Kilisienema bie mɔ dua ɛlɛtɔlɔneke ninyɛne mɔɔ ɛdwu zo la azo nee bɛ mbusuafoɔ nee bɛ gɔnwo mɔ Alasevolɛ di adwelie. Nɔhalɛ nu, Kilisienenli mɔɔ ɛnyi sunsum nu la bamaa folɛdulɛ ɛhye adɛnla ye adwenle nu: “Sonla mɔɔ anye gyi ɔ ti anwo la nwu esiane na ɔfa ɔ nwo ɔfea, noko mɔɔ ɛnlɛ anwubielɛ la kɔ ɔ nyunlu fɔɔnwo na ɔnwu nwolɛ amaneɛ.”​—Mrɛ. 27:12.

Yɛze kɛ Gyihova kulo kɛ ɔbɔ yɛ nwo bane. Yemɔti, yɛngulo kɛ yɛ nee menli mɔɔ fa mgbakyemgbakyenu ba, menli mɔɔ bɛdu bɛ anzɛɛ bɛkilehile adalɛ ngilehilelɛ la tu. (Wlo. 16:17; 1 Kɔl. 5:11; 2 Dwɔn 10, 11) Bie a menli mɔɔ ba debiezukoalɛ la bie mɔ ɛnva Baebolo ne anu ngyinlazo ɛmbɔ bɛ ɛbɛla. (2 Tim. 2:20, 21) Saa yɛlɛfa menli agɔnwolɛ a, ɔwɔ kɛ yɛkakye ɛhye. Ɔbayɛ se kɛ ɛbalua ɛlɛtɔlɔneke adwelielilɛ ninyɛne zo wɔava agɔnwolɛ kpalɛ.

Saa ɛkulo kɛ ɛhyehyɛ ekpunli bie mɔɔ ɛbalua ɛlɛtɔlɔneke ninyɛne zo ɛ nee bɛ ali adwelie la a, ɔhyia kɛ ɛnea menli mɔɔ ɛbava bɛ wɔaboka nwo la boɛ, titili saa menli mɔɔ wɔ nu la anwo zonle a. Mediema bie mɔ ɛva bɛ nwo ɛwula ekpunli kpole zɛhae bie mɔ anu na mɔɔ ɛvi nu ɛra la ɛnle kpalɛ. Saa adiema bie boka ekpunli bie mɔɔ nuhua menli ne bo ɛya ko anzɛɛ apenle la a, ɔbayɛ se kɛ ɔbamaa ɔ nye ala ɛkɛ. Ɛnrɛhola ɛnrɛnwu kɛzi menli mɔɔ wɔ ekpunli ne anu la subane de nee kɛzi bɛ sunsum nu gyinlabelɛ de la ɛlɛ. Edwɛne 26:4 ka kɛ: “Me nee adalɛma ɛndɛnla, yɛɛ me nee nabalabama ɛndu.” Asoo ɛhye ɛngile kɛ nrɛlɛbɛ wɔ nu kɛ yɛ nee menli mɔɔ yɛze bɛ la ala a balua ɛlɛtɔlɔneke ninyɛne zo ali adwelie ɔ?

Saa menli mɔɔ wɔ ekpunli ne anu la anzo bɔbɔ a, ɔwɔ kɛ Kilisienenli bie nea boɛ wɔ mekɛ dodo mɔɔ ɔ nee bɛ bava ali adwelie nee ninyɛne mɔɔ bɛka nwolɛ edwɛkɛ la anwo. Tɛ kɛ asɛɛ yɛkulo kɛ yɛ nee menli di adwelie la ati, mɔɔ bɛbaha nee mekɛ dodo mɔɔ yɛbava yɛ nee bɛ ali adwelie la ɛnvale yɛ nwo. Pɔɔlo bɔle Timote kɔkɔ wɔ menli bie mɔ mɔɔ “bɛka awie mɔ anwo edwɛkɛ” na “bɛfa bɛ nloa bɛwulowula awie mɔ edwɛkɛ nu” la anwo. (1 Tim. 5:13) Ɛnɛ noko, yɛbahola yɛalua ɛlɛtɔlɔneke ninyɛne zo yɛayɛ deɛ zɔhane ala bie.

Saa bɛlɛka Gyihova Dasevolɛ bie anwo edwɛkɛ ɛtane anzɛɛ ye fealeranu edwɛkɛ a, Kilisienenli mɔɔ ɛnyi sunsum nu la ɛnrɛdie edwɛkɛ ɛhye mɔ anzɛɛ ɔnrɛha bie. (Edw. 15:3; Mrɛ. 20:19) Yɛɛ ɔnrɛdie adiema bie anwo edwɛkɛ mɔɔ yɛ azibɛnwo anzɛɛ ɛngyi kpɔkɛ zo la anzɛɛ ɔnrɛha bie. (Ɛfɛ. 4:25) Yɛ sa ka sunsum nu aleɛ yɛɛ amaneɛbɔlɛ mɔɔ fɛta la wɔ yɛ jw.org wɛbsaete ne azo yɛɛ siane biala JW Broadcasting^® gyimalilɛ ne anu.

Mediema bie mɔ dua ɛlɛtɔlɔneke adwelielilɛ ninyɛne zo tɔne ninyɛne anzɛɛ tɔ debie anzɛɛ bɔ bɛ ninyɛne nwo nolo anzɛɛ fa menli wɔ bɛ gyima nu. Ɛhye mɔ le gualilɛ nu edwɛkɛ na ɔnvale Gyihova ɛzonlenlɛ nwo. Kilisienema mɔɔ bɛngulo kɛ bɛyɛ “ezukoa nwo anyebolo” la ɛngulo kɛ bɛdua bɛ mediema nwo zo bɛkpondɛ ezukoa ɛlɛ.​—Hib. 13:5.

Asoo ɔwɔ kɛ yɛdua ɛlɛtɔlɔneke adwelielilɛ ninyɛne zo yɛdielie ezukoa kɛ yɛfa yɛaboa mediema mɔɔ bɛhyia moalɛ anzɛɛ esiane ɛdo bɛ la ɔ? Yɛkulo yɛ mediema yɛɛ yɛdwenle bɛ nwo, ɔti dahuu yɛkulo kɛ yɛboa yɛ nwo ngoko na yɛmaa yɛ nwo anwosesebɛ. (Gye. 2:15, 16) Noko saa yɛbɔ mɔdenle kɛ yɛdua adwelielilɛ ekpunli kpole mɔɔ yɛhyehyɛ la azo yɛayɛ zɔ a, bie a ɔbamaa yeayɛ se kɛ Bɛtɛle anzɛɛ asafo ne bayɛ ngyehyɛleɛ kpalɛ aboa mediema ɛhye mɔ. (1 Tim. 5:3, 4, 9, 10, 16) Na yɛ nuhua biala ɛngulo kɛ ɔbamaa awie mɔ anyia adwenle kɛ bɛkpa yɛ kɛ yɛboa Nyamenle menli ne wɔ adenle titili bie azo.

Yɛkulo kɛ yɛyɛ debie mɔɔ bawula Nyamenle anyunlunyia la. (1 Kɔl. 10:31) Ɔti saa ɛkulo kɛ ɛfa adwelielilɛ ninyɛne anzɛɛ ɛlɛtɔlɔneke ninyɛne gyɛne ɛdi gyima a, suzu esiane mɔɔ wɔ nu la anwo na maa ɛ nye ɛla ɛkɛ.