1. Debie mɔɔ yɛ anyelielɛ la boni a ɛnee la Dwuuma mɔɔ ɛhɔ akɛlɛzonlenlɛ nu la anyunlu a?

 ƐNEE awie biala anye ɛlie. Gyihova Nyamenle “hanle Pɛhyea Belemgbunli Saelɛse ahonle” maanle ɔgyakyile Yizilayɛma mɔɔ ɛhɔ Babelɔn akɛlɛzonlenlɛ nu wɔ ɛvolɛ dɔɔnwo anu la. Belemgbunli ne bɔle nolo kɛ Dwuuma bahola azia ahɔ bɛ sua zo ahɔzi “Gyihova, Yizilayɛ Nyamenle ne sua ne bieko.” (Ɛzela 1:1, 3) Ɛhye le anyelielɛ edwɛkɛ! Ɛnee ɛhye kile kɛ bɛbava nɔhalɛ Nyamenle ne ɛzonlenlɛ bɛazie ɛkɛ bieko wɔ azɛlɛ mɔɔ ɔvale ɔmaanle ye menli ne la azo.

2. Mɔɔ menli ne vi akɛlɛzonlenlɛ nu ziale rale la, duzu a bɛlimoale bɛyɛle a?

² Wɔ 537 K.Y.M., Dwuuma mɔɔ hɔle akɛlɛzonlenlɛ nu la ekpunli mɔɔ limoa la radwule nyiakɛ belemgbunlililɛ ne suakpole Gyɛlusalɛm azo. Yeangyɛ, Dwuuma ne mɔɔ ziale rale la bɔle ɔ bo kɛ bɛyɛ ɛzonlenlɛsua ne anwo gyima, na ɔkadwu 536 K.Y.M. la, ɛnee bɛdo ye adiabo ne bɛwie!

3. Dwazotia boni a Dwuuma ne yiale a?

³ Noko mɔɔ Dwuuma ne bɔle ɔ bo kɛ bɛsi ɛzonlenlɛsua ne bieko la, bɛyiale dwazotia mɔɔ anu yɛ se la. Ɛnee menli mɔɔ ɛbɔ bɛ ɛyia la “ɛlɛkɔ zo amaa Dwudama asa anu ado na bɛannyia anwosesebɛ bɛanzi sua ne.” (Ɛzela 4:4) Ɛnee tɛnlabelɛ ne ɛnle kpalɛ, noko akee edwɛkɛ ne zɛkyele bɔkɔɔ. Wɔ 522 K.Y.M., Pɛhyea belemgbunli fofolɛ bie mɔɔ bɛfɛlɛ ye Atazɛzɛse la bɔle ɔ bo kɛ ɔdi tumi. * Dwazotiama ne nwunle tumililɛ fofolɛ ɛhye kɛ ɔle nwolɛ adenle mɔɔ bɛbanyia ‘bɛalua mɛla zo bɛava ngyegyelɛ bɛara’ amaa bɛazi sua ne ɛzilɛ adenle bɔkɔɔ a. (Edw. 94:20) Bɛhanle bɛhilele Belemgbunli Atazɛzɛse  kɛ Dwuuma ne ɛlɛfa adwenle kɛ bɛdwazo bɛatia ye. (Ɛzela 4:11-16) Ɔliele bɛ adalɛ edwɛkɛ ne lile na ɔmaanle bɛgyakyile ɛzonlenlɛsua ne ɛzilɛ. (Ɛzela 4:17-23) Ɛhye ati, menli mɔɔ ɛnee ɛlɛfa anyelielɛ azi ɛzonlenlɛsua ne la gyakyile gyima ne.​—Ɛzela 4:24.

4. Mɔɔ bɛdwazole bɛtiale ɛzonlenlɛsua ne ɛzilɛ la, duzu a Gyihova yɛle wɔ nwolɛ a? (Ayezaya 55:11)

⁴ Awozonle ɛzonlenlɛma mɔɔ de azɛlɛ ne azo nee menli bie mɔɔ wɔ Pɛhyea arane ne anu la bɔle kpɔkɛ kɛ bɛmaa bɛagyakyi ɛzonlenlɛsua ne ɛzilɛ. Noko ɛnee Gyihova ɛbɔ kpɔkɛ kɛ ɔmaa bɛazi ye bieko, na ye bodane ba nu dahuu. (Kenga Ayezaya 55:11.) Ɔkpale ngapezonli bie mɔɔ lɛ akɛnrasesebɛ mɔɔ bɛfɛlɛ ye Zɛkalaya la na ɔyele ɛnyelɛzodeɛnwunlɛ ngakyile mɔtwɛ mɔɔ yɛ anyelielɛ la ɔhilele ye, na ɛnee ɔwɔ kɛ ɔka nwolɛ edwɛkɛ ɔkile Dwuuma ne ɔfa ɔmaa bɛ anwosesebɛ. Ɛhye boale Dwuuma ne ɔmaanle bɛnwunle kɛ ɔnle kɛ bɛsulo bɛ agbɔvolɛ na ɔmaanle bɛ anwosesebɛ ɔmaanle bɛdoale Gyihova gyima ne azo. Wɔ ɛnyelɛzodeɛnwunlɛ ne mɔɔ tɔ zo nnu la anu, Zɛkalaya nwunle kɛnlaneɛbaka nee ɔlivi mbaka nwiɔ.

5. Duzu a yɛbazuzu nwo wɔ edwɛkɛ ɛhye anu a?

⁵ Ɔyɛ a yɛ muala yɛ sa nu to. Ɔti saa yɛsuzu anwosesebɛmaanlɛ mɔɔ Gyihova luale Zɛkalaya ɛnyelɛzodeɛnwunlɛ mɔɔ tɔ zo nnu la azo vale maanle Yizilayɛma la anwo a, ɔbaboa yɛdayɛ noko. Saa yɛte ɔ bo a, ɔbahola yeaboa yɛ yeamaa yɛazonle Gyihova nɔhalɛ nu wɔ mekɛ mɔɔ yɛlɛyia dwazotia, yɛ tɛnlabelɛ bahakyi nee mekɛ mɔɔ yɛ sa baha adehilelɛ bie mɔɔ yɛnde ɔ bo la.

6. Kɛzi kɛnlaneɛbaka nee ɔlivi mbaka nwiɔ ne anwo ɛnyelɛzodeɛnwunlɛ ne mɔɔ wɔ Zɛkalaya 4:1-3 la maanle Dwuuma ne anwosesebɛ ɛ? (Nea ɔ nyunlu nvoninli ne.)

⁶ Kenga Zɛkalaya 4:1-3. Kɛnlaneɛbaka nee ɔlivi mbaka nwiɔ ne anwo ɛnyelɛzodeɛnwunlɛ ne maanle Dwuuma ne nyianle akɛnrasesebɛ gyinlanle dwazotia nloa. Adenle boni azo? Ɛyɛle ye nzonlɛ kɛ nwole ne mɔɔ twi gua kɛnlaneɛbaka ne anu la abo ɛmpɛ ɔ? Ɔlivi mbaka nwiɔ ne twi nwole gua kyɛnze anu kuloonwu bie anu, na akee ɔsonyi ɔfi kyɛnze ne anu ɔkɔgua ahɛnlaneɛ nsuu ne mɔɔ gyigyi kɛnlaneɛbaka ne azo la anu. Nwole ɛhye maa ahɛnlaneɛ ne mɔ gyinla zo mɔɔ bɛnnu ɛlɛ a. Zɛkalaya bizale kɛ: “Duzu a ɛhye mɔ abo kile a?” Anwumabɔvolɛ ne hanle Gyihova edwɛkɛ ɛhye hilele ye: “‘Tɛ sogyama anwosesebɛ, anzɛɛ tumi zo, emomu, me sunsum ne azo,’ ɛlɔne Gyihova a ɛha a.” (Zɛk. 4:4, 6) Nwole ne mɔɔ vi mbaka ne anu la gyi ɛkɛ maa Gyihova sunsum nwuanzanwuanza ne mɔɔ tumi kpole wɔ nu mɔɔ ɔ bo ɛmpɛ ɛlɛ la. Saa ɛfa Pɛhyea Belemgbunlimaanle ne anu sogyama ne amuala anwosesebɛ ɛtoto tumi mɔɔ wɔ Nyamenle sunsum ne anu la anwo a, ɔndwu ɛleka biala. Kɛmɔ Gyihova boka menli mɔɔ ɛlɛsi ɛzonlenlɛsua ne anwo la ati, ɛnee bɛbahola bɛagyinla dwazotia biala anloa na bɛawie gyima ne. Edwɛkɛ ɛhye maa anwosesebɛ kpalɛ! Mɔɔ ɛnee ɔwɔ kɛ Dwuuma ne yɛ la ala a le kɛ bɛbava bɛ nwo bɛado Gyihova anwo zo na bɛayɛ gyima ne. Zɔhane ala a bɛyɛle a, ɔnva nwo kɛ ɛnee bɛtɛmaanle bɛ adenle kɛ bɛzi sua ne la.

7. Nzenzaleɛ boni a maanle menli mɔɔ ɛlɛsi ɛzonlenlɛsua ne la anwo dɔle bɛ ekyi a?

⁷ Nzenzaleɛ bie maanle menli mɔɔ ɛlɛsi ɛzonlenlɛsua ne la anwo dɔle bɛ ekyi. Duzu nzenzaleɛ ɔ? Wɔ 520 K.Y.M., belemgbunli fofolɛ mɔɔ bɛfɛlɛ ye Dalayɛse I la a ɛnee ɛlɛdi tumi wɔ Pɛhyea a. Wɔ ye tumililɛ ne ɛvolɛ mɔɔ tɔ zo nwiɔ la anu, ɔnwunle kɛ bɛ sa mɔɔ bɛvale bɛdole ɛzonlenlɛsua ne ɛzilɛ zo la ɛnle ye adenle zo. Akee Dalayɛse maanle adenle kɛ bɛdoa gyima ne azo. (Ɛzela 6:1-3) Zɔhane edwɛkɛ ne  angomekye zinle awie biala anwo, noko tɛ mɔɔ ɔyɛle la ala ɛne. Belemgbunli ne hanle hilele menli mɔɔ ɛbɔ bɛ ɛyia la kɛ bɛmmafa bɛ nloa bɛwulowula suazilɛ gyima ne anu bieko na bɛva ezukoa nee ninyɛne mɔɔ bɛhyia nwo la bɛboa bɛ! (Ɛzela 6:7-12) Ɛhye ati, ɔkadwu ɛvolɛ nna nee ɔ nzi mekɛ ekyi wɔ 515 K.Y.M. anu la, ɛnee Dwuuma ne ɛzi ɛzonlenlɛsua ne ɛwie.​—Ɛzela 6:15.

8. Saa ɛlɛyia dwazotia a, kɛ ɔkɛyɛ na wɔanyia akɛnrasesebɛ ɛ?

⁸ Ɛnɛ noko, Gyihova azonvolɛ dɔɔnwo yia dwazotia. Kɛ neazo la, bie mɔ de maanle mɔɔ bɛmmaa yɛnyɛ yɛ gyima ne foa bie wɔ ɛkɛ la anu. Wɔ maanle ɛhye mɔ anu, bie a bɛbahye yɛ mediema ne mɔ “bɛahɔ amɛnladoma nee arelemgbunli nyunlu” amaa yeayɛ daselɛlilɛ yeamaa bɛ. (Mat. 10:17, 18) Ɔdwu mekɛ ne bie na bɛyɛ nzenzaleɛ wɔ tumililɛ ne anu a, bie a bɛ nwo tɔ bɛ ekyi. Anzɛɛ bie a ndɛnebuavolɛ bie mɔɔ di pɛlepɛle la bua ndɛne mɔɔ maa bɛkola bɛyɛ bɛ gyima ne a. Alasevolɛ gyɛne noko yia dwazotia ngakyile. Bɛde maanle mɔɔ bɛlɛ fanwodi kpole bɛsonle Gyihova la anu, noko bɛ mbusuafoɔ mɔɔ bɛbɔ kpɔkɛ kɛ bɛmaa bɛagyakyi Nyamenle ɛzonlenlɛ la dwazo tia bɛ. (Mat. 10:32-36) Fane dɔɔnwo ne ala, saa dwazotiama ne nwu kɛ mɔdenle mɔɔ bɛlɛbɔ kɛ bɛmaa bɛ busuanli ne agyakyi Gyihova ɛzonlenlɛ la anyɛ boɛ a, akee bɛgyakyi ye. Wɔ tɛnlabelɛ bie mɔ anu, menli mɔɔ bɛdwazole bɛtiale bɛ ɛsesebɛ la nzinlii rayɛle Alasevolɛ mɔɔ bɔ mɔdenle. Saa ɛyia dwazotia a, mmamaa ɛ sa nu to! Nyia akɛnrasesebɛ. Gyihova nee ye sunsum nwuanzanwuanza ne mɔɔ tumi wɔ nu la boka ɛ nwo ɔti ɔnle kɛ ɛsulo ɛhwee!

9. Duzu ati a Dwuuma ne bie arɛle bɔle wɔ mekɛ mɔɔ bɛdole ɛzonlenlɛsua fofolɛ ne adiabo ne la ɛ?

⁹ Mɔɔ bɛdole ɛzonlenlɛsua fofolɛ ne adiabo ne la, Dwuuma mɔɔ ɛyɛ mgbanyinli la bie mɔ zunle. (Ɛzela 3:12) Bɛnwunle ɛzonlenlɛsua ne mɔɔ lɛ anyunlunyia mɔɔ Sɔlɔmɔn zile la, na bɛdele nganeɛ kɛ saa bɛfa fofolɛ ne mɔɔ bɛbazi la bɛtoto alimoa ɛdeɛ ne anwo a, ɔbayɛ “debie mgbane.” (Hagae 2:2, 3) Kɛmɔ ɛnee ngakyile kpole wɔ dɛba ne nee fofolɛ ne avinli la ati, bɛ nye anlie nwolɛ fee. Ɛnee Zɛkalaya ɛnyelɛzodeɛnwunlɛ ne baboa bɛ yeamaa bɛali bɛ rɛle mɔɔ bɔle la azo. Adenle boni azo?

10. Kɛzi anwumabɔvolɛ ne edwɛkɛ mɔɔ wɔ Zɛkalaya 4:8-10 la boale Dwuuma maanle bɛlile bɛ rɛle mɔɔ bɔle la azo ɛ?

¹⁰ Kenga Zɛkalaya 4:8-10. Mɔɔ anwumabɔvolɛ  ne hanle kɛ Dwuuma bɛali “fɛlɛko na bɛanwu ɛzuzunyɛma ne wɔ Zɛlubabɛle [Dwuuma Amɛnlado ne] asa anu” la, duzu a ɛnee ɔlɛkile a? Ɛzuzunyɛma le nyɛma mɔɔ bɛva bolɛ bɛhenda ye mɔɔ bɛfa bɛto debie nwo bɛnea saa ɔtenrɛ a. Ɛnee anwumabɔvolɛ ne ɛlɛmaa Nyamenle menli anyia anwodozo kɛ, wɔ bie mɔ anye zo, ɛzonlenlɛsua ne ɛnrɛyɛ kɛnlɛma kɛ dɛba ne ɛdeɛ, noko bɛbazi bɛawie yɛɛ ɔbayɛ kɛ mɔɔ Gyihova kpondɛ la. Ɔ nye balie nwo ɔti duzu ati a ɔnle kɛ bɛ nye die nwo a? Mɔɔ hyia Gyihova la a le kɛ bɛbazonle ye wɔ ɛzonlenlɛsua fofolɛ ne anu kɛ mɔɔ ɔkpondɛ la. Saa Dwuuma fa bɛ adwenle sie Gyihova mɔɔ bɛsonle ye kpalɛ na bɛanyia ɔ nyunlu ɛlolɛ la azo a, bɛ nye balie bieko.

11. Ngyegyelɛ boni mɔ a Gyihova azonvolɛ bie mɔ yia ɛnɛ a?

¹¹ Saa yɛ nuhua dɔɔnwo tɛnlabelɛ ne kakyi a, ɔnla aze ɔmmaa yɛ. Bɛmaa mediema bie mɔ mɔɔ ɛva ɛvolɛ dɔɔnwo ɛyɛ dahuu ɛzonlenlɛ gyima titili foa bie la gyimalilɛ fofolɛ. Kɛmɔ menli bie mɔ ɛyɛ mgbanyinli la ati, ɔwɔ kɛ bɛfa nwolɛ adenle bie mɔɔ bɛlɛ mɔɔ bɛ nye die nwo la bɛto ɛkɛ. Saa yɛkɔ tɛnlabelɛ ɛhye bie anu na yɛdi nwolɛ nyane a, nvonleɛ ɛnle nwo. Mɔlebɛbo ne, bie a yɛnrɛde kpɔkɛzilɛ ne abo anzɛɛ yɛnrɛlie yɛnrɛdo nu. Wɔannea a yɛbahakye ninyɛne mɔɔ ɛnee yɛyɛ la. Na bie a yɛ sa nu bado na yɛade nganeɛ kɛ kɛkala yɛnrɛhola yɛnrɛyɛ dɔɔnwo yɛnrɛmaa Gyihova. (Mrɛ. 24:10) Kɛzi Zɛkalaya ɛnyelɛzodeɛnwunlɛ ne baboa yɛ yeamaa yɛahɔ zo yɛayɛ biala mɔɔ yɛbahola la yɛamaa yɛ Nyamenle ne ɛ?

12. Saa yɛ tɛnlabelɛ ne kakyi na yɛ rɛle bɔ a, kɛzi Zɛkalaya ɛnyelɛzodeɛnwunlɛ ne baboa yɛ yeamaa yɛagyinla ɔ nloa ɛ?

¹² Saa yɛ tɛnlabelɛ ne kakyi na yɛnwu ninyɛne kɛ mɔɔ Gyihova nwu ye la a, ɔbaboa yɛ yeamaa yɛagyinla ɔ nloa kpalɛ. Gyihova ɛlɛyɛ gyima mgbole ɛnɛ, na yɛnyia nwolɛ adenle kpole kɛ ɔle yɛ gɔnwo gyimayɛvo la. (1 Kɔl. 3:9) Yɛ gyimalilɛ bahola ahakyi, noko Gyihova ɛlɔlɛ mɔɔ ɔlɛ ɔmaa yɛ la ɛnrɛhakyi. Ɔti saa nzenzaleɛ bie mɔɔ bɛbayɛ wɔ ahyehyɛdeɛ ne anu la ka ɛdawɔ mumua ne a, mmasɛkye wɔ mekɛ ɛdwenledwenle deɛmɔti bɛyɛle zɔhane nzenzaleɛ ne la anwo. Yɛɛ kɛ anrɛɛ ɛbava wɔ adwenle wɔazie “mekɛ mɔɔ ɛze ɛhɔ la” azo la, sɛlɛ Gyihova kɛ ɔboa wɔ ɔmaa ɛnwu kɛzi nzenzaleɛ ne baboa la. (Nol. 7:10) Mmadwenle ninyɛne mɔɔ ɛnrɛhola ɛnrɛyɛ ye bieko la anwo, emomu fa wɔ adwenle sie ninyɛne mɔɔ ɛbahola wɔayɛ ye kɛkala azo. Zɛkalaya  ɛnyelɛzodeɛnwunlɛ ne ɛmaa yɛnwu kɛzi ɔhyia kɛ yɛbahɔ zo yɛanyia adwenle kpalɛ la. Ɔbamaa yɛahɔ zo yɛali fɛlɛko na yɛali nɔhalɛ wɔ mekɛ mɔɔ yɛ tɛnlabelɛ ne bahakyi bɔbɔ la.

13. Duzu ati a ɛnee Yizilayɛma bie mɔ bahola ade nganeɛ kɛ, ɛzonlenlɛsua ne mɔɔ bɛse bɛzi ye bieko la ɛnle adwenle kpalɛ a?

¹³ Ɛnee bɛva bɛ sa bɛdo ɛzonlenlɛsua ne ɛzilɛ zo. Noko Ɛsɔfo Kpanyinli Gyɛhyua (Dwɔhyua) nee Amɛnlado Zɛlubabɛle “bɔle ɔ bo kɛ bɛsi Nyamenle sua ne.” (Ɛzela 5:1, 2) Wɔannea a Dwuuma bie mɔ adwenle bayɛ bɛ kɛ bɛanzi kpɔkɛ kpalɛ. Saa bɛka kɛ bɛsi ɛzonlenlɛsua ne bieko a, bɛ agbɔvolɛ banwu bɛ na bɛbalua adenle biala mɔɔ bɛbanyia la azo bɛagyegye bɛ. Ɛnee ɔwɔ kɛ Dwɔhyua nee Zɛlubabɛle nyia anwodozo kɛ Gyihova gyi bɛ nzi. Na bɛnwunle ye zɔ noko. Wɔ adenle boni azo?

14. Kɛ mɔɔ Zɛkalaya 4:12, 14 kile la, edwɛkɛ boni a bɛhanle bɛhilele Ɛsɔfo Kpanyinli Dwɔhyua nee Amɛnlado Zɛlubabɛle mɔɔ maanle bɛ anwosesebɛ a?

¹⁴ Kenga Zɛkalaya 4:12, 14. Wɔ ɛnyelɛzodeɛnwunlɛ ne foa ɛhye anu, anwumabɔvolɛ ne maanle Nyamenle ngapezonli nɔhavo ne nwunle kɛ ɔlivi mbaka nwiɔ ne gyi ɛkɛ maa “menli nwiɔ ne mɔɔ bɛkpokpa bɛ” la​—Dwɔhyua nee Zɛlubabɛle. Wɔ sɛkɛlɛneɛ adenle zo, ɛnee mrenyia nwiɔ ne gyi Gyihova, “azɛlɛ ye kɔsɔɔti Awulae ne anwo ɛkɛ ne.” Ɔle nwolɛ adenle kpole kpalɛ! Ɛnee Gyihova lɛ bɛ nu anwodozo. Ɔti ɛnee Yizilayɛma bahola anyia edwɛkɛ mɔɔ mrenyia nwiɔ ɛhye baha la anu anwodozo, ɔluakɛ Nyamenle ɛlɛdua bɛ nwo zo ahile Yizilayɛma adenle.

15. Kɛ ɔkɛyɛ na yɛahile kɛ yɛdie Gyihova adehilelɛ mɔɔ wɔ ye Edwɛkɛ ne anu la yɛto nu ɛ?

¹⁵ Debie ko mɔɔ Gyihova dua zo fa adehilelɛ maa ye menli ɛnɛ la a le ye Edwɛkɛ Baebolo ne. Yeha kɛzi yɛbahola yɛazonle ye kpalɛ la wɔ buluku nwuanzanwuanza zɔhane anu. Kɛ ɔkɛyɛ na yɛahile kɛ yɛdie adehilelɛ mɔɔ wɔ Nyamenle Edwɛkɛ ne anu la yɛto nu ɛ? Ɔwɔ kɛ yɛnyia alagye yɛkenga na yɛte ɔ bo kpalɛ. Biza ɛ nwo kɛ: ‘Saa mekenga Baebolo ne anzɛɛ yɛ mbuluku ne mɔ bie a, asoo megyinla na medwenledwenle nwo kpalɛ? Asoo mebɔ mɔdenle kɛ mebade Baebolo nu nɔhalɛ mɔɔ “bɛ bo ɛdelɛ yɛ se” la abo ɔ? Anzɛɛ mefa me nye mefa edwɛkɛ ne anu ala?’ (2 Pita 3:16) Saa yɛnyia mekɛ yɛdwenledwenle mɔɔ Gyihova ɛlɛkilehile yɛ la anwo a, yɛbahola yɛali ye adehilelɛ zo na yɛayɛ yɛ edwɛkɛhanlɛ gyima ne.​—1 Tim. 4:15, 16.

16. Saa yɛnde adehilelɛ bie mɔɔ “akɛlɛ nɔhavo nee badwema ne” bava amaa yɛ la abo kpalɛ a, duzu a baboa yɛ yeamaa yɛali zo a?

 ¹⁶ Eza Gyihova dua “akɛlɛ nɔhavo nee badwema ne” anwo zo fa adehilelɛ maa yɛ. (Mat. 24:45) Ɔdwu mekɛ ne bie a akɛlɛ ɛhye fa adehilelɛ mɔɔ yɛnde ɔ bo kpalɛ la maa yɛ. Kɛ neazo la, bie a bɛbamaa yɛ adehilelɛ fɔɔnwo bie wɔ kɛzi yɛbanyia yɛ ti wɔ esiane bie anu la anwo, noko wɔannea a yɛbanyia adwenle kɛ esiane zɔhane bie ɛnrɛzi wɔ ɛleka mɔɔ yɛde la. Anzɛɛ bie a yɛbade nganeɛ kɛ akɛlɛ ne ɛlɛyɛ kyengye somaa wɔ mekɛ mɔɔ ewulenzane bie ɛra la. Saa yɛte nganeɛ kɛ yɛnrɛhola yɛnrɛva adehilelɛ mɔɔ bɛva bɛmaa yɛ la yɛnrɛli gyima a, duzu a ɔwɔ kɛ yɛyɛ a? Yɛbahola yɛadwenle kɛzi adehilelɛ mɔɔ Dwɔhyua nee Zɛlubabɛle vale maanle Yizilayɛma la boale bɛ wɔ mekɛ mɔɔ bɛlile zo la anwo. Eza yɛbahola yɛadwenle Baebolo ne anu edwɛkɛ gyɛne mɔɔ yɛgenga la anwo. Ɔdwu mekɛ ne bie a, Nyamenle menli nyia adehilelɛ mɔɔ wɔ sonla nye zo nrɛlɛbɛ ɛnle nu noko yemɔ liele bɛ ngoane la.​—Ndɛ. 7:7; 8:10.

17. Kɛzi kɛnlaneɛbaka nee ɔlivi mbaka nwiɔ ne anwo ɛnyelɛzodeɛnwunlɛ ne boale Dwuuma ɛ?

¹⁷ Ɔbayɛ kɛ ɛnyelɛzodeɛnwunlɛ ne mɔɔ Zɛkalaya nwunle ye la le sikalɛ, noko ɔboale Dwuuma ɔmaanle bɛnyianle bɛ gyima nee bɛ ɛzonlenlɛ ne anwo adwenle kpalɛ. Na mɔɔ bɛvale mɔɔ wɔ nu la bɛlile gyima la, bɛnwunle kɛ Gyihova ɛlɛfi ɛlɔlɛ nu aboa bɛ na yeahile bɛ adenle. Gyihova vale ye sunsum nwuanzanwuanza ne mɔɔ tumi wɔ nu la boale bɛ maanle bɛdoale zo bɛyɛle gyima ne na bɛ nye liele bieko.​—Ɛzela 6:16.

18. Kɛzi Zɛkalaya ɛnyelɛzodeɛnwunlɛ ne bahola aboa wɔ ɛ?

¹⁸ Zɛkalaya ɛnyelɛzodeɛnwunlɛ ne mɔɔ fale kɛnlaneɛbaka nee ɔlivi mbaka nwiɔ ne anwo la bahola aboa wɔ kpalɛ. Kɛ mɔɔ yɛzuzu nwo la, ɔbahola yeaboa wɔ yeamaa wɔanyia anwosesebɛ wɔagyinla dwazotia nloa, wɔanyia anyelielɛ mɔɔ ɛhyia wɔ mekɛ mɔɔ wɔ tɛnlabelɛ ne bahakyi, na wɔanyia anwodozo mɔɔ ɛhyia amaa wɔali adehilelɛ mɔɔ ɛnde ɔ bo kpalɛ la azo. Saa ɛlɛyia ngyegyelɛ a, duzu a ɔwɔ kɛ ɛyɛ a? Mɔɔ limoa, nwu mɔɔ Zɛkalaya nwunle ye la​—daselɛ mɔɔ kile kɛ Gyihova ɛlɛnea Ye menli ne la. Akee dua mɔɔ ɛnwu ye la azo nyia Gyihova anu anwodozo na kɔ zo fa wɔ ahonle muala sonle ye. (Mat. 22:37) Saa ɛyɛ zɔ a, Gyihova baboa wɔ yeamaa wɔava anyelielɛ wɔazonle ye dahuu.​—Kɔl. 1:10, 11.