1-2. (a) Tɛnlabelɛ boni a ɛnee Pɔɔlo wɔ nu wɔ mekɛ mɔɔ ɔhɛlɛle Ɛfɛsɛsema ne kɛlata ne la ɛ, na duzu ati a ɔhɛlɛle a? (b) Kpuya boni mɔ a yɛbazuzu nwo a?

 MƆƆ bɛdole ɛzoanvolɛ Pɔɔlo efiade wɔ ɔdaye mumua ne ye sua nu wɔ Wulomu la, ɛnee ɔkulo kɛ ɔmaa ɔ mediema diedima anwosesebɛ. Ɛnee ɔnrɛhola ɔnrɛhɔ bɛ ɛkɛ ɔnrɛkpɔla bɛ, ɔti ɔhɛlɛle bɛ ngɛlata. Ɔhɛlɛle ngɛlata ɛhye mɔ anu ko wɔ kɛyɛ ɛvolɛ 60 anzɛɛ 61 Y.M. ɔhɔmaanle Ɛfɛsɛsema ne.—Ɛfɛ. 1:1; 4:1.

² Kɛyɛ ɛvolɛ bulu kolaa na Pɔɔlo ahɛlɛ kɛlata ne la, ɔvale mekɛ bie ɔyɛle edwɛkpahanlɛ nee ngilehilelɛ gyima ne wɔ Ɛfɛsɛse. (Gyi. 19:​1, 8-10; 20:​20, 21) Ɛnee ɔkulo ɔ mediema ne mɔ kpalɛ na ɛnee ɔkulo kɛ ɔboa bɛ ɔmaa bɛkɔ zo bɛdi nɔhalɛ bɛmaa Gyihova. Noko duzu ati a ɔhɛlɛle awozinli nee wienyi nwo edwɛkɛ ɔhɔmaanle Kilisienema mɔɔ ɛnee bɛkpokpa bɛ la ɛ? Na duzu a Kilisienema amuala bahola azukoa avi ye folɛdulɛ ɛhye anu a? Maa yɛzuzu kpuya ɛhye mɔ anwo mualɛ ne anwo.

BƐVI AWOZINLI NU BƐHƆ WIENYI NU

3. Ndotonwo boni a Pɔɔlo vale lile gyima wɔ kɛlata mɔɔ ɔhɛlɛle ɔhɔmaanle Ɛfɛsɛsema ne la anu a?

³ Pɔɔlo hɛlɛle Ɛfɛsɛse Kilisienema ne kɛ: “Dɛba ne ɛnee bɛwɔ awozinli nu, na kɛkala bɛra wienyi nu.” (Ɛfɛ. 5:8) Pɔɔlo vale edwɛkɛ agbɔkɛ “awozinli” nee “wienyi” yɛle ndonwo hilele kɛzi ɛnee Ɛfɛsɛsema ne ɛhakyi kpole kpalɛ la. Maa yɛzuzu deɛmɔti Pɔɔlo hanle kɛ ɛnee Ɛfɛsɛsema “wɔ awozinli nu” la anwo.

4. Duzu ati a ɛnee adalɛ ɛzonlenlɛ ti Ɛfɛsɛsema ne wɔ awozinli nu a?

 ⁴ Adalɛ ɛzonlenlɛ ti bɛwɔ awozinli nu. Kolaa na Ɛfɛsɛsema ne mɔɔ Pɔɔlo hɛlɛle bɛ kɛlata ne la azukoa nɔhalɛ ne na bɛarayɛ Kilisienema la, ɛnee bɛyɛ ngɛkɛlɛ bɛmaa adalɛ ɛzonlenlɛ nu ngilehilelɛ nee diedi mgbane. Ɛnee Gilikima bozonle raalɛ Aatɛmese ɛzonlenlɛsua ne wɔ Ɛfɛsɛse, na ɛnee menli mɔɔ de aze wɔ zɔhane mekɛ ne la bu ɛzonlenlɛsua zɔhane kɛ ɔboka azua mgbole nsuu mɔɔ alesama ɛyɛ wɔ ewiade la anwo. Ɛnee awozonlezonlenlɛ ɛli menli mɔɔ kɔsonle wɔ ɛkɛ ne la ati kpalɛ. Dwinvolɛma mɔɔ wɔ ɛkɛ ne la yɛ Aatɛmese ɛzonlenlɛsua ne ananze tɔne na ɔmaanle bɛnyianle bɛ nwo kpalɛ. (Gyi. 19:​23-27) Ɛye yemɔ ɛsie ahane a, ɛnee ngonyiayelɛ noko ɛlie ebia kpalɛ wɔ suakpole ne azo.—Gyi. 19:19.

5. Adenle boni azo a ɛbɛlatane ti ɛnee Ɛfɛsɛsema ne wɔ awozinli nu a?

⁵ Ɛbɛlatane ti ɛnee bɛwɔ awozinli nu. Ɛfɛsɛsema liele duma wɔ ɛbɛlatane ɛbɔlɛ nu na ɛnee bɛnze nwolɛ nyiane bɔbɔ. Ɛnee bɛta bɛte nla nwo edwɛkɛ wɔ suakpole ne nwɔhoalilɛleka ne mɔ nee bɛ ɛzonlenlɛ nu ɛvoyialilɛ ne mɔ abo. (Ɛfɛ. 5:3) Ɛnee “nyiane ɛnle” menli mɔɔ wɔ suakpole ne azo la anu dɔɔnwo ‘anye zo,’ edwɛkɛ mɔɔ kile kɛ, “akee bɛnde nyane bieko” la. (Ɛfɛ. 4:​17-19) Kolaa na Ɛfɛsɛsema ne azukoa Gyihova ngyinlazo mɔɔ fale kpalɛ nee ɛtane nwo la, ɛnee saa bɛyɛ debie ɛtane a, bɛ adwenle ɛngyegye bɛ yɛɛ ɛnee bɛmbu kɛzi Gyihova bu bɛ nyɛleɛ ne mɔ la anwo mgbonda bɔbɔ. Ɛhye ati a ɛnee Pɔɔlo kola ka kɛ ‘bɛ adwenle ɛhɔ awozinli nu yɛɛ bɛhwe bɛ nwo bɛvi ngoane ne mɔɔ Nyamenle fa maa la anwo’ la.

6. Duzu ati a Pɔɔlo holale hanle hilele Ɛfɛsɛsema ne kɛ “kɛkala bɛra wienyi nu” a?

⁶ Noko ɛnee Ɛfɛsɛsema bie mɔ ɛvi awozinli ne anu. Pɔɔlo hɛlɛle kɛ “kɛkala bɛra wienyi nu wɔ Awulae anu.” (Ɛfɛ. 5:8) Bɛliele Ngɛlɛlera ne anu nɔhalɛ ne mɔɔ le wienyi la bɛdole nu. (Edw. 119:105) Ɛfɛsɛsema ɛhye mɔ gyakyile adalɛ ɛzonlenlɛ nu ninyɛne mɔɔ ɛnee bɛyɛ nee ɛbɛlatane mɔɔ ɛnee bɛbɔ la. Ɛnee “bɛzukoa Nyamenle” na bɛlɛyɛ biala mɔɔ bɛbahola  la bɛazonle Gyihova na bɛayɛ mɔɔ sɔ ɔ nye la.—Ɛfɛ. 5:1.

7. Adenle boni azo a yɛ tɛnlabelɛ ne nee Ɛfɛsɛse Kilisienema dɔɔnwo ɛdeɛ ne le ko a?

⁷ Zɔhane ala a kolaa na yɛazukoa nɔhalɛ ne la, ɛnee yɛ ɛzonlenlɛ nee yɛ ɛbɛlabɔlɛ ti yɛwɔ awozinli nu a. Yɛ nuhua bie mɔ lile adalɛ ɛzonlenlɛ nu ɛvoyia ngakyile; yɛ nuhua bie mɔ noko bɔle ɛbɛlatane. Noko mɔɔ yɛzukoale Gyihova ngyinlazo ne mɔ mɔɔ fale kpalɛ nee ɛtane nwo la, yɛyɛle nzenzaleɛ. Yɛbɔle ɔ bo kɛ yɛfa ye tenlene ngyinlazo ne mɔ yɛabɔ yɛ ɛbɛla. Na ɛhye ɛboa yɛ kpalɛ. (Aye. 48:17) Noko kɛkala, yɛyia ngyegyelɛ dahuu. Ɔnle kɛ yɛbikye awozinli ne mɔɔ yɛgyakyi ye yɛ nzi la fee na ‘yɛkɔ zo yɛbɔ yɛ ɛbɛla kɛ wienyi nu mralɛ.’ Kɛ ɔkɛyɛ na yɛayɛ ɛhye ɛ?

TWE Ɛ NWO FI AWOZINLI NE ANWO

8. Kɛ mɔɔ Ɛfɛsɛsema 5:​3-5 kile la, duzu a ɛnee ɔhyia kɛ Ɛfɛsɛsema ne yɛ a?

⁸ Kenga Ɛfɛsɛsema 5:​3-5. Amaa Ɛfɛsɛse Kilisienema ambikye ɛbɛlatane mɔɔ bamaa bɛahɔ awozinli nu la anwo la, ɛnee ɔwɔ kɛ bɛkɔ zo bɛkpo nyɛleɛ mɔɔ ɛnzɔ Gyihova anye la. Bie a le adwɔmane ɛbɛla nee ɛdendɛlɛ evinli. Pɔɔlo hakyele Ɛfɛsɛsema ne kɛ saa bɛbanyia “agyapadeɛ biala wɔ Kelaese nee Nyamenle Belemgbunlililɛ ne anu” a, ɔwɔ kɛ bɛkpo ninyɛne ɛhye mɔ.

9. Duzu ati a ɔwɔ kɛ yɛnea boɛ na yɛanyɛ ninyɛne mɔɔ bamaa yɛabɔ adwɔmane ɛbɛla la ɛ?

⁹ Ɔwɔ kɛ yɛdayɛ noko yɛkɔ zo yɛko yɛtia “awozinli nu gyima mɔɔ nvasoɛ ɛnle zo la” amaa yeankyekye yɛ. (Ɛfɛ. 5:11) Awie mɔ anwubielɛ ɛmaa yela ali wienyi kɛ, saa awie ta nea anzɛɛ ɔtie anzɛɛ ɔka evinli nyɛleɛ anzɛɛ ɛbɛlatane nwo edwɛkɛ a, ɔmmaa ɔnyɛ se kɛ ɔbabɔ ɛbɛlatane. (Gyn. 3:6; Gye. 1:​14, 15) Wɔ maanle ko anu, mediema ekpunli kpole bie vale bɛ nwo agɔnwolɛ wɔ sohyia media zo. Mɔlebɛbo ne, bɛ nuhua dɔɔnwo mɔɔ wɔ ekpunli ne anu la hanle Gyihova nee nɔhalɛ ne nwo edwɛkɛ. Noko ngyikyingyikyi bɛbɔle ɔ bo kɛ bɛka ninyɛne mɔɔ Gyihova anye ɛnlie nwo la anwo edwɛkɛ. Ɛnee bɛ adawubɔlɛ ne ta fale nla nwo. Nzinlii bɛ nuhua dɔɔnwo hanle kɛ edwɛkɛ ɛhye mɔ mɔɔ nwolɛ ɛnde la maanle bɛbɔle adwɔmane ɛbɛla.

10. Kɛzi Seetan bɔ mɔdenle kɛ ɔbɛlɛbɛla yɛ ɛ? (Ɛfɛsɛsema 5:6)

¹⁰ Seetan ewiade ne bɔ mɔdenle kɛ ɔbɛlɛbɛla yɛ amaa yɛalie yɛali kɛ nvonleɛ biala ɛnle ninyɛne mɔɔ Gyihova se ɔle ɛbɛlatane yɛɛ nwolɛ ɛnde la anwo. (2 Pita 2:19) Ɛhye ɛnzi yɛ nwo! Agyibadolɛ mɔɔ Abɔnsam ɛva ɛli gyima mekɛ tendenle la a le kɛ ɔmaa menli adwenle nu ayɛ bɛ kesee wɔ mɔɔ le kpalɛ nee mɔɔ le ɛtane la anwo. (Aye. 5:20; 2 Kɔl. 4:4) Ɔnyɛ nwanwane kɛ vidio, TV zo gyimalilɛ nee wɛbsaete dɔɔnwo si adwenle mɔɔ ko tia Gyihova tenlene ngyinlazo ne mɔ la adua la! Seetan ɛlɛbɔ mɔdenle kɛ ɔbɛlɛbɛla yɛ yeamaa yɛanyia adwenle kɛ nvonleɛ biala ɛnle evinli nyɛleɛ nee ɛbɛlatane mɔɔ ɛbu zo la anwo, eza ɔyɛ anyelielɛ yɛɛ ɔnva ngyegyelɛ biala ɔmba.—Kenga Ɛfɛsɛsema 5:6.

11. Kɛzi Angela anwubielɛ ne maa yɛnwu kɛzi ɔhyia kɛ yɛbali folɛdulɛ mɔɔ wɔ Ɛfɛsɛsema 5:7 la azo ɛ? (Eza nea nvoninli ne.)

¹¹ Seetan kulo kɛ yɛfa menli mɔɔ bɛbamaa yeayɛ se kɛ yɛbahɔ zo yɛava Gyihova ngyinlazo yɛabɔ yɛ ɛbɛla la agɔnwolɛ. Ɛhye ati a Pɔɔlo dule Ɛfɛsɛsema folɛ kɛ: “Bɛ nee bɛ mmatu,” ɛnee ɔlɛkile bɛdabɛ mɔɔ bɛyɛ mɔɔ le ɛtane wɔ Nyamenle anye zo la. (Ɛfɛ. 5:7) Ɔwɔ kɛ yɛkakye kɛ, tɛ menli mɔɔ yɛyia bɛ la angomekye a yɛkola yɛ nee bɛ tu a. Bɛdabɛ mɔɔ yɛ nee bɛ di adwelie wɔ sohyia media ne azo la noko boka nwo, na yemɔ le esiane mɔɔ tete Ɛfɛsɛsema ne anyia bie a. Angela, a mɔɔ de  Asia la nwunle kɛzi sohyia media kola maa yɛtɔ esiane nu la. Ɔhanle kɛ: “Ɔkola ɔyɛ ɛhane, na ngyikyingyikyi yeahakyi wɔ adwenle. Yeangyɛ ɛnee akee ɔngyegye me kɛ mebava menli mɔɔ bɛmbu Baebolo nu ngyinlazo la agɔnwolɛ. Awieleɛ bɔkɔɔ ne, membɔle ɔ bo menyianle adwenle kɛ nvonleɛ biala ɛnle nwo kɛ mebabɔ ɛbɛla mɔɔ ɛnzɔ Gyihova anye la.” Noko asafo nu mgbanyima mɔɔ lɛ ɛlɔlɛ boale Angela maanle ɔyɛle nzenzaleɛ mɔɔ hyia la. Ɔhanle kɛ: “Kɛkala mefa me adwenle mesie sunsum nu ninyɛne zo na tɛ sohyia media zo.”

12. Duzu a baboa yɛ yeamaa yɛava Gyihova kpalɛ nee ɛtane nwo ngyinlazo ne yeabɔ yɛ ɛbɛla a?

¹² Ɔwɔ kɛ yɛko yɛatia adwenle mɔɔ ewiade ne lɛ kɛ nvonleɛ biala ɛnle ɛbɛlatane nwo la. Yɛze mɔɔ le kpalɛ la. (Ɛfɛ. 4:​19, 20) Ɔle kpalɛ kɛ yɛbabiza yɛ nwo kɛ: ‘Asoo meva meyɛ me bodane kɛ me nee me gyima nu amra, sukuluma anzɛɛ awie biala mɔɔ ɔmbu Gyihova tenlene ngyinlazo ne mɔ la ɛnrɛbɔ nu ɛnrɛyɛ debie biala mɔɔ nwolɛ ɛngyia la ɔ? Asoo mefa akɛnrasesebɛ medi Gyihova ngyinlazo zo saa bɔbɔ awie mɔ baha kɛ mele kyengye a?’ Kɛ mɔɔ 2 Timote 2:​20-22 kile la, eza ɔhyia kɛ yɛnea boɛ kpalɛ wɔ mekɛ mɔɔ yɛlɛkpa agɔnwolɛma wɔ asafo ne anu la. Ɔwɔ kɛ yɛkakye kɛ wɔannea a bie mɔ ɛnrɛboa yɛ ɛnrɛmaa yɛnrɛhɔ zo yɛnrɛli nɔhalɛ wɔ Gyihova ɛzonlenlɛ nu.

“BƐBƆ BƐ ƐBƐLA KƐ WIENYI NU MRALƐ”

13. Bɛka kɛ “bɛbɔ bɛ ɛbɛla kɛ wienyi nu mralɛ” a, ɔkile duzu? (Ɛfɛsɛsema 5:​7-9)

¹³ Pɔɔlo maanle Ɛfɛsɛse Kilisienema ne anwosesebɛ kɛ bɛhwe bɛ nwo bɛvi awozinli ne anwo na eza “bɛbɔ bɛ ɛbɛla kɛ wienyi nu mralɛ.” (Kenga Ɛfɛsɛsema 5:​7-9.) Ɔkile duzu? Ye sikalɛ nu, ɔkile kɛ ɔwɔ kɛ yɛbɔ yɛ ɛbɛla kɛ nɔhalɛ Kilisienema mekɛ biala. Debie ko mɔɔ ɔbamaa yɛadwu bodane ɛhye anwo la a le kɛ yɛbagenga Baebolo ne na yɛalua yɛ mbuluku ngakyile mɔɔ ahyehyɛdeɛ ne ɛyɛ la azo yɛazukoa ye anyebolo zo. Ɔhyia kpalɛ kɛ yɛbazukoa Gyisɛse Kelaese mɔɔ le “ewiade wienyi ne” la neazo nee ye ngilehilelɛ ne kpalɛ.—Dwɔn 8:12; Mrɛ. 6:23.

14. Kɛzi sunsum nwuanzanwuanza ne bahola aboa yɛ ɛ?

 ¹⁴ Eza yɛhyia Nyamenle sunsum nwuanzanwuanza ne moalɛ amaa yɛahɔ zo yɛabɔ yɛ ɛbɛla kɛ “wienyi nu mralɛ.” Duzu ati ɔ? Ɔluakɛ ɔyɛ se kpalɛ kɛ yɛbahɔ zo yɛamaa yɛ nwo ade wɔ ewiade ɛhye mɔɔ ɛbɛlatane ɛbu zo la anu. (1 Tɛs. 4:​3-5, 7, 8) Sunsum nwuanzanwuanza ne bahola aboa yɛ yeamaa yɛaho yɛatia adwenle mɔɔ ewiade ne lɛ la, bie a le bɛ diedi nee bɛ nzuzulɛ mɔɔ nee Nyamenle adwenle ɛnle ko la. Eza sunsum nwuanzanwuanza ne kola boa yɛ maa yɛda “kpalɛyɛlɛ nee tenleneyɛlɛ yɛɛ nɔhalɛ muala” ali.—Ɛfɛ. 5:9.

15. Kɛzi yɛbahola yɛanyia sunsum nwuanzanwuanza ne ɛ? (Ɛfɛsɛsema 5:​19, 20)

¹⁵ Adenle ko mɔ yɛbahola yɛalua zo yɛanyia sunsum nwuanzanwuanza ne la a le kɛ yɛbayɛ nwolɛ asɔne. Gyisɛse hanle kɛ Gyihova ‘bava sunsum nwuanzanwuanza ne amaa bɛdabɛ mɔɔ bɛbiza ye la.’ (Luku 11:13) Eza saa yɛbɔ nu yɛye Gyihova ayɛlɛ wɔ yɛ debiezukoalɛ ne mɔ abo a, yɛnyia sunsum nwuanzanwuanza ne. (Kenga Ɛfɛsɛsema 5:​19, 20.) Kɛmɔ sunsum nwuanzanwuanza ne nyia yɛ nwo zo tumi kpalɛ la ati, ɔbaboa yɛ yeamaa yɛabɔ ɛbɛla mɔɔ sɔ Nyamenle anye la.

16. Duzu a baboa yɛ yeamaa yɛasisi kpɔkɛ kpalɛ a? (Ɛfɛsɛsema 5:​10, 17)

¹⁶ Saa ɔwɔ kɛ yɛsisi kpɔkɛ ngakyile mɔɔ hyia la a, ɔhyia kɛ yɛnwu “Gyihova ɛhulolɛdeɛ” na yɛdi yemɔ azo. (Kenga Ɛfɛsɛsema 5:​10, 17.) Saa yɛkpondɛ Baebolo nu ngyinlazo mɔɔ fale yɛ tɛnlabelɛ ne anwo la a, ɛnee yɛlɛkpondɛ adwenle mɔɔ Nyamenle lɛ wɔ edwɛkɛ ne anwo la. Akee saa yɛdi ye ngyinlazo ne mɔ azo a, ɔbamaa yɛasisi kpɔkɛ kpalɛ.

17. Kɛ ɔkɛyɛ na yɛava yɛ mekɛ yɛali gyima kpalɛ ɛ? (Ɛfɛsɛsema 5:​15, 16) (Eza nea nvoninli ne.)

¹⁷ Eza Pɔɔlo dule Ɛfɛsɛse Kilisienema ne folɛ kɛ bɛva bɛ mekɛ bɛli gyima kpalɛ. (Kenga Ɛfɛsɛsema 5:​15, 16.) “Amumuyɛnli ne,” mɔɔ le yɛ kpɔvolɛ Seetan, kulo kɛ yɛfa yɛ mekɛ kɔsɔɔti yɛdi ewiade ɛhye ninyɛne nzi  mɔɔ yɛnnyia bie fee yɛmmaa yɛ Nyamenle ne ɛzonlenlɛ a. (1 Dwɔn 5:19) Ɔnrɛyɛ se kɛ Kilisienenli bie bava anwonyia, nwomazukoalɛ anzɛɛ ye gyima alimoa nwolɛ adenle ngakyile mɔɔ ɔlɛ kɛ ɔbazonle Gyihova la anyunlu. Saa ɔba ye zɔ a, ɔbahile kɛ ewiade ne adwenle ɛlɛnyia ɔ nwo zo tumi. Nɔhalɛ nu, nvonleɛ ɛnle ninyɛne ɛhye mɔ anwo ɛdeɛ, noko ɔnle kɛ yɛmaa yemɔ kyia yɛ somaa wɔ ɛbɛlabɔlɛ nu. Amaa ‘yɛabɔ yɛ ɛbɛla kɛ wienyi nu mralɛ’ la, ɔhyia kɛ ‘yɛfa yɛ mekɛ yɛdi gyima kpalɛ,’ na yɛfa yɛ adwenle yɛsie debie mɔɔ hyia kpalɛ la azo.

18. Duzu a Donald yɛle amaa yɛava ye mekɛ yɛali gyima kpalɛ a?

¹⁸ Maa ɛ nye ɛla ɛkɛ ne amaa wɔanwu nwolɛ adenle biala mɔɔ ɛbahola wɔalua zo wɔazonle Gyihova kpalɛ la. Ɛhye a Donald mɔɔ de South Africa la yɛle a. Ɔhanle kɛ: “Meneanle me tɛnlabelɛ ne na membodole Gyihova kɛ ɔboa me ɔmaa menyɛ me ɛzonlenlɛ gyima ne kpalɛ. Menzɛlɛle ye kɛ ɔmaa menyia gyima mɔɔ ɔbamaa meanyia mekɛ dɔɔnwo meahɔ daselɛlilɛ la. Ɔlua Gyihova moalɛ zo, menyianle gyima kpalɛ. Akee me nee me ye bɔle ɔ bo kɛ yɛyɛ dahuu ɛzonlenlɛ gyima ne bie.”

19. Kɛ ɔkɛyɛ na yɛahola yɛahɔ zo yɛabɔ yɛ ɛbɛla kɛ “wienyi nu mralɛ” ɛ?

¹⁹ Ɔbayɛ kɛ Pɔɔlo kɛlata ne mɔɔ ɔhɛlɛle Ɛfɛsɛsema ne la boale bɛ kpalɛ maanle bɛhɔle zo bɛlile nɔhalɛ bɛmaanle Gyihova. Na folɛdulɛ zɔhane baboa yɛdayɛ noko. Kɛ mɔɔ yɛnwu ye la, ɔkola ɔboa yɛ ɔmaa yɛkpa anyelielɛ ninyɛne nee yɛ gɔnwo mɔ nrɛlɛbɛ nu. Ɔkola ɔmaa yɛ anwosesebɛ ɔmaa yɛkɔ zo yɛyɛ ngyehyɛleɛ yɛsukoa Baebolo ne dahuu amaa nɔhalɛ wienyi ne ahɔ zo ahile yɛ adenle. Eza ɔmaa yɛnwu kɛzi sunsum nwuanzanwuanza ne, mɔɔ kola maa yɛnyia subane ngɛnlɛma la, hyia kpalɛ la. Yɛdi mɔɔ Pɔɔlo hɛlɛle la azo a, ɔkola ɔboa yɛ ɔmaa yɛsisi kpɔkɛ kpalɛ mɔɔ nee Gyihova adwenle yia la. Saa yɛyɛ ninyɛne ɛhye mɔ a, yɛbahola yɛahwe yɛ nwo yɛavi ewiade ɛhye awozinli ne anwo na yɛahɔ zo yɛadɛnla wienyi ne anu!