1, 2. (a) Ngyegyelɛ boni mɔ a yɛ mediema bie mɔ yia a? (b) Kpuyia boni mɔ a ɔmaa yɛbiza a?

ADIEMA nrenyia Lije hanle kɛ: “Mɔɔ konle bie zile wɔ Burundi maanle ne anu la, ɛnee yɛ abusua ne wɔ nyianu bo. Yɛnwunle kɛ bɛlɛtoto etu na menli ɛlɛnriandi. Me awovolɛ nee yɛdayɛ ngakula 11 ne nriandile, na ɛnee yɛ tɛladeɛ mɔɔ yɛwula la ala a yɛlɛ a. Awieleɛ ne, me mbusuafoɔ bie mɔ hɔle tutanema azokoɛleɛ ne mɔɔ wɔ Malawi mɔɔ ye tendenle bo mayɛlɛ 1,000 (km 1,600) la. Yɛdayɛ mɔɔ yɛhale la bɔle asande.”

² Kɛkala, tutanema mɔɔ konle anzɛɛ ɛkpɔlɛ ti bɛdu bɛvi bɛ azua nu la dodo bo 65,000,000​—ɛhye zonle tɛla biala. * Bɛ nuhua apenle dɔɔnwo le Gyihova Alasevolɛ. Dɔɔnwo mbusuafoɔ ɛwu yɛɛ bɛ ninyɛne ɛminli. Ngyegyelɛ boni bieko a bie mɔ ɛyia a? Kɛ ɔkɛyɛ na yɛaboa mediema ɛhye mɔ yɛamaa ‘bɛava fɛlɛkolilɛ bɛazonle Gyihova’ ɔnva nwo ngyegyelɛ mɔɔ bɛyia la ɛ? (Edw. 100:2) Na kɛ ɔkɛyɛ na yɛahola yɛaha edwɛkpa ne yɛahile tutanema mɔɔ bɛnze Gyihova la ɛ?

3. Kɛ ɔyɛle mɔɔ Gyisɛse nee ye ɛdoavolɛma dɔɔnwo yɛle tutanema ɛ?

³ Mɔɔ Gyihova anwumabɔvolɛ bɔle Dwosefi kɔkɔ kɛ Belemgbunli Hɛlɔdo kulo kɛ ɔku kakula Gyisɛse la, ye awovolɛ nee ye dule hɔle Yigyibiti. Bɛdɛnlanle ɛkɛ ne too Hɛlɔdo wule. (Mat. 2:13, 14, 19-21) Ɛvolɛ dɔɔnwo anzi, Gyisɛse ɛdoavolɛma mɔɔ limoa la ‘bɔle asande bɛhɔle Dwudiya nee Samɛlea maanzinli ne mɔ anu,’ ɔlua ɛkpɔlɛ ti. (Gyi. 8:1) Gyisɛse nwunle kɛ ye ɛdoavolɛma dɔɔnwo badu avi bɛ azua nu. Ɔhanle kɛ: “Saa bɛyɛ bɛ kpɔdekpɔde wɔ sua ko azo a, bɛnriandi bɛhɔ fofolɛ zo.” (Mat. 10:23) Ɔnla aze kɛ awie badu avi ye sua nu.

4, 5. Ngyegyelɛ boni a tutanema yia wɔ mekɛ mɔɔ (a)  bɛlɛnriandi la ɛ? (b) bɛwɔ azokoɛleɛ ɛkɛ ne la ɛ?

⁴ Tutanema kola yia ngyegyelɛ wɔ mekɛ mɔɔ bɛlɛnriandi anzɛɛ bɛde bɛ azokoɛleɛ ne la. Lije adiema kakula Gad hanle kɛ: “Yɛbɔle menli avunli yɛdɛlale wɔ dapɛne dɔɔnwo anu wɔ mekɛ mɔɔ ɛnee yɛlɛkɔ la. Ɛnee meli ɛvolɛ 12. Me gyakɛ nwunwunle kpalɛ, ɔti menzele me abusua ne kɛ bɛhɔ bɛgyakyi me. Kɛmɔ ɛnee me papa ɛngulo kɛ atuadelɛma ne asa baha me la ati, ɔdwule me. Yɛyɛle asɔne, yɛvale yɛ nwo yɛdole Gyihova anwo zo, na ɔyɛ a amango amunli a yɛdi a amaa yɛanwu.”​—Fel. 4:12, 13.

⁵ Lije mbusuafoɔ dɔɔnwo dɛnlanle Maamgbole Koyɛlɛ Eku ne tutanema azokoɛleɛ ne hyɛle. Noko, ɛnee bɛnlɛ banebɔlɛ wɔ ɛkɛ. Lije mɔɔ kɛkala le maangyebakyi zo neavolɛ la ka kɛ: “Ɛnee menli dɔɔnwo ɛnyɛ gyima. Bɛye ndɛne, bɛno nza, bɛto kyakya, bɛwua yɛɛ bɛbɔ nla nu ɛbɛlatane.” Ɛnee ɔwɔ kɛ Alasevolɛ ne mɔ fa bɛ nwo wula asafo ne gyimalilɛ ngakyile nu kpalɛ na bɛ subane ɛtane ne annyia anwo zo tumi. (Hib. 6:11, 12; 10:24, 25) Amaa bɛ diedi nu amia la, bɛvale bɛ mekɛ bɛlile gyima kpalɛ​—dɔɔnwo yɛle adekpakyelɛma. Bɛhakyele kɛ, mekɛ mɔɔ bɛfa bɛadɛnla azokoɛleɛ ɛkɛ la bara awieleɛ, kɛ mɔɔ mekɛ mɔɔ Yizilayɛma vale dɛnlanle fienemgbole ne anu la rale awieleɛ la.​—2 Kɔl. 4:18.

6, 7. (a) Kɛzi “Nyamenle ɛlɔlɛ” ne ka Kilisienema ɔmaa bɛboa bɛ mediema mɔɔ bɛhyia moalɛ la ɛ? (b) Maa neazo.

⁶ “Nyamenle ɛlɔlɛ” ne ka yɛ maa yɛkulo yɛ nwo ngoko, titili wɔ ngyegyelɛ mekɛ nu. (Kenga 1 Dwɔn 3:17, 18.) Mekɛ mɔɔ ɛhɔne kpole zile Dwudiya la, asafo ne yɛle ngyehyɛleɛ hɔboale Kilisienema mɔɔ wɔ ɛkɛ la. (Gyi. 11:28, 29) Ɛzoanvolɛ Pɔɔlo nee Pita noko maanle Kilisienema anwosesebɛ kɛ bɛlie nyɛvolɛ. (Wlo. 12:13; 1 Pita 4:9) Saa ɔwɔ kɛ Kilisienema die mediema mɔɔ bakpɔla bɛ la nyɛvolɛ a, ɛnee fane nyɛ a ɔnle kɛ yɛdie yɛ gɔnwo mɔ diedima mɔɔ bɛ ngoane la esiane nu anzɛɛ bɛ diedi ne ati, bɛlɛkpɔ bɛ la ɛ!​—Kenga Mrɛlɛbulɛ 3:27. *

⁷ Ɔtɛkyɛle biala, Gyihova Alasevolɛ​—mrenyia, mraalɛ nee ngakula apenle dɔɔnwo nriandile vile Ukraine adɔleɛ, ɔlua konle nee ɛkpɔlɛ ti. Ɔyɛ alɔbɔlɛ kɛ bɛhunle bie mɔ. Noko bɛ mediema diedima mɔɔ bɛwɔ Ukraine ɛleka gyɛne la nee bɛ nuhua dɔɔnwo dɛnlanle, yɛɛ bɛ gɔnwo mɔ Alasevolɛ mɔɔ bɛwɔ Russia la maanle bɛ nuhua dɔɔnwo radɛnlanle bɛ nwo. Wɔ maanle nwiɔ ɛhye mɔ anu, bɛangyinla afoa biala, ‘bɛangɔ ewiade ne afoa’ yɛɛ bɛbɔle mɔdenle bɛbɔle “edwɛkpa ne nolo.”​—Dwɔn 15:19; Gyi. 8:4.

8, 9. (a) Ngyegyelɛ boni mɔ a tutanema kola yia wɔ maanle gyɛne zo a? (b) Kɛmɔti a ɔwɔ kɛ yɛnyia bɛ nwo abotane na yɛboa bɛ ɛ?

⁸ Menli bie mɔ tu kɔtɛnla bɛ maanle nu ɛleka bie, noko awie mɔ tu kɔ maanle fofolɛ mɔɔ bɛnze ɛkɛ ne fee la azo. Ɔyɛ a arane maa bɛ aleɛ, adɛladeɛ, nee dabelɛ ɛdeɛ, noko bɛnnyia aleɛ mɔɔ bɛ nye die nwo la. Tutanema mɔɔ bɛ maanle nu le wuluwulu la bahola ahɔ maanle mɔɔ ɛkɛ ne yɛ ɛyɛlɛ la anu, na bie a bɛnrɛnwu nwolɛ tɛladeɛ mɔɔ ɔwɔ kɛ bɛwula la. Saa bɛvi namule nu a, bie a bɛnrɛnwu kɛzi bɛfa adwuleso sua nu ninyɛne bɛdi gyima la.

⁹ Arane bie mɔ yɛ ngyehyɛleɛ boa tutanema amaa tɛnlabelɛ fofolɛ ne nee bɛ nwo ali. Noko, fane dɔɔnwo ne ala, wɔ siane ekyii bie anzi bɛ nye la kɛ tutanema mumua ne banlea bɛ nwo. Ɛhye kola maa bɛ nwo kyele bɛ kpalɛ. Suzu ninyɛne ɛhye mɔ amuala mɔɔ ɔwɔ kɛ bɛyɛ bɛbɔ nu la anwo: aneɛ fofolɛ ɛzukoalɛ, mɛla fofolɛ zo ɛlilɛ, kɛzi ɔwɔ kɛ bɛyɛ bɛ nyɛleɛ, mekɛ zo ɛlilɛ, adwule nee kakɛ ɛdualɛ, sukulu ɛhɔlɛ nee kakula ɛtetelɛ! Ɛbahola wɔanyia abotane na wɔavi ɛbulɛ nu wɔaboa mediema mɔɔ bɛyia ngyegyelɛ ɛhye mɔ la ɔ?​—Fel. 2:3, 4.

10. Saa tutanema badwu ala a, kɛzi yɛmaa bɛ diedi nu mia ɛ? (Nea mɔlebɛbo nvoninli ne.)

¹⁰ Bieko, ɔyɛ a maanle mgbanyima maa ɔyɛ se kɛ yɛ mediema mɔɔ bɛle tutanema nee asafo ne bali ngitanwo. Arane gyima nu mgbanyima bie mɔ ka kile yɛ mediema ne mɔ kɛ saa bɛkpo gyima mɔɔ ɔbamaa bɛatoto debiezukoalɛ ɛhɔlɛ nu a, bɛnrɛboa bɛ anzɛɛ bɛnrɛmaa bɛ dabelɛ. Kɛmɔ ɛnee bie mɔ ɛnlɛ banebɔlɛ yɛɛ bɛsulo la ati, bɛangola ngyegyelɛ zɛhae mɔ anloa gyinla. Ɛhye ati, saa yɛ mediema mɔɔ bɛle tutanema la badwu ala a, ɔwɔ kɛ yɛkpo bɛ bo zo. Ɔwɔ kɛ bɛnwu kɛ yɛdwenle bɛ nwo. Yɛ anwunvɔnezelɛ nee yɛ moalɛ kola maa bɛ diedi nu mia.​—Mrɛ. 12:25; 17:17.

11. (a) Saa tutanema badwu ala a, duzu a bɛhyia nwo a? (b) Kɛzi ɔwɔ kɛ tutanema da anyezɔlɛ ali ɛ?

¹¹ Saa yɛ mediema badwu ala a, ɔwɔ kɛ yɛmaa bɛ aleɛ, adɛladeɛ anzɛɛ ninyɛne gyɛne. * Ninyɛne ngyikyi le kɛ tae mɔɔ ɛbava wɔamaa adiema nrenyia bie la baboa ye kpole. Saa tutanema da anyezɔlɛ ali na bɛambizebiza ninyɛne a, ɔmaa menli mɔɔ bɛrazokoɛ bɛ la anye die na bɛfi bɛ ɛhulolɛ nu bɛboa bɛ. Nɔhalɛ nu, saa tutanema fa bɛ nye to kɛ awie mɔ ɛboa bɛ dahuu a, ɔkola ɔsɛkye ɛbulɛ mɔɔ bɛlɛ bɛmaa bɛ nee agɔnwolɛvalɛ mɔɔ bɛ nee awie mɔ lɛ la. (2 Tɛs. 3:7-10) Noko bɛhyia moalɛ kpalɛ.

12, 13. (a) Kɛ ɔkɛyɛ na yɛaboa tutanema ɛ? (b) Maa neazo.

¹² Ɔngyia ezukoa dɔɔnwo na yɛahola yɛaboa tutanema, emomu ɔwɔ kɛ yɛnyia mekɛ yɛmaa bɛ na yɛdwenle bɛ nwo. Bie a yɛbahile bɛ kale ɛhanlɛ, kɛzi bɛdi gua anzɛɛ kɛ ɔkɛyɛ na bɛanyia ninyɛne le kɛ milahyinli mɔɔ bɛfa bɛkpomgba ninyɛne anzɛɛ bɛfa bɛbɔ ndile amaa bɛanyia ezukoa. Mɔɔ hyia la, ɛbahola wɔaboa bɛ wɔamaa bɛava bɛ nwo bɛawula bɛ asafo fofolɛ ne anu kpalɛ. Saa ɔbayɛ boɛ a, maa bɛvo wɔ kale ne bie bɛhɔ debiezukoalɛ. Eza kile bɛ kɛzi bɛbahola bɛaha Belemgbunlililɛ  nrɛlaleɛ ne bie bɛahile wɔ azɛlɛsinli ne anu amra la. Ɛ nee mediema mɔɔ bɛle tutanema la ɛhɔ daselɛlilɛ.

¹³ Mɔɔ tutanema nna mɔɔ bɛndwu ɛvolɛ abulanwiɔ hɔle asafo bie anu la, mgbanyima ngakyile hilele bɛ kale ɛhanlɛ, taepe ɛbɔlɛ, yɛɛ kɛzi bɛbahɛlɛ bɛ nwo edwɛkɛ wɔ mekɛ mɔɔ bɛlɛkpondɛ gyima nee kɛzi bɛbayɛ mekɛ ngyehyɛleɛ amaa bɛazonle Gyihova kpalɛ la. (Gal. 6:10) Yeangyɛ bɛ muala bɛyɛle dahuu adekpakyelɛma. Zɔhane moalɛ ne nee mɔdenle mɔɔ bɛbɔle bɛdwule sunsum nu bodane nwo la maanle bɛnyianle anyuhɔlɛ, na yeammaa Seetan ewiade ne anyia bɛ nwo zo tumi.

14. (a) Sɔnea boni a ɔwɔ kɛ tutanema ko tia a? (b) Maa neazo.

¹⁴ Kɛmɔ Kilisienema gyɛne yɛ la, ɔwɔ kɛ tutanema ko tia sɔnea nee ngyegyelɛ mɔɔ bamaa bɛanyia nwonane afoa nu ninyɛne noko ɔbazɛkye bɛ nee Gyihova agɔnwolɛvalɛ ne la. * Lije mɔɔ yɛlimoa yɛha ɔ nwo edwɛkɛ la nee ɔ mediema ne mɔ hakyele diedi nwo edwɛkɛ mɔɔ bɛ papa hilehilele bɛ wɔ mekɛ bɔbɔ mɔɔ ɛnee bɛlɛnriandi la. “Ɔvuandinle ninyɛne mɔɔ anwo ɛngyia mɔɔ ɛnee yɛlɛ la ɔguale ye lɔ ngoko ngoko. Awieleɛ ne, ɔmaanle baage ne mɔɔ ɛhwee ɛnle nu la zo na ɔvale anyelielɛ ɔhanle kɛ: ‘Bɛnwu ye ɔ? Ɛhye ala a yɛhyia nwo a!’”​—Kenga 1 Timote 6:8.

15, 16. Kɛ ɔkɛyɛ na yɛaboa tutanema wɔ (a) sunsum nu ɛ? (b) nganeɛdelɛ nu ɛ?

¹⁵ Tɛ nwonane afoa nu moalɛ ala a tutanema hyia a, bɛhyia sunsum nu nee nganeɛdelɛ nu moalɛ noko. (Mat. 4:4) Saa mgbanyima maa tutanema asa ka mbuluku wɔ bɛ aneɛ nu, na eza bɛboa bɛ bɛmaa bɛ nee mediema mɔɔ bɛte bɛ aneɛ ne la di ngitanwo a, ɔbaboa bɛ. Tutanema dɔɔnwo nee bɛ mbusuafoɔ, bɛ kpalɛzoamra nee bɛ asafo ne avinli ɛtete. Ɔwɔ kɛ bɛnwu Gyihova ɛlɔlɛ nee ye anwunvɔnezelɛ wɔ bɛ gɔnwo mɔ Kilisienema avinli. Tɛ ye zɔhane a, bɛbadoa bɛ mbusuafoɔ mɔɔ bɛnle diedima anzɛɛ menli mɔɔ bɛ nee bɛ ka aneɛ ko la. (1 Kɔl. 15:33) Saa yɛmaa bɛte nganeɛ kɛ yɛkulo bɛ wɔ asafo ne anu a, ɛnee yɛlɛboa yɛamaa Gyihova  ‘azinza nyɛvolɛ,’ na ɔle nwolɛ adenle kpole mɔɔ yɛnyia a.​—Edw. 146:9.

¹⁶ Kɛ mɔɔ ɔdole kakula Gyisɛse nee ye abusua ne la, saa tutanema agbɔvolɛ ɛlɛdi tumi a, bɛnrɛhola bɛnrɛzia bɛnrɛhɔ bɛ maanle nu bieko. Bieko, kɛmɔ Lije nwunle ye la, “awovolɛ dɔɔnwo mɔɔ bɛnwunle kɛ bɛlɛto bɛ mbusuafoɔ bɔna na bɛhunle bie mɔ la ɛngulo kɛ bɛ nee bɛ mra bazia ahɔ ɛleka mɔɔ zɔhane esiane ne zile la.” Amaa yɛaboa yɛ mediema la, ɔwɔ kɛ ‘yɛdi nyane yɛmaa yɛ gɔnwo mɔ, yɛnyia mediema ɛlɔlɛ, anwunvɔnezelɛ nee mɛlɛbɛnwoaze.’ (1 Pita 3:8) Ɛkpɔlɛ mɔɔ ɛdo tutanema bie mɔ la ati, bɛmbikye menli yɛɛ bɛngulo kɛ bɛka bɛ amaneɛnwunlɛ nwo edwɛkɛ bɔbɔ, titili wɔ mekɛ mɔɔ bɛ mra wɔ ɛkɛ la. Biza ɛ nwo kɛ: ‘Saa mewɔ tɛnlabelɛ zɛhae anu a, boni a mebahulo kɛ bɛyɛ bɛmaa me a?’​—Mat. 7:12.

17. Saa yɛdi tutanema daselɛ a, kɛzi ɔkyekye bɛ rɛle ɛ?

¹⁷ Ɛnɛ, tutanema dɔɔnwo vi maanle mɔɔ bɛva bɛ sa bɛdo yɛ gyima ne azo la anu. Ɔlua Alasevolɛ mɔɔ bɔ mɔdenle la moalɛ zo, tutanema apenle dɔɔnwo ɛrade “Belemgbunlililɛ ne anwo edwɛkɛ ne.” (Mat. 13:19, 23) Yɛ debiezukoalɛ ne mɔ kyekye menli dɔɔnwo mɔɔ “bɛzo adesoa la” arɛle, na ɔmaa bɛka kɛ: “Amgba Nyamenle ne bɛ de.”​—Mat. 11:28-30; 1 Kɔl. 14:25.

18, 19. Kɛzi yɛbahola yɛala nrɛlɛbɛ ali wɔ mekɛ mɔɔ yɛlɛdi tutanema daselɛ la ɛ?

¹⁸ Ɔwɔ kɛ menli mɔɔ di tutanema daselɛ la maa ‘bɛ nye da ɛkɛ’ na bɛyɛ menli mɔɔ bɛ ‘nye gyi bɛ ti anwo.’ (Mat. 10:16; Mrɛ. 22:3) Nyia abotane tie bɛ, noko mmaka maanyɛlɛ nwo edwɛkɛ. Di adehilelɛ mɔɔ Bɛtɛle nee maanle mgbanyima bava amaa la azo; mmafa ɛ nee awie mɔ ngoane ɛto esiane nu. Sukoa kɛ ɛbabu tutanema ɛzonlenlɛ nee bɛ amaamuo. Kɛ neazo la, menli mɔɔ vi maanle bie mɔ azo la kulo kɛ mraalɛ siezie bɛ nwo kpalɛ. Ɛhye ati, saa ɛlɛdi tutanema daselɛ a, nea boɛ na wɔ anwoziezielɛ angyegye bɛ.

¹⁹ Yɛkulo kɛ yɛboa menli mɔɔ ɛlɛnwu amaneɛ nee bɛdabɛ mɔɔ bɛnle Alasevolɛ la. (Luku 10:33-37) Adenle kpalɛ mɔɔ yɛbahola yɛalua zo yɛayɛ zɔ la a le kɛ yɛbaha edwɛkpa ne yɛahile bɛ. Kpanyinli bie mɔɔ yeboa tutanema dɔɔnwo la ka kɛ, “Ɔwɔ kɛ yɛmaa bɛnwu ye ɛkɛ ne ala kɛ yɛle Gyihova Alasevolɛ, na yɛ gyima titili a le kɛ yɛka Baebolo ne anu edwɛkɛ yɛahile bɛ, tɛ nwonane afoa nu ninyɛne mɔɔ yɛfa yɛamaa bɛ la ɔ. Tɛ ye zɔ a, bie mɔ nee yɛ badu ɔlua nwonane afoa nu ninyɛne mɔɔ bɛkpondɛ la ati.”

20, 21. (a) Saa yɛda Kilisiene ɛlɔlɛ ali yɛkile tutanema a, duzu a bavi nu ara a? (b) Duzu a yɛbazuzu nwo wɔ edwɛkɛ mɔɔ doa zo la anu a?

²⁰ Saa yɛda Kilisiene ɛlɔlɛ ali yɛkile “nyɛvolɛ” a, debie kpalɛ vi nu bara. Kilisiene adiema raalɛ bie hanle kɛ, ɛkpɔlɛ ti, ye abusua ne nriandile vile Eritrea. Mɔɔ ɔ mra nna ne bɔle mɔdenle pɛle ɛsɛlɛ ne la anzi, bɛradwule Sudan. Ɔka kɛ: “Mediema mɔɔ wɔ ɛkɛ ne la liele bɛ kɛnlɛma kɛ asɛɛ bɛle bɛ mbusuafoɔ la, bɛmaanle yɛ aleɛ, adɛladeɛ, dabelɛ na bɛduale yɛ kale kakɛ. Nwane mɔ a balie nyɛvolɛ ahɔ bɛ sua nu ɔluakɛ bɛ nee bɛ sonle Nyamenle ko la ati a? Gyihova Alasevolɛ ala!”​—Kenga Dwɔn 13:35.

²¹ Na ngakula dɔɔnwo mɔɔ bɛ nee bɛ awovolɛ le tutanema anzɛɛ bɛdu bɛra maanle fofolɛ nu la noko ɛ? Wɔ edwɛkɛ mɔɔ doa zo la anu, yɛbazuzu kɛzi yɛ muala yɛbahola yɛaboa bɛ yɛamaa bɛava anyelielɛ bɛazonle Gyihova la anwo.