1. Duzu a awovolɛ kulo kɛ bɛyɛ bɛmaa bɛ mra a?

 AWOVOLƐ, yɛze kɛ bɛkulo kɛ bɛboa bɛ mra bɛmaa bɛnwu Gyihova na bɛkulo ye. Noko yɛnva yɛ nye yɛnnwu Nyamenle. Kɛ ɔkɛyɛ na bɛaboa bɛ mra bɛamaa bɛanwu kɛ ɔle Awie mɔɔ amgba ɔwɔ ɛkɛ na bɛabikye ye ɛ?​—Gye. 4:8.

2. Kɛ ɔkɛyɛ na awovolɛ ahilehile bɛ mra Gyihova subane ne mɔ anwo debie ɛ?

² Adenle titili ko mɔɔ bɛbahola bɛalua zo bɛaboa bɛ mra bɛamaa bɛabikye Gyihova la a le kɛ bɛ nee bɛ bazukoa Baebolo ne. (2 Tim. 3:14-17) Noko Baebolo ne kile yɛ adenle bieko mɔɔ ngakula bahola alua zo azukoa ɔ nwo debie a. Wɔ Mrɛlɛbulɛ buluku ne anu, ɔda ali kɛ selɛ bie hakyele ɔ ra kɛ ɔmmamaa ɔ rɛle fi Gyihova subane ne mɔ mɔɔ da ali wɔ abɔdeɛ nu la ɛlɛ. (Mrɛ. 3:19-21) Yɛbazuzu ndenle mɔɔ awovolɛ balua abɔdeɛ zo aboa bɛ mra bɛamaa bɛazukoa Gyihova anwo debie la bie mɔ anwo.

3. Moalɛ boni a ɔwɔ kɛ awovolɛ fa maa bɛ mra a?

³ Baebolo ne ka kɛ, bɛnwu Nyamenle “subane ne mɔ mɔɔ ɛnyelɛ ɛnnwu bɛ la wienyi ɔvi mekɛ mɔɔ ɔbɔle ewiade la, ɔluakɛ bɛdua ninyɛne mɔɔ ɔbɔle la azo bɛnwu ye.” (Wlo. 1:20) Awovolɛ, ɔda ali kɛ saa bɛ nee bɛ mra fi sua nu kɔ ɛleka bie a, bɛ nye die. Bɛva zɔhane mekɛ ne bɛboa bɛ mra bɛmaa bɛnwu kɛzi ‘ninyɛne mɔɔ Gyihova ɛbɔ’ la maa yɛnwu ye subane ngɛnlɛma ne mɔ la. Ɔti bɛmaa yɛnlea mɔɔ awovolɛ bahola azukoa avi Gyisɛse neazo ne anu la.

4. Kɛzi Gyisɛse luale abɔdeɛ zo hilehilele ye ɛdoavolɛma ne ɛ? (Luku 12:24, 27-30)

 ⁴ Nea kɛzi Gyisɛse luale abɔdeɛ zo hilehilele la. Mekɛ bie, ɔhanle ɔhilele ye ɛdoavolɛma kɛ, bɛnlea ahɔhɔsɛlɛ nee ɛbɔ nu aloa. (Kenga Luku 12:24, 27-30.) Anrɛɛ Gyisɛse bahola abɔ nane anzɛɛ baka gyɛne biala duma, noko ɔhanle anloma nee felawɔse mɔɔ ye ɛdoavolɛma ne ze bɛ kpalɛ la anwo edwɛkɛ. Ɔbayɛ kɛ ye ɛdoavolɛma ne nwunle kɛ ahɔhɔsɛlɛ luolua anwomanyunlu yɛɛ felawɔse noko ɛfifi ndile ne anu. Ɛbahola wɔapɛ Gyisɛse mɔɔ yedende ɔ sa wɔ ninyɛne ɛhye mɔ anwo wɔ mekɛ mɔɔ ɔlɛtendɛ la anwo nvoninli ɔ? Na mɔɔ ɔhanle ninyɛne ɛhye mɔ anwo edwɛkɛ ɔwiele la, duzu a ɔyɛle a? Ɔhilehilele bɛ anwuma Selɛ ne atiakunlukɛnlɛma nee ye nyeleyɛlɛ ne anwo debie kɛnlɛma: Gyihova bamaa ye azonvolɛ nɔhavoma aleɛ nee adɛladeɛ kɛ mɔɔ ɔyɛ ɔmaa ahɔhɔsɛlɛ nee felawɔse la.

5. Gyihova abɔdeɛ boni a awovolɛ bahola ava ahilehile bɛ mra ɔ nwo debie a?

⁵ Awovolɛ, kɛ ɔkɛyɛ na bɛazukoa adenle mɔɔ Gyisɛse luale zo hilehilele la ɛ? Bɛbahola bɛaha abɔdeɛ mɔɔ bɛdabɛ mumua ne bɛ nye die nwo, bie a nane anzɛɛ baka mɔɔ bɛ nye die nwo la anwo edwɛkɛ bɛahile bɛ ra ne. Saa bɛlɛyɛ ye zɔ a, bɛhilehile mɔɔ ninyɛne ɛhye mɔ maa yɛnwu ye wɔ Gyihova anwo la anu bɛhile bɛ. Akee bɛbahola bɛabiza bɛ ra ne nane anzɛɛ baka mɔɔ ɔ nye die nwo la. Saa bɛka debie mɔɔ bɛ ra ne anye die nwo la anwo edwɛkɛ a, bie a ɔbadie bɛ kpalɛ wɔ mekɛ mɔɔ bɛlɛkilehile ye Gyihova anwo debie la.

6. Duzu a yɛbahola yɛazukoa yɛavi Christopher mame neazo ne anu a?

⁶ Asoo ɔwɔ kɛ awovolɛ fa mekɛ dɔɔnwo yɛ nane anzɛɛ baka fɔɔnwo bie anwo neɛnleanu kolaa na bɛahola bɛaha mɔɔ ɔmaa yɛnwu ye wɔ Gyihova anwo la bɛahile bɛ mra ɔ? Kyɛkyɛ. Gyisɛse angilehile kɛzi ahɔhɔsɛlɛ di aleɛ anzɛɛ kɛzi aloa nyi la anu angɔ moa. Saa bɛ ra ne kulo kɛ ɔsukoa Gyihova abɔdeɛ nwo ninyɛne dɔɔnwo bɔbɔ a, ɔdwu mekɛ ne bie a edwɛkɛ anzɛɛ kpuya sikalɛ bie bahola aboa bɛ ra ne yeamaa yeade mɔɔ bɛlɛkile la abo. Tie mɔɔ adiema Christopher hanle wɔ mekɛ mɔɔ ɛnee ɔle kakula la anwo la: “Ɛnee me mame ka edwɛkɛ sikalɛ mɔɔ boa yɛ ɔmaa yɛ nye die abɔdeɛ mɔɔ ɛbɔ yɛ ɛyia la anwo la. Kɛ neazo la, saa yɛgyi awoka nwo a, bie a ɔka kɛ: ‘Bɛnlea kɛzi awoka ɛhye mɔ le mgbole na eza bɛle ngɛnlɛma la! Asoo Gyihova anwo ɛnyɛ ɛzulolɛ ɔ?’ Anzɛɛ saa yɛkɔ ɛnweazo a, bie a ɔka kɛ: ‘Bɛnlea kɛzi azɛlɛkye ne mɔ anwo yɛ se la! Asoo Nyamenle ɛnlɛ tumi kpole ɔ?’” Christopher hanle kɛ: “Edwɛkɛ sikalɛ ɛhye mɔɔ maa yɛdwenle yɛkɔ moa la boale yɛ kpalɛ.”

7. Kɛ ɔkɛyɛ na bɛahilehile bɛ mra bɛamaa bɛadwenledwenle abɔdeɛ nwo ɛ?

⁷ Mekɛ mɔɔ bɛ mra ɛlɛyɛ mgbanyinli la, bɛbahola bɛahilehile bɛ bɛamaa bɛadwenledwenle abɔdeɛ nwo bɛahɔ moa amaa bɛanwu Gyihova subane ne mɔ. Bɛbahola bɛaha Nyamenle abɔdeɛ ko anwo edwɛkɛ na bɛabiza bɛ mra ne mɔ kɛ, “Duzu a ɛhye maa bɛnwu ye wɔ Gyihova anwo a?” Saa bɛka mɔɔ bɛnwu ye la bɛkile bɛ a, bie a ɔbazi bɛ nwo.​—Mat. 21:16.

8. Saa Yizilayɛ awovolɛ lua “adenle nu” a, nwolɛ adenle boni a bɛnyia a?

⁸ Bɛhanle bɛhilele Yizilayɛ awovolɛ kɛ, saa “bɛlua adenle nu” a, bɛva Gyihova mɛla ne bɛhilehile bɛ mra. (Dit. 11:19) Ɛnee ndenle dɔɔnwo wɔ Yizilayɛ maanle ne anu mɔɔ menli fa zo a. Ɛnee bɛnwu nane, nloma yɛɛ felawɔse ngakyile dɔɔnwo wɔ adenle nu. Saa Yizilayɛ mbusua lua adenle nu a, awovolɛ nyia nwolɛ adenle ka Gyihova abɔdeɛ ne mɔ anwo  edwɛkɛ kile bɛ mra. Awovolɛ, bɛdabɛ noko bɛlɛ nwolɛ adenle ko ne ala bie mɔɔ bɛbahola bɛalua abɔdeɛ zo bɛahilehile bɛ mra a. Nea kɛzi awovolɛ bie mɔ ɛyɛ zɔ la.

9. Duzu a yɛbahola yɛazukoa yɛavi Punitha nee Katya ɛkɛ a?

⁹ Ɛrɛladane bie mɔɔ bɛfɛlɛ ye Punitha mɔɔ de India suakpole bie azo la hanle kɛ: “Saa yɛkɔkpɔla yɛ mbusuafoɔ a, yɛbu ye kɛ ɔle nwolɛ adenle mɔɔ yɛbalua zo yɛaboa yɛ mra ne mɔ yɛamaa bɛazukoa Gyihova abɔdeɛ mɔɔ yɛ nwanwane la anwo debie a. Mete nganeɛ kɛ saa me mra ne mɔ fi suakpole ne mɔɔ menli dɔɔnwo wɔ zo la azo a, ɔmaa bɛte abɔdeɛ bo kpalɛ.” Awovolɛ, saa bɛnyia mekɛ bɛ nee bɛ mra kɔneɛnlea ɛleka mɔɔ le kɛnlɛma la a, bɛ mra ne mɔ arɛle ɛnrɛvi ye ɛlɛ. Adiema raalɛ Katya mɔɔ vi Moldova la hanle kɛ: “Debie mɔɔ mekakye ye kpalɛ wɔ me ngakula nu la a le mekɛ mɔɔ me nee me awovolɛ dule adenle hɔle ɛleka bie la. Me nye sɔ mɔɔ bɛyɛ bɛmaa me la, kɛ bɛhilehilele me wɔ me ngakula nu kɛ mengyinla na menea Gyihova abɔdeɛ na menlua zo menwu ye la.”

10. Saa ɔyɛ se kɛ awovolɛ badu adenle avi suakpole zo a, duzu a bɛbahola bɛayɛ a? (Nea ɛlɛka, “ Moalɛ Maa Awovolɛ.”)

¹⁰ Na saa bɛnrɛhola bɛnrɛdu adenle bɛnrɛhɔ ɛleka bie noko ɛ? Amol mɔɔ ɔdaye noko ɔde India la hanle kɛ: “Wɔ ɛleka mɔɔ mede la, awovolɛ fa mekɛ dɔɔnwo yɛ gyima yɛɛ ɛtu adenle wɔahɔ ɛleka gyɛne a, ye bolɛ yɛ se kpalɛ. Noko saa ɛkɔ paake ekyi bie azo anzɛɛ ɛfo ɛbolɔnsam bie azo a, ɛbahola wɔanlea abɔdeɛ na wɔaha mɔɔ ɔmaa yɛnwu ye wɔ Gyihova subane ne mɔ anwo la.” Saa ɛnea ɛleka mɔɔ ɛde la kpalɛ a, bie a ɛdawɔ noko ɛbanwu abɔdeɛ mɔɔ ɛbahola wɔalua zo wɔahilehile ɛ mra ne mɔ a. (Edw. 104:24) Ɛbanwu nloma, ngɛkɛba, mbaka nee ninyɛne gyɛne dɔɔnwo. Karina mɔɔ vi Germany la hanle kɛ: “Me mame anye die felawɔse nwo, ɔti wɔ me ngakula nu, saa  me nee ye lua biala a, ɔka felawɔse ngɛnlɛma mɔɔ ɔnwu ye la anwo edwɛkɛ ɔkile me.” Awovolɛ, eza bɛbahola bɛava vidio nee mbuluku ngakyile mɔɔ ahyehyɛdeɛ ne ɛyɛ mɔɔ fale abɔdeɛ nwo la bɛahilehile bɛ mra. Nɔhalɛ nu, kɛzi bɛ tɛnlabelɛ ne de biala la, bɛbahola bɛaboa bɛ mra bɛamaa bɛanlea abɔdeɛ. Akee bɛmaa yɛzuzu Gyihova subane bie mɔ mɔɔ bɛbahola bɛaha nwolɛ edwɛkɛ bɛahile bɛ mra la anwo.

11. Kɛ ɔkɛyɛ na awovolɛ aboa bɛ mra bɛamaa bɛanwu Gyihova ɛlɔlɛ ne ɛ?

¹¹ Amaa bɛaboa bɛ mra bɛamaa bɛanwu Gyihova ɛlɔlɛ ne la, bɛbahola bɛaha adenle kɛnlɛma mɔɔ nane dɔɔnwo dua zo nea bɛ mra la anwo edwɛkɛ. (Mat. 23:37) Eza bɛbahola bɛaha abɔdeɛ ngakyile ngakyile mɔɔ yɛ nwanwane mɔɔ yɛ nye die nwolɛ la anwo edwɛkɛ. Karina mɔɔ yɛhanle ɔ nwo edwɛkɛ la hanle kɛ: “Saa me nee me mame lua a, ɔmaa me anwosesebɛ kɛ mengyinla na menea kɛzi felawɔse ko biala le ngakyile nee kɛzi ye kɛnlɛma ne da Gyihova ɛlɔlɛ ne ali la. Ɛvolɛ dɔɔnwo ɛpɛ nu, na metɛnea kɛzi bɛyɛlɛ felawɔse na bɛ kɔla le ngakyile la. Bɛmaa mekakye kɛzi Gyihova kulo yɛ la dahuu.”

12. Kɛ ɔkɛyɛ na awovolɛ aboa bɛ mra bɛamaa bɛanwu Nyamenle nrɛlɛbɛ ne ɛ? (Edwɛne 139:14) (Eza nea nvoninli ne.)

¹² Bɛboa bɛ mra bɛmaa bɛnwu Nyamenle nrɛlɛbɛ ne. Nɔhalɛ nu, Gyihova ze nrɛlɛbɛ tɛla awie biala. (Wlo. 11:33) Kɛ neazo la, bɛbahola bɛaha kɛzi nzule mɔɔ kɔ anwuma la yɛ amungu na amungu ne mɔ fi ɛleka ko kɔ ɛleka fofolɛ mɔɔ ɔnyɛ se fee la anwo edwɛkɛ bɛahile bɛ mra. (Dwobu 38:36, 37) Eza bɛbahola bɛaha kɛzi sonlabaka ne yɛ nwanwane la anwo edwɛkɛ. (Kenga Edwɛne 139:14.) Nea kɛzi selɛ bie mɔɔ bɛfɛlɛ ye Vladimir la yɛle ye la. Ɔhanle kɛ: “Kenle ko bie, yɛ ra nrenyia ne vi ye basekɛ ne azo dɔle aze na ɔbodale. Yeangyɛ biala, ye hanle ne hɔle. Me nee me ye hilehilele nu hilele ye kɛ Gyihova bɔle yɛ ngoane ngɛkɛba ne mɔ mɔɔ bɛkola bɛsiezie bɛ nwo a. Yɛmaanle ɔnwunle kɛ yɛnnwu deɛ ɛhye bie wɔ ninyɛne mɔɔ alesama ɛyɛ la anu. Kɛ neazo la, saa kale bie sɛkye a, ɔ ngomekye ɔngola ɔnziezie ɔ nwo. Anwubielɛ ɛhye boale yɛ ra ne ɔmaanle ɔdele Gyihova nrɛlɛbɛ ne abo.”

13. Kɛ ɔkɛyɛ na awovolɛ aboa bɛ mra bɛamaa bɛanwu Nyamenle tumi ne ɛ? (Ayezaya 40:26)

 ¹³ Gyihova se yɛmaa yɛ nye zo yɛnlea anwuma na yɛdwenledwenle kɛzi ye tumi kpole ne ɛmmaa ninyɛne mɔɔ wɔ ɛkɛ la anu ko bɔbɔ ɛmminli la anwo. (Kenga Ayezaya 40:26.) Bɛbahola bɛamaa bɛ mra anwosesebɛ kɛ bɛnlea anwuma na bɛdwenledwenle mɔɔ bɛnwu ye la anwo. Tie mɔɔ adiema raalɛ Tingting mɔɔ vi Taiwan la hanle ye wɔ mɔɔ zile wɔ ye ngakula nu la anwo la: “Kenle ko bie, me nee me mame hɔle akpɔsa wɔ ɛleka bie na yɛlale ɛkɛ. Ye nɔsolɛ nu, yɛnwunle nwɔlɔra dɔɔnwo ɔluakɛ ɛnee yɛnle suakpole zo mɔɔ laete dɔɔnwo wɔ ɛkɛ a. Mekɛ zɔhane, ɛnee melɛyia atipɛnema ngyegyelɛ na ɛnee mengola mennwu ye saa mebahɔ zo meazonle Gyihova nɔhalɛ nu a. Me mame maanle me anwosesebɛ kɛ mendwenledwenle tumi mɔɔ Gyihova vale bɔle nwɔlɔra ne mɔ la anwo, na mengakye kɛ ɔbahola yeava tumi ko ne ala yeaboa me yeamaa meagyinla ngyegyelɛ biala mɔɔ melɛyia la anloa. Abɔdeɛ mɔɔ yɛhɔnleanle wɔ yɛ adendulɛ zɔhane anu la hanle me maanle membɔle mɔdenle kɛ mebanwu Gyihova kpalɛ na yemɔ maanle membɔle kpɔkɛ kɛ mebazonle ye.”

14. Kɛzi awovolɛ bahola alua abɔdeɛ zo aboa bɛ mra bɛamaa bɛanwu kɛ Gyihova le anyelielɛ Nyamenle ɛ?

¹⁴ Gyihova abɔdeɛ maa yɛnwu kɛ ɔ nye die yɛɛ ɔyɛ ninyɛne mɔɔ ka ɛzelekɛ a. Abɔdeɛ nwo nrɛlɛbɛvolɛma ɛnwu kɛ nane dɔɔnwo mɔɔ nloma nee fɛlɛ boka nwo la di nwɔhoa. (Dwobu 40:20) Asoo bɛ mra ɛnwu nane mɔɔ ɛlɛdi nwɔhoa la na yeyɛ bɛ ɛzelekɛ yemaa bɛzele ɛlɛ ɔ? Bie a bɛnwu kusu ralɛ bie mɔɔ ɔlɛfa nyɛma yeali nwɔhoa anzɛɛ ahwea mralɛ mɔɔ bɛlɛdi nwɔhoa la. Mekɛ fofolɛ mɔɔ bɛ mra ne mɔ banwu kɛ nane bie ɛlɛyɛ ninyɛne mɔɔ yɛ ɛzelekɛ na bɛbazele la, bɛmaa bɛnwu ye kɛ yɛsonle anyelielɛ Nyamenle.​—1 Tim. 1:11.

15. Duzu a baboa awovolɛ yeamaa bɛanwu mɔɔ wɔ bɛ mra adwenle nu la ɛ? (Mrɛlɛbulɛ 20:5) (Eza nea nvoninli ne.)

¹⁵ Ɔyɛ a ɔyɛ se kɛ ngakula baha ngyegyelɛ mɔɔ bɛlɛyia la anwo edwɛkɛ ahile bɛ awovolɛ. Saa zɔhane a ɔde wɔ bɛ mra ne mɔ afoa nu a,  bie a ɔwɔ kɛ bɛbɔ mɔdenle kɛ bɛbanwu mɔɔ wɔ bɛ adwenle nu la. (Kenga Mrɛlɛbulɛ 20:5.) Awovolɛ bie mɔ ɛnwu kɛ saa bɛ nee bɛ mra ɛlɛneɛnlea abɔdeɛ a, ɔnyɛ se kɛ bɛbayɛ ɛhye. Duzu ati ɔ? Debie ko a le kɛ ninyɛne dɔɔnwo ɛndwehwe ngakula ne mɔ nee awovolɛ ne mɔ adwenle. Masahiko, selɛ bie mɔɔ vi Taiwan la hanle debie gyɛne noko anwo edwɛkɛ: “Saa yɛ nee yɛ mra ne mɔ kɔ akpɔsa, bie a yɛkɔ awoka ne mɔ azo anzɛɛ ɛnweazo a, ɔmmaa bɛ ahonle ɛndu. Ɔti ɔnyɛ se kɛ yɛ nee bɛ babɔ adawu na yɛanwu mɔɔ wɔ bɛ adwenle nu la.” Katya mɔɔ yɛhanle ɔ nwo edwɛkɛ la hanle kɛ: “Saa yɛkpɔne sukulu a, me mame fa me kɔ ɛleka bie mɔɔ ɛkɛ ne la kɛnlɛma la. Kɛmɔ ninyɛne ɛndwehwe me adwenle la ati, ɔnyɛ se kɛ mebaha mɔɔ zile wɔ sukulu anzɛɛ mɔɔ gyegye me la anwo edwɛkɛ meahile ye.”

16. Kɛ ɔkɛyɛ na mbusua ava Gyihova abɔdeɛ alielie bɛ nye ɛ?

¹⁶ Eza mbusua bahola ava Gyihova abɔdeɛ alielie bɛ nye, na ɛhye bamaa ɛlɔlɛ mɔɔ wɔ bɛ avinli la anu amia kpalɛ. Baebolo ne ka kɛ bɛlɛ “mekɛ mɔɔ bɛsele” yɛɛ “mekɛ mɔɔ bɛwuluwulu.” (Nol. 3:1, 4, ɔbdw.) Gyihova ɛyɛ ɛleka ngɛnlɛma dɔɔnwo wɔ azɛlɛ ye azo mɔɔ yɛbahola yɛahɔ ɛkɛ yɛayɛ ninyɛne mɔɔ yɛ nye die nwo a. Mbusua dɔɔnwo anye die nwo kɛ bɛbabɔ nu bɛahɔ ɛleka mɔɔ mbaka nee nane wɔ, awoka zo anzɛɛ ɛnweanloa. Ngakula bie mɔ anye die nwo kɛ bɛbali nwɔhoa wɔ ɛleka mɔɔ le kɛnlɛma, bɛbanlea nane nane anzɛɛ bɛbabia azule anzɛɛ nyevile. Yɛlɛ nwolɛ adenle ngɛnlɛma dɔɔnwo mɔɔ yɛbahola yɛava yɛavinde yɛahɔlielie yɛ nye wɔ ɛleka mɔɔ Gyihova abɔdeɛ ɛbɔ yɛ ɛyia la!

17. Duzu ati a ɔwɔ kɛ awovolɛ boa bɛ mra maa bɛ nye die abɔdeɛ nwo a?

¹⁷ Wɔ Nyamenle ewiade fofolɛ ne anu, awovolɛ nee ngakula anye balie Gyihova abɔdeɛ nwo adɛla kɛkala. Ɔnrɛyɛ kɛ ɛnɛ la; yɛnrɛzulo nane ne mɔ yɛɛ bɛdabɛ noko bɛnrɛzulo yɛ. (Aye. 11:6-9) Yɛ nye balie Gyihova abɔdeɛ nwo dahuu. (Edw. 22:26) Noko awovolɛ, ɔnle kɛ bɛkendɛ too zɔhane mekɛ ne dwu na bɛaboa bɛ mra bɛamaa bɛ nye alie abɔdeɛ nwo. Mekɛ mɔɔ bɛlɛdua abɔdeɛ zo bɛahilehile bɛ mra ne mɔ Gyihova anwo debie la, bie a bɛ nee Belemgbunli Devidi bayɛ adwenle wɔ ɛhye anwo: “O Gyihova, . . . gyima biala nee wɔ gyima ne mɔ ɛnzɛ.”​—Edw. 86:8.