛ la a le kɛ, ɔbawula Gyihova anyunlunyia. Na ɔhɔle zo ɔdwenlenle kɛzi ɔbahola yeamaa awie mɔ anwosesebɛ la anwo. Ɔyɛle asɔne dahuu ɔvale ɔ nwo ɔdole Gyihova anwo zo. (2 Tim. 1:3) Pɔɔlo anva ye adwenle anzie mediema mɔɔ kpole ye la anwo zo, emomu, ɔhanle kɛ ɔ nye sɔ kɛzi mediema mɔɔ ɛha la vile ɛlɔlɛ nu boale ye la kpalɛ. Eza Pɔɔlo hɔle zo zukoale Nyamenle Edwɛkɛ ne. (2 Tim. 3:16, 17; 4:13) Mɔɔ hyia kpalɛ la, ɛnee ɔlɛ anwodozo kɛ Gyihova nee Gyisɛse kulo ye. Bɛamkpo ye, na ɛnee ɔlɛ anwodozo kɛ bɛbayila ye wɔ ye nɔhalɛlilɛ nwo.

19. Kɛzi Gyihova boale Pɔɔlo ɛ?

¹⁹ Ɛnee Gyihova ɛha ɛhile Pɔɔlo kɛ, kɛ mɔɔ yerayɛ Kilisienenli la ati, ɔbayia ɛkpɔlɛ. (Gyi. 21:11-13) Kɛzi Gyihova boale Pɔɔlo ɛ? Ɔbuale Pɔɔlo asɔneyɛlɛ ne na nzinlii ɔmaanle ye tumi. (2 Tim. 4:17) Bɛmaanle Pɔɔlo nwunle kɛ ɔ sa baha ahyɛlɛdeɛ ne mɔɔ ɔlɛyɛ nwolɛ gyima ɛsesebɛ la. Eza Gyihova hanle Pɔɔlo agɔnwo mɔ mɔɔ di nɔhalɛ la ahonle ɔmaanle bɛboale ye.

20. Kɛ ɔkɛyɛ na wɔazukoa Pɔɔlo diedi ne mɔɔ bɛha nwolɛ edwɛkɛ wɔ Wulomuma 8:38, 39 la ɛ?

²⁰ (4) Fa di gyima. Biza ɛ nwo kɛ, ‘Kɛ ɔkɛyɛ na meazukoa Pɔɔlo ɛ?’ Ɔwɔ kɛ yɛmaa yɛ nye da kɛ, yɛ diedi ne ati bɛbakpɔ yɛ kɛmɔ bɛkpɔle Pɔɔlo la. (Maake 10:29, 30) Amaa yɛali nɔhalɛ wɔ sɔnea nu la, ɔhyia kɛ yɛyɛ asɔne, yɛfa yɛ nwo yɛto Gyihova anwo zo na yɛsukoa debie dahuu. Na ɔwɔ kɛ yɛkakye ye dahuu kɛ, ninyɛne mɔɔ hyia kpalɛ la anu ko a le kɛ yɛbawula Gyihova anyunlunyia. Yɛbahola yɛanyia anwodozo bɔkɔɔ kɛ, Gyihova ɛnrɛkpo yɛ ɛlɛ yɛɛ debie biala ɛnle ɛkɛ mɔɔ awie bahola ayɛ azɛkye ɛlɔlɛ mɔɔ ɔlɛ ɔmaa yɛ la.​—Kenga Wulomuma 8:38, 39; Hib. 13:5, 6.

21. Duzu a boale Aya nee Hector maanle bɛlile ngyegyelɛ mɔɔ bɛyiale la azo a?

²¹ Kɛzi yɛ tɛnlabelɛ ne de biala la, neazo mɔɔ wɔ Baebolo ne anu la bahola aboa yɛ amaa yɛanyia anwosesebɛ yɛagyinla kpundii. Kɛ neazo la, Aya, adiema raalɛ adekpakyelɛnli bie mɔɔ wɔ  Japan la hanle kɛ Dwona edwɛkɛ ne boale ye maanle ɔlile ɛzulolɛ mɔɔ ɔlɛ wɔ bagua nu daselɛlilɛ nwo la azo. Kpavolɛ bie mɔɔ bɛfɛlɛ ye Hector mɔɔ wɔ Indonesia mɔɔ ye awovolɛ ɛnzonle Gyihova la hanle kɛ, Wulutu neazo ne boale ye maanle ɔzukoale Gyihova anwo debie na ɔzonlenle ye.

22. Kɛ ɔkɛyɛ na wɔanyia yɛ vidio anzɛɛ “Sukoa Bɛ Diedi” edwɛkɛ ne mɔ azo nvasoɛ kpalɛ ɛ?

²² Nienwu a ɛbanyia Baebolo nu neazo mɔɔ bamaa wɔ anwosesebɛ la ɛ? Yɛ vidio ne mɔ nee Baebolo nu edwɛkɛ mɔɔ bɛgenga ye kɛ drama yɛɛ “Sukoa Bɛ Diedi” edwɛkɛ ne mɔɔ ba toɔdoa zo la boa yɛ maa yɛte Baebolo nu edwɛkɛ bo kpalɛ. * Kolaa na wɔanlea anzɛɛ wɔadie anzɛɛ wɔangenga edwɛkɛ ɛhye mɔ mɔɔ bɛyɛ nwolɛ neɛnleanu kpalɛ la, sɛlɛ Gyihova kɛ ɔboa wɔ ɔmaa ɛnwu ɛzukoalɛdeɛ fɔɔnwo bie mɔɔ ɛbahola wɔava wɔali gyima la. Fa ye kɛ ɛdawɔ a ɛle ahenle mɔɔ bɛlɛka ɔ nwo edwɛkɛ la. Dwenledwenle mɔɔ Gyihova azonvolɛ ɛhye mɔ mɔɔ di nɔhalɛ la yɛle nee kɛzi Gyihova boale bɛ ɔmaanle bɛgyinlanle bɛ ngyegyelɛ nloa la anwo. Akee fa ɛzukoalɛdeɛ mɔɔ wɔ nu la toto wɔ tɛnlabelɛ ɛdeɛ ne anwo. Yɛ Gyihova mo wɔ kɛzi ɔlɛboa wɔ la anwo. Akee kpondɛ ndenle dua zo maa awie mɔ anwosesebɛ na boa bɛ fa kile kɛ ɛ nye sɔ moalɛ mɔɔ wɔnyia la.

23. Kɛ mɔɔ Ayezaya 41:10, 13 kile la, duzu a Gyihova ɛbɔ ɛwɔkɛ kɛ ɔbayɛ yeamaa yɛ a?

²³ Ɛbɛlabɔlɛ wɔ Seetan ewiade ɛhye anu kola yɛ se kpalɛ, na ɔdwu mekɛ bie bɔbɔ a, yɛnnwu mɔɔ yɛyɛ a. (2 Tim. 3:1) Noko ɔnle kɛ yɛmaa nwolɛ adwenleadwenle tɔ yɛ nwo anzɛɛ yɛ ahonle tu. Gyihova ze ngyegyelɛ mɔɔ yɛlɛyia la. Yebɔ ɛwɔkɛ kɛ, saa yɛhyia moalɛ a, ɔbava ɔ sa fema ne mɔɔ tumi wɔ nu la yeazɔ yɛ nu ɛsesebɛ. (Kenga Ayezaya 41:10, 13.) Yɛlɛ anwodozo bɔkɔɔ kɛ Gyihova baboa yɛ, na Baebolo ne bamaa yɛanyia anwosesebɛ mɔɔ yɛhyia la yɛava yɛagyinla sɔnea biala anloa.