GAYƐSE nee ɛvoyia mɔɔ limoa Kilisienema gyɛne yiale ngyegyelɛ. Bɛ nuhua bie mɔ hilehilele adalɛ ngilehilelɛ, bɛbɔle mɔdenle kɛ bɛsɛkye bɛ gɔnwo mɔ diedi na bɛava mgbakyemgbakye nu bɛara asafo ne mɔ anu. (1 Dwɔn 2:18, 19; 2 Dwɔn 7) Ɛnee Dayɛtelɛfizi ɛlɛkeha ɛzoanvolɛ Dwɔn nee awie mɔ anwo “edwɛkɛ ɛtane ɛtane,” ɔnzonle neavolɛ adenduvoma ɛyɛvolɛ yɛɛ ɔbɔ mɔdenle kɛ ɔdi awie mɔ gyɛne adwenle yeamaa bɛazukoa ye neazo ɛtane ne. (3 Dwɔn 9, 10) Tɛnlabelɛ ɛhye a ɛnee ɛlɛkɔ zo mɔɔ ɔti Dwɔn hɛlɛle Gayɛse kɛlata ne a. Ɛzoanvolɛ ne kɛlata ne mɔɔ ɔhɛlɛle ye kɛyɛ ɛvolɛ 98 Y.M., la a le “Dwɔn Mɔɔ Tɔ Zo Nsa” mɔɔ wɔ Kilisiene Giliki Ngɛlɛlera ne anu la.

Gayɛse yiale ngyegyelɛ ngakyile, noko ɔhɔle zo ɔzonlenle Gyihova nɔhalɛ nu. Kɛzi ɔhilele kɛ ɔdi nɔhalɛ ɛ? Duzu ati a yɛkulo kɛ yɛsukoa Gayɛse neazo ne ɛnɛ a? Kɛzi Dwɔn kɛlata ne bahola aboa yɛ amaa yɛayɛ zɔ ɛ?

Ahenle mɔɔ hɛlɛle Dwɔn Mɔɔ Tɔ Zo Nsa la vɛlɛle ɔ nwo “nrenyia kpanyinli ne.” Yemɔ ala maanle Gayɛse mɔɔ le ɔ ra wɔ nɔhalɛ ne anu la nwunle kɛ ɛzoanvolɛ Dwɔn ɔ. Dwɔn vɛlɛle Gayɛse kɛ ‘kulovolɛ mɔɔ mekulo ye nɔhalɛ nu la.’ Akee Dwɔn hanle kɛ ɔdie ɔdi kɛ Gayɛse te kpɔkɛ kpalɛ kɛmɔ ye sunsum nu gyinlabelɛ ne de la. Nganvolɛ kpalɛ mɔɔ bɛfi ahonle nu bɛfa bɛmaa la boni ɛ!​—3 Dwɔn 1, 2, 4.

Bie a ɛnee Gayɛse le asafo neavolɛ, noko kɛlata ne ɛnga ye fɔɔnwo kɛ ɔle zɔ. Dwɔn hanvole Gayɛse kɛ ɔsonle mediema ne ɛyɛvolɛ, ɔnva nwo kɛ ɔnze bɛ la. Dwɔn bule Gayɛse kɛ ɔdi nɔhalɛ, ɔluakɛ Nyamenle azonvolɛ liele nyɛvolɛ.​—Mɔl. 18:1-8; 1 Tim. 3:2; 3 Dwɔn 5.

Kɛlata mɔɔ Dwɔn hɛlɛle vale hilele mediema mɔɔ Gayɛse zonlenle bɛ ɛyɛvolɛ la anwo anyezɔlɛ la kile kɛ, ɛnee Kilisienema ta tu adenle fi ɛleka mɔɔ Dwɔn wɔ la kɔ asafo ne mɔ anu, na ɔbayɛ kɛ adenduvoma ɛhye mɔ hanle mɔɔ bɛyiale ye la bɛhilele Dwɔn. Ɔbayɛ kɛ, adenle ɛhye azo a, Dwɔn luale dele mɔɔ ɛlɛkɔ zo wɔ asafo ne mɔ anu la anwo edwɛkɛ a.

Ɛnee Kilisienema mɔɔ tu adenle la kulo kɛ bɛsokoɛ bɛ mediema diedima. Ɛnee bɛnga nyɛvolɛ azua nwo edwɛkɛ kpalɛ, bɛnyɛ bɛ gyima kpalɛ, yɛɛ bɛbɔ ɛbɛlatane wɔ ɛkɛ. Ɔti, adenduvoma mɔɔ ze nrɛlɛbɛ la sokoɛ bɛ gɔnwo mɔ, yɛɛ Kilisienema  mɔɔ tu adenle la sokoɛ bɛ mediema Kilisienema.

Dwɔn maanle Gayɛse anwosesebɛ kɛ ɔlie nyɛvolɛ, ɔluakɛ ɛzoanvolɛ ne zele ye kɛ, “gyakyi [adenduvoma ne] adenle kɛ mɔɔ ɔkɛzɔ Nyamenle anye la.” Nyɛvolɛ mɔɔ ɔbagyakyi bɛ adenle la kile kɛ ɔbali bɛ ngyianlɛ nwo gyima na yeamaa bɛ sa aha mɔɔ bɛbahyia nwo wɔ adendulɛ ne anu kɔkpula kɛ bɛbadwu ɛleka mɔɔ bɛlɛkɔ la. Ɔda ali kɛ, kɛ ɛnee Gayɛse yɛ ye nyɛvolɛ la ɛne, ɔluakɛ bɛhanle ɛlɔlɛ nee diedi mɔɔ ɔlɛ la anwo edwɛkɛ bɛhilele Dwɔn.​—3 Dwɔn 3, 6.

Bie a ɛnee nyɛvolɛ ne mɔ le edwɛkpatɛlɛvolɛma, Dwɔn soanvolɛma anzɛɛ neavolɛ adenduvoma. Ɛnee bɛwɔ adendulɛ nu, ɔlua edwɛkpa ne ati. Dwɔn hanle kɛ: “Ye duma nu ti a bɛhɔle a.” (3 Dwɔn 7) Ɛnee Dwɔn ɛha Nyamenle anwo edwɛkɛ dɛba, (nea ngyɛnu 6), ɔti ɔbayɛ kɛ edwɛkɛ, “ye duma nu ti,” gyi ɛkɛ maa Gyihova duma ne. Ɛnee mediema ne mɔ wɔ Kilisiene asafo ne anu, ɔti ɔwɔ kɛ bɛsonle bɛ ɛyɛvolɛ. Ɔti, Dwɔn hɛlɛle kɛ: “Ɔwɔ kɛ yɛsonle menli zɛhae mɔ nyɛvolɛ amaa yɛdayɛ noko yɛayɛ nɔhalɛ ne anwo gyimayɛvoma ne mɔ bie.”​—3 Dwɔn 8.

Dwɔn angɛlɛ Gayɛse kɛlata ne kɛ ɔfa yeala ye ase ala. Ɛnee Dwɔn kulo kɛ ɔboa ye ɔmaa ɔdi ngyegyelɛ kpole bie anwo gyima. Ɛnee Dayɛtelɛfizi mɔɔ wɔ Kilisiene asafo ne anu la ɛngulo kɛ ɔkɛlie Kilisienema mɔɔ wɔ adendulɛ nu la ɛyɛvolɛ. Ɔbɔle mɔdenle bɔbɔ kɛ ɔsi bie mɔ adenle amaa bɛanlie nyɛvolɛ.​—3 Dwɔn 9, 10.

Nɔhalɛ nu, ɛnee Kilisienema mɔɔ bɛdi nɔhalɛ la ɛngulo kɛ bɛ nee Dayɛtelɛfizi badɛnla. Ɛnee ɔkulo kɛ ɔdie duma wɔ asafo ne anu, yeangile ɛbulɛ yeammaa debie biala mɔɔ vi Dwɔn ɛkɛ la, yɛɛ ɛnee ɔkeha ɛzoanvolɛ ne nee awie mɔ anwo edwɛkɛ ɛtane ɛtane. Dwɔn anga kɛ Dayɛtelɛfizi le adalɛ kilehilevolɛ, noko ɔbɔle mɔdenle kɛ ɔko yeatia tumi mɔɔ ɛzoanvolɛ ne mɔ lɛ la. Kɛmɔ ɛnee Dayɛtelɛfizi kulo kɛ ɔdie duma na eza ɔnla subane kpalɛ ali la ati, ɔmaanle ye nɔhalɛlilɛ nwo rale edwɛkɛ. Dayɛtelɛfizi edwɛkɛ ne maa yɛnwu kɛzi awie mɔɔ ɔle anyebolo nee anwomemaazo la kola maa mgbakyemgbakyenu ba asafo ne anu la. Ɛhye ati, Dwɔn zele Gayɛse nee yɛ muala kɛ: ‘Yɛmmasukoa mɔɔ le ɛtane la.’​—3 Dwɔn 11.

Dwɔn hanle kɛ, Kilisienenli Dimiteleɛse yɛle neazo kpalɛ, yeanyɛ kɛ Dayɛtelɛfizi la. “Bɛ muala . . . [bɛli] Dimiteleɛse anwo daselɛ kpalɛ. Nɔhalɛ nu, yɛdayɛ noko yɛlɛdi ɔ nwo daselɛ na bɛze kɛ yɛ daselɛlilɛ ne le nɔhalɛ.” (3 Dwɔn 12) Bie a ɛnee Dimiteleɛse hyia Gayɛse moalɛ, na ɛzoanvolɛ ne hɛlɛle Dwɔn Mɔɔ Tɔ Zo Nsa vale hanvole Dimiteleɛse hilele Gayɛse. Bie a Dimiteleɛse mumua ne a vale kɛlata ne hɔmaanle Gayɛse a. Kɛmɔ Dimiteleɛse boka Dwɔn soanvolɛ ne mɔ anwo, anzɛɛ bie a ɔle neavolɛ adenduvo la ati, ɔnleanle ɔmaanle bɛlile mɔɔ Dwɔn hɛlɛle la azo.

Kɛmɔti a Dwɔn zele Gayɛse kɛ ɔhɔ zo ɔlie nyɛvolɛ wɔ mekɛ mɔɔ ɛnee ɔlɛyɛ zɔ la ɛ? Asoo Dwɔn nwunle kɛ ɔwɔ kɛ ɔboa Gayɛse ɔmaa ye akɛnrasesebɛ ne yɛ kpole ɔ? Asoo ɛnee ɔgyegye ɛzoanvolɛ ne kɛ, kɛ mɔɔ Dayɛtelɛfizi ɛlɛbɔ mɔdenle kɛ ɔbaye Kilisienema mɔɔ bɛdie nyɛvolɛ yeavi asafo ne anu la ati, bie a Gayɛse bagyakyi nyɛvolɛ ɛlielɛ ɔ? Kɛzi ɛnee ɔde ye biala la, Dwɔn maanle Gayɛse anwosesebɛ kɛ: “Awie mɔɔ yɛ kpalɛ la vi Nyamenle.” (3 Dwɔn 11) Ɛhye bɔbɔ ati a ɔwɔ kɛ yɛyɛ kpalɛ mɔɔ yɛngyakyi a.

Asoo Dwɔn kɛlata ne maanle Gayɛse anwosesebɛ kɛ ɔhɔ zo ɔlie nyɛvolɛ? Nɔhalɛ nu, kɛ mɔɔ Dwɔn Mɔɔ Tɔ Zo Nsa boka Baebolo  mbuluku ne mɔ anwo kɛ ɔmaa awie mɔ anwosesebɛ kɛ ‘bɛzukoa mɔɔ le kpalɛ’ la ati, ɔkile kɛ ɔyɛle zɔ.

Yɛnze yɛ diema Gayɛse mɔɔ dɛnlanle aze tete ne la anwo edwɛkɛ dɔɔnwo. Noko, ɛzukoalɛdeɛ dɔɔnwo wɔ ɔ nwo edwɛkɛ ekyii ɛhye anu.

Mɔɔ limoa, wɔ adenle bie azo, nɔhavoma dɔɔnwo mɔɔ vile bɛ ɛhulolɛ nu dule adenle la a boale maanle yɛnwunle nɔhalɛ ne a. Nɔhalɛ nu, tɛ Kilisienema mɔɔ wɔ asafo ne anu ɛnɛ la amuala a edwɛkpa ne ati, bɛtu adenle bɛkɔ moamoa a. Noko kɛmɔ Gayɛse yɛle la, yɛbahola yɛaboa bɛdabɛ mɔɔ edwɛkpa ne ati, bɛyɛ zɔ la, mɔɔ bie a le maangyebakyi zo neavolɛma nee bɛ ye mɔ. Yɛbahola yɛaboa mediema mɔɔ tu kɔ maanle ne anu ɛleka bie anzɛɛ kɔsonle maanle gyɛne zo ɛleka mɔɔ bɛhyia Belemgbunlililɛ nolobɔlɛma dɔɔnwo la. Ɛhye ati, bɛmaa ‘yɛlie nyɛvolɛ dahuu.’​—Wlo. 12:13; 1 Tim. 5:9, 10.

Mɔɔ tɔ zo nwiɔ, saa ɔyɛ na bɛdwazo bɛtia mgbanyima wɔ asafo ne mɔ anu a, ɔnle kɛ ɔsi yɛ nwo. Bɛdwazole bɛtiale tumi mɔɔ Dwɔn nee ɛzoanvolɛ Pɔɔlo lɛ la. (2 Kɔl. 10:7-12; 12:11-13) Yemɔti, saa yɛyia ngyegyelɛ ɛhye bie wɔ asafo ne anu a, kɛzi ɔwɔ kɛ yɛyɛ yɛ nyɛleɛ ɛ? Pɔɔlo dule Timote folɛ kɛ: “Ɔnle kɛ Awulae akɛlɛ ko, ɔwɔ kɛ ɔyɛ bɛtɛɛ ɔmaa menli kɔsɔɔti, ɔkola ɔkilehile, na ɔkomo ɔ nwo zo wɔ mekɛ mɔɔ bɛkɛyɛ ye ɛtane la, ɔfa bɛtɛɛyɛlɛ ɔkilehile atuadelɛma.” Saa bɛka yɛ ɛya bɔbɔ na yɛsie yɛ nwo dii a, ɔbamaa menli mɔɔ bɛ subane ɛnle kpalɛ la ahakyi bɛ nyɛleɛ ngyikyingyikyi. Gyihova noko ‘bamaa bɛanlu bɛ nwo na bɛanyia nɔhalɛ ne anwo nɔhalɛ ndelebɛbo.’​—2 Tim. 2:24, 25.

Mɔɔ tɔ zo nsa, ɔwɔ kɛ yɛkanvo yɛ mediema Kilisienema mɔɔ bɛsonle Gyihova nɔhalɛ nu ɔnva nwo kɛ bɛdwazo bɛtia bɛ nɔhalɛlilɛ ne la. Ɛzoanvolɛ Dwɔn maanle Gayɛse anwosesebɛ, na ɔmaanle ɔnwunle kɛ ɔlɛyɛ mɔɔ le kpalɛ la. Ɛnɛ noko, ɔwɔ kɛ mgbanyima sukoa Dwɔn neazo ne, na bɛmaa bɛ mediema anwosesebɛ amaa ‘bɛ nye zo ambulu bɛ.’​—Aye. 40:31; 1 Tɛs. 5:11.

Giliki edwɛkɛ agbɔkɛ 219 a wɔ ɛzoanvolɛ Dwɔn kɛlata mɔɔ ɔhɛlɛle Gayɛse la anu a, yemɔ a ɔle Baebolo buluku mɔɔ le ezinraa kpalɛ a. Noko ɔsonle bolɛ kpole ɔmaa Kilisienema ɛnɛ.